Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ರಾಜಸ್ಥಾನದ ಸುರುತ್ತ ವಂದೇ ಭಾರತ್ ರೈಲ್ ನ್ ಉದಿಪನ ಮಲ್ತಿನ ಮೋದಿ

ರಾಜಸ್ಥಾನದ ಸುರುತ್ತ ವಂದೇ ಭಾರತ್ ಎಕ್ಸ್‌ಪ್ರೆಸ್‌ ರೈಲ್ ನ್ ಪ್ರಧಾನಿ ಮೋದಿ ಉದಿಪನ ಮಲ್ತೆರ್.

ಈ ರೈಲ್ ಡೆಲ್ಲಿ ಕಂಟೋನ್ಮೆಂಟ್ ಬೊಕ್ಕ ಅಜ್ಮೇರ್ ಮಾರ್ಗಡ್ ಸವಾರಿ ಮಲ್ಪುಂಡು. ಉಂದು ಜೈಪುರ, ಅಲ್ವಾರ್ ಬೊಕ್ಕ ಗುರ್ ಗಾಂವ್ ಡ್ ಉಂತುಂಡು. ಅತ್ತಂದೆ ಈ ರೈಲ್ 5 ಗಂಟೆ 15 ನಿಮಿಷಡ್ ಡೆಲ್ಲಿರ್ದ್ ಅಜ್ಮೇರ್ ಗ್ ಎತ್ತುಂಡು.

ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ತಿನ ಎಸ್.ಅಂಗಾರ

ಸುಳ್ಯ ವಿಧಾನಸಭಾ ಕ್ಷೇತ್ರದ ಹಾಲಿ ಶಾಸಕೆರ್, ಸಚಿವೆರ್ ಎಸ್.ಅಂಗಾರ ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ದೆರ್.

ಇನಿ ಮೆರೆನ ಇಲ್ಲಡ್ ಸುದ್ದಿ ಸಂದರ್ಶನಡ್ ಪಾತೆರ್ದ್, ಪಕ್ಷ ಟಿಕೆಟ್ ಕೊರಂದಿನ ಬಗೆಟ್ ಎನ್ನ ಅಸಮಾಧಾನ ಅತ್ತ್, ಆಂಡ ಇತ್ ವರ್ಷೊ ಪಕ್ಷಗಾದ್ ಬೊಕ್ಕ ಸಮಾಜಗಾದ್ ಒವ್ವೇ ಕಪ್ಪು ಚುಕ್ಕೆ ಬಾರಂದಿಲೆಕ್ಕ ಮಲ್ತಿನ ಸೇವೆನ್ ಗೌರವಿಸುನ ಕ್ರಮ ಉಂದು ಅತ್ತ್. ಪ್ರಾಮಾಣಿಕ ರಾಜಕಾರಣಗ್ ಇನಿ ಬೆಲೆ ಇಜ್ಜಂದಿಲೆಕ್ಕ ಅತ್ಂಡ್. ಎನ್ನ ಪ್ರಾಮಾಣಿಕತೆಯೇ ಎಂಕ್ ಮುಳ್ಳು ಆಂಡ್. ಲಾಭ ಮಲ್ಪುನೇ ಎನ್ನ ಗುಣ ಆದಿಜ್ಜಂಡ್. ಅವ್ವೇ ಎಂಕ್ ಹಿನ್ನಡೆ ಆಂಡ್ ಪಂದ್ ಪಂಡಿನ ಅಂಗಾರೆರ್, ಯಾನ್ ನನ ರಾಜಕಾರಣಡ್ ಇಜ್ಜಿ. ಚುನಾವಣಾ ಪ್ರಚಾರಡ್ಲಾ ಇಜ್ಜಿ. ಪೊಸ ಅಭ್ಯರ್ಥಿ ಬೊಕ್ಕ ಅಕುಲು ಗೆಂದುನೆನೇ ಪಕ್ಷನೇ ತೂವು ಪಂದ್ ಪಂಡೆರ್.

ಮೆಕ್ಯಾನಿಕ್ ಗ್ 328 ಕೋಟಿ ಲಾಟರಿ

ಅಮೆರಿಕದ ಡುಬುಕ್ ದ ಅರ್ಲ್ ಲ್ಯಾಪಿ ಪನ್ಪುನ ಮೆಕ್ಯಾನಿಕ್ ಎ.11 ಕ್ಕ್ ಐಯೋವಾ ಲಾಟರಿ ಟಿಕೆಟ್ ದೆತೊಂದೆರ್.

