Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ರಕ್ತ ಚಂದನ ಸಾಗಾಟ ಮಲ್ತೊಂದಿತ್ತಿನ ಆರೋಪಿಲು ಅರೆಸ್ಟ್

ಬೊಲ್ತೇರ್: ವೇಣೂರ್ ಕೈತಲ್ ಕರಿಮಣೇಲು ದಲ್ಪ125 ಕೆಜಿ ರಕ್ತ ಚಂದನನ್ ಸಾಗಾಟ ಮಲ್ತೊಂದಿತ್ತಿನ ಆರೋಪಿಲೆನ್ ವಲಯ ಅರಣ್ಯ ಅಧಿಕಾರಿಲೆನ ನೇತೃತ್ವ ತಂಡ ದಾಳಿ ಮಲ್ತ್ ದ್ ಪತ್ ದ್ಂಡ್.


ಬಂಟ್ವಾಳದ ಮಾವಿನಕಟ್ಟೆ ನಿವಾಸಿ ಖಾಲಿದ್ ಬೊಕ್ಕ ಗುರುವಾಯನಕೆರೆ ದ ದೀಕ್ಷಿತ್ ಆರೋಪಿಲು. ಆರೋಪಿಲೆನ ಗಾಡಿನ್ ವಶಕ್ ಪಡೆಯೊಂದ್ ಆರೋಪಿಲೆನ್ ಕೋರ್ಟ್ ಗ್ ಹಾಜರ್ ಮಲ್ದೆರ್.

ಆ.13: ಜೈ ತುಲುನಾಡ್ (ರಿ.) ದ ಮುತಾಲಿಕೆಡ್ ತೆರಪು (ಕಚೇರಿ ) ಒಕ್ಕೆಲ್

ತುಲು ಬಾಸೆ, ಬರವು, ಸಂಸ್ಕೃತಿದ ಒರಿಪು ಬುಲೆಚ್ಚಿಲ್ ಗಾದ್ ಉಂಡಾಯಿನ ಕೂಟೊ ಜೈ ತುಲುನಾಡ್ (ರಿ.) ದ ಮುತಾಲಿಕೆಡ್ ತೆರಪು ಒಕ್ಕೆಲ್ (ಪ್ರಧಾನ ಕಚೇರಿ ಉದಿಪನ) ಲೇಸ್ ಆ.13 ಐತಾರ ಬೊಲ್ಪುಗು ಮುಲ್ಕಿ ಕೆನರಾ ಬ್ಯಾಂಕ್ ದ ಕೈತಲ್ ನಡಪರೆ ಉಂಡು.

ಅಂಚೆನೆ 9 ನೇ ವರ್ಸೋಚ್ಚಯೊ ಲೇಸ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ಚಾವಡಿಡ್ ನಡಪರೆ ಉಂಡು. ಈ ಲೇಸ್ ದ ಉದಿಪನನ್ ಬೆಂಗ್ಲೂರ್ ಕ.ಸಾ.ಪ ಮಾಜಿ ರಾಜ್ಯಾಧ್ಯಕ್ಷೆರ್ ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಮಲ್ಪರೆ ಉಲ್ಲೆರ್. ನೆತ್ತ ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ.) ದ ಗುರ್ಕಾರ್ಲು ವಿಶು ಶ್ರೀಕೇರ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್, ಆಳುವ ವಂಶಸ್ಥೆರ್ ಡಾ.ಆಕಾಶ್ ರಾಜ್ ಜೈನ್, ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಪ್ರಧಾನ ಸಂಪಾದಕೆರ್ ಎಸ್ ಆರ್ ಬಂಡಿಮಾರ್, ಕುಡ್ಲದ ಜಿಲ್ಲಾ ಯುವಜನ ಒಕ್ಕೂಟದ ಪ್ರಧಾನ ಕಾರ್ಯಂತೆರ್, ವಕೀಲೆರ್ ಗಿರೀಶ್ ಶೆಟ್ಟಿ ತಿಬಾರ್, ಮುಲ್ಕಿ ವಲಯ ಪತ್ರಕರ್ತರ ಸಂಘದ ಗುರ್ಕಾರ್ಲು ನಿಶಾಂತ್ ಶೆಟ್ಟಿ ಕಿಲೆಂಜೂರು ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ನ್ ಪೂರ್ಣಿಮಾ ಬಂಟ್ವಾಳ ಸುಧಾರಿಕೆ ಮಲ್ಪುವೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಎಲ್.ಎಸ್.ಎಸ್. ಪರೀಕ್ಷೆಡ್ ಕು. ಸನ್ನಿಧಿ ಜೆ ಉತ್ತೀರ್ಣ

