ರಾಜ್ಯಡ್ ಮೇ29 ರ್ದ್ ಪ್ರಾಥಮಿಕ ಶಾಲೆ ಸುರು ಆವೆರೆ ಉಂಡು.
ಇಂಚಾದ್ ಶಾಲೆಡ್ ಖಾಲಿ ಇಪ್ಪುನ 27ಸಾರ ಶಿಕ್ಷಕೆರೆನ ಬೇಲೆಗ್ ತಾತ್ಕಾಲಿಕ ಶಿಕ್ಷಕೆರೆನ್ ನೇಮಕ ಮಲ್ಪೆರೆ ರಾಜ್ಯ ಶೈಕ್ಷಣಿಕ ಇಲಾಖೆ ದುಂಬಾತ್ಂಡ್. ಆದ್ಯತೆದ ಮಿತ್ತ್ ತಾತ್ಕಾಲಿಕ ಶಿಕ್ಷಕೆರೆನ ನೇಮಕಾತಿಗ್ ಜಿಲ್ಲಾ ಉಪನಿರ್ದೇಶಕೆರ್ ತಾಲೂಕುದಲೆಕ್ಕ ಬೇಲೆದ ಕುಡೊರ ಹಂಚಿಕೆ ಮೇ26 (ಇನಿ) ತ್ತ ಉಲಯಿ ಮಲ್ಪೊಡು ಪಂದ್ ಆದೇಶ ಕೊರ್ತುಂಡು. ತಾತ್ಕಾಲಿಕ ಶಿಕ್ಷಕೆರಾದ್ ಆಯ್ಕೆ ಆಯಿನಕ್ಲೆಗ್ ತಿಂಗೊಲ್ ಗ್ 10 ಸಾರ ರೂ. ಸಂಬಳ ತಿಕ್ಕುಂಡು.
ಡೆಲ್ಲಿ: ಉಬರ್ ಕಂಪನಿ ಜೂನ್ ತಿಂಗೊಲ್ ರ್ದ್ ಬೆಂಗ್ಲೂರ್ ಡ್ ಇ.ವಿ. ಕ್ಯಾಬ್ ಸೇವೆನ್ ಸುರು ಮಲ್ಪೆರೆ ಉಂಡು.
ಉಂದು ಸುರು ಆಯಿನ ಬೊಕ್ಕ ಉಬರ್ ಗ್ರಾಹಕೆರ್, ಕ್ಯಾಬ್ ಸೇವೆ ಪಡೆಪುನ ಪೊರ್ತುಡು ಇ.ವಿ. ಕ್ಯಾಬ್ ಬೋಡು ಪಂದ್ ಬೇಡಿಕೆ ಸಂದಾಯೆರೆ ಅವಕಾಶ ಉಂಡು.
ಈ ಸೇವೆ ಬೆಂಗ್ಲೂರ್ ಮಾತ್ರ ಅತ್ತಂದೆ ಬೊಂಬೈ ಬೊಕ್ಕ ಡೆಲ್ಲಿಡ್ ಸುರು ಆಪುಂಡು. ದುಂಬದ ದಿನಟ್ ನೆನ್ ಹಂತ ಹಂತವಾದ್ ಬೇತೆ ಬೇತೆ ಪೇಂಟೆಡ್ ಸುರು ಮಲ್ಪೆರೆ ಉಂಡು ಪಂದ್ ಉಬರ್ ಇಂಡಿಯಾ ಬೊಕ್ಕ ದಕ್ಷಿಣ ಏಷ್ಯಾ ಅಧ್ಯಕ್ಷೆರ್ ಪ್ರಭಜೀತ್ ಸಿಂಗ್ ಪಂತೆರ್.
ಇ.ವಿ.ಡ್ ಚಾರ್ಜಿಂಗ್ ಸೌಲಭ್ಯ ಕೊರಿಯೆರೆ ಜಿಯೊ-ಬಿಪಿ ಬೊಕ್ಕ ಜಿಎಂಆರ್ ಗ್ರೀನ್ ದೊಟ್ಟಿಗೆ ಒಪ್ಪಂದ ಮಲ್ದ್ಂಡ್. ಉಬರ್ ಪಾಲ್ ಗ್ ಪ್ರಮುಖ ಆಯಿನ 7 ಪೇಂಟೆಡ್ ಒಟ್ಟು 25 ಸಾರ ಇ.ವಿ. ಸೇವೆನ್ ಮುಕ್ತ ಮಲ್ಪೆರೆ ಉಂಡು.
