Tulu News

ತೋಕೂರು ಬ್ರಹ್ಮಕಲಶ ಉಚ್ಚಯಗ್ ದೊಂಪ ಮೂರ್ತ, ಲೆಪ್ಪೋಲೆ ಬುಡುಗಡೆ

ಹಳೆಯಂಗಡಿ: ಜೀರ್ಣೋದ್ಧಾರ ಆದ್ ಬ್ರಹ್ಮಕಲಶ, ನಾಗಮಂಡಲ ಉಚ್ಚಯಗ್ ತಯಾರಾತಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಸ್ಥಾನಡ್ ದೊಂಪ ಮೂರ್ತ ಬೊಕ್ಕ ಉಚ್ಚಯದ ಲೆಪ್ಪೋಲೆ ಬುಡುಗಡೆ ಲೇಸ್ ಏ.2 ಐತಾರ ನಡತ್ಂಡ್.

ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ಅರ್ಚಕೆರ್ ಮದುಸೂದನ ಆಚಾರ್ಯ ಮೇರ್ ಬಾಲಾಲಯಡ್ ದೇವೆರೆಗ್ ಪ್ರಾರ್ತನೆ ಮಲ್ತ್ ದ್ ಬೊಕ್ಕ ದೇವಲ್ಯದ ಬಾಕಿಮಾರು ಕಂಡೊಡು ಪೂಜಾ ವಿಧಿ ಮಲ್ತ್‌ದ್ ಚಪ್ಪರ ಮೂರ್ತ ನಡತ್ಂಡ್.

ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಅನುವಂಶಿಕ ಅರ್ಚಕೆರ್ ವೇ.ಮೂ.ಲಕ್ಷ್ಮೀನಾರಾಯಣ ಅಸ್ರಣ್ಣೆರ್ ಮುರ್ತ ನೆರವೇರಿಸಾದ್ ಪಾತೆರ್ದ್, ತೋಕೂರು ದೇವಸ್ಥಾನಗ್ ಪ್ರಾಚೀನ ಕಾಲದ ಪರಪೋಕು (ಇತಿಹಾಸ) ಇತ್ತ್ ದ್ ಭಕ್ತಿ ಬೊಕ್ಕ ಶ್ರದ್ಧಾ ಕೇಂದ್ರವಾದುಂಡು.ಇತ್ತೆ ಸಂಪೂರ್ಣವಾದ್ ಜೀರ್ಣೋದ್ಧಾರ ಆತಿನವು ಪ್ರಗತಿದ ಸಂಕೇತ ಆದುಂಡು. ನಮ್ಮ ಮನಸ್ ದ ದೈವೀಕ ಶಕ್ತಿದ ಆರಾಧನೆನ್ ಭಕ್ತಿ ಮಾರ್ಗೊಡು ನೆರವೇರಿಸಾದ್ ಸಂತೃಪ್ತ ಭಾವನೆನ್ ಅರಳಾವೊಡು ಪಂದ್ ಪಂಡೆರ್.

ಮೂಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್ ಅಧ್ಯಕ್ಷತೆ ಒಯಿಸಾದ್ ಪಾತೆರ್ದ್, ಸೀಮೆದ ಮಾತಾ ಧಾರ್ಮಿಕ ಕ್ಷೇತ್ರೊಲು ಇನಿಕ್ಕ್ ಭಕ್ತೆರ್ನ ಸಂಘಟನಾ ಶಕ್ತಿರ್ದ್ ಬೆಳಗೊಂದುಂಡು ಪಂಡೆರ್.

ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ದಕ್ಷಿಣ ಕನ್ನಡ ಜಿಲ್ಲಾ ಧಾರ್ಮಿಕ ಪರಿಷತ್‌ ಸದಸ್ಯೆರ್ ಕೆ.ಭುವನಾಭಿರಾಮ ಉಡುಪ ಎಡ್ಡೆಪ್ಪು ಬಯಕಿಯೆರ್ .

ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ವಿಜಯಕುಮಾರ್ ರೈ, ಪುರುಷೋತ್ತಮ ರಾವ್, ಎಲ್.ಕೆ.ಸಾಲ್ಯಾನ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಬಂಗೇರ, ವಿಶ್ವನಾಥ್, ಯೋಗೀಶ್ ಕೋಟ್ಯಾನ್, ಬೇತೆ ಬೇತೆ ಸಮಿತಿದ ರತ್ನಾಕರ ಶೆಟ್ಟಿಗಾರ್, ಮೋಹನ್‌ದಾಸ್, ಗುರುರಾಜ್ ಪೂಜಾರಿ, ಸುಗಂಧಿ ಕೊಂಡಾಣ, ಶಂಕರ್ ಶೆಟ್ಟಿಗಾರ್, ಜನಾರ್ದನ ಪಡುಪಣಂಬೂರು, ಅನಂತರಾಮ ಶಿಮಂತ್ರಾಯ, ವಿನೋದ್ ಬೊಳ್ಳೂರು, ಧರ್ಮಾನಂದ ಶೆಟ್ಟಿಗಾರ್, ಶ್ರೀಧರ ಬಂಗೇರ, ಹೇಮಂತ್ ಅಮೀನ್, ವಿನೋದ್‌ಕುಮಾರ್, ಯಶೋಧ ರಾವ್, ಸಂತೋಷ್ ದೇವಾಡಿಗ, ನವೀನ್ ಶೆಟ್ಟಿಗಾರ್, ಅನುಪಮಾ ರಾವ್, ಭಾಸ್ಕರ ಅಮೀನ್, ಗಂಗಾಧರ ಶೆಟ್ಟಿ ಮೈಲೊಟ್ಟು, ಸವಿತಾ ಬೆಳ್ಳಾಯರು, ಶೋಭಾ ವರುಣ್ ಅಂಚನ್, ಪ್ರವೀಣ್ ಶೆಟ್ಟಿ ಬೆಳ್ಳಾಯರು, ಕುಮಾರ್ ದೇವಾಡಿಗ, ಸಂತೋಷ್‌ಕುಮಾರ್ ಚಿಕ್ಕಟ್ರಾಯಪಾಡಿ, ನಾರಾಯಣ ಸುವರ್ಣ, ಎಸ್‌ಕೆಪಿ ಮೋಹನ್ ಭಟ್ ಮೊಕುಲು ಮಾತ ಇತ್ತೆರ್.

ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಎದ್ಕೊಂಡೆರ್. ಪ್ರಧಾನ ಸಂಚಾಲಕೆರ್ ಡಾ.ಸೋಂದಾ ಭಾಸ್ಕರ ಭಟ್ ಪ್ರಸ್ತಾವನೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

ಸಾವಯವ ಕೃಷಿಕ್ಕ್ ಎಚ್ಚ ಗೇನ ಕೊರೊಡು : ವಿಜಯ ಶೆಟ್ಟಿ

ಹಳೆಯಂಗಡಿ: ಕೃಷಿ ಬದ್ ಕ್ ಗ್ ನಮ ಮಾತೆರ್ಲ‌ ತಯಾರಾವೊಡು. ಸಾವಯವ ಕೃಷಿಕ್ಕ್ ಮಸ್ತ್ ಗೇನ ಕೊರೊಡು. ಸಣ್ಣ ಜಾಗೆಡ್ ಲ ಕೈತೋಟ ಮಲ್ತ್ ದ್ ತರಕಾರಿ ಬುಲೆಪಾದ್ ಸಾವಯವ ಕೃಷಿ ಮುಕೇನ ರಾಸಾಯನಿಕ ದಾಂತಿನ ಆಹಾರ ಪದ್ದತಿನ್ ಮಲ್ತೊನೊಡು ಪಂದ್ ವಿನಯ ಕೃಷಿ ಬೆಳೆಗಾರರ ಸಂಘ ಕೊಲ್ನಾಡು ನೆತ್ತ ಅಧ್ಯಕ್ಷೆರ್ ವಿಜಯ ಶೆಟ್ಟಿ ಪಂಡೆರ್.

