Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಬೊಲ್ತೆರ್ ಗ್ ಸರ್ಕಲ್ ಇನ್ಸ್ ಪೆಕ್ಟರ್ ಆದ್ ನಾಗೇಶ್ ಕದ್ರಿ

ಬೊಲ್ತೆರ್: ರಾಜ್ಯಡ್ 211 ಇನ್ಸ್ ಪೆಕ್ಟರ್ ನಕ್ಲೆನ್ ರಾಜ್ಯ ಸರಕಾರ ವರ್ಗಾವಣೆ ಮಲ್ತ್ ಆದೇಶ ಕೊರ್ತುಂಡು.

ಬೊಲ್ತೇರ್ ಪೊಲೀಸ್ ಠಾಣೆದ ಸರ್ಕಲ್ ಇನ್ಸ್ ಪೆಕ್ಟರ್ ಆದ್ ನಾಗೇಶ್ ಕದ್ರಿ ಅರೆನ್ ವರ್ಗಾವಣೆ ಮಲ್ತ್ ಆದೇಶ ಕೊರ್ತೆರ್.

ಕೊಡಗು ಜಿಲ್ಲೆಡ್ ಡಿ.ಸಿ.ಆರ್.ಬಿ ಡ್ ಬೆಲೆ ಮಲ್ತೊಂದಿತ್ತಿನ ನಾಗೇಶ್ ಕದ್ರಿ ಇತ್ತೆ ಶಿವಕುಮಾರ್ ಬೆಲೆ ಮಲ್ತೊಂದಿತ್ತಿನ ಜಾಗೆಗ್ ವರ್ಗಾವಣೆ ಆತೆರ್.

ಅಂಡಮಾನ್ ನಿಕೋಬಾರ್ ಡ್ 5.0 ಬಿರ್ಸ್ ದ ಭೂಕಂಪ

ಕೇಂದ್ರಾಡಳಿತ ಪ್ರದೇಶವಾಯಿನ ಅಂಡಮಾನ್ ಬೊಕ್ಕ ನಿಕೋಬಾರ್ ಡ್ ಇನಿ ಬೊಲ್ಪುಗು 5.0 ಬಿರ್ಸ್ ದ ಭೂಕಂಪ ಆತ್ಂಡ್.

ಈ ಭೂಕಂಪ 10 ಮೀ ಅಡಿಟ್ಟ್ ಕೇಂದ್ರೀಕೃತ ಆತ್ಂಡ್ ಪಂದ್ ಭೂಕಂಪನ ಕೇಂದ್ರ ತೆರಿಪಾದ್ಂಡ್. ನೆರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಆ.6: ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಚಾವಡಿಡ್ ಆಟಿದ ನೆಂಪು ಲೇಸ್

ಕುಡ್ಲ ನೆಹರು ಯುವ ಕೇಂದ್ರ ಬೊಕ್ಕ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ.) ಮೊಕ್ಲೆನ ಒಟ್ಟುಸೇರಿಗೆಡ್ ಆಟಿದ ನೆಂಪು 2023 ಲೇಸ್ ಆ.6 ಐತಾರ ಸ್ಪೋರ್ಟ್ಸ್ ಕ್ಲಬ್ ದ ಚಾವಡಿಡ್ ನಡಪರೆ ಉಂಡು.

ಈ ಕೂಟದ ಉದಿಪನನ್ ಕುಡ್ಲ ನೆಹರು ಯುವ ಕೇಂದ್ರದ ಆಡಳಿತಾಧಿಕಾರಿ ಜಗದೀಶ್ ಕೆ., ಮಲ್ಪರೆ ಉಲ್ಲೆರ್. ಕುಡ್ಲ ಕರ್ಮಚಾರಿ ಯೂನಿಯನ್ ಸಂಘ ಎಮ್ ಆರ್ ಪಿಎಲ್, ಒಎನ್ ಜಿಸಿದ ಗುರ್ಕಾರ್ಲು ನಿತಿನ್ ಎಚ್.ಯು ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್. ಎಂಆರ್ ಪಿಎಲ್ ನಿವೃತ್ತ ಮಹಾಪ್ರಬಂಧಕೆರ್ ವೀಣಾ ಟಿ.ಶೆಟ್ಟಿ ಆಟಿದ ಮದಿಪು ಕೊರಿಯೆರೆ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಆ.6: ಬೊಂಬೈಡ್ ಪತ್ರಕರ್ತರ ದಿನಾಚರಣೆ

ಬೊಂಬೈ : ಮಹಾರಾಷ್ಟ್ರದ ಕನ್ನಡಿಗ ಪತ್ರಕರ್ತರ ಸಂಘ (ರಿ)ದ ನಿರೆಲ್ಡ್ ಪತ್ರಕರ್ತರ ದಿನಾಚರಣೆ-2023″ ಲೇಸ್ ಆ.6 ಐತಾರದಾನಿ ಅಂಧೇರಿ ಈಸ್ಟ್ ದ ಚಕಲಾದ ಸಾಲೀಟರಿ ಕಾರ್ಪೋರೇಶನ್ ಪಾರ್ಕ್ ದ ಕ್ಲಬ್ ಹೌಸ್ ಡ್ ನಡಪರೆ ಉಂಡು.

