ಈ ವರ್ಷ ಶ್ರೀಲಂಕಾ ಆತಿಥ್ಯಡ್ ನಡಪರೆ ಇಪ್ಪುನ ಮಹಿಳಾ ಏಷ್ಯಾ ಕಪ್ ಟಿ20 ಟೂರ್ನಿದ ವೇಳಾಪಟ್ಟಿ ಬುಡುಗಡೆ ಆತ್ಂಡ್.
ಜು.18-28 ಮುಟ್ಟ ಈ ಮ್ಯಾಚ್ ನಡಪರೆ ಉಂಡು. ಈ ಸರ್ತಿ 8 ಟೀಮ್ ಪಾಲ್ ಪಡೆಯೆರೆ ಉಂಡು. ಗ್ರೂಪ್-ಎ ಭಾರತ, ಪಾಕಿಸ್ತಾನ, ಯುಎಇ, ನೇಪಾಳ ಬೊಕ್ಕ ಗ್ರೂಪ್-ಬಿ ಶ್ರೀಲಂಕಾ, ಬಾಂಗ್ಲಾದೇಶ, ಮಲೇಷ್ಯಾ ಬೊಕ್ಕ ಥೈಲ್ಯಾಂಡ್ ಸ್ಥಾನ ಪಡೆತ್ಂಡ್.
ಭಾರತ ಜು.19 ಕ್ಕ್ ಯುಎಇ ದ ಎದುರು, ಜು.21 ಕ್ಕ್ ಪಾಕಿಸ್ತಾನ ಬೊಕ್ಕ ಜು.23 ಕ್ಕ್ ನೇಪಾಳದ ಎದುರು ಪಂತೊಡು ಗೊಬ್ಬೆರೆ ಉಂಡು.
ಬೊಂಬೈ ಬಿಲ್ಲವರ ಎಸೋಸಿಯೇಶನ್ ದ ಮುತಾಲಿಕೆಡ್ ಶ್ರೀ ಗುರುನಾರಾಯಣ ಸಾಹಿತ್ಯ ಪ್ರಶಸ್ತಿ ಬೊಕ್ಕ ಯಕ್ಷಗಾನ ಕಲಾ ಪ್ರಶಸ್ತಿ ಕೊರ್ಪುನ ಲೇಸ್ ಮಾ.29 ಸುಕ್ರಾರ (ಇನಿ) ಬಯ್ಯಗ್ ಬಿಲ್ಲವರ ಭವನದ ಶ್ರೀ ನಾರಾಯಣ ಗುರು ಸಭಾಗೃಹಡ್ ನಡಪರೆ ಉಂಡು.
ಈ ಪ್ರಶಸ್ತಿನ್ ದಿ. ಜಯ ಸಿ. ಸುವರ್ಣೆರೆನ ಅಮ್ಮ ದಿ. ಅಚ್ಚು ಸಿ ಸುವರ್ಣ ಮೆರೆನ ನೆಂಪುಗಾದ್ ಕೊರೊಂದು ಉಲ್ಲೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಿಲ್ಲವರ ಎಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಜಿ. ಅಮೀನ್ ಒಯಿಸೊನ್ವೆರ್. ಪುಗರ್ತೆದ ಸಾಹಿತಿ ಶ್ಯಾಮಲಾ ಮಾಧವ್ ಬೊಕ್ಕ ಪುಗರ್ತೆದ ಪ್ರಸಂಗಕಾರೆ ಕೊಲ್ಯಾರು ರಾಜು ಶೆಟ್ಟಿ ಮೊಕುಲು ಪ್ರಶಸ್ತಿಗ್ ಆಯ್ಕೆ ಆತೆರ್.
ಅಂತಾರಾಷ್ಟ್ರೀಯ ವಾಸ್ತು ತಜ್ಞೆರ್ ಅಶೋಕ್ ಪುರೋಹಿತ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪುಗರ್ತೆದ ಸಾಹಿತಿ ಮಿತ್ರಾ ವೆಂಕಟ್ರಾಜ್ ಮಾನಾದಿಗೆದ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.
