ಕುಡ್ಲ: ಮೂಲತ್ವ ಫೌಂಡೇಶನ್ ಚಾರಿಟೆಬಲ್ ಟ್ರಸ್ಟ್ ವತಿರ್ದ್ ಆಟಿಡೊಂಜಿ ದಿನ ಲೇಸ್ ಜು. 30 ಕ್ಕ್ ಬೊಲ್ಪುಗು 11 ಗಂಟೆಗ್ ಕುಡ್ಲ ಪೇಂಟೆದ ತಾರೆತೋಟದ ಮೂಲತ್ವ ಸಿ 105 ಸುವರ್ಣ ರೆಸಿಡೆನ್ಸಿಡ್ ನಡಪರೆ ಉಂಡು.
ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ದಯಾನಂದ ಜಿ. ಕತ್ತಲ್‌ ಸಾರ್ ಈ ಲೇಸ್ ದ ಉದಿಪನ ಮಲ್ಪೆರೆ ಉಲ್ಲೆರ್.
ತೆಲಂಗಾಣ: ಪುಗರ್ತೆದ ಮುತ್ಯಾಲ ಧಾರಾ ಜಲಪಾತಡ್ ತಿಕೊಂದಿನ 80 ಜನ ಪ್ರವಾಸಿಗೆರೆನ್ ರಕ್ಷಣಾ ತಂಡ ಬಚಾವ್ ಮಲ್ದ್ಂಡ್.
ಬಚಾವ್ ಮಲ್ತಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್. ನೆಟ್ಟ್ ಒರಿಯನ ಆರೋಗ್ಯಡ್ ತೊಂದರೆ ಆದ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಲ್ಲೆರ್. ಅವ್ವತ್ತಾಂದೆ ತೆಲಂಗಾಣದ ಕೆಲವು ಜಿಲ್ಲೆಡ್ ಭಾರೀ ಬರ್ಸ ಬರ್ಪಿನೆರ್ದಾವೆರ ಇನಿ ರೆಡ್ ಅಲರ್ಟ್ ಘೋಷಣೆ ಆತ್ಂಡ್.
ತಿರುಪತಿ: ತುಳುನಾಡ್ ದ ಕಟ್ಟ್ ಪ್ರಕಾರ ಪನವು ಕಟ್ಟುನ ತಿರುಪತಿದ ತಿಮ್ಮಪ್ಪ ದೇವರೆಗ್ ಇಡೆ ಮುಟ್ಟ 11 ಟನ್ ಬಂಗಾರ್ ಬೊಕ್ಕ ಬೊಲ್ಲಿದ ಪದ್ದೆಯಿ ಅಂಚೆನೆ 17,000 ಕೋಟಿ ರೂ. ಪನವು ಭಕ್ತೆರೆರ್ದ್ ಕಾಣಿಕೆಯಾದ್ ಬೈದ್ಂಡ್.
ಈ ಪದ್ದೆಯಿ ಬೊಕ್ಕ ಪನವುನು ಬೇತೆ ಬೇತೆ ಬ್ಯಾಂಕ್‌ಡ್ ಠೇವಣಿ ದೀತ ಪಂದ್ ತಿರುಪತಿ ತಿರುಮಲ ದೇವಲ್ಯದ ಆಡಳಿತ ಮಂಡಳಿ (ಟಿಟಿಡಿ) ತೆರಿಪಾದ್ಂಡ್.
ಈ ಬಗೆಟ್ಟ್ ಟಿಟಿಡಿ ಕಾರ್ಯನಿರ್ವಾಹಕ ಅಧಿಕಾರಿ ಎ.ವಿ.ಧರ್ಮ ರೆಡ್ಡಿ ಪೊಲಬು ಕೊರ್ತೆರ್.
ತಿರುಪತಿದ ಪ್ರಧಾನ ದೇವಲ್ಯಡ್ 1.2 ಟನ್ ಬಂಗಾರ್ ದ ಪದ್ದೆಯಿ ಬೊಕ್ಕ 10 ಟನ್ ಬೊಳ್ಳಿದ ಪದ್ದೆಯಿ ಉಂಡು. ಎಚ್ಚಾಯಿನ 11 ಟನ್ ಬಂಗಾರ್ ನ್ ಬ್ಯಾಂಕ್‌ಡ್ ಠೇವಣಿ ಮಲ್ದ್ಂಡ್.
2009-10 ಟ್ಟ್ 50,000 ಇತ್ತಿನ ಭಕ್ತೆರೆನ ಸಂಖ್ಯೆ ಇತ್ತೆ 1 ಲಕ್ಷಗ್ ಎಚ್ಚಾತ್ಂಡ್. ಟಿಟಿಡಿಗ್ ಆದಾಯಲ ಅವ್ವೇ ರೀತಿ ಎಚ್ಚಾವೊಂದು ಉಂಡು.
