ಸಾಕಾರ

ಪಡುಬಿದ್ರಿದ ಮೂಜಿ ಕುಟುಂಬಗ್ ಪೊಸ ಇಲ್ಲದ ಸಾಕಾರ

ಪಡುಬಿದ್ರಿ, ಆಗಸ್ಟ್ 4: ಸಮಾಜ ಸೇವಕ ಕಟಪಾಡಿ ಶಶಿಧರ್ ಪುರೋಹಿತ್ ಮೆರ್ನ ಮುತಾಲಿಕೆಡ್ ಇಲ್ಲ್ ಕಟ್ಟುನ ಸಮಿತಿದ ವತಿರ್ದ್ ಅಶಕ್ತ ಬಡ ಕುಟುಂಬದ ಪಡುಬಿದ್ರಿ ಅಬ್ಬೇಡಿದ ಸುಜಾತಾ ಕೇಶವ ಆಚಾರ್ಯ, ಅದಮಾರ್ ದ ಯಶೋಧಾ ಶಿವರಾಮ ಆಚಾರ್ಯ, ಒಡಿಪು ಪುತ್ತೂರು ಗರಡೆದ ಸುಮತಿ ಚೆಲುವಯ್ಯ ಆಚಾರ್ಯ ಮೆಕ್ಲೆನ ಪೊಸ ಇಲ್ಲನ್ ಕೊರ್ಪಿನ ಲೇಸ್ ನಡತುಂಡು.

ಐರ್ದ್ ಬೊಕ್ಕ ಪಾತೆರಿನ ಕಟಪಾಡಿ ಶಶಿಧರ್ ಪುರೋಹಿತ್, ಕೋವಿಡ್ ಸಂಕಷ್ಟ ಕಾಲಡ್ ಸುಮಾರ್ 600 ಕುಟುಂಬಗ್ ಆಹಾರದ ಕಿಟ್ ಕೊರ್ಪಿನ ಪೊರ್ತುಡು ಈ ಅಶಕ್ತ ಪಾಪದ ಕುಟುಂಬನ್ ತೂಯರೇ ಪೋದು ಇತ್ತೆರ್ . ಅಂಚನೇ ಜವಣ್ಯೆರ್ನ ಕೂಟನ್ ಕಟ್ಟ್ ದ್ ಈ ಇಲ್ಲನ್ ಸರಿ ಮಲ್ತ್ ಕೊರಿಯೆರ್.

ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ವತಿರ್ದ್ ಅಶಕ್ತೆರೆಗ್ ಪಣವುದ ಸಾಕಾರ

ಕುಡ್ಲ, ಜೂನ್ 30: ಶ್ರೀದುರ್ಗಾಪರಮೇಶ್ವರಿ ಅಪ್ಪೆನ ಅನುಗ್ರಹರ್ದ್ ಜನ ಸೇವೆಯೇ ಜನಾರ್ಧನ ಸೇವೆ ಪನ್ಪಿನ ನೆಲೆಟ್ಟ್ ಯುವ ಮನಸ್ಸ್ ದ ಸೇವಾ ಮನೋಭಾವನೆಡ್ ಕರಿನ 57 ತಿಂಗೊಲ್ ದ ಪಿರವು ಪುಟ್ಟಿನ ತುಳುನಾಡ ಪೊರ್ಲು ಸೇವಾ ಟ್ರಸ್ಟ್(ರಿ.) ಕುಡ್ಲ ಇತ್ತೇ ತನ್ನ 58ನೇ ತಿಂಗೊಲ್ ದ ಸೇವಾ ಪಯಣಡ್ 3 ಅಶಕ್ತೆರೆಗ್ ಸಾಕಾರ ಕೊರ್ತೆರ್ .

