Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ತುಲು ಲಿಪಿ ಮಾತೆರ್ಲ ಕಲ್ಪೊಡು : ಬಿ.ಮಹಾವೀರ ಹೆಗ್ಡೆ

ಸಂಸ್ಕೃತಿ ಸಿಂಚನ ರೆಂಜಾಳ, ಶ್ರೀ ಮಹಾಮಾಯಿ ಕುಣಿತ ಭಜನಾ ಮಂಡಳಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ನೆಟ್ಟ ನಿರೆಲ್ಡ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ,ಜೈ ತುಲುನಾಡ್ (ರಿ) ಸಂಸ್ಥೆದ ಮುತಾಲಿಕೆಡ್ ಬಲೆ ತುಲು ಲಿಪಿ ಕಲ್ಪುಗ ತರಬೇತಿ ದ ಉದಿಪನದ ಲೇಸ್ ಆ.13 ದಾನಿ ನಡತ್ಂಡ್.

ಲೇಸ್ ಉದಿಪನ ಮಲ್ತ್ ಪಾತೆರ್ನ ಮಹಾವೀರ ಹೆಗ್ಡೆ, ತುಳು ಲಿಪಿ ಮಾತೆರ್ಲ ಕಲ್ಪೊಡು. 1928ರಲ್ಲಿ ಭಾಷಾವಾರು ಸಮಿತಿ ಪರಿಷದ್ ಮೀಟಿಂಗ್ ಡ್ ತುಳು ಭಾಷೆನ್ ಒರಿಪಾವುನ ಅಂಚನೆ ಸಂಸ್ಕೃತಿದ ಬೆಳವಣಿಗೆಗ್ ಒತ್ತು ಕೊರ್ದ್ ಇತ್ತೆರ್, ತುಳುನಾಡ್ ಬ್ಯಾಂಕ್ ಸ್ಥಾಪನೆ ಮಲ್ತ್ ಇತ್ತೆರ್ ಪಂದ್ ತೆರಿಪಾಯೆರ್.

ಈ ಪೊರ್ತುಡು ಮಹಮ್ಮಾಯಿ ಕುಣಿತ ಭಜನ ಮಂಡಳಿ ರೆಂಜಾಳದ ಸಂಚಾಲಕೆರಾಯಿನ ಸುಪ್ರಿಯಾ ಮೇರ್ ಗುರ್ಕಾಮೆನ್ ವಹಿಸಾದ್ ಇತ್ತೆರ್. ಜೈ ತುಲುನಾಡ್ ಸಂಘದ ಅಧ್ಯಕ್ಷೆರ್ ವಿಶು ಶ್ರೀಕೇರ, ಮುಖ್ಯ ಶಿಕ್ಷಕಿ ಸ್ವರ್ಣಲತಾ, ವಿಶಾಲಾಕ್ಷಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ರೆಂಜಾಳದ ಅಧ್ಯಕ್ಷೆರ್ ರಮೇಶ್ ಶೆಟ್ಟಿ, ತುಳು ಲಿಪಿತ್ತ ತರಬೇತುದಾರೆರ್ ಪ್ರಶಾಂತ್ ಪೂಜಾರಿ, ಪವಿತ್ರ ಕೋಟ್ಯಾನ್ ಲೇಸ್ ಡ್ ಪಾಲ್ ಪಡೆಯೆರ್.

ಮಲ್ಲಿಕಾ ಮುನಿರಾಜ್‌ ಜೈನ್ ಸ್ವಾಗತ ಮಲ್ತ್ ದ್ ಶ್ರರ್ಮಿಳಾ ಶೆಟ್ಟಿ ವಂದನೆ ಮಲ್ತೆರ್.

ಕಳಿಯ ಗ್ರಾ.ಪಂ ಪೊಸ ಗುರ್ಕಾರೆ ದಿವಾಕರ ಎಂ, ಒತ್ತು ಗುರ್ಕಾರ್ದಿ ಇಂದಿರಾ ಡಿ ಶೆಟ್ಟಿ

ಬೊಲ್ತೇರ್ : ಕಳಿಯ ಗ್ರಾಮ ಪಂಚಾಯತ್ ದ ಪೊಸ ಗುರ್ಕಾರೆ ಆದ್ ದಿವಾಕರ ಎಂ , ಒತ್ತು ಗುರ್ಕಾರ್ದಿ ಆದ್ ಇಂದಿರಾ ಡಿ ಶೆಟ್ಟಿ ಆ.14 ದಾನಿ ಆಯ್ಕೆ ಆತೆರ್.