ಕುಡ್ಲ: ಫೈಸಲ್‌ ಪೇಂಟೆದ ನೇತ್ರಾವತಿ ತುದೆ ಬರಿಟ್ಟ್ ಕಲ್ವ ತಾದಿಡ್ ಪೊಯ್ಯೆ ದೆತ್ತೊಂದು ಇತ್ತಿನ ಬಗ್ಗೆ ತಿಕಿನ ಪೊಲಬುದ ಮಿತ್ತ್ ಕಂಕನಾಡಿ ನಗರ ಠಾಣೆ ಪೊಲೀಸೆರ್ ಜಾಗೆಗ್ ರೈಡ್ ಮಲ್ತ್ ದ್ 10 ಲೋಡ್‌ ಪೊಯ್ಯೆ, ಒಂಜಿ ಜೆಸಿಬಿನ್ ವಶಕ್ಕ್ ಪಡೆತೆರ್.
ಈ ಘಟನೆ ಕೋಡೆ ರಾತ್ರೆ 3 ಗಂಟೆಗ್ ಕಂಕನಾಡಿ ನಗರ ಪೊಲೀಸ್‌ ಠಾಣೆದ ಪೊಲೀಸ್‌ ಉಪನಿರೀಕ್ಷಕಿ ಜ್ಯೋತಿ ಎನ್‌.ಎ. ಮೇರ್ ರೌಂಡ್ಸ್‌ಡ್ ಇಪ್ಪುನಗ ನಡತ್ಂಡ್.
ವಶಕ್ಕ್ ಪಡೆಯಿನ ಸೊತ್ತುದ ಬಿಲೆ ಸುಮಾರ್ 3.70 ಲಕ್ಷ ರೂ. ಪಂದ್ ಅಂದಾಜ್ ಮಲ್ಪೊಲಿ. ಈ ಬಗೆಟ್ ಕಂಕನಾಡಿ ನಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕುಡ್ಲ: ಉತ್ಥಾನ ಬಳಗ ಸೇವಾ ಟ್ರಸ್ಟ್ (ರಿ) ನೆತ್ತ ಮುತಾಲಿಕೆಡ್ ದಾಸರ ಭಜನೆ (ನಲಿಕೆ) ಪಂತೊ ಮೇ28 ಐತಾರ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ನೆತ್ತ ಉದಿಪನ ಲೇಸ್ ಬೊಲ್ಪುಗು ನಡಪರೆ ಉಂಡು. ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ತುಡರ್ ಅರ್ಲಾವೆರೆ ಉಲ್ಲೆರ್. ಬೊಕ್ಕ ಮಧ್ಯಾಹ್ನ ಅನ್ನಸಂತರ್ಪಣೆ, ಬಯ್ಯಗ್ ಸಮಾರೋಪ ಸಮಾರಂಭ ಲೇಸ್ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ: ಪೊಸತಾದ್ ನಿರ್ಮಾಣ ಆವೆರೆ ಇಪ್ಪುನ ಮಾಣಿಗುತ್ತು ಶ್ರೀ ಉಳ್ಳಾಲ್ತಿ, ಬೆಮ್ಮೆರ್, ಗುಡ್ಡೆಚಾಮುಂಡಿ, ಪಂಜುರ್ಲಿ ಮಲೆಕೊರತಿ ದೈವೊಲೆನ ಧರ್ಮಚಾವಡಿಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ಅರ್ಚಕೆರ್ ಪಳನೀರು ಅನಂತ ಭಟ್ರೆನ ಪೌರೋಹಿತ್ಯಡ್ ವೈದಿಕ ವಿಧಿವಿಧಾನದೊಟ್ಟಿಗೆ ನಡತ್ಂಡ್.
