ಬೆಂಗ್ಲೂರು ಬಿಲ್ಲವ ಅಸೋಸಿಯೇಶನ್ ದ ಮುತಾಲಿಕೆಡ್ ಕೋಟಿ ಚೆನ್ನಯ ಕ್ರೀಡಾಕೂಟ-2024 ಫೆ.25 ಐತಾರ ಬೆಂಗ್ಲೂರುದ ವೈ.ಎಂ.ಸಿ.ಎ ಮೈದಾನಡ್ ನಡಪರೆ ಉಂಡು.
ಈ ಕ್ರೀಡಾಕೂಟಡ್ ಪಾಲ್ ಪಡೆಪಿನಕುಲು ಫೆ.25 ಕ್ಕ್ ಬೊಲ್ಪುಗು 9 ಗಂಟೆದುಲಯಿ ಕ್ರೀಡಾಂಗಣಡ್ ತನ್ನ ಪುದರ್ ನ್ ರಿಜಿಸ್ಟರ್ ಮಲ್ತ್ ದ್ ಕೂಪನ್ ದೆತೊನೊಡು. ಅಂಚೆನೆ ಮಧ್ಯಾಹ್ನ ಕರಾವಳಿ ಶೈಲಿದ ಮಾಸದ ಬೊಕ್ಕ ತರಕಾರಿದ ವನಸ್ ದ ವ್ಯವಸ್ಥೆ ಉಂಡು. ಬಯ್ಯಗ್ ಸಮಾರೋಪ ಸಮಾರಂಭ ಬೊಕ್ಕ ಇನಾಮು ಪಟ್ಟುನ ಲೇಸ್ ನಡಪರೆ ಉಂಡು.
ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾ ಘಟಕ ಬೊಕ್ಕ ಕದಳಿ ಬೀಜ್ ಟೂರಿಸಂದ ಒಟ್ಟುಸೇರಿಗೆಡ್ ಪಣಂಬೂರು ಬೀಚ್ ಡ್ ಮಾ.1-3 ಮುಟ್ಟ ಜಾನಪದ ಕಡಲ್ ಉಚ್ಚಯ ನಡಪರೆ ಉಂಡು.
ಈ ಲೇಸ್ ನ್ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಉದಿಪನ ಮಲ್ಪುವೆರ್. ಈ ಲೇಸ್ ಡ್ ಶಿಲ್ಪಿ ಅರುಣ್ ಯೋಗಿರಾಜ್ ಮೈಸೂರ್, ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ ಜಿಲ್ಲಾ ಘಟಕದ ಗುರ್ಕಾರೆ ಪಮ್ಮಿ ಕೊಡಿಯಾಲ್ ಬೈಲ್ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಜಾನಪದ ಪ್ರದರ್ಶನ, ಗಾಳಿಪಟ ಪ್ರದರ್ಶನ, ಆಹಾರ ಮೇಳ, ರಮೇಶ್ಚಂದ್ರ ಕೂಟ ಬೊಕ್ಕ ಕಲಾವತಿ ಕೂಟದಕ್ಲೆರ್ದ್ ಜಾನಪದ ರಸಮಂಜರಿ, ಅಜಯ್ ವಾರಿಯರ್ ಕೂಟರ್ದ್ ಸಂಗೀತ ರಸಮಂಜರಿ, ಮಣಿಕಾಂತ್ ಕದ್ರಿ ಕೂಟರ್ದ್ ಕಡಲಗೀತೆ ಮ್ಯೂಸಿಕಲ್ ನೈಟ್ ನಡಪರೆ ಉಂಡು ಪಂದ್ ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ ಬೆದ್ರ ತಾಲೂಕ್ ಘಟಕದ ಗುರ್ಕಾರ್ದಿ ಪದ್ಮಶ್ರೀ ಭಟ್ ನಿಡ್ಡೋಡಿ ಲೆಪ್ಪೋಲೆಡ್ ತೆರಿಪಾದೆರ್.