ಇಂಚೊಗು ಪ್ರಕಟ ಆಯಿನ ಎಲ್.ಎಸ್.ಎಸ್. ಪರೀಕ್ಷೆದ (LSS Examination) ಫಲಿತಾಂಶಡ್ ಬದಿಯಡ್ಕ ವಿದ್ಯಾಗಿರಿ ಶ್ರೀ ಅನಂತ ಭಟ್ ಸ್ಮಾರಕ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆದ ನಾಲನೇ ತರಗತಿದ ಕಲ್ಪಾರ್ಥಿ ಕು| ಸನ್ನಿಧಿ ಜೆ ಎನ್ ಎಡ್ಡೆ ಮಾರ್ಕ್ಸ್ ದೆತ್ತ್ ದ್ ಪಾಸ್ ಆದ್ ವಿದ್ಯಾರ್ಥಿ ವೇತನ ಪಡೆಯೊನರೆ ಆಯ್ಕೆ ಆತೆರ್.

ಜೈ ತುಲುನಾಡ್(ರಿ.) ಕಾಸ್ರೋಡ್ ಘಟಕದ ಉಪ ಕಾರ್ಯದರ್ಶಿ, ಕಾಸ್ರೋಡ್ ಘಟಕದ ಶೌರ್ಯ ವಿಪತ್ತು ಕಾರ್ಯಪಡೆತ ಮಾಸ್ಟರ್ ಜಗನ್ನಾಥ ಕುಲಾಲ್ ಬೊಕ್ಕ ನಯನ ಮೊಕ್ಲೆನ ಮಗಲ್.

ಕಲಿಕಾ ಚಟುವಟಿಕೆಡ್ ಆಸಕ್ತಿ ಇಪ್ಪುನ ಕು| ಸನ್ನಿಧಿ ಜೈ ತುಲುನಾಡ್(ರಿ.) ಸಂಘಟನೆ ನಡಪಾವೊಂದು ಇಪ್ಪುನ “ಬಲೆ ತುಲು ಲಿಪಿ ಕಲ್ಪುಗ” ಕಾರ್ಯಾಗಾರಡ್ ತುಲು ಲಿಪಿ ಕಲ್ತ್ ದ್ ಮಾತೃಬಾಷೆದ ಮೋಕೆನ್ ತೆರಿಪಾದೆರ್.

ನನ ನೀರುಳ್ಳಿಗ್ ರೇಟ್ ಎಚ್ಚ!

ಜಾಸ್ತಿ ಆದಿತ್ತಿನ ಟೊಮೊಟೋದ ರೇಟ್ ಇತ್ತೆ ಕಮ್ಮಿ ಆವೊಂದುಂಡು. ಆಂಡ ಜನಕುಲ್ ಒಂತೆ ಸಮಾಧಾನ ಆನಗ ನೀರುಳ್ಳಿದ ಬಿಲೆ ಜಾಸ್ತಿ ಆವರೆ ಸುರುವಾತ್ಂಡ್.

ಕೆಲವ್ ದಿನತ ಪಿರಾವು ಕಿಲೊಕ್ಕು 20-25 ರೂ. ಇತ್ತಿನ ನೀರುಳ್ಳಿ ಇತ್ತೆ 30-35 ರೂ ಆತ್‌ಂಡ್. ಸೆಪ್ಟೆಂಬರ್‌ಡ್ 70-80 ರೂ ಮುಟ್ಟ ಆವು ಪಂದ್ ಕ್ರಿಸಿಲ್ ಮಾರ್ಕೆಟ್ ಅನಾಲಿಸಿಸ್ ಮಲ್ತ್ ವರದಿ ಕೊರ್ತುಂಡು.

