ಎ.2 -7: ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಅಷ್ಟಬಂಧ ಬ್ರಹ್ಮಕಲಶ ಪುಣ್ಯೋಚ್ಚಯ
ಒಡಿಪು ಜಿಲ್ಲೆ ಕಾರ್ಲ ತಾಲ್ಲೂಕ್ ದ ನಿಟ್ಟೆ ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಎ.2 ಶನಿವಾರರ್ದ್ ಎ.7 ಗುರುವಾರ ಮುಟ್ಟ ಅಷ್ಟಬಂಧ ಬ್ರಹ್ಮಕಲಶದ ಪುಣ್ಯೋಚ್ಚಯ ನಡಪರೆ ಉಂಡು.
ಏ. 6 ಬುಧಾರ ಬೆಳ್ಮಣ್ಣು ದೊಡ್ಡಮನೆ ಬ್ರಹ್ಮಶ್ರೀ ಗುರುರಾಜ ತಂತ್ರಿಲೆನ ಅಂಚನೆ ಬೆಳ್ಮಣ್ಣು ದೊಡ್ಡಮನೆ ಬ್ರಹ್ಮಶ್ರೀ ಸರ್ವೇಶ ತಂತ್ರಿಲೆನ ಮುತಾಲಿಕೆಡ್ ಭಾರೀ ಗೌಜಿಡ್ ಶ್ರೀ ದುರ್ಗಾಪರಮೇಶ್ವರಿ ದೇವೆರೆಗ್ ಬ್ರಹ್ಮಕಲಶಾಭಿಷೇಕ ನಡಪರೆ ಉಂಡು.
ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಪರಪೋಕು
ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್ ದ ನಿಟ್ಟೆ – ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯ ಕಾರ್ಲರ್ದ್ ಸುಮಾರ್ 6 ಮೈಲ್ ದೂರಡ್ ಇಪ್ಪುನ ಪುಗರ್ತೆದ ಕ್ಷೇತ್ರ. ಪಚ್ಚೆ ಪಜಿರ್ ದ ನಡುಟ್ಟ್ ಈ ದೇವಲ್ಯ ಭಾರಿ ಪೊರ್ಲುಡ್ ತೋಜುಂಡ್. ಅನಾದಿ ಕಾಲರ್ದ್ ಲ ಈ ದೇವಲ್ಯಡ್ ಪೂಜಾದಿ ಕಾರ್ಯಲು ನಡತೊಂದು ಬೈದ್ಂಡ್. ಮುಲ್ಪದ ದೇವಿನ್ ಜನಕುಲು “ಉಳ್ಳಾಲ್ತಿ” ಪಂದ್ ಲೆಪ್ಪುವೆರ್.