ಪೊವಾಯಿದ ಕನ್ನಡ ಸೇವಾ ಸಂಘದ ಮಹಿಳಾ ವಿಭಾಗರ್ದ್ ಅರಸಿನ ಕುಂಕುಮ ಲೇಸ್ ಬೊಕ್ಕ ಎಲ್ಯ ನಾಟಕ ಪಂತೊ ಬರ್ಪಿನ ಐತಾರ (ಫೆ.25) ಮದ್ದೆನ 2.30ಗು ಸರಿಯಾದ್ ಸಂಘದ ಕಚೇರಿದ ಆವರಣ ಸೋಲಾರಿಸ್ ನೋ 1 ಸಾಕಿ ವಿಹಾರ ರೋಡ್ ಪೊವಾಯಿ ಮುಲ್ಪ ನಡಪರೆ ಉಂಡು.
ಆನಿದ ಲೇಸ್ ನ್ ಬಂಟರ ಸಂಘ ಮುಂಬಯಿ ನೆತ್ತ ಮಾಜಿ ಮಹಿಳಾ ಗುರ್ಕಾರ್ದಿ ಲತಾ ಜಯರಾಮ್ ಶೆಟ್ಟಿ ಉದಿಪನ ಮಲ್ಪೆರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ಕನ್ನಡ ಸೇವಾ ಸಂಘ ಪೊವಾಯಿದ ಮಹಿಳಾ ವಿಭಾಗದ ಗುರ್ಕಾರ್ದಿ ಸುಗುಣ ಕೃಷ್ಣ ಶೆಟ್ಟಿ ವಹಿಸೊನರೆ ಉಲ್ಲೆರ್. ಮಲ್ಲ ಬಿನ್ನೆರ್ ಆದ್ ಮುಲುಂಡ್ ಬಂಟ್ಸ್ ಮಹಿಳಾ ವಿಭಾಗ ದ ಗುರ್ಕಾರ್ದಿ ರತ್ನ ವಸಂತ್ ಶೆಟ್ಟಿ ಬೊಕ್ಕ ಬಂಟರ ಸಂಘ ಮುಂಬೈದ ಲೇಡೀಸ್ ವಸತಿ ಗ್ರಹತ್ತ ಸಂಯೋಜಕಿ ಶೋಭಾ ಸಿ ಎ ಶಂಕರ್ ಶೆಟ್ಟಿ ಅಂಚೆನೆ ಮಾನಾದಿಗೆದ ಬಿನ್ನೆರಾದ್ ಕೈತಲ್ದ ಮುನ್ಸಿಪಲ್ ಮೆಂಬರ್ ಅಶ್ವಿನಿ ಅಶೋಕ್ ಮಟೆಕಾರ್ ಬೊಕ್ಕ ಮಾಜಿ ಮುನ್ಸಿಪಲ್ ಮೆಂಬರ್ ಸವಿತಾ ಶರದ್ ಪವಾರ್ ಬರ್ರೆ ಉಲ್ಲೆರ್.
ಅಂಚೆನೆ ಲೇಸ್ ಡ್ ಬಾಂಬೆಡ್ ಸಮಾಜ ಪರ ಕೆಲಸ ಮಲ್ಪುನ ಸಮಾಜ ಸೇವಕಿ ಡಾ. ರಜಿನಿ ವಿನಾಯಕ್ ಪೈ ಬೊಕ್ಕ ಸಂಘದ ಸದಸ್ಯೆ ಭಾರತಿ ಬಾಲಕೃಷ್ಣ ಶೆಟ್ಟಿ ಮೊಕ್ಲೆನ್ ಬಿನ್ನೆರೆ ಚಾವಡಿಡ್ ಮಾನಾದಿಗೆ ಮಲ್ಪರೆ ಉಂಡು. ಅಂಚನೇ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು ಈ ಮಾತಾ ಲೇಸ್ ಡ್ ತನುಕ್ಲ್ ಪಾಲ್ ಪಡೆವೊಡು ಪಂದ್ ಸಂಘ ದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ಕಿನ್ನಿಗೋಳಿ ಕೈತಲ್ದ ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ನಡಪರೆ ಇಪ್ಪುನ ಅರಸು ಕುಂಜರಾಯನ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ದೊಂಪದ ಮೂರ್ತ ನಡತ್ಂಡ್.
ಕೊಡೆತ್ತೂರು ವೇದವ್ಯಾಸ ಉಡುಪ ಮೇರ್, ಪ್ರಾರ್ತನೆ ಸಂದಾದ್ ಧಾರ್ಮಿಕ ಕೇಂದ್ರಲೆನ ಜೀರ್ಣೋದ್ಧಾರದ ಮುಕೇನ ಗ್ರಾಮಡ್ ಸುಖ, ಶಾಂತಿ, ನೆಮ್ಮದಿ ಬೊಕ್ಕ ಅಭಿವೃದ್ಧಿ ಸಾಧ್ಯ ಪಂದ್ ಪಂಡೆರ್.