ತಿರುಪತಿದ ಗುಡ್ಡೆ ಸಾದಿಡ್ ಚಿರತೆ ದಾಳಿಗ್ ತೀರ್ ಪೋಯಿನ ಪೊಣ್ಣು ಬಾಲೆ

ಆಂಧ್ರಪ್ರದೇಶ: ತಿರುಪತಿ ದೇವಸ್ಥಾನೊಗು ನಡತೊಂದು ಪೋಪಿನ ಪೊರ್ತುಡು ಅಲಿಪಿರಿ ಪನ್ಪಿನಲ್ಪ ಚಿರತೆದ ದಾಳಿಗ್ ಪೊಣ್ಣು ಬಾಲೆ ಬಲಿ ಆತಲ್.

ತೀರ್ ಪೋಯಿನ ಪೊಣ್ಣು ಬಾಲೆ ಲಕ್ಷಿತಾ(6ವ) ಪಂದ್ ಗುರುತಿಸಾದೆರ್.

ಗುಡ್ಡೆ ಸಾದಿಡ್ ನಡತೊಂದು ಪೋನಗ ಲಕ್ಷ್ಮೀ ನರಸಿಂಹಸ್ವಾಮಿ ದೇವಸ್ಥಾನದ ಕೈತಲ್ ಈ ಘಟನೆ ನಡತ್‌ಂಡ್.

ಉಚ್ಚಿಲ ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ದ ಅಧ್ಯಕ್ಷೆರಾದ್ ಶಾಸಕೆರ್ ಯಶ್ ಪಾಲ್ ಸುವರ್ಣ ಅವಿರೋಧವಾದ್ ಕುಡೊರ ಆಯ್ಕೆ

ಉಚ್ಚಿಲ ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ಲಿ. ಒಡಿಪು ಆಡಳಿತ ಮಂಡಳಿದ ಪೊಸ ಅಧ್ಯಕ್ಷೆರಾದ್ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಅವಿರೋಧವಾದ್ ಕುಡೊರ ಆಯ್ಕೆ ಆಯೆರ್.

ಬ್ಯಾಂಕ್ ದ 2023-28 ನೇ ಸಾಲ್ ದ 5 ವರ್ಷಲೆನ ಅವಧಿದ ಅಡಳಿತ ಮಂಡಳಿಗ್ ಮಾತ ನಿರ್ದೇಶಕೆರ್ ಅವಿರೋಧವಾದ್ ಆಯ್ಕೆ ಆತೆರ್. ಬ್ಯಾಂಕ್ ದ ಉಪಾಧ್ಯಕ್ಷೆರಾದ್ ವಾಸುದೇವ ಸಾಲ್ಯಾನ್, ನಿರ್ದೇಶಕೆರಾದ್ ಕೆ ಸಂಜೀವ ಶ್ರೀಯಾನ್, ವೆಂಕಟರಮಣ ಕಿದಿಯೂರು, ಶಶಿಕಾಂತ ಬಿ ಕೋಟ್ಯಾನ್, ಶೋಭೇಂದ್ರ, ವಿನಯ ಕರ್ಕೇರ, ನಾರಾಯಣ ಟಿ ಅಮೀನ್, ರಾಮ ನಾಯ್ಕ್ ಎಚ್, ಶಿವರಾಮ ಕುಂದರ್, ಸುರೇಶ ಬಿ ಕರ್ಕೇರ, ಸದಾನಂದ ಬಳ್ಕೂರು, ವನಜ ಹೆಚ್ ಕಿದಿಯೂರು, ವನಜ ಜೆ ಪುತ್ರನ್, ಮನೋಜ್ ಆಯ್ಕೆ ಆತೆರ್.

ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ 8 ಶಾಖೆದ ಮುಖೇನ ವ್ಯವಹಾರ ನಡಪಾವೊಂದು ಉಂಡು. 2022-23 ನೇ ಸಾಲ್ ಡ್ ಬ್ಯಾಂಕ್ 9,464 ಕೋಟಿ ವಾರ್ಷಿಕ ವಹಿವಾಟು ನಡಪಾದ್ಂಡ್. ಕರಿನ 14 ವರ್ಷೊದಿಂಚ ನಿರಂತರವಾದ್ ಸದಸ್ಯೆರೆಗ್ ಶೇಕಡಾ 18% ಡಿವಿಡೆಂಡ್ ಕೊರ್ಪಿನ ಕರಾವಳಿ ಕರ್ನಾಟಕದ ಒಂಜೇ ಒಂಜಿ ಪಟ್ಟಣ ಸಹಕಾರ ಬ್ಯಾಂಕ್ ಪನ್ಪುನ ಪುದರ್ ಗ್ ಪಾತ್ರ ಆತ್ಂಡ್.