ಮೇರ್ ದೆತೊನ್ನ ಈ ಟಿಕೆಟ್ ಗ್ 40 ಮಿಲಿಯನ್ ಡಾಲರ್ (328 ಕೋಟಿ ರೂ.) ಇನಾಮು ಬೈದ್ಂಡ್. 40 ಮಿಲಿಯನ್ ಡಾಲರ್ ಲೆನ್ 29 ವರ್ಷ ಮುಟ್ಟ ಕಂತುಡು ಕೊರಿಯೆರೆ ಆಪುಂಡು. ಆಂಡ ಒಂಜೇ ಸರ್ತಿ ಇನಾಮುಗ್ ಬೇಡಿಕೆ ದೀಯಿರ್ನೆದಾವೆರ 21.28 ಮಿಲಿಯನ್ ಡಾಲರ್ (174 ಕೋಟಿ ರೂ. ಮಾತ್ರ ತಿಕ್ ದ್ಂಡ್.

ತೋಡಾರು ನವಚೇತನ ಸೇವಾ ಬಳಗ (ರಿ.) ದ ವತಿರ್ದ್ ಬಡಪತ್ತ್ ಕುಟುಂಬಗ್ 10ಸಾರ ರೂ. ಪನವುದ ಸಕಾಯ

ತೋಡಾರು ನವಚೇತನ ಸೇವಾ ಬಳಗ (ರಿ.) ದ ವತಿರ್ದ್ 75ನೇ ಯೋಜನೆದ ಅಂಗವಾದ್ ಒಂಜಿ ಬಡಪತ್ತ್ ಕುಟುಂಬಗ್ 10 ಸಾರ ರೂ. ಪನವುದ ಸಕಾಯನ್ ಮಲ್ತೆರ್.

ಕುಪ್ಪೆಪದವು ಕುಲವೂರು ಗ್ರಾಮದ ಅಟ್ಟೆ ಪದವು ನಿವಾಸಿ ಆಯಿನ ನಮಿತಾ ಸತೀಶ್ ಪೂಜಾರಿ ದಂಪತಿಲೆನ ಎಲ್ಯ ಮಗಲಾಯಿನ ನವ್ಯ ಮೇರ್ ಎಲುತ್ತ ಕ್ಯಾನ್ಸರ್ ರ್ದ್ ನರಲೊಂದು ಉಲ್ಲೆರ್.

ದೇರಳಕಟ್ಟೆದ ಯೆನಪೂಯ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇಪ್ಪುನ ಈ ಬಾಲೆದ ಚಿಕಿತ್ಸೆದ ಕರ್ಚಿಗ್ ತೋಡಾರು ನವಚೇತನಾ ಸೇವಾ ಕೂಟದ ವತಿರ್ದ್ 10 ಸಾರ ರೂ. ನ್ ಬಾಲೆದ ಇಲ್ಲಗ್ ಪೋದು ಬಾಲೆದ ಪೊಪ್ಪನ ಕೈಟ್ಟ್ ಕೊರಿಯೆರ್. ಈ ಪೊರ್ತುಡು ಕೂಟದ ಸದಸ್ಯೆರ್ ಇತ್ತೆರ್.

ಬಿಜೆಪಿದ ಸುರುತ್ತ ಪಟ್ಟಿಡ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್

ಬೆಂಗ್ಲೂರ್: ಕರ್ನಾಟಕ ವಿಧಾನಸಭಾ ವೋಟುಗು ಬಿಜೆಪಿ ಅಂಗಾರೆ ರಾತ್ರೆ (ಏ.11) ಸುರುತ್ತ ಅಭ್ಯರ್ಥಿಲೆನ ಪಟ್ಟಿ ಪ್ರಕಟ ಮಲ್ದ್ಂಡ್. ಒಟ್ಟು 189 ಅಭ್ಯರ್ಥಿಲೆನೆಟ್ಟ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಘೋಷಣೆ ಆಯಿನ ಅಭ್ಯರ್ಥಿಲೆನ ಪಟ್ಟಿಡ್ ಮೂಜಿ ಹಾಲಿ ಶಾಸಕಿಯೆರ್ ಬಿಜೆಪಿ ಟಿಕೆಟ್‌ ಪಡೆಪುನೆಟ್ಟ್ ಯಶಸ್ವಿ ಆತೆರ್. ಶಶಿಕಲಾ ಜೊಲ್ಲೆ, ಪೂರ್ಣಿಮಾ ಶ್ರೀನಿವಾಸ್‌ ಬೊಕ್ಕ ರೂಪಾಲಿ ಸಂತೋಷ್‌ ನಾಯ್ಕ್‌ ಹಾಲಿ ಶಾಸಕೆರ್. ಈ ಸರ್ತಿ ವೋಟುಡು 52 ಪೊಸ ಮೋನೆಗ್ ಬಿಜೆಪಿ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಎರೆಗ್ ಒಲ್ಪ ಬಿಜೆಪಿ ಟಿಕೆಟ್?