ಲೇಸ್‌ದ ಮಲ್ಲ ಬಿನ್ನೆರಾದ್ ಬೊಂಬೈ ಬಂಟ್ಸ್ ಸಂಘದ ಅಧ್ಯಕ್ಷೆರ್ ಚಂದ್ರಹಾಸ ಕೆ. ಶೆಟ್ಟಿ, ಕರ್ನಾಟಕ ಮುಖ್ಯಮಂತ್ರಿಲೆನ ಮಾಧ್ಯಮ ಸಲಹೆಗಾರೆರ್ ಕೆ.ವಿ ಪ್ರಭಾಕರ್, ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರ್ ಶಿವಾನಂದ ತಗಡೂರು, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಡಾ.ಸುನೀತಾ ಎಂ ಶೆಟ್ಟಿ, ಪರಿಸರ ಪ್ರೇಮಿ ಸಮಿತಿದ ಅಧ್ಯಕ್ಷೆರ್ ಜಯಶ್ರೀಕೃಷ್ಣ , ಎಲ್.ವಿ. ಆಮೀನ್ ಪಾಲ್ ಪಡೆವೆರ್.

ಲೇಸ್ ದ ಗುರ್ಕಾರ್ಮೆನ್ ಮಹಾರಾಷ್ಟ್ರ ಕನ್ನಡಿಗ ಪತ್ರಕರ್ತರ ಸಂಘದ ಅಧ್ಯಕ್ಷೆರ್ ರೋನ್ಸ್ ಬಂಟ್ವಾಳ್ ಒಯಿಸೊನ್ವೆರ್. ಬಾಂಬೆ ದಿವೋ ಕೊಂಕಣಿ ವಾರಪತ್ರಿಕೆದ ಸಂಪಾದಕೆರ್ ಲಾರೇನ್ಸ್ ಕುವೆಲ್ಹೋ ಅಂಚೆನೆ ಹಿರಿಯ ಪತ್ರಕರ್ತೆರ್ ಸನತ್ ಕುಮಾರ ಬೆಳಗಲಿ ಪ್ರಶಸ್ತಿ ಸ್ವೀಕಾರ ಮಲ್ಪರೆ ಉಲ್ಲೆರ್.

ಈ ಪೊರ್ತುಡು ಕನ್ನಡಿಗ ಪತ್ರಕರ್ತರ ಸಂಘದ ಸಲಹಾ ಸಮಿತಿದ ಹಿರಿಯ ಸದಸ್ಯೆರ್, ನ್ಯಾಯವಾದಿ ರೋಹಿಣಿ ಜೆ. ಸಾಲಿಯಾನ್ ರಚನೆ ಮಲ್ತಿನ “ದಿವ್ಯಾಂಗನೆ” ಕಬಿತೆದ ಗೊಂಚಿಲ್ ಬಿಡುಗಡೆ ಮಲ್ಪರೆ ಉಲ್ಲೆರ್.

ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲದ ವರ್ಷದ ಸಭೆ, ಪೊಸ ಪದುಕೆರೆನ ಆಯ್ಕೆ

ಹಳೆಯಂಗಡಿ: ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆಯಿನ ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲ (ರಿ.) ನೆತ್ತ ಮುತಾಲಿಕೆಡ್ ವರ್ಷದ ಸಭೆ ಜುಲೈ 30 ಕ್ಕ್ ಯುವಕ ಮಂಡಲದ ಚಾವಡಿಡ್ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಈ ಲೇಸ್ ದ ಚಾವಡಿಡ್ ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್, ಕೋಶಾಧಿಕಾರಿ ಧನಂಜಯ ಕದ್ರಿತೋಟ, ಸಲಹಾ ಸಮಿತಿದ ಅಧ್ಯಕ್ಷೆರ್ ಮೋಹನ್ ಬಂಗೇರ ಬೊಕ್ಕ ಟ್ರಸ್ಟ್‌ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ ಇತ್ತೆರ್.

ಸುವರ್ಣ ಮಹಾ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಪ್ರಾರ್ತನೆ ಮಲ್ತೆರ್. ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್ ಎದ್ಕೊನಿಯೆರ್. 2022-23 ನೇ ಸಾಲ್ ದ ವಾರ್ಷದ ವರದಿನ್ ಓದಿಯೆರ್.

ಮಂಡಲದ ಕೋಶಾಧಿಕಾರಿ ಧನಂಜಯ ಕದ್ರಿತೋಟ 2022-23ನೇ ಸಾಲ್ ದ ವರ್ಷದ ಆಯ-ವ್ಯಯ ಪಟ್ಟಿ ಬೊಕ್ಕ ಲೆಕ್ಕ ಪರಿಶೋಧಕೆರೆನ ವರದಿನ್ ಓದಿಯೆರ್. ಮಂಡಲದ ಸುವರ್ಣ ಮಹಾ ಉಚ್ಚಯ ಬೊಕ್ಕ ಟ್ರಸ್ಟ್ ದ ರಜತ ಮಹಾ ಉಚ್ಚಯ ಲೇಸ್ ಒಟ್ಟಾದ್ ನಡಾಪುನ ಬಗೆಟ್ಟ್ ಚರ್ಚೆ ಮಲ್ತ್ ದ್ ಸರ್ವೆರೆನ ಸಹಕಾರಗ್ ಬಿನ್ನಾಪು ಮಲ್ತೆರ್.

ಈ ಪೊರ್ತುಡು 2023-24 ನೇ ಸಾಲ್ ದ ಪೊಸ ಪದಾಧಿಕಾರಿಲೆನ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರೆನ್ ಆಯ್ಕೆ ಮಲ್ಪುನ ಪ್ರಕ್ರಿಯೆನ್ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ ಮೇರ್ ಮಲ್ತೆರ್. ಯುವಕ ಮಂಡಲದ ಕಾರ್ಯಕಾರಿ ಸಮಿತಿಗ್ ಒಟ್ಟು 21 ಸದಸ್ಯೆರೆನ್ ಆಯ್ಕೆ ಮಲ್ತೆರ್. ಸಲಹಾ ಸಮಿತಿಗ್ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿನ್ ಸೇರ್ಸಾದ್ 16 ಜನತ್ತ ಸಲಹಾ ಸಮಿತಿನ್ ರಚನೆ ಮಲ್ತೆರ್.

ಮಂಡಲಡ್ ಇತ್ತೆ ನಡಪುನ ಬೊಕ್ಕ ನನ ನಡಪರೆ ಇಪ್ಪುನ ಲೇಸ್ ದ ಬಗೆಟ್ಟ್, ಕಟ್ವಾನದ ಆಯವ್ಯಯದ ಬಗೆಟ್ಟ್ ಸಭೆ ನಡಪಾದ್ ಇಸೇಸ ಮಹಾಸಭೆ ನಡಪಾವುನ ಬಗೆಟ್ಟ್ ಅನುಮೋದನೆ ಪಡೆಯೆರ್. ಬೊಕ್ಕ ಬೇತೆ ಸುಮಾರ್ ಇಸಯದ ಬಗೆಟ್ಟ್ ಚರ್ಚೆ ಮಲ್ತೆರ್.

ಯುವಕ ಮಂಡಲದ ಹಿರಿಯ, ಕಿರಿಯ ಸದಸ್ಯೆರ್, ಟ್ರಸ್ಟಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಸಲಹೆ, ಸೂಚನೆ, ಅನುಮೋದನೆನ್ ಕೊರಿಯೆರ್. ಮಂಡಲದ ಸಹೋದರಿ ಸಂಸ್ಥೆ ಯುವತಿ ಬೊಕ್ಕ ಮಹಿಳಾ ಮಂಡಲದ ಪದಾಧಿಕಾರಿಲು, ಸದಸ್ಯೆರ್ ಈ ಸಭೆಟ್ಟ್ ಪಾಲ್ ಪಡೆದಿತ್ತೆರ್.

2023-24 ನೇ ಸಾಲ್ ದ ಪೊಸ ಕಾರ್ಯಕಾರಿ ಸಮಿತಿ ಬೊಕ್ಕ ಪದುಕೆರ್ನ ಪೊಲಬು:

ಯುವಕ ಮಂಡಲದ ಅಧ್ಯಕ್ಷೆರಾದ್ ನಾಗೇಶ್ ಟಿ. ಜಿ, ಉಪಾಧ್ಯಕ್ಷೆರಾದ್ ಧನಂಜಯ ಕದ್ರಿತೋಟ, ಪ್ರಧಾನ ಕಾರ್ಯದರ್ಶಿ ಹಿಮಕರ ಕೋಟ್ಯಾನ್, ಜತೆ ಕಾರ್ಯದರ್ಶಿ ಪ್ರಾಣೇಶ್ ರಾವ್, ಕೋಶಾಧಿಕಾರಿ ಹನುಮಂತ ಡಿ ಪೂಜಾರ್ ರಾಮನಗರ, ಸಾಂಸ್ಕೃತಿಕ ಕಾರ್ಯದರ್ಶಿ ಲೋಕೇಶ್ ಚಿಲಿಂಬಿ, ಕ್ರೀಡಾ ಕಾರ್ಯದರ್ಶಿ ತಾರಾನಾಥ ಹಳೆಯಂಗಡಿ ಮೊಕುಲು ಅಜತ್ತ್ ಬತ್ತೆರ್.

ಅಂಚೆನೆ ಕಾರ್ಯಕಾರಿ ಸಮಿತಿಗ್ ಯತೀಶ್ ಕೋಟ್ಯಾನ್, ಸುಧಾಕರ ಆರ್ ಅಮೀನ್, ಮೋಹನ್ ಅಮೀನ್, ನಿಶಾಂತ್ ಕೊಪ್ಪಲ, ದಾಮೋದರ ಗೊಳಿದಡಿ, ಶಿವಪ್ರಸಾದ್ ಕೊಪ್ಪಲ, ಆಕಾಂಕ್ಷ ಎಂ ಅಂಚನ್ ಪಾವಂಜೆ, ಪ್ರಶಾಂತ್ ದೇವಾಡಿಗ, ರಾಜೇಶ್ ಚಿಲಿಂಬಿ, ಲಿಖಿತ್ ಕೊಪ್ಪಳ, ಭಾಸ್ಕರ ದೇವಾಡಿಗ ಪಾವಂಜೆ, ಕೇಶವ ಕಾಮತ್, ನಿಖಿಲ್ ಶೇಖರ್ ಪೂಜಾರಿ, ಮಲ್ಲೇಶ್ ಇಂದಿರಾನಗರ ಅಜತ್ ಬತ್ತೆರ್.

ಸಲಹಾ ಸಮಿತಿಗ್ ಅಧ್ಯಕ್ಷೆರಾದ್ ಮೋಹನ್ ಬಂಗೇರ, ಎಸ್. ಎಚ್. ಶೆಟ್ಟಿಗಾರ್, ಆಶೋಕ್ ಪಾವಂಜೆ, ಉಮೇಶ್ ಪಡು ಪಣಂಬೂರು, ರಾಮದಾಸ್ ಪಾವಂಜೆ, ಸೋಮಶೇಖರ ಜೋಕಟ್ಟೆದ ಪಡುತೋಟ, ನಾರಾಯಣ ರಾವ್ ರಾಮನಗರ, ಮಹಾಬಲ ಅಂಚನ್, ಜೀವನ್ ಪ್ರಕಾಶ್ ಕಾಮೆರೊಟ್ಟು, ಯೋಗೀಶ್ ಪಾವಂಜೆ, ವಿನೋದ್ ಕುಮಾರ್ ಕೊಳುವೈಲು, ಅಶೋಕ್ MCF ಕಾಲೊನಿ, ಪಲಿಮಾರ್ ಜಗದೀಶ್ ಪಾವಂಜೆ, ಹರೀಶ್ ಸಾಲ್ಯಾನ್, ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ.) ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡೀ ಕೋಸ್ಟ, ಕಾನೂನು ಸಲಹೆಗಾರೆರ್ ಚಂದ್ರಶೇಖರ ಜಿ. ಆಯ್ಕೆ ಆಯೆರ್.‌
ರಾಷ್ಟ್ರಗೀತೆದೊಟ್ಟಿಗೆ ಈ ಲೇಸ್ ಮುಗಿತಲ ಆಂಡ್. ಅಕೇರಿಗ್ ಕೋಶಾಧಿಕಾರಿ ಧನಂಜಯ ಸೊಲ್ಮೆ ಸಂದಾಯೆರ್.

ತುಳು ಅಧಿಕೃತ ಮಲ್ಪರೆ ಸಿಎಂ ಭೇಟಿ ಮಲ್ತಿನ ತುಳುನಾಡ ರಕ್ಷಣಾ ವೇದಿಕೆ ನಿಯೋಗ

ಒಡಿಪು: ತುಳುನಾಡ ರಕ್ಷಣಾ ವೇದಿಕೆ ಸ್ಥಾಪಕ ಅಧ್ಯಕ್ಷೆರಾಯಿನ ಯೋಗಿಶ್ ಶೆಟ್ಟಿ ಜಪ್ಪು ಮೆರೆನ ಮುತಾಲಿಕೆದ ನಿಯೋಗ ಇನಿ ಒಡಿಪು ಗ್ ಬತ್ತಿನ ಮುಖ್ಯ ಮಂತ್ರಿ ಸಿದ್ದರಾಮಯ್ಯ ಮೇರೆನ್ ಭೇಟಿಯಾದ್ ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪುನಂಚ ಮನವಿ ಕೊರ್ದು ಒತ್ತಾಯ ಮಲ್ತೆರ್.

ಪಂಚದ್ರಾವಿಡ ಭಾಷೆ ಡ್ ಒಂಜಾಯಿನ ಸುಮಾರು 2500 ವರ್ಷದ ಇತಿಹಾಸ ಇಪ್ಪುನ ತುಳುಭಾಷೆನ್ ದೇಶದ ಸಂವಿಧಾನದ 8ನೇ ಪರಿಚ್ಚೇದಗ್ ಸೇರಾವೊಡುಂದು ತುಳುವೆರ್ನ ಕೆಲವು ವರ್ಷದ ಬೇಡಿಕೆ ಆತ್ಂಡ್ .

ಜಗತ್ತ್ ಡ್ 1.5 ಕೋಟಿ ರ್ದ್ ಲ ಜಾಸ್ತಿ ತುಳು ಭಾಷೆದಕುಲ್ ಇತ್ ದ್, 14ನೇ ಶತಮಾನರ್ದ್ ಪಿರಕ್ ದ ಕಾವ್ಯಲು ಸೃಷ್ಟಿ ಅತ್ಂಡ್. ತುಳು ಲಿಪಿಕ್ ಶಿಲಾಶಾಸನಲು, ತಾಮ್ರ ಪತ್ರಲು, ತಾಡೆಯೋಲೆದ ದಾಖಲೆ ಕರಾವಳಿ ಪ್ರದೇಶಡ್ ಉಂಡು.

ಇತ್ತೆ ದಕ್ಷಿಣ ಕನ್ನಡ ಮತ್ತು ಒಡಿಪು ಜಿಲ್ಲೆದ ಶಾಲೆ ಡ್ 6ನೇ ತರಗತಿರ್ದ್ 10ನೇ ತರಗತಿ ಮುಟ 2009 ರ್ದ್ ತುಳು ಪಠ್ಯನ್ ತೃತೀಯ ಭಾಷೆಯಾದ್ ಕಲ್ಪವೊಂದುಲ್ಲೆರ್.

ತುಳು ಭಾಷೆ ಒರಿಪರೆಗ್ ಅವಕಾಶ ಬತುದ್ ಇಪ್ಪುನ ಸಮಸ್ತ ತುಳುವೆರೆಗ್ ಅಭಿಮಾನ ಬೊಕ್ಕ ಸಂತೋಷ ದ ವಿಷಯ.ತುಳುವೆರ್ನ ಬಾರಿ ದಿನತ ಬೇಡಿಕೆ ತುಳುನ್ ಸಂವಿಧಾನದ 8ನೇ ಪರಿಚ್ಛೇದಕ್ಕೆ ಸೇರ್ಪವುನ ಪ್ರಯತ್ನದ ಪಜ್ಜೆಡ್ ರಾಜ್ಯದ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪುನಂಚ ಈರ್ ಕ್ರಮ ದೆತೊಂದು ತುಳು ಭಾಷಿಕೆರ್ನ ಪರವಾದ್ ತುಳುನಾಡ ರಕ್ಷಣಾ ವೇದಿಕೆ ಮನವಿ ಮಲ್ತೆ ರ್.

ಈ ಪೊರ್ತುಡ್ ನಿಯೋಗದ ಜಿಲ್ಲಾ ವೀಕ್ಷಕೆರಾಯಿನ ಫ್ರಾಂಕಿ ಡಿಸೋಜ, ತಾಲೂಕಾಧ್ಯಕ್ಷರಾಯಿನ ಕೃಷ್ಣಕುಮಾರ್ ಉಪಾಧ್ಯಕ್ಷೆರ್ ಜಯ ಪೂಜಾರಿ, ಗಣೇಶ್ ಮಲ್ಯ ,ಮಹಿಳಾ ಘಟಕ ಅಧ್ಯಕ್ಷೆರ್ ಶೋಭಾ ಪಾಂಗಳ, ಬೊಕ್ಕ ತುಳುನಾಡು ರಕ್ಷಣಾ ವೇದಿಕೆ ಪದಾಧಿಕಾರಿಲು ಇತ್ತೆರ್.

