ಕಾರ್ಲದ ಸುದ್ದಿ Karkala News

ಪರಶುರಾಮ ಥೀಮ್ ಪಾರ್ಕ್‌ ಬಂದ್

ಕಾರ್ಲ ತಾಲೂಕುದ ಯರ್ಲಪಾಡಿ ಗ್ರಾಮ ಪಂಚಾಯತ್ ವ್ಯಾಪ್ತಿದ ಪರಶುರಾಮ ಥೀಮ್ ಪಾರ್ಕ್ ಗ್ ನವೆಂಬರ್ ಅಕೇರಿ ಮುಟ್ಟ ಪ್ರವಾಸಿಗೆರೆಗ್ ಪ್ರವೇಶ ಬಂದ್ ಮಲ್ದೆರ್.

2023 ಜನವರಿ 27ಕ್ಕ್ ಉದಿಪನ ಆದಿತ್ತಿನ ಪರುಶುರಾಮ ಥೀಮ್ ಪಾರ್ಕ್ ವೀಕ್ಷಣೆಗ್ ಪ್ರವಾಸಿಗೆರೆಗ್ ಅವಕಾಶ ಮಲ್ತ್ ಕೊರ್ದಿತ್ತೆರ್.

ಆಂಡ ಈ ಥೀಮ್ ಪಾರ್ಕ್‌ದ ಪರಶುರಾಮ ಮೂರ್ತಿನ್ ಗಟ್ಟಿ ಮಲ್ಪರೆ, ಮೂರ್ತಿಗ್ ತೆಡಿಲ್ ನಿರೋಧಕ ಪಾಡರೆ, ಮೂರ್ತಿ ಮಣ್ಣ್ ಪತ್ತಂದಿಲೆಕ ಲೇಪ ಪಾಡರೆ ಇಂಚ ಬೇತೆ ಬೇತೆ ಬಾಕಿ ಬೇಲೆ ಮಲ್ಪರೆ ನಿರ್ಮಿತಿ ಕೇಂದ್ರದಕುಲು ಕಾಲಾವಕಾಶ ಕೇಂಡಿನೆಕ್ಕ್ ಅ.9ರ್ದ್ ನವೆಂಬರ್ ಅಕೇರಿ ಮುಟ್ಟ ಸಾರ್ವಜನಿಕೆರ್ನ ಬೊಕ್ಕ ಪ್ರವಾಸಿಗೆರ್ನ ಭೇಟಿ ಮಲ್ಪುನೆನ್ ನಿಷೇಧ ಮಲ್ತ್ ದೆರ್.

ಹಿಂದೂ ಧಾರ್ಮಿಕ ಕಟ್ಟೆಡ್ ಇಸ್ಲಾಂ ಧ್ವಜ…!!

ಕುಡ್ಲ: ಬೆದ್ರ ತಾಲೂಕುದ ಪುಚ್ಚೆಮುಗೇರು ಗ್ರಾಮಡ್ ಹಿಂದೂ ಧಾರ್ಮಿಕ ಕಟ್ಟೆಡ್ ಇಸ್ಲಾಂ ಧ್ವಜ ದೀನ ಘಟನೆ ನಡತ್‌ಂಡ್.‌ ವಿಷಯ ತೆರಿನಂಚೆನೆ ಜಾಗೆಗ್‌ ಬತ್ತಿನ ಬೆದ್ರ ಪೊಲೀಸೆರ್ ಧ್ವಜನ್ ತೆರವು ಮಲ್ತ್‌ದೆರ್. ಈ ಪೊರ್ತುಗು ಸರ್ಕಲ್ ಇನ್ಸ್‌ಪೆಕ್ಟರ್ ಸಂದೇಶ್​ ಪಂಚಾಯತ್ ಅನುಮತಿ ದೆತೊನಂದೆ ಪಾಡಿನ ಧ್ವಜ ಉಂದು. ಈ ಬಗ್ಗೆ ಪೊಲೀಸೆರ್ನ ಗಮನಗ್ ತೆರಿಪಾವಂದೆ ಇತ್ತಿನೆಕ್ಕ್ ಪಿಡಿಒ ಅರೆಗ್ ತರಾಟೆಗ್ ದೆತೊಂದೆರ್. ಪಿಡಿಒ ಕರ್ತವ್ಯದ ಬಗ್ಗೆ ಎಚ್ಚರಿಕೆ ಕೊರ್ದು, ನಿಕ್ಲೆನ ಮಿತ್ತ್ ಕೇಸ್‌ ಪಾಡುವೆ ಪಂದ್‌ ಎಚ್ಚರಿಕೆ ಕೊರ್ತೆರ್.

