ಕೊಯಮತ್ತೂರುದ ಡಿಐಜಿ ವಿಜಯಕುಮಾರ್ ಐಪಿಎಸ್ ಮೇರ್ ಪಾಂಥಯ ಸಲೈಡ್ ಇಪ್ಪುನ ತನ್ನ ಕ್ಯಾಂಪ್ ಕಚೇರಿಡ್ ಸುಕ್ರಾರ ಗುಂಡು ಪಾಡ್ದ್ ಆತ್ಮಹತ್ಯೆ ಮಲ್ತೊಂದೆರ್.
2009ತ್ತ ಐಪಿಎಸ್ ಬ್ಯಾಚ್‌ ದಾರಾಯಿನ ಮೇರ್, 2022 ನೇ ಇಸವಿಡ್ ಜನವರಿ 6 ಕ್ಕ್ ಚೆನ್ನೈದ ಅಣ್ಣಾನಗರ ಡೆಪ್ಯುಟಿ ಕಮಿಷನರ್‌ ಬೇಲೆರ್ದ್ ಕೊಯಮತ್ತೂರು ಡಿಐಜಿ ಆಯೆರ್. ಅತ್ತಂದೆ ಕಾಂಚೀಪುರಂ, ಕಡಲೂರು, ನಾಗಪಟ್ಟಿಣಂ ಬೊಕ್ಕ ತಿರುವರೂರ್‌ ಡ್ ಡಿಎಸ್ಪಿಯಾದ್ ಬೇಲೆ ಮಲ್ದೆರ್.
ಆತ್ಮಹತ್ಯೆಗ್ ಕಾರಣ ನನ ಗೊತ್ತಾವೊಡಾತೆ. ತಮಿಳುನಾಡ್ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.
ಬಂಟ್ವಾಳ ತಾಲೂಕ್ ದ ಸಜೀಪಮುನ್ನೂರು ಗ್ರಾಮದ ನಂದಾವರ ಗುಂಪು ಇಲ್ಲ್ ದ ಮಿತ್ತ್ ಗುಡ್ಡೆ ಜರಿದ್ ಬೂರ್ದು ಇಲ್ಲ್ ದೊಲಯಿ ಇತ್ತಿನ ರಡ್ಡ್ ಪೊಂಜೋವ್ ಲೆಡ್ ಒಂಜಿ ಪೊಂಜೋವ್ ತೀರ್ ಪೋಯಿನ ಘಟನೆ ನಡತ್ಂಡ್.
ಕುಡೊರ್ತಿನ್ ಕೈತಲ್ ದಕುಲು ಪೂರ ಸೇರ್ದ್ ಬಚಾವ್ ಮಲ್ದೆರ್. ನಂದಾವರ ನಿವಾಸಿ ಮಹಮ್ಮದ್ ಮೆರೆನ ಬೊಡೆದಿ ಝರೀನಾ (49) ಈ ಘಟನೆಡ್ ತೀರ್ ಪೋಯಿನಾರ್. ಬೊಕ್ಕ ಶಫಾ (20) ಪನ್ಪಿನಾರೆನ್ ಬಚಾವ್ ಮಲ್ದೆರ್.
ಈ ಘಟನೆದ ಜಾಗೆಡ್ ಬಂಟ್ವಾಳ ಅಗ್ನಿಶಾಮಕ ಅಧಿಕಾರಿಲು, ಪೊಲೀಸೆರ್, ತಾಲೂಕ್ ಆಡಳಿತ ಸಿಬ್ಬಂದಿ , ತಹಶೀಲ್ದಾರ್ ಎಸ್.ಬಿ.ಕೂಡಲಗಿ ಇತ್ತೆರ್.
ಯುಪಿಡ್ ಭಾರೀ ಬರ್ಸ ಬರ್ಪಿನೆರ್ದಾವೆರ ತೆಡಿಲ್ ಹಾಕ್ 7 ಜನ ತೀರ್ ಪೋಯೆರ್.
ಈ ಘಟನೆ ಬುದೌನ್, ಇಟಾಹ್ ಬೊಕ್ಕ ರಾಯ್ ಬರೇಲಿಡ್ ನಡತ್ಂಡ್. ನೆಟ್ಟ್ ತೀರ್ ಪೋಯಿನಕ್ಲೆಡ್ 2 ಜೋಕುಲು ಉಲ್ಲೆರ್.
ಈ ಘಟನೆಡ್ ರೈತೆ ಬಬ್ಲು (30), ವರ್ಜೀತ್ ಯಾದವ್ (32), ಕಲ್ಪಾರ್ಥಿ ಅಂಶಿಕಾ (11), ಪೆತ್ತ ಮೇಪಾವೊಂದು ಇತ್ತಿನಾಯೇ ಮೋಹಿತ್ ಪಾಲ್ (14), ಕಂಡಡ್ ಬೇಲೆ ಮಲ್ತೊಂದು ಇತ್ತಿನ ಜಮುನಾ ಪ್ರಸಾದ್ (38), ಬೊಕ್ಕ ರಮಾಕಾಂತಿ (38) ತೀರ್ ಪೋಯಿನಕುಲು.
