ಒಡಿಪು ಪುತ್ತೂರು ಬೊಲ್ತೆರ್

ಬಜ್ಪೆ ಏರ್‌ಪೋರ್ಟ್‌ಗ್ “ಕೋಟಿ ಚೆನ್ನಯ” ಪುದರ್ ದೀವರೆ ಮಿಥುನ್ ರೈ ಬಿನ್ನಾಪು

Sep 16, 2026

ಕುಡ್ಲ : ಕುಡ್ಲಡ್ ಸೆ.18 ಸುಕ್ರಾರ ನಡಪುನ ಕಡೀರ್‌ದ ಸಚಿವ ಸಂಪುಟ ಸಭೆಟ್ಟ್ ಬಜ್ಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ತುಳುನಾಡ್‌ದ ಕಾರ್ಣಿಕ ಪುರುಷೆರಾಯಿನ “ಕೋಟಿ ಚೆನ್ನಯೆ”ರ್‌ನ ಪುದರ್ ದೀವರೆ ನಿರ್ಣಯ ದೆತೊಂದು ಕೇಂದ್ರ ಸರಕಾರೊಗು ಶಿಫಾರಸ್ ಮಲ್ಪೊಡು” ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಎಂ. ಮಿಥುನ್ ರೈ ಬಿನ್ನಾಪು ಮಲ್ದೆರ್.
ಈ ಬಗೆಟ್ಟ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಮುಕೇನ ಮುಖ್ಯಮಂತ್ರಿಲು ಡಿಕೆ ಶಿವಕುಮಾರ್‌ಗ್ ಓಲೆ ಕಡಪುಡ್ದೆರ್.
“ಕೋಟಿ ಚೆನ್ನಯೆರ್ ತುಳು ಮಣ್ಣ್‌ದ ಸ್ವಾಭಿಮಾನ,ಶೌರ್ಯ, ಸಾಮಾಜಿಕ ನ್ಯಾಯ ಬೊಕ್ಕ ಸಾಂಸ್ಕೃತಿಕ ಅಸ್ಮಿತೆದ ಸಂಕೇತವಾದುಲ್ಲೆರ್. ಅಂಚಾದ್ ಅಕ್ಲೆನ ಪುದರ್ ಶಾಶ್ವತ ಆಪಿಲೆಕ ಏರ್ಪೋರ್ಟ್ ‌ಗ್ ಪುದರ್ ದೀವೊಡು” ಪಂದ್ ಬಿನ್ನಾಪು ಮಲ್ದೆರ್.
ಕುಡ್ಲದ ವಿಮಾನ ನಿಲ್ದಾಣಗ್ ಕೋಟಿ ಚೆನ್ನಯೆರ್‌ನ ಪುದರ್ ದೀವೊಡು ಪನ್ಪಿನ ಪೊರ್ಂಬಾಟದ ಒಂಜಿ ಭಾಗವಾದ್ 2010 ನೇ ಇಸ್ವಿಡ್ ಡಿಸೆಂಬರ್ 10 ಕ್ಕ್ ಕೆಪಿಟಿ ಸರ್ಕಲ್ ರ್ದ್ ತನ್ನ ನೇತೃತ್ವಡ್ ದೊಂದಿ ಬೊಲ್ಪುದ ಮೆರವಣಿಗೆ ಮಲ್ದಿನ ಬಗ್ಗೆ ಓಲೆಡ್ ಮಿಥುನ್ ರೈ ನೆಂಪು ಮಲ್ದೆರ್.

ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೆ.19 : ಬಸ್ರೂರು ಶ್ರೀ ತುಳುವೇಶ್ವರ ಲಿಂಗೊಗು 12 ಜ್ಯೋತಿರ್ಲಿಂಗ ಕ್ಷೇತ್ರದ ತೀರ್ಥಾಭಿಷೇಕ, ಪ್ರಶ್ನಾಚಿಂತನೆ