ಈ ಪೊರ್ತುಡು ದೈವೊಲ್ಯದ ಆಡಳಿತ ಮಂಡಳಿದ ಸದಸ್ಯೆರ್, ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘದ 59ನೇ ವರ್ಷದ ಮಹಾಸಭೆ ಫೆ.25 ಐತಾರ ಹಳೆಯಂಗಡಿ ಬಿಲ್ಲವ ಭವನಡ್ ನಡಪರೆ ಉಂಡು.
ಈ ಲೇಸ್ ಸಂಘದ ಗುರ್ಕಾರೆ ಚಂದ್ರಶೇಖರ್ ನಾನಿಲ್ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು.
ಈ ಲೇಸ್ ಡ್ ಸಂಘದ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಸಭೆತ್ತ ಯಶಸ್ವಿಗ್ ಸಹಕಾರ ಮಲ್ಪೊಡು ಪಂದ್ ಕಾರ್ಯಕಾರಿ ಸಮಿತಿದ ಮಾನಾದಿಗೆದ ಪ್ರಧಾನ ಕಾರ್ಯದರ್ಶಿ ಹಿಮಕರ್ ಟಿ ಸುವರ್ಣ ಕಲ್ಲಾಡಿ ಕದಿಕೆ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು-ಕೊಡವೂರು ಸುಮನಸಾ ಸಾಂಸ್ಕೃತಿಕ ಸಮಾಜ ಸೇವಾ ಸಂಘಟನೆದ 12ನೇ ರಂಗಪರ್ಬ ಫೆ.25 ರ್ದ್ ಮಾ.2 ಮುಟ್ಟ ಒಡಿಪು ಅಜ್ಜರಕಾಡು ಭುಜಂಗಪಾರ್ಕ್ ಬಯಲುರಂಗ ಮಂದಿರಡ್ ನಡಪರೆ ಉಂಡು.
ಪ್ರತಿದಿನೊಲ ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಬೇತೆ ಬೇತೆ ನಾಟಕ ನಡಪರೆ ಉಂಡು.
ಈ ಲೇಸ್ ಬೆಂಗ್ಲೂರು-ಒಡಿಪು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಕಾರಡ್ ನಡಪರೆ ಉಂಡು.
ಕೊಯಿಕುಡೆ: ಪಂಜ ಶ್ರೀ ಕೋಡ್ದಬ್ಬು ದೈವೊಲ್ಯಡ್ ಸಿರಿಸಿಂಗಾರದ ನೇಮ ಫೆ.23 ಬೊಕ್ಕ 24 ಕ್ಕ್ ನಡಪರೆ ಉಂಡು.
ಫೆ.23 ಸುಕ್ರಾರ ಬಯ್ಯಗ್ ಭಂಡಾರ ಏರಿಯೆರೆ, ಅನ್ನ ಪ್ರಸಾದ ಸೇವೆ, ರಾತ್ರೆ ಶ್ರೀ ಕೋಡ್ದಬ್ಬು ದೈವೊದ ಬೊಕ್ಕ ತನ್ನಿಮಾನಿಗ ದೈವೊದ ನೇಮ ನಡಪರೆ ಉಂಡು.
ಫೆ.24 ಸನಿಯಾರ ಬಯ್ಯಗ್ ಧೂಮಾವತಿ ಬಂಟ ದೈವೊಲೆನ ನೇಮ, ಭಂಡಾರ ಪೋವೆರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಪಂಜದ ಗುತ್ತು ವಿಶ್ವನಾಥ ಶೆಟ್ಟಿ, ಪಂಜ ಶ್ರೀ ಕೋಡ್ದಬ್ಬು ದೈವಸ್ಥಾನದ ಆಡಳಿತ ಮಂಡಳಿ, ಪಂಜ ಮೊಗಪಾಡಿ ಗ್ರಾಮದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೇರಳ ರಾಜ್ಯದ ಕಾಸ್ರೋಡು ಜಿಲ್ಲೆದ ಚಂದ್ರಗಿರಿ ತುದೆ ಬರಿರ್ದ್ ಕರ್ನಾಟಕ ರಾಜ್ಯದ ದಕ್ಷಿಣ ಕನ್ನಡ ಜಿಲ್ಲೆದ ಮೂಲ್ಕಿ ತಾಲೂಕುದ ಸಸಿಹಿತ್ಲು ಮುಟ್ಟ ಇಪ್ಪುನ ಪದ್ನೆನ್ಮ ಭಗವತೀ ಕ್ಷೇತ್ರಲೆಡ್ ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರಲ ಒಂಜಿ.
