5,8,9 ಬೊಕ್ಕ 11ನೇ ಕ್ಲಾಸ್ ದ ಬೋರ್ಡ್ ಎಕ್ಸಾಂ ಕ್ಯಾನ್ಸಲ್ ಮಲ್ಪೆರೆ ಹೈಕೋರ್ಟ್ ಆದೇಶ ಮಲ್ದ್ಂಡ್.
2023ನೇ ಡಿಸೆಂಬರ್ ಡ್ ಬೋರ್ಡ್ ಎಕ್ಸಾಂ ನಡಪಾಯೆರೆ ರಾಜ್ಯ ಸರ್ಕಾರ ಸುತ್ತೋಲೆ ಕೊರ್ದಿತ್ತ್ಂಡ್. ಆಂಡ ಸರ್ಕಾರದ ಆದೇಶನ್ ಕ್ಯಾನ್ಸಲ್ ಮಲ್ಪೆರೆ ರುಪ್ಸಾ ಸಂಘಟನೆ ಹೈಕೋರ್ಟ್ ಗ್ ಅರ್ಜಿ ಪಾಡ್ದಿತ್ತ್ಂಡ್.
ಅರ್ಜಿ ವಿಚಾರಣೆ ನಡಪಾಯಿನ ನ್ಯಾಯಮೂರ್ತಿ ರವಿ ಹೊಸಮಂಜ ಮೆರೆನ ನ್ಯಾಯ ಪೀಠ, ಸರ್ಕಾರದ ಸುತ್ತೋಲೆನ್ ಕ್ಯಾನ್ಸಲ್ ಮಲ್ಪರೆ ಆದೇಶ ಮಲ್ದ್ಂಡ್.
ಬೊಂಬೈ ಶ್ರೀ ಮಣಿಕಂಠ ಯಕ್ಷ ಕಲಾಕೇಂದ್ರದ 12ನೇ ವಾರ್ಷಿಕ ಉಚ್ಚಯ ಮಾ.24 ಐತಾರ ಬೊಂಬೈ ಭಾಂಡುಫ್ ದ ಟ್ಯಾಂಕ್ ರೋಡ್ ದ ಹಾರ್ಮೊನಿ ಹಾಲ್ ಡ್ ನಡಪರೆ ಉಂಡು.
ಯಕ್ಷಗುರು ದೇವಲ್ಕುಂದ ಭಾಸ್ಕರ್ ಶೆಟ್ಟಿ ಮೆರೆನ ನಿರ್ದೇಶನಡ್ ಕಲಾಕೇಂದ್ರದ ಕಲ್ಪಾರ್ಥಿಲೆರ್ದ್ ಶ್ರೀರಾಮ ದರ್ಶನ ಯಕ್ಷಗಾನ ಪ್ರದರ್ಶನ ಆಯೆರೆ ಉಂಡು.
ಜೆ.ಜೆ ಹಾಸ್ಪಿಟಲ್ ಕಾಲೇಜ್ ದ ವೈದ್ಯಕೀಯ ಕಲ್ಪಾರ್ಥಿ ಮಾಸ್ಟರ್ ವಿಶ್ವ ಎಂ ಶೆಟ್ಟಿ ಮೆರೆಗ್ ಪ್ರತಿಭಾ ಪುರಸ್ಕಾರ ನಡಪರೆ ಉಂಡು.
