Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಆ.6: ಬಂಟರ ಸಂಘ ಬಜಪೆ ವಲಯ (ರಿ.) ದ ಮುತಾಲಿಕೆಡ್ ಆಟಿದ ನೆಂಪು

ಕುಡ್ಲ: ಬಂಟರ ಸಂಘ ಬಜಪೆ ವಲಯ (ರಿ.) ದ ಮುತಾಲಿಕೆಡ್ ಆಟಿದ ನೆಂಪು “ತರವಾಡ್ ದ ತಮ್ಮನ” ಲೇಸ್ ಆ.6 ಐತಾರ ಬಜಪೆ ಸಂಜೀವ ಶೆಟ್ಟಿ ಸಭಾಗೃಹಡ್ ನಡಪರೆ ಉಂಡು.

ಬೊಲ್ಪುಗು ಪ್ರಾರ್ತನೆ, ಉದಿಪನ, ಜೋಕುಲೆಗ್, ಪೊಂಜೋವ್, ಆಂಜೋವ್ ನಕ್ಲೆಗ್ ಬೇತೆ ಬೇತೆ ಪಂತೊಲು, ಮಧ್ಯಾಹ್ನ ತರವಾಡ್ ತಮ್ಮನ ಉಪ್ಪಡ್, ತಿಮರೆ ಚಟ್ನಿ, ಎಟ್ಟಿ ಚಟ್ನಿ, ಪತ್ರೊಡೆ, ಸೇಮಿಗೆ, ಸೇಮಿಗೆಗ್ ಪೇರ್, ಪದೆಂಗಿ ಸಲಾಯಿ ಗಸಿ, ಪೆಲಕಾಯಿದ ಗಟ್ಟಿ, ನುಪ್ಪು, ಕುಡು ಸಾರ್, ಚಿಕನ್ ಸುಕ್ಕ, ಸಾರ್ ನಡ್ಯೆ, ಪರ್ಂದ್ ಉಂಡು.‌

ಈ ಲೇಸ್ ಡ್ ಸಂಘದ ವ್ಯಾಪ್ತಿಗ್ ಸೇರುನ ಗ್ರಾಮದ ಬಂಟ ಬಾಂಧವೆರ್ ಕುಟುಂಬ ಸಮೇತರಾದ್ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಂಟ ಸಂಘ ಬಜಪೆ ವಲಯ (ರಿ.) ದ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್. ‌

ಸೆ.19 ರ್ದ್ 21 ಬಂಟ್ಸ್ ಹಾಸ್ಟೆಲ್ ಸಾರ್ವಜನಿಕ ಗಣೇಶೋತ್ಸವ

ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ ಬೊಕ್ಕ ಸಿದ್ದಿ ವಿನಾಯಕ ಪ್ರತಿಷ್ಠಾನದ ನಿರೆಲ್ಡ್ 17 ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವ ಸೆ.19 ರ್ದ್ 21 ಮುಟ್ಟ ದಕ್ಷಿಣ ಕನ್ನಡ, ಒಡಿಪು, ಕಾಸರಗೋಡು ಜಿಲ್ಲೆದ ಸರ್ವ ಬಂಟ ಸಮಾಜದ ಸಹಕಾರಡ್ ಬಂಟ್ಸ್ ಹಾಸ್ಟೆಲ್ ಡ್ ಶ್ರದ್ದಾಭಕ್ತಿ ಡ್ ನಡಪರೆ ಉಂಡು.

ಸಾರ್ವಜನಿಕ ಗಣೇಶೋತ್ಸವದ ಮುತಾಲಿಕ್ ಡ್ ಸಮಾಜದ ಬಾಂಧವರೆನ್ ಒಟ್ಟು ಮಲ್ಪುನ ಕೆಲಸ ಕಾರ್ಯ ನಡಪರೆ ಉಂಡು ಪಂದ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಕೊಡಿಯಾಲ್ ಗುತ್ತು ಅಜಿತ್ ಕುಮಾರ್ ರೈ ಮಾಲಾಡಿ ತೆರಿಪಾದೆರ್.

ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಕಟ್ಟಡದ ಸಭಾಂಗಣಡ್ ನಡತ್ ನ ಸಭೆಟ್ ಗುರ್ಕಾರ್ಮೆ ಒಯಿಸೊಂದು ಆರ್ ಪಾತೆರಿಯೆರ್.