ಕಿನ್ನಿಗೋಳಿ: ಬೈಕ್ ದ ಮಿತ್ತ್ ಮರತ್ತ ಗೆಲ್ಲ್ ಬೂರ್ದು ಸವಾರೆ ತೀರ್ ಪೋಯಿನ ಘಟನೆ ಕೋಡೆ ರಾತ್ರೆ ಬೆಳ್ಮಣ್ ರಾಜ್ಯ ಮಾರ್ಗಡ್ ನಡತ್ಂಡ್.
ಪ್ರವೀಣ್ ಆಚಾರ್ಯ ಈ ಘಟನೆಡ್ ತೀರ್ ಪೋಯಿನಾರ್. ಮೇರ್ ಜಾಗೆಡೇ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರಾಯಿನ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪಿನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 15ನೇ ಸಂಚಿಕೆ ಜುಲೈ 7 ಕ್ಕ್ ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ನನ ಜು.8 ಕ್ಕ್ ಸನಿಯಾರ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.
ಕಾಂಗ್ರೆಸ್ ಸರ್ಕಾರದ 5 ಗ್ಯಾರಂಟಿಲೆನ ಬಗ್ಗೆ ಮಕ್ಕರ್ ಮಲ್ಪುನ ವಿಪಕ್ಷದ ನಾಯಕೆರ್ ಆಯಿನ್ ಬಿಟ್ಟಿ ಕೊಡುಗೆ ಪಂದ್ ಅಪಮಾನ ಮಲ್ಪೊರ್ಚಿ. ಬದಲಾದ್ ಬಡವೆರೆನ, ಶ್ರಮಿಕೆರೆನ ಶ್ರಮನ್ ತೂದು ಅಕ್ಲೆನ್ ಗೌರವಿಸಾಲೆ ಪಂದ್ ಸಿಎಂ ಸಿದ್ದರಾಮಯ್ಯ ಮೇರ್ ಬಿನ್ನಾಪು ಮಲ್ತೆರ್.
ಪೊಂಜೋವ್ ನಕ್ಲೆಗ್ ಇತ್ತೆ ಫ್ರೀ ಆದ್ ಬಸ್ ಸೇವೆ ಕೊರ್ತುಂಡು. ಗೃಹಜ್ಯೋತಿನ್ ಜುಲೈರ್ದ್, ಗೃಹಲಕ್ಷ್ಮೀ ಯೋಜನೆನ್ ಆಗಸ್ಟ್ ರ್ದ್ ಜಾರಿಗ್ ಕನಪ ಪಂದ್ ಪಂಡೆರ್.
ಕುಡ್ಲ: ಯಕ್ಷಗಾನ ಕಲಾವಿದೆರೆಗ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಯೋಜನೆಲೆಡ್ ಒಂಜಾಯಿನ ಯಕ್ಷಾಶ್ರಯದ ಲೆಕ್ಕೊಡು ಇಲ್ಲ್ ಕಟ್ಟೆರೆ ಪನವುದ ಸಕಾಯನ್ ಟ್ರಸ್ಟ್ ದ ಕಚೇರಿಡ್ ಪಟ್ಟುನ ಲೇಸ್ ನಡತ್ಂಡ್.
ಸುಂಕದಕಟ್ಟೆ ಮೇಳದ ಜಯೇಂದ್ರ ಕಿದೂರ್, ಸಸಿಹಿತ್ಲು ಮೇಳದ ಗುಡ್ಡಪ್ಪ ಸುವರ್ಣ ಮೊಕ್ಕೆಗ್ 2ನೇ ಕಂತ್ ಬೊಕ್ಕ ಬಪ್ಪನಾಡ್ ಮೇಳದ ನಾಗಪ್ಪ ಪಡುಮಲೆ ಮೆರೆಗ್ ಅಕೇರಿದ ಕಂತ್ ದ ಕಾಸ್ ದ ಚೆಕ್ಕ್ ನ್ ಸ್ಥಾಪಕಾಧ್ಯಕ್ಷೆರಾಯಿನ ಪಟ್ಲ ಸತೀಶ್ ಶೆಟ್ರ್ ಕೊರಿಯೆರ್.
ಈ ಪೊರ್ತುಡು ಫೌಂಡೇಶನ್ ದ ಪ್ರಧಾನ ಕಾರ್ಯದರ್ಶಿ ಅಡ್ಯಾರ್ ಪುರುಷೋತ್ತಮ ಭಂಡಾರಿ, ಕೋಶಾಧಿಕಾರಿ ಸಿಎ ಸುದೇಶ್ ಕುಮಾರ್ ರೈ, ಜತೆ ಕಾರ್ಯದರ್ಶಿ ರವಿ ಶೆಟ್ಟಿ ಅಶೋಕನಗರ, ಬಪ್ಪನಾಡ್ ಮೇಳದ ದಿನೇಶ್ ಕೊಡಪದವು ಇತ್ತೆರ್.