Sep 15, 2026

ಬಸ್ರೂರು: ಬಸ್ರೂರು ಶ್ರೀ ತುಳುವೇಶ್ವರ ದೇವಸ್ಥಾನದ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆದ ಅಂಗವಾದ್ ಸೆ. 19 ಬೊಕ್ಕ 20 ತಾರೀಕ್‌ಗ್ ವಿವಿಧ ಧಾರ್ಮಿಕ ಕಾರ್ಯಕ್ರಮ ನಡಪರೆ ಉಂಡು.
ಸೆ.19 ಶನಿವಾರ ಕಾಂಡೆ 9-10 ಗಂಟೆ ಮುಟ್ಟ ಶ್ರೀ ತುಳುವೇಶ್ವರ ದೇವೆರ್‌ನ ಲಿಂಗೊಗು 12 (ದ್ವಾದಶ) ಜ್ಯೋತಿರ್ಲಿಂಗದ ಪವಿತ್ರ ತೀರ್ಥ ಮೈತ್‌ದ್ ವಿಶೇಷ ತೀರ್ಥಾಭಿಷೇಕ ನಡಪರೆ ಉಂಡು.
ತುಳುವರ್ಲ್ಡ್ ಫೌಂಡೇಶನ್ ಸದಸ್ಯೆರಾಯಿನ ನಿತಿನ್ ಪೂಜಾರಿ, ಅಜಯ್ ದೇವಾಡಿಗ, ರಿತೇಶ್ ಬೊಕ್ಕ ಬಸಂತ್ ಮೊಕುಲು ಸುಮಾರ್ 48 ದಿನ ಅಕ್ಲೆನನೇ ಗಾಡಿಡ್ ದ್ವಾದಶ ಜ್ಯೋತಿರ್ಲಿಂಗ ಕ್ಷೇತ್ರದ ಯಾತ್ರೆ ಮಲ್ತ್‌ದ್, ಮಾತಾ ಜ್ಯೋತಿರ್ಲಿಂಗದ ದರ್ಶನ ಪಡೆದ್ ಪವಿತ್ರ ತೀರ್ಥ ಸಂಗ್ರಹ ಮಲ್ತ್‌ದ್ ಬಸ್ರೂರುಗು ಕನದೆರ್. ಈ ತೀರ್ಥನ್ ಶ್ರೀ ತುಳುವೇಶ್ವರ ದೇವೆರೆಗ್ ಅಭಿಷೇಕದ ಒರುಟ್ಟು ಸಮರ್ಪಣೆ ಮಲ್ಪರೆ ಉಂಡು.ಈ ವಿಶೇಷ ತೀರ್ಥಾಭಿಷೇಕನ್ ನೀಲೇಶ್ವರದ ತಂತ್ರಿಲಾಯಿನ ಅರವತ್ತ್ ಬ್ರಹ್ಮಶ್ರೀ ಪದ್ಮನಾಭ ತಂತ್ರಿಲು ಮಲ್ಪರೆ ಉಲ್ಲೆರ್. ತೀರ್ಥಾಭಿಷೇಕ ಆಯಿ ಬೊಕ್ಕ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆ ನಡಪರೆ ಉಂಡು.
ಉಂದುವೇ ಸಂದರ್ಭಡ್ ತುಳುನಾಡ್‌ದ ಭಾಷೆ, ಸಂಸ್ಕೃತಿ ಬೊಕ್ಕ ಧಾರ್ಮಿಕ ಪರಂಪರೆದ ಬೆಳವಣಿಗೆಲ ಮಹತ್ವ ಪಡೆತ್ಂಡ್. ಸೆ. 18ಗು ಕುಡ್ಲಡ್ ನಡಪುನ ಸಚಿವ ಸಂಪುಟ ಸಭೆ, ಅಂಜಾರು ರಾಮಣ್ಣ ಹೆಗ್ಡೆ ಬೊಕ್ಕ ಎಸ್.ಯು. ಪಣಿಯಾಡಿ ಮೊಕ್ಲೆನ ತುಳುವ ಚಳುವಳಿದ ಶತಮಾನೋತ್ಸವ, ಸೆ.23ರ್ದ್ ನಡಪುನ ತುಳುವ ಮಹಾಸಭೆತ್ತ 99ನೇ ವರ್ಷಾಚರಣೆ ಅಂಚೆನೆ 19 ದೇಶಗ್ ತುಳುವ ಮಹಾಸಭೆತ್ತ ಕಾರ್ಯವ್ಯಾಪ್ತಿ ವಿಸ್ತರಣೆ ಆಯಿನಿ ತುಳು ನುಡಿ ಬೊಕ್ಕ ಸಂಸ್ಕೃತಿದ ಪುನರ್‌ವೈಭವದ ವ್ಯಾಪ್ತಿನ್ ತೊಜಪಾವುಂಡು.
ಈ ಹಿನ್ನೆಲೆಡ್ ಸಮಸ್ತ ತುಳುನಾಡ್‌ದ ಜನಕುಲು ಶ್ರೀ ತುಳುವೇಶ್ವರ–ತುಳುವೇಶ್ವರಿ ಭಕ್ತೆರ್ ಸೆ. 19ಗು ಬಸ್ರೂರುಗು ಬತ್ತ್‌ದ್ ಈ ಧಾರ್ಮಿಕ ಲೇಸ್‌ಡ್ ಪಾಲ್ ಪಡೆವೊಡು ಪಂದ್ ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಕೃಷ್ಣ ಆಳ್ವ ಬಿನ್ನಾಪು ಮಲ್ದೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆಂಗಳೂರುದ ಸುದ್ದಿ ರಪಕ್ಕ ಸುದ್ದಿ Flash News

ಜೈ ತುಲುನಾಡ್ ಬೆಂಗಳೂರು (ರಿ.)ವತಿರ್ದ್ ತುಳು ಅಧಿಕೃತ ಭಾಷೆಗೆ ಬಿನ್ನಾಪು

Sep 11, 2026

ಬೆಂಗ್ಲೂರು: ಕರ್ನಾಟಕದ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆಯಾದ್ ತುಳು ಭಾಷೆನ್ ಘೋಷಣೆ ಮಲ್ಪುಲೆಕ್ಕ ಬೆಚ್ಚ ಆಯಿನ ಬೆಂಗ್ಲೂರು ಜೈ ತುಲುನಾಡ್ (ರಿ.) ಮುತಾಲಿಕೆಡ್ ಸರ್ವ ಸಂಘಲೆನ ಪರವಾದ್ ಬಿನ್ನಾಪು ಸಂದಾದೆರ್.

ಸೆ.18 ಕ್ಕ್ ಕುಡ್ಲಡ್ ನಡಪರೆ ಇಪ್ಪುನ ಸಚಿವ ಸಂಪುಟ ಸಭೆಟ್ಟ್ ತುಳು ಭಾಷೆನ್ ಕರ್ನಾಟಕದ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆಯಾದ್ ಘೋಷಣೆ ಮಲ್ಪುನ ಬಗ್ಗೆ ಸರ್ಕಾರ ಸರಿಯಾಯಿನ ನಿರ್ಧಾರ ದೆತೊನೊಡು ಪಂದ್ ಸಂಘಟನೆಲೆನ ಪ್ರಮುಖೆರ್ ಒತ್ತಾಯ ಮಲ್ತೆರ್.

ಈ ಲೆಕ್ಕೊಡು ಕರ್ನಾಟಕ ವಿಧಾನಸಭೆತ್ತ ಸಚಿವೆರ್ ಯು.ಟಿ. ಖಾದರ್ ಮೆರೆನ ಮುಕೇನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮೆರೆಗ್ ಬಿನ್ನಾಪು ಸಂದಾಯೆರ್. ತುಳು ಭಾಷೆಗ್ ಅಧಿಕೃತ ಮಾನ್ಯತೆ ಕೊರ್ಪಿನ ಮುಕೇನ ತುಳು ಭಾಷೆದಕ್ಲೆನ ಮಾಸ್ತ್ ದಿನತ್ತ ಬೇಡಿಕೆನ್ ಈಡೇರಿಸಾವೊಡು ಪಂದ್ ಬಿನ್ನಾಪುಡು ಬೆಚ್ಚ ಆತೆರ್.

ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದ ಸಂರಕ್ಷಣೆ, ಅಭಿವೃದ್ಧಿಗ್ ಅಧಿಕೃತ ಆಡಳಿತ ಭಾಷೆದ ಸ್ಥಾನಮಾನ ಮಹತ್ವದ ಹೆಜ್ಜೆ ಆಯೆರೆ ಉಂಡು. ನೆತ್ತ ಲೆಕ್ಕೊಡು ನನ ಬರ್ಪಿನ ಸಚಿವ ಸಂಪುಟ ಸಭೆಟ್ಟ್ ಸರ್ಕಾರ ತುಳು ಭಾಷೆದ ಪರವಾದ್ ಸಕಾರಾತ್ಮಕ ತೀರ್ಮಾನ ದೆತೊನೊಡು ಪಂದ್ ಸಂಘಟನೆಲೆನ ಪ್ರಮುಖೆರ್ ಒತ್ತಾಯ ಮಲ್ತೆರ್.

“ತುಳು ಭಾಷೆಗ್ ಅಧಿಕೃತ ಮಾನ್ಯತೆ ತಿಕೊಡು ಪನ್ಪಿನವು ತುಳುವೆರೆನ ಮಾಸ್ತ್ ವರ್ಷೊದ ಆಶಯ. ಸರ್ಕಾರ ಈ ಬೇಡಿಕೆನ್ ಸಕಾರಾತ್ಮಕವಾದ್ ಪರಿಗಣಿಸಾದ್, ತುಳು ಭಾಷೆಗ್ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆದ ಸ್ಥಾನಮಾನ ಕೊರೊಡು,” ಪಂದ್ ಬೆಚ್ಚ ಆಯೆರ್.

ತುಳು ಭಾಷೆದ ಯೂನಿಕೋಡ್‌ಗ್ ಸಂಬಂಧಪಟ್ಟಿನಂಚೆನೆ ನಡತೊಂದು ಇಪ್ಪುನ ಕೆಲಸದ ಬಗ್ಗೆ ಸಚಿವೆರೆಗ್ ಪೊಲಬು ಕೊರ್ತುಂಡು. ಈ ಬಗ್ಗೆ ಸಂಬಂಧಪಟ್ಟಿನ ಅಧಿಕಾರಿಲೆನೊಟ್ಟಿಗೆ ಪಾತೆರಕತೆ ನಡಪಾದ್, ಅಗತ್ಯ ಇಪ್ಪುನ ವ್ಯವಸ್ಥೆಲೆನ್ ಮಲ್ತ್ ಕೊರ್ಪ ಪಂದ್ ಸಚಿವೆರ್ ಭರವಸೆ ಕೊರಿಯೆರ್.

ಈ ಪೊರ್ತುಡು ಸಂಘಟನೆದ ಸಲಹೆಗಾರೆರ್ ನಿಧೀಶ್ ಶೆಟ್ಟಿ, ಅಧ್ಯಕ್ಷೆರ್ ವಿನಯ್ ಮಣಿಯನ, ಉಪಾಧ್ಯಕ್ಷೆರ್ ಶರತ್ ಕೊಡವೂರ್, ಸಂಘಟನಾ ಕಾರ್ಯದರ್ಶಿ ಗುರುಪ್ರಸಾದ್, ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಪ್ರಶಾಂತ್, ಸದಸ್ಯೆರ್ ಶರತ್ ಪೆರಾಜೆ ಬೊಕ್ಕ ಶರತ್ ಹೆಗ್ಡೆ ಕಡ್ತಲ ಪಾಲ್ ಪಡೆದಿತ್ತೆರ್.