1. ನಿಪ್ಪಾಣಿ- ಶಶಿಕಲಾ ಜೊಲ್ಲೆ
2.ಹಿರಿಯೂರು- ಪೂರ್ಣಿಮಾ ಶ್ರೀನಿವಾಸ್
3.ಸವದತ್ತಿ- ರತ್ನಾ ವಿಶ್ವನಾಥ್‌ ಮಾಮನಿ
4.ಕಾರವಾರ- ರೂಪಾಲಿ ನಾಯ್ಕ್
5.ಸಂಡೂರು- ಶಿಲ್ಪಾ ರಾಘವೇಂದ್ರ
6.ನಾಗಮಂಗಲ- ಸುಧಾ ಶಿವರಾಮೇಗೌಡ
7.ಪುತ್ತೂರ್- ಆಶಾ ತಿಮ್ಮಪ್ಪ ಗೌಡ
8.ಸುಳ್ಯ- ಭಾಗೀರಥಿ ಮುರುಳ್ಯ

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ, ಉದಿಪನ ಲೇಸ್

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ ಬೊಕ್ಕ ಉದಿಪನ ಲೇಸ್ ಸುಳ್ಯ ಶ್ರೀ ರಾಮ ಭಜನಾ ಮಂದಿರದ ಸಭಾಭವನಡ್ ಕೋಡೆ (ಎ.9) ಕ್ಕ್ ನಡತ್ಂಡ್.

ಈ ಲೇಸ್ ಮೋಹನ ಆಚಾರ್ಯ ಕೆದಿಕ್ಕಾನ ಮೆರೆನ ಪ್ರಾರ್ತನೆದೊಟ್ಟಿಗೆ ಸುರು ಆಂಡ್. ಸಂಘದ ಪೊಸ ಸಮಿತಿನ್ ಹರೀಶ್ ಬೂಡುಪನ್ನೆ, ವಕೀಲೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಚಾವಡಿಡ್ ಜಿಲ್ಲಾ ಅಧ್ಯಕ್ಷೆರ್ ಸತೀಶ್ ಆಚಾರ್ಯ ಚೊಕ್ಕಾಡಿ, ತಾಲೂಕ್ ಅಧ್ಯಕ್ಷೆರ್ ವಾಸುದೇವ ಆಚಾರ್ಯ ಮರ್ಕಂಜ, ಕಾನೂನು ಸಲಹೆಗಾರೆರ್ ಹರೀಶ್ ಬೂಡುಪನ್ನೆ, ಸಂಘದ ತಾಲೂಕ್ ಕಾರ್ಯದರ್ಶಿ ಜನಾರ್ದನ ಆಚಾರ್ಯ ಪಂಜ, ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಇತ್ತೆರ್.

