tulunews

ಒಡಿಪುಡು ನಡತಿನ ತುಳುನಾಡ ಗೊಬ್ಬುಲುದ ಮುಗಿತಲದ ಲೇಸ್

ಒಡಿಪು : ತುಳುಕೂಟ ಒಡಿಪು , ಅಂತಾರಾಷ್ಟ್ರೀಯ ಲಯನ್ಸ್ ಸೇವಾ ಸಂಸ್ಥೆ ಜಿಲ್ಲೆ ೩೧೭ಸಿ ಬೊಕ್ಕ ಇಂದ್ರಾಳಿ-ಒಡಿಪು ಲಯನ್ಸ್ ಬೊಕ್ಕ ಲಿಯೋ ಕ್ಲಬ್ ಮೆಕ್ಲೆನ ಒಟ್ಟು ಸೇರಿಗೇಡ್ ಮಲ್ಪೆ ಕಡಲ ಬರಿಟ್ ಅಟ್ಟನೆ ಮಲ್ತಿನ ಒಡಿಪು ಜಿಲ್ಲಾಮಟ್ಟದ ತುಳುನಾಡ ಗೊಬ್ಬುಲು ಬೊಕ್ಕ ಆಹಾರಮೇಳ, ತುಳುನಾಡ ಸಂಗೀತ ನೃತ್ಯ ಲೇಸ್ ದ ಮುಗಿತಲದ ಲೇಸ್ ನಡತುಂಡು.

ಈ ಪೊರ್ತುಡು ವಿಶೇಷವಾದ್ ಪೊಂಜೊವುಲು ಬೊಕ್ಕ ಆಂಜೊವ್ಲೆಗ್ ನಡತಿನ ತುಳುನಾಡ್ ದ ಗೊಬ್ಬುಲಾಯಿನ ಹಗ್ಗ ಜಗ್ಗಾಟ, ವಾಲಿಬಾಲ್, ತ್ರೋಬಾಲ್, ಕಬಡ್ಡಿ, ಮಾನವ ಗೋಪುರ, ಸೊಪ್ಪಾಟ, ಪಾಲೆದ ಗೊಬ್ಬು, ಚೆನ್ನೆಮಣೆ, ಪೊಕ್ಕು, ತಾರಾಯಿದ ಸೋಗೆ ನೈಪುನ , ತಾರಾಯಿದ ಚೋಲಿ ದೆಪ್ಪುನ ಪಂಥಡ್ ಗೆಂದಿನ ಜನಕ್ಲೆಗ್ ಇನಾಮು ಪಟ್ಟಿಯೆರ್.

ಈ ಪೊರ್ತುಡು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ ಸಾಹಿತಿ ಬನ್ನಂಜೆ ಬಾಬು ಅಮೀನ್ ಬೊಕ್ಕ ತುಳು ಎಂಎ ಪದವಿಡ್ ಸುರುತ ರ್ಯಾಂಕ್ ಪಡೆಯಿನ ವಿಜಯಲಕ್ಷ್ಮೀ ಪ್ರಸಾದ್ ರೈ ಸೇರಿನಂಚ ಬೇತೆ ಬೇತೆ ಗಣ್ಯೆರೆಗ್ ಮಾನದಿಗೆ ಮಲ್ತೆರ್ .

ಒಡಿಪು ತುಳುಕೂಟದ ಗುರ್ಕಾರ್ಲಾಯಿನ ಬಿ.ಜಯಕರ್ ಶೆಟ್ಟಿ ಇಂದ್ರಾಳಿ, ಲಯನ್ಸ್ ಜಿಲ್ಲಾ ಗವರ್ನರ್ ವಿಶ್ವನಾಥ್ ಶೆಟ್ಟಿ, ಇಂದ್ರಾಳಿ-ಉಡುಪಿ ಲಯನ್ಸ್ ಬೊಕ್ಕ ಲಿಯೋಕ್ಲಬ್ ಗುರ್ಕಾರ್ಲಾಯಿನ ಮನೋಹರ್ ಶೆಟ್ಟಿ ತೋನ್ಸೆ, ಲೇಸ್ ದ ಪ್ರಮುಖ ಪ್ರಾಯೋಜಕೆರಾಯಿನ ಭೀಮಾ ಜುವೆಲ್ಲರ್ಸ್‌ ಸಂಸ್ಥೆದ ವ್ಯವಸ್ಥಾಪಕ ಸಂದೇಶ್ ಕಾಮತ್, ಆಹಾರ ಮೇಳದ ಸಂಚಾಲಕ ಚಂದ್ರಶೇಖರ್ ರಾವ್, ನಗರಸಭೆ ಸ್ಥಾಯಿ ಸಮಿತಿ ಗುರ್ಕಾರ್ಲಾಯಿನ ಬಾಲಕೃಷ್ಣ ಶೆಟ್ಟಿ, ಸುಧೇಶ್ ಶೆಟ್ಟಿ, ಭುವನಪ್ರಸಾದ್, ತುಳು ಅಕಾಡೆಮಿ ಸದಸ್ಯೆ ತಾರಾ ಆಚಾರ್ಯ, ತುಳುಕೂಟದ ಕೋಶಾಧಿಕಾರಿ ಎಂ.ಜಿ. ಚೈತನ್ಯ, ಯಶೋಧಾ ಕೇಶವ್, ಡಾ.ವಿ.ಕೆ.ಯಾದವ್, ಮೋಹನ್ ಶೆಟ್ಟಿ, ಪ್ರಭಾಕರ್ ಭಂಡಾರಿ, ರತ್ನಾಕರ್ ಇಂದ್ರಾಳಿ, ಮಹಮ್ಮದ್ ಮೌಲಾ,ವೀಣಾ ಶೆಟ್ಟಿ, ವಿವೇಕಾನಂದ ಎನ್, ಪ್ರೇಮ್ ಕುಮಾರ್, ಶಶಿಧರ್ ಕುಂದರ್ ಮಲ್ಪೆ, ಮಂಜು ಕೊಳ ಪಾಲ್ ಪಡೆದಿತ್ತೆರ್ .