ಕಾರ್ಲ : 45ನೇ ಶಾರದಾ ಪೂಜಾ ಉತ್ಸವ

ಕಾರ್ಲ : ಕಾರ್ಲ ಶ್ರೀ ಶಾರದಾ ಪೂಜಾ ಸಮಿತಿ ಬೊಕ್ಕ ಮಂಜುನಾಥ ಪೈ ಸಾಂಸ್ಕೃತಿಕ ಫೌಂಡೇಶನ್ ಮುತಾಲಿಕೆಡ್‌ ನಡಪುನ 45ನೇ ಶಾರದಾ ಪೂಜಾ ಉತ್ಸವದ ಅಂಗವಾದ್ ಕಾರ್ಲ ತಾಲೂಕು ಮಟ್ಟದ ಭಾರತ ಕ್ವಿಜ್ – 2023 ಪಂತೊ ನಡಪೆರೆ ಉಂಡು. ಅ. 21 ದಾನಿ ಮದ್ಯಾಹ್ನ 2 ಗಂಟೆಗ್ ಶಾರದಾ ಉತ್ಸವದ ಚಾವಡಿಡ್ ಈ ಪಂತೋ ನಡಪೆರೆ ಉಂಡು.

6-10ನೇ ತರಗತಿಯ ಕಲ್ಪಾರ್ಥಿಲೆಗ್ ಈ ಸ್ಪರ್ಧೆಗ್ ಅವಕಾಶ ಉಂಡು. ಬೊಕ್ಕ ರಡ್ಡ್ ಕಲ್ಪಾರ್ಥಿಲು ಒಂಜಿ ತಂಡ ಆದ್ ಈ ಪಂತೊಡ್‌ ಪಾಲ್‌ ಪಡೆಯೆರೆ ಅವಕಾಶ ಉಂಡು. ಭಾರತೀಯ ಸಂಸ್ಕೃತಿ, ಕಲೆ, ಹಿಂದೂ ಧರ್ಮದ ಆಚರಣೆ, ಸ್ವಾತಂತ್ರ್ಯ ಹೋರಾಟ, ಭಾರತದ ಇತಿಹಾಸ, ದಾಸ ಸಾಹಿತ್ಯ ಬೊಕ್ಕ ಪ್ರದರ್ಶನ ಕಲೆತ್ತ ಮಿತ್ತ್ ಪ್ರಶ್ನೆಲು ಇಪ್ಪುಂಡು. ಸುರುಕು ಲಿಖಿತವಾದ್‌ ಬೊಕ್ಕ ಆಯ್ಕೆಯಾಯಿನ ಆಜಿ ತಂಡಲೆಗ್ ವೇದಿಕೆಡ್ ಈ ಸ್ಪರ್ಧೆ ನಡಪೆರೆ ಉಂಡು. ವಿಜೇತ ಕಲ್ಪಾರ್ಥಿಲೆಗ್ ನಗದು ಬಹುಮಾನ, ಪ್ರಶಸ್ತಿ ಪತ್ರ ಬೊಕ್ಕ ಟ್ರೋಫಿಲೆನ್ ಸಮಿತಿದ ವತಿರ್ದ್‌ ಕೊರ್ಪ ಪಂದ್ ಸಮಿತಿ ಪ್ರಕಟಣೆಡ್‌ ತೆರಿಪಾದುಂಡ್.