ಕಾನೂನು ಸಲಹೆ ಕೊರ್ನ ಹರೀಶ್ ಬೂಡುಪನ್ನೆ ಮೇರ್ ಸಂಘದ ಸದಸ್ಯೆರೆನ ಕೆಲವು ಪ್ರಶ್ನೆಲೆಗ್ ಕಾನೂನು ರೀತಿದ ತಿಳುವಳಿಕೆ ಪೊಲಬುನ್ ಕೊರಿಯೆರ್. ಬೊಕ್ಕ ಜಿಲ್ಲಾ ಸಮಿತಿಡ್ ಅಧ್ಯಕ್ಷೆರಾದ್ ಸತೀಶ್ ಆಚಾರ್ಯ ಚೊಕ್ಕಾಡಿ, ಉಪಾಧ್ಯಕ್ಷೆರಾದ್ ರಮೇಶ್ ಆಚಾರ್ಯ ಕಡೆಶಿವಾಲಯ, ಕೇಶವ ಆಚಾರ್ಯ ಕಾವಲು ಕಟ್ಟೆ, ಸಂಚಾಲಕೆರಾದ್ ರಜನೀಶ್ ಆಚಾರ್ಯ ಬಂಟ್ವಾಳ, ಪ್ರಧಾನ ಕಾರ್ಯದರ್ಶಿಯಾದ್ ಚಂದ್ರಶೇಖರ ಆಚಾರ್ಯ ತೊಡಿಕಾನ, ಜತೆ ಕಾರ್ಯದರ್ಶಿಯಾದ್ ಜನಾರ್ದನ ಆಚಾರ್ಯ ಪಂಜ, ಕೋಶಾಧಿಕಾರಿಯಾದ್ ರೋಹಿತ್ ಆಚಾರ್ಯ ಚೀಮುಲ್ಲು, ಸಂಘಟನಾ ಕಾರ್ಯದರ್ಶಿಯಾದ್ ಭವಾನಿಶಂಕರ ಆಚಾರ್ಯ ಅಡ್ಡನಪಾರೆ, ಸದಸ್ಯೆರಾದ್ ರವಿ ಆಚಾರ್ಯ ಸಿದ್ಧಕಟ್ಟೆ, ಸುಂದರ ಆಚಾರ್ಯ ಬೊಲ್ತೇರ್, ಪ್ರಸನ್ನ ಆಚಾರ್ಯ ಪುತ್ತೂರ್, ಜಗನ್ನಾಥ ಆಚಾರ್ಯ ಪುತ್ತೂರ್, ಜಗದೀಶ ಆಚಾರ್ಯ ಕಡಬ, ಹರೀಶ್ ಆಚಾರ್ಯ ಬೆದ್ರ, ಸೀತಾರಾಮ ಆಚಾರ್ಯ ಮುಡಿಪು, ಉದಯ ಆಚಾರ್ಯ ಅರೆಕಲ್ಲು, ಆಯ್ಕೆ ಆಯೆರ್.

ಲೇಸ್ ದ ರೂಪುರೇಷೆನ್ ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಮಲ್ತೆರ್. ಕಮಲಾಕ್ಷ ಆಚಾರ್ಯ ಗೂನಡ್ಕ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ಆಚಾರ್ಯ ತೊಡಿಕಾನ ಸೊಲ್ಮೆ ಸಂದಾಯೆರ್. ಈ ಲೇಸ್ ಡ್ ದಕ್ಷಿಣ ಕನ್ನಡ ಜಿಲ್ಲೆ ಬೊಕ್ಕ ಮಡಿಕೇರಿ ತಾಲೂಕ್ ದ ವಿಶ್ವಕರ್ಮ ಸಮಾಜದ ಕಮ್ಮಾರ ಬೇಲೆ ಮಲ್ತೊಂದು ಇಪ್ಪುನ ಸದಸ್ಯೆರ್ ಹಾಜರ್ ಇತ್ತ್ ದ್, ಸಲಹೆ ಸೂಚನೆಲೆನ್ ಕೊರ್ದು, ಪೊಲಬು ಪಡೆಯೆರ್.

ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು “ಗೌಜಿ ಗಮ್ಮತ್” ತುಳು ಪಿಚ್ಚರ್

ಮೋವಿನ್ ಫಿಲಂಮ್ಸ್ ಲಾಂಭನಡ್ ಮೋಹನ್ ಭಟ್ಕಳ್, ವಿನಾಯಕ ತೀರ್ಥಹಳ್ಳಿ ನಿರ್ಮಾಣಡ್, ಮಣಿ ಎಜೆ ಕಾತೀಕೇಯನ್ ನಿರ್ದೇಶನಡ್ ತಯಾರ್ ಆಯಿನ “ಗೌಜಿ ಗಮ್ಮತ್” ತುಳು ಪಿಚ್ಚರ್ ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು.

ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಪಾತೆರ್ದ್, ಕುಡ್ಲದ ರೂಪವಾಣಿ, ಬಿಗ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲದ ಭಾರತ್ ಸಿನಿಮಾ, ಐನಾಕ್ಸ್, ಪಡುಬಿದ್ರೆದ ಭಾರತ್ ಸಿನಿಮಾ, ಸುರತ್ಕಲ್‌ದ ನಟರಾಜ್, ಸಿನಿ ಗ್ಯಾಲಕ್ಸಿ, ಪುತ್ತೂರ್‌ದ ಅರುಣಾ, ಭಾರತ್ ಸಿನಿಮಾ, ಬೆದ್ರದ ಅಮರಶ್ರೀ, ಕಾರ್ಲದ ರಾಧಿಕಾ ಇಂಚಿನ ಕಡೆಟ್ಟ್ ಈ ಪಿಚ್ಚರ್ ಬುಡುಗಡೆ ಆಯರೆ ಉಂಡು. ತುಳುನಾಡ್‌ದ ಪೊಸ ಕಲಾವಿದೆರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್. ಈ ಪಿಚ್ಚರ್ ಒಂಜೇ ಪಂತೆಡ್ 19 ದಿನತ್ತ ಕಾಲ ಚಿತ್ರೀಕರಣ ಆದಿತ್ತ್ಂಡ್ ಪಂದ್ ಪಂಡೆರ್.

ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್ ಪಾತೆರ್ದ್, ಈ ಪಿಚ್ಚರ್‌ಗ್ ಯು ಎ ಸರ್ಟಿಫಿಕೇಟ್ ತಿಕ್ಕ್‌ದ್ಂಡ್. ಗೌಜಿ ಗಮ್ಮತ್ ಪಿಚ್ಚರ್ ಮಸ್ತ್ ಹಾಸ್ಯಮಯವಾದ್ ಉಂಡು. ಇತ್ತೆದ ಪೀಳಿಗೆದ ಜನಕುಲು ಇಷ್ಟ ಪಡುನ ಕತೆನ್ ಹಾಸ್ಯಭರಿತವಾದ್ ನಿರ್ದೇಶನ ಮಲ್ತ್‌ದೆರ್. ಸಮಾಜಗ್ ಎಡ್ಡೆ ಸಂದೇಶನ್ ಈ ಪಿಚ್ಚರ್ ಕೊರ್ಪುಂಡು ಪಂದ್ ಪಂಡೆರ್.

ಕುಸಲ್ದರಸೆ ನವೀನ್ ಡಿ ಪಡೀಲ್, ನಾಯಕ ನಟೆಯಾದ್ ಕರ್ಣ ಉದ್ಯಾವರ್, ನಾಯಕಿಯಾದ್ ಸ್ವಾತಿ ಪ್ರಕಾಶ್ ಶೆಟ್ಟಿ ಅಭಿನಯ ಮಲ್ತ್‌ದೆರ್. ಪ್ರಸನ್ನ ಶೆಟ್ಟಿ ಬೈಲೂರ್, ಉಮೇಶ್ ಮಿಜಾರ್, ಜಯಶೀಲಾ ಮರೋಳಿ, ಪ್ರಭಾಕರ್ ಬ್ರಹ್ಮಾವರ, ಚಂದ್ರಹಾಸ ಶೆಟ್ಟಿ ಮಾಣಿ, ಸುಜಾತ ಶಕ್ತಿನಗರ, ಕಿಶೋರ್ ಶೆಟ್ಟಿ ಪಿಲಾರ್, ಹರೀಶ್ ಪೂಜಾರಿ ಕಡ್ತಲ, ಹರೀಶ್ಚಂದ್ರ ಪೆರಾಡಿ ಪ್ರಭಾಕರ್ ಆಚಾರ್ಯ ಮೂಡುಬೆಳ್ಳೆ, ಅಶ್ವತ್ ಶೆಟ್ಟಿ, ವಿಕ್ಕಿ ರಾವ್, ಮಿರ್ಚಿ ಸಂದೇಶ್ ದೇವಾಡಿಗ, ಅಶ್ವತ್ಥಪುರ, ಶಿವರಾಮ್ ವಿಟ್ಲ, ರಾಧಿಕಾ ಭಟ್, ವನಿತಾ ಸುವರ್ಣ, ನರಸಿಂಹ ನಾಯಕ್, ರಶ್ಮಿತಾ ಸಾಲಿಯಾನ್ ಪಿಲಾರ್, ಸುರಕ್ಷಾ ಕೋಟ್ಯಾನ್ ಪಿಲಾರ್ , ಲೊಕೇಶ್ ಮಾಣಿಲ, ಅನುಷಾ ಶೆಟ್ಟಿ,
ಬೇಬಿ ಚಿತ್ರಿತಾ ದೇವಾಡಿಗ ಹಳೆಯಂಗಡಿ, ಲೊಕೇಶ್ ಶೆಟ್ಟಿ, ಜ್ಞಾನೇಶ್ ಆಚಾರ್ಯ, ಶಶಿರಾಜ್ ಆಚಾರ್ಯ, ಮಧು ಪೂಜಾರಿ ವಿಷ್ಣುನಗರ, ನಿಲೇಶ್ ಶೆಟ್ಟಿ ಇನ್ನ, ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್.