ಈ ಪಿರವು ಈ ಪ್ರದೇಶಡ್ ದೇವಲ್ಯ ಇಜ್ಜಂದಿನಪಗ ಅಲ್ಪದ ಜನಕುಲು ದೇವೆರ್ನ ದರ್ಶನಗಾದ್ ಮಸ್ತ್ ದೂರ ನಡತೊಂದು ಪೋವೊಡಿತ್ಂಡ್. ಒರ ಜನ್ನಿ ಪನ್ಪಿನಾರ್ ದೇವೆರೆನ್ ತೂಯರೆ ಪಂದ್ ಕೊಲ್ಲೂರು ಮೂಕಾಂಬಿಕಾ ದೇವಲ್ಯಗ್ ಪೋಪೆರ್. ವೃತ ಪತ್ತ್ ದ್ ದೇವೆರೆನ್ ಧ್ಯಾನ ಮಲ್ಪುವೆರ್. 48 ದಿನ ದೇವೆರ್ನ ಪೂಜೆ ಅಂಚನೆ ಸೇವೆನ್ ಮಲ್ಪುವೆರ್. ಒಂಜಿ ದಿನ ಕತ್ತಲೆಗ್ ಜನ್ನಿಗ್ ದೇವಿ ಕನಟ್ಟ್ ತೋಜಿದ್ ಬತ್ತಿತ್ತ್ ದ್, “ಭಕ್ತ ನಿನ್ನ ಧ್ಯಾನನ್ ಉಂತಾವ್. ನಿಕ್ಕ್ ದಾದ ಆವೊಡ್ ಪಂದ್ ಕೇನುವೆರ್. ಅಯಿಕ್ ಜನ್ನಿ “ಅಮ್ಮಾ ಯಾನ್ ಇರ್ನ ಸನ್ನಿಧಿಗ್ ಬತ್ತ್ ದ್ ಮಸ್ತ್ ಸಂತೋಷ ಪಡೆಪೆ. ನಮ್ಮ ಊರುದ ಜನಕುಲು ನಿನನ್ ಆರಾಧನೆ ಮಲ್ಪುನ ಅಭಿಲಾಷೆ ಇತ್ತ್ಂಡಲ ಆಯಿಕ್ ಸಾದಿ ತೋಜಂದಿಲೆಕ್ಕ ಆತ್ಂಡ್. ಅಕ್ಲೆನ ಉದ್ದಾರಗಾದ್ ಈರ್ ಅಡೆಗ್ ಬರೋಡಮ್ಮ ಉಂದು ಯನ್ನ ಪ್ರಾರ್ಥನೆ” ಪಂದ್ ದೇವಿನ ಕಾರ್ ಪತ್ತ್ ದ್ ಕೇನುವೆ. ಅಪಗ ದೇವಿ “ಮಗಾ ಯನ್ನ ಮಿತ್ತ್ ನಂಬಿಕೆ ದೀಲ. ಯಾನ್ ನಿನ್ನ ಪಿರವು ಬರ್ಪೆ. ಆಂಡ ಪಿರ ತಿರ್ಗ್ ದ್ ತೂವೊರ್ಚಿ ಪಂದ್ ಪಂಡ್ ದ್ ಮಾಯ ಆಪೆರ್.
ಜನ್ನಿಗ್ ಎಚ್ಚರ ಆದ್ ಕನಟ್ಟ್ ದೇವಿನ ದರ್ಶನ ಆಯಿನೆನ್ ಎನ್ನೊಂದ್ ಸ್ಮರಣೆ ಮಲ್ತೆರ್.ಎನ್ನೊಟ್ಟ್ ಗ್ ದೇವಿ ಎನ್ನ ಪಿರವು ಬರೊಂದುಲ್ಲೆರ್ ಪಂದ್ ಎನ್ನ್ ದ್, ಅಲ್ಪರ್ದ್ ಪಿದಡ್ಯೆ. ಸಾದಿಡ್ ಪೊವೊಂದಿಪ್ಪುನಗ ಜನ್ನಿಗ್ ಮಂಗಳವಾದ್ಯದ ಸ್ವರ ಕೇನಿಲೆಕ್ಕ ಆಪುಂಡ್. ಅಪಗ ತಿಗಲೆ ಒಡೆಪುನಾತ್ ಕುಷಿ ಆಂಡ್. ಆ ಕುಶಿಟ್ ದೇವಿನ ಅಪ್ಪಣೆನ್ ಮರೆತ್ ದ್ ದೇವಿ ಯನ್ನ ಪಿರವು ಉಲ್ಲೆರಾ ಇಜ್ಜೆರಾ ಪನ್ಪಿನೇನ್ ತೂಯರೆ ಬೋಡಾದ್ ಪಿರ ತಿರ್ಗ್ ದ್ ತೂಪೆರ್. ಅಪಗ ಮಾತ ಮಂಗಳವಾದ್ಯದ ಸ್ವರ ಕೇನುನವ್ ಉಂತುಂಡ್. ಜನ್ನಿ ತನ್ನ ಅಪರಾಧಗಾದ್ ಬುಲಿತೆರ್. ದೇವಿ ಅದೃಶ್ಯ ಆಯಿನ ಜಾಗೆನ್ ಕೂಡ ಕೂಡ ತೂವೊಂದ್ ದೇವಿ ಮುಲ್ಪನೆ ಪಂಡ ಕೆಮ್ಮಣ್ಣುಡ್ ನಿಲೆ ಆಯರೆ ಇಚ್ಛೆ ಮಲ್ತೆರ್ ಪಂದ್ ಎನ್ಯರ ಯೋಚನೆ ಮಲ್ತೆರ್. ಉಂದೇ ಗುಂಗುಡ್ ದೇವಿನ ಕ್ಷೇತ್ರಗ್ ಪೋದು ಯನ್ನ ಅಪರಾಧನ್ ಮಾಪು ಮಲ್ಪುಲೆ ದೇವೆರೆ. ಇಜ್ಜಿಂಡ ಇರೆನ ಸನ್ನಿಧಿಡ್ ಯಾನ್ ಪ್ರಾಣ ಬುಡ್ಪೆ ಪಂದ್ ಪಂಡೆರ್. ದೇವೆರ್ ಭಕ್ತನ ಮಿತ್ತ್ ಕನಿಕರ ಪುಟ್ಟ್ ದ್, “ಮಗಾ ನಿನ್ನ ಭಕ್ತಿಗ್ ಯಾನ್ ಮೆಚ್ಚ್ ದೆ. ಪೋದ್ ಈ ಪಿರವು ತೂಯಿನ ಕೆಮ್ಮಣ್ಣು ಪನ್ಪಿನ ಜಾಗೆಡ್ ಯನ್ನ ದೇವಲ್ಯ ನಿರ್ಮಾಣ ಮಲ್ಪು ಪಂದ್ ಅಶರೀರವಾಣಿ ಕೇನುಂಡ್. ಇಂಚ ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯ ನಿರ್ಮಾಣ ಆಪುಂಡು ಪಂದ್ ಕ್ಷೇತ್ರದ ಇತಿಹಾಸ ಉಂಡು.
ಬ್ರಹ್ಮಕಲಶೋಚ್ಚಯದ ಪೂಜಾ ಕಾರ್ಯಕ್ರಮದ ವಿವರ
ಏ.2 ಸನಿಯಾರ ಕಾಂಡೆ 8 ಗಂಟೆರ್ದ್ ಆಚಾರ್ಯಾದಿ ಋತ್ವಿಜರೆನ್ ಎದ್ಕೊನುನ, ಸಾಮೂಹಿಕ ದೇವತಾ ಪ್ರಾರ್ಥನೆ, ತೋರಣ ಮುಹೂರ್ತ, ವೈದಿಕ ಉಗ್ರಾಣ ಮುಹೂರ್ತ, ಸಾರ್ವಜನಿಕ ಉಗ್ರಾಣ ಮುಹೂರ್ತ, ಪುಣ್ಯಾಹ ಪಂಚಗವ್ಯ, ಬ್ರಹ್ಮಕೂರ್ಚ ಹೋಮ, ದೇವನಾಂದಿ, ಕಂಕನಬಂಧ ಆಚಾರ್ಯಾದಿ ಋತ್ವಿಜರೆನ ವೇದತ್ರಯ ಪಾರಾಯಣ ಸುರು, ಅಗ್ನಿಜನನ, ಅಥರ್ವ ಶೀರ್ಷ ಗಣಹೋಮ, ಬಯ್ಯಗ್ 4 ಗಂಟೆರ್ದ್ ಸಪ್ತಶುದ್ಧಿ, ಪ್ರಸಾದ ಶುದ್ಧಿ, ರಾಕ್ಷೋಘ್ನ ಹೋಮ, ವಾಸ್ತುಪೂಜೆ, ವಾಸ್ತು ಹೋಮ, ವಾಸ್ತು ಬಲಿ, ಪ್ರಾಕಾರ ಬಲಿ, ಅಸ್ತ್ರಕಲಶ ಪ್ರತಿಷ್ಠೆ ಅಂಕುರಾರೋಪಣ.