ಪಿರಾಕ್ ದ ಕಾಲರ್ದಿಂಚಲ ಇತಿಹಾಸ ಇಪ್ಪುನ ಒರ್ತಿ ಉಳ್ಲಾಲ್ತಿ ಮೂಜಿ ದೈವೊಲು ಪನ್ಪುನ ಪರಂಪರೆ ಇಪ್ಪುನ ಮಾಣಿ ಗ್ರಾಮಡ್ ಉಳ್ಳಾಲ್ತಿಗ್ ವರ್ಷಾವಧಿ ಒಂಜಿ ಮೆಚ್ಚಿ ಜಾತ್ರೆ ಆಂಡ, ದೈವೊಲೆಗ್ ವರ್ಷಡ್ 7 ಕಡೆಟ್ ನೇಮ ನಡಪುಂಡು. ಗ್ರಾಮದ ಈ ಮತ ಸೇವೆಗ್ ಮಾಣಿಗುತ್ತು ಭಂಡಾರದ ಇಲ್ಲಲ್ ರ್ದ್ ಭಂಡಾರ ಪೋಪುನವು ರೂಢಿ ಆತ್ಂಡ್.
ಪರತ್ ಚಾವಡಿಗ್ ಸುಮಾರ್ ವರ್ಷ ಕರಿದ್ ಅಜೀರ್ಣಾವಸ್ಥೆಡ್ ಇಪ್ಪುನಗ, 20 ವರ್ಷದ ಪಿರವು ಪೊಸ ಚಾವಡಿನ್ ಎಲ್ಯ ಮಲ್ತ್ ದ್ ನಿರ್ಮಾಣ ಮಲ್ತೆರ್. ಆಂಡ ಪ್ರಶ್ನಾಚಿಂತನೆಡ್ ಬೊಕ್ಕ ದೈವೊದ ನುಡಿಟ್ಟ್ ತೂಜಿದ್ ಬತ್ತಿನ ಪ್ರಕಾರ ಚಾವಡಿನ್ ಪೊಸತಾದ್ ದುಂಬುದ ಸಂಪ್ರದಾಯದಂಚೆನೆ ನಿರ್ಮಾಣ ಮಲ್ಪುನ ಉದ್ದೇಶರ್ದ್ ನಿರ್ಮಾಣ ಮಲ್ಪೆರೆ ಗುತ್ತುದಕುಲು ಬೊಕ್ಕ ಗ್ರಾಮಸ್ಥೆರ್ ದುಂಬಾತ್ತೆರ್.
ಈ ಪೊರ್ತುಡು ಶಾಸಕೆರ್ ರಾಜೇಶ್ ನಾಯ್ಕ್, ಮಾಜಿ ಸಚಿವೆರ್ ಬಿ. ರಮಾನಾಥ ರೈ, ವಕೀಲೆರ್ ಅಶ್ವನಿ ಕುಮಾರ್ ರೈ, ಬಾಳ್ತಿಲಬೂಡು ಬೃಜೇಶ್ ಬಂಗ, ಪೂಂಜಲ್ಮಾರಗುತ್ತು ಮೋಹನ ಕುಮಾರ್ ಚೌಟ, ಪೆರಾಜೆಗುತ್ತು ಶ್ರೀಕಾಂತ್ ಆಳ್ವ, ಮಾಣಿಗುತ್ತು ನಾಗೇಶ್ ಶೆಟ್ಟಿ, ಮಾಣಿಗುತ್ತು ಸಚಿನ್ ರೈ, ಸಂತೋಷ್ ಶೆಟ್ಟಿ ಅರೆಬೆಟ್ಟು, ಜಗನ್ನಾಥ ಚೌಟ ಬದಿಗುಡ್ಡೆ, ಮಾಣಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಬಾಲಕೃಷ್ಣ ಆಳ್ವ ಕೊಡಾಜೆ, ಮಧುಸೂಧನ ಭಟ್ ಭರಣೀಕೆರೆ, ರಾಮಚಂದ್ರ ಪೂಜಾರಿ ಪಾದೆ, ವಿಜೇತ್ ಶೆಟ್ಟಿ ಅರೆಬೆಟ್ಟು, ರವೀಂದ್ರ ರೈ ಖಂಡಿಗ, ರವೀಂದ್ರ ರೈ ಮಂಜೊಟ್ಟಿ, ಗಣೇಶ್ ಭಟ್ ಮಕರಂದ, ಸಂದೀಪ್ ಶೆಟ್ಟಿ ಅರಿಯಡ್ಕ, ಗಂಗಾಧರ್ ರೈ ತುಂಗೆರೆಕೊಡಿ, ಅಮಿತ್ ಕುಮಾರ್ ಜೈನ್ ಕನ್ನೋಟ್ಟುಗುತ್ತು ಮೋಹನ್ ಪೈ ಮಾಣಿ ಬೊಕ್ಕ ಗ್ರಾಮಸ್ಥೆರ್ ಇತ್ತೆರ್.