15 ಜನ ಸದಸ್ಯೆರ್ ಇಪ್ಪುನ ಈ ಪಂಚಾಯತ್ ಡ್ ಬಿಜೆಪಿ ಬೆಂಬಲಿತ 8 ಜನ , 7 ಜನ ಕಾಂಗ್ರೆಸ್ ಬೆಂಬಲಿತ ಸದಸ್ಯೆರ್ ಉಲ್ಲೆರ್.

ಸುರತ್ಕಲ್ ಬಂಟರ ಸಂಘದ ಮುತಾಲಿಕೆಡ್ ಆಟಿದ ಪೊರ್ಲು, ಅಭಿನಂದನೆ ಲೇಸ್

ಸಮಾಜಮುಖಿ ಲೇಸ್ ಲೆರ್ದ್ ಸುರತ್ಕಲ್ ಬಂಟರ ಸಂಘ ಪ್ರಸಿದ್ದಿ: ಎ ಸದಾನಂದ ಶೆಟ್ಟಿ

ಸುರತ್ಕಲ್: ಬಂಟರ ಸಂಘ (ರಿ.) ಸುರತ್ಕಲ್ ಬೊಕ್ಕ ಮಹಿಳಾ ವೇದಿಕೆ, ಬಂಟರ ಸಂಘ ಸುರತ್ಕಲ್ ದ ಒಟ್ಟುಸೇರಿಗೆಡ್ ಆಟಿದ ಪೊರ್ಲು ಬೊಕ್ಕ ಅಭಿನಂದನೆ ಲೇಸ್ ಸುರತ್ಕಲ್ ಬಂಟರ ಸಂಘದ ಚಾವಡಿಡ್ ನಡತ್ಂಡ್.

ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ಎಂ. ದೇವಾನಂದ ಶೆಟ್ಟಿ ಮೇರ್ ಪಾತೆರ್ದ್, “ಆಟಿ ತಿಂಗೊಲ್ ತುಳುವೆರೆಡ ಮಸ್ತ್ ಭಿನ್ನ ಆಯಿನವು.‌ ನಮ್ಮ ಪೂರ್ವಜೆರ್ ಆಟಿ ತಿಂಗೊಲ್ ನ್ ಕಷ್ಟರ್ದ್ ಕಲೆವೊಂದು ಇತ್ತೆರ್.‌ ನನದ ಕಾಲಡ್ ಯುವಜನತೆ ಆಟಿ ತಿಂಗೊಲ್ದ ಆಚರಣೆ, ಸಂಪ್ರದಾಯನ್ ಮರಪಂದೆ ಇಪ್ಪುನವು ನೆನೆಪೊಡಾಯಿನವು ಪಂದ್ ಪಂಡೆರ್.

ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಎ ಕೋಟ್ಯಾನ್ ಮೇರ್ ಪಾತೆರ್ದ್, “ಆಟಿ ತಿಂಗೊಲ್ದ ಕಷ್ಟ, ಇಸೇಸವಾಯಿನ ತಿಂಡಿ ತೆನಸ್, ನಮ್ಮ ಹಿರಿಯೆರೆನ ನೆಂಪು ಮಾತಲ ಏಪಲ ನೆಂಪುಡು ಒರಿಪುನವು. ಆವೆನ್ ಇನಿ ಮಾತ್ರ ಅತ್ತ್ ನನದ ಪೀಳಿಗೆದ ಜೋಕುಲು ತೆರಿವುನಂಚಿನವು. ಆಟಿ ತಿಂಗೊಲ್ದ ತುಳುನಾಡ್ ದ ಆಚರಣೆಲು ನನದ ತಲೆಮಾರ್ ಗ್ ಇಂಚನೇ ಒರಿವೊಡು ಪಂದ್ ಪಂಡೆರ್.