ಈ ಲೇಸ್ ಡ್ ಕಲಾಭಿಮಾನಿಲು ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಸ್ಥಾಪಕ ಗುರ್ಕಾರೆ ದೇವಲ್ಕುಂದ ಭಾಸ್ಕರ ಶೆಟ್ಟಿ, ಗೌ. ಕಾರ್ಯದರ್ಶಿ ಮಹೇಂದ್ರ ಶೆಟ್ಟಿ, ಕೋಶಾಧಿಕಾರಿ ಸಮಿತ್ ಬಿ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಶಾಂತಿಪಲ್ಕೆ ಶ್ರೀ ಬ್ರಹ್ಮ ಮುಗೇರ ಮಹಾಂಕಾಳಿ ದೈವೊಲ್ಯಡ್ ಪೊಸತಾದ್ ನಿರ್ಮಾಣ ಆಯಿನ ಆಲಯಡ್ ಶ್ರೀ ಬ್ರಹ್ಮೆರ್ ಬೊಕ್ಕ ಕೊರಗಜ್ಜ ದೈವೊದ ಪುನರ್ ಪ್ರತಿಷ್ಠೆ, ಶ್ರೀ ಬ್ರಹ್ಮ ಮುಗೇರ ಮಹಾಂಕಾಳಿ ಬೊಕ್ಕ ಪರಿವಾರ ದೈವೊಲೆನ ಬ್ರಹ್ಮ ಕುಂಭಾಭಿಷೇಕ ಮಾ.7-10 ಮುಟ್ಟ ನಡಪರೆ ಉಂಡು.
ಈ ಲೇಸ್ ಏಳಿಂಜೆ ವೈ.ವಿ ಗಣೇಶ್ ಭಟ್ರೆನ ಪೌರೋಹಿತ್ಯಡ್ ನಡಪರೆ ಉಂಡು.
ಮಾ.7 ಗುರುವಾರ ಬೊಲ್ಪುಗು ಉಗ್ರಾಣ ಮೂರ್ತ, ಬಯ್ಯಗ್ ಶಿಲ್ಪಿಲೆರ್ದ್ ಆಲಯ ಪರಿಗ್ರಹ, ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ರಾಕ್ಷೋಘ್ನ ಹೋಮ, ವಾಸ್ತು ಹೋಮ, ವಾಸ್ತು ಪೂಜೆದ ಬಲಿ, ಪ್ರಕಾರ ಬಲಿ ನಡಪರೆ ಉಂಡು.
ಮಾ.8 ಸುಕ್ರಾರ ಬೊಲ್ಪುಗು ಗಣಪತಿ ಹೋಮ, ಕಲಶಾಧಿವಾಸ, ಪ್ರಧಾನ ಹೋಮ, ಪೊಸತಾದ್ ನಿರ್ಮಾಣ ಮಲ್ತಿನ ಆಲಯಡ್ ಬ್ರಹ್ಮೆರ್ ಬೊಕ್ಕ ಕೊರಗಜ್ಜ ದೈವೊದ ಪುನರ್ ಪ್ರತಿಷ್ಠೆ, ಬ್ರಹ್ಮಕುಂಭಾಭಿಷೇಕ, ಪ್ರಸನ್ನ ಪೂಜೆ, ದೈವೊಲೆನ ಭಂಡಾರ ಬರಿಯೆರೆ, ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ದೈವೊದ ದರ್ಶನ, ಧಾರ್ಮಿಕ ಸಭಾ ಲೇಸ್, ಕೈತಲ್ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಬೊಕ್ಕ ನೃತ್ಯ ಲೇಸ್ ರಾತ್ರೆ ಶ್ರೀ ಉಳ್ಳಾಯ ದೈವೊದ ನೇಮ, ಶ್ರೀ ಮಹಾಂಕಾಳಿ ದೈವೊದ ನೇಮ ನಡಪರೆ ಉಂಡು.
ಮಾ.9 ಸನಿಯಾರ ರಾತ್ರೆ ಶ್ರೀ ಬ್ರಹ್ಮ ಮುಗೇರ ಬೊಕ್ಕ ತಂಗಡಿ ದೈವೊದ ನೇಮ ನಡಪರೆ ಉಂಡು.
ಮಾ.10 ಐತಾರ ಬೊಲ್ಪುಗು ಶ್ರೀ ಅಲೇರ ಪಂಜುರ್ಲಿ ದೈವೊದ ಎಣ್ಣೆ ಬೂಲ್ಯ ಬೊಕ್ಕ ನೇಮ, ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ದೈವೊಲೆನ ಭಂಡಾರ ಪೋಯೆರೆ ಉಂಡು.