ಉದ್ಯಮಿ ವಿನಯ ಎಂ.ಕುಕ್ಯಾನ್ ಬೊಕ್ಕ ಬೊಂಬೈ ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಪ್ರಶಸ್ತಿ ಪ್ರಾಯೋಜಕೆರಾತೆರ್.
ಅಂಚೆನೆ ಗುರುನಾರಾಯಣ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಕೃಷ್ಣಾರ್ಜುನ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂದ್ ಗೌರವ ಪ್ರಧಾನ ಕಾರ್ಯದರ್ಶಿ ಹರೀಶ್ ಜಿ ಸಾಲ್ಯಾನ್, ಗೌರವ ಪ್ರಧಾನ ಕೋಶಾಧಿಕಾರಿ ರಾಜೇಶ್ ಜೆ ಬಂಗೇರ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಕುಂತಲಾ ಕೆ. ಕೋಟ್ಯಾನ್ ಬೊಕ್ಕ ಅಕ್ಷಯ ಸಂಪಾದಕ ಮಂಡಳಿ, ಸಾಂಸ್ಕೃತಿಕ ಉಪಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಎಪ್ರಿಲ್ ತಿಂಗೊಲ್ಡ್ ಒಟ್ಟು 14 ದಿನ ಬ್ಯಾಂಕ್ ಬಂದ್ ಇಪ್ಪುಂಡು. ಆಂಡ ಕರ್ನಾಟಕಡ್ ಎಪ್ರಿಲ್ ತಿಂಗೊಲ್ಡ್ 9 ರಜೆ ದಿನ ಉಂಡು.
ಬ್ಯಾಂಕ್ ಲು ರಜೆ ಇತ್ತ್ಂಡಲ ಸುಮಾರ್ ಬ್ಯಾಂಕಿಂಗ್ ಸೇವೆ ಆನ್ ಲೈನ್ ಡ್ ಉಂಡು. ಅಂಚಾದ್ ಎಚ್ಚದ ಬ್ಯಾಂಕ್ ಬಳಕೆದಾರೆರೆಗ್ ರಜೆರ್ದ್ ತೊಂದರೆ ಇಪ್ಪುಜಿ.
ಮುಲ್ಕಿ: ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿದ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಕಾರ್ಯಕರ್ತೆರೆನ ಸಮಾವೇಶ ಹಳೆಯಂಗಡಿ ಓಂ ಸಂಕೀರ್ಣದ ಸಭಾಭವನಡ್ ನಡತ್ಂಡ್.
ಸಭೆಟ್ಟ್ ಮಾಜಿ ಸಚಿವೆರ್ ರಮಾನಾಥ ರೈ ಪಾತೆರ್ದ್, ರಾಜ್ಯದ ಪುಗರ್ತೆದ ಮುಖ್ಯಮಂತ್ರಿಲಾಯಿನ ಸಿದ್ದರಾಮಯ್ಯ ಮುತಾಲಿಕೆದ ಕಾಂಗ್ರೆಸ್ ರ್ದ್ ಗ್ಯಾರಂಟಿಲೆನೊಟ್ಟಿಗೆ ಸುಮಾರ್ ಪುಗರ್ತೆದ ಯೋಜನೆಲು ಜಾರಿಗ್ ಬೈದ್ಂಡ್, ಜನಕ್ಲೆನ ಬದ್ ಕ್ ಸುಧಾರ್ ದ್ಂಡ್. ಬಿಜೆಪಿದಕುಲು ಬಜೀ ಅಪಪ್ರಚಾರದ ಮುಕೇನ ತನ್ನ ಬೇಳೆನ್ ಬೆಯಿಪಾವರೆ ಕುತಂತ್ರ ನಡಪಾವೊಂದು ಉಲ್ಲೆರ್. ಜನಕ್ಲೆಗ್ ಕಾಂಗ್ರೆಸ್ ಸರಕಾರದ ಸಾಧನೆಲೆನ ಬಗೆಟ್ಟ್ ಪೊಲಬು ಕೊರ್ದು ನನದ ಲೋಕಸಭೆ ವೋಟುಡು ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಪದ್ಮರಾಜ ಮೆರೆಗ್ ಗೆಂದಾಯೆರೆ ಕಾರ್ಯಕರ್ತೆರ್ ಸಹಕಾರ ಮಲ್ಪೊಡು ಪಂದ್ ಪಂಡೆರ್.
ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಪದ್ಮರಾಜ್ ಪಾತೆರ್ದ್, ಕರಿನ ಸುಮಾರ್ ವರ್ಷೊದಿಂಚ ಬಿಜೆಪಿ ಆಡಳಿತರ್ದ್ ಜಿಲ್ಲೆದ ಅಭಿವೃದ್ಧಿ ಕಮ್ಮಿ ಆತ್ಂಡ್. ಜನಕ್ಲೆಡ ಕೋಮು ಸಾಮರಸ್ಯ ಭಾವನೆ ಕಡಿಮೆ ಆವೊಂದು ಉಂಡು. ಕಾಂಗ್ರೆಸ್ ಪಕ್ಷ ಅಧಿಕಾರಗ್ ಬತ್ತ್ಂಡ ಜಿಲ್ಲೆಡ್ ಉದ್ಯೋಗ ಸೃಷ್ಟಿದೊಟ್ಟಿಗೆ ಬೀಚ್ ಅಭಿವೃದ್ಧಿಗ್ ಪ್ರಾಧಾನ್ಯತೆ ಕೊರ್ಪ ಪಂದ್ ಪಂಡ್ ದ್ ಈ ಸರ್ತಿ ಕಾಂಗ್ರೆಸ್ ಪಕ್ಷನ್ ಬಹುಮತರ್ದ್ ಗೆಂದಾಯೆರೆ ಕಾರ್ಯಕರ್ತೆರ್ ಬೆನೊಡು ಪಂದ್ ಪಂಡೆರ್.
ಚಾವಡಿಡ್ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಬೆದ್ರ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ವೀಕ್ಷಕೆರ್ ವಸಂತ್ ಬರ್ನಾಡ್, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಪ್ರಧಾನ ಕಾರ್ಯದರ್ಶಿ ಮಂಜುನಾಥ ಕಂಬಾರ, ಕಾಂಗ್ರೆಸ್ ನಾಯಕೆರ್ ಗುರುರಾಜ್ ಎಸ್ ಪೂಜಾರಿ, ಅಶೋಕ್ ಪೂಜಾರ, ಶಾಹುಲ್ ಹಮೀದ್ ಬಜ್ಪೆ, ಪ್ರಮೋದ್ ಕುಮಾರ್, ಸುರೇಶ್, ಹಸನಬ್ಬ, ಆಲ್ವಿನ್ ಪಾಲ್ ಪಡೆದಿತ್ತೆರ್.
Do something every day to move toward your goal
Get going and keep going, Just do it.
ಕುಂಪಲ: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ ಮಾ.24-31 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.
ಕಿನ್ನಿಗೋಳಿ: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನದ ವರ್ಷದ ಜಾತ್ರೆ ಮಾ.28-31 ಮುಟ್ಟ ನಡಪರೆ ಉಂಡು.
ಮಾ.28 ಕ್ಕ್ ಬೊಲ್ಪುಗು ಅರಸು ಕುಂಜಿರಾಯೆರ್ನ ಭಂಡಾರ ಬರಿಯೆರೆ, ಶ್ರೀ ಅರಸು ಕುಂಜಿರಾಯೆರೆಗ್ ನವಕ ಪ್ರಧಾನ ಕಲಶಾಭಿಷೇಕ, ಕೊಡಿ ಏರ್ಂಡ್, ಬಯ್ಯಗ್ ದೇಲಂತಬೆಟ್ಟು ಗ್ರಾಮದ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವೊದ ಭಂಡಾರ ಬತ್ತ್ಂಡ್, ಕಿಲೆಂಜೂರು ಶ್ರೀ ಸರಳ ಧೂಮಾವತಿ ದೈವೊದ ಭಂಡಾರ ಬತ್ತ್ ದ್, ಮೂಡ್ರಗುತ್ತು ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊಲೆನ ಭಂಡಾರ ಬತ್ತ್ ದ್, ಕೊಯಿಕುಡೆ ಶ್ರೀ ಜಾರಂದಾಯ ದೈವೊದ ಬಂಟ ದೈವೊದ ಭಂಡಾರ ಬತ್ತ್ ದ್, ರಾತ್ರೆ ಶ್ರೀ ಅರಸು ಕುಂಜಿರಾಯನ ನೇಮ ನಡಪರೆ ಉಂಡು.