ಕುಡ್ಲ: ಬಲ್ಲ್ ಪಾಡೊಂದು ಪೊಣ್ಣು ಒರ್ತಿ ಆತ್ಮಹತ್ಯೆ ಮಲ್ತೊನ್ನ ಘಟನೆ ಉಳ್ಳಾಲದ ಪಜೀರ್ ಗ್ರಾಮದ ಅಡಪ್ಪ ರೆಸಿಡೆನ್ಸಿಡ್ ಕೋಡೆ ಮಧ್ಯಾಹ್ನ ನಡತ್ಂಡ್.
ಪ್ರೀತಿಕಾ ಪೂಜಾರಿ (21) ಈ ಘಟನೆಡ್ ತೀರ್ ಪೋಯಿನಾರ್. ಮೇರ್ ತನ್ನ ಅಮ್ಮ ಬೊಕ್ಕ ಅಣ್ಣನೊಟ್ಟಿಗೆ ಪಜೀರ್ ಗ್ರಾಮದ ಅಡಪ್ಪ ರೆಸಿಡೆನ್ಸಿದ ಬಾಡಿಗೆ ಇಲ್ಲಲ್ ಇತ್ತೆರ್. ಮೇರ್ ಕುಡ್ಲದ ಕಾಲ್ ಸೆಂಟರ್ ಒಂಜೆಟ್ಟ್ ಬೇಲೆ ಮಲ್ತೊಂದು ಇತ್ತೆರ್. ಘಟನೆ ಆಯಿನ ಜಾಗೆಗ್ ಕೊಣಾಜೆ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ದೆರ್. ಈ ಆತ್ಮಹತ್ಯೆಗ್ ಕಾರಣ ದಾದ ಪಂದ್ ನನ ಗೊತ್ತಾವೊಡಾತೆ.
10ನೇ ಕ್ಲಾಸ್ ಮುಟ್ಟದ ಜೋಕುಲೆಗ್ ತೆತ್ತಿ ಭಾಗ್ಯ ಯೋಜನೆನ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮಲ್ದೆರ್.
ವಾರಡ್ ಒಂಜಿ ದಿನ ಜೋಕುಲೆಗ್ ತೆತ್ತಿ ಕೊರ್ಪ ಪಂದ್ ಸಿಎಂ ತನ್ನ ಮುಂಗಡ ಪತ್ರಡ್ ಪಂತೆರ್. ಅತ್ತಂದೆ ಬೆಂಗ್ಲೂರ್ ಅಭಿವೃದ್ಧಿಗ್ 45 ಸಾರ ಕೋಟಿ ರೂ. ಕೊರ್ಪ ಪಂದ್ ಘೋಷಣೆ ಮಲ್ದೆರ್. ಪೆತ್ತ, ಬೋರಿ ಬೊಕ್ಕ ಎರ್ಮೆ ಸೈತ್ಂಡ ರೈತೆರೆಗ್ 10 ಸಾರ ರೂ. ಪರಿಹಾರ ಧನ ಕೊರ್ಪ ಪಂದ್ ಪಂಡೆರ್.
ಕರಿನ ರಡ್ಡ್ ದಿನೊರ್ದಿಂಚ ಮಹಾರಾಷ್ಟ್ರಗ್ ಭೇಟಿ ಕೊರೊಂದು ಇಪ್ಪುನ ರಾಷ್ಟ್ರಪತಿ ದ್ರೌಪದಿ ಮುರ್ಮ ಇನಿ ಶಿರಡಿಗ್ ಭೇಟಿ ಕೊರಿಯೆರೆ ಉಲ್ಲೆರ್.
ಈ ಮುಖೇನ ಶಿರಡಿ ದೇವಲ್ಯಗ್ ಭೇಟಿ ಕೊರ್ನ ಆರನೇ ರಾಷ್ಟ್ರಪತಿ ಆಪೆರ್. ರಾಷ್ಟ್ರಪತಿಲು ಸಾಯಿ ಸಮಾಧಿಗ್ ಬೊಕ್ಕ ದ್ವಾರಕಾಮಾಯಿಗ್ ಭೇಟಿ ಕೊರಿಯೆರೆ ಉಲ್ಲೆರ್. ಅಂಚಾದ್ ಮಹಾರಾಷ್ಟ್ರ ರಾಜ್ಯ ಸರ್ಕಾರ ಪೂರಾ ತಯಾರಿ ಮಲ್ದ್ಂಡ್. ಬಿಗಿ ಭದ್ರತೆದ ವ್ಯವಸ್ಥೆಲ ಮಲ್ದ್ಂಡ್.
