ಮೇ 30-31 : ರಾಣಿ ಅಬ್ಬಕ್ಕನ ಐತಿಹಾಸಿಕ “ಮಣೇಲ್ ಗ್ರಾಮೊಡೊಂಜಿ ಚಿತ್ರ ಕೂಟೊ” ಲೇಸ್

ಕುಡ್ಲ : ತುಳುನಾಡ್‌ದ ವೀರರಾಣಿ ಅಬ್ಬಕ್ಕ ದೇವಿನ ಅರಮನೆ ಇತ್ತಿನ ಮಣೇಲ್ ಗ್ರಾಮಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿರೆಲ್‌ಡ್ ‘ಮಣೇಲ್ ಗ್ರಾಮೊಡೊಂಜಿ ಚಿತ್ರ ಕೂಟೊ’ ಪನ್ಪಿನ ಕಾರ್ಯಕ್ರಮ ಮೇ 30 ಬೊಕ್ಕ 31 ಕ್ಕ್ ನಡಪರೆ ಉಂಡು.
ಕುಡ್ಲ ತಾಲೂಕುದ ಗುರುಪುರ ಕೈತಲ್‌ದ ಮಣೇಲ್ ಗ್ರಾಮದ ಚಾರಿತ್ರಿಕ ಅಂಚೆನೆ ಮಹತ್ವದ ಜಾಗೆಲೆನ್ ಬೊಕ್ಕ ಗ್ರಾಮದ ಕುಲ ಕಸಬುಲೆನ್ ಚಿತ್ರ ಬುಡ್ಪಾವುನ ಮುಕೇನ ದಾಖಲ್ ಮಲ್ಪುನ ಈ ಕಾರ್ಯಕ್ರಮ ಮೇ 30 ಸನಿಯಾರ ಕಾಂಡೆ 10 ಗಂಟೆಗೆ ಮಣೇಲ್ ಶ್ರೀ ಲಕ್ಮ್ಷಿ ವೆಂಕಟರಮಣ ದೇವಸ್ಥಾನದ ಸಭಾಂಗಣಡ್ ಉದಿಪನ ಆವರೆ ಉಂಡು.
ಇಂಟಾಕ್ ಮಂಗಳೂರು ವಿಭಾಗ ಬೊಕ್ಕ ರಾಣಿ ಅಬ್ಬಕ್ಕ ಚಾವಡಿ ಮಣೇಲ್ ಮೊಕ್ಲೆನ ಒಟ್ಟುಸೇರಿಗೆಡ್ ನಡಪುನ ಈ ಚಿತ್ರ ಕೂಟೊನು ಹಿರಿಯ ಚಿತ್ರ ಕಲಾವಿದೆರ್ ಗಣೇಶ್ ಸೋಮಯಾಜಿ ಉದಿಪನ ಮಲ್ಪುವೆರ್. ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆರ್ ತಾರಾನಾಥ ಗಟ್ಟಿ ಕಾಪಿಕಾಡ್ ಗುರ್ಕಾರ್ಮೆ ವಹಿಸೊನ್ವೆರ್. ಕಟ್ಟೆಮಾರ್ ವಂಶಸ್ಥೆರ್ ಪ್ರಶಾಂತ್ ಕುಮಾರ್ ಕಟ್ಟೆಮಾರ್, ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಸ್ಥಾನದ ಟ್ರಸ್ಟಿ ವಾಮನ ನಾಯಕ್ , ಮಣೆಲ್ ಜುಮ್ಮಾ ಮಸೀದಿದ ಅಧ್ಯಕ್ಷೆರ್ ಅಬ್ದುಲ್ ರಜಾಕ್ , ಅಕಾಡೆಮಿ ಸದಸ್ಯೆರ್ ಬೂಬ ಪೂಜಾರಿ ಮಣೇಲ್ ಬಿನ್ನೆರಾದ್ ಪಾಲ್ ಪಡೆವೆರ್.
ಉದಿಪನದ ಲೇಸ್‌ಡ್ ಇತಿಹಾಸ ತಜ್ಞೆರ್ ಡಾ.ಪುಂಡಿಕಾಯ್ ಗಣಪಯ್ಯ ಭಟ್ ಮೇರ್ ‘ಮಣೇಲ್ ಗ್ರಾಮದಲ್ಲಿ ಅಬ್ಬಕ್ಕನ ಚರಿತ್ರೆ’ ಬೊಕ್ಕ ನಿವೃತ್ತ ಉಪನ್ಯಾಸಕೆರ್ ಪ್ರೊ.ಅಕ್ಷಯ ಕುಮಾರ್ ಮೇರ್ ಮಣೇಲ್ ಗ್ರಾಮದ ಸಾಮಾಜಿಕ ಸಾಂಸ್ಕ್ರತಿಕ ನೆಲೆತ್ತ ಬಗೆಟ್ಟ್ ಉಪನ್ಯಾಸ ಮಲ್ಪುವೆರ್.
2 ದಿನತ್ತ ಈ ಚಿತ್ರ ಕೂಟೊಡು ಜಿಲ್ಲೆದ 15 ಜನ ಚಿತ್ರ ಕಲಾವಿದೆರ್ ಪಾಲ್ ಪಡೆವೆರ್ ಪಂದ್ ಅಕಾಡೆಮಿದ ಪ್ರಕಟಣೆ ತೆರಿಪಾದ್ಂಡ್.