ಕೊರೊನಾಡ್ ಕರಿನ ಮೂಜಿ ವರ್ಷ ರ್ದ್ ಸಾರ್ವಜನಿಕ ಗಣೇಶೋತ್ಸವನ್ ಆಚರಣೆ ಮಲ್ಪರೆ ಆತಿಜಿ. ಈ ವರ್ಷ 17 ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವನ್ ಮಾತೆರ್ಲ ಸೇರ್ದ್ ಆಚಾರಣೆ ಮಲ್ಪುಗ ನೆಕ್ಕ್ ಮಾತೆರ್ನ ಸಹಕಾರ ಅಗತ್ಯ.

ಸಮುದಾಯದ ಮಾತೆರೆನ್ ಒಂಜೆ ಕುಬಲ್ ದ ಅಡಿಟ್ ಸೇರಿಸಾಯೆರೆ ಕೆಲವು ಲೇಸ್ ನ್ ಆಯೋಜನೆ ಮಲ್ತ್ ದ, ನೆಕ್ಕ್ ಸಮಿತಿ, ಉಪ ಸಮಿತಿ ನ್ ರಚನೆ ಮಲ್ತ್ ದ . ಆಸಕ್ತರೆನ್ ಸಮಿತಿಗ್ ಸೇರಿಸಾದ್ ಲೇಸ್ ನ್ ಮಲ್ಪುನ ಪಂದ್ ತೆರಿಪಾದೆರ್.


ಆಗೋಸ್ಟ್ 27 ಕ್ಕ್ ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಕಾಸ್ರೋಡು ಜಿಲ್ಲೆದ ದೇವಸ್ಥಾನಲೆನ ಬಂಟ ಸಮುದಾಯದ ಆಡಳಿತ ಮುಖ್ಯಸ್ಥರೆನ್ ಮಾನಾದಿಗೆ ಮಲ್ಪುನ ಲೇಸ್ ನಡಪರೆ ಉಂಡು ಪಂದ್ ತೆರಿಪಾದೆರ್. ಸೆಪ್ಟೆಂಬರ್ 3 ದಾನಿ ಬಂಟ ಕಲೋತ್ಸವ, ಸೆ. 10 ಕ್ಕ್ ಬಂಟರ ಕ್ರೀಡೋತ್ಸವ, ಸೆ.16 ಬಂಟ ಯುವ ಸಮ್ಮೇಳನ ನಡಪರೆ ಉಂಡು ಪಂದ್ ಅಜಿತ್ ಕುಮಾರ್ ರೈ ಮಾಲಾಡಿ ತೆರಿಪಾದೆರ್.

ಲೇಸ್ ಡ್ ಒಡಿಪು ಜಿಲ್ಲಾ ಸಂಚಾಲಕೆರ್ ಉದಯ ಕುಮಾರ್ ಶೆಟ್ಟಿ ಮುನಿಯಾಲು, ಕಾಸ್ರೋಡು ಜಿಲ್ಲಾ ಸಂಚಾಲಕೆರ್ ಸಂಜೀವ ಶೆಟ್ಟಿ, ದ.ಕ. ಜಿಲ್ಲಾ ಸಂಚಾಲಕೆರ್ , ನಾಗರಾಜ ಶೆಟ್ಟಿ, ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಕೆ.ಎಂ.ಶೆಟ್ಟಿ, ಕೋಶಾಧಿಕಾರಿ ಸಿಎ ರಾಮಮೋಹನ್ ರೈ, ಜೊತೆ ಕಾರ್ಯದರ್ಶಿ ಸಂಜೀವ ಶೆಟ್ಟಿ ಸಂಪಿಗೇಡಿ, ಟ್ರಸ್ಟಿಲಾಯಿನ ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ಆಶಾಜ್ಯೋತಿ ರೈ, ಮಂಗಳೂರು ತಾಲೂಕು ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ, ಗಣೇಶೋತ್ಸವ ಸಮಿತಿದ ಮಂಗಳೂರು ಸಂಚಾಲಕೆರಾಯಿನ ಸುಧಾಕರ ಪೂಂಜ, ಶೇಖರ ಶೆಟ್ಟಿ, ಭಾರತಿ ಶೆಟ್ಟಿ, ಅರುಣಾ ಶೆಟ್ಟಿ ಇತ್ತೆರ್. ಸಮಿತಿದ ಪ್ರಮುಖೆರಾಯಿನ ಉಲ್ಲಾಸ್ ಶೆಟ್ಟಿ ಪೆರ್ಮುದೆ, ಸತೀಶ ಶೆಟ್ಟಿ ಕೊಡಿಯಾಲ್ ಬೈಲ್, ಮೀನಾ ಆರ್ ಶೆಟ್ಟಿ, ನಿವೇದಿತಾ ಶೆಟ್ಟಿ ಸಭೆಟ್ ಮಾಹಿತಿ ಕೊರಿಯೆರ್.