ತೋಕೂರು ಯುವಕ ಸಂಘದ ಸುವರ್ಣ ಸಭಾಂಗಣಡ್ ನೆಹರು ಯುವ ಕೇಂದ್ರ ಮಂಗಳೂರು, ಮಹಿಳಾ ಮಂಡಲ ತೋಕೂರು, ಸಾವಯವ ಕೃಷಿ ಗ್ರಾಹಕರ ಬಳಗ ಮಂಗಳೂರು, ವಿನಯ ಕೃಷಿ ಬೆಳೆಗಾರರ ಸಂಘ ಕೊಲ್ನಾಡು ಬೊಕ್ಕ ಯುವಕ ಸಂಘ ತೋಕೂರು ನೆತ್ತ ಜಂಟಿ ಸಹಯೋಗಡ್ ಬೊಲ್ಲಿ ಪರ್ಬ ಉಚ್ಚಯದ ಲೆಕ್ಕೊಡು ಅಟ್ಟಣೆ ಮಲ್ದಿನ ಕ್ರಾಂತಿಕಾರಿ ಕೈತೋಟ ಪ್ರಾತ್ಯಕ್ಷಿಕೆ ಬೊಕ್ಕ ಮಾಹಿತಿ ಶಿಬಿರದ ಗುರ್ಕಾರ್ಮೆ ಒಯಿಸ್ ದ್ ಆರ್ ಪಾತೆರಿಯೆರ್.

ಸ್ವಪ್ನ ಅವಿನಾಶ್ ಬೊಕ್ಕ ದಾಕ್ಷಾಯಿಣಿ ಅಲಂಕಾರಿಕ ಗಿಡಕ್ಲೆನ ನಿರ್ವಹಣೆ ಬೊಕ್ಕ ಮಣ್ಣ್ ಬೆಜಿಕಿರೆ, ಕೊಟ್ಯ ಗೊಬ್ಬರ, ಗಂಜಲ ಗಲಸ್ ದ್ ಸಾವಯವ ಕೃಷಿಯಾಧಾರಿತ ಪೂತ್ತ ಗಿಡಕುಲು ಅಂಚೆನೆ ತರಕಾರಿ ಗಿಡಕ್ಲೆನ್ ನಡ್ಪಿನ, ನಿರ್ವಹಣೆ ಮಲ್ಪುನ ವಿಧಾನಲೆನ್ ಪ್ರಾತ್ಯಕ್ಷಿಕೆ ಮುಕೇನ ಮಾರ್ಗದರ್ಶನ ಕೊರಿಯೆರ್.

ಶಿಬಿರಾರ್ಥಿಲೆಗ್ ಸಾವಯವ ಕೃಷಿ ಮಾಹಿತಿ ಬೂಕು, ಅಂಚೆನೆ ಪೂತ್ತ ಬೊಕ್ಕ ತರಕಾರಿ ಬಿತ್ತ್ ಲೆನ್ ಪಟ್ಟಿಯೆರ್.

ಮಹಿಳಾ ಮಂಡಲದ ಅಧ್ಯಕ್ಷೆರ್ ಅನುಪಮಾ ಎ. ರಾವ್ ಎದ್ಕೊಂಡೆರ್. ಯುವಕ ಸಂಘದ ಅಧ್ಯಕ್ಷೆರ್ ಶೇಖರ ಶೆಟ್ಟಿಗಾರ್ ಸೊಲ್ಮೆ ಸಂದಾಯೆರ್. ವಿನೋದಾ ಭಟ್ ಸಭೆ ಸುಧಾರಿಕೆ ಮಲ್ತೆರ್.

ಚಿಕ್ಕಮಗಳೂರುಡು ದಾಖಲೆ ಇಜ್ಜಂದೆ ಟ್ರಕ್‌ಡ್ ಕೊನೊಂದು ಇತ್ತಿನ 17 ಕೆ.ಜಿ. ಬಂಗಾರ್, ಬೊಳ್ಳಿ ಪದ್ದೆಯಿ ವಶಕ್ಕ್..!

