ಕೇಂದ್ರ ಸರ್ಕಾರದ ಸುಮಾರ್ ಸಚಿವಾಲಯಡ್ ಪೊಸತಾದ್ ನೇಮಕ ಆಯಿನ 71 ಸಾರ ನೌಕರೆರೆಗ್ ಪ್ರಧಾನಿ ಮೋದಿ ಇನಿ ನೇಮಕಾತಿ ಪ್ರಮಾಣಪತ್ರ ಕೊರಿಯೆರ್.
ಬೊಕ್ಕ ಪಾತೆರ್ದ್, ನೇರ್ದ್ ಸರ್ಕಾರಿ ಬೇಲೆಗ್ ಅರ್ಜಿ ಸಂದಾಯೆರೆ ಮಾಸ್ತ್ ಭಂಗ ಇತ್ಂಡ್. ಅರ್ಜಿಗಾದ್ ಸಾಲ್ ಡ್ ಉಂತೊಡು ಇತ್ಂಡ್. ಇತ್ತೆ ಇಡೀ ನೇಮಕಾತಿ ಪ್ರಕ್ರಿಯೆ ಆನ್ ಲೈನ್ ಡೇ ನಡಪರೆ ಉಂಡು. ಅತ್ತಂದೆ ಗ್ರೂಪ್ ಸಿ ಬೊಕ್ಕ ಡಿ ಬೇಲೆಗ್ ಸಂದರ್ಶನ ಇಜ್ಜಿ. ನೆತ್ತೊಟ್ಟಿಗೆ ಭ್ರಷ್ಟಾಚಾರನ್ ದೆಪ್ಪುನ ಬೇಲೆ ಮಲ್ದ ಪಂದ್ ಪಂಡೆರ್.
ಅಲಯನ್ಸ್ ಏರ್ ಇಮಾನ ಯಾನ ಕಂಪೆನಿಗ್ ಕೇಂದ್ರ ಸರ್ಕಾರ ಈಕ್ವಿಟಿ ರೂಪಡ್ 300 ಕೋಟಿ ರೂ. ಹೂಡಿಕೆ ಮಲ್ಪೆರೆ ಉಂಡು ಪಂದ್ ಪೆರಿಯ ಅಧಿಕಾರಿಯೊರಿ ಪಂತೆರ್.
ಕಂಪೆನಿಗ್ ಪನವು ಸಮಸ್ಯೆ ಉಪ್ಪುನ ಕಾರಣರ್ದ್ ಹೂಡಿಕೆಗ್ ಹಣಕಾಸು ಸಚಿವಾಲಯ ಒಪ್ಪಿಗೆ ಕೊರ್ತುಂಡು ಪಂದ್ ತೆರಿದ್ ಬೈದ್ಂಡ್. ಅಲಯನ್ಸ್ ಏರ್ ಕಂಪೆನಿ ನೇರ್ದ್ ದುಂಬು ಏರ್ ಇಂಡಿಯಾದ ಭಾಗವಾದಿತ್ತ್ಂಡ್.
ಕಾಂಗ್ರೆಸ್ ಅಧಿಕಾರಗ್ ಬರೊಂದು ಇಪ್ಪುನ ಪೊರ್ತುಡು ನಿಗಮ ಮಂಡಳಿದ ಅಧ್ಯಕ್ಷೆರೆ ತಾನಗ್ ಮೂಜಿ ಜನ ರಾಜೀನಾಮೆ ಕೊರಿಯೆರ್.
ಕರ್ನಾಟಕ ರಾಜ್ಯ ಬ್ರಾಹ್ಮಣ ಅಭಿವೃದ್ಧಿ ಮಂಡಳಿ ಅಧ್ಯಕ್ಷೆರಾದಿತ್ತಿನ ಸಚ್ಚಿದಾನಂದ ಮೂರ್ತಿ, ಕರ್ನಾಟಕ ಮರಾಠ ಸಮುದಾಯದ ಅಭಿವೃದ್ಧಿ ನಿಗಮಗ್ ಎಂ.ಜಿ ಮುಳೆ ಬೊಕ್ಕ ಕರ್ನಾಟಕ ಸವಿತಾ ಸಮಾಜದ ಅಭಿವೃದ್ಧಿ ನಿಗಮಗ್ ಎಸ್. ನರೇಶ್ ಕುಮಾರ್ ರಾಜೀನಾಮೆ ಸಂದಾದೆರ್. ಶಿವಮೊಗ್ಗ ರಂಗಾಯಣ ನಿರ್ದೇಶಕೆರೆ ತಾನಗ್ ಸಂದೇಶ್ ಜವಳಿ ರಾಜೀನಾಮೆ ಕೊರ್ತೆರ್.