ಏ.3 ಐತಾರ ಕ್ಷಾಳನಾದಿ, ಬಿಂಬಶುದ್ಧಿ, ನವಗ್ರಹ ಹೋಮ, ನಾಗದೇವೆರ್ನ ಸಾನಿಧ್ಯಗ್ ಅಂಚನೆ ಪರಿವಾರ ಸಾನಿಧ್ಯಗ್ ಕಲಶಾಭಿಷೇಕ, ಅಧಿವಾಸ ಹೋಮಲು, ಪ್ರಸನ್ನ ಪೂಜೆ, ಬಯ್ಯಗ್ 4 ಗಂಟೆರ್ದ್ ಮಂಟಪ ಸಂಸ್ಕಾರ, ಅಷ್ಟಬಂದಾಧಿವಾಸ, ಶಕ್ತಿ ಹೋಮ, ಅಷ್ಟಬಂಧ ಪ್ರತಿಷ್ಠೆ, ಅಧಿವಾಸಹೋಮ, ಪ್ರಸನ್ನ ಪೂಜೆ, ದೇವಿನ ಮೂಲ ಸ್ಥಾನಡ್ ಕಲಶಾಭಿಷೇಕ, ವಿಶೇಷ ಪೂಜೆ.
ಏ.4 ಸೋಮಾರ ಕಾಂಡೆ 6 ಗಂಟೆರ್ದ್ ಶ್ರೀ ದೇವಿಗ್ ತತ್ವಕಲಶ, ತತ್ವಹೋಮ, ಶ್ರೀ ಗಣಪತಿ ದೇವೆರೆಗ್ ತತ್ವಕಲಶ, ತತ್ವಹೋಮ, ಶಾಂತಿ ಹೋಮಲು, ಪ್ರಾಯಶ್ಚಿತ್ತ ಹೋಮಲು, ಕಲಶಾಭಿಷೇಕ, ನ್ಯಾಸಲು, ಪ್ರಸನ್ನ ಪೂಜೆ, ಬ್ರಹ್ಮಕಲಶ, ಮಂಡಲ ರಚನೆ, ಬಯ್ಯಗ್ 3.30 ರ್ದ್ ದಿಕ್ಪಾಲಕ ಹೋಮಲು, ಶ್ರೀ ಚಕ್ರ ಪೂಜೆ, ವಿಶೇಷ ಪ್ರಾಯಶ್ಚಿತ್ತ ಹೋಮ, ಶ್ರೀ ಗಣಪತಿ ದೇವೆರೆಗ್ 108 ಕಲಶದೊಟ್ಟುಗ್ ಬ್ರಹ್ಮಕಲಶಾಧಿವಾಸ, ಅಧಿವಾಸ ಹೋಮ ನಡಪರೆ ಉಂಡು.
ಏ.5 ಅಂಗಾರೆ ಕಾಂಡೆ 7 ಗಂಟೆರ್ದ್ ದಗ್ಧ ಶಾಂತಿ, ಅದ್ಭುತ ಶಾಂತಿ, ಮಹಾಶಾಂತಿ, ಶ್ರೀ 108 ಗಣಪತಿ ದೇವೆರೆಗ್ 108 ಕಲಶದೊಟ್ಟುಗ್ ಬ್ರಹ್ಮಕಲಶಾಭಿಷೇಕ, ಚಂಡಿಕಾ ಹೋಮ, ಬ್ರಹ್ಮಕಲಶ ಮಂಡಲ ಪೂಜೆ, ಬಯ್ಯಗ್ 4 ಗಂಟೆರ್ದ್ ಶಕ್ತಿ ದಂಡಕ ಮಂಡಲ ಪೂಜೆ, ಶ್ರೀ ದೇವೆರೆಗ್ ಪಂಚವಿಂಶತಿ ದ್ರವ್ಯಮಿಳಿತ 500 ಕಲಶದೊಟ್ಟುಗ್ ಬ್ರಹ್ಮಕಲಶಾಧಿವಾಸ, ಅಧಿವಾಸ ಹೋಮ ನಡಪರೆ ಉಂಡು.