ಕಿರಣ್ ಪಕ್ಕಳ ಲೇಸ್ ದ ನಿರೂಪಣೆ ಮಲ್ತ್ ದ್ , ಕೆ.ಎಂ. ಶೆಟ್ಟಿ ಸೊಲ್ಮೆ ಸಂದಾಯೆರ್.

ಆ.6: ಹಳೆಯಂಗಡಿ ನಾರಾಯಣ ಗುರು ಸಂಘಡ್ ಆಟಿದ ರಂಗ್

ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ಯುವವಾಹಿನಿ (ರಿ.) ಹಳೆಯಂಗಡಿ ಘಟಕದ ಒಟ್ಟುಸೇರಿಗೆಡ್ “ಆಟಿದ ರಂಗ್” ಲೇಸ್ ಆ.6 ಐತಾರ ಕಾಂಡೆ 10 ಗಂಟೆರ್ದ್ ಹಳೆಯಂಗಡಿ ಬ್ರಹ್ಮಶ್ರೀ ನಾರಾಯಣ ಗುರು ಮಂದಿರದ ವಠಾರಡ್ ನಡಪರೆ ಉಂಡು.

ಈ ಕೂಟದ ಉದಿಪನನ್ ಬೈಕಂಪಾಡಿ ಎನ್.ಡಿ ಸನ್ಸ್ ಎಂಟರ್ ಪ್ರೈಸಸ್ ದ ಮೋನಪ್ಪ ಪೂಜಾರ್ಲು ಮಲ್ಪರೆ ಉಲ್ಲೆರ್. ಕುಡ್ಲ ಕೆನರಾ ಪಿಯು ಕಾಲೇಜ್ ದ ಪ್ರಾಧ್ಯಾಪಕೆರ್ ರಘು ಇಡ್ಕಿದು ಮದಿಪು ಕೊರ್ರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರ್ಲು ಚಂದ್ರಶೇಖರ್ ನಾನಿಲ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರ್ಲು ರಾಜೇಶ್ ಬಿ., ಹಳೆಯಂಗಡಿ ಬಿಲ್ಲವ ಸಂಘ (ರಿ.) ಮಲ್ಲ ಗುರ್ಕಾರ್ಲು ಗಣೇಶ್ ಜಿ. ಬಂಗೇರ್ರ್, ಹಳೆಯಂಗಡಿ ಕಟ್ಟೋಣ ಸಮಿತಿ ದ ಗುರ್ಕಾರ್ಲು ಮೋಹನ್ ಎಸ್ ಸುವರ್ಣೆರ್, ಯುವವಾಹಿನಿ (ರಿ.) ಹಳೆಯಂಗಡಿದ ಗುರ್ಕಾರ್ಲು ಕಿರಣ್ ಪಡುಪಣಂಬೂರು ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ಕೃಷಿ ಬದ್ ಕ್ ದ ಸಾಧಕೆರ್ ಸುಧಾಕರ ಸುವರ್ಣೆರ್ ಕೊರುವೈಲ್, ಪೆರ್ಮೆದ ಹಿರಿಯ ವೈದ್ಯೆರ್ ಡಾ. ಜಯಕರ್ ಮಲ್ಯ ಮಾನಾದಿಗೆದ ಮಣೆಟ್ಟ್ ಕುಲ್ಲೆರ್ ಉಲ್ಲೆರ್.‌

ಈ ಪೊರ್ತುಡು ಬಿಲ್ಲವ ಸಂಘ, ಯುವವಾಹಿನಿ ಸದಸ್ಯೆರೆರ್ದ್ ತುಳು ನಲಿಕೆ ಬೊಕ್ಕ ಕುಸೇಲ್ದ ಕೂಟ ನಡಪರೆ ಉಂಡು.

ಅಂಚೆನೆ ಬತ್ತಿ ಬಿನ್ನೆರೆಗ್ ಎಡ್ಡೆಮುಂಚಿದ ಕಷಾಯ, ಗುಜ್ಜೆದ ಹಪ್ಪಳ, ಉಪ್ಪಡ್, ತಿಮರೆದ ಚಟ್ನಿ, ಕುಡುತ ಚಟ್ನಿ, ರಚ್ಚ-ಕುಕ್ಕು-ಗೂಂಜಿದ ಚಟ್ನಿ, ಉಪ್ಪಡ್-ಪಚ್ಚಿಲ್, ತೊಪ್ಪು-ತೊಜಂಕ್, ತೇವು-ತೇಟ್ಲ, ಬಂಬೆ-ಕುಡು ಗಸಿ, ತೇವುದ ಇರೆತ್ತ ಅಡ್ಡೆ, ಸುಗ್ಗಿದ ಅರಿತ್ತ ಉರ್ಪೆಲ್ ನುಪ್ಪು, ಒಗರ್ನೆದ ಪುನರ್ ಪುಲಿತ ಸಾರ್, ಮೆತ್ತೆದ ಗಂಜಿ, ಪೊಸ ಪೊಸ ತೆನಸುಲು ಉಂಡು.