ಕಿಡ್ನಿ ವೈಫಲ್ಯರ್ದ್ ಉಪ್ಪುನ ಬಂಟ್ವಾಳ ದ ಮೊಗರ್ನಾಡು ನರಿಕೊಂಬು ನಿವಾಸಿ ಸತೀಶ್ ಕುಲಾಲ್ ಮೆರ್ನ ಚಿಕಿತ್ಸೆಗ್ 20,000 ಚೆಕ್ದ ಪಣವುದ ಸಾಕಾಯ ,ಲಿವರ್ ಸಂಬಂಧಿತ ಖಾಯಿಲೆರ್ದ್ ಬಳಲೊಂದು ಉಪ್ಪುನ ಬಂಟ್ವಾಳ ತಾಲೂಕುದ ಬಡಗಬೆಳ್ಳೂರು ಕೈತಲ್ ದ ಕೊಳ್ತಮಜಲು ನಿವಾಸಿ ಮಾಯಿಲಪ್ಪ ಪೂಜಾರಿಲ್ ಮೆರ್ನ ಚಿಕಿತ್ಸೆಗ್ 20,000 ಚೆಕ್ ದ ಪಣವುದ ಸಾಕಾಯ ಬೊಕ್ಕ ತಾರೀಖ್ 24.05.2021ಕ್ಕ್ ಪುಟ್ಟುದು ಥೈರಾಯ್ಡ್, ಕಿಡ್ನಿ ಸಮಸ್ಯೆ ಬೊಕ್ಕ ಹೃದಯದ ಪಂಪಿಂಗ್ ಸಮಸ್ಯೆರ್ದ್ ಉಪ್ಪುನ ಒಡಿಪು ಕಾರ್ಕಳ ತಾಲೂಕುದ ಇನ್ನಾ ಗ್ರಾಮದ ಹೊಸಮನೆತ ಅಶೋಕ್ ಬೊಕ್ಕ ದಿವ್ಯ ದಂಪತಿಲೆನ ಪೊಣ್ಣು ಬಾಲೆದ ಮರ್ದ್ ದ ಖರ್ಚ್ ಗ್ 30,000 ಪಣವುದ ಸಾಕರನ್ ಬಂಟ್ವಾಳ ನಗರ ಪೊಲೀಸ್ ಠಾಣೆ ಬಿ.ಸಿ ರೋಡ್ ಡ್ ಕೊರಿಯೆರ್ .

ಈ ಪೊರ್ತುಡು ಬಂಟ್ವಾಳ ನಗರ ಪೊಲೀಸ್ ಠಾಣೆದ ಇನ್ಸ್ಪೆಕ್ಟರ್ ಚೆಲುವರಾಜ್ ಬಿ, ಸಿಬ್ಬಂದಿ ವರ್ಗ ಬೊಕ್ಕ ಟ್ರಸ್ಟ್ ದ ಸೇವಾ ಮಾಣಿಕ್ಯೆರ್ ಪಾಲ್ ಪಡೆದಿತ್ತೆರ್..

ಅಮೇರಿಕಾದ ಯಕ್ಷ ಪ್ರೇಮಿಲೆರ್ದ್ ಯಕ್ಷಗಾನ ಕಲಾವಿದೆರೆಗ್ ಸಾಕಾರ

ಒಡಿಪು , ಜೂ.9: ಕೊರೋನರ್ದಾವರ ಕಷ್ಟಡ್ ಉಪ್ಪುನ ಯಕ್ಷಗಾನ ಕಲಾವಿದೆರೆಗ್ ಸಾಕಾರ ಕೊರಿಯೆರೆ ಅಮೆರಿಕದ ಮಿಯಾಮಿಯಡ್ ಉಪ್ಪುನ ಮಹದೇವ ಜಿ.ಭಟ್ ವರ್ಗಾಸರ ಮೇರ್ ತನ್ನ ದೋಸ್ತಿನಕ್ಲೆನೊಟ್ಟುಗು ಸೇರ್ದ್ ಒಟ್ಟು ಮಲ್ತಿನ 1700 ಡಾಲರ್ (ಒಟ್ಟು 1.21ಲಕ್ಷ ರೂ.) ಪಣವುನು ಒಡಿಪುದ ಯಕ್ಷಗಾನ ಕಲಾರಂಗ ಸಂಸ್ಥೆಗ್ ಕಡಪಾದೆರ್.