ಈ ಮಾತ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ತಾಳಿಪಾಡಿ ಶಾಂತಿಪಲ್ಕೆ ಶ್ರೀ ಬ್ರಹ್ಮ ಮುಗೇರ ಮಹಾಂಕಾಳಿ ದೈವೊಲ್ಯದ ಮಾನಾದಿಗೆದ ಗುರ್ಕಾರೆ, ಗುರ್ಕಾರೆ, ಪದುಕೆರ್, ಗುರಿಕಾರೆರ್, ಸಮಿತಿದ ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿ, ಮಹಿಳಾ ಸಮಿತಿ, ಬೊಕ್ಕ ಊರುದ ಪರವೂರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಕ್ಕೆ ಸುಬ್ರಮಣ್ಯ: ಕುಕ್ಕೆ ಸುಬ್ರಮಣ್ಯದ ಆದಿ ಸುಬ್ರಮಣ್ಯಡ್ 4 ಮಾರ್ಗ ಸೇರುನ ಸರ್ಕಲ್ ದಲ್ಪ ಮಾ.5 ಕ್ಕ್ 2 ಕಾರ್ ಆಕ್ಸಿಡೆಂಟ್ ಆತ್ಂಡ್. ಈ ಆಕ್ಸಿಡೆಂಟ್ ನಡಪರೆ ಮುಖ್ಯ ಕಾರಣ ಮುಲ್ಪ ಒವ್ವೇ ಹಂಪ್ಸ್ ನಿರ್ಮಾಣ ಮಲ್ಪಂದಿನವು ಪಂದ್ ತೆರಿದ್ ಬೈದ್ಂಡ್. ಅತ್ತಂದೆ ಮುಲ್ಪ ಒವ್ವೇ ಸರ್ಕಲ್ ನಿರ್ಮಾಣ ಮಲ್ದಿಜೆರ್.
ದಿನ ದಿನೊಲ ಸುಮಾರ್ ಜನ ಪಾದಚರಿಲು ಪೋಪುನ ಜಾಗೆ ಆತ್ಂಡ್. ಅತ್ತಂದೆ ಶಾಲೆದ ಜೋಕುಲು ಬೊಲ್ಪುಗು ಈ ಮಾರ್ಗಡ್ ಪೋಪೆರ್. ಮುಲ್ಪ ನನೊರ ಇಂಚಿನ ಆಕ್ಸಿಡೆಂಟ್ ಆವಂದಿಲೆಕ್ಕ ಸಂಬಂಧಪಟ್ಟಿನ ಇಲಾಖೆ ಕೂಡ್ಲೆ ಹಂಪ್ಸ್ ನಿರ್ಮಾಣ ಮಲ್ಪಾವೊಡು ಪಂದ್ ಕೈತಲ್ದ ಜನಕುಲು ಈ ಬಗೆಟ್ಟ್ ಒತ್ತಾಯ ಮಲ್ದೆರ್.
ಕಿನ್ನಿಗೋಳಿ: ಧಾರ್ಮಿಕ ಕೇಂದ್ರಡ್ ಮನಸ್ಸ್ ಸತ್ ಚಿಂತನೆರ್ದ್ ಇಪ್ಪೊಡು ಪಂದ್ ಕೊಂಡೆವೂರು ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿ ಪಂಡೆರ್.
ಕೊಡೆತ್ತೂರು ಅರಸು ಕುಂಜರಾಯ ದೈವೊಲ್ಯದ ಪೊಸ ಭಂಡಾರ ಇಲ್ಲಲ್ ದೈವೊಲೆನ ಪ್ರತಿಷ್ಠೆ, ಕಲಶಾಭಿಷೇಕದ ಬೊಕ್ಕ ನಡತಿನ ಸಭಾ ಲೇಸ್ ಡ್ ಮೇರ್ ಪಾತೆರಿಯೆರ್.