ಮಂಜೇಶ್ವರ ಕೈತಲ್ದ ಮಜಿಬೈಲ್ ಪನ್ಪಿನ ಪ್ರಕೃತಿ ಪೊರ್ಲುದ ಪಟ್ಟತ್ತಮೊಗರು ಪುಟ್ಟಗ್ರಾಮಡ್ ಬಲ್ಲಂಗುಡೇಲು ಪನ್ಪಿನ ಪುಣ್ಯ ಭೂಮಿಡ್ ಅತೀ ಪುರಾತನ ಕಾರಣಿಕ ಶಕ್ತಿಯಾದ್ ಒವ್ವೇ ಜಾತಿ ಪಂಗಡ ಭೇದ ಇಜ್ಜಂದೆ ಅಸಂಖ್ಯಾತ ಆಸ್ತಿಕ ಭಕ್ತಾದಿಲೆನ ಅಪ್ಪೆಯಾದ್ ಅನ್ನಪೂರ್ಣೇಶ್ವರಿಯಾದ್ ಪೂಜಿಸಾವೊಂದು ಬರೊಂದು ಇಪ್ಪುನ ದೇವತೆ ಶ್ರೀ ಪಾಡಂಗರೆ ಭಗವತಿ ಅಮ್ಮ. ಮೂಲು ಪ್ರದಾನವಾದ್ ನಡಪುನ ಉತ್ಸವಲು “ಮೂಜಿ ಸಂಕ್ರಮಣ,ಸಿಂಹತಿಂಗೊಲುಡು ಮುಪ್ಪ ದಿನ ದೀಪರಾಧನೆ, ಅಭಿಷೇಕ, ನವರಾತ್ರಿ, ತುಲಾ ಮಾಸ ಪತ್ತೆಟ್ಟ್ ತುಲಪುತ್ತರಿ,ಏಳ್ ದಿನತ್ತ ಕಳಿಯಾಟ ಉತ್ಸವ, ಒಂಜಿ ದಿನತ್ತ ವಿಷು ಸಂಕ್ರಮಣ ಬೊಕ್ಕ ಪತ್ತನಾಜೆಡ್” ಭಕ್ತ ಜನಕ್ಕುಲು ಭಕ್ತಿರ್ದ್ ನೆರವೇರಿಸಾವೊಂದು ಇಪ್ಪುನ ಸರ್ವವೇದ್ಯ.
ಬಲ್ಲಂಗುಡೇಲು ಶ್ರೀ ಭಗವತೀ ಕ್ಷೇತ್ರಗ್ ನೂದು ವರ್ಷದ ಇತಿಹಾಸ ಉಂಡು. ಅಂಚೆನೆ ವಿಶೇಷವಾಯಿನ ಪರಪೋಕು ಉಂಡು. ಕರಿನ ವರ್ಷದ (2023) ಕಳಿಯಾಟ ಮಹೋತ್ಸವದ ಪೊರ್ತುಡು ಕ್ಷೇತ್ರ ಅಜೀರ್ಣಾವಸ್ಥೆಡ್ ಇತ್ತ್ ದ್ ಅತೀ ಶೀಘ್ರಡ್ ಪುನರ್ ನಿರ್ಮಾಣ ಮಲ್ಪೊಡು ಪಂದ್ ಶ್ರೀ ಭಗವತೀ ಅಪ್ಪೆನ ನುಡಿ ಆದಿತ್ತ್ಂಡ್. ಮಾತ್ರ ಅತ್ತಂದೆ ಸಾಂಪ್ರದಾಯಿಕವಾದ್ ಶ್ರೀ ಭಗವತೀ ಮಾತೆ ಸೇರಿನ ಭಕ್ತ ಜನಕ್ಲೆರ್ದೆ ಮೂಲಧನ ಸಂಗ್ರಹ ಮಲ್ತ್ ಅನುಗ್ರಹ ಮಲ್ತ್ ದೆರ್. ಆ ಪ್ರಕಾರ ಶ್ರೀ ಕ್ಷೇತ್ರದ ತಂತ್ರಿಲೆನ ಮಾರ್ಗದರ್ಶನ ,ಗ್ರಾಮದ ಮುಖ್ಯಸ್ಥೆರ್ ಅಚಾರಪಟ್ಟ, ಗುರಿಕಾರೆರ್,ಮೂಜಿ ಗ್ರಾಮದ ಪತ್ತ್ ಸಮಸ್ತೆರ್ ಸೇರ್ದ್ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಮಲ್ತೆರ್. ಪ್ರಶ್ನೆ ಚಿಂತನೆಡ್ ಕ್ಷೇತ್ರ ಪುನರ್ ನಿರ್ಮಾಣ ಅತ್ತಂದೆ ಅವೆತ ಕೈತಲ್ ಇಪ್ಪುನ ವೀರಪುತ್ರ ದೈವದ ಕ್ಷೇತ್ರನ್ಲ ಪುನರ್ ನಿರ್ಮಾಣ ಮಲ್ಪೊಡು ಪಂದ್ ತೋಜಿದ್ ಬತ್ತ್ಂಡ್.
ಶ್ರೀ ಕ್ಷೇತ್ರಡ್ ವೀರಪುತ್ರ ದೈವಗ್ ವಿಶೇಷವಾಯಿನ ಹಿನ್ನೆಲೆ ಉಂಡು. ಶ್ರೀ ಪಾಡಂಗರೆ ಭಗವತೀ ನೆಲೆ ಆವೊಡಾಂಡ ಸುರುಕ್ಕು ಬಲ್ಲಂಗುಡೇಲು ಪನ್ಪುನ ಪುಣ್ಯ ಭೂಮಿನ್ ಆಯ್ಕೆ ಮಲ್ತಿನ ವೀರಭದ್ರ ದೈವ ಪನ್ಪುನ ಇತಿಹಾಸ ಉಂಡು. ಅಂಚಾದ್ ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರದ ಕೈತಲ್ ಡ್ ದೇವಸ್ಥಾನ ಬೊಕ್ಕ ಸುರುತ ಸ್ಥಾನನ್ ಪಡೆಯೊಂದುಂಡು.
ಈ ಸರ್ತಿ ಫೆ. 24 ರ್ದ್ ಫೆ.26 ಮುಟ್ಟ ಶ್ರೀ ಪಾಡಂಗರೆ ಮಾತೆನ ಬೊಕ್ಕ ಶ್ರೀ ವೀರಪುತ್ರ ದೈವದ ಅಂಚನೆ ಪರಿವಾರ ದೈವದ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶೋತ್ಸವ ಶ್ರೀ ಕ್ಷೇತ್ರದ ತಂತ್ರಿವರ್ಯರಾಯಿನ ಡಾ.ರಾಮಚಂದ್ರ ಪದಕಣ್ಣಾಯರೆನ ನೇತೃತ್ವಡ್, ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿ ಕೊಂಡೆವೂರು ಮೆರೆನ ಶುಭಾಶೀರ್ವಾವಾದದೊಟ್ಟಿಗೆ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರಾಯಿನ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ,ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಗೋಪಾಲ ಎಂ .ಬಂದ್ಯೋಡು ಬೊಕ್ಕ ಊರಪರವೂರ ಮಾತೆನ ಭಕ್ತೆರೆನ ಉಪಸ್ಥಿತಿಟ್ಟ್ ನಡಪೆರೆ ಉಂಡು.