ಪುತ್ತೂರ್ ಕ್ಷೇತ್ರದ ಶಾಸಕೆರ್ ಅಶೋಕ್ ಕುಮಾರ್ ರೈ ಕೋಡಿಂಬಾಡಿ ಪಾತೆರ್ದ್, “ಬಂಟರ ಸಮಾಜ ಬಲಿಷ್ಠ ಆಯಿನ ಸಮಾಜ ಆತ್ಂಡ್. ಸಾಮಾಜಿಕವಾದ್ ಗುರುತಿಸಾವೊನ ಬಂಟರ ಸಮಾಜ ಆಟಿದ ಪೊರ್ಲು ಪನ್ಪುನಂಚಿನ ವಿಶಿಷ್ಟ ಲೇಸ್ ನ್ ಆಯೋಜನೆ ಮಲ್ದ್ಂಡ್. ನೆಕ್ಕಾದ್ ಸುರತ್ಕಲ್ ಬಂಟರ ಸಂಘನ್ ಅಭಿನಂದಿಸಾವೆ. ರಾಜ್ಯ ಸರಕಾರ ವೋಟುದ ಪೂರ್ವ ಪ್ರಣಾಳಿಕೆಡ್ ಬಂಟ ಸಮಾಜಗ್ 250 ಕೋಟಿ ರೂ. ಮೀಸಲ್ ದೀತ್ಂಡ್. ಸಮಾಜದ ಪ್ರಮುಖೆರ್ ಬಂಟ ನಿಗಮ ಸ್ಥಾಪನೆಗ್ ಒತ್ತಾಯ ಮಲ್ಪೊಡಾಯಿನ ಅಗತ್ಯ ಉಂಡು ಪಂದ್ ಪಂಡೆರ್.

ಚಾವಡಿಡ್ ಕುವೆಂಪು ವಿಶ್ವವಿದ್ಯಾನಿಲಯ ಶಿವಮೊಗ್ಗಡ್ ಗೌರವ ಡಾಕ್ಟರೇಟ್ ಪುರಸ್ಕೃತೆರಾಯಿನ ಡಾ.ಎ. ಸದಾನಂದ ಶೆಟ್ಟಿ ಮೆರೆಗ್ ಸನ್ಮಾನ ಮಲ್ತೆರ್.

ಬೊಕ್ಕ ಮೇರ್ ಪಾತೆರ್ದ್, “ಬಿರುದು, ಸನ್ಮಾನರ್ದ್ ಜಬದಾರಿ ಎಚ್ಚಾಪುಂಡು ಪನ್ಪುನವು ಎನ್ನ ಭಾವನೆ. ಎನನ್ ಇಡೆಗ್ ಲೆತ್ತ್ ದ್ ಮಾನಾದಿಗೆ ಮಲ್ತಿನ ಸುರತ್ಕಲ್ ಬಂಟರ ಸಂಘಗ್ ಚಿರಋಣಿ ಆದಿಪ್ಪುವೆ. ಸಮಾಜಮುಖಿ ಕಾರ್ಯನ್ ಮಲ್ತೊಂದು ಇಪ್ಪುನ ಸಂಘಟನೆ ನನಾತ್ ಬುಲೆದ್ ಹೆಮ್ಮರ ಆವಡ್” ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, “ಬಂಟರ ಸಮಾಜ ಬೇತೆ ಸಮಾಜಗ್ ಮಾದರಿಯಾದ್ ಬುಲೆತ್ಂಡ್. ಎಕುಲು ಬಂಟ ನಿಗಮ ಬೋಡು ಪಂದ್ ಕೇನೊಂದೆ ಬೈದ. ಸದನಡ್ ಪುತ್ತೂರ್ ಶಾಸಕೆರ್ ಈ ಬಗೆಟ್ಟ್ ಸ್ವರ ಲಕ್ಕಾಯಿನವು ಸಂತೋಷದ ಇಸಯ. ಸರಕಾರ ಕೊರಿನ ಭರವಸೆನ್ ಕೂಡ್ಲೆ ಈಡೇರಿಸಾವೊಡು. ಎಕುಲು ದಾಲ ಭಿಕ್ಷೆ ಕೇನೊಂದು ಇಜ್ಜ. ಎಂಕ್ಲೆನ ಹಕ್ಕನ್ ಕೇನೊಂದು ಉಲ್ಲ ಆತೆ. ಮಾತ ಸಮುದಾಯಗ್ ಸಕಾಯ ಮಲ್ಪುನ ಸಮಾಜ ಎಂಕ್ಲೆನವು” ಪಂದ್ ಪಂಡೆರ್.