ಚಿಕ್ಕಮಗಳೂರು: ಜಿಲ್ಲಾ ಪೊಲೀಸ್ ಇಲಾಖೆ ಅಧಿಕಾರಿ, ಸಿಬ್ಬಂದಿ ಬೊಕ್ಕ ಚುನಾವಣಾಧಿಕಾರಿಲು ಕಾರ್ಯಾಚರಣೆ ನಡಪಾಯಿನ ಪೊರ್ತುಡು ದಾಖಲೆ ಇಜ್ಜಂದೆ ಕೊನೊಂದು ಇತ್ತಿನ 6.44 ಕೋಟಿ ರೂ. ಬಿಲೆತ 17 ಕೆ.ಜಿ. ಬಂಗಾರ್ ಬೊಕ್ಕ ಬೊಳ್ಳಿದ ಪದ್ದೆಯಿನ್ ಸುಕ್ರಾರ ಬಯ್ಯಗ್ ತರೀಕೆರೆ ತಾಲೂಕ್ ದ ಸಿ.ಕೆ.ಹಳ್ಳಿ ಗ್ರಾಮಡ್ ವಶಕ್ಕ್ ಪಡೆತೆರ್.

ಈ ಘಟನೆದ ಬಗೆಟ್ ತರೀಕೆರೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಈ ಜಾಗೆಡ್ ಜಿಲ್ಲಾಧಿಕಾರಿ ರಮೇಶ್, ಎಸ್ಪಿ ಉಮಾ ಪ್ರಶಾಂತ್, ಜಿಪಂ ಸಿಇಒ ಪ್ರಭು ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.

ಪವರ್ ಗ್ರಿಡ್ ಕಾರ್ಪೊರೇಷನ್ ಡ್ 138 ಬೇಲೆ

ಪವರ್ ಗ್ರಿಡ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ ಡ್ ಖಾಲಿ ಇಪ್ಪುನ 138 ಇಂಜಿನಿಯರ್ ಟ್ರೈನಿ ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ.

ಅರ್ಜಿ ಪಾಡುನಕುಲು BE, BTech ಪಾಸ್ ಆದಿಪ್ಪೊಡು. GATE-2023 ಟ್ಟ್ ಅರ್ಹತೆ ಪಡೆದಿಪ್ಪೊಡು. ಅರ್ಜಿ ಸಂದಾಯೆರೆ ಏಪ್ರಿಲ್ 18 ಅಕೇರಿದ ತಾರೀಕ್ ಆತ್ಂಡ್. ನೆತ್ತ ವೆಬ್ ಸೈಟ್: https//www.powergrid.in ಭೇಟಿ ಕೊರೊಲಿ.

ಎ.13-19: ಕುಕ್ಕುಂದೂರು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಭೌತಿಕ ಉಚ್ಚಯ, ತೇರ್ ಉಚ್ಚಯ

ಕಾರ್ಲ: ಕುಕ್ಕುಂದೂರು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಭೌತಿಕ ಉಚ್ಚಯ ಬೊಕ್ಕ ತೇರ್ ಯಾತ್ರೆ ಉಚ್ಚಯ ಎ.13-19 ಮುಟ್ಟ ನಡಪರೆ ಉಂಡು.

ಎ.13 ಗುರುವಾರ ಬೊಲ್ಪುಗು ಆರಾಧನಾ ಬಲಿ ನಡಪರೆ ಉಂಡು.

ಎ.14 ಸುಕ್ರಾರ ಮಧ್ಯಾಹ್ನ ಕೊಡಿ ಏರುಂಡು. ಬೊಕ್ಕ ಮಹಾಪೂಜೆ, ಅನ್ನಸಂತರ್ಪಣೆ, ಬಯ್ಯಗ್ ಭಜನೆ ನಡಪರೆ ಉಂಡು.

ಎ.15 ಸನಿಯಾರ ಬೊಲ್ಪುಗು ಕಲಶಾಭಿಷೇಕ, ತುಲಾಭಾರ ಸೇವೆ, ಮಧ್ಯಾಹ್ನ ಮಹಾಪೂಜೆ, ಅನ್ನಸಂತರ್ಪಣೆ, ರಾತ್ರೆ ಬಲಿದಾನ ಉಚ್ಚಯ, ಮಹಾರಂಗಪೂಜೆ ಉಚ್ಚಯ ನಡಪರೆ ಉಂಡು.