ಮಾ.29 ಕ್ಕ್ ಬೊಲ್ಪುಗು ಶ್ರೀ ಉಳ್ಳಾಯ ದೈವೊದ ನೇಮ, ರಾತ್ರೆ ಕೊಡಮಣಿತ್ತಾಯ ದೈವೊದ ನೇಮ, ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊದ ನೇಮ ನಡಪರೆ ಉಂಡು.
ಮಾ.30 ಕ್ಕ್ ಬಯ್ಯಗ್ ಕುಸಾಲ್ದ ಕಲಾವಿದೆರ್ ಸುರಗಿರಿ ಮೊಕ್ಲೆರ್ದ್ ತುಳು ನಾಟಕ “ಕಥೆ ಏರ್ ಬರೆಪೆರ್,” ರಾತ್ರೆ ಶ್ರೀ ಜಾರಂದಾಯ ಬಂಟ ದೈವೊದ ನೇಮ, ಅತ್ತೂರು ಮಾಗಣೆ ಶ್ರೀ ಕೊರ್ದಬ್ಬು ಶ್ರೀ ಬಂಟ ದೈವೊಲೆನ ಭಂಡಾರ ಬರಿಯೆರೆ, ಶ್ರೀ ಜಾರಂದಾಯ ಬಂಟ ದೈವೊಲೆನ ಬಂಡಿ ಉಚ್ಚಯ ಬೊಕ್ಕ ಸೂಟೆದಾರ ಸೇವೆ, ಜಾರಂದಾಯ- ಬಂಟ ಬೊಕ್ಕ ಕೋರ್ದಬ್ಬು ಶ್ರೀ ಧೂಮಾವತಿ ದೈವೊಲೆನ ಭೇಟಿ, ರಾತ್ರೆ ಶ್ರೀ ಸರಳ ಧೂಮಾವತಿ ಬಂಟ ದೈವೊದ ನೇಮ ನಡಪರೆ ಉಂಡು.
ಮಾ.31 ಕ್ಕ್ ಬೊಲ್ಪುಗು ಕೊಡಿ ಜಾವೆರೆ ಬೊಕ್ಕ ಶ್ರೀ ದೈವೊಲೆನ ಭಂಡಾರ ಪೋಯೆರೆ ಉಂಡು. ಅಂಚೆನೆ ಈ ಉಚ್ಚಯದ ಪೊರ್ತುಡು ಪ್ರತೀ ದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೈವಸ್ಥಾನದ ಪ್ರಕಟನೆ ತೆರಿಪಾದ್ಂಡ್.
ವಿಟ್ಲ: ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪುನ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಸ್ಥಾನದ ಧರ್ಮದರ್ಶಿಲು ಶ್ರೀ ಶ್ರೀಕೃಷ್ಣ ಗುರೂಜಿ ಮೇರ್ ಬುಡುಗಡೆ ಮಲ್ತ್ ದ್ ಆಶೀರ್ವಾದ ಕೊರಿಯೆರ್.
ಈ ಲೇಸ್ ಡ್ ಸಾಹಿತ್ಯ ಬೊಕ್ಕ ಗಾಯನ ಮಲ್ತಿನ ಶ್ವೇತಾ ಪ್ರವೀಣ್ ಆಚಾರ್ಯ ಮೆರೆಗ್ ಮಾನಾದಿಗೆ ನಡತ್ಂಡ್.
ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರು, ದೇವಿಪ್ರಸಾದ್ ಕುಕ್ಕಾಜೆ, ಸತ್ಯಪ್ರಸಾದ್ ಕುಕ್ಕಾಜೆ, ಅಶ್ವಿನ್ ಕುಕ್ಕಾಜೆ ಪಾಲ್ ಪಡೆದಿತ್ತೆರ್.
