ಉಡುಪಿದ ಸುದ್ದಿ | Udupi News

ದೈವಾರಾಧನೆಡ್ ಬಿರುವೆರ್ನ ಬೇಲೆ ಮುಖ್ಯವಾಯಿನವು : ತಮ್ಮಣ್ಣ ಶೆಟ್ಟಿ

ಪಡ್ಡೆದ್ರ: ಮಿತ್ತಜಾತಿ ತಿರ್ತ ಜಾತಿದ ಅಸ್ಪೃಶ್ಯತೆ ಜಾಸ್ತಿ ಅಯಿನ ಕೇರಳನ್ ಬದಲಾವಣೆ ಮಲ್ತಿನ ಹರಿಕಾರೆರ್ ಬ್ರಹ್ಮಶ್ರೀ ನಾರಾಯಣಗುರುಕುಲೆನ ಪಾತ್ರ ನೆಂಪು ದೀಪುನವು. ಪ್ರಯೋಗ, ಪ್ರತಿಷ್ಠೆ ಪ್ರವೇಶ ಇಂಚ ಇಸೇಸ ತತ್ವಲೆನ್ ಪ್ರತಿಪಾದಿಸಾಯಿನರ್. ಜಗತ್ತ್ ದ ರಡ್ಡನೇ ಬೊಕ್ಕ ಏಷ್ಯದ ಸುರುತ ಸರ್ವಧರ್ಮ ಸಮ್ಮೇಳನದ, ಆಯೋಜನೆದ ಪುಗರ್ತೆನ್ ಪಡೆತಿನಾರ್ ಪಂದ್ ಶಂಭುಗ ಮಾಣಿಕ್ಯ ಬೂಡುದಾರ್, ಕನ್ನಡ ಚಿತ್ರೋದ್ಯಮದ ನಟೆ ನಿರ್ಮಾಪಕೆರ್ ತಮ್ಮಣ್ಣ ಶೆಟ್ರ್ ಪಂಡೆರ್.

ಆರ್ ಪಡ್ಡೆದ್ರ ಬಿರ್ವೆರೆ ಸಮಾಜ ಸೇವಾ ಸಂಘ ಬೊಕ್ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಯುವವಾಹಿನಿ ಪಡ್ಡೆದ್ರ ಘಟಕ ಮೊಕ್ಲೆನ ಒಟ್ಟುಸೇರಿಗೆಡ್ ಪಡ್ಡೆದ್ರ ಬ್ರಹ್ಮಶ್ರೀ ನಾರಾಯಣ ಗುರು ಸಭಾಗೃಹಡ್ ,ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ 94 ನೇ ಪುಣ್ಯ ತಿಥಿತಾನಿ ತುಳುನಾಡ್ ದ ದೈವಾರಾಧನೆಡ್ ಬಿರ್ವೆರ್ ಪನ್ಪುನ ವಿಷಯದ ಉಪನ್ಯಾಸ ಕೊರ್ತೆರ್. ಹಿಂದುಲೆನ ಜ್ಞಾನ, ಬುದ್ಧನ ಕರುಣೆ, ಜೀಸಸ್ ನ ಪ್ರೀತಿ, ಮಹಮ್ಮದರ ಸಹೋದರತೆ ಉಂದು ವಿಶ್ವಧರ್ಮ ಪಂದ್ ಸರ್ವಧರ್ಮ ಸಮ್ಮೇಳನಡ್ ಪಂಡೆರ್. ಅಸ್ಪೃಶ್ಯತೆ ಬರಿಕ್ ದೀದ್ ಜಗತ್ತಿಗ್ ಬೊಲ್ಪುನ್ ಕೊರ್ನ ಮಹಾನ್ ದಾರ್ಶನಿಕೆರ್ ಕೇರಳದ ಶಿವಗಿರಿಡ್ ನಂದಾದೀಪವಾದ್ ಜಗತ್ತ್ ಗೆ ಬೊಲ್ಪಾತೆರ್. ನಾರಾಯಣಗುರು ಬೊಕ್ಕ ಭೂ ಮಸೂದೆ ಕಾನೂನು ಬರಂದೆ ಇತ್ತ್ ದುಂಡ ನಮ ಮಾತೆರ್ಲಾ ಪ್ರಾಣಿರ್ದ್ ಲ ಕಡೆಯಾದ್ ಇತ್ತುದುವ. ಮತಾಂತರನ್ ತಡೆಪರೆ ಬಂಗ ಬತ್ತಿನಾರ್ರ್, ನಾರಾಯಣಗುರುಕ್ಲೆನ್ ನಂಬುನ ಬಿರ್ವೆರೆ ಸಮಾಜ ರಾಜಕೀಯ ಶಕ್ತಿಲೆನ ಪ್ರಭಾವಗ್ ಬೂರ್ದುಂಡಲ ಕಾಲಿ ಒಂಜಿ ಸರ್ಕಲ್ ಗ್ ಅರೆನ ಪುದರ್ ಸೀಮಿತ ಆವನಂದೆ ಕೇಂದ್ರ, ರಾಜ್ಯಲೆನ ವ್ಯವಸ್ಥೆದ ಭಾಗವಾದ್ ಅರೆನ ಪುದರ್ ಶಾಶ್ವತ ಅವೊಡು. ಬಿರ್ವೆರೆ ಸಮಾಜ ಶ್ರೀಮಂತ ವ್ಯವಸ್ಥೆ ಆವೊಡು, ದೈವಾರಾಧನೆ, ಸಂಧಿ ಪಾಡ್ದನ, ನಾಥ ಪಂಥಡ್ ಲ ಬಿಲ್ಲವೆರ್ ನ ಇತಿಹಾಸ ಉಂಡು. ತುಳುನಾಡ್ ದ ದೈವಾರಾಧನೆಡ್ ಪ್ರಮುಖ ಪಾತ್ರ ಉಪ್ಪುನು ಬಿಲ್ಲವೆರೆನವೆ. ದೈವಾರಾಧನೆಡ್ ವೈದಿಕ ಪದ್ಧತಿ ಇಜ್ಜಿ ಪಂದ್ ಪಂಡೆರ್.