ಸತ್ ಚಿಂತನೆದ ಸತ್ಕರ್ಮರ್ದ್ ಸಾರ್ಥಕ ಸಾಧ್ಯ, ದೈವ ದೇವೆರೆಡ ದೀನ ನಂಬಿಕೆ ಏಪಲ ಕಮ್ಮಿ ಆಯೆರೆ ಬಲ್ಲಿ ಪಂದ್ ಸ್ವಾಮೀಜಿ ಪಂಡೆರ್.
ಶ್ರೀಕಾಂತ ಶೆಟ್ಟಿ ಕಾರ್ಲ ಉಪನ್ಯಾಸ ಕೊರ್ದು, ಸುಮಾರ್ ಕಡೆಟ್ಟ್ ಇಪ್ಪುನ ದೈವೊಲು ನಿಗೂಡವಾದ್ ಇತ್ತೆಲ ನಂಬಿಕೆದ ಆಧಾರಡೇ ಆರಾಧನೆ ಆವೊಂದು ಉಂಡು. ಅಹಂಕಾರ ಇಜ್ಜಂದಿನ ಶರಣಾಗತಿದ ಭಾವರ್ದ್ ದೈವ ದೇವೆರೆನ ಸೇವೆ ಮಲ್ತ್ಂಡ ಉದ್ಧಾರ ಖಂಡಿತ ಪಂದ್ ಪಂಡೆರ್.
ಈ ಪೊರ್ತುಡು ಕಟೀಲ್ ಲಕ್ಷ್ಮೀನಾರಾಯಣ ಆಸ್ರಣ್ಣ ದೇವಸ್ಯ ಮಠತ್ತ ವೇದವ್ಯಾಸ ಉಡುಪ, ಡಾ. ಸುಧಾಕರ ಶೆಟ್ಟಿ, ಜಯರಾಮ ಮುಕ್ಕಾಲ್ದಿ, ದೈವೊಲ್ಯ ಜೀರ್ಣೋದ್ಧಾರ ಸಮಿತಿದ ದೇವೀಪ್ರಸಾದ ಶೆಟ್ಟಿ, ಶ್ರೀಧರ ಆಳ್ವ ಮಾಗಂದಡಿ, ಬೊಂಬೈ ಸಮಿತಿದ ದಿವಾಕರ ಶೆಟ್ಟಿ, ಸಿಎ ಶರತ್ ಶೆಟ್ಟಿ, ಮೂಡು ದೇವಸ್ಯ ಮೋಹನ ಶೆಟ್ಟಿ, ಲೋಕೇಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಅಂಚೆನೆ ಬೇತೆ ಬೇತೆ ಕಡೆತ್ತ ಗಡಿಪ್ರಧಾನೆರಾಯಿನ ಪಣಂಬೂರು ಮಂಜು ಕಾವ, ಅತ್ತೂರು ಶಂಭು ಮುಕ್ಕಾಲ್ದಿ ಕುಡುಂಬೂರು ಗುತ್ತು ಜಯರಾಮ ಶೆಟ್ಟಿ, ರಘುರಾಮ ಮಾಡ ಕಿಲೆಂಜೂರು, ಪಡ್ರೆ ಭಂಡ್ರಿಯಾಲ್, ತಾಳಿಪಾಡಿಗುತ್ತು ದಿನೇಶ್ ಬಂಡ್ರಿಯಾಲ್, ಭೋಜ ಶೆಟ್ಟಿ ಮಾನಂಪಾಡಿ, ಮೂಡ್ರಗುತ್ತು ಸುಧಾಕರ ಶೆಟ್ಟಿ, ಪರ್ಲಬೈಲ್ ಗುತ್ತು ತುಕಾರಾಮ ಶೆಟ್ಟಿಗ್ ಮಾನಾದಿಗೆ ಮಲ್ತೆರ್. ನಿತೇಶ್ ಶೆಟ್ಟಿ ಎಕ್ಕಾರು ಲೇಸ್ ದ ಸುಧಾರಿಕೆ ಮಲ್ತೆರ್.