ದಕ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಪೂಜಾರಿ ನೇಮಕ

Sep 10, 2026

ಒಡಿಪು ಜಿಲ್ಲೆಗ್ ಕಿಶನ್ ಹೆಗ್ಡೆ ಅಧ್ಯಕ್ಷೆರ್

ಬೆಂಗಳೂರು : ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಆರ್ ಪೂಜಾರಿ ನೇಮಕ ಆತೆರ್. ಅಂಚೆನೆ ಒಡಿಪು ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಕಿಶನ್ ಹೆಗ್ಡೆ ಕೊಳ್ಕೆಬೈಲ್ ಮೆರೆನ್ ನೇಮಕ ಮಲ್ದೆರ್.
ಅಖಿಲ ಭಾರತ ಕಾಂಗ್ರೆಸ್ ಕಮಿಟಿ (ಎಐಸಿಸಿ) ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ ರಾಜ್ಯದ ಬೇತೆ ಬೇತೆ ಜಿಲ್ಲೆದ ಕಮಿಟಿ ಅಧ್ಯಕ್ಷೆರ್‌ನ ಪಟ್ಟಿ ಬುಡುಗಡೆ ಮಲ್ದೆರ್.
ತುಳುನಾಡ್‌ದ ರಡ್ಡ್ ಜಿಲ್ಲೆಡ್‌ಲ ಪಕ್ಷದ ಸಂಘಟನೆ ಬೊಕ್ಕ ನನ ದುಂಬುದ ಓಟುಗು ತಯಾರಿ ಮಲ್ಪುನ ನಿಲೆಟ್ಟ್ ಜಿಲ್ಲಾ ಅಧ್ಯಕ್ಷೆರ್‌ನಕಲೆನ್ ನೇಮಕ ಮಲ್ತ್‌ದ್ ಆದೇಶ ಕಡಪಾದೆರ್.
ಮೊಕ್ಲೆನ ನೇಮಕಗ್ ಮಾಜಿ ಸಚಿವೆರಾಯಿನ ಅಭಯ ಚಂದ್ರ ಜೈನ್, ವಿನಯಕುಮಾರ್ ಸೊರಕೆ, ರಮಾನಾಥ್ ರೈ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಮುಖಂಡೆರಾಯಿನ ವಸಂತ್ ಬೆರ್ನಾಡ್, ಮೋಹನ್ ಕೋಟ್ಯಾನ್, ರಕ್ಷಿತ್ ಕೊಳಚಿಕಂಬ್ಲ, ಧನಂಜಯ ಮಟ್ಟು , ಗೋಪಿನಾಥ್ ಪಡಂಗ, ಗುರುರಾಜ್ ಪೂಜಾರಿ ತೋಕೂರು, ಜಗನ್ನಾಥ ಕೋಟ್ಯಾನ್ ಸಸಿಹಿತ್ಲು, ಅನಿಲ್ ಪೂಜಾರಿ ಸಸಿಹಿತ್ಲು , ಯೋಗೀಶ್ ಕೋಟ್ಯಾನ್ ಚಿತ್ರಾಪು ಮೊಕುಲು ಮಾತ ಅಭಿನಂದನೆ ಮಲ್ದೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ಬೊಲ್ತೆರ್ ಸುದ್ದಿ | Belthangady News ವಿದ್ಯೆಗ್ ಸಂಬಂದ ಪಟ್ಟಿನ ಮಾಹಿತಿ | Education Information

ನವಜ್ಞಾನ ಸುಧಾ ಪಿಯು ಕಾಲೇಜಿಡ್ ಸೈನ್ಸ್ , ಕಾಮರ್ಸ್ ವಿಭಾಗಗ್ ಅಡ್ಮಿಶನ್ ಸುರು

Sep 9, 2026

ಬೊಲ್ತೇರ್ : ಪ್ರತಿಷ್ಠಿತ ನವಜ್ಞಾನ ಸುಧಾ ಪದವಿಪೂರ್ವ ಕಾಲೇಜಿಡ್ 2027-28 ನೇ ವರ್ಷದ ಸೈನ್ಸ್ ಬೊಕ್ಕ ಕಾಮರ್ಸ್ ವಿಭಾಗಗ್ ಅಡ್ಮಿಶನ್ ಸುರುವಾತ್ಂಡ್.
ಉಜಿರೆ- ಧರ್ಮಸ್ಥಳ ಕೈತಲ್ದ ಲಾಯಿಲ ಕಾಶಿಬೆಟ್ಟುಡು ಉಪ್ಪುನ ಈ ಕಾಲೇಜಿಡ್ ವಿದ್ಯಾರ್ಥಿಲೆನ ಕಲಿಕೆಗ್ ಅನುಕೂಲ ಆಪಿನ ಅತ್ಯಾಧುನಿಕ ತಂತ್ರಜ್ಞಾನದ ಮೂಲಸೌಕರ್ಯ ವ್ಯವಸ್ಥೆ ಮೂಲು ಉಂಡು.
ಜೋಕ್ಲೆನ ಎಡ್ಡೆ ಶಿಕ್ಷಣ ಬೊಕ್ಕ ಭದ್ರ ಭವಿಷ್ಯದ ಬಗ್ಗೆ ನವಜ್ಞಾನ ಸುಧಾ ಪಿಯು ಕಾಲೇಜ್ ಮಸ್ತ್ ನಂಬಿಕೆ ದೀತ್ಂಡ್.
ಕಾಲೇಜ್ ಕ್ಯಾಂಪಸ್‌ಡ್ ಸೈನ್ಸ್‌ದ ಬೇತೆ ಬೇತೆ ವಿಭಾಗದ ಸುಸಜ್ಜಿತ ಲ್ಯಾಬ್ ಉಂಡು. ಫಿಟ್ನೆಸ್ ಸೆಂಟರ್, ಸ್ಮಾರ್ಟ್ ಕ್ಲಾಸ್, ಕಂಪ್ಯೂಟರ್ ಲ್ಯಾಬ್‌ಲ ಉಂಡು.
ವಿದ್ಯಾರ್ಥಿಲೆಗ್ ನೀಟ್, ಜೆಇಇ, ಕೆಸಿಇಟಿ, ಸಾಫ್ಟ್ ಸ್ಕಿಲ್, ಸಿಎ ಫೌಂಡೇಶನ್ ಕೋರ್ಸ್‌ಲೆಗ್ ಆದ್ಯತೆ ಕೊರ್ದು ಜೋಕ್ಲೆನ ಉನ್ನತ ವಿದ್ಯಾಭ್ಯಾಸಗ್ ಎಡ್ಡೆ ಪಂಚಾಂಗ ಪಾಡುನ ಉದ್ದೇಶ ದೀತ್ಂಡ್.
ಅನುಭವಿ ಲೆಕ್ಚ‌ರರ್‌ನಕುಲು, ಎಸಿ ಲೈಬ್ರೆರಿ, 24/7 ಮೆಡಿಕಲ್ ಸರ್ವಿಸ್, ಬಾಯ್ಸ್ ಬೊಕ್ಕ ಗರ್ಲ್ಸ್ ಹಾಸ್ಟೆಲ್ ಸೌಲಭ್ಯ, ಕಾಲೇಜ್ ಬಸ್ ಇಂಚಿನ ಮಾತ ಸವಲತ್ತ್‌ಲೆನ್ ಕಾಲೇಜಿಡ್ ಕೊರೊಂದುಲ್ಲೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಾರ್ಲಡ್ ಸೆ. 13 ಕ್ ‘ತೌಳವ ಯಕ್ಷಾಯನ’