ಈ ಪೊರ್ಲುದ ಕೂಟೊಗು ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್. ‌

ಎ.ಪಿ.ಎಲ್ ಕಾರ್ಡ್ ದಕ್ಲೆಗ್ ಲ ಗೃಹಲಕ್ಷ್ಮಿದ ಕಾಸ್

ಗೃಹಲಕ್ಷ್ಮೀ ಯೋಜನೆ ಡ್ 2000 ರೂ. ದೆತೊನರೆ ಇತ್ತೆ ಕ್ಯಾನ್ಸಲ್ ಆಯಿನ ಎ.ಪಿ.ಎಲ್ ಕಾರ್ಡ್ ದಕುಲುಲ ಅಕ್ಲೆನ ರೇಷನ್ ಅಂಗಡಿ ಡ್ ಅಪ್ಡೇಟ್ ಮಲ್ಪರೆ ಸರಕಾರ ಅವಕಾಶ ಕೊರ್ತುಂಡು.

ಒಂಜಿ ದೇಶ ಒಂಜಿ ಕಾರ್ಡ್ ವ್ಯವಸ್ಥೆ ದ ನಿಲೆಟ್ ಕೆಲವೆರ್ ಪೊಸ ಕಾರ್ಡ್ ಕೊರ್ನಗ ಅಪ್ಡೇಟ್ ಮಲ್ತ್ ಇಜ್ಜಂಡ್. ಇಂಚ ಇಪ್ಪುನಗ ಬಿರೆಲ್ ದ ಗುರುತು, ಆಧಾರ್ , ಮೊಬೈಲ್ ನಂಬರ್ ದ ಒಟ್ಟಿಗೆ ಮಾತ ಕಾರ್ಡ್ ನ್ ಸಕ್ರಿಯ ಮಲ್ಪರೆ ಅವಕಾಶ ಉಂಡು ಪಂದ್ ಅಧಿಕಾರಿಲು ತೆರಿಪಾದೆರ್.

ಪುತ್ತೂರ್ ದ ಸ್ಯಾಕ್ಸೋಫೋನ್ ವಾದಕೆರ್ ಡಾ‌.ಪಿ‌.ಕೆ ಗಣೇಶ್ ಮೆರೆಗ್ ಕಲಾನಿಧಿ ಪ್ರಶಸ್ತಿ

ಪುತ್ತೂರ್: ತಮಿಳ್ ನಾಡ್ ದ ಮೈಲಾಡುತುರೈಡ್ ಇಪ್ಪುನ ಧರ್ಮಪುರಂ ಅಧೀನಂ 27ನೇ ಗುರು ಮಹಾ ಸನ್ನಿಧಾನಂ ತಿರುಪ್ಪಾನಂದಲ್ ಕುಂಭಾಭಿಷೇಕಡ್ ನಡತಿನ ಸಂಗೀತ ಕಚೇರಿಡ್ ಪುತ್ತೂರ್ ದ ಸ್ಯಾಕ್ಸೋಫೋನ್ ವಾದಕೆರ್ ಡಾ‌.ಪಿ‌.ಕೆ ಗಣೇಶ್ ಮೆರೆಗ್ ಕಲಾನಿಧಿ ಪ್ರಶಸ್ತಿ ತಿಕ್ ದ್ಂಡ್.

ಜುಲೈ 7 ಕ್ಕ್ ನಡತಿನ ಸಂಗೀತ ಕಛೇರಿಡ್ ಪುತ್ತೂರ್ ದ ಇತಿಹಾಸ ಪುಗರ್ತೆದ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಪ್ರಧಾನ ಸ್ಯಾಕ್ಸೋಫೋನ್ ವಾದಕೆರ್ ಡಾ.ಪಿ.ಕೆ ಗಣೇಶ್ ಮೆರೆಗ್ ಬಂಗಾರ್ ದ ಪದಕ ಬೊಕ್ಕ ಸ್ಯಾಕ್ಸೋಫೋನ್ ಕಲಾನಿಧಿ ಪ್ರಶಸ್ತಿನ್ ಕೊರ್ದು ಮಾನಾದಿಗೆ ಮಲ್ತೆರ್.