ಈ ಪದ್ಯಗ್ ಶ್ವೇತಾ ಪ್ರವೀಣ್ ಆಚಾರ್ಯ ಬೆದ್ರ ಗಾಯನ ಬೊಕ್ಕ ಸಾಹಿತ್ಯ ಮಲ್ದೆರ್. ಪ್ರಚಾರ ಕಲೆ ಬೊಕ್ಕ ಸಂಕಲನ ಜಿತೇಶ್ ಸರಪಾಡಿದ ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ ಆತ್ಂಡ್. ಈ ಪದ್ಯನ್ ದಯಾ ಕ್ರಿಯೇಷನ್ you tube channel ಡ್ ತೂವೊಲಿ.
ಸುಬ್ರಹ್ಮಣ್ಯ: ಸಮಾಜ ಸೇವೆನೇ ಜನಕ್ಲೆನ ಸೇವೆ ಪನ್ಪುನ ಉದಾರ ಮನೋಭಾವರ್ದ್ ನಿಟ್ಟೆ ಜಸ್ಟಿಸ್ ಕೆ ಎಸ್ ಸದಾನಂದ ಹೆಗಡೆರ್ ಸುಮಾರ್ ದುಂಬೇ ಮುಲ್ಪ ಗ್ರಾಮೀಣ ಬಡಪತ್ತ್ ದ ಜನಕ್ಲೆಗ್ ದೂರಗ್ ಪೋಪುನ ಬದಲ್ ಕೈತಲ್ ಡ್ ಮಾತ ವೈದ್ಯಕೀಯ ಸೇವೆಲು ತಿಕುಲೆಕ್ಕ ಆವೊಡು ಪನ್ಪುನ ಉದ್ದೇಶರ್ದ್ ಮುಲ್ಪ ಸದಾನಂದ ಆಸ್ಪತ್ರೆನ್ ಸುರು ಮಲ್ದೆರ್. ದುಂಬುದ ಕಾಲಡ್ ವೈದ್ಯಕೀಯ ಕರ್ಚಿಲು ರೋಗಿಲೆಗ್ ದಿಂಜ ಇತ್ತಿನೆನ್ ತೆರಿನ ಹೆಗಡೆರ್ ಬಡಪತ್ತ್ ದ ರೋಗಿಲೆಗ್ ಕಡಿಮೆ ಕಿರಯಡ್ ಬೊಕ್ಕ ಕೆಲವು ಪೊರ್ತುಡು ಧರ್ಮಾರ್ಥವಾದ್ ಸೇವೆನ್ ಕೊರ್ಪುನ ಮುಕೇನ ಸೇವಾ ತೃಪ್ತಿನ್ ಸುರು ಮಲ್ದೆರ್. ಮುಲ್ಪ ಪೂರ್ಣಕಾಲಿಕ ವೈದ್ಯೆರ್, ದಂತ ವೈದ್ಯೆರ್, ಬೊಕ್ಕ ತರಬೇತಿ ವೈದ್ಯೆರ್ ಲು ದಿನತ್ತ ಮಾತ ಪೊರ್ತುಡು ಸೇವೆನ್ ಒದಗಾವೊಂದು ಬೈದೆರ್. ಮುಲ್ಪದ ಸೇವೆನ್ ಫಲಾನುಭವಿಲು ಉಪಯೋಗಿಸಾವೊಡು ಪಂದ್ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿಲು ಪಂಡೆರ್.
