ಅಸೈಗೋಳಿದ “ದೂಮಣ್ಣ” ಹೋಟೆಲ್ ಡ್ ತುಳು ಲಿಪಿತ ಪುದರ್ ಪಲವೆ

ಅಸೈಗೋಳಿದ ಆಶೀಶ್ ಮೇರ್ನ ಹೋಟೆಲ್ ಡ್ ತುಳು ಲಿಪಿತ ಪುದರ್ ಪಲವೆ ತೊಜಿದ್ ಬೈದ್oಡ್.

ಈ ಬಗೆಟ್ ಹೋಟೆಲ್ ದ ಧನಿ ಆಶಿಶ್ ಪಾತೆರ್ದ್, ಯಾನೊರಿ ತುಳುವೆ ಪಂದ್ ಪನಿಯೆರೆ ಎಂಕ್ ಪೆರ್ಮೆ ಉಂಡು. ನಮ್ಮ ತುಳು ಭಾಷೆ ಆಚಾರ ವಿಚಾರ ಸಂಸ್ಕೃತಿ ಪಂಡ ಎಂಕ್ ಮಸ್ತ್ ಇಷ್ಟ. ಯಾನ್ ತುಳು ಲಿಪಿತ ಬಗೆಟ್ಟ್ ಪೇಪರ್ಡ್, ಸಾಮಾಜಿಕ ಜಾಲತಾಣೊಲೆಡ್ ತೂವೊಂದು ಉಪ್ಪುವೆ. ಅಂಚನೆ ಯಾನ್ಲ ಎನ್ನ ಹೋಟೆಲ್ ಗ್ ತುಳು ಲಿಪಿ ಪುದರ್ ಪಲವೆ ಪಾಡೊಡೆ ಪಂದ್ ನಿರ್ಧಾರ ಮಂತೆ.

ಅವು ಅತ್ತಂದೆ ಈ ಹೋಟೆಲ್ 1988ಡ್ ಸುರು ಮಂತ್ತಿನಿ ಎನ್ನ ಅಜ್ಜೆರ್ ದೂಮಣ್ಣೆ. ಎನ್ನ ಅಜ್ಜೆರ್ ದುಂಬುದ ಕಾಲಡ್ ಮಣ್ಣ್ ದ ಕರ ಬಿಸಲೆಡ್ ತೆನಸ್ ವನಸ್ಲೆನ್ ಮಲ್ತೊಂದು ಇತ್ತೆರ್. ಅವೆಟ್ ಸ್ಪೆಷಲ್ ತೆನಸ್ ಪಂಡ ನೀರ್ ದೋಸೆ ದ ಮಿತ್ತ್ ಪದೆಂಗಿ ಪಾಡ್ದ್ ಅಯಿತ ಮಿತ್ತ್ ಚಟ್ನಿ, ಪುಂಡಿ ಬೊಕ್ಕ ಕೋರಿ ಪುಲಿಮುಂಚಿ ಗಸಿ. ಅವುಲ ಮಣ್ಣ್ ದ ಬಿಸಲೆಡ್ ಶುಚಿ ರುಚಿಯಾದ್ ಮಲ್ತೊಂದು ಇತ್ತೆರ್. ಅಜ್ಜೆರ್ ಕರಿದ್ ಪೋಯಿ ಬೊಕ್ಕ ಈ ಹೋಟೆಲ್ ಬಾಡಿಗೆಗ್ ಕೊರ್ದು ಇತ್ತೆರ್. ಒಂತೆ ಸಮಯ ಕರಿದ್ ಹೋಟೆಲ್ ನಡಪಾವುನಕುಲು ಇಜ್ಜಂದೆ ಬಂದ್ ಮನ್ಪೊಡಾಂಡ್.