ಡಾ.ಪಿ.ಕೆ ಗಣೇಶ್ ಮೇರ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿದೊಟ್ಟಿಗೆ ಸುಮಾರ್ ಪ್ರಶಸ್ತಿನ್ ಪಡೆತೆರ್.

ಇತಿಹಾಸಡೇ ಸುರುತ್ತ ಸರ್ತಿ ತಮಿಳ್ ನಾಡ್ ದ ಧರ್ಮಪುರಂ ಅಧೀನಂ (ಮಠ) ಸ್ಯಾಕ್ಸೋಫೋನ್ ಕ್ಷೇತ್ರಗ್ ಕೊರ್ನ ಪ್ರಶಸ್ತಿ ಬೊಕ್ಕ ಬಂಗಾರ್ ದ ಪದಕ ಉಂದಾತ್ಂಡ್.‌

ಬೆಂಗ್ಲೂರ್ ಡ್ ಜೈ ತುಲುನಾಡ್ (ರಿ.) ನಿರೆಲ್ಡ್ ಮುತಾಲಿಕೆಡ್ “ತುಲುನಾಡ ಆಟಿ” ಆಚರಣೆ

ಬೆಂಗ್ಲೂರ್ ದ ಬಳೆಪೇಟೆದಲ್ಪ ಇಪ್ಪುನ ಸ್ವಾಗತ್ ಹೋಟೆಲ್ ಡ್ ಜೈ ತುಲುನಾಡ್ (ರಿ.) ಮುತಾಲಿಕೆಡ್ “ತುಲುನಾಡ ಆಟಿ” ಲೇಸ್ ನಡತ್ಂಡ್. ‌

ಜೈ ತುಲುನಾಡ್ (ರಿ.) ಸಂಘಟನೆ ಬೆಂಗ್ಲೂರ್ ಎಗ್ಗೆದ ಗುರ್ಕಾರ್ಲು ವಿಶಾಲ್ ಕೊಡಿಯಾಲ್ ಗುರ್ಕಾರ್ಮೆಡ್ ನಡತಿನ ಈ ಲೇಸ್ ಡ್ ಬೆಂಗ್ಲೂರ್ ದ ಸುಮಾರ್ ತುಲು ಸಂಘಟನೆದ ಪ್ರಮುಖೆರ್ ಪಾಲ್ ಪಡೆದಿತ್ತೆರ್.

ತುಳುವೆರೆ ಚಾವಡಿ ಗೌರವಾಧ್ಯಕ್ಷೆರ್ ಪುರುಷೋತ್ತಮ ಚೇಂಡ್ಲ ಈ ಲೇಸ್ ದ ಉದಿಪನ ಮಲ್ತೆರ್. ಜೈ ತುಲುನಾಡ್ (ರಿ.) ಸಂಘಟನೆದ ಅನುದೀಪ್ ಶೆಟ್ಟಿ ಎದ್ಕೊನಿಯೆರ್. ಸಂಘಟನೆದ ಜಯಪ್ರಸಾದ್ ತುಲುನಾಡ್ ಪ್ರಾಸ್ತಾವಿಕವಾದ್ ಸಂಘಟನೆ ಮಲ್ತಿನ ಕೆಲಸನ್ ತೆರಿಪಾಯೆರ್.

