ಒಡಿಪು ಪುತ್ತೂರು ಬೊಲ್ತೆರ್

ದೇಶಭಕ್ತಿ ಗೀತೆದ ಒರುಟು ಉಡಲ್ ಗೆಂದಿನ ಕಟೀಲ್ದ ಎಲ್ಯ ಆನ್ ಸಮರ್ಥ್

Aug 18, 2026

ಕಿನ್ನಿಗೋಳಿ: ಸ್ವಾತಂತ್ರ್ಯ ದಿನಾಚರಣೆದ ಅಂಗವಾದ್ ಎಲ್ಯ ಆನ್ ಪಂಡಿನ ದೇಶಭಕ್ತಿ ಗೀತೆ ಇತ್ತೆ ಸಾಮಾಜಿಕ ಜಾಲತಾಣಡ್ ಸಕತ್ ವೈರಲ್ ಆದ್ , ಆನನ್ ಪದ್ಯ ಪುಗಾರ್ತೆ ಪಡೆತ್ಂಡ್.

ಕಟೀಲ್ ಅಂಗ್ಲ ಮಾಧ್ಯಮ ಶಾಲೆದ ಒಂಜನೇ ತರಗತಿಡ್ ಕಲ್ಪುನ ಕಿನ್ನಿಗೋಳಿ ಉಲ್ಲಂಜೆದ ಸಮರ್ಥ್ ಈ ಪದ್ಯನ್ ಪಂತಿನ ಎಲ್ಯ ಪ್ರತಿಭೆ. ವಿಜಯನರಸಿಂಹ ಆರ್ ರಚನೆ ಮಲ್ದಿನ ‘ಹಿಂದುಸ್ಥಾನವು ಎಂದೂ ಮರೆಯದ ಭಾರತ ರತ್ನವು ನೀನಾಗು’ ಪನ್ಪಿನ ಭಾವಗೀತೆನ್ ಸಮರ್ಥ್ ತನ್ನ ಪೊರ್ಲ ಸೊರಟ್ ಪಂತಿನವು , ಸ್ವಾತಂತ್ರ್ಯ ದಿನಾಚರಣೆದ ಪೊರ್ತುಡು ಬಾರಿ ಪುಗಾರ್ತೆ ಪಡೆತ್ಂಡ್.

ಪುಟ್ಟಣ್ಣ ಕಣಗಾಲ್ ನಿರ್ದೇಶನದ ‘ಅಮೃತ ಘಳಿಗೆ’ ಸಿನಿಮಾಡ್ ಇತ್ತಿನ ಈ ಪದ ಅಪಗ ಬಾರಿ ಪುಗಾರ್ತೆ ಪಡೆದ್ ಇತ್ತ್ಂಡ್. ಇತ್ತೆ ಅವೇ ಪದನ್ ಎಲ್ಯ ಆನ್ ಸಮರ್ಥ್ ಪಂಡಿನ ಸಾಮಾಜಿಕ ಜಾಲತಾಣಡ್ ವೈರಲ್ ಅತುಂಡ್ .

ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಸದಸ್ಯರಾದ್ ಇಪ್ಪುನ ಅಂಚೆನೆ ಪದ ಪನ್ಪುನಾರ್ ಪ್ರಕಾಶ್ ಆಚಾರ್ಯ ಬೊಕ್ಕ ಸೌಮ್ಯ ಪ್ರಕಾಶ್ ಆಚಾರ್ಯ ದಂಪತಿಲೆನ ಮಗೆ ಸಮರ್ಥ್‌ಗ್ ಒವೇ ರೀತಿದ ಸಂಗೀತ ತರಬೇತಿ ಇಜ್ಜಿ . ಆಂಡ ಅಮ್ಮೆರ್ ಪನ್ಪುನ ಪದ್ಯ ಕೇಂದ್, ಆರೆರ್ದ್ ಪದ ಕಲ್ತಿನ ಸಮರ್ಥ್ ಇತ್ತೆ ಈ ಪದ ಪಂದ್ ಮಾತೆರ್ನ ಉಡಲ್ ಗೆಂದುದೆರ್.

ಸಮರ್ಥ್ ಪಂಡಿನ ಈ ಎಲ್ಯ ವಿಡಿಯೋ ಇನ್‌ಸ್ಟಾಗ್ರಾಂಡ್ ಕಾಲಿ ರಡ್ಡ್ ದಿನಟ್ ರಡ್ಡ್ ಲಕ್ಷ ರ್ದ್ ಜಾಸ್ತಿ ಜನ ತೂತೆರ್. ಇತ್ತೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಅತುಂಡ್ .

Religious & Cultural News ಮಾತ ಧರ್ಮದ ಸುದ್ದಿ ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಬಿರುವೆರ್ ಕಾಪು ಸೇವಾ ಸಮಿತಿ ಮುತಾಲಿಕೆಡ್ 5 ನೇ ವರ್ಷದ ಆಟಿ ಕಷಾಯ, ಮೆತ್ತೆದ ಗಂಜಿ ಪಟ್ಟುನ ಲೇಸ್