ಅರೆನ ಪುಲ್ಲಿಯಾದ್ ಯಾನ್ ಅರೆನನೆ ಪುದರ್ಡ್ ಹೋಟೆಲ್ ಪಿರ ಸುರು ಮಲ್ತ್ ದೆ. ದುಂಬು ಈ ಹೋಟೆಲ್ ಗ್ ಬೇತೆ ಪುದರ್ ಇತ್ತ್ಂಡ್. ಒಂಜಿ ಮರತ ಪರ ಇರೆ ತಾಲ್ದ್ ಪೊಸ ಚಿಗ್ ರ್ ಇರೆ ಬತ್ದ್ ಗೆಲ್ಲಾದ್ ಏತ್ ಮಲ್ಲ ಮರ ಆಂಡಲ ಆ ಮರತ ಬೇರ್ ಪರತ್ತೆ ಆದ್ ಉಪ್ಪುಂಡುಗೆ. ಅಂಚನೆ ಈ ಹೋಟೆಲ್ ಈ ಕಾಲಗ್ ತಕ್ಕ ನವೀಕರಣ ಮಂತ್ಂಡಲ ಅಜ್ಜೆರೆನ ಮಿತ್ತ್ ದ ಅಭಿಮಾನ ಬೊಕ್ಕ ಅರೆನ ಪುದರ್ ಶಾಶ್ವತ ಆದ್ ಉಪ್ಪೊಡು ಪನ್ಪುನ ಬಗೆಟ್ ಹೋಟೆಲ್ ದೂಮಣ್ಣ ಪಂದ್ ಅರೆನನೆ ಪುದರ್ ದೀತೆ. ಅಪಗದ ಕಾಲಡ್ ಅರೆನ ಹೋಟೆಲ್ ಡ್ ದಾದ ಸ್ಪೆಷಲ್ ಇತ್ತ್oಡ್ ಅವೆನೆ ಜನಕುಲು ಮಾತಾ ತಿನಿಯೆರೆ ಇಷ್ಟ ಪಡೆಯೊಂದಿತ್ತೆರ್.

ಪುಂಡಿ ಬೊಕ್ಕ ಕೋರಿ, ಪುಲಿಮುಂಚಿ ಗಸಿ ಇತ್ತೆ ಎಂಕ್ಲೆನ ಹೋಟೆಲ್ ಡ್ಲ ಸ್ಪೆಷಲ್ ತೆನಸ್ ಆದ್ ಉಂಡು. ಆತೆ ಅತ್ತಂದೆ ತೆನಸ್ ವನಸ್ ಮನ್ಪೆರೆ ಸಾಧ್ಯ ಆಯಿನಾತ್ ಯಾನ್ ಮಣ್ಣ್ ದ ಕರ ಬಿಸಲೆ ಗಲಸೊಂದು ಉಲ್ಲೆ.

ಜನಕ್ಲೆಗ್ ರುಚಿಯಾಯಿನ ತೆನಸ್ ವನಸ್ಲೆನ್ ಕೊರೊಡು. ನಮ್ಮ ತುಳುನಾಡ್ದ ಮರಿಯಲದ ತೆನಸುಲಾಯಿನ ಪತ್ರೊಡೆ, ಪೆಲಕಾಯಿದ ಗಟ್ಟಿ ಇಂಚಿನ ಮಾತಾ ಕೆಲವು ತೆನಸ್ಲೆನ್ ಮಾತಾ ದುಂಬಗ್ ಮನ್ಪೊಡುಂದು ಉಲ್ಲೆ. ಊರುದ ಜನಕ್ಲೆನ ಸಹಕಾರಲ ಎಡ್ಡೆ ರೀತಿಡ್ ಉಂಡು ಪಂದ್ ಆಶಿಶ್ ಪಂಡೆರ್.

ಅಸೈಗೋಳಿದ ಊರುಡು ಬಹುಷ ಇಂದು ಸುರುತ ತುಳು ಲಿಪಿ ಪುದರ್ ಪಲವೆ. ಅಂಚನೆ ಅಸೈಗೋಳಿ ಬೊಕ್ಕ ಕೈತಲ್ದ ಊರುಲೆಡ್ ಮಾತಾ ನನಲಾತ್ ತುಳು ಲಿಪಿತ ಪುದರ್ ಪಲವೆ ತೂಪುಲೆಕ ಆವಡ್ ಪoದ್ ಆರ್ ತುಳು ಭಾಷೆಗ್ ಎಡ್ಡೆಪ್ಪುನು ಬಯಕ್ಯೆರ್.