ಬಪ್ಪನಾಡ್ ಕ್ಷೇತ್ರಡ್ ಯಕ್ಷಗಾನ ತರಬೇತಿ ಉದಿಪನ

ಬಪ್ಪನಾಡ್ ಕ್ಷೇತ್ರಡ್ ಯಕ್ಷಗಾನ ತರಬೇತಿ ಉದಿಪನ

ಶಾಲೆ, ಕಾಲೇಜಿಡ್ ಯಕ್ಷಗಾನ ತರಬೇತಿ ಕೊರೊಡು: ಎನ್.ಎಸ್.ಮನೋಹರ ಶೆಟ್ಟಿ

ಮುಲ್ಕಿ : ಒಂಜಿ ಕಾಲೊಡು ಯಕ್ಷಗಾನ ಕಲಾವಿದೆರ್ನ ಕೊರತೆ ಇತ್ತ್ಂಡ್. ಇತ್ತೆ ಆ ಸಮಸ್ಯೆ ಇಜ್ಜಿ. ಆಂಡ ದುಂಬುದ ಪೀಳಿಗೆಗ್ ಯಕ್ಷಗಾನದ ಆಸಕ್ತಿ ಪುಟ್ಟಾವೊಡು. ಅಂಚಾದ್ ಶಾಲೆ, ಕಾಲೇಜಿದ ಮಟ್ಟೊಡು ಯಕ್ಷಗಾನ ಕಲ್ಪಾವುನ ಕೆಲಸ ಆವೊಡು ಪಂದ್ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ದ ಮೊಕ್ತೇಸರೆರ್ ಎನ್.ಎಸ್.ಮನೋಹರ ಶೆಟ್ರ್ ಲೆಪ್ಪು ಕೊರಿಯೆರ್.

ಆರ್ ಬಪ್ಪನಾಡು ಕ್ಷೇತ್ರಡ್ ಬುಧಾರ ತೆಂಕುತಿಟ್ಟು ಯಕ್ಷ ನಾಟ್ಯ ತರಗತಿ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಒಂಜಿ ಕಾಲೊಡು ಮುಲ್ಕಿ ಪರಿಸರೊಡು ಬಪ್ಪನಾಡು ಮೇಳ ಬೊಕ್ಕ ವೆಂಕಟರಮಣ ಯಕ್ಷಗಾನ ಮೇಳ ಇತ್ತ್ಂಡ್. ಬೊಕ್ಕ ಅವು ಕಲಾವಿದೆರ್ನ ಕೊರತೆ ಇಂಚಿನ ಮಾತ ಕಾರಣೊಡು ಅವು ಉಂತುದು ಪೋದಿತ್ತ್ಂಡ್. ಕೆಲವು ವರ್ಸೊರ್ದು ಬೊಕ್ಕ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಮೊಕಲ್ನಂಚಿನ ಗಣ್ಯೆರ್ ಸೇರ್ದ್ ಬಪ್ಪನಾಡ್ ಮೇಳನ್ ಕುಡೊರ ಸುರು ಮಲ್ತ್ ದಿತ್ತೆರ್. ಇತ್ತೆ ಅಪ್ಪೆ ದುರ್ಗಾಪರಮೇಶ್ವರಿನ ಅನುಗ್ರಹೊರ್ದಾತ್ರ ಯಶಸ್ವಿಯಾದ್ ಮೇಳ ನಡತೊಂದು ಉಂಡು ಪಂದ್ ನೆಂಪು ಮಲ್ತೆರ್.

ಬಪ್ಪನಾಡ್ ಕ್ಷೇತ್ರದ ಅರ್ಚಕೆರ್ ನರಸಿಂಹ ಭಟ್ ಪಾತೆರ್ದ್, ದೇವಿಗ್ ಪ್ರತಿದಿನತ್ತ ಪೂಜೆ ಮಾತ್ರ ಅತ್ತಾಂದೆ ಯಕ್ಷಗಾನ, ಭಜನೆ ಇಂಚಿನ ಮಾತಾ ವಿಧೊತ್ತ ಸಾಂಸ್ಕೃತಿಕ ಸೇವೆ ನಡತ್ಂಡ ಪೂಜೆ ಪರಿಪೂರ್ಣ ಆಪುಂಡು ಪಂದ್ ಯಕ್ಷಗಾನ ತರಬೇತಿಗ್ ಆಶೀರ್ವಚನ‌ ಮಲ್ತೆರ್.

ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಶಾರದಾ ಇನ್ ಫ್ರಾ ಡಿಸೈನ್ಸ್ ದ ಮುಲ್ಕಿ ಜೀವನ್ ಶೆಟ್ಟಿ, ಪಾತೆರ್ದ್ ಇತ್ತೆ ಕಲಾವಿದೆರ್ನ ಕೊರತೆ ಇಜ್ಜಿ. ಬೋಡಾಯಿನಾತ್ ಮೇಳಲ ಉಂಡು. ಆಂಡ ನನದ ಜೋಕುಲೆಗ್ ಯಕ್ಷಗಾನ ತರಬೇತಿ ಕೊರ್ಪಿನ ಅಗತ್ಯ ಉಂಡು ಪಂಡೆರ್. ಉಂದುವೇ ಪೊರ್ತುಡು ಯಕ್ಷಗುರು ರಾಕೇಶ್ ರೈ ಅಡ್ಕ ಮೆರೆಗ್ ಮಾನಾದಿಗೆ ನಡತ್ಂಡ್.

ಮತ್ತರ್ಮೆಡ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದಶಾವತಾರ ಯಕ್ಷಗಾನ ಮಂಡಳಿದ ಸಂಚಾಲಕೆರ್ ವಿನೋದ್ ಕುಮಾರ್ ಬಜ್ಪೆ, ಮದ್ದಳೆವಾದಕೆರ್ ಗಣೇಶ್ ಭಟ್ ನೆಕ್ಕರೆಮೂಲೆ ಗಣೇಶ್ ಭಟ್, ವಿಜಯಬ್ಯಾಂಕ್ ದ ನಿವೃತ್ತ ಅಧಿಕಾರಿ, ಶನಿ ಕಥಾ ಅರ್ಥದಾರಿ ವಿಜಯಕುಮಾರ್ ಶೆಟ್ಟಿ ಮೊಯಿಲೊಟ್ಟು, ಯಕ್ಷ ಗುರು ರಾಕೇಶ್ ರೈ ಅಡ್ಕ, ನಾಟ್ಯಗುರು ಪರಮೇಶ್ವರ ಗಂಗನಾಡು ಮೊಕುಲು ಮಾತ ಇತ್ತೆರ್.

ಪ್ರಸಾದ್ ಭಟ್ ದೇವೆರೆನ್ ಸುಗಿತೆರ್. ಯಕ್ಷಗಾನ ಕಲಾವಿದೆರ್ ಮಾಧವ ಕೊಳತ್ತಮಜಲು ಲೇಸ್ ಸುಧಾರಿಕೆ ಮಲ್ತೆರ್. ಪ್ರತಿ ಐತಾರ ಮಧ್ಯಾಹ್ನ 1.30 ಗಂಟೆರ್ದ್ 2.30 ಗಂಟೆ ಮುಟ್ಟ ಯಕ್ಷಗಾನ ತರಬೇತಿ ನಡಪರೆ ಉಂಡು.