ಮೇರ್ ಐತಾರ ಸುಬ್ರಹ್ಮಣ್ಯದ ಸದಾನಂದ ಆಸ್ಪತ್ರೆಡ್ ಜಸ್ಟಿಸ್ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆ ದೇರಳಕಟ್ಟೆ, ಸದಾನಂದ ವೈದ್ಯಕೀಯ ಬೊಕ್ಕ ದಂತ ಚಿಕಿತ್ಸಾ ಕೇಂದ್ರ ಸುಬ್ರಹ್ಮಣ್ಯ, ಬೊಕ್ಕ ರೋಟರಿ ಕ್ಲಬ್, ಲಯನ್ಸ್ ಕ್ಲಬ್, ಇನ್ನರ್ ವೇರ್ ಕ್ಲಬ್, ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಒಟ್ಟುಸೇರಿಗೆಡ್ ನಡತಿನ ಧರ್ಮಾರ್ಥ ಆರೋಗ್ಯ ತಪಾಸಣಾ ಶಿಬಿರನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬತ್ತಿನ ನೆಟ್ಟೆ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆದ ಮುಖ್ಯಸ್ಥೆರ್ ಸತೀಶ್ ಭಂಡಾರಿ ಪಾತೆರ್ದ್, ನಮಡ 23 ಗ್ರಾಮೀಣ ಆಸ್ಪತ್ರೆಲು ಉಂಡು. ಆಯಿಟ್ಟ್ ಸುಬ್ರಹ್ಮಣ್ಯ ಸದಾನಂದ ಆಸ್ಪತ್ರೆಗ್ ನಮ ಎಚ್ಚದ ಮಹತ್ವನ್ ಕೊರೊಂದು ಉಲ್ಲ, ಅತ್ತಂದೆ ಇಡೆಗ್ ಬೋಡಾಯಿನ ಸೌಲಭ್ಯನ್ ಲ ಹಂತ ಹಂತವಾದ್ ಕೊರೊಂದು ಉಲ್ಲ. ಶ್ರೀ ಸುಬ್ರಹ್ಮಣ್ಯ ಮಠ ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಸಹಾಕಾರರ್ದ್ ನನಾತ್ ಈ ಆಸ್ಪತ್ರೆನ್ ಅಭಿವೃದ್ಧಿ ಮಲ್ಪೆರೆ ಉಂಡು ಪಂದ್ ಪಂಡೆರ್.
ಚಾವಡಿಡ್ ಸದಾನಂದ ಆಸ್ಪತ್ರೆ ಆಡಳಿತ ಅಧಿಕಾರಿ ಮೇಜರ್ ರಾಘವೇಂದ್ರ, ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಳಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ಪ್ರಶಾಂತ್ ಕೋಡಿಬೈಲು, ಇನ್ನರ್ ವೇಲ್ ಕ್ಲಬ್ ಪ್ರಭಾರ ಅಧ್ಯಕ್ಷೆರ್ ಶ್ರುತಿ, ಡಾ|ರವಿ ಕಕ್ಕೆ ಪದವು, ನಿವೃತ್ತ ಪ್ರಾಂಶುಪಾಲೆರ್ ಎಸ್ಎನ್ ಭಟ್, ಸುಬ್ರಹ್ಮಣ್ಯದ ಉದ್ಯಮಿ ಹರೀಶ್ ಕಾಮತ್, ಸದಾನಂದ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ. ಭಾನುಮತಿ ಪಾಲ್ ಪಡೆದಿತ್ತೆರ್.
ಲಯನ್ಸ್ ಕ್ಲಬ್ ದ ವಿಮಲಾ ರಂಗಯ್ಯ ಎದ್ಕೊಂದು ಲೇಸ್ ನ್ ಸುಧಾರಿಕೆ ಮಲ್ತೆರ್. ಲಯನ್ ರಾಮಚಂದ್ರಪ್ಪಳಂಗಾಯ ಸೊಲ್ಮೆ ಸಂದಾದೆರ್. ಶಿಬಿರಡ್ ಕಣ್ಣ್ ದ ಪರೀಕ್ಷೆ, ಚರ್ಮ ರೋಗದ ಪರೀಕ್ಷೆಲು, ಕಣ್ಣ್ ಕೆಬಿ ಮೂಂಕುದ ಪರೀಕ್ಷೆಲು, ಕೂಲಿದ ಪರೀಕ್ಷೆ, ಇಂಚ ಬೇತೆ ಬೇತೆ ಪರೀಕ್ಷೆಲೆನ್ ನಿಟ್ಟೆ ಆಸ್ಪತ್ರೆದ ವೈದ್ಯೆರೆನ ಕೂಟಲು ನಡಪಾದ್ ಕೊರಿಯೆರ್.