ಕುಡ್ಲ ಉತ್ತರ ಕ್ಷೇತ್ರದ ಶಾಸಕೆರ್ ಡಾ. ಭರತ್ ಶೆಟ್ಟಿ ವೈ. ಪಾತೆರ್ದ್, “ಕೃಷಿ ಇಸಯಗ್ ನಮ ಎಚ್ಚದ ಒತ್ತು ಕೊರೊಡಾಯಿನ ಅಗತ್ಯ ಉಂಡು. ಮಾತೆರ್ಲಾ ಇಂಜಿನಿಯರ್ ಆಂಡ ತಿನಿಯೆರೆ ದಾಲ ತಿಕುಜಿ. ಇಂಚಾದ್ ಕೃಷಿ ಸಂಪ್ರದಾಯನ್ ನಮ್ಮ ಬಂಟ ಸಮಾಜ ಬುಡಿಯೆರೆ ಬಲ್ಲಿ. ಸುರತ್ಕಲ್ ಬಂಟರ ಸಂಘ ಬೇತೆ ಸಮಾಜನ್ ಒಟ್ಟಿಗೆ ಕೊನೊಪುನ ಕೆಲಸ ಮಲ್ತೊಂದು ಉಂಡು. ಮನಸ್ ಬೇನೆ ಆಯಿನಕ್ಲೆನ ಕಣ್ಣೀರ್ ನ್ ಒರೆಸುನ ಸಮಾಜಮುಖಿ ಬೇಲೆನ್ ಮಲ್ತೊಂದು ಬೈದ್ಂಡ್. ನೆಕ್ಕಾದ್ ಅಭಿನಂದನೆ ಸಂದಾವೊಡು ಪಂದ್ ಪಂಡೆರ್.

ಕಾಪು ಕ್ಷೇತ್ರದ ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಪಾತೆರ್ದ್, ಸಮಾಜನ್ ಕಟ್ಟ್ ದ್ ಬುಲೆಪಾವೊನ ಕಾರ್ಯ ಏಪಲ ನಡಪಾಡ್ ಪಂದ್ ಪಂಡೆರ್.

ಆಟಿ ಆಚರಣೆದ ಬಗೆಟ್ಟ್ ಉಪನ್ಯಾಸಕಿ ಜಯಲಕ್ಷ್ಮಿ ಆರ್. ಶೆಟ್ಟಿ ಮೇರ್ ಪೊಲಬು ಕೊರಿಯೆರ್.

ನಿಟ್ಟೆ ವಿಶ್ವವಿದ್ಯಾನಿಲಯದ ಪ್ರಭಾರ ಮುಖ್ಯಸ್ಥೆರ್ ಡಾ. ಸಾಯಿಗೀತಾ ಹೆಗ್ಡೆ, ಪತ್ರಕರ್ತೆರ್ ಹಿರಿಯ ರಂಗಕರ್ಮಿ ಪರಮಾನಂದ ಸಾಲ್ಯಾನ್, ಸಂಗೀತ ನಿರ್ದೇಶಕೆರ್ ಸತೀಶ್ ಸುರತ್ಕಲ್, ಸಮಾಜ ಸೇವಕೆರ್ ಅಬ್ದುಲ್ ಆಜೀಜ್ ಸುರತ್ಕಲ್, ಕೃಷಿಕೆರ್ ವೆಂಕಟೇಶ್ ಶೆಟ್ಟಿ ಚೇಳಾರ್ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು ಗುರ್ಕಾರ್ಮೆನ್ ಒಯಿಸೊಂದು, ಲೇಸ್ ದ ಯಶಸ್ವಿಗ್ ಸಹಕಾರ ಮಲ್ತಿನ ಮಾತೆರೆಗ್ಲಾ ಕೃತಜ್ಞತೆ ಸಂದಾಯೆರ್.

ಈ ಪೊರ್ತುಡು ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ್ ಎಸ್ ಪೂಂಜ, ಮಾಜಿ ಅಧ್ಯಕ್ಷೆರ್ ಉಲ್ಲಾಸ್ ಶೆಟ್ಟಿ ಪೆರ್ಮುದೆ, ಸಂಘದ ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ, ಉಪಾಧ್ಯಕ್ಷೆರ್ ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಕೋಶಾಧಿಕಾರಿ ಅವಿನಾಶ್ ಶೆಟ್ಟಿ, ಜತೆ ಕಾರ್ಯದರ್ಶಿ ಸುಜೀರ್ ಶೆಟ್ಟಿ ಸೂರಿಂಜೆ, ಮಹಿಳಾ ವೇದಿಕೆ ಅಧ್ಯಕ್ಷೆರ್ ಭವ್ಯ ಎ. ಶೆಟ್ಟಿ, ಕಾರ್ಯದರ್ಶಿ ಸುಜಾತ ಶೆಟ್ಟಿ ಕೃಷ್ಣಾಪುರ, ಉಪಾಧ್ಯಕ್ಷೆರ್ ಸರೋಜ ಶೆಟ್ಟಿ, ಕೋಶಾಧಿಕಾರಿ ಜ್ಯೋತಿ ಶೆಟ್ಟಿ ಇತ್ತೆರ್.

