ಕಾಸ್ರೋಡ್ ಸುದ್ದಿ | Kasargod News

ಕೊಡ್ಲಮೊಗರು ಶ್ರೀ ಮಲರಾಯ ಬೊಕ್ಕ ಪರಿವಾರ ದೈವದ ಕ್ಷೇತ್ರ “ಕೆಡ್ಡಸ” ಜಾತ್ರಾ ಮಹೋತ್ಸವ ಸಂಪನ್ನ

ಮಂಜೇಶ್ವರ:- “ಕೆಡ್ಡಸ ಜಾತ್ರೆ” ಪಂದ್ ಪುಗಾರ್ತೆ ಪಡೆಯಿನ ಕೊಡ್ಲಮೊಗರು ಶ್ರೀ ಮಲರಾಯ ದೈವಸ್ಥಾನಡ್ ಈ ಸಲದ ವಾರ್ಷಿಕ ಕೆಡ್ಡಸ ಜಾತ್ರಾ ಮಹೋತ್ಸವವು ಪಾರಂಪರ್ಯದ ಪ್ರಕಾರ ಕೋಡೆ ನಡತುಂಡು.

ಸಾರ ಊರ – ಪರವೂರ ಭಕ್ತಾದಿಲು ಉತ್ಸವಡ್ ಪಾಲ್ ಪಡೆದ್ ಶ್ರೀ ದೈವದ ಅನುಗ್ರಹ ದೆತೊoಡೆರ್. ಕೋವಿಡ್ ನಿಯಮದ ಪ್ರಕಾರ ಲೇಸ್ ನಡತುಂಡು.

ಬುಧಾರ ರಾತ್ರಿ ಭಂಡಾರ ಏರಿ ಉತ್ಸವಗ್ ಮುಗಿತಲದ ಚುಕ್ಕಿ ದೀಯೆರ್ .
ಕೋಡೆ ಕಾಂಡೆ ಶ್ರೀ ಮಲರಾಯ ಬೊಕ್ಕ ಪರಿವಾರ ದೈವದ ನೇಮೋತ್ಸವ ನಡತುಂಡು. ಅಂಚನೇ ಮಧ್ಯಾಹ್ನ ಅನ್ನಸಂತರ್ಪಣೆ,ರಾತ್ರಿ ದೈವಗಳ ಒಲಸರಿ ಬಂಡಿ ಉತ್ಸವ ನಡತುಂಡು.

ಚಿತ್ರ ಕೃಪೆ :- ಮನೋಜ್ ಕುಮಾರ್ ಶೆಟ್ಟಿ ಕೊಡ್ಲಮೊಗರು.

ಕಾಂಚೋಡು ಶ್ರೀ ಮಂಜುನಾಥೇಶ್ವರ ದೇವಾಲಯ ತುಲು ಲಿಪಿ ಪುದರ್ ಪಲವೆ ಉದಿಪನ

ತುಲುನ್ 8 ನೇ ಪರಿಚ್ಛೇದಗ್ ಸೇರ್ಸಾವೊಡ್, ತುಲು ರಾಜ್ಯದ ಅಧಿಕೃತ ಬಾಸೆ ಆವೊಡು ಉಂದು ತುಲುವೆರೆನ ಮಲ್ಲ ಕನ, ಅಯಿಕ್ಕಾದ್ ತುಲುವೆರ್ ಪೊರ್ಂಬಾಟ ಮಲ್ತೊಂದ್ ಉಲ್ಲೆರ್, ಈ ಬೇಲೆದ ನಡುಟ್ ತುಲು ಲಿಪಿತ ಬುಲೆಚ್ಚಿಲ್‌ಗ್‌ಲ ಬೆನೊಂದುಲ್ಲೆರ್. ಅಯಿಕ್ಕಾದ್ ಪ್ರತಿ ಊರುಡ್ ತುಲು ಲಿಪಿ ಕಲ್ಪುನ ಕಜ್ಜ ಕೊಟ್ಯ ನಡತೊಂದುಂಡು, ಅಲ್ಲಲ್ಲ್ ತುಲು ಲಿಪಿತ ಪುದರ್ ಪಲವೆ ಪಾಡೊಂದುಲ್ಲೆರ್, ಉಂದೆಕ್ ಬೆರಿಸಾಯವಾದ್ ಸುಳ್ಯ ತಾಲೂಕುದ ಬಾಳಿಲ ಗ್ರಾಮೊದ ಕಾಂಚೋಡು ಶ್ರೀ ಮಂಜುನಾಥೇಶ್ವರ ದೇಲಂತಡೆದ ತುಲು ಲಿಪಿತ ಪುದರ್ ಪಲವೆನ್ ಪಾಜಪಳ್ಳಡ್ ಶ್ರೀ ಕ್ಷೇತ್ರೊದ ಪ್ರತಿಷ್ಠಾ ವರ್ಸೊಚ್ಚಯದ ಸಂದರ್ಭೊಡು ತೇದಿ ಪೊನ್ನಿ 28 ಪೋಪುನಾನಿ 11-02-2021 ಗುರ್ವಾರೊ ಕಾಂಚೋಡು ಶ್ರೀ ಮಂಜುನಾಥೇಶ್ವರ ದೇಲಂತಡೆದ ಧರ್ಮದರ್ಶಿಲಾಯಿನ ಶ್ರೀ ಪರಮೇಶ್ವರಯ್ಯ ಕಾಂಚೋಡು ಉದಿಪನ ಮಲ್ದೆರ್. ಶ್ರೀ ಮಹಾವಿಷ್ಣು ಸಿಂಗಾರಿ ಮೇಳ ಬಾಳಿಲ-ಮುಪ್ಪೇರ್ಯದ ಚೆಂಡೆ ವಾದನದ ಒಟ್ಟುಗ್ ಉದಿಪನ ಪೊರ್ಲುಡ್ ನಡತ್ಂಡ್. ಶ್ರೀ ಕ್ಷೇತ್ರೊದ ಜಾತ್ರೆ ಫೆಬ್ರವರಿ 11 ರ್ದ್ 14 ಗ್ ಮುಟ್ಟ ವರ್ಸೊಲ ನಡಪುಂಡು. ಈ ಸಂದರ್ಭೊಡು ದೇಲಂತಡೆದ ಜಾತ್ರೆಗ್ ಪುದೆನ್ (ಹಸಿರು ಕಾಣಿಕೆ) ಮೆರವಣಿಗೆಡ್ ಕೊನೊದ್ ದೇವೆರೆಗ್ ಸಂದಾಯೊ ಮಲ್ದೆರ್.

