ಮಂಜೇಶ್ವರ : ಕುಲಾಲ ಶ್ರೀ ಸಾಹಿತ್ಯ ಕಲಾ ಸಂಪದ ಕುಡ್ಲ ನೆತ್ತ ಮಹೇಶ್ ಕುಲಾಲ್ ಅರ್ತಿಮೂಲೆ ಮೆರೆನ ಮುತಾಲಿಕೆಡ್ “ತುಲುನಾಡ ಮೂಲ್ಯ -ಕುಲಾಲೆರ್ನ ಅಳಿಯ ಸಂತಾನ ಕಟ್ಟ್ದ ಅಳಿದ್ ಪೋಪುನ ಮೂಲ ಕಟ್ಟ್ -ಕಟ್ಟಳೆದ ತುಲಿಪು ಲೇಸ್ ಕಾರ್ತೆಲ್ ಪದಿಮೂಜಿ ಪೋಪಿನ ಐತಾರ(ಜೂನ್ 28 ತಾನಿ,) ಕಾಸ್ರೋಡು ಜಿಲ್ಲಾ ಕುಲಾಲ ಸಂಘ (ರಿ), ಮಂಜೇಶ್ವರದ ಒತ್ತು ಸೇರಿಗೆ ಡ್ ಜಿಲ್ಲಾ ಕುಲಾಲ ಸಮುದಾಯ ಭವನ, ತೂಮಿನಾಡುಡ್, ಸಂಘದ ಗುರ್ಕಾರ್ಲು ರವೀಂದ್ರ ಮುನ್ನಿಪ್ಪಾಡಿ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಈ ಲೇಸ್ನ್ ಬಾಲಕೃಷ್ಣ ದೀಕ್ಷಾ ತುಡರ್ ಅರ್ಲಾದ್ ಉದಿಪನ ಮಂತೆರ್. ಅತ್ತಂದೆ ಕುಲಾಲ ಸಮಾಜದ ಮಾನಾದಿಗೆದ ಬಿನ್ನೆರ್ನಕುಲು ಜತೆ ಕೊರ್ಯೆರ್.
ಕುಲಾಲ ಮೂಲ್ಯೆರೆಡ ಪಿರಾಕ್ರ್ದ್ ನಡತೊಂದು ಬೈದಿನ ಅಳಿಯ ಸಂತಾನದ ಕಟ್ಟ್ -ಕಟ್ಟಳೆ ಅವು ಇತ್ತೆದ ಆಧುನೀಕರಣದ ಒಯ್ಲ್ಗ್ ತಿಕ್ಕ್ದ್ ಅಳಿದ್ ಪೋವೊಂದುಪ್ಪುನಗ ಅಯಿನ್ ದಾಖಲೀಕರಣ ಮಂತ್ದ್ ಒರಿಪುನ ಅಗತ್ಯ ಉಂಡು.ಅಂಚಿನ ಬೇಲೆಗ್ ಜಯಿದಿನ ಮಹೇಶ್ ಅರ್ತಿಮೂಲೆ ಅರೆನ ಬೇಲೆಗ್ ಸಮಾಜ ಬಾಂಧವೆರ್ ಬೆರಿತಾಂಗ್ ಕೊರೊಡು,ಪಂಡ್ದ್ ಬತ್ತಿ ಬಿನ್ನೆರ್ ಪಂಡೆರ್.
ಈ ಪೊರ್ತುಡು ತುಲುನಾಡೊರ್ಮೆ ಇತ್ತಿನ ಮೂಲ್ಯೆರೆನ ಗುತ್ತು, ಗತ್ತ್ದ ಪೊಲಬು ಕೊರ್ಪುನ ತುಳುನಾಡ ಮೂಲ್ಯೆರ್ ಪನ್ಪಿನ ಮಹಾ ಸಂಪುಟ ಮಂತೊಂದುಪ್ಪುನ ಮಹೇಶ್ ಅರ್ತಿಮೂಲೆ ಬೊಕ ರೆಡ್ ಕ್ರಾಸ್ ಸಂಸ್ಥೆರ್ದ್ ಅತೀಮೀರ ನೆತ್ತೆರ್ ದಾನ ಮಂತಿನಕ್ಲೆಗ್ ಸಿಕ್ಕುನ ಮಾನಾದಿಗೆ ಪಡೆಯೊನಿನ ಸುಧೀರ್ ರಂಜನ್ ದೈಗೋಳಿ ಮೆರೆಗ್ಲಾ ಸಂಘದ ಪರವಾದ್ ಸಮ್ಮನ ಪಾಡಿಯೆರ್.
ಅಯಿರ್ದ್ ಬೊಕ್ಕ ನಡತಿನ ತುಲಿಪುಡು ಕುಲಾಲ ಸಮಾಜದ ಹಿರಿಯ,ಕಿರಿಯ ಬಂಧುಲು ಕುಲಾಲ ಮೂಲ್ಯೆರೆನ ಅಳಿಯ ಸಂತಾನ ದ ಕಟ್ಟ್ ಕಟ್ಟಳೆದ ಬಗೆಟ್ ಪುಟ್ಟುರ್ದು ಸಾವು ಮುಟ್ಟದ ಆಚೆರಿಪುದ ಅನುಭವಲೆನ್ ಪಟ್ಟೊಂಡೆರ್.ಅಂಚೆನೆ ಅಯಿತ ದಾಖಲೀಕರಣಲಾ ನಡತ್ಂಡ್.
ಈ ಲೇಸ್ ಕು.ರಶ್ಮಿತಾ ಬೊಕ ಕೂಟದಕ್ಲೆನ ದೇವೆರೆ ಸುಗಿಪುದೊಟ್ಟಿಗೆ ಸುರುವಾಂಡ್. ಮಹೇಶ್ ಅರ್ತಿಮೂಲೆ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್, ಸುಧೀರ್ ರಂಜನ್ ಸೊಲ್ಮೆ ಸಂದೈತ ಮಂತೆರ್. ರವೀಂದ್ರ ವರ್ಕಾಡಿ ಲೇಸ್ ಸುದಾರಿಕೆ ಮಂತೆರ್. ಕಾಸ್ರೋಡು ಕುಲಾಲ ಸಂಘದ ಪದುಕೆರ್ ಸಹಾಯ ಮಂತೆರ್.ಕಾಂಡೆದ ಫಲಾರ, ಮಧ್ಯಾಹ್ನದ ಒನಸ್,ಬಯ್ಯದ ಚಾ ತೆನಸ್ದೊಟ್ಟಿಗೆ ತುಲಿಪು ಮಂಜೇಶ್ವರಡ್ ತೊಡಗ್ದ್ ದುಂಬಗ್ ಜುಲಾಯಿ 26 ಕ್ ಬಿ.ಸಿ.ರೋಡು ಕುಲಾಲ ಭವನ ಪೊಸಳ್ಳಿ, ಅಗಸ್ಟ್ 30 ಗ್ ಪೆರ್ಡೂರು ಕುಲಾಲ ಭವನ ಪೆರ್ಡೂರುಡು ದುಂಬು ಪೋಪುಂಡುಂದುಲಾ, 04-11-2026 ಯಾನಿ ಕುಡ್ಲದ ಪುರಭವನ ಡ್ ತುಳುನಾಡ ಮೂಲ್ಯೆರ್ ಮಹಾ ಸಂಪುಟದ ಬುಡುಗಡೆ ನಡಪೆರುಂಡೂಂದು ತೆರಿಪಾಯೆರ್.