Aug 14, 2026

ಕಾಪು : ಆಟಿದ ಅಮಾಸೆದಾನಿ ಬಿರುವೆರ್ ಕಾಪು ಸೇವಾ ಸಮಿತಿ ವತಿರ್ದ್ 5 ನೇ ವರ್ಷದ ಆಟಿದ ಕಷಾಯ, ಮೆತ್ತೆದ ಗಂಜಿ ಪಟ್ಟುನ ಲೇಸ್ ನಡತ್ಂಡ್.
ಸಾಮಾಜಿಕ ಕಾರ್ಯಕರ್ತೆ ಪ್ರಶಾಂತ್ ಪೂಜಾರಿ ಕೊಂಬುಗುಡ್ಡೆ ಮೆರನ ಮುತಾಲಿಕೆಡ್ ಸಮಿತಿದ ಸದಸ್ಯೆರ್ ಆಟಿದ ಅಮಾಸೆದಾನಿ ಪುಲ್ಯ ಕಾಂಡೆ ಬೇತೆ ಬೇತೆ ಕಡೆಕ್ಕ್ ಪೋದು ಪಾಲೆದ ಮರತ್ತ ಕೆತ್ತೆ ಕೆತ್‌ದ್ ಕನತ್‌ದ್ 150 ಲೀಟರ್ ದಾತ್ ಕಷಾಯ ಮಲ್ತ್‌ದ್ ಸರ್ವ ಧರ್ಮದ ಸುಮಾರ್ 1000 ಜನ ಬಂಧುಲೆಗ್ ಪಟ್ಟಿಯೆರ್.
ಬಿರುವೆರ್ ಕಾಪು ಸೇವಾ ಸಮಿತಿದ ಅಧ್ಯಕ್ಷೆರ್ ಕಾರ್ತಿಕ್ ಅಮೀನ್ ಕಲ್ಲುಗುಡ್ಡೆ, ಪ್ರಧಾನ ಕಾರ್ಯದರ್ಶಿ ಸಂಧ್ಯಾ ಬಾಲಕೃಷ್ಣ ಕೋಟ್ಯಾನ್, ಕೋಶಾಧಿಕಾರಿ ಅಶ್ವಿನಿ ನವೀನ್, ಸದಸ್ಯೆರಾಯಿನ ವಿಕ್ಕಿ ಪೂಜಾರಿ ಮಡುಂಬು, ರಾಕೇಶ್ ಕುಂಜೂರು, ಅನಿಲ್ ಅಮೀನ್ ಕಾಪು,ರವಿರಾಜ್ ಇನ್ನಂಜೆ, ಶರತ್ ಪೂಜಾರಿ, ಉದ್ಯಮಿಲಾಯಿನ ಪ್ರಭಾಕರ ಪೂಜಾರಿ ಕೈಪುಂಜಾಲು, ದೀಪಕ್ ಕುಮಾರ್ ಎರ್ಮಾಳ್ ಮೊಕುಲು ಮಾತ ಇತ್ತೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕುಡ್ಲ : 9 ತಾಲೂಕು ಕಚೇರಿಲೆಗ್ ಲೋಕಾಯುಕ್ತ ರೈಡ್

Aug 13, 2026

ಕುಡ್ಲ : ಮಂಗಳೂರು ವಿಭಾಗದ 9 ತಾಲೂಕು ಆಫೀಸ್‌ಲೆಗ್ ಲೋಕಾಯುಕ್ತ ಪೊಲೀಸೆರ್ ಬುದಾರ ಬೊಲ್ಪುಗು ಒಂಜೇ ಪೊರ್ತುಡು ದಿಢೀರ್ ಪೊಗ್ಗುದು ದಾಖಲೆ ಪತ್ರಲೆನ್ ಚೆಕ್ ಮಲ್ದೆರ್.
ಸಾರ್ವಜನಿಕೆರೆರ್ದ್ ದೂರು ಬೈದಿನ ಹಿನ್ನೆಲೆಡ್ ಮಂಗಳೂರು,ಬಂಟ್ವಾಲ, ಬೆಲ್ತಂಗಡಿ, ಪುತ್ತೂರು, ಕಡಬ, ಸುಳ್ಯ, ಉಳ್ಳಾಲ, ಬೆದ್ರ ಬೊಕ್ಕ ಮುಲ್ಕೆ ತಾಲೂಕು ಆಫೀಸ್‌ಲೆಗ್ ರಪಕ್ಕ ರೈಡ್ ಮಲ್ತ್‌ದ್ ಜನಕ್ಲೆನ ಬೇಲೆ ಮಲ್ತ್ ಕೊರಂದೆ ಬಾಕಿ ದೀತಿನ ಫೈಲ್‌ಲೆನ್ ಪರಿಶೀಲನೆ ಮಲ್ದೆರ್.
ಲೋಕಾಯುಕ್ತ ದಿನೇಶ್ ಬಿ.ಪಿ. ಮೆರೆನ ಮುತಾಲಿಕೆಡ್ 55 ಜನ ಸಿಬ್ಬಂದಿಲು ರೈಡ್ ಮಲ್ದಿತ್ತೆರ್

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ ರಪಕ್ಕ ಸುದ್ದಿ Flash News

ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ), ಯುವವಾಹಿನಿ (ರಿ) ಹಳೆಯಂಗಡಿ ಘಟಕದ ನಿರೆಲ್‌ಡ್ “ಆಟಿದ ಗೇನ” ಲೇಸ್

Aug 7, 2026

ಹಳೆಯಂಗಡಿ: ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಹಳೆಯಂಗಡಿ ಬೊಕ್ಕ ಯುವವಾಹಿನಿ (ರಿ) ಹಳೆಯಂಗಡಿ ಘಟಕದ ಒಟ್ಟುಸೇರಿಗೆಡ್ “ಆಟಿದ ಗೇನ ” ಲೇಸ್ ನಡತ್ಂಡ್.

ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಪಡ್ಪು ಲೇಸ್ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಮಲ್ಲ ಬಿನ್ನೆರಾದ್ ಕರ್ಣಾಟಕ ಬ್ಯಾಂಕ್ ಡಿಜಿಎಂ ಬಿ. ಗೋಪಾಲಕೃಷ್ಣ ಸಾಮಗ ಪಾತೆರ್‌ದ್ ಭಾರತೀಯ ಸಂಸ್ಕೃತಿ, ಸಂಸ್ಕಾರ ಬೊಕ್ಕ ಪರಂಪರೆದ ಮೌಲ್ಯನ್ ಒರಿಪಾದ್ ಬುಲೆಪಾವುನ ಪ್ರತಿಯೊರಿಯನ ಜವಾಬ್ದಾರಿ ಪಂದ್ ಪಂಡೆರ್.
ಲೇಸ್‌ದ ಅಧ್ಯಕ್ಷತೆ ವಹಿಸ್‌ದಿತ್ತಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಹಳೆಯಂಗಡಿ ಅಧ್ಯಕ್ಷೆರ್ ಚಂದ್ರಶೇಖರ್ ನಾನಿಲ್ ಪಾತೆರ್ದ್, ಸಮಾಜದ ಐಕ್ಯತೆ, ಸಂಸ್ಕೃತಿ ಬೊಕ್ಕ ಪರಂಪರೆನ್ ಒರಿಪಾವುನೆಟ್ಟ್ ಇಂಚಿನ ಕಾರ್ಯಕ್ರಮದ ಅಗತ್ಯ ಉಂಡು ಪಂದ್ ಪಂಡೆರ್.
ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಸಮಾಜ ಸೇವಕೆರ್ ಜೈಕೃಷ್ಣ ಕೋಟ್ಯಾನ್ ಮೆರೆನ್ ಪ್ರಶಸ್ತಿ ಪುರಸ್ಕೃತ ನಮ್ಮ ಟಿವಿದ ಕಾರ್ಯಕ್ರಮ ನಿರೂಪಕೆ, ಕೃಷಿಕ ನವೀನ್ ಶೆಟ್ಟಿ ಎಡ್ಮೆಮಾರ್ ಮೆರೆಗ್ “ಆಟಿದ ತಮ್ಮನ” ಕೊರ್ದು ಸನ್ಮಾನ ಮಲ್ತೆರ್. ಈ ಪೊರ್ತುಡು ಕರಾಟೆಡ್ ರಾಷ್ಟ್ರ ಮಟ್ಟದ ಸಾಧನೆ ಮಲ್ದಿನ ಕು. ವಿನೀತ್ s ಸುವರ್ಣ ಮೆರೆನ್ ಗೌರವ ಮಲ್ತೆರ್. ದಿ. ಕೊಲ್ನಾಡ್ ಕಮಲಾ ಬೂಬ ಅಮೀನ್ ಬೊಕ್ಕ ದಿ. ಲೀಲಾ ಕರಿತೋಟ ಮೊಕ್ಲೆನ ಸ್ಮರಣಾರ್ಥ ಅರೆನ ಜೋಕುಲು ಕೊರ್ಪಿನಲ ವಿದ್ಯಾರ್ಥಿ ವೇತನ ಪಟ್ಟಿಯೆರ್. ಅಂಚೆನೆ ಇರ್ ವೆರ್ ಹಿರಿಯ ಕೃಷಿಕೆರೆನ್ ಗೌರವ ಮಲ್ತೆರ್.
ಬಿಲ್ಲವ ಸಮಾಜ ಸೇವಾ ಸಂಘದ ಖಜಾಂಚಿ ರಮೇಶ್ ಬಂಗೇರ ಸ್ವಾಗತ ಮಲ್ತೆರ್.ಸನ್ಮಾನ ಕಾರ್ಯಕ್ರಮಡ್ ಶ್ರೀ ಭಾಸ್ಕರ್ ಸಾಲ್ಯಾನ್ ಮೇರ್ ಸನ್ಮಾನಿತೆರ್‌ನ ಪರಿಚಯ ಬೊಕ್ಕ ಅಭಿನಂದನಾ ಭಾಷಣ ಮಲ್ತ್‌ದ್, ಸಮಾಜಗ್ ಆರ್ ಕೊರ್ತಿನ ಕೊಡುಗೆನ್ ನೆಂಪು ಮಲ್ತೆರ್.
ವೇದಿಕೆಡ್ ಜಗನ್ನಾಥ ಸನಿಲ್, ಮೋಹನ್ ಎಸ್. ಸುವರ್ಣ, ಗಣೇಶ್ ಜಿ. ಬಂಗೇರ, ರವಿ ಜಿ. ಅಮೀನ್, ಗೋಪಾಲ್ ಕೃಷ್ಣ ಕೋಟ್ಯಾನ್, ಶಶೀoದ್ರ ಸಾಲ್ಯಾನ್ ಸೇರ್ದ್ ಮಸ್ತ್ ಗಣ್ಯೆರ್ ಇತ್ತೆರ್.
ಕು. ಕಾತ್ಯಾಯಿನಿ ಸೊಲ್ಮೆ ಸಂದಾಯೆರ್. ಹಿಮಕರ್ ಟಿ ಸುವರ್ಣ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ನಂತರ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮನ್ ಯುವವಾಹಿನಿ ಬೊಕ್ಕ ಬಿಲ್ಲವ ಸಂಘದ ಸದಸ್ಯೆರ್ ನಡಪಾದ್ ಕೊರಿಯೆರ್. ಆಟಿದ ವಿವಿಧ ತೆನಸ್‌ಲೆನ್ ಸುಮಾರ್ 700 ಕ್ಕೆ ಜಾಸ್ತಿ ಕನ ಸೇವನೆ ಮಲ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಪಾವಂಜೆ ನಂದಾದೀಪ ಸೇವಾ ಬಳಗದ ಗೌರವಾಧ್ಯಕ್ಷೆರಾದ್ ಚಂದ್ರಶೇಖರ್ ಕರ್ಕೆರ ನೇಮಕ