ಕಾರ್ಯಕ್ರಮತ್ತ ವಿವರ
ಫೆ.24 ತಾರೀಕ್ ದಾನಿ ಮಧ್ಯಾಹ್ನ 2.30 ಕ್ಕ್ ಹಸಿರುವಾಣಿ ಹೊರೆ ಕಾಣಿಕೆದ ಭವ್ಯ ಶೋಭಯಾತ್ರೆ.ಶೋಭಯಾತ್ರೆದ ಚಾಲನೆನ್ ಶ್ರೀ ನಾರಾಯಣ ಭಗವತೀ ಪೂಜಾರಿ ಪಟ್ಟತ್ತೂರು ಮಲ್ಪೆರೆ ಉಲ್ಲೆರ್.ಶ್ರೀ ಪಾಡಂಗರೆ ಭಗವತೀ ಭಜನಾ ಸಂಘ ಪಟ್ಟತ್ತೂರು (ತೃಪ್ತಿ ಬಳಗದಕ್ಲೆನ) ಕುಣಿತ ಭಜನೆ. ಬಯ್ಯ 6 ಗಂಟೆಗ್ ತಂತ್ರಿವರ್ಯೆರ್ ,ಋತ್ವಿಜರೆಗ್ ಬೊಕ್ಕ ಕೊಂಡೆವೂರು ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿಗ್ ಪೂರ್ಣ ಕುಂಭ ಸ್ವಾಗತ, ಬಯ್ಯ 6.30 ಕ್ಕ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಕೊಂಡೆವೂರು ಸ್ವಾಮೀಜಿರ್ದ್ ಆಶೀರ್ವಚನ, ಕ್ಷೇತ್ರದ ತಂತ್ರಿವರ್ಯೆರ್ ಮೂಡುಮನೆ ಡಾ.ಶ್ರೀ ಅಶೋಕ್ ರಾಮಚಂದ್ರ ಪದಕಣ್ಣಯ ತುಡರ್ ಅರ್ಲಾಯೆರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ರವೀಂದ್ರ ಶೆಟ್ಟಿ ಕರಿಬೈಲ್ ವಹಿಸೆರೆ ಉಲ್ಲೆರ್.
ಫೆ. 25 ಮಧ್ಯಾಹ್ನ 12 ಗಂಟೆಗ್ ಚಂಡಿಕಾ ಹೋಮ, ಪ್ರಸಾದ ವಿತರಣೆ ಬೊಕ್ಕ ಕಾಂಡೆ 10 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಶ್ರೀ ಶ್ರೀ ಮೋಹನದಾಸ್ ಪರಮಹಂಸ ಸ್ವಾಮೀಜಿ ಶ್ರೀ ಧಾಮ ಮಾಣಿಲ ಆಶೀರ್ವಚನ ಮಲ್ಪರೆ ಉಲ್ಲೆರ್. ಈ ಲೇಸ್ ದ ಉದಿಪನನ್ ಶ್ರೀ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿ ಮಲ್ಪೆರೆ ಉಲ್ಲೆರ್.
ಮಧ್ಯಾಹ್ನ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಶಿಲ್ಪಾ ಭಟ್ ಬೊಕ್ಕ ಶಿಷ್ಯೆರೆರ್ದ್ ಕರ್ನಾಟಕ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ , ಬಯ್ಯಗ್ 4 ಗಂಟೆಗ್ ಶ್ರೀ ದುರ್ಗಾಪರಮೇಶ್ವರಿ ಮಹಿಳಾ ಸಂಘ ಬೊಕ್ಕ ಶ್ರೀ ಶಾಸ್ತಾ ಫ್ರೆಂಡ್ಸ್ ಕಡಂಬಾರ್ ಮೇರೆನ ಪ್ರಾಯೋಜಕತ್ವಡ್ ಶ್ರೀ ಚೌಕಾರು ಮಂತ್ರವಾದಿ ಗುಳಿಗ ದೇವಸ್ಥಾನದ ಶ್ರೀ ಶಾಸ್ತಾ ಯಕ್ಷಗಾನ ಕಲಾ ಸಂಘದ ಜೋಕ್ಲೆರ್ದ್ “ಮೋಕ್ಷ ಸಂಗ್ರಾಮ” ಯಕ್ಷಗಾನ ನಡಪೆರೆ ಉಂಡು. ರಾತ್ರಿ 8.30 ರ್ದ್ ಬೇತೆ ಬೇತೆ ಭಜನಾ ಸಂಘರ್ದ್ ಭಜನಾ ಕಾರ್ಯಕ್ರಮ ನಡಪೆರೆ ಉಂಡು.