ಕೇಂದ್ರ ಸರ್ಕಾರದ ಬೇತೆ ಬೇತೆ ಇಲಾಖೆಡ್ ಖಾಲಿ ಇಪ್ಪುನ 1600 ರ್ದ್ ಎಚ್ಚ ಬೇಲೆಗ್ ಅರ್ಜಿ ಪಾಡೊಲಿ.
ಕಿರಿಯ ಗುಮಾಸ್ತೆ, ಕಿರಿಯ ಸಹಾಯಕ ಕಾರ್ಯದರ್ಶಿ ಬೊಕ್ಕ ದತ್ತಾಂಶ ನಮೂದಕ ಕಾರ್ಯನಿರ್ವಾಹಕ ಬೇಲೆಗ್ ಭರ್ತಿ ಮಲ್ಪೆರೆ ಸಿಬ್ಬಂದಿ ನೇಮಕಾತಿ ಆಯೋಗದ ವತಿರ್ದ್ ಕಂಬೈನ್ಡ್ ಹೈಯರ್ ಸೆಕೆಂಡರಿ (10+2) ಲೆವೆಲ್ ಪರೀಕ್ಷೆಗಾದ್ ಅರ್ಜಿ ಸಂದಾವೊಲಿ. ನೆಕ್ಕ್ ಅರ್ಜಿ ಪಾಡುನಕುಲು 18-27 ವರ್ಷದೊಲಯಿ ಇಪ್ಪೊಡು. ನೆತ್ತ ವೆಬ್‌ಸೈಟ್ https://ssc.nic.in ಅತ್ತಂಡ www.sskkr.kar.nic.in
ಗಲೆಜ್ ನೀರ್ ಪರ್ದ್ 30 ರ್ದ್ ಎಚ್ಚ ಜನಕ್ಕ್ ಹುಷಾರ್ ಇಜ್ಜಂದೆ ಆಯಿನ ಘಟನೆ ರಾಯಚೂರುದ ರೇಕಲಮರಡಿ ಗ್ರಾಮಡ್ ನಡತ್ಂಡ್.
ಹುಷಾರ್ ಇಜ್ಜಂದೆ ಆಯಿನಕ್ಲೆನ್ ಅರಕೇರಾ, ದೇವದುರ್ಗ ಬೊಕ್ಕ ರಾಯಚೂರುದ ರಿಮ್ಸ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಲ್ಲೆರ್. ಗ್ರಾಮ ಪಂಚಾಯತಿದ ನಿರ್ಲಕ್ಷ್ಯರ್ದ್ ಈ ಘಟನೆ ನಡತ್ ದ್ಂಡ್ ಪಂದ್ ಕೈತಲ್ ದಕುಲು ಬೆಚ್ಚ ಆತೆರ್. ಗ್ರಾಮಡ್ ಆರೋಗ್ಯ ಇಲಾಖೆ ಸಿಬ್ಬಂದಿ ಇತ್ತೆ ಉಲ್ಲೆರ್.
ದುಬೈ: ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್ಸ್ ದ ಸ್ಥಾಪಕೆರ್ ಪ್ರವೀಣ್ ಕುಮಾರ್ ಶೆಟ್ಟಿ ವಕ್ವಾಡಿ ಮೇರ್ ಅರೆನ ಅಪ್ಪೆ ಸರೋಜಿನಿ ಶೆಟ್ಟಿ ಬೊಕ್ಕ ಅಮ್ಮೆರ್ ನಾರಾಯಣ ಶೆಟ್ಟಿ ಮೊಕ್ಲೆನ 57ನೇ ಮದಿಮೆದ ವಾರ್ಷಿಕ ಉಚ್ಚಯದ ಸಂತೋಷದ ಪೊರ್ತುಡು ದುಬೈದ ಅಲ್ ಗೀಸಸ್ ದ ಫಾರ್ಚೂನ್ ಪ್ಲಾಜಾಡ್ ಮೇ22 ಕ್ಕ್ ನೆತ್ತೆರ್ ಉಂಬೊಲಿ (ರಕ್ತ ದಾನ) ಲೇಸ್ ಅಟ್ಟಣೆ ಮಲ್ದಿತ್ತೆರ್.