ಹುಂಡಿ ಕಾಣಿಕೆ, ಭಕ್ತೆರ್ ಕೊರ್ಪಿನ ಮುಡಿ ಬೊಕ್ಕ ಬೇತೆ ಬೇತೆ ಸೇವೆ, ದರ್ಶನದ ಟಿಕೆಟ್‌ರ್ದ್ ಆದಾಯ ಎಚ್ಚಾತ್ಂಡ್. ಟಿಟಿಡಿದ ವರ್ಷದ ಬಜೆಟ್ ಪ್ರತಿ ವರ್ಷ 100 ಕೋಟಿ ರೂ.ದಾತ್ ಎಚ್ಚಾವೊಂದು ಪಂದ್ ತೆರಿಪಾದೆರ್.
ಐಲೇಸಾ ತನ್ನ ಪುಟ್ಟು ದಿನತ ನೆಂಪುಗು ವರ್ಷಲಾ ಕೊರ್ಪಿನ ”ವಯೋ ಸಮ್ಮಾನ” ಈ ಸರ್ತಿ ಬೊಂಬಾಯಿದ ತುಳುವೆ ”ಶಿಮುಂಜೆ ಪರಾರಿ” ಪಂಡ್ ದೇ ಪುದರಾಯಿನ ಮುಲ್ಕಿದ ಕಕ್ವಗ್ರಾಮದ ಅತಿಕಾರಿ ಬೆಟ್ಟು ಮುಲ್ಪದ ಸೀತಾರಾಮ ಮುದ್ದಣ್ಣ ಶೆಟ್ಟಿ ಮೆರೆಗ್ ಸಂದಾಯ್ತ ಆವೊಂದುಂಡು .
ಮುಂಬೈದ ಅಂಧೇರಿ ಪಡ್ಡಾಯಿ ಕಂಟ್ರಿ ಕ್ಲಬ್ ಮುಲ್ಪ ಜುಲೈ ತಿಂಗೊಲು ಅಕೇರಿದ 29 ತಾರೀಖ್ ದಾನಿ ನಡಪುನ ಈ ವಯೋಸಮ್ಮಾನ ಮಾನಾದಿಗೆ ಕೊರ್ಯೆರೆಗಾದ್ ಅರೆನ ಅಪಗದ ಸಾಹಿತ್ಯದ ದೋಸ್ತಿ ಸುಬ್ರಾಯ ಚೊಕ್ಕಾಡಿ ಊರುಡ್ಡು ಬೊಂಬಾಯಿಗ್ ಬರೊಂದುಲ್ಲೆರ್ . ಮುಖ್ಯ ಬಿನ್ನೆರಾದ್ ಅಬುಧಾಭಿ ಸರ್ವೋತ್ತಮ ಶೆಟ್ರು , ಮೂಡಂಬೈಲ್ ರವಿ ಶೆಟ್ಟಿ ಕತಾರ್ , ಅಕ್ಷತರಾಜ್ ಪೆರ್ಲ ಪಾಲ್ ಪಡೆವೆರ್.
ಮಾನಾದಿಗೆದ ಬಿನ್ನೆರಾದ್ ಮುಂಬೈ ಬಂಟ್ ಸಂಘದ ಮಾಜಿ ಅಧ್ಯಕ್ಷೆ ಶ್ಯಾಮ್ ಎನ್ ಶೆಟ್ಟಿ ,ದಿವಾಕರ್ ಎನ್ ಶೆಟ್ಟಿ ಮುದ್ರಾಡಿ ,ಡಿ ಕೆ ಶೆಟ್ಟಿ ಪೊವೈ ಪುಗರ್ತೆದ ವಕೀಲೆರಾಯಿನ ಪ್ರಕಾಶ್ ಎಲ್ ಶೆಟ್ಟಿ ಬೊಕ್ಕ ಗುಣಕರ ಶೆಟ್ಟಿ , ಕರ್ನಾಟಕ ಮಲ್ಲ ದಿನ ಪತ್ರಿಕೆದ ಸಂಪಾದಕೆರಾಯಿನ ಚಂದ್ರಶೇಖರ ಪಾಲೆತ್ತಾಡಿ , ಮುಂಬೈ ವಿಶ್ವ ವಿದ್ಯಾಲಯದ ಕನ್ನಡ ವಿಭಾಗ ದ ಡಾ, ಜಿ ಎನ್ ಉಪಾಧ್ಯ , ಮಾತೃಭೂಮಿ ಕೋ ಆಪರೇಟಿವ್ ಸೊಸೈಟಿ ಕಾರ್ಯಂತೆರ್ ಪ್ರವೀಣ್ ಶೆಟ್ಟಿ,, ಶ್ರೀನಿವಾಸ ಸಾಫಲ್ಯ ,ಬೊಕ್ಕ ಶಿಮುಂಜೆ ಪರಾರಿ ಮೆರೆನ ಅಭಿಮಾನಿಲು ಪಾಲ್ ಪಡೆದ್ ಅರೆನೊಟ್ಟುಗು ಖುಷಿ ಪಟ್ಟೊನೆರೆ ಒಟ್ಟಾವೊಂದುಲ್ಲೆರ್ .
