ತುಳು ನಾಟಕಕಾರೆ ಡಾ.ಸಂಜೀವ ದಂಡೆಕೇರಿ ಮೆರೆಗ್ ಆರ್ಯಭಟ ಅಂತಾರಾಷ್ಟ್ರೀಯ ಪ್ರಶಸ್ತಿ

ಕುಡ್ಲ : ಬೆಂಗಳೂರುದ ಆರ್ಯಭಟ ಕಲ್ಬರಲ್ ಆರ್ಗನೈಸೇಷನ್‌ ಸಂಸ್ಥೆ ರಾಷ್ಟ್ರ- ಅಂತರ್‌ರಾಷ್ಟ್ರೀಯ ಮಟ್ಟಡ್ ಪ್ರಸಿದ್ದಿ ಪಡೆತಿನ ಅಸಾಧಾರಣ ಸಾಧಕೆರೆಗ್ ಕೊರ್ಪಿನ 51ನೇ ವರ್ಷದ ಅಂತರ್‌ರಾಷ್ಟ್ರೀಯ ಆರ್ಯಭಟ ಪ್ರಶಸ್ತಿಗ್ ತುಳುನಾಡ್‌ದ ಪುಗರ್ತೆದ ನಾಟಕಕಾರೆ, ನಿರ್ದೇಶಕೆರ್, ತುಳು ರಂಗಭೂಮಿ ಅಂಚೆನೆ ಚಿತ್ರರಂಗಗ್ ಅಮೂಲ್ಯ ಕೊಡುಗೆ ಕೊರ್ತಿನ ಡಾ.ಸಂಜೀವ ದಂಡೆಕೇರಿ ಆಯ್ಕೆ ಆತೆರ್.
ನಾಟಕ ರಂಗದ ಒಟ್ಟುಗೆ ಡಾ. ಸಂಜೀವ ದಂಡೆಕೇರಿ ಮೆರೆನ ಸಾಮಾಜಿಕ ಬೊಕ್ಕ ಸಾಂಸ್ಕೃತಿಕ ಸೇವೆನ್ ತೂದು ಈ ಪ್ರಶಸ್ತಿ ಕೊರೊಂದುಲ್ಲ ಪಂದ್ ಪ್ರಕಟನೆಡ್ ತೆರಿಪಾದೆರ್
ಆಯುರ್ವೇದ ವೈದ್ಯ ಡಾ.ಸಂಜೀವ ದಂಡೆಕೇರಿ, ತುಳು ಭಾಷೆಡ್ ಸುಮಾರು 20 ಜನಪ್ರಿಯ ನಾಟಕ ಬರೆತೆರ್. ಅರೆನ ಸುರುತ್ತ ನಾಟಕ ‘ಕಲ್ಪಂದಿ ತಿಮ್ಮೆ’ 1962ಟ್ಟ್ ರಂಗ ಪ್ರದರ್ಶನ ಆತ್ಂಡ್. ಆರ್ ಬರೆತಿನ ‘ಬಯ್ಯ ಮಲ್ಲಿಗೆ’ ತುಳು ನಾಟಕ 58 ವರ್ಷಡ್ ದೇಶ – ವಿದೇಶಡ್ ಸುಮಾರ್ 28 ಸಾವಿರ ಪ್ರದರ್ಶನ ಆತ್ಂಡ್. ‘ಪೊಣ್ಣ ಜನ್ಮ, ‘ಕಾವೇರಿ’, ‘ಬೊಲ್ಲಿ ಮೂಡ್ಂಡ್’, ‘ಪೂ ಪನ್ನೀರ್’, ‘ಪಾದ ಕಾಣಿಕೆ’, ‘ಸರಸ್ವತಿ’, ‘ಒಂಜೇ ಕರ್ಲ್’, ‘ಗಂಗಾ ರಾಮ್’ ಮತ್ತಿತರ ನಾಟಕ ಬರೆತೆರ್. ಕೆಲವು ಸಿನಿಮಾಲೆಗ್ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆತೆರ್. ಬಯ್ಯ ಮಲ್ಲಿಗೆ ನಾಟಕ ಸಿನಿಮಾ ಆತ್ಂಡ್. ಬೊಳ್ಳಿದೋಟ ಸಿನಿಮಾ ಮಲ್ದೆರ್.
ತುಳು ಸಾಹಿತ್ಯ ಅಕಾಡೆಮಿ, ಕರ್ನಾಟಕ ನಾಟಕ ಅಕಾಡೆಮಿ, ರಂಗಚಾವಡಿ ಸಹಿತ ಅನೇಕ ಪ್ರಶಸ್ತಿ ಪಡೆತೆರ್.
ಮೇ 23 ಕ್ಕ್ ಬೆಂಗಳೂರು ರವೀಂದ್ರ ಕಲಾಕ್ಷೇತ್ರಡ್ ಪ್ರಶಸ್ತಿ ಪ್ರದಾನ ಲೇಸ್ ನಡಪರೆ ಉಂಡು.