ಪತ್ರಿಕಾಗೋಷ್ಠಿಡ್ ಪಿಚ್ಚರ್‌ದ ನಟಿ ಸ್ವಾತಿ ಪ್ರಕಾಶ್, ಕರುಣಾಕರ್ ಉಡುಪಿ, ನಿರ್ಮಾಪಕೆರ್ ವಿನಾಯಕ ತೀರ್ಥಹಳ್ಳಿ, ಮೋಹನ್ ಭಟ್ಕಳ್, ಸಂದೀಪ್, ಪ್ರಭಾಕರ ಬ್ರಹ್ಮಾವg, ಜಯಶೀಲ ಮರೋಳಿ, ಛಾಯಾಗ್ರಹಕೆರ್ ರಾಮಾಂಜನೇಯ ಇತ್ತೆರ್.

ಮ್ಯಾನ್ಮಾರ್ ಸೇನೆದ ಮಿತ್ತ್ ದಾಳಿ: 100 ಜನ ತೀರ್ ಪೋಯೆರ್

ಮ್ಯಾನ್ಮಾರ್ ಸೇನೆದ ಜನತ್ತ ಮಿತ್ತ್ ದಾಳಿ ನಡತ್ಂಡ್.

ಈ ದಾಳಿಡ್ ಸುಮಾರ್ 20 ನಿಮಿಷ ಮುಟ್ಟ ಇನಾಮರ್ದ್ ಗುಂಡು ರಾಪಾದೆರ್. ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್. ವಿಶ್ವಸಂಸ್ಥೆ ಈ ದಾಳಿನ್ ಖಂಡಿಸಾದ್ಂಡ್. ಸೈನ್ಯ ಬಂಡುಕೋರೆರೆನ ಭದ್ರಕೋಟೆ ಪಂದ್ ಪರಿಗಣಿಸಾಯಿನ ಪಜಿಗಿ ಪ್ರದೇಶಡ್ ದಾಳಿ ಮಲ್ದ್ಂಡ್ ಪಂದ್ ವರದಿ ಆತ್ಂಡ್.

ಬಿಹಾರಡ್ 4.3ಬಿರ್ಸ್ ದ ಭೂಕಂಪ

ಬಿಹಾರದ ಅರಾರಿಯಾ ಪ್ರದೇಶಡ್ ಇನಿ ಬೊಲ್ಪುಗು 4.3 ಬಿರ್ಸ್ ದ ಭೂಕಂಪ ಆತ್ಂಡ್.

ಭೂಮಿದ ಮೇಲ್ ರ್ದ್ 10 ಕಿ.ಮೀ ಅಡಿಟ್ಟ್ ಭೂಕಂಪ ಆತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್. ಈ ಭೂಕಂಪರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಬಪ್ಪನಾಡ್ ಜಾತ್ರೆಗ್ ಪಗೆಲ್ ತೇರ್, ಮಲ್ಲಿಗೆದ ರಾಶಿಡ್ ಶಯನೋತ್ಸವ, ಭಕ್ತೆರೆರ್ದ್ ಲಕ್ಷಾಂತರ ಅಟ್ಟಿ ಮಲ್ಲಿಗೆ ಸಂದೈತ

ಮೂಲ್ಕಿ: ಕೋಮು ಸೌಹಾರ್ದತೆದ ಪರಪೋಕು(ಇತಿಹಾಸ) ಇತ್ತಿನ ಮೂಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನಡ್ ಜಾತ್ರೆದ ನಿಲೆಟ್ಟ್ ಅಂಗಾರೆ ಪಗೆಲ್ ತೇರ್ ರಾತ್ರೆ ಬಲಿ ಉಚ್ಚಯ ನಡತ್ ದ್ ಶುನೋತ್ಸವ ನಡತ್‌ಂಡ್.