ಕುಡ್ಲ: ಬಿಜೆಪಿ ಸರಕಾರದ 4 ವರ್ಷದ ಆಡಳಿತ ತೂಯಿನ ಜನಕುಲು ತನ್ನ ಬೇನೆನ್ ವೋಟುದ ಮುಖೇನ ತೂಪಾಯಿನವು ಕಾಂಗ್ರೆಸ್ ದ ಗೆಲ್ಮೆಗ್ ಕಾರಣ ಆತ್ಂಡ್ ಪಂದ್ ಕುಡ್ಲ ಶಾಸಕೆರ್ ಯು.ಟಿ. ಖಾದರ್ ಪಂಡೆರ್.
5ನೇ ಸರ್ತಿ ಗೆಂದಿನ ಬೊಕ್ಕ ಸುರುತ್ತ ಪತ್ರಿಕಾಗೋಷ್ಠಿಡ್ ಸೋಮಾರ ಪಾತೆರ್ದ್ ಮೇರ್, ಬಿಜೆಪಿದ ಜನವಿರೋಧಿ, ದ್ವೇಷದ ಆಡಳಿತರ್ದ್ ರಾಜ್ಯದ ಜನಕುಲೆಗ್ ಸಾಕಾದ್ ಪೋತ್ಂಡ್. ದ.ಕ. ಬೊಕ್ಕ ಒಡಿಪು ಜಿಲ್ಲೆ ಬುರ್ದು ರಾಜ್ಯದ ಮಾತ ಕಡೆಟ್ಲಾ ಕಾಂಗ್ರೆಸ್ ಗೆಂದ್ ದ್ಂಡ್ ಪಂದ್ ಪಂಡೆರ್.
ಬೊಲ್ತೇರ್: ಹೊಸಂಗಡಿ ಗ್ರಾಮದ ಕುರ್ಲೊಟ್ಟು ಬ್ರಹ್ಮಶ್ರೀ ಸತ್ಯಸಾರಮಾನಿ, ಅಲೇರ ಪಂಜುರ್ಲಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಕುಂಭಾಭಿಷೇಕ ಬೊಕ್ಕ ದೈವೊಲೆನ ನೇಮ ಮೇ22-24 ಮುಟ್ಟ ನಡಪರೆ ಉಂಡು.
ಈ ಲೇಸ್ ಮಾತೆರ್ಲಾ ಬತ್ತ್ ದ್, ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಹರೀಶ್ ಪೂಂಜ, ಗೌರವಾಧ್ಯಕ್ಷೆರ್ ಭಾಗೀರಥಿ ಮುರುಳ್ಯ, ಆಡಳಿತ ಸಮಿತಿದ ಅಧ್ಯಕ್ಷೆರ್ ನಾಗೇಶ್ ಎಸ್ ಅಂಚನ್, ಗೌರವಾಧ್ಯಕ್ಷೆರ್ ಡೀಕಯ್ಯ ಕೊಡಪಟ್ಟ ಪೆರಿಂಜೆ, ಮಹಿಳಾ ಆಡಳಿತ ಸಮಿತಿದ ಅಧ್ಯಕ್ಷೆರ್ ಜಯಶ್ರೀ, ಗೌರವಾಧ್ಯಕ್ಷೆರ್ ಕಮಲ ಡೀಕಯ್ಯ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಪ್ರಧಾನಿ ನರೇಂದ್ರ ಮೋದಿ ಆ ಜಪಾನ್, ಪಪುವಾ ನ್ಯೂಗಿನಿಯಾ ಬೊಕ್ಕ ಆಸ್ಟ್ರೇಲಿಯಾಗ್ ಉಂದುವೇ 19 ರ್ದ್ 24 ಮುಟ್ಟ ಭೇಟಿ ಕೊರಿಯೆರೆ ಉಲ್ಲೆರ್ ಪಂದ್ ಕೇಂದ್ರ ವಿದೇಶಾಂಗ ಸಚಿವಾಲಯ ತೆರಿಪಾದ್ಂಡ್.
