ಮುಲ್ಕಿ : ಕೊರೊನಾದ ಪೊರ್ತುಡು ಯಕ್ಷಗಾನದ ಪ್ರದರ್ಶನದಾಂತೆ ಕಷ್ಟ ಬುಡ್ತಿನ ಬಪ್ಪನಾಡ್ ಮೇಳದ 52 ಕಲಾವಿದೆರೆಗ್ ಸುಮಾರ್ 6.80 ಲಕ್ಷ ರೂಪಾಯಿ ಮುಟ್ಟದ ಪಣವುದ ಸಕಾಯ ಪಟ್ಟುನ ಲೇಸ್ ಐತಾರ ಬಯ್ಯಡ್ ನಡತ್ಂಡ್.
ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಎದುರು ನಡತಿನ ಈ ಲೇಸ್ ಡ್ ದೇವಸ್ಥಾನದ ಆಡಳ್ತೆ ಮೊಕ್ತೇಸರೆರ್ ಎನ್. ಎಸ್. ಮನೋಹರ ಶೆಟ್ಟಿ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಧರ್ಮದರ್ಶಿ ಹರಿಕೃಷ್ಣ ಪುನರೂರು,ಬಪ್ಪನಾಡು ದೇವಸ್ಥಾನ ದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ಲು ಶೇಖರ್ ಶೆಟ್ಟಿ, ದಕ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ನಿದೇರ್ಶಕೆರ್ ಜಿಟಿ ಜಯರಾಮ್ ಭಟ್, ಕಲಾ ಪೋಷಕರಾಯಿನ ದಿನಕರ ಭಟ್ ಮಾವೆ, ದುಬೈ, ಎಲ್ಲೂರು ರಾಮಚಂದ್ರ ಭಟ್, ರವೀಂದ್ರ ಕೋಟ್ಯಾನ್ ಕಿನ್ನಿಗೋಳಿ, ತುಳು ಸಾಹಿತ್ಯ ಅಕಾಡೆಮಿ ಪದುಕೆರಾಯಿನ ನಾಗೇಶ್ ಕುಲಾಲ್ ಕುಳಾಯಿ, ನರೇಂದ್ರ ಕೆರೆಕಾಡ್, ರಾಜ್ಯ ಪ್ರಶಸ್ತಿ ಗೆಂದಿನ ಕಲಾವಿದೆ ಅರುವ ಕೊರಗಪ್ಪ ಶೆಟ್ಟಿ, ಯೂತ್ ಕಾಂಗ್ರೆಸ್ ಗುರ್ಕಾರ್ಲು ಮಿಥುನ್ ರೈ, ಬಂಗಾರ್ ಬಾಲೆ ಪ್ರಸಂಗಕರ್ತೆ ರವಿ ಕುಮಾರ್ ಸುರತ್ಕಲ್, ಪದ್ಯ ಬರೆಪಿನಾರ್ ಮಾಧವ ಭಂಡಾರಿ ಕುಳಾಯಿ, ಮೇಳದ ಅರ್ಚಕೆರ್ ಗುರುರಾಜ್ ಭಟ್ರ್ , ಮೇಳದ ಪ್ರಬಂಧಕೆರ್ ವಿನೋದ್ ಕುಮಾರ್ ಬಜ್ಪೆ, ಮ್ಯಾನೇಜರ್ ಭವಾನಿಶಂಕರ್ ಶೆಟ್ಟಿ, ಸಂತೋಷ್ ಬೋಳಿಯಾರ್ ಮೊಕುಲು ಮಾತ ಇತ್ತೆರ್.
ಬಪ್ಪನಾಡು ದೇವಸ್ಥಾನದ ಲೆಕ್ಕೊಡು ಕಲಾವಿದೆರೆಗ್ ಕೊರ್ಪಿನ ಕಿಟ್ ನ್ ಸಾಂಕೇತಿಕವಾದ್ ಹಾಸ್ಯ ಕಲಾವಿದೆ ದಿನೇಶ್ ಕೋಡಪದವು ಬೊಕ್ಕ ಸಾಣೂರು ಗಣೇಶ್ ಶೆಟ್ರ್ ಸ್ವೀಕಾರ ಮಲ್ತೆರ್.
ಉಂದುವೇ ಪೊರ್ತುಡು ಮೇಳದ ಪೆರಿಯ ಕಲಾವಿದೆ ಅರುವ ಕೊರಗಪ್ಪ ಶೆಟ್ರ್ ಅರುವ ಪ್ರತಿಷ್ಠಾನದ ಲೆಕ್ಕೊಡು 5 ಸಾರ ರೂಪಾಯಿ ಸಕಾಯ ಮಲ್ತೆರ್. ಕೊರೊನಾ ಕಾಲೊಡು ಕಲಾವಿದೆರೆಗಾದ್ ಪಣವು ಒಟ್ಟು ಮಲ್ದಿನ ಪೆರಿಯ ಕಲಾವಿದೆ ಮಧೂರು ರಾಧಾಕೃಷ್ಣ ನಾವಡ ಮೆರೆಗ್ ಮಾನಾದಿಗೆ ನಡತ್ಂಡ್.ಬಪ್ಪನಾಡ್ ಮೇಳದ ಕಲಾವಿದೆ, ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್ ದಿನೇಶ್ ರೈ ಕಡಬ ಬಿನ್ನೆರೆನ್ ಎದ್ಕೊನಿಯೆರ್. ರಾಧಾಕೃಷ್ಣ ನಾವಡೆರ್ ಪ್ರಸ್ತಾವನೆ ಮಲ್ತೆರ್.ರಾಜೇಂದ್ರ ಪ್ರಸಾದ ಎಕ್ಕಾರ್ ಲೇಸ್ ನಡಪಾದ್ ಕೊರಿಯೆರ್.ಅಯಿರ್ದ್ ಬೊಕ್ಕ ಬಂಗಾರ್ ಬಾಲೆ ಯಕ್ಷಗಾನ ಪ್ರದರ್ಶನ ನಡತ್ಂಡ್.
pallavi shetty