Aug 3, 2026

ಮುಕ್ಕ : ಪಾವಂಜೆ ನಂದಾದೀಪ ಸೇವಾ ಬಳಗದ ಗೌರವಾಧ್ಯಕ್ಷೆರಾದ್ ಉದಾರ ಮನಸ್ಸ್ ದ ವ್ಯಕ್ತಿ ಚಂದ್ರಶೇಖರ್ ಕರ್ಕೇರ ಮಿತ್ರ ಪಾಟ್ನಾ ಮುಕ್ಕ ಮೇರ್ ನೇಮಕ ಆತೆರ್.

ಮೆರೆಗ್ ನಂದಾದೀಪ ಸೇವಾ ಬಳಗದ ಮಾತ ಸದಸ್ಯೆರೆನ ಪರವಾದ್ ಅಭಿನಂದನೆನ್ ಸಂದಾಯೆರ್. ಮೆರೆನ ಗೌರವಾಧ್ಯಕ್ಷತೆದ ಅವಧಿಡ್ ನಂದಾದೀಪ ಸೇವಾ ಬಳಗ ನನಾತ್ ಬುಲೆವಾಡ್ ಪಂದ್ ಪಂಡೆರ್

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆದ್ರದ ಸುದ್ದಿ | Moodbidri News ಬೇಲೆ / ಕೆಲಸ | Jobs ರಪಕ್ಕ ಸುದ್ದಿ Flash News

ಆ.7,8: ಬೆದ್ರ ‘ಆಳ್ವಾಸ್ ಪ್ರಗತಿ–2026’ ಬೃಹತ್ ಉದ್ಯೋಗ ಮೇಳ

Aug 3, 2026

ಬೆದ್ರ: ದೇಶದ ಭಾರೀ ಮಲ್ಲ ಉದ್ಯೋಗ ಮೇಳಲೆಡ್ ಒಂಜಾಯಿನ ‘ಆಳ್ವಾಸ್ ಪ್ರಗತಿ–2026’ ತ್ತ 16ನೇ ಆವೃತ್ತಿ ಆ.7 ಬೊಕ್ಕ 8 ಕ್ಕ್ ಬೆದ್ರದ ಆಳ್ವಾಸ್ ವಿದ್ಯಾಗಿರಿ ಕ್ಯಾಂಪಸ್‌ಡ್ ನಡಪರೆ ಉಂಡು.

ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ (ರಿ.) ಆಯೋಜನೆ ಮಲ್ಪುನ ಈ ಬೃಹತ್ ಉದ್ಯೋಗ ಮೇಳಡ್ 340 ರ್ದ್ ಎಚ್ಚ ಪುಗರ್ತೆದ ಕಂಪನಿಲು ಪಾಲ್ ಪಡೆಯೆರೆ ಉಂಡು. 23,900 ರ್ದ್ ಎಚ್ಚ ಬೇಲೆದ ಅವಕಾಶಲು ಉಂಡು. ಎಸ್‌ಎಸ್‌ಎಲ್‌ಸಿ, ಪಿಯುಸಿ, ಡಿಪ್ಲೊಮಾ, ಐಟಿಐ, ಒವ್ವೇ ಪದವಿ, ಬಿ.ಇ./ಬಿ.ಟೆಕ್, ಬಿ.ಕಾಂ/ಬಿಬಿಎ, ಸ್ನಾತಕೋತ್ತರ/ಎಂಬಿಎ, ಕೋರ್ ಐಟಿ ಬೊಕ್ಕ ವೈದ್ಯಕೀಯ, ಪ್ಯಾರಾಮೆಡಿಕಲ್ ಸೇರಿನಂಚೆನೆ ಬೇತೆ ಬೇತೆ ವಿದ್ಯಾರ್ಹತೆ ಪಡೆಯಿನ ಅಭ್ಯರ್ಥಿಲೆಗ್ ಬೇಲೆದ ಅವಕಾಶಲು ಉಂಡು.

ವಿದ್ಯಾರ್ಹತೆ ಆಧಾರದ ಮಿತ್ತ್ ಬೇಲೆದ ಅವಕಾಶಲೆಡ್ ಎಸ್‌ಎಸ್‌ಎಲ್‌ಸಿ ಬೊಕ್ಕ ಪಿಯುಸಿ – 5,228, ಡಿಪ್ಲೊಮಾ ಬೊಕ್ಕ ಐಟಿಐ – 8,748, ಒವ್ವೇ ಪದವಿ – 3,473, ಬಿ.ಇ./ಬಿ.ಟೆಕ್ – 1,601, ಬಿ.ಕಾಂ/ಬಿಬಿಎ – 2,149, ಒವ್ವೇ ಸ್ನಾತಕೋತ್ತರ/ಎಂಬಿಎ – 1,843, ವೈದ್ಯಕೀಯ ಬೊಕ್ಕ ಪ್ಯಾರಾಮೆಡಿಕಲ್ – 709 ಬೊಕ್ಕ ಕೋರ್ ಐಟಿ – 180 ಬೇಲೆ ಉಂಡು, ಅನುಭವ ಇಪ್ಪುನ ಅಭ್ಯರ್ಥಿಲೆಗ್ ಇಸೇಸ ಅವಕಾಶ ಉಂಡು.