ಲೋಕಯ್ಯ ಶೆಟ್ಟಿ ಎದ್ಕೊನಿಯೆರ್. ಲೀಲಾಧರ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸುಧಾ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಲೇಸ್ ಡ್ ಆಂಜೋವ್ ನಕ್ಲೆಗ್ ಬೊಕ್ಕ ಪೊಂಜೋವ್ ನಕ್ಲೆಗ್ ಪಂತೊಲೆನ್ ಆಯೋಜನೆ ಮಲ್ತ್ ದ್ ಇತ್ತೆರ್. ಬೊಕ್ಕ ಸಂಘದ ಪೊಂಜೋವ್ ನಕ್ಲೆರ್ದ್, ಜೋಕುಲೆರ್ದ್ ಜಾನಪದ ನೃತ್ಯ ನಡತ್ಂಡ್.

ರೇಡಿಯೊ ಮಣಿಪಾಲ್ ಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 20ನೇ ಸಂಚಿಕೆ ಆ.14 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಆ.15 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ರೆಖ್ಯಾ: 24ನೇ ವರ್ಸದ ಸಾರ್ವಜನಿಕ ಶ್ರೀಕೃಷ್ಣ ಜನ್ಮಾಷ್ಟಮಿ ಸಮಿತಿ ರಚನೆ

ರೆಖ್ಯಾ: 24 ನೇ ವರ್ಸದ ಸಾರ್ವಜನಿಕ ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿ ರಚನೆ ಇಂಚಿಪ್ಪಗ್ ನಡತ್‌ಂಡ್.

ಗುರ್ಕಾರೆರಾದ್ ನವೀನ್ ಕೆ ರೆಖ್ಯಾ, ಒತ್ತು ಗುರ್ಕಾರೆರಾದ್ ಸತೀಶ್ ಜಿ.ಆರ್, ಕಾರ್ಯದರ್ಶಿಯಾದ್ ಪ್ರದೀಪ್ ಸಂಪಿಗೆತ್ತಡಿ, ಸಹ ಕಾರ್ಯದರ್ಶಿಯಾದ್ ಪುಷ್ಪಾವತಿ ಎಂಜಿರ ಬೊಕ್ಕ ಚೇತನ್ ಕೆರೆಜಾಲು ಆಯ್ಕೆ ಆತೆರ್.

ಸದಸ್ಯೆರಾದ್ ಸುನೀಲ್, ನಿತಿನ್ ಕೆಲೆಂಜಿನೊಡಿ, ಬೇಬಿ ಕಿರಣ್, ನಿತ್ಯಾನಂದ, ಕಾರ್ತಿಕ್ ಎನ್ಮಡ್ಕ, ಗುರುಪ್ರಸಾದ್, ಆನಂದ, ಕಿರಣ್ ಕೆರೆಜಾಲು, ಜಗದೀಶ್ ನಾಗಂಡ, ಶಿವರಾಜ್ ಮೊಕುಲ್ ಆಯ್ಕೆಯಾತೆರ್.

ಶ್ರೀ ಕ್ಷೇತ್ರ ನಂದಿಕೇಶ್ವರ ದೇವಸ್ಥಾನಡ್ ಶ್ರೀ ವರಮಹಾಲಕ್ಷ್ಮೀ ವೃತ ಪೂಜೆ

ಬೊಳ್ತೆರ್: ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಎ ಬೊಕ್ಕ ಬಿ ಒಕ್ಕೂಟದ ನಿರೆಲ್ಡ್ 19 ನೇ ವರ್ಸದ ಶ್ರೀ ವರಮಹಾಲಕ್ಷ್ಮೀ ವೃತ ಪೂಜೆ ಆ.25 ಸುಕ್ರವಾರ ದಾನಿ ದೇವಸ್ಥಾನದ ವಠಾರಡ್ ನಡಪೆರೆ ಉಂಡು.

ಬ್ರಹ್ಮಶ್ರೀ ಕೊಯ್ಯೂರು ನಂದಕುಮಾರ ತಂತ್ರಿ ಲೆನ ಮುತಾಲಿಕೆಡ್ ಬೊಲ್ಪುಗ್ 9 ಗಂಟೆರ್ದ್ ಮದ್ಯಾಹ್ನ 1 ಗಂಟೆ ಮುಟ ಶ್ರೀ ವರಮಹಾಲಕ್ಷ್ಮೀ ವೃತ ನಡಪೆರೆ ಉಂಡು.

ಪೂಜೆಗ್ ಬರ್ಪಿನಕುಲ್ 1 ಸೇರ್ ಬೊಳಂತರಿ, 2 ತಾರಾಯಿ, ಬಚ್ಚಿರೆ 1 ಕವಲೆ, ಬಜೈ 2, ಬಾರೆದ ಇರೆ 10 ತುಂಡ್, ತುಳಸಿ, ಪೂ ಪಿಂಗಾರ, ಜಲಪಾತ್ರೆ, ಚಮಚ ಅಂಚನೆ 200ರೂ ಕೊರ್ದ್ ರಸೀದಿ ಮಲ್ತ್ ದ್ 9 ಗಂಟೆದ ಉಲಾಯಿ ಕ್ಷೇತ್ರಡ್ ಇಪ್ಪೊಡು ಪಂದ್ ಆಡಳಿತ ಮಂಡಳಿ ದಕುಲ್ ತೆರಿಪಾದೆರ್.

ಕುಕ್ಕೇಡಿ ಗ್ರಾ.ಪಂ ಪೊಸ ಗುರ್ಕಾರ್ದಿ ಅನಿತಾ ಪಾಣೂರು,ಒತ್ತು ಗುರ್ಕಾರ್ದಿ ಕುಸುಮ

ಬೊಲ್ತೇರ್ : ಕುಕ್ಕೇಡಿ ಗ್ರಾಮ ಪಂಚಾಯತ್ ದ ಪೊಸ ಗುರ್ಕಾರ್ದಿ ಅನಿತಾ ಪಾಣೂರು , ಒತ್ತು ಗುರ್ಕಾರ್ದಿ ಆದ್ ಕುಸುಮಾ ಪೊಸಲಾಯಿ ಆ.14 ದಾನಿ ಆಯ್ಕೆ ಆತೆರ್.

11 ಜನ ಸದಸ್ಯೆರ್ ಇಪ್ಪುನ ಈ ಪಂಚಾಯತ್ ಡ್ ಬಿಜೆಪಿ ಬೆಂಬಲಿತ 8 ಜನ , 3 ಜನ ಕಾಂಗ್ರೆಸ್ ಬೆಂಬಲಿತ ಸದಸ್ಯೆರ್ ಉಲ್ಲೆರ್.

ಚೆನ್ನೆಮಣೆ ಗೊಬ್ಬುಡು ಗೆಂದಿನಕುಲು

ಬೊಲ್ತೇರ್: ತುಳುನಾಡ್ ಒಕ್ಕೂಟ ಸಂಘಟನೆದ ಮುತಾಲಿಕೆಡ್ (ಆ.13) ಐತಾರ ನಡತಿನ ಚೆನ್ನೆಮಣೆ ಗೊಬ್ಬುದ ಪಂತೊಡು ಗೆಂದಿನಕಲ್ನ ಪೊಲಬು ಮೂಲುಂಡು.

16 ವರ್ಷರ್ದ್ ಮಿತ್ತ್ ದಕ್ಲೆನ ಪಂತೆ:

ಸುರುತ್ತ ಇನಾಮು: ಪ್ರವೀಣ್
ರಡ್ಡನೇ ಇನಾಮು: ರಚನಾ
ಮೂಜಿನೇ ಇನಾಮು: ಯಶೋಧರ
ನಾಲ್ ನೇ ಇನಾಮು: ದಿವಾಕರ.

ಜೋಕುಲೆನ ಪಂತೆಡ್

ಸುರುತ್ತ ಇನಾಮು:ಸುಪ್ರಿತ್,
ರಡ್ಡನೇ ಇನಾಮು: ಯಕ್ಷಿಣಿ,
ಮೂಜಿನೇ ಇನಾಮು: ಯಕ್ಷಿತಾ
ನಾಲ್ ನೇ ಇನಾಮು: ಶಿವಾನಿ ಮೆರೆಗ್ ತಿಕ್ ದ್ಂಡ್.