ಸುಬ್ರಹ್ಮಣ್ಯ: ಬ್ಯಾಂಕ್ ಆಫ್ ಬರೋಡಾ ಸುಬ್ರಹ್ಮಣ್ಯ ಶಾಖೆ ಸ್ಥಳಾಂತರ ಆದ್ ಪೊಸ ಕಟ್ವಾನ ಅಕ್ಷರ ವಸತಿ ಗ್ರಹದ ತೀರ್ತ್ ದ ಮಾಳಿಗೆಡ್ ಸೋಮಾರ ಸುರು ಆತ್ಂಡ್.
ಈ ಶಾಖೆನ್ ಬ್ಯಾಂಕ್ ಆಫ್ ಬರೋಡಾ ಮಂಗಳೂರು ವಲಯದ ಜನರಲ್ ಮ್ಯಾನೇಜರ್ ಗಾಯತ್ರಿ ಆರ್ ಮೇರ್ ಟೇಪ್ ಕಟ್ಟ್ ಮಲ್ತ್ ದ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ಸುಬ್ರಹ್ಮಣ್ಯದಂಚಿನ ಗ್ರಾಮೀಣ ಪ್ರದೇಶಡ್ ನಮ್ಮ ಶಾಖೆಗ್ ಎಡ್ಡೆ ಸ್ಪಂದನೆ ತಿಕ್ ದ್ಂಡ್. ಮುಲ್ಪದ ಗ್ರಾಹಕೆರೆನ ಬೇಡಿಕೆಗನುಗುಣವಾದ್ ಬೊಕ್ಕ ಅಕ್ಲೆನ ಅನುಕೂಲಗಾದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದಕುಲು ನಮಕ್ ಎಡ್ಡೆ ಜಾಗೆನ್ ಕೊರ್ತೆರ್. ಮುಲ್ಪದ ಶಾಖೆಗ್ ಮಾತ ಗ್ರಾಹಕೆರ್ ಬೊಕ್ಕ ದೇವಸ್ಥಾನದ ನೌಕರೆರ್ ಬೊಕ್ಕ ಇಸೇಸವಾದ್ ಅಂಚಿ ಇಂಚಿ ಊರುದ ಕೃಷಿಕೆರ್ ಮಸ್ತ್ ಸ್ಪಂದನೆ ಕೊರ್ತೆರ್. ಮಾತೆರೆನ ಸಹಕಾರದೊಟ್ಟಿಗೆ ಈ ಶಾಖೆ ನನಾತ್ ಅಭಿವೃದ್ಧಿ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಡಾ. ನಿಂಗಯ್ಯ, ಕುಡ್ಲ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಜನಾರ್ದನ, ಪುತ್ತೂರು ಪ್ರಾದೇಶಿಕ ಕಚೇರಿದ ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ ಶೆಟ್ಟಿ, ಉಪ ಪ್ರಾದೇಶಿಕ ವ್ಯವಸ್ಥಾಪಕೆರ್ ಶ್ರೀ ಮೂರ್ತಿ, ಕೈತಲ್ದ ಬ್ಯಾಂಕ್ ಆಫ್ ಬರೋಡ ಶಾಖೆದ ವ್ಯವಸ್ಥಾಪಕೆರ್ ಬೊಕ್ಕ ಗ್ರಾಹಕೆರ್ ಪಾಲ್ ಪಡೆದಿತ್ತೆರ್.
ಸುಬ್ರಹ್ಮಣ್ಯ ಶಾಖೆದ ವ್ಯವಸ್ಥಾಪಕೆರ್ ಕೃಷ್ಣಪ್ರಸಾದ್ ಮೇರ್ ಎದ್ಕೊನಿಯೆರ್. ನೂಜಿ ಬಾಳ್ತಿಲ ಶಾಖೆದ ವ್ಯವಸ್ಥಾಪಕೆರ್ ಶಿವಪ್ರಸಾದ್ ಲೇಸ್ ಸುಧಾರಿಕೆ ಮಲ್ತೆರ್. ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ್ ಶೆಟ್ಟಿ ಸೊಲ್ಮೆ ಸಂದಾಯೆರ್.