ಆಳ್ವಾಸ್ ಪ್ರಗತಿ ಕೇವಲ ಉದ್ಯೋಗ ಮೇಳ ಮಾತ್ರ ಅವಂದೆ, ಬೇಲೆದ ನಿರೀಕ್ಷೆದಕ್ಲೆಗ್ ಬೊಕ್ಕ ಬೇಲೆ ಇಜ್ಜಂದಿನಕ್ಲೆಗ್ ಒಂಜೇ ವೇದಿಕೆಡ್ ಸಂಪರ್ಕ ಮಲ್ಪುನ ಮಹತ್ವದ ಉಪಕ್ರಮ ಆತ್ಂಡ್. ಕರಿನ 23 ಉದ್ಯೋಗ ಮೇಳದ ಮುಕೇನ 40,848ರ್ದ್ ಎಚ್ಚ ಬೇಲೆ ಬೊಡಾಯಿನಕುಲು ಪಾಲ್ ಪಡೆದಿತ್ತೆರ್, 66,432 ರ್ದ್ ಎಚ್ಚ ಅಭ್ಯರ್ಥಿಲು ಬೇತೆ ಬೇತೆ ಪುಗರ್ತೆದ ಸಂಸ್ಥೆಲೆಡ್ ಬೇಲೆನ್ ಪಡೆತೆರ್. ಈ ಸಾಧನೆರ್ದ್ ಆಳ್ವಾಸ್ ಪ್ರಗತಿ ಭಾರತದ ಮಲ್ಲ ಯಶಸ್ವಿ ಉದ್ಯೋಗ ಮೇಳಲೆಡ್ ಒಂಜಾತ್ಂಡ್.

ಉದ್ಯೋಗ ಮೇಳಡ್ ಪಾಲ್ ಪಡೆಪುನ ಅಭ್ಯರ್ಥಿಲೆಗ್ ವೃತ್ತಿ ಮಾರ್ಗದರ್ಶನ, ಕೌಶಲ್ಯಾಭಿವೃದ್ಧಿ ಬೊಕ್ಕ ಸಂದರ್ಶನಗ್ ಅಗತ್ಯ ಸಲಹೆನ್ ಕೊರಿಯೆರೆ ಉಂಡು. ಬೇತೆ ಬೇತೆ ಕ್ಷೇತ್ರದ ಪುಗರ್ತೆದ ಕಂಪನಿಲು ನೇರ ಸಂದರ್ಶನದ ಮುಕೇನ ಅರ್ಹ ಅಭ್ಯರ್ಥಿಲೆಗ್ ಆಯ್ಕೆ ಮಲ್ಪೊಂಡು.

ಉದ್ಯೋಗ ಮೇಳಡ್ ಪಾಲ್ ಪಡೆಪುನ ಮಾತ ಅಭ್ಯರ್ಥಿಲೆಗ್ ನೋಂದಣಿ ಸಂಪೂರ್ಣ ಧರ್ಮೊಗು, ಡಿಪ್ಲೊಮಾ ಬೊಕ್ಕ ಐಟಿಐ ಅಭ್ಯರ್ಥಿಲೆಗ್ ಬಸ್ ಸೌಲಭ್ಯ ಬೊಕ್ಕ ಪಿದಯಿ ಜಿಲ್ಲೆರ್ದ್ ಬರ್ಪಿನ ಅಭ್ಯರ್ಥಿಲೆಗ್‌‌ ಧರ್ಮೊಗು ವಸತಿ ವ್ಯವಸ್ಥೆ ಉಂಡು. ವಸತಿದ ಪೊಲಬುಗಾದ್ 99867 79182 ಕ್ಕ್ ಸಂಪರ್ಕ ಮಲ್ಪೊಲೆ.

ಎಚ್ಚದ ಪೊಲಬುಗಾದ್ 9741440490, 9190089077, 96117 50531 ಬೊಕ್ಕ 7975223865 ಸಹಾಯವಾಣಿ ಸಂಖ್ಯೆಗ್ ಸಂಪರ್ಕ ಮಲ್ಪೊಲಿ. ಅಭ್ಯರ್ಥಿಲು ತನ್ನ ವಿದ್ಯಾರ್ಹತೆಗ್ ಸರಿ ಹೊಂದುನ ಉದ್ಯೋಗದ ಪೊಲಬುನ್ www.alvaspragati.com ಡ್ ಪರಿಶೀಲಿಸಾದ್ ಧರ್ಮೊಗು ನೋಂದಾಣಿ ಮಲ್ತ್ ದ್ ಈ ಬೃಹತ್ ಉದ್ಯೋಗ ಮೇಳದ ಸದುಪಯೋಗನ್ ಪಡೆವೊನೊಡು ಪಂದ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ಪ್ರಕಟಣೆಡ್ ತೆರಿಪಾದ್ಂಡ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಆ.02: ಹಳೆಯಂಗಡಿ ಬಿಲ್ಲವ ಸಂಘ, ಯುವವಾಹಿನಿ ಒಟ್ಟುಸೇರಿಗೆಡ್ “ಆಟಿದ ಗೇನ’ ಲೇಸ್