ಸುವರ್ಣ ನ್ಯೂಸ್ ಬೆಂಗ್ಲೂರ್ ನೆತ್ತ ಹಿರಿಯ ಪತ್ರಕರ್ತೆರ್ ಜಯಪ್ರಕಾಶ್ ಶೆಟ್ಟಿ ಉಪ್ಪಲ ಮೇರ್, ತುಲುವೆರೆ ಆಟಿ ತಿಂಗೊಲ್ದ ಮಹತ್ವ, ಇಚಾರ ತೆರಿಯೆರ್. ತುಳುವೆರ್ ಆಟಿ ತಿಂಗೊಲ್ಡ್ ಬಂಗದ ಪೊರ್ತುಡು ಗುಜ್ಜೆದ ಕಜಿಪು, ಪಚ್ಚಿರ್ ದ ಕಜಿಪು, ಪೆಲಕಾಯಿದ ಗಟ್ಟಿ, ಸಾಂತನಿ, ಪೆಲತರಿ ತಿನೊಂದು ಇತ್ತೆರ್. ಇಂಚಿನ ಖಾದ್ಯಲು ತುಳುನಾಡ್ ಡ್ ಮಾತ್ರ ತಿಕಿಯೆರೆ ಸಾಧ್ಯ, ದೈವಾರಾಧನೆ ತುಲುವೆರೆನ ಇಸೇಸ ಆಚರಣೆ. ಬಿನ್ನೆರೆನ್ ಉಪಚಾರ ಮಲ್ಪುನ ರೀತಿ ತುಳುವೆರೆಡ ಇಸೇಸವಾದ್ ಉಂಡು ಪಂದ್ ಜೈ ತುಲುನಾಡ್ (ರಿ.) ಸಂಘಟನೆ, ತುಲು ಭಾಷೆ, ಲಿಪಿಗ್ ಮಲ್ತಿನ ಕೆಲಸನ್ ಮೆಚ್ಚಿಯೆರ್. ತುಳು ಭಾಷೆಗ್ ರಾಜ್ಯದ ರಡ್ಡನೇ ಅಧಿಕೃತ ಸ್ಥಾನಮಾನ ತಿಕೊಡು ಪನ್ಪುನ ಪಾತೆರ ಮಾತ ತುಳು ಸಂಘಟನೆದ ಮುಖಂಡೆರೆನ ಬಾಯಿಡ್ ಬತ್ತ್ಂಡ್.

ಈ ಪೊರ್ತುಡು ತುಳುನಾಡ್ ದ, ಆಟಿ ಕಳೆಂಜೆ, ಕಂಗಿಲ್ ನೃತ್ಯ, ಬೇತೆ ಬೇತೆ ಜನಪದ ನೃತ್ಯನ್ ಬೊಕ್ಕ ಇಸೇಸ ಖಾದ್ಯನ್ ಮಲ್ತ್ ದ್ ಇತ್ತೆರ್. ತುಳುವರೆ ಚಾವಡಿ (ರಿ.) ದ ಅಧ್ಯಕ್ಷೆರಾಯಿನ, ಡಿ.ಉಮೇಶ್ ಪೂಂಜ, ಕೆ.ಎನ್‌. ಅಡಿಗ ಅಡೂರು, ಬೊಕ್ಕ ತುಳುವೆರುಂಕುಲು ಅಧ್ಯಕ್ಷೆರ್ ವೈ. ಜಯಂತ್ ರಾವ್, ತುಳುನಾಡ ಜವನೆರ್ ಸಂಘಟನೆದ ಮಹೇಶ್ ಶೆಟ್ಟಿ, ರಾಜಾರಾಮ್ ಶೆಟ್ಟಿ ಉಪ್ಪಳ, ತುಳು ಕೂಟದ ಅಧ್ಯಕ್ಷೆರ್ ಸುಂದರ್ ರಾಜ್ ರೈ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಕಾಂತಿ ಶೆಟ್ಟಿ, ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ಉಪಾಧ್ಯಕ್ಷೆರ್ ಉದಯ್‌ ಪೂಂಜ ಇತ್ತೆರ್.

ಸಂಘಟನೆದ ನಿಧೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಬನಶ್ರೀ ಅವಿನಾಶ್ ಬೊಕ್ಕ ಅನುಷಾ ಸಾಲಿಯನ್ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

ನಂದಳಿಕೆ ಇಂಚರ ಸೇವಾ ಬಳಗದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ನಂದಳಿಕೆ ಇಂಚರ ಸೇವಾ ಬಳಗದಕುಲು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಸೂಡ ಪಡುಬೆಟ್ಟು ನಿವಾಸಿ ನಾರಾಯಣ ಶೆಟ್ಟಿ ಮೇರೆಗ್ ಕರಿನ ರಡ್ಡ್ ವರ್ಷೊರ್ದಿಂಚ ಲಿವರ್ ಕ್ಯಾನ್ಸರ್ ಇತ್ತ್ಂಡ್. ಆಂಡ ಇಂಚಿಪ್ಪ ಮೇರ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಕುಟುಂಬ ಮೆರೆನ ಚಿಕಿತ್ಸೆಗ್ ಸಾಲನ್ ಮಲ್ತ್ ದ್ ಇತ್ತೆರ್. ಅಂಚಾದ್ ಮೊಕುಲು ನಂದಳಿಕೆ ಇಂಚರ ಸೇವಾ ಬಳಗದಕ್ಲೆಗ್ ಬಿನ್ನಾಪು ಮಲ್ತೆರ್. ಈ ಬಿನ್ನಾಪುಗ್ ಸ್ವಂದಿಸಾಯಿನ ಈ ಕೂಟದಕುಲು ತನ್ನ ಕೂಟದ ವತಿರ್ದ್ 10 ಸಾರ ರೂ. ದ ಚೆಕ್ ನ್ ರತ್ನ ಸೂಡ ಮೆರೆನ ಮುಖೇನ ಕೊರಿಯೆರ್.‌