ಈ ಸರ್ತಿ ಯಶಸ್ವಿ 11ನೇ ವರ್ಷದ ನೆತ್ತೆರ್ ಉಂಬೊಲಿ ಲೇಸ್ ಅಟ್ಟಣೆ ಮಲ್ಪುನ ಮುಖೇನ ಪ್ರವೀಣ್ ಕುಮಾರ್ ಶೆಟ್ಟಿ ಬೊಕ್ಕ ಕುಟುಂಬ ಸದಸ್ಯೆರ್ ಸಮಾಜಗ್ ಮಾದರಿ ಆತೆರ್.
ಈ ಪೊರ್ತುಡು ಪ್ರವೀಣ್ ಕುಮಾರ್ ಶೆಟ್ರ್ ಪಾತೆರ್ದ್, ” ನೆತ್ತೆರ್ ಉಂಬೊಲಿದ ಕಜ್ಜೊಗು ಎಡ್ಡೆ ಪ್ರತಿಕ್ರಿಯೆರ್ದ್ ಬೈದ್ಂಡ್. ನೆತ್ತೆರ್ ದಾನ ಪಂಡ ದಾನಿಲೆಗ್ ಕೆಲವೇ ನಿಮಿಷ. ಆಂಡ ನೆತ್ತೆರ್ದ ಅಗತ್ಯ ಇತ್ತಿನಕ್ಲೆಗ್ ಜೀವಮಾನ. ಇಂಚ ನಮ್ಮ ಸಮಾಜಗ್ ಕೊಡುಗೆ ಕೊರ್ಪಿನೆಟ್ಟ್ ಮಸ್ತ್ ತೃಪ್ತಿ ತಿಕ್ಕುಂಡು.ಅಗತ್ಯ ಇತ್ತಿನಕ್ಲೆಗ್ ನೆತ್ತೆರ್ ದಾನ ಮಲ್ತಿನ ಮಾತ ಸದಸ್ಯೆರ್, ಫಾರ್ಚೂನ್ ಕುಟುಂಬದ ನೆತ್ತೆರ್ ದಾನಿಲು ಬೊಕ್ಕ ಯುಎಇದ ತುಳು-ಕನ್ನಡ ಸಂಘ ಸಂಸ್ಥೆದ ದೋಸ್ತಿಲು ತನ್ನ ಜೀವ ಒರಿಪಾವುನ ನೆತ್ತೆರ್ ಗಾದ್ ನೆತ್ತೆರ್ ದಾನಗಾದ್ ಬತ್ತಿನ ಗಣ್ಯರೆಗ್ ಸೊಲ್ಮೆ ಸಂದಾವೆ ಪಂದ್ ಪಂಡೆರ್.
ನೆತ್ತೆರೆದಾನ ಉಂಬೊಲಿ 2023 DHA – ಸ್ಥಳೀಯ ಆರೋಗ್ಯ ಅಧಿಕಾರಿಲು ಬೊಕ್ಕ ರಕ್ತನಿಧಿತ್ತ ಒಟ್ಟುಸೇರಿಗೆಡ್ ನಡತ್ಂಡ್. ಹೋಟೆಲ್ ಸಿಬ್ಬಂದಿಲು ಬೊಕ್ಕ ಯುಎಇದ ತುಳು- ಕನ್ನಡ ಸಂಘ ಸಂಸ್ಥೆದ ಸದಸ್ಯೆರ್ದ್ ಎಡ್ಡೆ ಸ್ಪಂದನೆಗ್ ಸಾಕ್ಷಿ ಆಂಡ್.