Sep 9, 2026

ಕಾರ್ಲ, ಸೆ. 09: ತುಳು ಭಾಷೆ, ಸಂಸ್ಕೃತಿ, ಸಾಹಿತ್ಯ ಇತಿಹಾಸೊದ ಒರಿಪು ಬುಲೆಪುಗು ಬೆನ್ಪುನ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ದ ಕಡೆರ್ದ್ ಉಂದೇ ಬರ್ಪುನ ಐತಾರ ಸೆಪ್ಟೆಂಬರ್ 13 ಕ್ ಕಾರ್ಲದ ಶ್ರೀ ವೇಣುಗೋಪಾಲಕೃಷ್ಣ ಸಭಾಭವನೊಡು ಮದ್ಯಾನ 2 ಗಂಟೆರ್ದ್, ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿದ ಪೊಲಬು ಮಲ್ತ್ ಕೊರ್ಪುನ ‘ತೌಳವ ಯಕ್ಷಾಯನ’ ಲೇಸ್ ನಡಪರೆಗುಂಡು.

ಈ ಕಾರ್ಯಕ್ರಮೊಡು ಪೆರಿಯ ಯಕ್ಷಗಾನ ಕಲಾವಿದೆರ್ ಕೊಳ್ತಿಗೆ ನಾರಾಯಣ ಗೌಡೆರ್ ‘ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿ’ ಪನ್ಪಿ ವಿಷಯೊದ ಬಗೆಟ್ ಪನ್ಯಾಸ ಕೊರ್ಯೆರ ಉಲ್ಲೆರ್.

ಕೇಮಾರ್ ಸಾಂದೀಪನಿ ಮಠೊತ ಶ್ರೀ ಈಶವಿಠ್ಠಲದಾಸ ಸ್ವಾಮಿಲು ಆಶೀರ್ವಚನ ಕೊರ್ಯೆರ ಉಲ್ಲೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಗುರ್ಕಾರ್ಲು ನಿಶ್ಚಿತ್ ಜಿ ರಾಮಕುಂಜ ಮೆರೆನ ಗುರ್ಕಾರ್ಮೆಡ್ ನಡಪುನ ಈ ಲೇಸ್‌ಡ್ ಮಲ್ಲಬಿನ್ನೆರಾದ್ ಕಾರ್ಲ ವಿಧಾನಸಭಾ ಕ್ಷೇತ್ರೊದ ಶಾಸಕೆರ್ ವಿ ಸುನಿಲ್ ಕುಮಾರ್, ಕಾಂಗ್ರೆಸ್ ಮುಖಂಡೆರ್ ಉದಯ ಕುಮಾರ್ ಶೆಟ್ಟಿ ಮುನಿಯಾಲ್, ಗಾಯತ್ರಿ ಎಕ್ಸ್‌ಪೋರ್ಟ್ಸ್‌ದ ಬೋಳ ಪ್ರಶಾಂತ್ ಕಾಮತ್, ತುಳುವ ಮಹಾಸಭೆದ ಕರ್ನಾಟಕ ರಾಜ್ಯಾಧ್ಯಕ್ಷೆರ್ ದೇವೇಂದ್ರ ಹೆಗ್ಡೆ ಕೊಕ್ರಾಡಿ, ಮಂದಾರ ಪ್ರತಿಷ್ಠಾನೊದ ಗುರ್ಕಾರ್ಲು ರಾಜೇಶ್ ಭಟ್ ಮಂದಾರ, ಬೊಟ್ಟಿಕೆರೆ ಅಂಬರುಹ ಯಕ್ಷಸದನ ಪ್ರತಿಷ್ಠಾನೊದ ಗುರ್ಕಾರ್ಲು ಶೋಭಾ ಪುರುಷೋತ್ತಮ ಪೂಂಜ, ಪೆರಿಯ ಯಕ್ಷಗಾನ ಕಲಾವಿದೆರ್ ತಾರಾನಾಥ್ ವರ್ಕಾಡಿ, ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಸ್ಥಾಪಕೆರ್ ಮಹಿ ಮುಲ್ಕಿ ಪಾಲ್‌ಪಡೆಪೆರ್.

ಈ ಲೇಸ್‌ಡ್ ಮಂದಾರ ಕೇಶವ ಭಟ್ರ್ ಬರೆತಿನ ‘ಭರತನ ಮೋಕೆ ಬೊಕ್ಕ ಮಾಯೆದ ಸೂರ್ಪನಕಿ’ ತುಳು ಯಕ್ಷಗಾನ ಪ್ರಸಂಗ ಬೊಕ್ಕ ಬೊಟ್ಟಿಕೆರೆ ಪುರುಷೋತ್ತಮ ಪೂಂಜೆರ್ ಬರೆತಿನ ‘ಕುಡಿಯನ ಕೊಂಬಿರೆಲ್’ ತುಳು ಯಕ್ಷಗಾನ ಪ್ರಸಂಗೊಲೆನ ಪುಸ್ತಕೊಲು ಬುಡುಗಡೆ ಆವೊಂದುಲ್ಲ.