ಈ ಪೊರ್ತುಡು ಕೂಟದ ಸದಸ್ಯೆರ್ ಸಂತೋಷ್ ಕೋಟ್ಯಾನ್ ಸೂಡ, ಅನಿತಾ ರಮೇಶ್ ಸೂಡ, ಸುಮಲತಾ ದುಗ್ಗಪ್ಪ, ದೀಕ್ಷಾ, ಸುಶ್ಮಿತಾ ರಾಕೇಶ್ ನಂದಳಿಕೆ, ಸಂತೋಷ್ ಪೂಜಾರಿ ಹೊಕ್ಕಾಡಿಗೋಳಿ ಇತ್ತೆರ್.

ಕುಕ್ಕೆ ಸುಬ್ರಹ್ಮಣ್ಯದ ಅರ್ಚಕೆರ್ನ ಇಲ್ಲಡ್ ಕಲ್ವೆರ್ನ ಕಾರ್ ಬಾರ್!!

ಸುಬ್ರಹ್ಮಣ್ಯ: ಅರ್ಚಕೆರ್ನ ಇಲ್ಲಡ್ ಕಲ್ವೆರ್ ಕಾಸ್ ಸಮೇತ ಲಕ್ಷಾಂತರ ಮೌಲ್ಯದ ಸೊತ್ತುಲೆನ್ ಕಂಡಿನ ಘಟನೆ ಸುಬ್ರಹ್ಮಣ್ಯ ಡ್ ನಡತ್ತ್ಂಡ್.

ಒಡಿಪು ಮೂಲದ ಕೃಷ್ಣರಾಜ ಭಟ್ ಮೆರೆನ ಸುಬ್ರಹ್ಮಣ್ಯದ ಬಾಡಿಗೆದ ಇಲ್ಲಡ್ ಈ ಘಟನೆ ನಡದ್ಂಡ್.

ಕೃಷ್ಣರಾಜ ಭಟ್ ಮೇರ್ ಒಡಿಪುದಾರ್ ಆದಿತ್ತ್ ದ್ ಕರಿನ 15 ವರ್ಷರ್ದ್ ಸುಬ್ರಹ್ಮಣ್ಯದ ಮಠಟ್ಟ್ ಪುರೋಹಿತರಾದ್ ಸೇವೆ ಸಂದಾವೊಂದುಲ್ಲೆರ್.

ಆರ್ ಜು.27 ದಾನಿ ಬಯ್ಯಗ್ ಇಲ್ಲದಕ್ಲೆನ ಒಟ್ಟಿಗೆ ಒಡಿಪು ಗ್ ಪೋದ್ ಜು.30 ದಾನಿ ಬಯ್ಯಗ್ ಸುಬ್ರಹ್ಮಣ್ಯದ ಬಾಡಿಗೆ ಇಲ್ಲಗ್ ಪಿರ ಬತ್ತ್ ದ್ ತೂನಗ ಕಂಡ್ ದ್ ಪೋತಿನ
ಬೊಲ್ಪುಗು ಬೈದ್ಂಡ್. ಇಲ್ಲದ ಮಾಡ್ ದೆತ್ ದ್ ಕಲ್ವೆರ್ ಉಲಾಯಿ ಬೈದೆರ್ ಪಂದ್ ತೆರಿದ್ ಬೈದ್ಂಡ್.

ದೇವೆರ್ನ ಕೋಣೆಡ್ ಇತ್ತಿನ 2 ಬೊಳ್ಳಿದ ದೀಪ, ಬೊಳ್ಳಿದ ತಟ್ಟೆ, ಬೊಳ್ಳಿದ ಕರಡಿಗೆ, ಬಂಗಾರ್ ದ ಸರ, ಕೆಬಿತ್ತ ಒಂಜಿ ಜೊತೆ, ಕಬಾಟ್ ಡ್ ಇತ್ತಿನ ಕಾಸ್ 1 ಲಕ್ಷ ಪನವು, ಒಟ್ಟು 2.80 ಲಕ್ಷ ದ ಸೊತ್ತುಲೆನ್ ಕಂಡಿನ ತೆರಿದ್ ಬೈದ್ಂಡ್.

