ಕುಡ್ಲ : ಸತತ 5ನೇ ಸರ್ತಿಗ್ ಸ್ಯಾಂಡಿಸ್ ಕಂಪನಿ ಅರ್ಪಣೆ ಮಲ್ಪುನ ಸಿನಿ ಗ್ಯಾಲಕ್ಸಿ ಕೋಸ್ಟಲ್ ಫಿಲ್ಮ್ ಅವಾಡ್ಸ್ ೯ 2026 ಪಟ್ಟುನ ಲೇಸ್ ಮೇ 24 ಐತಾರ ಬಯ್ಯಡ್ 3 ಗಂಟೆಗ್ ಮುಲ್ಕಿ ಕೊಲ್ನಾಡ್ದ ಮುಲ್ಕಿ ಸುಂದರರಾಮ ಶೆಟ್ಟಿ ಕನ್ವೆನ್ಷಲ್ ಸೆಂಟರ್ಡ್ ಅದ್ಧೂರಿಯಾದ್ ನಡಪರೆ ಉಂಡು ಪಂದ್
ಸ್ಯಾಂಡಿಸ್ ಕಂಪನಿದ ಮಾಲಕೆರ್ ಸಂದೇಶ್ ರಾಜ್ ಬಂಗೇರ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
ಈ ಕಾರ್ಯಕ್ರಮಕ್ಕ್ ಬಿನ್ನೆರಾದ್ ಕನ್ನಡ ಚಿತ್ರರಂಗದ ಖ್ಯಾತ ಸಂಗೀತ ನಿರ್ದೇಶಕೆ ಗುರುಕಿರಣ್, ಖ್ಯಾತ ನಿರ್ದೇಶಕೆ ತರುಣ್ ಸುಧೀರ್, ನಟಿ ಸೋನಾಲ್ ಮೊಂತೆರೋ, ನಿರ್ಮಾಪಕಿ ಶಿಲ್ಪಾ ಗಣೇಶ್, ನಟೆ ತ್ರಿವಿಕ್ರಮ ಬೊಕ್ಕ ತುಳು ಚಿತ್ರರಂಗದ ಮಲ್ಲ ಮಲ್ಲ ಕಲಾವಿದೆರ್ ನಿರ್ಮಾಪಕೆರ್, ತಂತ್ರಜ್ಞೆರ್, ಹಿರಿಯ ಬೊಕ್ಕ ಕಿರಿಯ ನಟ, ನಟಿಯೆರ್ , ಗಣ್ಯೆರ್, ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್. ಬಿನ್ನೆರಾದ್ ವಿಧಾನಸಭಾಧ್ಯಕ್ಷೆರ್ ಯು ಟಿ ಖಾದರ್, ಸಂಸದೆರ್ ಬ್ರಿಜೇಶ್ ಚೌಟ, ಶಾಸಕೆರ್ ಉಮಾನಾಥ ಎ ಕೋಟ್ಯಾನ್, ಮೈಂಡ್ ಮೆಕ್ಯಾನಿಸಂ ಸ್ಥಾಪಕೆರ್ ಶ್ರೀನಾಥ ಶೆಟ್ಟಿ, ಅಸ್ತ್ರ ಗ್ರೂಪ್ ಸ್ಥಾಪಕೆರಾಯಿನ ಲಂಚುಲಾಲ್ ಕೆ ಎಸ್, ಮಾಜಿ ಸಚಿವೆರಾಯಿನ ಕೃಷ್ಣ ಜೆ ಪಾಲೇಮಾರ್ ಮೊಕುಲು ಮಾತ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಆರ್ ಪಂಡೆರ್.
ತುಳು ಚಿತ್ರರಂಗದ ನಟ ನಟಿಯೆರೆರ್ದ್ ಅಂಚೆನೆ ಸಿಜ್ಲಿಂಗ್ ಗಯ್ಸ್ ತಂಡರ್ದ್ ನೃತ್ಯ, ರಸಮಂಜರಿ ಬೊಕ್ಕ ಕಾಮಿಡಿ ಕಾರ್ಯಕ್ರಮ ನಡಪರೆ ಉಂಡು. ಪ್ರಸಿದ್ದ ನಿರೂಪಕೆರಾಯಿನ ಶರ್ಮಿಳಾ ಅಮೀನ್ ಬೊಕ್ಕ ವಿನೀತ್ ಕುಮಾರ್ ಕಾರ್ಯಕ್ರಮ ನಿರೂಪಣೆ ಮಲ್ಪುವೆರ್. ಸಿನಿಮಾರಂಗಡ್ ಸಾಧನೆ ಮಲ್ದಿನ ಡಾ| ದೇವದಾಸ ಕಾಪಿಕಾಡ್, ಸರೋಜಿನಿ ಶೆಟ್ಟಿ ಮೊಕ್ಲೆಗ್ ಸನ್ಮಾನ ಕಾರ್ಯಕ್ರಮ ನಡಪರೆ ಉಂಡು. ಈ ಸರ್ತಿ 2025 ಬಿಡುಗಡೆ ಆತಿನ ಒಟ್ಟು 8 ಸಿನಿಮಾ ಸ್ಪರ್ಧೆಗ್ ಬೈದ್ಂಡ್. ಲೈಫ್ ಟೈಮ್ ಅಚೀವ್ಮೆಂಟ್ ಅವಾರ್ಡ್ ಬೊಕ್ಕ ವರ್ಸಟೈಲ್ ಆ್ಯಕ್ಟರ್ ಅವಾಡ್೯ ಸೇರ್ದ್ ಒಟ್ಟು 30 ವಿಭಾಗಡ್ ಸ್ಪರ್ಧೆ ನಡಪುಂಡು. ಈ ಕಾರ್ಯಕ್ರಮಗ್ ಉಚಿತ ಪ್ರವೇಶ ಉಂಡು ಪಂದ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ವಿಜಯಕುಮಾರ್ ಕೊಡಿಯಾಲ್ ಬೈಲ್, ಸಚಿನ್ ಉಪ್ಪಿನಂಗಡಿ, ಯಶ್ ರಾಜ್ ಇತ್ತೆರ್.