Jul 28, 2026

ಹಳೆಯಂಗಡಿ : ಬಿಲ್ಲವ ಸಮಾಜ ಸೇವಾ ಸಂಘ(ರಿ) ಹಳೆಯಂಗಡಿ ಬೊಕ್ಕ ಯುವವಾಹಿನಿ (ರಿ) ಹಳೆಯಂಗಡಿ ಎಗ್ಗೆದ ಒಟ್ಟುಸೇರಿಗೆಡ್ ಆಗಸ್ಟ್ 2 ಐತಾರ ಕಾಂಡೆ 1೦ ಗಂಟರ‍್ದ್ ಸಂಘದ ಬಿಲ್ಲವ ಭವನದ ಚಾವಡಿಡ್ “ಆಟಿದ ಗೇನ’ ಲೇಸ್ ನಡಪರೆ ಉಂಡು.
ಆಟಿದ ಗೇನದ ಕುಟೊದ ಚಾವಡಿಡ್ ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಪಡ್ಪು ಮೇರ್ ಲೇಸ್ ಉದಿಪನ ಮಲ್ಪುವೆರ್. ಕರ್ಣಾಟಕ ಬ್ಯಾಂಕ್ ಕುಡ್ಲ ಡಿಜಿಎಂ ಬಿ.ಗೋಪಾಲಕೃಷ್ಣ ಸಾಮಗೆರ್ ಆಟಿದ ಮದಿಪು ಮದಿಪರೆ ಬರ್ಪೆರ್. ಬಿಲ್ಲವ ಸಮಾಜ ಸೇವಾ ಸಂಘ ಹಳೆಯಂಗಡಿದ ಗುಕಾರ‍್ಲು ಚಂದ್ರಶೇಖರ ನಾನಿಲ್ ಕೂಟದ ಗರ‍್ಕಾರ‍್ಮೆದ ಮಣೆಟ್ಟ್ ಕುಲ್ಲುವೆರ್. ಕೂಟದ ತಮೆರಿಲಾದ್ ಹೋಟೆಲ್ ಸಾಯಿಲೀಲಾದ ಮಾಲಕೆರ್ ಜಗನ್ನಾಥ ಸನಿಲ್, ಕಟ್ವಾಣ ಸಮಿತಿದ ಗುಕಾರ‍್ಲು ಮೋಹನ್ ಎಸ್ ಸುವರ್ಣೆರ್, ಸಂಘದ ಮಲ್ಲ ಗರ‍್ಕಾರ‍್ಲು ಗಣೇಶ್ ಜಿ ಬಂಗೇರ, ಯುವವಾಹಿನಿದ ಅಧ್ಯಕ್ಷೆರ್ ರವಿ ಜೆ. ಅಮೀನ್ ಮಿತ್ರ‍್ಮೆಡ್ ಉಪ್ಪುವೆರ್.
ಮಾನಾದಿಗೆದ ಮಣೆಟ್ಟ್ ಸಮಾಜಸೇವಕೆರಾಯಿನ ಜೈಕೃಷ್ಣ ಬಿ. ಕೋಟ್ಯಾನ್, ತುಳು ಭೀಷ್ಮೆ ಪ್ರಶಸ್ತಿ ಪಡೆತಿನ ನಿರೂಪಕೆ ನವೀನ್ ಎಡ್ಮೆಮಾರ್ ಮೊಕ್ಲೆಗ್ ಸಮ್ಮನ ಬಲ್ಮನ ಮಲ್ಪರೆ ಉಂಡು. ಅಂಚೆನೆ ಎಸ್‌ಎಸ್‌ಎಲ್‌ಸಿ ಬೊಕ್ಕ ಪಿಯುಸಿ ಪರೀಕ್ಷೆಡ್ ಶೇ.೮೫ ರ‍್ದ್ ಎಚ್ಚ ಮಾರ್ಕ್ಸ್ ದೈದಿನಕ್ಲೆಗ್ ವಿದ್ಯಾರ್ಥಿ ವೇತನ ಕೊರಿಯರೆ ಉಂಡು. ಅಂಚೆನೆ ನಲಿಕೆದ ಕಲಟ್ಟ್ ಬಿಲ್ಲವ ಸಂಘ ಬೊಕ್ಕ ಯುವವಾಹಿನಿದ ಕಲಾವಿದೆರರ‍್ದ್ ತುಳು ನಲಿಕೆ ಬೊಕ್ಕ ಕುಸೆಲ್ದ್ ಕೂಟ ನಡಪರೆ ಉಂಡು.
ಈ ಲೇಸ್‌ಗ್ ನಿಕ್ಲೆನ್ ಮಾತೆರೆನ್ಲ ಎದ್ಕೊನುವ ಪಂದ್ ಬಿಲ್ಲವ ಸಂಘ ಹಳೆಯಂಗಡಿ, ಕಟ್ವಾಣ ಸಮಿತಿ ಬೊಕ್ಕ ಹಳೆಯಂಗಡಿ ಯುವವಾಹಿನಿದ ಅಧಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಗೌಜಿ ಗಮ್ಮತ್ ದ ಸುದ್ದಿ | Events & Functions ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News ರಪಕ್ಕ ಸುದ್ದಿ Flash News

ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್

Jul 28, 2026

ವಿಟ್ಲ: ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್ ವಿಟ್ಲದ ಪ್ರವಾಸಿ ಮಂದಿರಡ್ ನಡತ್ಂಡ್.