ಶಿಮುಂಜೆ ಪರಾರಿ ಮರಾಠಿ ಹಿಂದಿ ಮೂಲದ ನಾಟಕೊಲೆನ್ , ಪದೊಕುಲೆನ್ ತುಳು ಭಾಷೆಗ್ ಅನುವಾದ ಮಲ್ತುದು ಪುದರಾಯಿನಾರ್ . ಯಾನ್ ಪಿನಯೆ , ಔಲೊರ್ತಿ ಮೂಲೊರ್ತಿ , ಜೋಕುಲು ಬಾಲೆಲು ಪನ್ಪಿನ ನಾಟಕೊಲೆನ್ ಮರಾಠಿ ಭಾಷೆಡ್ದ್ ತುಳುಕು ಕನತ್ ಅಭಿನಯ ಮಲ್ತು ಪುಗಾರ್ತೆ ಪಡೆಯಿನಾರ್ . ಜೋಕುಲು ಬಾಲೆಲು ನಾಟಕೊಗು ತುಳು ಅಕಾಡಮಿದ ಪುಸ್ತಕ ಮಾನಾದಿಗೆ ದೆತೊಂದಿನ ಶಿಮುಂಜೆ ಯಾನ್ ಪನ್ಪಿನಿ ಇಂಚ ಪನ್ಪಿನ ತುಳು ಚುಟುಕು ಬರೆದ್ ಮುಪ್ಪಸಾವಿರ ಪ್ರತಿ ಪ್ರತಿ ತುಳುವನ ಇಲ್ಲ ಬಾಕಿಲ್ಗ್ ಮುಟ್ಟಾಯಿನಾರ್ . ನಿತ್ಯಾನಂದ ಸ್ವಾಮಿಲೆನ ಪುದರ್ಡ್ ನಿತ್ಯ ಅನಂದ ವಚನ ಮುಕ್ತಕ ಬರೆದ್ ಅವೆನ್ ಗುರುಕುಲೆಗ್ ಸಂದಾಯ್ತ ಮಲ್ತಿನಾರ್ . ಮೆರೆನ ಸಾಹಿತ್ಯ ಬೇಲೆನ್ ಗುರ್ತ ಮಲ್ತಿನ ಮುಂಬೈ ವಿಶ್ವ ವಿದ್ಯಾಲಯದ ಡಾ. ಪೂರ್ಣಿಮಾ ಶೆಟ್ಟಿ ಶಿಮುಂಜೆ ಬದ್ ಕ್ ಬರವುದ ಅಧ್ಯಯನ ಬೊಕ್ಕ ಡಾ. ಜಿ ಎನ್ ಉಪಾಧ್ಯ ಮೇರ್ ಪ್ರಧಾನ ಸಂಪಾದಕೆರಾದ್ ಸಂಪೊಲಿಗೆ ಮಲ್ದಿನ ಸಂಪ್ರೀತಿ ಪನ್ಪಿನ ಗ್ರಂಥ ಗೌರವ ಅರೆಗ್ ಅರ್ಪಣೆ ಮಲ್ದೆರ್ .
ಊರುಡ್ಡು ಬೊಂಬಾಯಿಗ್ ಬತ್ತಿನ ಜೋಕುಲೆಗ್ ಫ್ರೀ ನೈಟ್ ಸ್ಕೂಲ್ ಮುಲ್ಪ ಪದಿಮೂಜಿ ವರ್ಷ ದರ್ಮಾರ್ಥ ಪಾಠ ಕಲ್ಪಾಯಿನ ಮಾಸ್ಟ್ರ್ ಶಿಮುಂಜೆ ಪರಾರಿ ಮೆರೆಗ್ ಇತ್ತೆ 84 ವರ್ಷ ಪ್ರಾಯ . ಬುಡೆದಿ ಚಂದ್ರಿಕಾ ಬೊಕ್ಕ ಅರ್ಚನಾ ಅಪರ್ಣ ಪನ್ಪಿನ ರಡ್ಡ್ ಪೊಣ್ಣು ಜೋಕುಲೆನೊಟ್ಟುಗು ಬೊಂಬಾಯಿದ ಅಂಧೇರಿಡ್ ಉಪ್ಪುನ ಪರಾರಿ ಮೆರೆನ ಇಲ್ಲ ಬಾಕಿಲ್ಗ್ ಪೋದು ಅರೆನ ಪ್ರಾಯದಾತ್ 84000 ರೂ. ಗುರುದಕ್ಷಿಣೆ ಕೊರ್ದು , ಅರೆನ ಸಾಹಿತ್ಯ ಕತೆ ಕವನ , ನಾಟಕ ವಾಚನ ಮಲ್ತ್ ಅರೆನ ಇಷ್ಟದ ಪದ ಪಂಡ್ ದ್ , ಇಷ್ಟದ ತೆನಸ್ ಅರೆಗ್ ತಿನ್ಪಾದ್ ಅರೆನೊಟ್ಟುಗು ಒಂತೆ ಪೊರ್ತು ನಲಿತ್ ತೆಲಿತ್ ಈ ವಯೋಸಮ್ಮಾನ ಕೊರ್ದು ಬರ್ರೆಗ್ ಐಲೇಸಾದ ಕೂಟದಕುಲು ಅಟ್ಟನೆ ