Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ನಟೆ ಉಪೇಂದ್ರಗ್ ಪೋಲಿಸ್ ನೋಟಿಸ್

ಫೇಸ್ ಲೈವ್ ವಿಡಿಯೋಡ್ ಗಾದೆ ಪಾತೆರ ಕೇನುನ ಪೊರ್ತುಡು ಆಕ್ಷೇಪಾರ್ಹ ಪದ ಗಲಸಿನ ನಟೆ, ನಿರ್ದೇಶಕೆರ್ ಉಪೇಂದ್ರ ಮೆರೆನ ಮಿತ್ತ್ ಬೆಂಗ್ಲೂರ್ ದ ಚೆನ್ನಮ್ಮನಕೆರೆ ಅಚ್ಚುಕಟ್ಟು ಪೋಲಿಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಆಟ್ರಾಸಿಟಿ ಕೇಸ್ ದ ಅಡಿಟ್ಟ್ ದೂರು ದಾಖಲ್ ಆಯಿನೇರ್ದಾವೆರ ಸಿಕೆ ಅಚ್ಚುಕಟ್ಟು ಪೋಲಿಸೆರ್ ಉಪೇಂದ್ರ ಮೆರೆಗ್ ವಿಚಾರಣೆಗ್ ಹಾಜರ್ ಆಯೆರೆ ಪಂತೆರ್. ‌ಈ ಪೊರ್ತುಡು ಇಲ್ಲದ ಮಹಜರು ನಡಪರೆ ಉಂಡು ಪಂದ್ ತೆರಿಪಾದೆರ್.

ಸೆ.24: ವಿಜಯನಗರ ಬಂಟರ ಸಂಘದ ಚಾವಡಿಡ್ ಅಸ್ಟೆಮಿದ ಐಸಿರ ಲೇಸ್

ತುಳುನಾಡ ಜವನೆರ್ ಬೆಂಗ್ಲೂರ್ (ರಿ.) ಸಂಘಟನೆದ ಮುತಾಲಿಕೆಡ್ ಶ್ರೀಕೃಷ್ಣ ಜನ್ಮಾಷ್ಟಮಿದ ಲೆಕ್ಕೊಡು ಅತ್ತಿಗುಪ್ಪೆ ವಿಜಯನಗರ ಬಂಟರ ಸಂಘದ ಚಾವಡಿಡ್ ಅಸ್ಟೆಮಿದ ಐಸಿರ ಪನ್ಪಿನ ಲೇಸ್ ಸೆಪ್ಟೆಂಬರ್ 24 ಐತಾರ ಬೊಲ್ಪುಗು 9 ರ್ದ್ ರಾತ್ರೆ 10 ಗಂಟೆ ಮುಟ್ಟ ನಡಪರೆ ಉಂಡು.

ಈ ಪೊರ್ತುಡು ದಕ್ಷಿಣ ಕನ್ನಡ ಜಿಲ್ಲೆದ ಬೆದ್ರ ಬೋಳ ಗುತ್ತುದ ಸತೀಶ್ ಜಗದೀಶ್ ಶೆಟ್ಟಿ ಮಾಲಿಕತ್ವಡ್ ಪುಗರ್ತೆದ ಕಂಬುಲದ ಎರ್ಲು ಧೋನಿ ಬೊಕ್ಕ ಬೊಲ್ಲೆನ್ ಸನ್ಮಾನಗ್ ಲೆತೊಂದು ಬರಿಯೆರೆ ಉಂಡು. ಅಂಚೆನೆ ಈ ಎರ್ಲೆನ ಮಾಲಿಕೆರೆಗ್ ಬಿನ್ನೆರೆನ ಎದುರುಡ್ ಚಾವಡಿಡ್ ಸನ್ಮಾನ ನಡಪರೆ ಉಂಡು.

ಕಂಬುಲ ಕ್ಷೇತ್ರದ ಪುಗರ್ತೆದ ಜೋಡಿ ಧೋನಿ ಬೊಕ್ಕ ಬೊಳ್ಳೆ ಬರೊಂದು ಇಪ್ಪುನವು ಬೆಂಗ್ಲೂರ್ ದ ಜವನೆರೆಗ್ ಭಾರೀ ಕುಸಿ ಕೊರ್ತುಂಡು.

ಆ.25: ಗೋರೆಗಾಂವ್ ಡ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ

ಬೊಂಬೈ : ಶ್ರೀ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಸೇವೆದಾಟ ಗೋರೆಗಾಂವ್ ದಿ.ಜಯ ಸುವರ್ಣ ಮಾರ್ಗದಲ್ಪ ಇಪ್ಪುನ ಜಯಲೀಲಾ ಬ್ಯಾಂಕ್ವೆಟ್ ಹಾಲ್ ಡ್ ಆ.25 ಸುಕ್ರಾರ ಬಯ್ಯಗ್ 4 ಗಂಟೆರ್ದ್ ಭಾರೀ ಗೌಜಿಡ್ ನಡಪರೆ ಉಂಡು.

ಶ್ರೀ ಗೆಜ್ಜೆಗಿರಿ ಕ್ಷೇತ್ರದ ಗೌರವಾಧ್ಯಕ್ಷೆರ್, ಬಿಲ್ಲವ ಸಮಾಜದ ಗೌರವಾನ್ವಿತ ನೇತಾರೆರ್, ಕೀರ್ತಿಶೇಷ ಜಯ ಸಿ ಸುವರ್ಣ ದಂಪತಿಲೆನ ನೆಂಪುಗಾದ್ ಈ ಆಟ ನಡಪರೆ ಉಂಡು. ‌

ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟಡ್ ಕ್ಷೇತ್ರದ ಜಾಗೆದ ಪುರಾಣದ ಕಾರಣಿಕನ್ ತೊಜಪಾವುನ ಪ್ರಸಂಗ ಉಂಡು. ಈ ಆಟನ್ ಸೇವೆದ ರೂಪಡ್ ಯಕ್ಷಗಾನ ಗೆಜ್ಜೆಸೇವೆದ ಸೇವಾಕರ್ತೆರ್ ಕೀರ್ತಿ ಶೇಷ ಜಯ ಸಿ ಸುವರ್ಣ ಮೆರೆನ ಜೋಕುಲು ಬೊಕ್ಕ ಕುಟುಂಬದಕುಲು ಗೊಬ್ಬಯೆರೆ ಉಲ್ಲೆರ್. ಅಂಚೆನೆ ಈ ಲೇಸ್ ಗ್ ಮಾತೆರೆನ್ಲಾ ಮೋಕೆಡ್ ಎದ್ಕೊಂದೆರ್.

ನಾಸಿಕ್ ರೋಡ್ ಫ್ರೆಂಡ್ಸ್ ಮುತಾಲಿಕೆಡ್ ಆಟಿಡೊಂಜಿ ದಿನ ಲೇಸ್

ನಾಸಿಕ್ ರೋಡ್ ಫ್ರೆಂಡ್ಸ್ ಮೊಕ್ಲೆನ ಮುತಾಲಿಕೆಡ್ ಆಟಿಡೊಂಜಿ ದಿನ ಲೇಸ್ ಹೊಟೇಲ್ ಲ್ಯಾಂಡ್ ಮಾರ್ಕ್ ಡ್ ಗೌಜಿಡ್ ನಡತ್ಂಡ್.

ನಾಸಿಕ್ ರೋಡ್ ದ ಹಿರಿಯೆರೆನ ಮಾರ್ಗದರ್ಶನಡ್ ನಡತಿನ ಈ ಲೇಸ್ ಡ್ ತುಳುನಾಡ್ ದ ಇಸೇಸ ತೆನಸ್ ಲಾಯಿನ ಪುನರ್ಪುಳಿ ಕಡಿ, ಕೊಟ್ಟೆ (ಗುಂಡ), ಮೂಡೆ, ಪತ್ರಡ್ಡೆ, ಗೆಂಡದಡ್ಯೆ, ಉಪ್ಪಡ್ ಪಚ್ಚಿಲ್ ಸುಕ್ಕ, ತೇವುದ ಚಟ್ನಿ, ತಿಮರೆದ ಚಟ್ನಿ, ಕುಡುತ್ತ ಸಾರ್, ಉರ್ಪೆಲರಿತ್ತ ನುಪ್ಪು, ತೌತೆ ಕೊದ್ದೆಲ್, ಕೋರಿ ಸುಕ್ಕ ಇಂಚ ಸುಮಾರ್ 20 ರ್ದ್ ಎಚ್ಚ ಬಗೆತ್ತ ತೆನಸ್ ಲೆನ ಆಟಿದ ವನಸ್ ಇತ್ತ್ಂಡ್. ಮಾತ ಶುಚಿರುಚಿಯಾಯಿನ ಆಟಿದ ತೆನಸ್ ಲೆನ್ ನಾಸಿಕ್ ರೋಡ್ ಫ್ರೆಂಡ್ಸ್ ದ ಪೊಂಜೋವ್ ನಕ್ಲೇ ತಯಾರ್ ಮಲ್ತ್ ದ್ ಮೆಚ್ಚಿಗೆಗ್ ಪಡೆಯೆರ್.

✍️ ವರದಿ : ಸಂತೋಷ್ ಶೆಟ್ಟಿ ಕುಚ್ಚೂರು

ಹಾರ್ಟ್ ಅಟ್ಯಾಕ್ ಆದ್ ತೀರ್ ಪೋಯಿನ ನರ್ಸಿಂಗ್ ಕಲ್ಪಾರ್ಥಿ

ನರ್ಸಿಂಗ್ ಕಲ್ಪಾರ್ಥಿ ಲೋ ಬಿಪಿ ಬೊಕ್ಕ ಹಾರ್ಟ್ ಅಟ್ಯಾಕ್ ಆದ್ ತೀರ್ ಪೋಯಿನ ಘಟನೆ ಬೊಲ್ತೇರ್ ತಾಲೂಕ್ ದ ನೆರಿಯ ಗ್ರಾಮಡ್ ನಡತ್ಂಡ್.

ಸುಮಾ (19) ತೀರ್ ಪೋಯಿನಾರ್. ನೆರ್ದ್ ದುಂಬು ಸುಮಾ ಹುಷಾರ್ ಇಜ್ಜಾಂದೆ ಕುಡ್ಲದ ಆಸ್ಪತ್ರೆಡ್ ಚಿಕಿತ್ಸೆ ಪಡೆದ್ ಗುಣ ಆದಿತ್ತೆರ್.‌ ಕೋಡೆ ರಾತ್ರೆ ಕುಡ ಒರಾನೆ ಹುಷಾರ್ ತತ್ತ್ ದಿತ್ತೆರ್.‌ ಮೆರೆನ್ ಆಸ್ಪತ್ರೆಗ್ ಲೆತೊಂದು ಪೋನಗ ತಾದಿಡ್ ಹಾರ್ಟ್ ಅಟ್ಯಾಕಾದ್ ತೀರ್ ಪೋತೆರ್. ಮೇರ್ ಕುಡ್ಲಡ್ ಸುರುತ್ತ ವರ್ಷದ ನರ್ಸಿಂಗ್ ಕಲ್ತೊಂದು ಇತ್ತೆರ್.

ಮುಲ್ಕಿಡ್ ಜೈ ತುಲುನಾಡ್(ರಿ) ತೆರಪು ಉದಿಪನ

ಜೈ ತುಲುನಾಡು(ರಿ) ಸಂಘಟನೆದ 9 ನೇ ವರ್ಷದ ವಾರ್ಷಿಕೋತ್ಸವ ಪುನರೂರು ಟೂರಿಸ್ಟ್ ಹೋಮ್ ಸಭಾ ಭವನಡ್ ನಡ ತ್ಂಡ್. ಅಂಚನೆ ಜೈ ತುಲುನಾಡ್ ಸಂಘಟನೆದ ತೆರಪು(ಕಚೇರಿ) ಒಕ್ಕೆಲ್ ಲೇಸ್ ಐತಾರ ಬೊಲ್ಪುಗು ಮುಲ್ಕಿ ಕೆನರಾ ಬ್ಯಾಂಕ್ ಕೈತಲ್ ನಡತ್ಂಡ್.

ಸಭಾ ಕಾರ್ಯಕ್ರಮದ ಉದಿಪನ ಮಲ್ತ್ ಪಾತೆರ್ನ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನ ರೂರು, ತುಳು ಭಾಷೆ ಒರಿಪಾದ್ ಬುಲೆಪಾವುನ ನಮ್ಮ ಕರ್ತವ್ಯ. ಜೋಕ್ಲೆಗ್ ತುಳು ಲಿಪಿ ಕಲ್ಪಾವೊಡು, ತುಳುಕ್ಕು ರಾಜ್ಯಡ್ ವಿಶೇಷ ಸ್ಥಾನಮಾನ ಕೊರೊಡು ಅಂಚನೆ ಸಂವಿಧಾನದ 8 ನೇ ಪರಿಚ್ಚೇದಗ್ ಸೇರ್ಪಾವೆರೆ ಹಕ್ಕೊತ್ತಾಯ ಮಲ್ಪೊಡು ಪಂಡೆರ್.

ಲೇಸ್ ದ ಗುರ್ಕಾಮೆನ್ ಜೈ ತುಲುನಾಡ್ ಸಂಘಟನೆದ ಗುರ್ಕಾರೆ ವಿಶು ಶ್ರೀಕೇರ ವಹಿಸಾದ್ ಇತ್ತೆರ್. ಮಲ್ಲ ಬಿನ್ನೆರಾದ್ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಡಾ. ಆಕಾಶ್ ರಾಜ್ ಜೈನ್, ಟೈಮ್ಸ್ ಆಫ್ ಕುಡ್ಲ ತುಳುಪತ್ರಿಕೆದ ಸಂಪಾದಕೆರ್ ಎಸ್. ಆರ್ ಬಂಡಿಮಾರ್, ವಕೀಲೆರಾಯಿನ ಗಿರೀಶ್ ಶೆಟ್ಟಿ ಶಿಬರೂರು, ಮುಲ್ಕಿ ವಲಯ ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ನಿಶಾಂತ್ ಶೆಟ್ಟಿ ಕಿಲೆಂಜೂರು, ಜೈ ತುಲುನಾಡ್ ಸಂಘಟನೆದ ಉಪಾಧ್ಯಕ್ಷೆರ್ ಉದಯ ಪೂಂಜ, ಕಿರಣ್ ತುಲುವೆ, ಪೂರ್ಣಿಮಾ ಕಿರಣ್ ಇತ್ತೆರ್.

ಪೂರ್ಣಿಮಾ ಬಂಟ್ವಾಳ್ ಲೇಸ್ ನಿರೂಪಣೆ ಮಲ್ತೆರ್.

 

ಬೊಲ್ತೇರ್ ಡ್ ತುಳುನಾಡ್ ಒಕ್ಕೂಟದ ಮುತಾಲಿಕೆಡ್ ಚೆನ್ನೆಮಣೆ ಗೊಬ್ಬುದ ಪಂತೊ ಉದಿಪನ

ಬೊಲ್ತೇರ್: ತುಳುನಾಡ್ ಒಕ್ಕೂಟ ಸಂಘಟನೆದ ಮುತಾಲಿಕೆಡ್ (ಆ.13) ಇನಿ ಚೆನ್ನೆಮಣೆ ಗೊಬ್ಬುದ ಪಂತೊ ಬೊಲ್ತೇರ್ ಅಂಬೇಡ್ಕರ್ ಭವನಡ್ ನಡತ್ಂಡ್.

ತುಳುನಾಡ್ ಒಕ್ಕೂಟದ ಸಂಸ್ಥಾಪಕೆರ್ ಶೈಲೇಶ್ ಆರ್. ಜೆ ಲೇಸ್ ಡ್ ಚೆನ್ನೆಮಣೆಕ್ಕ್ ಕಾಯಿ ಪಾಡುನ ಮುಖೇನ ಉದಿಪನ ಮಲ್ತೆರ್.

ಗುರ್ಕಾರ್ಮೆನ್ ತುಳುನಾಡ್ ಒಕ್ಕೂಟದ ಅಧ್ಯಕ್ಷೆರ್ ಶೇಖರ್ ಗೌಂಡತಿಗ್ ಒಯಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ದ ನೋಟರಿ ವಕೀಲೆರ್ ಬಿ. ಮುರಳಿ, ಯುವವಾಹಿನಿ ಕೇಂದ್ರ ಸಮಿತಿದ ಕೋಶಾಧಿಕಾರಿ ಎಂ. ಕೆ. ಪ್ರಸಾದ್, ಲಾಯಿಲ ಗ್ರಾಮ ಪಂಚಾಯತ್ ಸದಸ್ಯೆರ್ ಪ್ರಸಾದ್ ಶೆಟ್ಟಿ ಏನಿಂಜೆ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ತುಳುನಾಡ್ ಒಕ್ಕೂಟದ ಪದಾಧಿಕಾರಿಲು, ಸದಸ್ಯೆರ್, ಸ್ಪರ್ಧಿಲು ಇತ್ತೆರ್. ಬೊಕ್ಕ ಚೆನ್ನೆಮಣೆ ಪಂತೊ ನಡತ್ಂಡ್. ಒಕ್ಕೂಟದ ಕಾನೂನು ಸಲಹೆಗಾರೆರ್ ಹರೀಶ್ ಎದ್ಕೊನಿಯೆರ್. ಅಶ್ವಿನಿ ಲೇಸ್ ದ ಸುಧಾರಿಕೆ ಮಲ್ತೆರ್.

ಆ.17: ಪಟ್ಲಡ್ಕ ಶ್ರೀ ಗಡಿಯಾಡಿ ಆದಿಮೊಗೇರ್ಕಳ, ಸ್ವಾಮಿ ಕೊರಗಜ್ಜ ಬೊಕ್ಕ ಪರಿವಾರ ದೈವೊಲೆನ ದೈವಸ್ಥಾನಡ್ ಪರಕೆದ ಕೋಲ

ಕಡಬ: ಪಟ್ಲಡ್ಕ, ಕೊಕ್ಕಡ, ಕೌಕ್ರಾಡಿ ಗ್ರಾಮದ ಶ್ರೀ ಗಡಿಯಾಡಿ ಆದಿಮೊಗೇರ್ಕಳ, ಸ್ವಾಮಿ ಕೊರಗಜ್ಜ ಬೊಕ್ಕ ಪರಿವಾರ ದೈವೊಲೆನ ದೈವಸ್ಥಾನಡ್ ಶ್ರೀ ಕ್ಷೇತ್ರ ಪಟ್ಲಡ್ಕದ ಆಡಳಿತ ಮಂಡಳಿದ ಮುತಾಲಿಕೆಡ್ ಪರಕೆದ ಕೋಲ ಆ.17 ಗುರುವಾರ ಬೊಲ್ಪುಗು ನಡಪರೆ ಉಂಡು. ‌

ಈ ಲೇಸ್ ಗ್ ನಿಕುಲು ಮಾತ ಎಚ್ಚದ ಸಂಖ್ಯೆಗ್ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಕ್ಷೇತ್ರ ಪಟ್ಲಡ್ಕ ಆಡಳಿತ ಮಂಡಳಿ ಲೆಪ್ಪೋಲೆಡ್ ತೆರಿಪಾದೆರ್.

ಆ.20: ಅಮೃತಸಂಜೀವಿನಿ (ರಿ.) ಕುಡ್ಲ ನೆತ್ತ 8ನೇ ವರ್ಷೊದ ಉಚ್ಚಯ, 13 ಬಡಪತ್ತ್ ಕುಟುಂಬಗ್ ಪನವುದ ಸಕಾಯ ಪಟ್ಟುನ ಲೇಸ್

ಅಮೃತಸಂಜೀವಿನಿ (ರಿ.) ಕುಡ್ಲ ನೆತ್ತ 8ನೇ ವರ್ಷೊದ ಉಚ್ಚಯ, ಸಭಾ ಲೇಸ್ ಬೊಕ್ಕ 13 ಬಡಪತ್ತ್ ಕುಟುಂಬಗ್ ಪನವುದ ಸಕಾಯ ಪಟ್ಟುನ ಲೇಸ್ ಆ.20 ಐತಾರ ಬೊಲ್ಪುಗು 11 ಗಂಟೆಗ್ ಗುರುಪುರ ವಜ್ರದೇಹಿ ಮಠಟ್ಟ್ ನಡಪರೆ ಉಂಡು. ‌

ಈ ಲೇಸ್ ಡ್ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಪಾಲ್ ಪಡೆದ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಅಂಚೆನೆ ಈ ಕೂಟ ನೆರ್ದ್ ದುಂಬು 353 ಸೇವಾ ಯೋಜನೆ, 252 ತುರ್ತು ಯೋಜನೆ, 605 ಬಡಪತ್ತ್ ಕುಟುಂಬಗ್ 1 ಕೋಟಿ 48 ಲಕ್ಷದಾತ್ ಪನವುದ ಸಕಾಯನ್ ಕೊರ್ತುಂಡು ಪಂದ್ ಅಮೃತಸಂಜೀವಿನಿ (ರಿ.) ಕುಡ್ಲ ನೆತ್ತ ಕೂಟದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಕಾರ್ಲ ಹಾಡಿ ಗರಡಿ ಬ್ರಹ್ಮ ಬೈದರ್ಕಳ ಕ್ಷೇತ್ರದ ವರ್ಷಾವಧಿ ಉತ್ಸವ

ಕಾರ್ಲ: ಹಾಡಿಗರಡಿ ಶ್ರೀ ಬ್ರಹ್ಮ ಬೈದರ್ಕಳ ಮಾಯಂದಲ ದೇವಿ ಸನ್ನಿದಿಡ್ ವರ್ಷಂಪ್ರತಿ ನಡಪುನ ಕ್ಷೇತ್ರದ ವರ್ಷಾವಧಿ ಉತ್ಸವ ಆಗಸ್ಟ್ 17 ರ್ದ್ 21 ಮುಟ್ಟ ನಡಪರೆ ಉಂಡು.

ಆ.17 ಗುರುವಾರ ಬೊಲ್ಪುಗು 7.30 ಕ್ಕ್ ತೋರಣ ಮೂಹೂರ್ತ, 7.45 ಕ್ಕ್ ಪುಣ್ಯಾಹವಾಚನ, ಕ್ಷೇತ್ರ ಶುದ್ದಿ, ಉದಯಕಾಲ ಪೂಜೆ, 8 ಗಂಟೆಗ್ ಹಾಡಿಗರಡಿ ಇಲ್ಲರ್ದ್ ಶ್ರೀ ಕ್ಷೇತ್ರಗ್ ಭಂಡಾರ ಬರ್ಪಿನಿ, 9 ಗಂಟೆಗ್ ಪಂಚದೈವದ ಸನ್ನಿಧಾನಡ್ ತನುತಂಬಿಲ ಬೊಕ್ಕ ಪಂಚಪರ್ವ ಸೇವೆ, 10 ಗಂಟೆಗ್ ಉದ್ವಾರ್ಚನಾ ಪೂಜೆ, 12 ಗಂಟೆಗ್ ಅಲಂಕಾರ ಪೂಜೆ, ಪ್ರಸನ್ನ ಪೂಜೆ, 12.30 ಕ್ಕ್ ತಂತ್ರಾಗಮ ಪೂಜೆ, ಶ್ರೀ ಬ್ರಹ್ಮಬಲಿ , ಮದ್ಯಾಹ್ನ 1.30 ಮಹಾಪೂಜೆ, ಪ್ರಸಾದ ವಿತರಣೆ, 2 ಗಂಟೆಗ್ ಅನ್ನಸಂತರ್ಪಣೆ, ರಾತ್ರಿ 7.30 ಕ್ಕ್ ಸೋಣಾರತಿ ದೀಪಾರಾಧನೆ, ಮಹಾಗಣಬಲಿ ಮಹಾಪೂಜೆ ನಡಪೆರೆ ಉಂಡು.