ಈ ಪೊರ್ತುಡು ವಿಟ್ಲದ ಆಪದ್ಭಾಂಧವೆರ್ ಅರ್ಪಿತ್ ಚಿಕನ್ ಸೆಂಟರ್ ದ ಮಾಲಕೆರ್ ಮುರಳಿ ವಿಟ್ಲ ಇಂಚಿಪ್ಪ ವಿಟ್ಲದ ಕೋಟಿಕೆರೆಟ್ಟ್ ಮಿಂದಿಯೆರೆ ಬಾರಂದೆ ಮುರ್ಕೊಂದು ಇತ್ತಿನ ಕೆಳಿಂಜದ ಒರಿ ಬೊಕ್ಕ ಬೈರಿಕಟ್ಟೆದ ರಡ್ಡ್ ಜೋಕ್ಲೆನ್ ರಕ್ಷಣೆ ಮಲ್ತಿನ ಮಹೇಶ ಗೌಡ ಬನ ಮೊಕ್ಲೆಗ್ ಸನ್ಮಾನ ಮಲ್ತೆರ್.

ಈ ಲೇಸ್ ಡ್ ಕುಡ್ಲ ಲೋಕಸಭಾ ಕ್ಷೇತ್ರದ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಪುತ್ತೂರ್ ವಿಜಯ ಸಾಮ್ರಾಟ್ ದ ಸ್ಥಾಪಕ ಅಧ್ಯಕ್ಷೆರ್ ಸಹಜ್ ರೈ ಬಲ್ಲಜ, ಮೈತ್ರೇಯಿ ಗುರುಕುಲದ ಜಗನ್ನಾಥ ಕಾಸ್ರೋಡು, ವಿಟ್ಲ ಪಟ್ಟಣ ಪಂಚಾಯಿತಿ ಅಧ್ಯಕ್ಷೆರ್ ಕರುಣಾಕರ ಗೌಡ ನಾಯ್ತೊಟ್ಟು, ಮಾಜಿ ಅಧ್ಯಕ್ಷೆರ್ ಅರುಣ್ ವಿಟ್ಲ, ಮಾಜಿ ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ರವಿಪ್ರಕಾಶ್, ಸ್ವಸ್ತಿಕ್ ಫ್ರೆಂಡ್ಸ್ ಅಧ್ಯಕ್ಷೆರ್ ತಾರಾನಾಥ, ಕಾರ್ಯದರ್ಶಿ ಆಕಾಶ್ ವಿಟ್ಲ, ಕೋಶಾಧಿಕಾರಿ ಚಂದ್ರಶೇಖರ್ ವಿಟ್ಲ, ಸದಸ್ಯೆರ್ ನಾಗೇಶ್ ಬಸವನಗುಡಿ, ಸುದರ್ಶನ್ ವಿಟ್ಲ, ರಿತೇಶ್, ಜೀವನ್, ರಂಜಿತ್, ರಾಹುಲ್ ಶೆಣೈ, ವಿಘ್ನೇಶ್, ಉತ್ತೇಜ್, ಆದರ್ಶ್, ದಯಾನಂದ, ವಿಶ್ವನಾಥ ಅಳಿಕೆ, ಶರತ್, ಮನೋಜ್, ಶ್ರೀನಿವಾಸ್ ಗೌಡ, ಮೋನಪ್ಪ ಗೌಡ, ಜತ್ತಪ್ಪ ಗೌಡ, ಹೃತಿಕ್, ಸುಬ್ರಹ್ಮಣ್ಯ, ನಿತೀಶ್, ಪ್ರೀತೇಶ್, ಪ್ರಕಾಶ್ ಪಾಲ್ ಪಡೆದಿತ್ತೆರ್.

ರಿತೇಶ್ ಎದ್ಕೊನಿಯೆರ್. ಹರೀಶ್ ವಿಟ್ಲ ಸೊಲ್ಮೆ ಸಂದಾದ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಟೀಮ್ ಸಂರಕ್ಷಣಾ ವತಿರ್ದ್ 27ನೇ ಕಾರ್ಗಿಲ್ ವಿಜಯ್ ದಿವಸ್ ಆಚರಣೆ

Jul 27, 2026

ಕುಡ್ಲ :ಟೀಮ್ ಸಂರಕ್ಷಣಾ ವತಿರ್ದ್ 27ನೇ ಕಾರ್ಗಿಲ್ ವಿಜಯ್ ದಿವಸ್ ಅಂಗವಾದ್ ಕದ್ರಿಡ್ ಇಪ್ಪುನ ಯುದ್ಧ ಸ್ಮಾರಕಡ್ ದೇಶಗಾದ್ ಪ್ರಾಣತ್ಯಾಗ ಮಲ್ತಿನ ವೀರ ಯೋಧೆರೆಗ್ ಪುರ್ಪ ಸಂದೈತ ಮಲ್ಪುನ ಒರುಟು ಗೌರವ ನಮನ ಸಂದಾಯೆರ್ .