ಕಲ್ಪಾರ್ಥಿಲು ಅಕ್ಟೋಬರ್ 20 ರ್ದ್‌ ದುಂಬು ಶಾರದೋತ್ಸವದ ಕಚೇರಿಡ್‌ ಅತ್ತ್‌ಂಡ 9742384423, 9481511177 ಮೊಬೈಲ್‌ಗ್‌ ಕಾಲ್‌ ಮಲ್ತ್‌ ನೋಂದಣಿ ಮಲ್ತೊನೊಲಿ.

ಅ.19-21 : ಮೂಲ್ಕಿಡ್ 25ನೇ ವರ್ಷದ ಸಾರ್ವಜನಿಕ ಶ್ರೀ ಶಾರದಾ ಮಹೋತ್ಸವ

ಮೂಲ್ಕಿ: ಹಿಂದೂ ಯುವಸೇನೆ ಬೊಕ್ಕ ಮಹಿಳಾ ಮಂಡಳಿ ಮೂಲ್ಕಿ ಘಟಕದ ಮುತಾಲಿಕೆಡ್‌ 25ನೇ ವರ್ಷದ ಸಾರ್ವಜನಿಕ ಶ್ರೀ ಶಾರದೋತ್ಸವ ಅ.19 ರ್ದ್‌ 21 ಮುಟ್ಟ ಮೂಲ್ಕಿ ಪುನರೂರು ಕಾಂಪ್ಲೆಕ್ಸ್‌ದ ಕೈತಲ್‌ ದ ಶಿವಾಜಿ ಮಂಟಪಡ್ ನಡಪರೆ ಉಂಡು.

ಅ.19 ದಾನಿ ಕಾಂಡೆ ಗಣಹೋಮ, ಶಾರದಾ ಮಾತೆನ ಪ್ರತಿಷ್ಟೆ, ಬಯ್ಯಗ್‌ ರಾಜ್ಯಪ್ರಶಸ್ತಿ ಪುರಸ್ಕೃತ ನಾಗಸ್ವರ ವಾದನ ನಾಗೇಶ್‌ ಎ ಬಪ್ಪನಾಡು ಮೇರೆಗ್‌ ಮಾನಾದಿಗೆ ನಡಪೆರೆ ಉಂಡು. ಬಯ್ಯ ೭.೩೦ ಕ್ಕ್‌ ಸಾಂಸ್ಕೃತಿಕ ಕಾರ್ಯಕ್ರಮ, ಅಂಚನೆ ಪುದರ್‌ ದೀದಾಂಡ್‌ ತುಳು ಹಾಸ್ಯಮಯ ನಾಟಕ ನಡಪೆರೆ ಉಂಡು.

ಅ.20 ದಾನಿ ಸರಸ್ವತಿ ಯಾಗ, ಭಜನೆ, ಬೇತೆ ಬೇತೆ ಆಟೋಟ ಸ್ಪರ್ಧೆಲು ಅಂಚನೆ ಧಾರ್ಮಿಕ ಸಭೆ ನಡಪರೆ ಉಂಡು. ನಿವೃತ್ತ ಯೋಧೆರ್ ನಾರಾಯಣ ರೈ ಬೊಕ್ಕ ರೋಹಿತ್‌ ಕುಲಾಲ್‌ ಕಿಲ್ಪಾಡಿ ಮೊಕ್ಲೆಗ್‌ ಈ ಪೊರ್ತುಡು ಮಾನಾದಿಗೆ ನಡಪರೆ ಉಂಡು. ಬಯ್ಯಗ್‌ 5 ಗಂಟೆಗ್‌ ಸಮೂಹ ನೃತ್ಯ ಪಂತೋ ನಡಪರೆ ಉಂಡು. ಅ.21 ದಾನಿ ಭಜನೆ, ಮಹಾಪೂಜೆ, ಮುಗಿತಲದ ಲೇಸ್‌ ಆದ್‌ ಬಯ್ಯ 4 ಗಂಟೆಗ್‌ ಲಕ್ಕಿಡಿಪ್‌ ಡ್ರಾ, 4.30 ಕ್ಕ್‌ ವಿಸರ್ಜನಾ ಪೂಜೆ ಆದ್‌ ಶಾರದಾ ದೇವಿನ ಭವ್ಯ ಶೋಭಾಯಾತ್ರೆ ನಡಪರೆ ಉಂಡು.