ಜಾಗೆಗ್ ಸುಬ್ರಹ್ಮಣ್ಯ ಪೊಲೀಸೆರ್, ಶ್ವಾನದಳ, ಬೆರಳಚ್ಚು ತಜ್ಞೆರ್ ಭೇಟಿ ಮಲ್ತ್ ಪರಿಶೀಲನೆ ಮಲ್ತ್ ದೆರ್. ನೆತ್ತ ಬಗ್ಗೆ ಸುಬ್ರಹ್ಮಣ್ಯ ಠಾಣೆ ಡ್ ಪ್ರಕರಣ ದಾಖಲಾತ್ಂಡ್.

ನನ ತಿರುಪತಿದ ಲಾಡ್‌ಡ್ ಇಪ್ಪುಜಿ ನಂದಿನಿ ನೆಯಿತ್ತ ಕಮ್ಮೆನ

ತಿರುಪತಿ ತಿಮ್ಮಪ್ಪ ದೇವಲ್ಯಡ್ ಕರಿನ 50 ವರ್ಷರ್ದಿಂಚಿ ಪ್ರಸಾದದ ಲಾಡ್ ಮಲ್ಪುನಗ ನಂದಿನಿ ನೆಯಿ ಪಾಡೊಂದಿತ್ತೆರ್. ಆಂಡ ನನ ದುಂಬುಗ್ ನಂದಿನಿ ನೆಯಿಟ್ಟ್ ಮಲ್ತಿನ ಲಾಡ್ ತಿಕ್ಕುಜಿ. ನನ ತಿರುಪತಿಗ್ ನೆಯಿ ಕಡಪುಡುಜ ಪಂದ್ ಕೆಎಂಎಫ್ ಅಧ್ಯಕ್ಷೆರ್ ಭೀಮಾ ನಾಯಕ್ ಪಂತೆರ್.

ತಿರುಪತಿಗ್ 6 ತಿಂಗೊಲುಗು 14 ಲಕ್ಷ ಕೆಜಿ ನೆಯಿ ಕೊರೊಡು, ದೇವಸ್ಥಾನಗ್ ಪಂದ್ ರಿಯಾಯಿತಿ ದರಟ್ ನೆಯಿ ಪೂರೈಕೆ ಮಲ್ತೊಂದಿತ್ತೆರ್. ಆಂಡ ಈ ಸಲ ಕೆಎಂಎಫ್ ರಿಯಾಯಿತಿ ದರಟ್ ನಂದಿನಿ ನೆಯಿ ಕೊರ್ಪುನ ಟೆಂಡರ್‌ನ್ ಕೈ ಬುಡ್ತುಂಡು. ಕಡಿಮೆ ಬಿಲೆಟ್ ನೆಯಿ ಕೊರಿಯೆರೆ ಆಪುಜಿ ಪಂದ್ ಕೆಎಂಎಫ್ ತೆರಿಪಾದ್ಂಡ್.

ಮುದಲೆದ ಮಿತ್ತ್ ಜಾಲಿ ರೈಡ್

ಅಮೆರಿಕಡ್ ಒರಿ ಮುದಲೆದ ಮಿತ್ತ್ ಸವಾರಿ ಮಲ್ತಿನ ಭಯಾನಕ ವೀಡಿಯೋವೊಂಜಿ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.

ಈ ಜನ ಮುದಲೆದ ಮಿತ್ತ್ ಆನೆ ಮಿತ್ತ್ ಸವಾರಿ ಮಲ್ತಿಲೆಕ್ಕ ಮಲ್ದೆರ್. ಮುದಲೆಲ ಎಡ್ಡೆ ಮೂಡ್‌ ಡ್ ಇತ್ತಿಲೆಕ್ಕ ಈ ಜನಕ್ಕ್ ದಾಲ ಮಲ್ಪಂದೆ ಮನಿಪಂದೆ ನೀರ್ ಗ್ ಪೋತ್ಂಡ್. ಈ ಮುದಲೆದ ಮಿತ್ತ್ ಸುರುಕ್ಕು ಕುಲ್ಲುದು ಬೊಕ್ಕ ಜೆತ್ತ್ ದ್ ಸವಾರಿ ಮಲ್ತಿನೆನ್ ವೀಡಿಯೋಡ್ ತೂವೊಲಿ. ಈ ಜನತ್ತ ಧೈರ್ಯನ್ ತೂಯಿನ ಜನ ಈ ಜನಕ್ಕ್ ದಾದತ್ಂಡ್ ಪಂದ್ ಕಾಮೆಂಟ್‌ಡ್ ಪಂತೆರ್.