ಮುಲ್ಕಿ : ತಾಲೂಕು ಆದ್ ರಚನೆ ಆಯಿನ ಕೆಲವೇ ವರ್ಷಡ್ ಒಂಜೇ ಕಟ್ವಾಣಡ್ ಸರಕಾರದ ಮಾತಾ ಸೇವೆಲೆನ್ ಕೊರ್ಪಿನ “ಪ್ರಜಾ ಸೌಧ”ದ ಉದಿಪನದ ಲೇಸ್ ಮಾರ್ಚ್ 14 ಶನಿವಾರ ಬೊಲ್ಪುಗು 10 ಗಂಟೆಗ್ ಮುಲ್ಕಿ ಗೇರುಕಟ್ಟೆಡ್ ನಡಪರೆ ಪಂದ್ ಮುಲ್ಕಿ- ಬೆದ್ರ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್.
ಪ್ರಜಾಸೌಧದ ಚಾವಡಿಡ್ ಶುಕ್ರವಾರ ನಡತಿನ ಸುದ್ದಿ ಗೋಷ್ಠಿಡ್ ಪಾತೆರ್ನ ಆರ್, ಸಮಾರ್ 10 ಕೋಟಿ ರೂ. ಅನುದಾನಡ್ 31600 ಚದರ ಅಡಿ ವ್ಯಾಪ್ತಿಡ್ ನಿರ್ಮಾಣ ಆತಿನ ಈ ಆಡಳಿತ ಸೌಧನ್ ಕಂದಾಯ ಸಚಿವೆರ್ ಕೃಷ್ಣ ಬೈರೇಗೌಡ ಉದಿಪನ ಮಲ್ಪುವೆರ್. ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್, ಸಂಸದೆರ್ ಕ್ಯಾ.ಬ್ರಿಜೇಧಗ ಚೌಟ, ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ ಬೊಕ್ಕ ಶಾಸಕೆರ್, ವಿಧಾನ ಪರಿಷತ್ ಸದಸ್ಯೆರ್ ಬಿನ್ನೆರಾದ್ ಪಾಲ್ ಪಡೆವೆರ್ . ಉಂದು ಒಂಜೇ ವಿಧಾನಸಭೆ ಕ್ಷೇತ್ರಡ್ 2 ನೇ ಪ್ರಜಾಸೌಧ ಉದಿಪನ ಆವೊಂದುಂಡು” ಪಂದ್ ಪಂಡೆರ್.
ಮುಲ್ಕಿ ತಾಲೂಕು ಆವೊಡು ಪಂದ್ ಮಸ್ತ್ ಗಣ್ಯೆರ್ ಮಸ್ತ್ ಕಷ್ಟಬುಡ್ತೆರ್. ಮಾಜಿ ಮುಖ್ಯಮಂತ್ರಿಲು ಕುಮಾರಸ್ವಾಮಿ ಮುಲ್ಕಿ ತಾಲೂಕು ಘೋಷಣೆ ಮಲ್ದಿತ್ತೆರ್. ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ತಹಶೀಲ್ದಾರ್ ನೇಮಕ ಮಲ್ಪಾದೆರ್. ಹಿರಿಯೆರಾಯಿನ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಗುಂಡಾಲುಗುತ್ತು ಮಹಾಬಲ ಶೆಟ್ಟಿ ಮೊಕಲ್ನಂಚಿನಕ್ಲೆನ ಪ್ರಯತ್ನದ ಫಲವಾದ್ ಮುಲ್ಕಿ ತಾಲೂಕು ಆದ್ ಇತ್ತೆ ಕರ್ನಾಟಕ ಗೃಹ ಮಂಡಳಿ ಬೊಕ್ಕ ದ.ಕ. ಜಿಲ್ಲಾಡಳಿತದ ಸಹಕಾರಡ್ “ಪ್ರಜಾಸೌಧ” ಲಕ್ದ್ ಉಂತುದುಂಡು. ನನ ಉಂದೆರ್ದ್ ಕಾರ್ನಾಡ್ದ ಗತ ವೈಭವ ಪಿರ ಮೆರೆಯರೆ ಉಂಡು” ಪಂದ್ ಪಂಡೆರ್.