ಕಾರ್ಯಕ್ರಮನ್ ಯುವವಾಹಿನಿ ಕೇಂದ್ರ ಸಮಿತಿ ಕುಡ್ಲ ನೆತ್ತ ಅಧ್ಯಕ್ಷೆರಾದ್ ಉದಯ ಅಮೀನ್ ಮಟ್ಟು ಉದಿಪನ ಮಾಲ್ತೆರ್. ಪಡ್ಡೆದ್ರ ಬಿಲ್ಲವೆರೆ ಸಮಾಜ ಸೇವಾ ಸಂಘ (ರಿ.) ಅಧ್ಯಕ್ಷೆರ್ ವೈ. ಸುಧೀರ್ ಕುಮಾರ್ ಗ್ ಈ ಪೊರ್ತುಡು ಪಾತೆರ್ಯೆರ್.

ಪಡ್ಡೆದ್ರ ಬ್ರಹ್ಮಶ್ರೀ ನಾರಾಯಣಗುರು ಮಂದಿರದ ಅರ್ಚಕೆರಾಯಿನ ಚಂದ್ರಶೇಖರ ಶಾಂತಿ, ಪಡ್ಡೆದ್ರ ಬಿರ್ವೆರೆ ಸಮಾಜ ಸೇವಾ ಸಂಘ (ರಿ.) ಕಾರ್ಯದರ್ಶಿ ಲಕ್ಷ್ಮಣ್ ಡಿ ಪೂಜಾರಿ, ಯುವವಾಹಿನಿ ಘಟಕದ ಕಾರ್ಯದರ್ಶಿ ಡಾ| ಐಶ್ವರ್ಯ, ಬಿಲ್ಲವೆರೆ ಸಂಘದ ಪದಾಧಿಕಾರಿಳು, ದೈವಾರಾಧನೆದ ಚಾಕರಿದಕುಲು, ಯುವವಾಹಿನಿ ಪದಾಧಿಕಾರಿಲು, ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 94 ನೇ ಪುಣ್ಯ ತಿಥಿದ ಪ್ರಯುಕ್ತ ಬ್ರಹ್ಮಶ್ರೀ ನಾರಾಯಣಗುರು ಮಂದಿರಡ್ ಭಜನೆ ಬೊಕ್ಕ ಮಹಾಮಂಗಳಾರತಿ ಸೇವೆಲ ನಡತ್ಂಡ್.

ನಾರಾಯಣಗುರು ಮಹಿಳಾ ಮಂಡಳಿದ ಸದಸ್ಯೆರ್ ಪ್ರಾರ್ಥನೆ ಮಲ್ತೆರ್. ಯುವವಾಹಿನಿ (ರಿ.) ಪಡ್ಡೆದ್ರ ಘಟಕದ ಅಧ್ಯಕ್ಷೆರ್ ಶಾಶ್ವತ್ ಪೂಜಾರಿ ಬಿನ್ನೆರೆನ್ ಎದ್ಕೊನಿಯೆರ್. ದುಂಬುದ ಅಧ್ಯಕ್ಷೆರ್ ಯಶೋದ ಪ್ರಸ್ತಾವಿಕ ಪಾತೆರ ಪಾತೆರಿಯೆರ್. ರವಿರಾಜ್ ಎನ್ ಕೋಟ್ಯಾನ್ ಬೊಕ್ಕ ಪೂರ್ಣಿಮ ವಿಧಿತ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಪಡ್ಡೆದ್ರ ಘಟಕದ ನಾರಾಯಣಗುರು ತತ್ವ ಪ್ರಚಾರ ನಿರ್ದೇಶಕೆರ್ ಸಂತೋಷ್ ಕರ್ನಿರೆ ಸೊಲ್ಮೆ ಸಂದೈತ ಮಲ್ತೆರ್.