ಈ ಪೊರ್ತುಡು ತುಳುನಾಡ್ ಒಕ್ಕೂಟದ ಪದಾಧಿಕಾರಿಲು, ಸದಸ್ಯೆರ್, ಸ್ಪರ್ಧಿಲು ಇತ್ತೆರ್.

ಪುಟ್ಟುಪರ್ಬದ ಲೆಕ್ಕೊಡು ಅಂಗನವಾಡಿಗ್ ಕೊಡುಗೆ

ಶಿಬರಾಜೆ: ಕಡಬ ಗೋಳಿತ್ತೊಟ್ಟು ನಿವಾಸಿ, ನಿಶ್ಮಿತಾ ಬೊಕ್ಕ ಸಂದೇಶ್ ಶೆಟ್ಟಿ ಮೆರೆನ ಮಗಲ್ ಕುಶಾನಿನ ಪುಟ್ಟುಪರ್ಬದ ಲೆಕ್ಕೊಡು ಶಿಬರಾಜೆ, ಪಾದೆ ಅಂಗನವಾಡಿಗ್ ಪಜೆ ಕೊರಿಯೆರ್.

ಈ ಪೊರ್ತುಡು ಶಾಲೆದ ಕಾರ್ಯಕರ್ತೆ ಪ್ರಿಯಾ, ಸಹಾಯಕಿ ಅನ್ಸಿಲ್ಲಾ ರೋಶ್ನಿ, ಅಕ್ಷತ್ ರೈ ಬೊಕ್ಕ ಜೋಕುಲು ಇತ್ತೆರ್. ಅಂಚೆನೆ ದೇವೆರ್ ಅರೆಗ್ ನನಾತ್ ಬೇತೆ ಬೇತೆ ಕ್ಷೇತ್ರಡ್ ಬೇಲೆ ಮಲ್ಪರೆ ಶಕ್ತಿ ಕೊರಡ್ ಪಂದ್ ಶಾಲೆದ ಪರವಾದ್ ಎಡ್ಡೆಪ್ಪು ಬಯಕಿಯೆರ್.

ಸೌಜನ್ಯ ಕೇಸ್ ಪಿರ ತನಿಖೆ ಮಲ್ತ್ ಜಿಂಡ ಸಂಘರ್ಷ ಹೋರಾಟ: ಅರುಣ್ ಪುತ್ತಿಲ

ಪುತ್ತೂರು: ಸೌಜನ್ಯ ಕೇಸ್ ದ ಪಿರ ತನಿಖೆ ಮಲ್ಪರೆ ಒತ್ತಾಯ ಮಲ್ತ್ ದ್ ಪುತ್ತಿಲ ಪರಿವಾರ್ದ್ ದರ್ಬೆರ್ದ್ ಪುತ್ತೂರು ಬಸ್ ಸ್ಟ್ಯಾಂಡ್ ಮುಟ್ಟ ಸೋಮಾರ ಮೆರವಣಿಗೆ ನಡ ತ್ಂಡ್.

ಸೌಜನ್ಯ ಅತ್ಯಾಚಾರ ಬೊಕ್ಕ ಕೆರ್ತಿನ ಬಗೆಟ್ಟ್ ಸರಕಾರ ಮರು ತನಿಖೆ ಮಲ್ತಿಜಿಂಡ ದುಂಬುದ ದಿನಟ್ ಸಂಘರ್ಷದ ಹೋರಾಟ ನಡಪುಂಡ್ ಪಂದ್ ಅರುಣ್ ಕುಮಾರ್ ಪುತ್ತಿಲ ಸಭೆಟ್ ತೆರಿಪಾಯೆರ್.

ಅಂಚನೆ ಈ ಪ್ರತಿಭಟನೆದ ಪೊರ್ತುಡು ಜನಕುಲು ಅಂಗಡಿನ್ ಬಂದ್ ಮಲ್ಪುನ ಮುಕೇನ ಈ ಹೋರಾಟಗ್ ಬೆಂಬಲ ಕೊರಿಯೆರ್.

ಈ ಪೊರ್ತುಡು ಸೌಜನ್ಯ ಪರ ಹೋರಾಟ ಗಾರೆರ್ ಮಸ್ತ್ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

You Missed