ತುಳು ರಕ್ಷಣಾ ವೇದಿಕೆ ನಿಯೋಗಗ್ ಆಯಿನಾತ್ ಬೇಗ ತುಳು ಅಧಿಕೃತ ಭಾಷೆ ಘೋಷಣೆ ಮಲ್ಪುನೆಟ್ ಪ್ರಯತ್ನ ಮಲ್ಪುವೆ ಪಂದ್ ಮುಖ್ಯಮಂತ್ರಿಲು ಭರವಸೆ ಕೊರಿಯೆರ್.

ಏಷ್ಯಾ ಡ್ ಸುರುತ ಸರ್ತಿ ಬೆಂಗಳೂರ್ ಡ್ ಕಾಫಿ ಸಮ್ಮೇಳನ

ಕಾಫಿ ಬೆಳೆಗಾರೆರ್ ಬೊಕ್ಕ ಉದ್ಯಮಿಲೆಗ್ ಪೊಸ ಅವಕಾಶ ಸೃಷ್ಟಿ ಬೊಕ್ಕ ಮಾರುಕಟ್ಟೆದ ವಿಸ್ತರಣೆದ ಉದ್ದೇಶರ್ದ್ ಏಷ್ಯಾಡ್ ಉಂದೆ ಸುರುತ ಸರ್ತಿ ಬೆಂಗಳೂರ್ ದ ಅರಮನೆ ಮೈದಾನ ಡ್ ಸೆ.25 ರ್ದ್ 28 ಮುಟ 5ನೇ “ವಿಶ್ವ ಕಾಫಿ ಸಮ್ಮೇಳನ” ಅಟ್ಟಣೆ ಮಲ್ದೆರ್.

ಭಾರತೀಯ ಕಾಫಿ ಮಂಡಳಿ, ಅಂತಾರಾಷ್ಟ್ರೀಯ ಕಾಫಿ ಸಂಘಟನೆಲು (ಐಸಿಒ) ಬೊಕ್ಕ ಕಾಫಿ ಉದ್ಯಮದ ಮುತಾಲಿಕ್ ಡ್ ಈ ಸಮ್ಮೇಳನ್ ಆಯೋಜನೆ ಮಲ್ತ್ ದೆರ್. ಸಮ್ಮೇಳನದ ಬ್ರ್ಯಾಂಡ್​ ಅಂಬಾಸಿಡರ್​ ಟೆನಿಸ್​ ಆಟಗಾರೆರ್ ಬೊಕ್ಕ ಅರ್ಜುನ ಪ್ರಶಸ್ತಿ ಪುರಸೃತೆರ್ ರೋಹನ್​ ಬೋಪಣ್ಣ ಸೋಮವಾರ ಲಾಂಛನ ಅನಾವರಣ ಮಲ್ಪೆರೆ ಉಲ್ಲೆರ್.

ದೇಶದಡ್ ಕರ್ನಾಟಕ ಕಾಫಿ ರಾಜಧಾನಿ ಅತ್ಂಡ್. ಸಮ್ಮೇಳನರ್ದ್ ಕಾಫಿ ಬೆಳೆಗಾರೆಗ್ ಮಸ್ತ್ ಪ್ರಯೋಜನ ಆವೆರುಂಡು. 100 ಮಿಲಿಯನ್ ಕುಟುಂಬದಕ್ಲೆಗ್ ಉದ್ಯೋಗ ಬೊಕ್ಕ ಜೀವನೋಪಾಯ ಮಲ್ಪರೆ ಸಹಾಯ ಅತ್ಂಡ್ ಪಂದ್ ತೆರಿಪಾದೆರ್.