ಮುಲ್ಕಿ ತಾಲೂಕು ತಹಶಿಲ್ದಾರ್ ಶ್ರೀಧರ ಮುಂದಲಮನಿ ಮೇರ್ ಪಾತೆರ್ದ್, ಪ್ರಜಾಸೌಧ ಲೋಕಾರ್ಪಣೆದ ಲೇಸ್ಡ್ ಕ್ಷೇತ್ರದ 300 ಜನ ಫಲಾನುಭವಿಲೆಗ್ ಹಕ್ಕುಪತ್ರ ಪಟ್ಟರೆ ಉಂಡು ಪಂದ್ ಪಂಡೆರ್.
ಸುದ್ದಿಗೋಷ್ಠಿಡ್ ಕರ್ನಾಟಕ ಗೃಹಮಂಡಳಿದ ಎಇಇ ಸಹನಾ,ಉಪತಹಶೀಲ್ದಾರ್ ದಿಲೀಪ್ ರೋಡ್ಕರ್, ತಾಲೂಕು ಕಂದಾಯ ಇಲಾಖೆದ ಅಧಿಕಾರಿ ಮೋಹನ್, ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸತೀಶ್ ಅಂಚನ್, ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಶೈಲೇಶ್, ರಂಗನಾಥ್ ಶೆಟ್ಟಿ, ವಿನೋದ್ ಸಾಲ್ಯಾನ್ ಬೆಳ್ಳಾಯಿರು ಮೊಕುಲು ಮಾತ ಇತ್ತೆರ್.
ಕಾರ್ನಾಡ್- ಗೇರುಕಟ್ಟೆಗ್ ಡಬಲ್ ರೋಡ್
ಸುಮಾರ್ 8 ಕೋಟಿ ರೂ. ಕರ್ಚಿಡ್ ಮುಲ್ಕಿ ಪೇಂಟೆರ್ದ್ ಕಾರ್ನಾಡ್ ಜಂಕ್ಷನ್ ಮುಟ್ಟ ರಸ್ತೆ ಅಗಲ ಬೊಕ್ಕ ಕಾಂಕ್ರೀಟ್ದ ಬೇಲೆ ಅಂಚೆನೆ ಕಾರ್ನಾಡ್ ಜಂಕ್ಷನ್ ರ್ದ್ ಗೇರುಕಟ್ಟೆ ಮುಟ್ಟ ದ್ವಿಪಥ ರಸ್ತೆ ನಿರ್ಮಾಣ ಮಲ್ಪರೆ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್.
ಸೋಮಾರರ್ದ್
ಮಾತಾ ಆಫೀಸ್ ಶಿಫ್ಟ್ !
ಪ್ರಜಾಸೌಧದ ಪೊಸ ಕಟ್ವಾಣಗ್ ಮಾ. 16 ಸೋಮಾರರ್ದ್ ಎಚ್ಚಿನ ಕಚೇರಿಲು ಶಿಫ್ಟ್ ಆವರೆ ಉಂಡು. ಆಹಾರ ಇಲಾಖೆ ಕಚೇರಿ, ಅಂಕಿ ಅಂಶದ ಕಚೇರಿ, ಕಂದಾಯ ಕಚೇರಿ ಬೊಕ್ಕ ಶಾಸಕರ ಕಚೇರಿ ಪೂರ ಸೋಮಾರರ್ದ್ ಕಾರ್ಯಾಚರಣೆ ಮಲ್ಪರೆ ಉಂಡು ಪಂದ್ ತಹಶೀಲ್ದಾರ್ ಮುಂದಲಮನಿ ತೆರಿಪಾಯೆರ್.