2008 ರ್ದ್ ಬ್ಯಾಂಕ್ ದ ನಿರ್ದೇಶಕೆರಾದ್ ನಿರಂತರವಾದ್ ಸೇವೆ ಸಂದಾಯಿನ ಯಶ್ ಪಾಲ್ ಸುವರ್ಣ 2018 ಟ್ಟ್ ಬ್ಯಾಂಕ್ ದ ಅಧ್ಯಕ್ಷೆರಾದ್ ಸಂಸ್ಥೆದ ಸಾರಥ್ಯ ಒಯಿಸೊಂದು, ಬ್ಯಾಂಕ್ ಸರ್ವಾಂಗೀಣ ಪ್ರಗತಿ ಸಾಧವೊನಲ್ಪ ಪ್ರಮುಖ ಪಾತ್ರ ಒಯಿಸಾದೆರ್. ಇತ್ತೆ ಕುಡೊರ ಬ್ಯಾಂಕ್ ದ ಅಧ್ಯಕ್ಷೆರಾದ್ ಸಂಸ್ಥೆನ್ ದುಂಬು ಕೊನೊಂದು ಉಲ್ಲೆರ್.

2014 ರ್ದ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಸಹಕಾರಿ ಮೀನು ಮಾರಾಟ ಫೆಡರೇಶನ್ ಅಧ್ಯಕ್ಷೆರಾದ್, ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿರ್ದೇಶಕೆರಾದ್, ಸುಮಾರ್ ಸಹಕಾರಿ ಸಂಸ್ಥೆಲೆಡ್ ಎಪಲ ಗುರುತಿಸಾಯಿನ ಯಶ್ ಪಾಲ್ ಸುವರ್ಣ ಮೇರ್ ತನ್ನ ಸಹಕಾರ ಕ್ಷೇತ್ರದ ಸಾಧನೆಗಾದ್ 69ನೇ ಅಖಿಲ ಭಾರತ ಸಹಕಾರ ಸಪ್ತಾಹಡ್ 2022 ನೇ ಸಾಲ್ ದ ಸಹಕಾರ ಕ್ಷೇತ್ರದ ಅತ್ಯುನ್ನತ ಪ್ರಶಸ್ತಿ ಸಹಕಾರ ರತ್ನ ಪ್ರಶಸ್ತಿನ್ ಪಡೆತೆರ್.

ಭಾರತೀಯ ಜನತಾ ಪಾರ್ಟಿದ ಹಿಂದುಳಿದ ವರ್ಗಲೆನ ಮೋರ್ಚಾದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾದ್, ಒಡಿಪು ವಿಧಾನ ಸಭಾ ಕ್ಷೇತ್ರದ ಶಾಸಕೆರಾದ್ ಸಾಮಾಜಿಕ, ಧಾರ್ಮಿಕ, ಶೈಕ್ಷಣಿಕ, ಮೀನುಗಾರಿಕೆ ಕ್ಷೇತ್ರಡ್ ಬೇಲೆ ಮಲ್ತ್ ದ್ ಗುರುತಿಸಾದೆರ್.

ಆ.13: ಅಂಬಲಪಾಡಿ ಶ್ರೀ ನಾರಾಯಣಗುರು ಸಮುದಾಯ ಭವನಡ್ ‘ಆಟಿಡೊಂಜಿ ಕೂಟ’

ಬಿಲ್ಲವ ಸೇವಾ ಸಂಘ (ರಿ.), ಶ್ರೀ ವಿಠೋಬ ಭಜನಾ ಮಂದಿರ ಅಂಬಲಪಾಡಿ ನೆತ್ತ ಮುತಾಲಿಕೆಡ್, ಬಿಲ್ಲವ ಮಹಿಳಾ ಘಟಕ ಅಂಬಲಪಾಡಿ ಬೊಕ್ಕ ಉಜ್ವಲ ಸಂಜೀವಿನಿ ಒಕ್ಕೂಟ ಅಂಬಲಪಾಡಿ ನೆತ್ತ ಒಟ್ಟುಸೇರಿಗೆಡ್ ಆ.13 ಐತಾರ ಬೊಲ್ಪುರ್ದ್ ‘ಆಟಿಡೊಂಜಿ ಕೂಟ’ ಲೇಸ್ ಸಂಘದ ಶ್ರೀ ನಾರಾಯಣಗುರು ಸಮುದಾಯ ಭವನಡ್ ನಡಪರೆ ಉಂಡು.

