October 20, 2021

ಕುಕ್ಕಾಜೆ ಮಣ್ಣ್ ದ ಬೊಲ್ಪು ತುಳು ಭಕ್ತಿ ಸುಗಿಪುನ್ ಬುಡುಗಡೆ ಮಲ್ತಿನ ಶ್ರೀ ಶ್ರೀ ಕೃಷ್ಣ ಗುರೂಜಿಲು

ವಿಟ್ಲ, ಅ.20: ಗ್ರಾಮೀಣ ಭಾಗದ ಪ್ರತಿಭೆಲೆನ್ ಜಗತ್ತ್ ಗ್ ತೋಜಾವುನ ಬೇಲೆ ಎಪಲ ನಡತ್ತೊಂದ್ ಉಪ್ಪೊಡ್. ಗುರು ಹಿರಿಯಕುಲೆನ್ ಗೌರವ ಕೊರ್ಪಿನ ಗುಣ ಯಂಕುಲ್ ಡ ಇತ್ತ್ಂಡ ಜೀವನ ಸಾರ್ಥಕ ಆಪುಂಡು. ಇಲ್ಲ್ ಡ್ ಜೋಕುಲೆಗ್ ಭಜನೆ ಮಲ್ಪಾವುನ ಮುಖೇನ ಸಂಸ್ಕಾರನ್ ಕಲ್ಪಾವುನ ಬೇಲೆ ಪ್ರತಿ ಇಲ್ಲದ ಅಪ್ಪೆಲೆಡ್ ದೇ ಅವೊಡ್ ಪಂದ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ಕ್ಷೇತ್ರದ ಶ್ರೀ ಶ್ರೀ ಕೃಷ್ಣ ಗುರೂಜಿಲು ಪಂಡೆರ್.

ಕುಕ್ಕಾಜೆ ಮಣ್ಣ್ ದ ಬೊಲ್ಪು ತುಳು ಭಕ್ತಿ ಸುಗಿಪುದ ಗಾಯಕೆರಾಯಿನ ಗೌರಿ ಪುಚ್ಚಮೊಗರು, ಸಾಹಿತ್ಯ ನಿರ್ದೇಶಕೆರ್ ಅಭಿಷೇಕ್ ಬಜಾಗೋಳಿ, ಛಾಯಾಗ್ರಾಹಕೆರ್ ಪ್ರಜ್ವಲ್ ಎಸ್. ದಯಾ ಕ್ರಿಯೇಷನ್ ದ ದಯಾನಂದ ಅಮೀನ್ ಬಾಯರ್, ಸುಪ್ರೀತಾ ಟಿ, ಸುಶ್ಮಿತಾ ಕುಕ್ಕಾಜೆ, ಕ್ಷೇತ್ರದ ಭರತನಾಟ್ಯ ಜೋಕುಲೆನ್ ಈ ಪೊರ್ತುಡ್ ಗುರೂಜಿಲು ಶಾಲುಪೊದಿಪಾದು, ಫಲಪುಷ್ಪ ನ್ ಕೊರ್ದು ಮಾನಾದಿಗೆ ಮಲ್ತೆರ್.

ಈ ಪೊರ್ತುಡ್ ಕ್ಷೇತ್ರದ ಜಾತ್ರೆದಾನಿ ನಡಪುನ “ಮಾದು ಮನಿಪೂಜೆ” ತುಳು ನಾಟಕದ ಪೋಸ್ಟರ್ ನ್ ಗುರೂಜಿಲು ಬುಡುಗಡೆ ಮಲ್ತೆರ್. ಕಾಳಿಕಾಂಬ ಸಂಘದ ಪದಾಧಿಕಾರಿಲು ಕೃಷ್ಣಪ್ಪ ತಾರಿದಳ, ಮಹಿಳಾ ಸಂಘದ ಅಧ್ಯಕ್ಷೆರ್ ಮೋಹಿನಿ ತಾರಿದಳ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ಕ್ಷೇತ್ರದ ಬಗೆಟ್ ನಿರ್ಮಿಸಲಾಯಿನ “ಕುಕ್ಕಾಜೆ ಮಣ್ಣ್ ದ ಬೊಲ್ಪು” ತುಳುಭಕ್ತಿ ಸುಗಿಪುನ್ ಅಕ್ಟೋಬರ್ 9 ಗ್ ಕ್ಷೇತ್ರಡ್ ಬುಡುಗಡೆ ಮಲ್ತ್ ದ್ ಆಶೀರ್ವಚನ ಕೊರಿಯೆರ್. ಭಕ್ತಿ ಸುಗಿಪು, ಧ್ಯಾನ, ಭಜನೆ ಮಲ್ತುಂಡ ದೇವೆರೆಗ್ ನಮ ಕೈತಲ್ ಆಯಾರ ಸಾಧ್ಯ ಪಂದ್ ಗುರೂಜಿಲು ಪಂಡೆರ್.