ಈ ಲೇಸ್‌ದ ಅಕೇರಿಡ್ ತುಳುನಾಡ ಪುಗಾರ್ತೆದ ಯಕ್ಷಗಾನ ಕಲಾವಿದೆರೆನ ಗೋಡ್ಯಾವೊಂದು ‘ಸಿರಿಕಿಷ್ಣ ಚಂದಪಾಲಿ’ ಪನ್ಪಿನ ಯಕ್ಷಗಾನ ಪ್ರಸಂಗ ಗೊಬ್ಬುದ್ ತೋಜಾವರೆ ಉಲ್ಲೆರ್. ಆಯಿನಾತ್ ಎಚ್ಚಿಗೆ ಸಂಖ್ಯೆಡ್ ತುಳುವೆರ್, ಯಕ್ಷಾಭಿಮಾನಿಲು ಬತ್ತ್‌ದ್ ಈ ಲೇಸ್‌ನ್ ಗೆಂದಾದ್ ಕೊರೊಡೂ ಪನ್ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಒತ್ತು ಗುರ್ಕಾರ್ಲು ಅಂಚೆನೇ ತೌಳವ ಯಕ್ಷಾಯನ ಲೇಸ್‌ದ ಸಂಯೋಜಕೆರ್ ಅಭಿಷೇಕ್ ಕುಂದರನ್ನಾಯ ತುಳು ಸಮಾಚಾರಗ್ ತೆರಿಪಾಯೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆದ್ರದ ಸುದ್ದಿ | Moodbidri News ರಪಕ್ಕ ಸುದ್ದಿ Flash News

ಸೆ.8 : ಕಂಬುಲ ಸಮಾಲೋಚನೆ ಸಭೆ

Sep 3, 2026

ಬೆದ್ರ : ರಾಜ್ಯ ಕಂಬುಲ ಅಸೋಸಿಯೇಷನ್ ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಜಂಟಿ ಸಮಾಲೋಚನೆ ಸಭೆ ಸೆ.8 ಅಂಗಾರೆ ಬೆದ್ರದ ಸೃಷ್ಟಿ ಗಾರ್ಡನ್‌ಡ್ ನಡಪರೆ ಉಂಡು.
ಅಸೋಸಿಯೇಷನ್ ‌ದ ಅಧ್ಯಕ್ಷೆರ್ ಬೆಳಪು ದೇವಿ ಪ್ರಸಾದ್ ಶೆಟ್ಟಿ ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಅಧ್ಯಕ್ಷೆರ್ ಚಂದ್ರಹಾಸ ಸನಿಲ್ ಮೊಕ್ಲೆನ ಉಪಸ್ಥಿತಿಟ್ಟ್ ಸೆ.8 ಮದ್ಯಾನ 3 ಗಂಟೆಗ್ ಸಭೆ ಲೆತ್ತ್‌ದೆರ್. ಈ ಸಭೆಟ್ಟ್ ಪೊಸ ಸೀಸನ್‌ದ ಕಂಬುಲ ವಿಚಾರೊಡು ಸಮಾಲೋಚನೆ ನಡಪರೆ ಉಂಡು.
ಕಂಬುಲದ ಆಯೋಜಕೆರ್, ಎರ್ಲೆನ ಯಜಮಾನೆರ್,ತೀರ್ಪುಗಾರೆರ್, ಕಂಬುಲ, ಸಮಿತಿದ ಪದುಕೆರ್, ಎರು ಬುಡ್ಪಿನಕುಲು, ಎರು ಗಿಡಪುನಕುಲು ಬೊಕ್ಕ ಪರಿಚಾರಕ ವರ್ಗದಕುಲು ಈ ಸಭೆಟ್ಟ್ ಪಾಲ್ ಪಡೆದ್ ಸಲಹೆ ಸೂಚನೆನ್ ಪಟ್ಟೊನೊಡು ಪಂದ್ ಕಂಬುಲ ಅಸೋಸಿಯೇಷನ್ ಪ್ರಧಾನ ಕಾರ್ಯದರ್ಶಿ ವಿಜಯಕುಮಾರ್ ಕಂಗಿನಮನೆ ಬೊಕ್ಕ ಕೋಶಾಧಿಕಾರಿ ಲೋಕೇಶ್ ಶೆಟ್ಟಿ ಮುಚ್ಚೂರು ಕಲ್ಕುಡೆ ಪತ್ರಿಕಾ ಹೇಳಿಕೆಡ್ ಬಿನ್ನಾಪು ಮಲ್ದೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ತುಳು ಬಾಸೆಡ್ ‘ಹಲ್ಕಾ ಡಾನ್’ ಪಿಚ್ಚರ್