ಆ.18 ಶುಕ್ರವಾರ ಬೊಲ್ಪುಗು 8 ಗಂಟೆಗ್ ಕಲಶಪೂಜೆ, ಕ್ಷೇತ್ರ ಶುದ್ದಿ, ವಗೈರೆ, ಮದ್ಯಾಹ್ನ 12 ಗಂಟೆಗ್ ಮಹಾಪೂಜೆ, ಬಯ್ಯಗ್ 6.30 ಗಂಟೆಗ್ ತಂತ್ರಾಗಮ ಪೂಜೆ, ಕಲಾಪ್ರಸನ್ನ ಪೂಜೆ, ರಾತ್ರೆ 7.30 ಕ್ಕ್ ಶ್ರೀ ಬ್ರಹ್ಮಬಲಿ, 8.30 ಕ್ಕ್ ಶ್ರೀ ಬೈದರ್ಕಳ ಬೊಕ್ಕ ಪರಿವಾರ ದೈವದ ನೇಮೋತ್ಸವ, ಅನ್ನಸಂತರ್ಪಣೆ.

ಆ.19 ಶನಿವಾರ ಬೊಲ್ಪುಗ್ 4 ಗಂಟೆಗ್ ತಂತ್ರಾಗಮ ಪೂಜೆ, ಶ್ರೀ ಬ್ರಹ್ಮಬಲಿ, 7.30 ಕ್ಕ್ ಕ್ಷೇತ್ರ ಶುದ್ದಿ, ಕಲಶಪೂಜೆ, ಬಿಂಬಶುದ್ದಿ, 8.30 ಅಲಂಕಾರ ಪೂಜೆ, ಪ್ರಸನ್ನ ಪೂಜೆ, ಮದ್ಯಾಹ್ನ 11 ಗಂಟೆಗ್ ಶ್ರೀ ಮಾಯಾಂದಲ ದೇವಿ ನೇಮೋತ್ಸವ, ಅನ್ನಸಂತರ್ಪಣೆನಡಪರೆ ಉಂಡು.

ಆ.20 ಐತಾರದಾನಿ
ಬೊಲ್ಪುಗ್ 9 ಗಂಟೆಗ್ ಪುಣ್ಯಾಹವಾಚನ, ಕಲಶ ಪೂಜೆ, ಕ್ಷೇತ್ರ ಶುದ್ದಿ, ವಗೈರೆ, ಮದ್ಯಾಹ್ನ 1 ಗಂಟೆಗ್ ಮಹಾಪೂಜೆ, ರಾತ್ರೆ 8 ಗಂಟೆಗ್ ವಾರ್ಷಿಕ ನೈವೇದ್ಯ ಪೂಜೆ(ಅಗೇಲ್ ಸೇವೆ)

ಆ.21 ಸೋಮವಾರ
ಬೊಲ್ಪುಗ್ 8 ಗಂಟೆಗ್ ಪುಣ್ಯಾಹವಾಚನ ಪ್ರಧಾನ ಹೋಮ, ನವಕ ಪೂಜೆ, ಪ್ರಸನ್ನ ಪೂಜೆ, ಮದ್ಯಾಹ್ನ 12.30 ಕ್ಕ್ ಮಹಾಪೂಜೆ , 1 ಗಂಟೆಗ್ ಪ್ರಸಾದ, ಮಹಾ ಮಂತ್ರಾಕ್ಷತೆ, 1.30 ಗಂಟೆಗ್ ಗರಡಿದ ಇಲ್ಲಗ್ ಭಂಡಾರ ಪೋಪುನ, ರಾತ್ರೆ 8 ಗಂಟೆಗ್ ಸೋಣಾರತಿ ಪೂಜೆ ನಡಪೆರೆ ಉಂಡು.

ಮಾತಾ ಭಕ್ತೆರ್ ಕ್ಷೇತ್ರಗ್ ಬತ್ತ್ ದ್ ಕ್ಷೇತ್ರದ ಸಿರಿಮುಡಿ ಗಂಧ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ಕ್ಷೇತ್ರದ ಆಡಳಿತ ಸಮಿತಿದಕುಲ್ ತೆರಿಪಾದೆರ್.

You Missed