ಎ.16 ಐತಾರ ಬೊಲ್ಪುಗು ಅಂಬೋಡಿ ಬಲಿ, ತುಲಾಭಾರ ಸೇವೆ, ಮಧ್ಯಾಹ್ನ ಮಹಾಪೂಜೆ ಅನ್ನಸಂತರ್ಪಣೆ, ರಾತ್ರೆ ಕಲಾಸಂಗಮ ಕಲಾವಿದೆರೆರ್ದ್ ಶಿವದೂತೆ ಗುಳಿಗೆ ತುಳು ನಾಟಕ ನಡಪರೆ ಉಂಡು.

ಎ.17 ಸೋಮಾರ ಬೊಲ್ಪುಗು ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ತೇರ್ ಒಯಿಪೆರೆ, ಅನ್ನಸಂತರ್ಪಣೆ, ತೇರ್, ಮಹಾಪೂಜೆ, ಶ್ರೀ ಮಹಾಭೂತ ಬಲಿ, ಕವಾಟ ಬಂಧನ, ಬಯ್ಯಗ್ ಭಜನೆ ನಡಪರೆ ಉಂಡು.

ಎ.18 ಅಂಗಾರೆ ಬೊಲ್ಪುಗು ಕವಾಟ ಉದಿಪನ, ದಶವಿಧ ಸ್ನಾನ, ಮಧ್ಯಾಹ್ನ ಮಹಾಪೂಜೆ, ಬಲಿ ಉಚ್ಚಯ, ವಸಂತ ಪೂಜೆ, ಅನ್ನಸಂತರ್ಪಣೆ, ರಾತ್ರೆ ಯಾತ್ರೆ ಹೋಮ, ಓಕುಳಿ, ಅವಭೃತ, ಕಟ್ಟೆಪೂಜೆ, ರಕ್ತೇಶ್ವರಿ ಬೊಕ್ಕ ಪರಿವಾರ ದೈವೊಲೆನ ನೇಮ, ಕೊಡಿ ಜಾವರೆ ಉಂಡು.

ಎ.19 ಬುಧಾರ ಸಂಪ್ರೋಕ್ಷಣೆ, ಮಹಾ ಮಂತ್ರಾಕ್ಷತೆ, ಪ್ರಸಾದ ಕೊರಿಯೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಗಂಧ ಪ್ರಸಾದ ದೆತೊಂದು, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಅನುವಂಶಿಕ ಧರ್ಮದರ್ಶಿಲು ಕೆ. ರತ್ನರಾಜ ಮುದ್ಯ ಕುಕ್ಕುಂದೂರು ಗುಡ್ಡೆಗುತ್ತು ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪ್ಲಾಂಟ್ ಫಂಗಸ್ ಸೀಕ್: ಜಗತ್ತ್ ಡೇ ಸುರುತ ಕೇಸ್ ಭಾರತಡ್ ಪತ್ತೆ

ಸಸ್ಯ ಶಿಲೀಂಧ್ರ (ಪ್ಲಾಂಟ್ ಫಂಗಸ್) ಸೀಕ್ ಜಗತ್ತ್ ಡೇ ಸುರುತ ಕೇಸ್ ಭಾರತಡ್ ಪತ್ತೆ ಆತ್ಂಡ್.

ಈ ಸೀಕ್ ಕೋಲ್ಕತ್ತಾದ ಒಂಜಿ ಜನಕ್ಕ್ ಬೈದ್ಂಡ್. ಈ ಜನ ಸುಮಾರ್ ದಿರ್ನೊರ್ದಿಂಚ ಹುಷಾರ್ ಇಜ್ಜಂದೆ ಇತ್ತೆರ್. ಮೆರೆಗ್ ಕರ್ಕಶ ಸ್ವರ, ತೆಮ್ಮ, ಬಚ್ಚುನು, ದೊಂಡೆಡ್ ಬಾವು ಬತ್ತ್ ದ್ ಇತ್ತ್ಂಡ್. ಆಸ್ಪತ್ರೆಗ್ ದಾಖಲ್ ಆಯಿನ ಬೊಕ್ಕ ಮೆರೆಗ್ ಈ ಸೀಕ್ ಇಪ್ಪುನವು ಗೊತ್ತಾತ್ಂಡ್‌. ಸಸ್ಯ ಶಿಲೀಂಧ್ರಲ ನರಮಾನಿಲೆಗ್ ಸೀಕ್ ಬರ್ಪುಲೆಕ್ಕ ಮಲ್ಪುಂಡು ಪನ್ಪುನೆಕ್ಕ್ ಉಂದು ಸುರುತ ಕೇಸ್ ಆತ್ಂಡ್.

