ಸುಬ್ರಹ್ಮಣ್ಯ: ಭಾರತದ ಸಂವಿಧಾನ ರಚನೆ ಆದ್ 75 ವರ್ಷ ಪೂರ್ತಿ ಆಯಿನ ಅಂಗವಾದ್ ದಕ್ಷಿಣ ಕನ್ನಡ ಜಿಲ್ಲೆಡ್ ಜನ ಜಾಗೃತಿ ಪುಟ್ಟಾವುನ ಜಾಥಾಗ್ ಬುಧವಾರ ಮಧ್ಯಾಹ್ನ ಸುಬ್ರಮಣ್ಯಡ್ ಸ್ವಾಗತ ಮಲ್ತೆರ್
ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.
ಜಾಥಾದ ನೋಡಲ್ ಅಧಿಕಾರಿ ಸಮಾಜ ಕಲ್ಯಾಣ ಇಲಾಖೆದ ಅಧಿಕಾರಿ ಕೃಷ್ಣ ಪ್ರಸ್ತಾವಿಕದೊಟ್ಟಿಗೆ ಜಾತಾದ ಪೊಲಬು ಕೊರಿಯೆರ್.
ಮಲ್ಲ ಬಿನ್ನೆರಾದ್ ನಿವೃತ್ತ ಉಪನ್ಯಾಸಕೆರ್ ವಿಶ್ವನಾಥ ನಡುತೋಟ ಸಂವಿಧಾನದ ಉದ್ದೇಶ ನಡತ್ತ್ ಬತ್ತಿನ ಸಾದಿದ ಬಗ್ಗೆ ಪಾತೆರಿಯೆರ್. ಗ್ರಾಮ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಮಹೇಶ್ ಭಾರತದ ಸಂವಿಧಾನದ ಪೀಠಿಕೆದ ಪ್ರತಿಜ್ಞೆ
ಓದಾಯೆರ್.
ಉಂದುವೇ ಪೊರ್ತುಡು ಜಾನಪದ ಕಲಾವೇದಿಕೆ ಸುರತ್ಕಲ್ ಮೊಕುಲು ಸಂವಿಧಾನಗ್ ಸಂಬಂಧಪಟ್ಟಿನ ಬೀದಿ ನಾಟಕ ಮಲ್ತ್ ತೊಜಪಾಯೆರ್. ವೇದಿಕೆಡ್ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಎಚ್ಎಲ್ ವೆಂಕಟೇಶ್ ಗ್ರಾಮಕರಣಿಕೆರ್ ರವಿಚಂದ್ರ ಗ್ರಾಮ ಪಂಚಾಯತ್ ದ ಸದಸ್ಯೆರ್ ಇತ್ತೆರ್.
ಸುಬ್ರಹ್ಮಣ್ಯ ಪಿಯು ಕಾಲೇಜ್ ದ ವಿದ್ಯಾರ್ಥಿಲು ಬೊಕ್ಕ ಶಿಕ್ಷಕೆರ್ ,ಡಿಗ್ರಿ ಕಾಲೇಜ್ ದ ಉಪನ್ಯಾಸಕೆರ್, ವಿದ್ಯಾರ್ಥಿಲು ಕುಮಾರಸ್ವಾಮಿ ವಿದ್ಯಾಲಯದ ಶಿಕ್ಷಕೆರ್ ಬೊಕ್ಕ ವಿದ್ಯಾರ್ಥಿಲು ಎನೇಕಲ್ ಪ್ರೌಢಶಾಲಾ ಶಿಕ್ಷಕೆರ್, ವಿದ್ಯಾರ್ಥಿಲು, ಐನೆಕಿದು ಹಿರಿಯ ಪ್ರಾಥಮಿಕ ಶಾಲಾ ಶಿಕ್ಷಕೆರ್ ಬೊಕ್ಕ ವಿದ್ಯಾರ್ಥಿಲು, ಸುಬ್ರಹ್ಮಣ್ಯ ಹಿರಿಯ ಪ್ರಾಥಮಿಕ ಶಾಲಾ ಶಿಕ್ಷಕೆರ್ ಬೊಕ್ಕ ವಿದ್ಯಾರ್ಥಿಲು ಇತ್ತೆರ್.
ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ. ಡಿ ಬತ್ತಿ ಬಿನ್ನೆರೆನ್ ಎದ್ಕೊಂದು, ಲೇಸ್ ದ ಸುದಾರಿಕೆ ಮಲ್ತೆರ್.