ಅಂಚೆನೆ ಆಟಿ ತಿಂಗೊಲ್ದ ಆಚಾರ ವಿಚಾರ, ಆಹಾರ ಪದ್ಧತಿ ಬೊಕ್ಕ ಕೃಷಿ ಸವಲತ್ತುಲೆನ ಬಗೆಟ್ಟ್ ಪೊಲಬು, ಹಿರಿಯ ಕೃಷಿಕ ಪೊಂಜೋವ್ ಲೆಗ್ ಸನ್ಮಾನ ಬೊಕ್ಕ ಆಟಿ ತಿಂಗೊಲ್ದ ವೈವಿಧ್ಯಮಯ ಖಾದ್ಯಲೆನ ಪ್ರಾತ್ಯಕ್ಷಿಕೆ ಬೊಕ್ಕ ಮನೋರಂಜನಾ ಲೇಸ್ ನಡಪರೆ ಉಂಡು ಪಂದ್ ಸಂಘದ ಪ್ರಭಾರ ಅಧ್ಯಕ್ಷೆರ್ ಶಿವಕುಮಾರ್ ಅಂಬಲಪಾಡಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಆ.28: ಸೌಜನ್ಯ ಕೇಸ್ ಪಿರ ತನಿಖೆಗ್ ಒತ್ತಾಯ ಮಲ್ಪರೆ ಬೊಲ್ತೇರ್ ಚಲೋ

ಬೊಲ್ತೆರ್ : ಸೌಜನ್ಯ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣದ ಪಿರ ತನಿಖೆಗ್ ಆಗಸ್ಟ್ 28 ದಾನಿ ಚಲೋ ಬೊಲ್ತೆರ್ ಕಾರ್ಯಕ್ರಮ ಬೊಕ್ಕ ಬೊಲ್ತೆರ್ ಮಿನಿ ವಿಧಾನ ಸೌಧದ ಕೈತಲ್ ಸಾಮೂಹಿಕ ಧರಣಿ ಕೂಡ ನಡಪೆರೆ ಉಂಡು ಪಂದ್ ಮಾಜಿ ಶಾಸಕೆರ್ ವಸಂತ ಬಂಗೇರ ತೆರಪಾದೆರ್.

ಪ್ರಕರಣದ ತನಿಖೆಡ್ ಕೆಲವ್ ಲೋಪದೋಷ ಬೊಕ್ಕ ಪ್ರಕರಣ ಮುಚ್ಚಿದ್ ಪಾಡೆರೆ ವ್ಯವಸ್ಥಿತ ಸಂಚ್ ನೆಟ್ಟ್ ಆತ್‌ಂಡ್. ಧರ್ಮಸ್ಥಳ, ಉಜಿರೆ ಭಾಗಡ್ ಆತ್‌ನ ಅಸಹಜ ಸಾವು ಮರುತನಿಖೆ ಬಗ್ಗೆ ವಿಶೇಷ ತನಿಖಾ ತಂಡರ್ದ್ ತನಿಖೆ ಮಲ್ಪುನಂಚ ಬೊಕ್ಕ ಮ್ಯಾಜಿಸ್ಟ್ರೇಟ್ ತನಿಖೆಗ್ ಆಗ್ರಹಿಸಾದ್ ಜನಪರ ಸಂಘಟನೆದ ಒಕ್ಕೂಟದ ಒಟ್ಟು ಸೇರಿಗೆಡ್ ಈ ಪ್ರತಿಭಟನೆ ನಡಪೆರೆ ಉಂಡು ಪಂದ್ ತೆರಿಪಾದೆರ್.