ನೆತ್ತ ಅಂಗವಾದ್ ಮೇರ್ ಜಿ7 ಸಭೆ, FIPIC ಮೂಜಿನೇ ಸಮ್ಮೇಳನ ಬೊಕ್ಕ ಕ್ವಾಡ್ ಸಭೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್.
ಕಾರ್ಖಾನೆಡ್ ಪಟಾಕಿ ಪುಡಾದ್ 5 ಜನ ತೀರ್ ಪೋಯಿನ ಘಟನೆ ಪ.ಬಂಗಾಳದ ಪುರ್ಬಾ ಮೇದಿನಿಪುರ ಜಿಲ್ಲೆದ ಇಗ್ರಾಡ್ ನಡತ್ಂಡ್.
ಕಾರ್ಖಾನೆ ನಡಪಾವೊಂದು ಇತ್ತಿನ ಕಟ್ವಾನ ಪುಡಾದ್ ಬೂರ್ದುಂಡು. 7 ಜನ ಕಾರ್ಮಿಕೆರೆಗ್ ಘಟನೆಡ್ ಮಸ್ತ್ ಪೆಟ್ಟಾತ್ಂಡ್. ಪಟಾಕಿಲೆನ್ ಪೂರ ಒಡಿಶಾಗ್ ಕಡಪಾದೆರ್. ಈ ಲೇಸ್ ದ ತನಿಖೆ ಮಲ್ಪೆರೆ ಸಿಎಂ ಮಮತಾ ಬ್ಯಾನರ್ಜಿ ಪಂತೆರ್.
ತೋಕೂರು: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡಪುನ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ನಿಲೆಟ್ಟ್ ಸ್ಥಾಪನೆ ಆಯಿನ ಪೊಸ ಕೊಡಿ ಮರಟ್ಟ್ ಕೊಡಿ ಏರ್ದ್ ಶ್ರೀ ನಾಗ ದೇವೆರ್ನ ಬಿಂಬ ಪ್ರತಿಷ್ಠೆ, ಕಲಶಾಭಿಷೇಕ, ಬೇತೆ ಬೇತೆ ಹೋಮ ಆದ್ ಶ್ರೀ ಕಾಂತೇರಿ ಜುಮಾದಿ ದೈವದ ಬಿಂಬ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ ಬುಧಾರ ಕಾಂಡೆ ನಡತ್ಂಡ್.
ಶ್ರೀ ಮಹಾಗಣಪತಿ ಅಂಚೆನೆ ಶ್ರೀ ದುರ್ಗಾದೇವಿಗ್ ಕಲಶಾಧಿವಾಸ, ಉತ್ಸವ ಬಲಿ, ಮಹಾಪೂಜೆ ಆದ್ ಪ್ರಸಾದ ವಿತರಣೆ ನಡತ್ಂಡ್. ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್, ಕ್ಷೇತ್ರದ ಅರ್ಚಕೆರ್ ಮಧುಸೂಧನ ಆಚಾರ್ಯ ಮೆರೆನ ಸಹಕಾರಡ್ ಧಾರ್ಮಿಕ ವಿಧಿ ವಿಧಾನಲು ನಡತ್ಂಡ್.
ಕಾಂಡೆ ಬೊಕ್ಕ ಮಧ್ಯಾಹ್ನ ಅಂದಾಜಿ 10 ಸಾರ ಭಕ್ತೆರೆಗ್ ಉಪಹಾರ ಬೊಕ್ಕ ಅನ್ನಪ್ರಸಾದನ್ ಬೇತೆ ಬೇತೆ ಸಂಘ ಸಂಸ್ಥೆಲೆನ ಸಹಕಾರೊಡು ಪಟ್ಟಿಯೆರ್. ಅಂಚಿಡ್ ಸ್ಕಂದ ಮಂಟಪಡ್ ಬೇತೆ ಬೇತೆ ಸಂಘ ಸಂಸ್ಥೆಲೆನ ಪ್ರಾಯೋಜಕತ್ವದ ಸಾಂಸ್ಕೃತಿಕ ಕಾರ್ಯಕ್ರಮಕುಲು ನಡತ್ಂಡ್.