ಯಕ್ಷಗಾನ ಕಲಾರಂಗ ಈ ಕಾಸ್ ನ್ ಆರ್ಥಿಕ ಸಂಕಷ್ಟಡ್ ಉಪ್ಪುನ ಕಲಾವಿದೇರಾಯಿನ ಸಂಪಾಜೆ ಶೀನಪ್ಪ ರೈ, ಸುರತ್ಕಲ್ (20,000 ರೂ.), ಪುರುಷೋತ್ತಮ ಪೂಂಜಾ, ಕುಡ್ಲ (20,000 ರೂ.), ಕೃಷ್ಣ ಭಂಡಾರಿ ಗುಣವಂತೆ, ಹೊನ್ನಾವರ (20,000ರೂ.), ಹಳ್ಳಾಡಿ ಜಯರಾಮ ಶೆಟ್ಟಿ, ಬಾರಕೂರು (15,000), ಬೆದ್ರಾಡಿ ನರಸಿಂಹ ನಾಯಕ್, ಅಂಪಾರು (15,000), ಪ್ರಸನ್ನ ಭಟ್ ಬಾಳ್ಕಟ್, ಕಿರಿಮಂಜೇಶ್ವರ (10,000), ಹೊಳಮೊಗೆ ನಾಗಪ್ಪ, ಕುಂದಾಪುರ (7,000), ದಾಸನಡ್ಕ ರಾಮ ಕುಲಾಲ, ಕಾಸರಗೋಡು (7,000) ಬೊಕ್ಕ ಆಲ್ಮನೆ ಚಂದ್ರಶೇಖರ, ತೀರ್ಥಹಳ್ಳಿ (7,000ರೂ.) ಮೆಕ್ಲೆಗ್ ಕೊರ್ತೆರ್ .

ಕೊರೋನ ಪೊರ್ತುಡು ಎಂಡೋಸಲ್ಫಾನ್ ಸಂತ್ರಸ್ತರೆಗ್ ಸಾಕಾರ

ಒಡಿಪು , ಜೂ.7: ಕರ್ನಾಟಕ ಉಚ್ಚ ನ್ಯಾಯಾಲಯದ ರಿಟ್ ಪಿಟಿಷನ್‌ಡ್ ಕೊರಿನ ನಿರ್ದೇಶನನ್ ಪರಿಣಾಮಕಾರಿಯಾದ್ ಅನುಷ್ಠಾನ ಮಲ್ಪುನ ನೆಲೆಟ್ಟ್ ವೀಡಿಯೋ ಕಾನ್ಸರೆನ್ಸ್ ಮುಖೇನ ಬೇತೆ ಬೇತೆ ಇಲಾಖಾಧಿಕಾರಿಲೇನ ಸಭೆನ್ ಜೂ.5 ತಾರೀಖ್ ಗ್ ಉಡುಪಿ ಜಿಲ್ಲಾ ನ್ಯಾಯಾಲಯಡ್ ಅಟ್ಟನೆ ಮಲ್ತಿತ್ತೆರ್.

ಸಭೆಟ್ ಪ್ರಧಾನ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಾಧೀಶ ಜಿಎನ್.ಸುಬ್ರಮಣ್ಯ, ಅಪರ ಜಿಲ್ಲಾಧಿಕಾರಿ ಸದಾಶಿವ ಪ್ರಭು, ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ನಾಗಭೂಷಣ ಉಡುಪ, ಡಾ.ಪ್ರಶಾಂತ್ ಭಟ್, ಉಡುಪಿ ಜಿಲ್ಲಾ ಕಾನೂನು ಸೇವೆದ ಪ್ರಾಧಿಕಾರದ ಸದಸ್ಯೆ ಕಾರ್ಯದರ್ಶಿ ಕಾವೇರಿ, ಜಿಲ್ಲಾ ವಿಕಲ ಚೇತನರ ಬೊಕ್ಕ ಹಿರಿಯ ನಾಗರಿಕರ ಸಬಲೀಕರಣ ಅಧಿಕಾರಿ ರತ್ನ, ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಗುರ್ಕಾರ್ಲಾಯಿನ ರವೀಂದ್ರನಾಥ ಶ್ಯಾನುಬೋಗ್ ಪಾಲ್ ಪಡೆದಿತ್ತೆರ್ .