ಡಿವೈಎಫ್‌ಐ ರಾಜ್ಯ ಸಮಿತಿ ಅಧ್ಯಕ್ಷೆರ್ ಮುನೀರ್ ಕಾಟಿಪಳ್ಳ, ಸಿಪಿಐ(ಎಂ) ಜಿಲ್ಲಾ ಕಾರ್ಯದರ್ಶಿ ಯಾದವ ಶೆಟ್ಟಿ, ಕಾಂಗ್ರೆಸ್ ಮುಖಂಡ ಜಯವಿಕ್ರಂ , ಬಿ.ಎಂ ಭಟ್ ಬೊಕ್ಕ ಕೆಲವ್ ಪ್ರಮುಖೆರ್ ಈ ಪೊರ್ತುಡ್ ಇತ್ತೆರ್.

ಐಕಳ ಗ್ರಾಪಂಗ್ ದಿವಾಕರ ಚೌಟ ಅಧ್ಯಕ್ಷೆರ್, ಜಯಲಕ್ಷ್ಮಿ ಪೂಜಾರ್ತಿ ಉಪಾಧ್ಯಕ್ಷೆರ್

ಮುಲ್ಕಿ: ಮುಲ್ಕಿ ತಾಲೂಕ್ ವ್ಯಾಪ್ತಿದ ಐಕಳ ಗ್ರಾಮ ಪಂಚಾಯತ್ ದ ರಡ್ಡನೇ ಅವಧಿಗ್ ಅಧ್ಯಕ್ಷೆರಾದ್ ದಿವಾಕರ ಚೌಟ, ಉಪಾಧ್ಯಕ್ಷೆರಾದ್ ಜಯಲಕ್ಷೀ ಪೂಜಾರ‍್ತಿ ಅವಿರೋಧವಾದ್ ಆಯ್ಕೆ ಆತೆರ್.

ಒಟ್ಟು 14 ಸದಸ್ಯ ಬಲದ ಪಂಚಾಯತ್ ಡ್ ಮಾತ 14 ಸದಸ್ಯೆರ್ ಬಿಜೆಪಿ ಬೆಂಬಲಿತೆರಾತೆರ್. ಅಧ್ಯಕ್ಷೆರೆ ತಾನಗ್ ಸಾಮಾನ್ಯ ಬೊಕ್ಕ ಉಪಾಧ್ಯಕ್ಷೆರೆ ತಾನಗ್ ಹಿಂದುಳಿದ ವರ್ಗ ಎ ದ ಪೊಂಜೋವ್ ಗ್ ಬತ್ತ್ ದ್ ಇತ್ತ್ಂಡ್. ದಿವಾಕರ ಚೌಟ ಮೆರೆಗ್ ನೆರ್ದ್ ದುಂಬು ಅಧ್ಯಕ್ಷೆರಾದ್, ಉಪಾಧ್ಯಕ್ಷೆರಾದ್ ಬೇಲೆ ಮಲ್ತಿನ ಅನುಭವ ಉಂಡು. ಜಯಲಕ್ಷೀ ಮೇರ್ ಸುರುತ್ತ ಸರ್ತಿ ಉಪಾಧ್ಯಕ್ಷೆರಾತೆರ್.

ಕೇಪು ಗ್ರಾ.ಪಂ ಪೊಸ ಅಧ್ಯಕ್ಷೆರಾದ್ ರಾಘವ ಸಾರಡ್ಕ, ಉಪಾಧ್ಯಕ್ಷೆರಾದ್ ಹೇಮಾವತಿ ದೇವಮೂಲೆ ಆಯ್ಕೆ

ವಿಟ್ಲ: ಕೇಪು ಗ್ರಾಮ ಪಂಚಾಯತ್ ದ ಪೊಸ ಅಧ್ಯಕ್ಷೆರಾದ್ ರಾಘವ ಸಾರಡ್ಕ, ಉಪಾಧ್ಯಕ್ಷೆರಾದ್ ಹೇಮಾವತಿ ದೇವಮೂಲೆ ಅವಿರೋಧವಾದ್ ಆಯ್ಕೆ ಆತೆರ್.

ಬಂಟ್ವಾಳ ತಾಲೂಕ್ ಹಿಂದುಳಿದ ವರ್ಗಲೆನ ಕಲ್ಯಾಣಾಧಿಕಾರಿ ಬಿಂದಿಯಾ ವೋಟುದ ಪ್ರಕ್ರಿಯೆನ್ ನಡಪಾದ್ ಕೊರಿಯೆರ್.

You Missed