ಅವ್ವತ್ತಾಂದೆ ಜಾತ್ರೆದ ಗೌಜಿದ ಈ ಪೊರ್ತುಡು ಜೋಕುಲೆಗ್ ಬೊಕ್ಕ ಭಕ್ತೆರೆಗ್ ಬೇತೆ ಬೇತೆ ನಮುನೆದ ಗೊಬ್ಬುಲೆಡ್ ಪಾಲ್ ಪಡೆವರೆ ಗೊಬ್ಬುದ ಮೈದಾನಗ್ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆರ್ ಚಾಲನೆ ಕೊರಿಯೆರ್.
ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್‌ದಾಸ್, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಸದಸ್ಯೆರಾಯಿನ ವಿಜಯಕುಮಾರ್ ರೈ, ಟಿ.ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ, ವಿಶ್ವನಾಥ್, ಯೋಗೀಶ್ ಆರ್. ಕೋಟ್ಯಾನ್, ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ, ಅನಂತರಾಮ ಶಿಮಂತ್ರಾಯ, ಆರ್.ಎನ್.ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ದೇವಿದಾಸ ಶೆಟ್ಟಿ ಕಿನ್ನಿಗೋಳಿ, ರತ್ನಾಕರ ಶೆಟ್ಟಿಗಾರ್, ಸಂಪತ್ ದೇವಾಡಿಗ, ಧನಂಜಯ ಶೆಟ್ಟಿಗಾರ್, ಸಂತೋಷ್ ಕುಮಾರ್, ದಿನಕರ್ ಸಾಲ್ಯಾನ್, ಹಿಮಕರ್, ನವೀನ್ ಶೆಟ್ಟಿಗಾರ್, ಸಂತೋಷ್ ದೇವಾಡಿಗ, ನಾರಾಯಣ ಸುವರ್ಣ, ಧರ್ಮಾನಂದ ಶೆಟ್ಟಿಗಾರ್, ಗಣೇಶ್ ದೇವಾಡಿಗ, ವರುಣ್ ಅಂಚನ್ ಮೊಕುಲು ಮಾತ ಇತ್ತೆರ್.
ಜೀವನೋಪಾಯಗಾದ್ ದುಬೈಗ್ ಪೋದಿತ್ತಿನ ಭಾರತದ ಜವನಗ್ ಅದೃಷ್ಟ ಒಲಿದ್ಂಡ್. ತೆಲಂಗಾಣದ ಕರೀಂನಗರ ಕೈತಲ್ ದ ಜಗ್ತಿಯಾಲ್ ಮೂಲದ ಅಜಯ್ ಒಕುಲಾ ಪನ್ಪುನಾರೆಗ್ ದುಬೈ ಲಾಟ್ರಿಡ್ 33 ಕೋಟಿ ರೂ. ಇನಾಮು ಬೈದ್ಂಡ್.
ನಾಲ್ ವರ್ಷದ ಪಿರವು ಅಜಯ್ ಬೇಲೆಗ್ ಪಂದ್ ಯುಎಇಗ್ ಪೋದು ಅಲ್ಪ ಬಂಗಾರ್ ದಂಗಡಿಡ್ ಡ್ರೈವರಾದ್ ಬೇಲೆ ಮಲ್ತೊಂದು ಇತ್ತೆರ್. ಮುಲ್ಪ ಮೆರೆಗ್ ದೇಶದ ಬಿಲೆತ್ತ ಪ್ರಕಾರ ತಿಂಗೊಲ್ ಗ್ 3,200 ದಿರ್ಹಮ್ ಆದಾಯ ಇತ್ಂಡ್. ಇಂಚಿಪ್ಪ, ಮೇರ್ 15 ಮಿಲಿಯನ್ ದಿರ್ಹಮ್ ಬಿಲೆತ್ತ ರಡ್ಡ್ ದುಬೈ ಲಾಟರಿ ಇನಾಮುದ ಟಿಕೆಟ್ ನ್ ದೆತ್ತೊಂದೆರ್. ಮೇರ್ ದೆತ್ತೊನ್ನ ಲಾಟರಿ ಟಿಕೆಟ್ ಇನಾಮುಡ್ ಗೆಂದ್ ದೆರ್. ಅತ್ತಂದೆ ಒಂಜೇ ದಿನಟ್ 33 ಕೋಟಿ ರೂ.ದ ಒಡೆಯ ಆತೆರ್.