ಕೊಡೆತ್ತೂರು ಅರಸು ಕುಂಜರಾಯ ದೈವೊಲ್ಯದ ಪೊಸ ಭಂಡಾರ ಚಾವಡಿಡ್ ಶ್ರೀ ಅರಸು ಕುಂಜರಾಯನ ಬೊಕ್ಕ ಸಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ ನಡತ್ಂಡ್.
ಈ ಲೇಸ್ ಕೊಡೆತ್ತೂರು ದೇವಸ್ಯ ಮಠತ್ತ ವೇದವ್ಯಾಸ ಉಡುಪೆರೆನ ಮುತಾಲಿಕೆಡ್ ನಡತ್ಂಡ್.
ಈ ಲೇಸ್ ಪದುಕೆರ್, ಸದಸ್ಯೆರ್, ಗ್ರಾಮಸ್ಥೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.
ಪಣಂಬೂರು: ಪಣಂಬೂರು ಕಡಲ್ ಡ್ ಮಿಂದೊಂದು ಇಪ್ಪುನಗ ನೀರ್ ಪಾಲಾಯಿನ ಮೂಜಿ ಜನಟ್ಟ್ ನಾಗರಾಜ್ (24) ಬೊಕ್ಕ ಮಿಲನ್ (20) ಮೊಕ್ಲೆನ ಪುನ ಸೋಮಾರ ಬೊಲ್ಪುಗು ಪತ್ತೆ ಆತ್ಂಡ್.
ಕುಡೊರಿ ಜವನೆ ಲಿಖಿತ್ (18) ನ್ ನಡೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಈ ಘಟನೆದ ಜಾಗೆಗ್ ತಹಶೀಲ್ದಾರ್, ಪಣಂಬೂರು ಪೊಲೀಸೆರ್ ಭೇಟಿ ಕೊರ್ದು ನಾಪತ್ತೆ ಆಯಿನಕ್ಲೆನ ಪತ್ತೆಗ್ ಕ್ರಮ ದೆತೊಂದಿತ್ತೆರ್.
ಈ ಘಟನೆದ ಬಗೆಟ್ಟ್ ಜೀವ ರಕ್ಷಕ ಕೂಟದಕುಲು ಪಾತೆರ್ದ್, ಎಂಕ್ಲೆನ ಪಾತೆರ ಕೇನಂದೆ ಕೆಲವೆರ್ ಕಡಲ್ ಜತ್ತ್ ದ್ ಮಿಂದ್ ದ್ ತೊಂದರೆ ತಿಕೊಂದು ಉಲ್ಲೆರ್. ಗಡಿ ಗಡೀ ಎಚ್ಚರಿಕೆ ಕೊರ್ಂಡಲ ಜವನೆರ್ ಅವೆನ್ ಪಾಲಿಸಂದೆ ಇಂಚಿನ ಘಟನೆ ನಡತೊಂದು ಉಂಡು ಪಂದ್ ತೆರಿಪಾದೆರ್.
ಮುಲ್ಕಿ-ಬೆದ್ರ ಕ್ಷೇತ್ರದ ಬಿಜೆಪಿ ಹಳೆಯಂಗಡಿ ಮಹಾಶಕ್ತಿ ಕೇಂದ್ರದ ಗುರ್ಕಾರೆಯಾದ್ ಲಕ್ಷ್ಮಣ್ ಸಾಲ್ಯಾನ್ ಕೆರೆಕಾಡು ಬೊಕ್ಕ ಕಾರ್ಯದರ್ಶಿಯಾದ್ ಯುವ ನಾಯಕೆ ಜೀವನ್ ಶೆಟ್ಟಿ ಅಂಗರಗುಡ್ಡೆ ಆಯ್ಕೆ ಆತೆರ್ ಪಂದ್ ಮಂಡಲದ ಗುರ್ಕಾರೆ ದಿನೇಶ್ ಪುತ್ರನ್ ಪ್ರಕಟ ಮಲ್ದೆರ್.