ಜಪ್ಪಿನಮೊಗೆರ್ ಬಂಟರ ಸಂಘದ 32ನೇ ವರ್ಷದ ಸಭೆ

ಜಪ್ಪಿನಮೊಗೆರ್ ಬಂಟರ ಸಂಘದ 32ನೇ ವಾರ್ಷಿಕ ಮಹಾಸಭೆ ಸಂಘದ ಅಧ್ಯಕ್ಷೆರ್ ಜೆ. ಸತ್ಯಪ್ರಸಾದ್ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಈ ಸಭೆಟ್ಟ್ 2023-2024 ನೇ ಸಾಲ್ ದ ಕಾರ್ಯಕಾರಿ ಸಮಿತಿನ್ ರಚನೆ ಮಲ್ತೆರ್. ಬೊಕ್ಕ ಬಂಟರ ಯಾನೆ ನಾಡವರ ಮಾತ್ರ ಸಂಘ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ, ಬೆಂಗ್ಲೂರ್ ಬಂಟರ ಸಂಘ ಬೊಕ್ಕ ಇಂಟರ್ ನ್ಯಾಷನಲ್ ಬಂಟ್ಸ್ ವೆಲ್ಫೇರ್ ಟ್ರಸ್ಟ್ ಮುತಾಲಿಕೆಡ್ “ಆಟಿದ ಕೂಟ ಬೊಕ್ಕ ಪ್ರತಿಭಾ ಪುರಸ್ಕಾರ” ಲೇಸ್ ಲಯನ್ ಸಂಜಿತ್ ಶೆಟ್ಟಿ (ಸುರಭಿ ಗ್ರೂಪ್ ಆಫ್ ಹೋಟೆಲ್ಸ್ ) ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.‌ ಬೊಕ್ಕ ಆಟಿದ ವಿಶೇಷತೆದ ಬಗೆಟ್ಟ್ ಪೊಲಬುನ್ ಮಾಜಿ ಶಾಸಕಿ ಶಕುಂತಲಾ ಶೆಟ್ಟಿ ಮೇರ್ ಚೆನ್ನೆದ ಮಣೆ ಗೊಬ್ಬುನ ಮುಖೇನ ಕೊರಿಯೆರ್.

SSLC ಬೊಕ್ಕ PUC ಡ್ 85% ರ್ದ್ ಎಚ್ಚ ಮಾರ್ಕ್ ಪಡೆಯಿನ ಗ್ರಾಮದ ಮಾತ ವರ್ಗದ ಜೋಕುಲೆಗ್ ಪ್ರತಿಭಾ ಪುರಸ್ಕಾರ ಪಟ್ಟಿಯೆರ್. ಬೊಕ್ಕ ಕುವೆಂಪು ವಿಶ್ವ ವಿದ್ಯಾಲಯ ಕೊರಿನ ಗೌರವ ಡಾಕ್ಟರೇಟ್ ಪಡೆಯಿನ ಎ. ಸದಾನಂದ ಶೆಟ್ಟಿ ಮೆರೆಗ್ ತಮ್ಮನ ನಡತ್ಂಡ್.

ಈ ಪೊರ್ತುಡು ಮಲ್ಲ ಬಿನ್ನೆರಾದ್ ಚಿತ್ತರಂಜನ್ ಭಂಡಾರಿ ಐಕಳ ಬಾವಾ, ಸಿ. ಎಸ್. ಭಂಡಾರಿ, ರಾಜಕುಮಾರ್ ಶೆಟ್ಟಿ ತಿರುವೈಲ್ ಗುತ್ತು, ಕಾರ್ಪೊರೇಟರ್ ಪ್ರವೀಣಚಂದ್ರ ಆಳ್ವ, ವಸಂತ್ ಶೆಟ್ಟಿ, ದೇವಿಚರಣ್ ಶೆಟ್ಟಿ, ಪುರಂದರ್ ಶೆಟ್ಟಿ ಕೊಂಡೆವೂರ್ ಇತ್ತೆರ್.

ಆಟಿದ ಬೇತೆ ಬೇತೆ ತೆನಸುಲು ಇತ್ತ್ಂಡ್. ಉಮೇಶ್ ಎದ್ಕೊನಿಯೆರ್. ಸೀತಾರಾಮ್ ಶೆಟ್ಟಿ, ಪ್ರಕಾಶ್ ಮೇಲಾಂಟ, ಕೃಷ್ಣ ಶೆಟ್ಟಿ ತಾರೇಮಾರ್ ಸಹಕಾರ ಕೊರಿಯೆರ್.