ಅಂಚೆನೆ ಇನಾಮುದ ಕಾಸ್ ರ್ದ್ ಸುರುಕು ಎನ್ನ ಹಳ್ಳಿಡ್ ಇಲ್ಲ್ ಕಟ್ಟುವೆ. ಬೊಕ್ಕ ಹಳ್ಳಿಡೇ ನಿರ್ಮಾಣ ಕಂಪನಿನ್ ಸ್ಥಾಪನೆ ಮಲ್ಪುವೆ. ಬೊಕ್ಕ ಈ ಕಾಸ್ ದ ಒಂಜಿ ಭಾಗಡ್ ತನ್ನ ಗ್ರಾಮ, ಕೈತಲ್ ದ ಗ್ರಾಮಲೆನ ಅಭಿವೃದ್ಧಿಗ್ ಕೊರ್ಪೆ ಪಂದ್ ಪಂಡೆರ್. ಅಂಚೆನೆ ದುಬೈರ್ದ್ ಪಿದಾಡುನ ದುಂಬು ಎನ್ನ ಕುಟುಂಬನ್ ದುಬೈಗ್ ಲೆತ್ತ್ ದ್ ತಿರ್ಗವೆ ಪಂದ್ ಪಂಡೆರ್.
ಕುಡ್ಲ: ಮೂಜಿ ಸಿಟಿ ಬಸ್ಸ್ ಲು ಗುದ್ದೊಂದು ರಡ್ಡ್ ಜನಕ್ಕ್ ಪೆಟ್ಟಾಯಿನ ಘಟನೆ ಕುಡ್ಲದ ಹಂಪನಕಟ್ಟೆಡ್ ಸೋಮಾರ ಮಧ್ಯಾಹ್ನ ನಡತ್ಂಡ್.
ಸ್ಟೇಟ್‌ಬ್ಯಾಂಕ್‌ ರ್ದ್ ಕುಂಜತ್ತಬೈಲ್ ದಂಚಿ ಪೋವೊಂದು ಇತ್ತಿನ 13 ನಂಬರ್ ದ ಬಸ್ಸೊಂಜಿ ತಲಪಾಡಿದಂಚಿ ಪೋವೊಂದು ಇತ್ತಿನ 42 ನಂಬರ್ ದ ಬಸ್ಸ್ ತ್ತ ಪಿರವುಗ್ ಗುದ್ದುಂಡು.
ಈ ಬಸ್ ಗುದ್ದಿನ ಬಿರ್ಸ್ ಗ್ ತಲಪಾಡಿಗ್ ಪೋವೊಂದು ಇತ್ತಿನ ಬಸ್, ಆಯಿತ್ತ ಎದುರುಡಿತ್ತಿನ ನೀರ್ ಮಾರ್ಗಗ್ ಪೋವೊಂದಿತ್ತಿನ 21 ನಂಬರ್ ದ ಬಸ್ಸ್ ತ್ತ ಪಿರವುಗ್ ಗುದ್ದುದುಂಡು.
ಈ ಘಟನೆಡ್ ಮೂಜಿ ಬಸ್ಸ್ ಲ ನಕ್ಕೆ ಆತ್ಂಡ್. ಅತ್ತಂದೆ ಕುಂಜತ್ತಬೈಲ್ ಬಸ್ಸ್ ತ್ತ ಡ್ರೈವರ್ ಬೊಕ್ಕ ಈ ಬಸ್ಸ್ ಟ್ ಪ್ರಯಾಣ ಮಲ್ತೊಂದು ಇತ್ತಿನ ಪೊಂಜೋವ್ ಗ್ ಪೆಟ್ಟಾತ್ಂಡ್.
