ತುಳುನಾಡ್ ಡ್ ಪುಗರ್ತೆ ಪಡೆಯಿನ ಅಕ್ಷರ ಸಂತೆರ್ ಹರೇಕಳ ಹಾಜಬ್ಬ ಮೇರೆಗ್ ಈ ಸರ್ತಿದ ಪದ್ಮಶ್ರೀ ಪುರಸ್ಕಾರದ ಮಾನಾದಿಗೆ ಪಡೆವರೆ ದಿಲ್ಲಿದ ರಾಷ್ಟ್ರಪತಿ ಭವನೊರ್ದು ಲೆಪ್ಪು ಬೈದ್ಂಡ್.
ಕುಡ್ಲದ ಸ್ಟೇಟ್ ಬ್ಯಾಂಕ್ ಸರ್ಕಲ್ ಡ್ ಚಿತ್ತ್ ಪುಲಿ ಮಾರೊಂದಿತ್ತಿನ ಹಾಜಬ್ಬ ಮೇರ್ ಬಡವೆರ್ನ ಜೋಕುಲೆಗ್ ಬೋಡಾದ್ ಒಂಜಿ ಸ್ವಂತ ಶಾಲೆನ್ ಊರುಡ್ ಮಲ್ತೆರ್.1999 ಡ್ ಹರೇಕಳಡ್ ದಕ್ಷಿಣ ಕನ್ನಡ ಕಿರಿಯ ಪ್ರಾಥಮಿಕ ಶಾಲೆನ್ ಮಲ್ತ್ ದ್ ಆಯಿಬೊಕ್ಕ ದಾನಿಲೆನ ಪಣವುದ ಸಾಕಾರಡ್ ಹೈಸ್ಕೂಲ್ ನ್ ಲ ಮಲ್ತೆರ್.
ಸ್ವಂತ ಇಲ್ಲ್ ಇಜ್ಜಂದೆ, ಸರಿಯಾದ್ ಕಲ್ಪರೆ ಆವಂದೆ ಕುಡ್ಲದ ಮಾರ್ಗದ ಬರಿಟ್ ಚಿತ್ತುಪುಲಿ ಬ್ಯಾರನ್ ಮಲ್ತೊಂದ್ ಆರ್ನ ಜೀವನನ್ ದುಂಬು ಕೊನವೊಂದ್ ಇತ್ತೆರ್.
ಮಸ್ತ್ ಸಮಯನ್ ಚಿತ್ತುಪುಲಿ ಮಾರುನ ಬ್ಯಾರಗ್ ದೀದ್ ಆಯಿಟ್ ಬತ್ತಿನ ಕಾಸ್ ಡ್ ಶಾಲೆನ್ ಮಲ್ತೆರ್. ಒಂಜಿ ಸರ್ಕಾರ ಮಲ್ತೊಂದ್ ಉಪ್ಪುನ ಮಾತ ಬೇಲೆನ್ ಹಾಜಬ್ಬೆರ್ ಚಿತ್ತುಪುಲಿ ಮಾರ್ ದ್ ಮಲ್ತೊಂದಿತ್ತಿನೆನ್ ತೂದು ಮಸ್ತ್ ಸಂಘಟನೆಲು ಅರೆನ್ ಗುರ್ತಿಸಾದ್ ಮಾನಾದಿಗೆನ್ ಮಲ್ತ್ ದೆರ್.
ಮೇರ್ ನ ಸಾಧನೆ ಅಂಚನೆ ಸಮಾಜ ಸೇವೆನ್ ಗುರ್ತಿಸಾದ್ ಉಂದುವೇ ನವೆಂಬರ್ 8 ಗ್ ದಿಲ್ಲಿಡ್ ರಾಷ್ಟ್ರಪತಿ ರಮಾನಾಥ್ ಕೋವಿಂದ್ ಮೇರ್ ನ ಕೈಟ್ ಹರೇಕಳ ಹಾಜಬ್ಬೆರ್ ಪದ್ಮಶ್ರೀ ಪ್ರಶಸ್ತಿನ್ ದೆತೊನರೆ ಉಲ್ಲೆರ್. ಕರಿನ ವರ್ಷನೆ ಪ್ರಕಟ ಆಯಿನ ಈ ಪ್ರಶಸ್ತಿ ಕೊರೊನಾ ಕಾರಣಡ್ದಾವರ ಕೊರಿಯೆರ ಆಯಿಜಿ. ಇತ್ತೆ ಕೊರೊನಾ ಸೀಕ್ ಕಮ್ಮಿಯಾದಿತ್ ದ್ ನವೆಂಬರ್ 8 ಗ್ ದೆಲ್ಲಿದ ರಾಷ್ಟ್ರಪತಿ ಭವನಡ್ ರಾಷ್ಟ್ರಪತಿ ಲೆಡ್ದ್ ಪ್ರಶಸ್ತಿದ ಮಾನಾದಿಗೆನ್ ದೆತೊನರೆ ಉಲ್ಲೆರ್. ಉಂದು ನಮ್ಮ ತುಳುನಾಡ್ ದ ಹರೇಕಳ ಹಾಜಬ್ಬೆರೆಗ್ ಸಂದಿನ ಪೆರ್ಮೆದ ಮಾನಾದಿಗೆ.
Editorial