ಮೊಗವೀರ ಸಮಾಜ ಯುಎಇದ ಬಾಲಕೃಷ್ಣ ಸಾಲಿಯಾನ್ ಬೊಕ್ಕ ಫಾರ್ಚೂನ್ ಗ್ರೂಪ್ ದ ಉದ್ಯೋಗಿ ವಸಂತ ಶೆಟ್ಟಿ ನೆತ್ತೆರ್ ದಾನ ಮಲ್ತಿನ ದಾನಿಲೆಗ್ ಕೃತಜ್ಞತೆ ಸಂದಾವುನ ಮುಖೇನ ಅಭಿನಂದನೆ ಸಂದಾಯೆರ್. 150 ರ್ದ್ ಎಚ್ಚ ಜನ ನೆತ್ತೆರ್ ದಾನ ಮಲ್ತೆರ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
Narayan Shetty, Sarojini Shetty couple celebrate their 57 th wedding anniversary –conduct a blood donation camp to commemorate the day
Dubai: Praveen Kumar founder of the Fortune group of hotels celebrated the 57 th wedding anniversary of his parents by organising a blood donation camp on May 22 nd.
This is the 11 th time he has organised such an event and has been a role model to the society.
ಕುಡ್ಲ: ಟೇಕಾಫ್ಗ್ ತಯಾರ್ ಆಯಿನ ಇಮಾನಗ್ ಪಕ್ಕಿ ಗುದ್ದುದು ಆಕ್ಸಿಡೆಂಡ್ ಆಯಿನ ಘಟನೆ ಕುಡ್ಲ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣಡ್ ನಡತ್ಂಡ್.
ಪ್ರಯಾಣಿಕೆರೆನೊಟ್ಟಿಗೆ ಬೊಲ್ಪುಗು 8:30ಕ್ಕ್ ಕುಡ್ಲರ್ದ್ ದುಬೈಗ್ ಪಿದಾಡಿನ ಈ ಇಂಡಿಯೋ ಇಮಾನದ ರೆಕ್ಕೆಗ್ ಪಕ್ಕಿ ಗುದ್ದುಂಡು. ಟ್ಯಾಕ್ಸಿ ವೇ ದಾಟಿ ರನ್ವೇಡ್ ಪೋವೊಂದು ಇತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್. ಅಪಾಯದ ಸೂಚನೆ ತಿಕಿನ ಕೂಡ್ಲೆ ಪೈಲಟ್ ಎಟಿಸಿಗ್ ಪೊಲಬು ಕೊರ್ದು ಟೇಕಾಫ್ ಕ್ಯಾನ್ಸಲ್ ಮಲ್ತ್ ದ್ ರನ್ ವೇರ್ದ್ ಇಮಾನ ವಾಪಸ್ ಬೈದ್ಂಡ್.
ಪ್ರಯಾಣಿಕೆರೆನ್ ಜಪ್ಪದ್ ಇಮಾನದ ತಪಾಸಣೆ ಮಲ್ತೊಂದು ಉಲ್ಲೆರ್. ಬೆಂಗ್ಲೂರ್ ರ್ದ್ ಬತ್ತಿನ ಕುಡೊಂಜಿ ಇಮಾನಡ್ ಪ್ರಯಾಣಿಕೆರೆನ್ ದುಬೈಗ್ ಕಡಪಾವುನ ವ್ಯವಸ್ಥೆ ಮಲ್ದೆರ್. ಈ ಘಟನೆರ್ದ್ ಕುಡ್ಲ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣಡ್ ಕೆಲವು ಪೊರ್ತು ಪೋಡಿಗೆದ ಸ್ಥಿತಿ ನಿರ್ಮಾಣ ಆದಿತ್ತ್ಂಡ್.
ಬೆಂಗ್ಲೂರ್: ರಾಜ್ಯ ಯುವ ಜನತಾದಳ ಅಧ್ಯಕ್ಷೆರೆ ತಾನಗ್ ನಿಖಿಲ್ ಕುಮಾರಸ್ವಾಮಿ ರಾಜೀನಾಮೆ ಕೊರ್ತೆರ್.
ಈ ಸರ್ತಿದ ವೋಟುಡು ಜೆಡಿಎಸ್‌ ಸೋಲು ಅನುಭವಿಸಾಯಿನ ಹಿನ್ನೆಲೆಡ್ ಮೇರ್ ರಾಜೀನಾಮೆ ಪತ್ರನ್ ಸಿಎಂ ಇಬ್ರಾಹಿಂಗ್ ಸಂದಾದೆರ್. ಪೊಸ ನಾಯಕತ್ವಗ್ ಅವಕಾಶ ಮಲ್ತ್ ಕೊರೊಡು ಪಂದ್ ಬಿನ್ನಾಪು ಮಲ್ದೆರ್.