ಎ.22-23: ನುಳಿಯಾಲು ತರವಾಡ್ ಶ್ರೀ ಧರ್ಮಚಾವಡಿಡ್ ಕಾಲಾಧಿದ ನೇಮ

ಪುತ್ತೂರ್: ನಿಡ್ಪಳ್ಳಿದ ನುಳಿಯಾಲು ತರವಾಡ್ ಶ್ರೀ ಧರ್ಮಚಾವಡಿಡ್ ಕಾಲಾಧಿದ ನೇಮ ಎ.22-23 ಮುಟ್ಟ ನಡಪರೆ ಉಂಡು.

ಎ.22 ಸನಿಯಾರ ಬೊಲ್ಪುಗು ಗಣಹೋಮ, ನಾಗತಂಬಿಲ, ನಲಿಕೆ ಭಜನೆ, ಶ್ರೀ ವೆಂಕಟರಮಣ ದೇವೆರೆಗ್ ಹರಿಸೇವೆ ಪ್ರಸಾದ ಕೊರಿಯೆರೆ ಉಂಡು. ಮಧ್ಯಾಹ್ನ ಅನ್ನಸಂತರ್ಪಣೆ, ಸಾಂಸ್ಕೃತಿಕ ಲೇಸ್, ದೈವೊಲೆನ ಭಂಡಾರ ಜತ್ತ್ ದ್ ಎಣ್ಣೆಬೂಳ್ಯ ದೆತೊನಿಯೆರೆ ಉಂಡು. ಬೊಕ್ಕ ರಾಜನ್ ದೈವ ಪಿಲಿ ಭೂತಗ್ ನೇಮ, ಜುಮಾದಿ ದೈವೊಗ್ ನೇಮ ನಡಪರೆ ಉಂಡು. ಅವೆರ್ದ್ ಬೊಕ್ಕ ರಾತ್ರೆ ವರ್ಣಾರ ಪಂಜುರ್ಲಿ, ಪಂಜುರ್ಲಿ ಕಲ್ಲುರ್ಟಿ ಮೂಕಾಂಬಿಕಾ ಗುಳಿಗಗ್ ನೇಮ ನಡಪರೆ ಉಂಡು.‌

ಎ.23 ಐತಾರ ಬೊಲ್ಪುಗು ರಕ್ತೇಶ್ವರಿ ದೈವೊದ ನೇಮ ಆದ್ ಧರ್ಮದೈವ ಬೀರ್ಣಾಳ್ವ ದೈವೊದ ನೇಮ ನಡಪರೆ ಉಂಡು. ಬೊಕ್ಕ ಗಂಧ ಪ್ರಸಾದ ಕೊರಿಯೆರೆ ಉಂಡು. ಮಧ್ಯಾಹ್ನ ಗುಳಿಗ ದೈವೊದ ಕೋಲ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ನುಳಿಯಾಲು ತರವಾಡ್ ಟ್ರಸ್ಟ್ (ರಿ.) ದ ಅಧ್ಯಕ್ಷೆರ್ ಜಗನ್ನಾಥ ರೈ ನುಳಿಯಾಲು ಬೊಕ್ಕ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

Clothes made of sack is trending in Mangalore!! ಕುಡ್ಲಗ್ ಬತ್ತ್ಂಡ್ ಗೋಣಿದ ತುತ್ತೈತ!

ಕುಡ್ಲ: ಗೋಣಿ ಚೀಲಡ್ ತಯಾರ್ ಮಲ್ತಿನ ಡ್ರೆಸ್ ಇತ್ತೆ ಕುಡ್ಲ ಪೇಂಟೆದ ಕಂಕನಾಡಿದ ಶಾಲಿಮಾರ್ ಕಾಂಪ್ಲೆಕ್ಸ್ ಡ್ ಇಪ್ಪುನ ಮೈ ಚಾಯಿಸ್ (My Choice) ಡ್ರೆಸ್ಸ್ ದ ಅಂಗಡಿಡ್ ಉಂಡು.