ಫೆ.26 ಕಾಂಡೆ 8 ಗಂಟೆಗ್ ಗಣಹೋಮ 109 ಕಲಶ,ಪುಣ್ಯಹವಾಚನ, ಕಾಂಡೆ 11.17 ತ್ತ ವೃಷಭ ಲಗ್ನದ ಮೂರ್ತಡ್ ಶ್ರೀ ಪಾಡಂಗರೆ ಭಗವತೀ ಮಾತೆನ ಬೊಕ್ಕ ವೀರಪುತ್ರ ದೈವದ ಬ್ರಹ್ಮಕಲಶಾಭಿಷೇಕ, ಕಾಂಡೆ 9 ಗಂಟೆಗ್ ಧಾರ್ಮಿಕ ಸಭಾಕಾರ್ಯಕ್ರಮಡ್ ಕೊಂಡೆವೂರು ಸ್ವಾಮಿಲೆರ್ದ್ ಆಶೀರ್ವಚನ ನಡಪೆರೆ ಉಂಡು. ಅಧ್ಯಕ್ಷತೆನ್ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರಾಯಿನ ಗೋಪಾಲ ಬಂದ್ಯೋಡು ವಹಿಸೆರೆ ಉಲ್ಲೆರ್. ಸಭೆತ್ತ ಉದಿಪನನ್ ಬ್ರಹ್ಮಕಲಶೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ ವಹಿಸೆರೆ ಉಲ್ಲೆರ್. ವಿಶ್ವರೂಪಿಣಿ ಸ್ಮರಣ ಸಂಚಿಕೆನ್ ಮುಂಡಪಲ್ಲ ಕ್ಷೇತ್ರದ ಆಡಳಿತ ಮೊಕ್ತೇಸೆರಾಯಿನ ಕೆ.ಕೆ.ಶೆಟ್ಟಿ ಮುಂಡಪಲ್ಲ ಬಿಡುಗಡೆ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಕಾಸ್ರೋಡು ಸಂಸದೆರಾಯಿನ ರಾಜ್ ಮೋಹನ್ ಉಣ್ಣಿತ್ತಾನ್,ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ, ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ.ಅಶ್ರಫ್, ಉದ್ಯಮಿಲಾಯಿನ ಕೆ.ಡಿ.ಶೆಟ್ಟಿ ದಡ್ಡಂಗಡಿ, ಕೃಷ್ಣ ಎನ್.ಉಚ್ಚಿಲ್, ಭಿಷಜಾಕ್ಷಿ ಭಂಡಾರಮನೆ, ಮೋಹನ್ ಶೆಟ್ಟಿ ಮಜ್ಜಾರ್,ಕೆ. ಆರ್.ಜಯಾನಂದ,ಅಶೋಕ್ ಕುಮಾರ್ ಕತಾರ್, ಕಲಾ ರತ್ನ ಶಂನಾಡಿಗ ಕುಂಬಳೆ,ಐಲ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ನಾರಾಯಣ ಹೆಗ್ಡೆ ಕೋಡಿಬೈಲ್,ಶ್ರೀಧರ ಶೆಟ್ಟಿ ಗುಬ್ಬೆ ಕನ್ಯಾನ,ಮುಳಿಂಜ ಕ್ಷೇತ್ರದ ಅಧ್ಯಕ್ಷೆರ್ ಹರಿನಾಥ ಭಂಡಾರಿ,ಪಟ್ಟತ್ತೂರು ಜುಮಾ ಮಸೀದಿದ ಅಧ್ಯಕ್ಷೆರ್ ಅಬ್ದುಲ್ಲ ಕೆ.,ಕುಞಿರಾಮನ್ ಶಿಲ್ಪಿ ನೆಲ್ಲಿಕಟ್ಟೆ ಅಧಿಗುಳಿ,ಕನಿಲ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ವಿಶ್ವನಾಥ ಕುದೂರು, ಉಪ್ಪಳ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ಸುಕುಮಾರ ಉಪ್ಪಳ, ಆರಿಕಾಡಿ ಆಲಿ ಚಾಮುಂಡಿ ಕ್ಷೇತ್ರದ ಅಧ್ಯಕ್ಷೆರ್ ಕರುಣಾಕರ,ಐಲ ಗತ್ಯಮ್ಮ ಭಗವತೀ ಕ್ಷೇತ್ರದ ಅಧ್ಯಕ್ಷೆರ್ ಆನಂದ ಎನ್.ಐಲ ಪಾಲ್ ಪಡೆಯೆರೆ ಉಲ್ಲೆರ್.
ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಮಧ್ಯಾಹ್ನ 2.30 ಗ್ ವಿಷ್ಣು ಯಕ್ಷ ಬಳಗ ಮಜಿಬೈಲ್ ಮೊಕ್ಲೆರ್ದ್ “ಸಪ್ತ ದುರ್ಗೆಯೆರ್” ಯಕ್ಷಗಾನ ತಾಳ ಮದ್ದಳೆ ಬೊಕ್ಕ ರಾತ್ರಿ 8 ಗಂಟೆರ್ದ್ ತ್ರಿಶೂಲ್ ಫ್ರೆಂಡ್ಸ್ ಸಂತಡ್ಕ ಆಯೋಜನೆದ ಶ್ರೀ ಶಿರಿಡಿ ಸಾಯಿಬಾಬ ಮಂದಿರ ಸಾಯಿಶಕ್ತಿ ಕಲಾ ಬಳಗ ಉರ್ವ ಚಿಲಿಂಬಿ ಮೊಕ್ಲೆರ್ದ್ “ಬೊಳ್ಳಿಮಲೆತ ಶಿವಶಕ್ತಿಲು” ತುಳು ಪೌರಾಣಿಕ ನಾಟಕ ನಡಪೆರೆ ಉಂಡು.
🖋️ ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಮೀರಾರೋಡ್ ಶ್ರೀ ಲಕ್ಷ್ಮೀನಾರಾಯಣ ಭಜನಾ ಸಮಿತಿದ 24ನೇ ವರ್ಷದ ಮಂಗಳ ಉಚ್ಚಯ ಲೇಸ್ ಫೆ.23-25 ಮುಟ್ಟ ನಡಪರೆ ಉಂಡು.
ಫೆ.23 ಕ್ಕ್ ಬಯ್ಯಗ್ ಪೊಂಜೋವುನಕ್ಲೆರ್ದ್ ಅರಶಿನ ಕುಂಕುಮ ಲೇಸ್ ನಡಪರೆ ಉಂಡು.
ಫೆ.24 ಕ್ಕ್ ಬೊಲ್ಪುಗು ಗಣಹೋಮ, ಕಲಶ ಪ್ರತಿಷ್ಠಾಪನೆ, ಏಕಾಹ ಭಜನೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಫೆ.25 ಕ್ಕ್ ಬೊಲ್ಪುಗು ಮಂಗಳಾರತಿ ಬೊಕ್ಕ ಪ್ರಸಾದ ಪಟ್ಟುನ ಲೇಸ್ ನಡಪರೆ ಉಂಡು.
ಈ ಮಾತ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಶ್ರೀ ಲಕ್ಷ್ಮೀನಾರಾಯಣ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಲಕ್ಷ್ಮೀನಾರಾಯಣ ಭಜನಾ ಸಮಿತಿ ಕಾರ್ಯಕಾರಿ ಮಂಡಳಿದ ಗುರ್ಕಾರೆ ಹರೀಶ್ ಜಿ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ನಡಿಕುದ್ರು ಶ್ರೀ ಧರ್ಮದೈವ ಜಾರಂದಾಯ ದೈವೊಲ್ಯದ ಗಡು ಜಾಗೆಡ್ ಶ್ರೀ ಧರ್ಮದೈವೊಲೆನ ನೇಮ ಬುಧಾರ ರಾತ್ರೆ ಭಾರಿ ಗೌಜಿಡ್ ನಡತ್ಂಡ್.
ಬೊಲ್ಪುಗು ಪ್ರಾರ್ತನೆ, ನವಕ ಕಲಶಾಭಿಷೇಕ, ನಾಗದೇವೆರೆಗ್ ಪೇರ್ ದ ಅಭಿಷೇಕ, ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ಭಂಡಾರ ಜಪ್ಪೆರೆ, ಅನ್ನ ಪ್ರಸಾದ ಸೇವೆ, ಮೈಸಂದಾಯ ನೇಮ, ಶ್ರೀ ಧರ್ಮದೈವ ಜಾರಂದಾಯ, ಬಂಟ ಪರಿವಾರ ದೈವೊಲೆನ ಗಡಿನಾಡು ನೇಮ ನಡತ್ಂಡ್.
ಈ ಪೊರ್ತುಡು ದೈವೊಲ್ಯದ ಆಡಳಿತ ಮಂಡಳಿದ ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.