ಕಾರ್ಯಕ್ರಮಡ್ ಭಾರತೀಯ ವಾಯುಪಡೆತ ಮಾಜಿ ಸಾರ್ಜೆಂಟ್ ಅಂಚೆನೆ ಭಾರತದ ನಿಯಂತ್ರಕ ಬೊಕ್ಕ ಮಹಾಲೆಕ್ಕ ಪರಿಶೋಧಕರ (C&AG) ಕಚೇರಿದ ನಿವೃತ್ತ ಹಿರಿಯ ಲೆಕ್ಕಪರಿಶೋಧಕೆರ್ ಪ್ರಭಾಕರ ಗುಂಡೇರ ಮೇರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಕಾರ್ಗಿಲ್ ವಿಜಯ್ ದಿವಸದ ಮಹತ್ವ, ಭಾರತೀಯ ಸೈನಿಕೆರೆನ ಶೌರ್ಯ, ತ್ಯಾಗ ಅಂಚೆನೆ ದೇಶಭಕ್ತಿದ ಬಗೆಟ್ ಪಾತೆರಿಯೆರ್.
ಯುವಜನತೆ ದೇಶದ ಭದ್ರತೆ ಬೊಕ್ಕ ರಾಷ್ಟ್ರಪ್ರೇಮದ ಮೌಲ್ಯಲೆನ ಉಡಲ್ ಡ್ ದಿಂಜಾವೊಡು ಪಂಡೆರ್.

ಈ ಪೊರ್ತುಡು ಟೀಮ್ ಸಂರಕ್ಷಣದ ಪದಾಧಿಕಾರಿಲು ಪಾಲ್ ಪಡೆದ್ ದೇಶದ ರಕ್ಷಣೆಗಾದ್ ತನ್ನ ಪ್ರಾಣತ್ಯಾಗ ಮಲ್ತಿನ ವೀರ ಯೋಧೆರೆಗ್ ಮೌನಾಚರಣೆ ಮಲ್ತ್ ದ್ ಗೌರವ ನಮನ ಸಂದಾಯೆರ್ .

ಊರುದ ಕೆಲಸ | Regional Jobs ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಬಂಟ್ಸ್ ಹಾಸ್ಟೆಲ್ ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಗಣೇಶೋತ್ಸವ

Jul 16, 2026

ಗಣಪತಿ ಮೂರ್ತಿಗ್ ಮುರ್ತ, ಕಚೇರಿ ಉದಿಪನ

ಕುಡ್ಲ : ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿ ವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌ಡ್ ಸೆಪ್ಟಂಬರ್ 14 ರ್ದ್ 16 ತಾರೀಕ್ ಮುಟ್ಟ 20ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವ ನಡಪರೆ ಇತ್ತ್‌ದ್, ಈ ಹಿನದನೆಲೆಡ್ ಜು. 15 ಕ್ಕ್ ಶರವು ರಾಧಾಕೃಷ್ಣ ದೇವಸ್ಥಾನಡ್ ಗಣಪತಿ ದೇವೆರ್‌‌ನ ಮೂರ್ತಿ ರಚನೆಗ್ ಮುಹೂರ್ತ ನಡತ್ಂಡ್.
ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಮ್ಯಾನೇಜಿಂಗ್ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ, ಡಾ. ಆಶಾಜ್ಯೋತಿ ರೈ ದಂಪತಿಲು ಪೂಜಾ ವಿಧಿವಿಧಾನಡ್ ಪಾಲ್ ಪಡೆಯೆರ್. ಬೊಕ್ಕ ಶ್ರೀ ಶರವು ಮಹಾಗಣಪತಿ ದೇವಸ್ಥಾನಡ್ ಪೂಜೆ ಸಂದಾಯೆರ್.
ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲಾಯಿನ ನಿಟ್ಟೆಗುತ್ತು ರವಿರಾಜ್ ಶೆಟ್ಟಿ, ಕೃಷ್ಣಪ್ರಸಾದ್ ರೈ, ಶೆಡ್ಡೆ ಮಂಜುನಾಥ ಭಂಡಾರಿ, ಬಾಲಕೃಷ್ಣ ಶೆಟ್ಟಿ ಲಾನ್ಸ್ ವೇ, ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಜಯಶೀಲ ಅಡ್ಯಂತಾಯ ಅಡ್ಯಾರ್ ಗುತ್ತು, ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಎಮ್ ಕರುಣಾಕರ ಶೆಟ್ಟಿ, ಕೋಶಾಧಿಕಾರಿ ಸಿಎ ರಾಮ್ ಮೋಹನ್ ರೈ, ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಗಣೇಶೋತ್ಸವ ಸಮಿತಿದ ಪದಾಧಿಕಾರಿಗಳು, ಬೇತೆ ಬೇತೆ ಬಂಟರ ಸಂಘಲೆನ ಅಧ್ಯಕ್ಷೆರ್ ಇತ್ತೆರ್.

ಕಚೇರಿ ಉದಿಪನ
ಗಣೇಶೋತ್ಸವ ಸಮಿತಿದ ಕಚೇರಿ ಉದ್ಘಾಟನೆ ಬಂಟ್ಸ್ ಹಾಸ್ಟೇಲ್‌ದ ಮಾತೃಸಂಘದ ಕಚೇರಿದ ಕೈತಲ್ ನಡತ್ಂಡ್ .
ಉದ್ಘಾಟನೆನ್ ಶಶಿಕಲಾ ಸುಂದರ್ ಶೆಟ್ಟಿ, ಶಾಲಿನಿ ಎಸ್ ಶೆಟ್ಟಿ, ಸಂಗೀತಾ ಗಣೇಶ್ ಶೆಟ್ಟಿ, ಮಲ್ಲಿಕಾ ಪ್ರಸಾದ್ ಶೆಟ್ಟಿ, ಶಶಿ ಸುಭಾಷ್ ರೈ ನೆರವೇರಿಸಾಯೆರ್.
ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪಿ ಸದಾಶಿವ ಶೆಟ್ಟಿ, ಸ್ವಾಗತ ಮಲ್ತ್‌ದ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಬಂಟರ ಮಾತೃ ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ಬಿಜೈ ಜಗದೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್.