Aug 31, 2026

ಕುತ್ತಾರು ಕೊರಗಜ್ಜ ಆದಿಸ್ಥಳಕ್ಕ್ ಚಿತ್ರತಂಡ ಭೇಟಿ

ಉಳ್ಳಾಲ: ವೀನಸ್ ಎಂಟರ್ ಟೈನರ್ ಬ್ಯಾನರ್‌ಡ್ “ಸಲಗ” ಪಿಚ್ಚರ್ ಖ್ಯಾತಿದ ನಿರ್ಮಾಪಕೆರ್ ಕೆ.ಪಿ. ಶ್ರೀಕಾಂತ್ ನಿರ್ಮಾಣಡ್, ವೆಂಕಟಾಚಲ (ಚಲಂ) ನಿರ್ದೇಶನದ ಮಂಗಳೂರು ಕೇಂದ್ರವಾದ್ ಚಿತ್ರೀಕರಣ ಆವೊಂದಿತ್ತಿನ ಕನ್ನಡ-ತೆಲುಗು ಆ್ಯಕ್ಷನ್ ಕಾಮಿಡಿ ಪಿಚ್ಚರ್ ‘ಹಲ್ಕಾ ಡಾನ್’ದ ಶೂಟಿಂಗ್ ಬಹುತೇಕ ಪೂರ್ಣ ಆತ್ಂಡ್.
ಈ ಹಿನ್ನೆಲೆಡ್ ಚಿತ್ರತಂಡ ಸೋಮವಾರ ಕುತ್ತಾರು ದೆಕ್ಕಾಡು ಕೊರಗಜ್ಜ ಆದಿಸ್ಥಳಕ್ಕ್ ಭೇಟಿ ಕೊರ್ದು ವಿಶೇಷ ಪ್ರಾರ್ಥನೆ ಕೊರ್ದು, ಆಶೀರ್ವಾದ ದೆತೊನ್ಂಡ್.
ಬೊಕ್ಕ ಸುದ್ದಿಗೋಷ್ಠಿ ಮಲ್ತ್‌ದ್ ಪಿಚ್ಚರ್‌ದ ಮಾಹಿತಿನ್ ಪಟ್ಟೊಂಡು.
ಪಿಚ್ಚರ್‌ಡ್ ನಾಯಕ ನಟೆ ಪ್ರಮೋದ್ ಪಂಜು, ರಾಕ್ ಸ್ಟಾರ್ ರೂಪೇಶ್ ಶೆಟ್ಟಿ ಬೊಕ್ಕ ಅಮೃತಾ ಅಯ್ಯಂಗಾರ್ ಪ್ರಮುಖ ಪಾತ್ರ ಮಲ್ತೊಂದುಲ್ಲೆರ್. ತುಳು ಬೊಕ್ಕ ಕನ್ನಡ ಚಿತ್ರರಂಗದ ಖ್ಯಾತ ಕಲಾವಿದೆರಾಯಿನ ಅರವಿಂದ್ ಬೋಳಾರ್, ಸಾಯಿ ಕುಮಾರ್, ಜ್ಯೋತಿ ಪೂರ್ವಜ್ ಬೊಕ್ಕ ರಮೇಶ್ ಇಂದಿರಾ ಪೋಷಕ ಪಾತ್ರಲೆಡ್ ತೋಜಿದ್ ಬೈದೆರ್.
ಸತ್ಯ ಹೆಗ್ಡೆ ಛಾಯಾಗ್ರಹಣ, ಅರ್ಜುನ್ ಕಿಟ್ಟು ಸಂಕಲನ ಬೊಕ್ಕ ವಿ. ಹರಿಕೃಷ್ಣ ಸಂಗೀತ ಸಂಯೋಜನೆ ಮಲ್ದೆರ್.
ನಾಯಕ ನಟೆ ಪ್ರಮೋದ್ ಪಂಜು ಪಾತೆರ್ದ್, ಮಂಗಳೂರು ಪರಿಸರಡ್ ನಡಪುನ ಕಥೆ ದೀವೊಂದು ಮಲ್ದಿನ ಪಿಚ್ಚರ್‌ಡ್ ಅಭಿನಯ ಮಲ್ಪರೆ ಅವಕಾಶ ತಿಕಿನವು ಅಂಚೆನೆ ಅನುಭವಿ ಕಲಾವಿದೆರಾಯಿನ ಅರವಿಂದ್ ಬೋಳಾರ್ ಬೊಕ್ಕ ರೂಪೇಶ್ ಶೆಟ್ಟಿ ಮೊಕ್ಲೆನ ಒಟ್ಟುಗು ಕೆಲಸ ಮಲ್ಪುನವು ಮಸ್ತ್ ಕುಷಿ ಕೊರ್ತುಂಡು ಪಂದ್ ಪಂಡೆರ್.
ಅಂಚೆನೆ ಎಚ್ಚಿನ ಚಿತ್ರೀಕರಣ ಮಂಗಳೂರಡು ಆಯಿನೆತ್ತ ಹಿನ್ನೆಲೆಡ್ ಸ್ಥಳೀಯ ಜನಕ್ಲೆಗ್ ಅಕ್ಲೆನನೇ ಆಯಿನ ಭಾಷೆಡ್ ಸಿನಿಮಾನ್ ಮುಟ್ಟಾವುನ ಉದ್ದೇಶಡ್ ತುಳು ಭಾಷೆ‌ಡ್‌ಲ ಚಿತ್ರ ನಿರ್ಮಾಣ ಮಲ್ಪರೆ ನಿರ್ದಾರ ಮಲ್ತ್‌ದ ಪಂದ್ ಪಂಡೆರ್.
ನಟ ರೂಪೇಶ್ ಶೆಟ್ಟಿ ಪಾತೆರ್ದ್,ನೆರ್ದ್ ದುಂಬು ಕೆಲವು ತುಳು ಬೊಕ್ಕ ಕನ್ನಡ ಚಿತ್ರಲೆಡ್ ಅಭಿನಯ ಮಲ್ತ್ಂಡಲ ಎಡ್ಡೆ ಬ್ಯಾನರ್‌‌ದ ಒಟ್ಟುಗು ಕೆಲಸ ಮಲ್ಪೊಡು ಪನ್ಪುನ ಆಸೆ ಇತ್ತ್ಂಡ್. ಇತ್ತೆ ‘ಹಲ್ಕಾ ಡಾನ್’ಮುಕೇನ ಆ ಅವಕಾಶ ತಿಕಿನವು ಕುಸಿ ಕೊರ್ತುಂಡು ಪಂದ್ ಪಂಡೆರ್ .
ನಿರ್ದೇಶಕ ವೆಂಕಟಾಚಲ (ಚಲಂ) ಪಾತೆರ್ದ್, ‘ಹಲ್ಕಾ ಡಾನ್’ ಒರಿ ಆಕರ್ಷಕ ಆಂಡ ಮುಗ್ಧ ಸ್ವಭಾವದ ವ್ಯಕ್ತಿ ಅನಿರೀಕ್ಷಿತವಾದ್ ಮಲ್ಲ ಗ್ಯಾಂಗ್‌ ಸೇರ್ದ್ ಸ್ಥಳೀಯ ಭೂಗತ ಲೋಕದ ಪೈಪೋಟಿಡ್ ತಿಕೊನ್ನ ನಾಯಕೆ, ತನ್ನ ಬುದ್ಧಿವಂತಿಕೆ, ಬೊಕ್ಕ ಅಮೃತಾ ಮೆರೆನ ಪಾತ್ರದ ಸಹಾಯೊಡು ಬರ್ಪಿನ ಸವಾಲ್‌ಲೆನ್ ಎದುರಿಸುವಾವುನ ಹಾಸ್ಯ ಬೊಕ್ಕ ಆಕ್ಷನ್‌ ಪಿಚ್ಚರ್ ಉಂದು ಆದುಂಡು ಪಂಡೆರ್.
ಕನ್ನಡಡ್ ಮೈಲಾರಿ, ಟಗರು, ಸಲಗ, U I, ನಂಚಿನ ಸೂಪರ್ ಹಿಟ್ ಸಿನಿಮಾ ನಿರ್ಮಾಣ ಮಲ್ದಿನ ನಿರ್ಮಾಪಕೆರ್ ಕೆ.ಪಿ. ಶ್ರೀಕಾಂತ್ ಪಾತೆರ್ದ್ , ಸುರುಕ್ಕು ಕನ್ನಡ ಬೊಕ್ಕ ತೆಲುಗು ಭಾಷೆಡ್ ಸಿನಿಮಾ ಮಲ್ಪುನ ಉದ್ದೇಶ ಇತ್ತ್ಂಡ್. ಆಂಡ ಎಚ್ಚಿನ ಶೂಟಿಂಗ್ ಮೂಲೆ ಆಯಿನೆರ್ದಾವರ ಮುಲ್ತ ಜನ ಕ್ಲೆನ ಭಾಷೆಡ್‌ಲ ತುಳು ಸಿನಿಮಾ ಮಲ್ಪುನ ಉದ್ದೇಶ ಉಂಡು ಪಂಡೆರ್.
ಸುದ್ಧಿಗೋಷ್ಠಿಡ್ ನಿರ್ದೇಶಕೆ ಬೊಕ್ಕ ನಟೆ ಸುಜಯ್‌ ಶಾಸ್ತ್ರಿ, ಮೆನೇಜರ್‌ ಸುಧೀರ್‌, ನಿರ್ದೇಶಕ ಛಲಂ, ನಿರ್ಮಾಪಕ‌ ಕೆ.ಪಿ ಶ್ರೀಕಾಂತ್, ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್‌, ಕ್ಯಾಮರಾಮೆನ್ ಸತ್ಯ ಹೆಗಡೆ,ಶ್ರೀ ಪಂಜಂದಾಯ ಬಂಟ ವೈದ್ಯನಾಥ ಆದಿ ಕೊರಗತನಿಯ ಸೇವಾ ಟ್ರಸ್ಟೀ ಮಹಾಬಲ ಹೆಗ್ಡೆ ದೆಪ್ಪೆಲಿಮಾರ್, ನಟ ರೂಪೇಶ್‌ ಶೆಟ್ಟಿ, ಗೌತಮ್ ಮಂಗಳೂರು ಮೊಕುಲು ಮಾತ ಇತ್ತೆರ್.