ಕೆರೆಕಾಡು ಬೆಳ್ಳಾಯರ್ ನಿವಾಸಿ ಲಕ್ಷ್ಮಣ್ ಸಾಲ್ಯಾನ್ ಮೆರೆಗ್ ಬೆಳ್ಳಾಯರು ಶಕ್ತಿ ಕೇಂದ್ರದ ಪ್ರಮುಖರಾದ್ ಅನುಭವ ಉಂಡು. ಕೈತಲ್ದ ಸಾರ್ವಜನಿಕ ಹಿಂದೂ ರುದ್ರಭೂಮಿದ ಗುರ್ಕಾರೆಯಾದ್ ರುದ್ರಭೂಮಿದ ಪ್ರಗತಿಗ್ ಕೆಲಸ ಮಲ್ದೆರ್.
ಎಲ್ ಐಸಿ ಏಜೆಂಟರಾದ್ ಮುಲ್ಕಿ ಯೂನಿಯನ್ ಗುರ್ಕಾರೆಯಾದ್ ಸಂಘಟನಾತ್ಮಕವಾದ್ ಬೇಲೆ ಮಲ್ದೆರ್. ಕಿನ್ನಿಗೋಳಿ ಪರಿಸರಡ್ ಕೋರಿ ಮಾರುನ ಉದ್ಯಮಿ ಆಯಿನ ಮೆರೆಗ್ ಈ ಪೊಸ ಜಬದಾರಿನ್ ಬಿಜೆಪಿ ಕಾರ್ಯಕರ್ತೆರ್ ಕೊರ್ತೆರ್.
ಅಂಚೆನೆ ಅತಿಕಾರಿಬೆಟ್ಟು ಗ್ರಾಮ ಪಂಚಾಯತ್ ದ ಮಾಜಿ ಸದಸ್ಯೆರ್ ಜೀವನ್ ಶೆಟ್ಟಿ ತನ್ನ ಅವಧಿಡ್ ಗ್ರಾಮದ ಸಮಸ್ಯೆಲೆನ ಪರಿಹಾರಗ್ ಪ್ರಮಾಣಿಕವಾದ್ ಕೆಲಸ ಮಲ್ದೆರ್. ತುಳು ಲಿಪಿಟ್ಟ್ ಪುದರ್ ಪಲವೆನ್ ಪಾಡ್ದ್ ಮಾತೆರ್ನಲ ಗಮನ ಸೆಳೆತೆರ್. ಬಡಪತ್ತ್ ದ ಪೊಂಜೋವುಗ್ ಇಲ್ಲ್ ನಿರ್ಮಾನ ಮಲ್ತ್ ದ್ ಕೊರ್ಪುನಲ್ಪ ಮಲ್ಲ ಪಾತ್ರ ಒಯಿಸೊನ್ನ ಮೇರ್ ಸಾಮಾಜಿಕ ಕ್ಷೇತ್ರಡ್ ಸ್ನೇಹಿತೆರೆನ ಮುಖೇನ ಬಡವೆರೆಗ್ ಸಹಾಯ ಮಲ್ಪುನಲ್ಪ ದುಂಬು ಉಲ್ಲೆರ್. ದಿ ಸುಖಾನಂದ ಶೆಟ್ಟಿ ನೆಂಪುಗಾದ್ ಕ್ರೀಡಾ ಸಂಘಟನೆ, ಸಮಾಜಸೇವೆ ಬೊಕ್ಕ ಸುಸಜ್ಜಿತ ಬಸ್ ನಿಲ್ದಾಣ ನಿರ್ಮಾಣ ಮಲ್ತ್ ದ್ ಸಮಾಜಗ್ ಕೊರ್ತೆರ್. ಮೆರೆನ ಸಂಘಟನಾ ಚತುರತೆಗ್ ಅರ್ಹವಾದ್ ಕಾರ್ಯದರ್ಶಿ ಬೇಲೆ ತಿಕ್ ದ್ಂಡ್ ಪಂದ್ ಬಿಜೆಪಿ ಕಾರ್ಯಕರ್ತೆರ್ ತೆರಿಪಾದೆರ್.