ಏ.6 ಬುಧಾರ ಕಾಂಡೆ 7 ಗಂಟೆರ್ದ್ ಕಲಶಾಭಿಷೇಕ ಸುರು, ಕಾಂಡೆ 9.36ಗ್ ಸರಿಯಾದ್ ಇಪ್ಪುನ ವೃಷಭ ಲಗ್ನ ಸುಮೂಹೂರ್ತಡ್ ಶ್ರೀ ದೇವಿಗ್ “ಬ್ರಹ್ಮಕಲಶಾಭಿಷೇಕ”, ಮಹಾನ್ಯಾಸ, ಮಹಾಪೂಜೆ, ಅವಸ್ರುತ ಬಲಿ, ಉತ್ಸವ, ಪಲ್ಲ ಪೂಜೆ, ಪ್ರಸಾದ ಕೊರ್ಪಿನವ್, ನುಪ್ಪು ಸೇವೆ, ಬಯ್ಯಗ್ 6 ಗಂಟೆರ್ದ್ ಬಲಿ ಉಚ್ಚಯ, ರಾತ್ರಿ ಪೂಜೆ, .ಮಹಾರಂಗ ಪೂಜೆ, ಭೂತ ಬಲಿ.
ಏ.7 ಗುರುವಾರ ಕಾಂಡೆ 7 ಗಂಟೆರ್ದ್ ಪುಣ್ಯಾಹ, ಪಂಚಗವ್ಯ, ಶ್ರೀ ಗಣಪತಿ ದೇವೆರೆಗ್ ಅಂಚನೆ ಶ್ರೀ ದೇವಿಗ್ ಸಂಪ್ರೋಕ್ಷಣಾ, ಕಲಶಾಭಿಷೇಕ, ಪ್ರಸನ್ನ ಪೂಜೆ, ಮಹಾಮಂತ್ರಾಕ್ಷತೆ, ಪ್ರಸಾದ ಕೊರ್ಪಿನವ್, ಬಯ್ಯಗ್ 4 ಗಂಟೆರ್ದ್ ಧೂಮಾವತಿ ದೈವಸ್ಥಾನಡ್ ಕಲಶಾಭಿಷೇಕ.
ಸಾಂಸ್ಕೃತಿಕ ಕಾರ್ಯಕ್ರಮಲು
ಏ. 2 ಸನಿಯಾರ ಬಯ್ಯಗ್ 6.30 ಗಂಟೆರ್ದ್ ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ಯಕ್ಷಗಾನ ಕಲಾಕೇಂದ್ರದ ಕಲ್ಪಾರ್ಥಿಲೆರ್ದ್ ಯಕ್ಷಗಾನ ಪ್ರದರ್ಶನ
ಪ್ರಸಂಗ: ಪಾಂಡವಾಶ್ವಮೇಧ
ಏ.3 ಐತಾರ ಬಯ್ಯಗ್ 6.30 ಗಂಟೆರ್ದ್ ಉದಯೋನ್ಮುಖ ಯುವ ಗಾಯಕಿ ಆಯಿನ ಕುಮಾರಿ ಶರಣ್ಯ ಕೆ.ಎನ್ ಬೊಕ್ಕ ಕುಮಾರಿ ಸುಮೇಧಾ ಕೆ.ಎನ್ ಮುಕುಲೆರ್ದ್
ಕರ್ನಾಟಕ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ
ಏ.5 ಅಂಗಾರೆ ಬಯ್ಯಗ್ 6.30 ಗಂಟೆರ್ದ್ ಬಲೆ ತೆಲಿಪಾಲೆ ಖ್ಯಾತಿದ ಉಮೇಶ್ ಮಿಜಾರು ಮುತಾಲಿಕೆಡ್ ನಮ್ಮ ಕಲಾವಿದೆರ್ ಬೆದ್ರ ಮೊಕ್ಲೆಡ್ದ್ ತುಳು ಹಾಸ್ಯಮಯ ನಾಟಕ
ಕುಸಲ್ದ ಗೊಬ್ಬು
ಏ.6 ಬುಧಾರ ಬಯ್ಯಗ್ 6.30 ಗಂಟೆರ್ದ್ ಯಕ್ಷಗಾನ ಗೊಂಬೆಯಾಟ, ಶ್ರೀ ಉಪ್ಪಿನಕುದ್ರು ಶ್ರೀ ಗಣೇಶ ಯಕ್ಷಗಾನ ಗೊಂಬೆಯಾಟ ಮಂಡಳಿ
ಚೂಡಾಮಣಿ – ಲಂಕಾದಹನ
ಗೊಂಬೆಯಾಟ ಪ್ರದರ್ಶನ
ಬರವು : ಶ್ರುತಿ ದಾಸ್
