ತುಳು ಲಿಪಿ ಒಡಿಪು

ಒಡಿಪುದ “ಶ್ರೀ ಕೃಷ್ಣ ಮಠ” ಟ್ ತುಳು ಲಿಪಿತ ಪುದರ್ದ ಬೋರ್ಡ್ ನ್ ಪಾಡಿನ “ಶ್ರೀ ಶ್ರೀ ಈಶಪ್ರೀಯ ತೀರ್ಥ” ಮಠಾದೀಶೆರೆಗ್ ಯುವ ತುಳುನಾಡ್ (ರಿ.) ಕುಡ್ಲ ಸಂಘಟನೆದಕ್ಲೆನ ಪರವಾದ್ ಸೊಲ್ಮೆ ಸಂದಾಯಿತ

ತುಳು ಬಾಸೆ ಒರಿಯೊಡು, ತುಳು ಲಿಪಿ ತೆರಿಯೊಡು ಪನ್ಪಿನ ಉದ್ದೇಶಡ್ ಒಡಿಪುದ “ಶ್ರೀ ಕೃಷ್ಣ ಮಠ” ಟ್ ತುಳು ಲಿಪಿತ ಪುದರ್ದ ಬೋರ್ಡ್ ನ್ ಪಾಡಿನ “ಶ್ರೀ ಶ್ರೀ ಈಶಪ್ರೀಯ ತೀರ್ಥ” ಮಠಾದೀಶೆರೆಗ್ ಬೊಕ್ಕ ಶ್ರೀ ಕೃಷ್ಣ ಮಠತ ಆಡಳಿತ ಮುಖ್ಯೆಸ್ತೆರೆಗ್ “ಶ್ರೀ ಗೋವಿಂದ ರಾಜ್” ಮೆರಗ್ “ಯುವ ತುಳುನಾಡ್ (ರಿ.) ಕುಡ್ಲ” ಸಂಘಟನೆದಕುಲು ಉಡಲೊರ್ಮೆದ ಸೊಲ್ಮೆ ಸಂದಾಯಿತ ಮಲ್ತೆರ್. ಈ ಪೊರ್ತುಡು ಶ್ರೀ ಮಠ ಟ್ ನನಾತ್ ತುಳು ಲಿಪಿ ಬೋರ್ಡ್ ಪಾಡೊಡು ಪಂಡ್ದ್ ಅಂಚನೆ ತುಳು ಬಾಸೆ ರಾಜ್ಯದ ಅಧಿಕೃತ ಬಾಸೆ ಮಲ್ಪರೆ ಮಾನ್ಯ ಮುಖ್ಯಮಂತ್ರಿಲೆಗ್ ಬಿನ್ನಾಪು ಮಲ್ಪೊಡು ಪಂಡ್ದ್ ಸ್ವಾಮಿಲೆಡ ಅರಿಕೆ ಮಲ್ತೆರ್ . ಈ ಪೊರ್ತುಡು ಸಂಘಟನೆದ ಪ್ರಧಾನ ಕಾರ್ಯಂತೆರ್ ರಿತೇಶ್ ಡಿಸೋಜ, ಪ್ರಧಾನ ಸಂಘಟನಾ ಮಾರ್ಗದರ್ಶಿ “ತುಳುನಾಡ ತುಡರ್” ದಿಲ್ ರಾಜ್ ಆಳ್ವ, ಖಜಾಂಜಿ ರಕ್ಷಣ್ ಪೂಜಾರಿ, ಮಹಿಳಾ ಗುರ್ಕಾರ್ದಿ ದೀಪಿಕಾ ಶೇರಿಗಾರ್, ಪದುಕೆರ್ ಕೌಶಿಕ್ ಶೆಟ್ಟಿ, ಸಚಿನ್ ಶೆಟ್ಟಿ ಅಂಚನೇ ಟೈಮ್ಸ್ ಆಫ್ ಕುಡ್ಲದ ಯಶೋಧ ಕೇಶವ್ ಪಾಲ್ ಪಡೆದಿತ್ತೆರ್ .