ಬೊಂಬೈ: ಬೊರಿವಲಿ ತುಳು ಸಂಘದ ವಿಹಾರ ಕೂಟನ್ ಮಾ.3 ಕ್ಕ್ ಮಲಾಡ್ ಪಶ್ಚಿಮ ಕೈತಲ್ದ ರಾಹುತ್ ಕೋಟೇಜ್ ಡ್ ಆಯೋಜನೆ ಮಲ್ತ್ ಇತ್ತ್ಂಡ್.
ಈ ಲೇಸ್ ಡ್ ಸಂಘದ ನೂದೆರ್ದ್ ಎಚ್ಚ ಜನ ಸದಸ್ಯೆರ್ ಪರಿವಾರ ಸಮೇತ ಪಾಲ್ ಪಡೆದಿತ್ತೆರ್. ಹಿರಿಯ ಕಿರಿಯೆರೆಗ್ ಬೇತೆ ಬೇತೆ ಗೊಬ್ಬುದ ಪಂತೊಲು, ನೃತ್ಯ, ಗಾಯನನ್ ಆಯೋಜನೆ ಮಲ್ತ್ ಇತ್ತೆರ್. ನೆಟ್ಟ್ ಮಾತೆರ್ಲಾ ಕುಸಿ ಪಡೆಯೆರ್.
ಸಂಘದ ಗುರ್ಕಾರೆ ಕರುಣಾಕರ ಎಂ. ಶೆಟ್ಟಿ ಪಾತೆರ್ದ್, ಸಂಘದ ಕಾರ್ಯಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ಸದಸ್ಯೆರ್ ಏಪಲ ಪಾಲ್ ಪಡೆಪುನೆ ಬೊಕ್ಕ ನಿರಂತರ ಬೆಂಬಲ ಮಲ್ಪುನೆಕ್ಕ್, ಅತ್ತಂದೆ ಸಂಸ್ಥಾಪಕ ಗುರ್ಕಾರೆ ವಾಸು ಪುತ್ರನ್ ಬೊಕ್ಕ ಮಾಜಿ ಗುರ್ಕಾರೆ ಪ್ರಕಾಶ್ ಶೆಟ್ಟಿ ಪೇಟೆಮನೆ ಮೊಕ್ಲೆನ ನಿರಂತರ ಬೆಂಬಲ ಬೊಕ್ಕ ಮಾರ್ಗದರ್ಶನನ್ ಮೆಚ್ಚಿಯೆರ್. ಬೊಕ್ಕ ವಿಹಾರ ಕೂಟಡ್ ಪಾಲ್ ಪಡೆದ್ ಯಶಸ್ವಿಯಾದ್ ನಡಪಾದ್ ಕೊರ್ನ ಮಾತ ಸದಸ್ಯೆರೆಗ್ ಕೃತಜ್ಞತೆನ್ ಸಂದಾಯೆರ್. ಅತ್ತಂದೆ ಮಾತ ಕಾರ್ಯನ್ ಯಶಸ್ವಿಯಾದ್ ಮಲ್ತಿನ ಸಂಘದ ಪದುಕೆರೆಗ್, ಕಾರ್ಯಕಾರಿ ಸಮಿತಿದ ಸದಸ್ಯೆರೆಗ್, ಸಾಂಸ್ಕೃತಿಕ ಸಮಿತಿ ಬೊಕ್ಕ ಮಹಿಳಾ ವಿಭಾಗದ ಸದಸ್ಯೆರೆಗ್ ಅಭಿನಂದನೆ ಸಂದಾಯೆರ್.
ಬೊರಿವಲಿ ತುಳು ಸಂಘ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ನ್ಯಾ.ರಾಘವ ಮೇರ್ ದಿನ ಇಡೀ ನಡತಿನ ಬೇತೆ ಬೇತೆ ಗೊಬ್ಬುದ ಪಂತೊನ್ ನಡಪಾದ್ ಕೊರಿಯೆರ್. ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.