ನಟಿ ಉರ್ಫಿ ಜಾವೇದ್ ಗೋಣಿ ಚೀಲ ಗಲಸ್ ದ್ ಡ್ರೆಸ್ ಮಲ್ತ್ ದ್ ಪಾಡಿನ ವೀಡಿಯೋ ವೈರಲ್ ಆಯಿನ ಬೊಕ್ಕ ಗೋಣಿ ಚೀಲದ ಡ್ರೆಸ್ ಮಸ್ತ್ ಫೇಮಸ್ ಆಂಡ್. ಸುಮಾರ್ ವಿನ್ಯಾಸಕಾರೆರ್ ನೆನ್ ಪ್ರೇರಣೆಯಾದ್ ದೆತೊಂದು ಗೋಣಿ ಚೀಲಡ್ ಪ್ಯಾಂಟ್, ಅಂಗಿ ಇಂಚ ಬೇತೆ ಬೇತೆ ಡ್ರೆಸ್ ತಯಾರ್ ಮಲ್ತ್ ದ್ ಮಾರ್ಕೆಟ್ ಗ್ ಬುಡಿಯೆರ್. ಇತ್ತೆ ಕುಡ್ಲದ ಮೈ ಚಾಯಿಸ್ ಡ್ರೆಸ್ಸ್ ದ ಅಂಗಡಿಡ್ ಈ ಗೋಣಿ ಚೀಲದ ಅಂಗಿ ವಿಂಡೋ ಪ್ರದರ್ಶನಗ್ ದೀತೆರ್. ನೆತ್ತ ಬಿಲೆ 4,899/- ರೂ. ಪಂದ್ ಅಂಗಡಿ ಮಾಲಿಕೆರ್ ತೆರಿಪಾದೆರ್.

Radio Manipal to air Puranamrutha – Pauranika Patra Jeevana Sutra series ರೇಡಿಯೊ ಮಣಿಪಾಲ್ ಡ್ ಪುರಾಣಾಮೃತ- ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಪುರಾಣಾಮೃತ- ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್ ದ 89ನೇ ಸಂಚಿಕೆ ಎ.1 (ಇನಿ) ಸನಿಯಾರ ಬಯ್ಯಗ್ 4.15ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಉಪನ್ಯಾಸಕೆರ್ ಮುಂಡಾಜೆ ಕುಮಾರೇಶ್ವರ ಭಟ್ ಪಾಲ್ ಪಡೆಯೆರೆ ಉಲ್ಲೆರ್. ಎ.2 ಮಧ್ಯಾಹ್ನ 12.15ಕ್ಕ್ ಕುಡೊರ ಪ್ರಸಾರ ಆಪುಂಡು.

Rains and thunderstorms likely in the state in the next three days ರಾಜ್ಯಡ್ ಇನಿರ್ದ್ 3 ದಿನ ತೆಡಿಲ್ ಬರ್ಸ ಬರ್ಪಿನ ಅಂದಾಜಿ

ಬೆಂಗ್ಲೂರ್: ರಾಜಬೂಡು ಬೆಂಗ್ಲೂರ್ ಸೇರಿನಂಚನೆ ರಾಜ್ಯದ ಬೇತೆ ಬೇತೆ ಭಾಗಲೆಡ್ ಇನಿರ್ದ್ ಮೂಜಿ ದಿನ ಮುಟ್ಟ ತೆಡಿಲ್ ಬರ್ಸ ಬರ್ಪುನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.

ಬೆಂಗ್ಲೂರ್, ಮಂಡ್ಯ, ರಾಮನಗರ, ಮೈಸೂರ್, ಚಾಮರಾಜನಗರ, ಕೋಲಾರ, ಚಿಕ್ಕಬಳ್ಳಾಪುರ, ಕೊಡಗು ಬೊಕ್ಕ ತುಮಕೂರು ಭಾಗಡ್ ಇನಿರ್ದ್ (ಏ.1) ಸೋಮಾರ ಮುಟ್ಟ (ಏ.3) ತೆಡಿಲ್ ಬರ್ಸ ಬರ್ಪುನ ಅಂದಾಜಿ ಪಂದ್ ಪೊಲಬು ತಿಕ್ ದ್ಂಡ್.