ಈ ಲೇಸ್‌ಡ್ ತುಲು ಲಿಪಿ ಕಲ್ಪಾದಿ (ಶಿಕ್ಷಕೆರ್) ಜಗದೀಶ ಗೌಡ ಕಲ್ಕಳ, ಜಾತ್ರೊಚ್ಚಯ ಸಮಿತಿದ ಗುರ್ಕಾರ್ಲು ಗಂಗಾಧರ ಮುಪ್ಪೇರ್ಯ, ಸುಳ್ಯ ತಾಲೂಕು ಪಂಚಾಯತ್ ಪದುಕೆದಿ ಜಾಹ್ನವಿ ಕಾಂಚೋಡು, ಬಾಳಿಲ ಗ್ರಾಮ ಪಂಚಾಯತ್ ಪದುಕೆರ್ ರವೀಂದ್ರ ರೈ, ಅಂಚೆನೇ ಸತ್ಯನಾರಾಯಣ, ಗೋವಿಂದ ಭಟ್, ಮಹಾಬಲೇಶ್ವರಯ್ಯ, ನಾರಾಯಣ ಭಟ್, ಶ್ರೀನಾಥ್ ರೈ ದೊಳ್ತೋಡಿ, ವಸಂತ ಗೌಡ ಕಾಯಾರ, ಕೌಶಿಕ್ ಗೌಡ ಕೊಡಪಾಲ, ಒತ್ತು ಪಾಲ್‌ಡಿತ್ತೆರ್. ಅಂಚೆನೇ ಈ ಲೇಸ್‌ಡ್ ಊರ ಪರವೂರುದ ಜನಕುಲ್ ಪಾಲ್ ಪಡೆದಿತ್ತೆರ್.

ಜೈ‌ ತುಲುನಾಡ್ (ರಿ.) ಕಾಸರಗೋಡು ಸಂಘಟನೆ ವತಿರ್ದ್ “ಕೆಡ್ಡಸ ಪರ್ಬೊ”

ಮಂಜೇಶ್ವರ ಫೆಬ್ರವರಿ 12 :- ತುಳುನಾಡ್ ದ ಜನಕುಲು ಕೆಡ್ಡಸ ಪರ್ಬನ್ ಪರಂಪರೆದ ಪ್ರಕಾರ ಆಚರಣೆ ಮಲ್ತೊಂದು ಬೈದೆರ್ . ಭೂಮಿ ಅಪ್ಪೆ ಮೈನೆರೆದ್ ಫಲವಂತಿಕೆಗ್ ಅಪ್ಪೆ ಆದುಪ್ಪುನವೇ ನೆಕ್ಕ್ ಕಾರಣ ಉಂದೆನ್ ತುಳುನಾಡ್ ದ ಮಾತಾ ಜನಕುಲು ಗೇನೊಡು ದೀಯೊಂದು ನನ ದುಂಬುದ ಪೀಳಿಗೆಗ್ ಈ ಆಚರಣೆನ್ ಒರಿಪಾದ್ ಅಕ್ಲೆಗ್ ತೆರಿಪಾವುನಂಚಿನ ಬೇಲೆ ನಮ ಮಲ್ಪೊಡು ಪಂದ್ ಜೈ‌ ತುಲುನಾಡ್ (ರಿ.)ಕೇಂದ್ರ ಸಮಿತಿದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್ ಪಂಡೆರ್ .