ಸಂಘದ ಸ್ಥಾಪಕ ಗುರ್ಕಾರೆ ವಾಸು ಪುತ್ರನ್ ಪಾತೆರ್ದ್, ಸದಸ್ಯೆರ್ ಪಾಲ್ ಪಡೆಪುನ ಬೊಕ್ಕ ಬೆಂಬಲಗ್ ಸಂತೋಷ ತೆರಿಪಾಯೆರ್.
ಈ ಪೊರ್ತುಡು ಪ್ರಧಾನ ಕಾರ್ಯದರ್ಶಿ ರಜಿತ್ ಸುವರ್ಣ, ಕೋಶಾಧಿಕಾರಿ ಚಂದ್ರಹಾಸ ಬೆಳ್ಚಡ, ಸಾಂಸ್ಕೃತಿಕ ಸಮಿತಿ ಕಾರ್ಯಾಧ್ಯಕ್ಷೆರ್ ಕುಸುಮಾ ಶೆಟ್ಟಿ, ಒತ್ತು ಗುರ್ಕಾರ್ದಿ ಕಸ್ತೂರಿ ಶೆಟ್ಟಿ, ಮಹಿಳಾ ವಿಭಾಗದ ಒತ್ತು ಗುರ್ಕಾರ್ದಿ ಶೋಭ ಶೆಟ್ಟಿ, ಸರಸ್ವತಿ ರಾವ್, ಲಕ್ಷ್ಮೀ ದೇವಾಡಿಗ, ಜಯಂತಿ ಶೆಟ್ಟಿ, ಪದುಕೆರ್ ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಕನ್ನಡ ಸಾಹಿತ್ಯ ಪರಿಷತ್ ಕೊರ್ಪುನ ದತ್ತಿ ಪ್ರಶಸ್ತಿ ಲೇಸ್ ಮಾ.3 ಕ್ಕ್ ನಡತ್ಂಡ್.
ಈ ಲೇಸ್ ಡ್ ಶಾರದಾ ಎ .ಅಂಚನ್ ಕೊಡವೂರು ಮೆರೆನ ವೈದ್ಯಕೀಯ ಬೂಕು “ರಕ್ತಶುದ್ಧಿ-ಆರೋಗ್ಯವೃದ್ಧಿ” ಗ್ ಬಿಸಲೇರಿ ಜಯಣ್ಣ ಬೊಕ್ಕ ಬಿಸಲೇರಿ ಬ್ರದರ್ಸ್ ದತ್ತಿ ಪ್ರಶಸ್ತಿನ್ ಕೊರಿಯೆರ್.
ಈ ಪ್ರಶಸ್ತಿನ್ ಮೇರ್ ಸಾಹಿತ್ಯ ಪರಿಷತ್ತ್ ದ ಗುರ್ಕಾರೆ ಡಾ.ಮಹೇಶ್ ಜೋಶಿ, ಮಾನ್ಯ ಕರ್ನಾಟಕ ಲೋಕಾಯುಕ್ತೆರ್ ಬಿ.ಎಸ್.ಪಾಟೀಲ್, ಚಲನಚಿತ್ರ ಸಾಹಿತಿ ಕವಿರತ್ನ ಡಾ.ನಾಗೇಂದ್ರ ಪ್ರಸಾದ್, ಸಾಹಿತಿ ಬೊಕ್ಕ ವೈದ್ಯೆರ್ ಡಾ.ಯೋಗಣ್ಣ, ನಿವೃತ್ತ ಉಪಕುಲಪತಿಲು ಡಾ. ಎನ್.ಎಸ್ ರಾಮೇಗೌಡ, ಕುಲಾಧಿಪತಿಲು, ಮಾಲ್ಡೀವ್ಸ್ ದೇಶದ ಕೌನ್ಸಿಲ್ ಜನರಲ್ ಡಾ.ವಿ.ಜಿ .ಜೋಸೆಫ್ ಮೊಕ್ಲೆನ ಸಮ್ಮುಖಡ್ ಸ್ವೀಕಾರ ಮಲ್ತೆರ್.