ಆ.6: ಮುಲ್ಕಿ ಬಂಟರ ಸಂಘದ ಚಾವಡಿಡ್ ಆಟಿದ ತಮ್ಮನ ಲೇಸ್

ಮುಲ್ಕಿ ಬಂಟರ ಸಂಘ (ರಿ.) ದ ಮುತಾಲಿಕೆಡ್ 2023-24 ನೇ ಸಾಲ್ ದ ವಿದ್ಯಾರ್ಥಿವೇತನ, ಪ್ರತಿಭಾ ಪುರಸ್ಕಾರ, ಮುಲ್ಕಿ ಸುಂದರರಾಮ ಶೆಟ್ಟಿ ಪ್ರಶಸ್ತಿ ಪ್ರದಾನ, ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಆಟಿದ ತಮ್ಮನ ಲೇಸ್ ಆ.6 ಐತಾರ ಮುಲ್ಕಿ ಬಂಟರ ಸಂಘದ ಚಾವಡಿಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಮುಲ್ಕಿ ಬಂಟರ ಸಂಘದ ಗುರ್ಕಾರ್ಲು ಕೆ‌. ಪುರುಷೋತ್ತಮ ಶೆಟ್ಟಿ ಒಯಿಸೊನ್ವೆರ್. ಕುಡ್ಲ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ಟಿ ಈ ಲೇಸ್ ದ ಉದಿಪನ ಮಲ್ಪುವೆರ್.‌ ಮಲ್ಲ ಬಿನ್ನೆರಾದ್ ಬೊಂಬೈ ವಿ.ಕೆ ಸಮೂಹ ಸಂಸ್ಥೆದ ಗುರ್ಕಾರ್ಲು ಬೊಕ್ಕ ಆಡಳಿತ ನಿರ್ದೇಶಕೆರ್ ಕೆ.ಎಂ ಶೆಟ್ಟಿ ಮಧ್ಯಗುತ್ತು, ಬೆಂಗ್ಲೂರ್ ಬಂಟರ ಸಂಘದ ಗುರ್ಕಾರ್ಲು ಮುರಳೀಧರ ಹೆಗ್ಡೆ, ಮುಲ್ಕಿ ಸುಂದರರಾಮ ಶೆಟ್ಟಿ ಚಾರಿಟೇಬಲ್ ಟ್ರಸ್ಟ್‌ ದ ಟ್ರಸ್ಟಿ ಸುಕುಮಾರ್ ಶೆಟ್ಟಿ ಕಕ್ವಗುತ್ತು ಪಾಲ್ ಪಡೆಯೆರೆ ಉಲ್ಲೆರ್. ಆಟಿದ ಮದಿಪುನ್ ನಿಟ್ಟೆ ವಿಶ್ವವಿದ್ಯಾನಿಲಯದ ಮಾನವಿಕ ವಿಭಾಗದ ಪ್ರಭಾರ ಮುಖ್ಯಸ್ಥೆರ್ ಡಾ. ಸಾಯಿಗೀತಾ ಹೆಗ್ಡೆ ಕೊರಿಯೆರೆ ಉಲ್ಲೆರ್.

ಕುಡ್ಲ ಶ್ರೀ ದೇವಿ ಎಜ್ಯುಕೇಶನ್ ಟ್ರಸ್ಟ್ ದ ಆಡಳಿತ ನಿರ್ದೇಶಕೆರ್ ಎ‌.ಸದಾನಂದ ಶೆಟ್ಟಿ ಮೆರೆಗ್ 2023 ತ್ತ ಮುಲ್ಕಿ ಸುಂದರರಾಮ ಶೆಟ್ಟಿ ಪ್ರಶಸ್ತಿ ಪುರಸ್ಕಾರ ನಡಪರೆ ಉಂಡು ಪಂದ್ ಮುಲ್ಕಿ ಬಂಟರ ಸಂಘ (ರಿ.) ದ ಅಧ್ಯಕ್ಷೆರ್, ಗೌರವಾಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ತುಳುನಾಡ್ ಗ್ ಬತ್ತೆರ್ ಸಿಎಂ ಸಿದ್ದರಾಮಯ್ಯೆರ್

ಕುಡ್ಲ: ಕರ್ನಾಟಕ ರಾಜ್ಯದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಪ್ರಗತಿ ಪರಿಶೀಲನೆ ಮಲ್ಪೆರೆ ಆ. 1 ದಾನಿ ಅಂಗರೆ ಬೊಲ್ಪುಗ್ ಬಜಪೆದ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಗ್ ಬತ್ತೆರ್.

ಮುಖ್ಯಮಂತ್ರಿಲೆನ ಒಟ್ಟುಗು ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಅಂಚೆನೆ ಜಿಲ್ಲಾ ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಉಲ್ಲೆರ್.

ಈ ಪೊರ್ತುಡು ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ, ಬೊಲ್ತೇರ್ ದ ಮಾಜಿ ಶಾಸಕೆರ್ ವಸಂತ ಬಂಗೇರ, ದ.ಕ. ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್, ಕುಡ್ಲ ನಗರ ಪೊಲೀಸ್ ಆಯುಕ್ತೆರ್ ಕುಲ್ ದೀಪ್ ಕುಮಾರ್ ಜೈನ್, ಜಿ.ಪಂ. ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ. ಆನಂದ್, ಎಸ್ಪಿ ರಿಷ್ಯಂತ್, ಡಿಸಿಪಿ ಅನ್ಯುಕುಮಾರ್, ಬೊಕ್ಕ ಅಧಿಕಾರಿಲು ಇತ್ತೆರ್.

You Missed