ಉಡುಪಿದ ಸುದ್ದಿ | Udupi News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಪರ್ಂದ್‌ಗ್ ಕೆಮಿಕಲ್ ಇಂಜೆಕ್ಷನ್ !?

Aug 20, 2026

ಒಡಿಪು : ಆರೋಗ್ಯ ಅಧಿಕಾರಿಲು ರೈಡ್ ಮಲ್ಪುನಗ ಗುಟ್ಟು ರಟ್ಟ್!

ಒಡಿಪು : ಬಾರೆದ ಪರ್ಂದ್ ಜೂವೊಗು ಎಡ್ಡೆ ಪಂದ್ ತಿನರೆ ಪೋಂಡ ಅಯಿಟ್ಲ ವಿಷಕಾರಿ ಕೆಮಿಕಲ್ ಉಂಡು ಪನ್ಪಿನ ಭಯಂಕರ ನ್ಯೂಸ್ ಒಡಿಪುದ ಅಲೆವೂರು ಬೊಕ್ಕ ಮಣಿಪಾಲದ ದುಗ್ಗಿ ಪನ್ಪಿನ ಜಾಗೆರ್ದ್ ಬೈದ್ಂಡ್.
ಈ ಪರಿಸರದ 4-5 ಪರ್ಂದ್ ದ ಗೋಡೌನ್‌ಗ್ ಆರೋಗ್ಯ ಅಧಿಕಾರಿಲು ಇನಿ ಕಾಂಡೆ ದಾಳಿ ಮಲ್ಪುನಗ ಈ ವಿಚಾರ ಗೊತ್ತಾತ್ಂಡ್.
ಅಸಿಸ್ಟೆಂಟ್ ಕಮಿಷನರ್ ರಶ್ಮಿ ಬೊಕ್ಕ ಆರೋಗ್ಯ ಇಲಾಖೆ ಅಧಿಕಾರಿಲು ದಾಳಿ ಮಲ್ಪುನಗ ಪರ್ಂದ್ ಬೇಗ ಪರ್ಂದರೆ ಪಾಡುನ ಕೆಮಿಕಲ್ ಬಾಟಲ್ ಪತ್ತೆ ಆದ್ ಅಕ್ಲೆನ ಮಿತ್ತ್ ಕೇಸ್ ಪಾಡ್ದ್ ತನಿಖೆ ಮಲ್ತೊಂದುಲ್ಲೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಪುಗರ್ತೆದ ಫೊಟೊಗ್ರಾಫರ್ ಉಮೇಶ್ ಉಳ್ಳಾಲ್ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ

Aug 19, 2026

ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ರಿ. ದ. ಕ. ಉಡುಪಿ ಜಿಲ್ಲೆ ಬ್ರಹ್ಮಾವರ ವಲಯ ಬೊಕ್ಕ ರೋಟರಿ ಕ್ಲಬ್ ನೆತ್ತ ಒಟ್ಟುಸೇರಿಗೆಡ್ ಇಂಚೊಗು ನಡತಿನ ವಿಶ್ವ ಛಾಯಾಗ್ರಹಣ ದಿನಾಚರಣೆದ ಲೇಸ್‌ಡ್ ಉಳ್ಳಾಲ ವಲಯದ ಪುಗರ್ತೆದ ಫೊಟೊಗ್ರಾಫರ್ ಉಮೇಶ್ ಉಳ್ಳಾಲ್ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.