ಕಾಂಡೆ ಪಗೆಲ್ ತೇರ್ ದ ಉಚ್ಚಯ ಆಯಿ ಬೊಕ್ಕ ಭಕ್ತೆರೆಗ್ ಅಲೆ ನೀರ್ ದ ಸೇವೆ, ಮಧ್ಯಾಹ್ನ ಅನ್ನ ಸಂತರ್ಪಣೆ ನಡತ್ಂಡ್. ಬಯ್ಯಡ್ ಶ್ರೀ ಪಂಚದುರ್ಗೆನ ಶಯನೋತ್ಸವಗ್ ಭಕ್ತೆರ್ ಲಕ್ಷಾಂತರ ಮಲ್ಲಿಗೆದ ಅಟ್ಟಿಲೆನ್ ಕನತ್ ದ್ ದೇವೆರೆಗ್ ಅರ್ಪಿಸಾದ್ ಪ್ರಾರ್ತನೆ ಮಲ್ತೆರ್. ಜಾತ್ರಾ ಮಹೋತ್ಸವದ ಅಂಗವಾದ್ ಬಾಕಿಮಾರ್ ದೀಪೋತ್ಸವ, ಬೊಂಬೆ ರಥೋತ್ಸವ, ಬಂಗಾರ್ದ ಪಲ್ಲಕ್ಕಿ ಉತ್ಸವ ನಡತ್‌ಂಡ್. ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ ಬೊಕ್ಕ ನರಸಿಂಹ ಭಟ್ ನೇತೃತ್ವದಲ್ಲಿ ಧಾರ್ಮಿಕ ವಿಧಿ ವಿಧಾನ ನಡತ್ಂಡ್.

ಮುಲ್ಕಿ ಸೀಮೆದ ಅರಸು ವಂಶಸ್ಥರಾಯಿನ ದುಗ್ಗಣ್ಣ ಸಾವಂತೆರ್, ದೇವಲ್ಯದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಜಯಮ್ಮ, ಅಧಿಕಾರಿ ಶಿವಶಂಕರ್ ಮೊಕುಲು ಮಾತ ಇತ್ತೆರ್.

ಈ ಪೊರ್ತುಡು ದೇವಿನ ಶಯನೋತ್ಸವಗ್ ಬೋಡಿತ್ತಿನ ಮಲ್ಲಿಗೆನ್ ಶಿಮಂತೂರು ಯುವಕ ಮಂಡಲದ ಮುಕೇನ ಮಾರಾಟ ಮಲ್ತ್ ದ್ ಅಯಿಟ್ಟ್ ಒರಿವುನ ಲಾಭದ ದುಡ್ಡುನು ಅಂಗರಗುಡ್ಡೆದ ಬಡ ಕುಟುಂಬದ ಇಲ್ಲ್ ಕಟ್ಟರೆ ಕೊರ್ಪಿನ ಉದ್ದೇಶ ದೀವೊಂದೆರ್.

ಭಕ್ತರೆರ್ದ್ ಸಾಲ್ ಸಾಲಾದ್ ಮಲ್ಲಿಗೆ ಸಂದೈತ ಆಯಿಬೊಕ್ಕ ಮಲ್ಲಿಗೆನ್ ಸ್ಥಳೀಯ ಸಂಘ ಸಂಸ್ಥೆದ ಪ್ರಮುಖೆರ್ ಬೊಕ್ಕ ಸ್ವಯಂ ಸೇವಕೆರ್ ದೇವಸ್ಥಾನದ ಜಗಲಿಡ್ ಭಾರಿ ಪೊರ್ಲುಡೆ ಸಿಂಗಾರ ಮಲ್ದೆರ್.

ಸಾಂಸ್ಕ್ರತಿಕ ಕಾರ್ಯಕ್ರಮದ ಅಂಗವಾದ್ ಬಪ್ಪನಾಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ ಡ್ಯಾಜೆಲ್ ಸ್ಟುಡಿಯೊ ಮುಲ್ಕಿ ಮುಲ್ತ ಯಕ್ಷಗಾನ ತರಬೇತಿ ಕೇಂದ್ರದ ವಿದ್ಯಾರ್ತಿಲೆರ್ದ್ ಶ್ರೀ ಕೃಷ್ಣ ಲೀಲೆ ಬೊಕ್ಕ ಗಜೇಂದ್ರ ಮೋಕ್ಷ ಯಕ್ಷಗಾನ ನಡತ್ಂಡ್.

You Missed