ಮೇರ್ ತುಳು ಭಾಷೆ ಬೊಕ್ಕ ಪಿರಾಕ್ ದ ಆಚಾರ -ಇಚಾರ ಲೆನ್ ಇತ್ತೆದ ಪೀಳಿಗೆಗ್ ಒರಿಪಾವುನ ನೆಲೆಟ್ಟ್ ಜೈ ತುಳುನಾಡು (ರಿ.) ಕಾಸರಗೋಡು ಸಂಘಟನೆದ ಒಟ್ಟು ಸೇರಿಗೆಡ್ ಕುಂಬಳೆದ ಕಳತ್ತೂರುಡುಪ್ಪುನ “ಶ್ರೀ ಲಲಿತಾಂಬ” ನಿವಾಸದ ಸಭಾಂಗಣಡ್ ಕೋಡೆ ಬೈಯ್ಯ ನಡತಿನ “ತುಳುನಾಡ ಕೆಡ್ಡಸ ಪರ್ಬೊ” ಲೇಸ್ ಡ್ ತುಡರ್ ಅರ್ಲಾದ್ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಲೇಸ್ ಗುರ್ಕಾರ್ಮೆನ್ ಕೇರಳ ತುಳು ಅಕಾಡೆಮಿದ ಗುರ್ಕಾರ್ಲಾಯಿನ ಉಮೇಶ್ ಸಾಲ್ಯಾನ್ ಕಾಸರಗೋಡು ವಯಿಸ್ದಿತ್ತೆರ್ .ಮತ್ತರ್ಮೆಡ್ ಮಂಚಿಕೊಳ್ನಾಡ್ ಸರಕಾರಿ ಪ್ರೌಢಶಾಲೆದ ಸಹಶಿಕ್ಷಕರಾಯಿನ ಶ್ರೀಮತಿ ವಿಜಯಲಕ್ಷ್ಮಿ ಕಟೀಲು ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.ತುಳು ಸಂಶೋಧಕಿ, ಕಾದಂಬರಿಗಾರ್ತಿ ಶ್ರೀಮತಿ ರಾಜಶ್ರೀ ಟಿ. ರೈ ಪೆರ್ಲ, ಬಂಬ್ರಾಣ ಯಜಮಾನ ಬಂಬ್ರಾಣ ಮೋಹನ್ ದಾಸ್ ರೈ, ಕುಂಬಳೆ ಗ್ರಾಮ ಪಂಚಾಯತ್ ಸದಸ್ಯೆ ಶ್ರೀಮತಿ ಪುಷ್ಪಲತಾ ಪಿ. ಶೆಟ್ಟಿ ಪಾಲ್ ಪಡೆದ್ ಎಡ್ಡೆಪ್ಪುದ ನುಡಿ ಪಂಡೆರ್ .

ಜೈ ತುಳುನಾಡ್ ದ ತುಳು ವಿಕಿಪಿಡಿಯಾದ ಸಂಪಾದಕಿ ಶ್ರೀಮತಿ ವಿನೋದ್ ಪ್ರಸಾದ ರೈ ಕಾರಿಂಜ ಕೆಡ್ಡಸದ ಬಗ್ಗೆ ಮಾಹಿತಿ ಕೊರಿಯೆರ್ . ಕು. ವೃದ್ಧಿ ಆಳ್ವ ಕಳತ್ತೂರು ತುಳು ಭಕ್ತಿಗೀತೆ ಪಂಡೆರ್ , ಜೈ ತುಳುನಾಡು (ರಿ.) ಕಾಸರಗೋಡು ಸಂಘಟನೆದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ಎದುಕೊಂಡೆರ್ ,
ಜತೆ ಕಾರ್ಯದರ್ಶಿ ಶ್ರೀನಿವಾಸ ಆಳ್ವ ಕಳತ್ತೂರು ಲೇಸ್ ದ ನಿರೂಪಣೆ ಮಲ್ತೆರ್,
ಸಂಘಟನಾ ಕಾರ್ಯದರ್ಶಿ ಯಜ್ಞೆಶ್ ಕಿಳಿ0ಗಾರ್ ಸೊಲ್ಮೆ ಸಂದೈತ ಮಲ್ತೆರ್..ಕೆಡ್ಡಸ ಪಂಡ ಮೂಜಿ ದಿನ ಭೂಮಿ ಅಪ್ಪೆ ಋತುಮತಿಯಾಪಿನ ದಿನ.
ಭೂಮಿ ಅಪ್ಪೆಗೆ ಋತುಸ್ತ್ರಾವ ಆನಗ ತುಳುನಾಡ್ ದ ಪಿರಾಕ್ ದ ಪೆರಿಯೆರ್ ಪಾರಂಪರಿಕವಾದ್ ಕೆಡ್ಡಸನ್ ಎಂಚ ಆಚರಣೆ ಮಲ್ಪುವೆರ್ ಪನ್ಪಿನೆನ್ ಪ್ರಾತ್ಯಕ್ಷಿಕೆ ಮುಖೇನ ಶ್ರೀನಿವಾಸ ಆಳ್ವ ಮೆರ್ನ ಇಲ್ಲದಕುಲು ತೆರಿಪಾಯೆರ್.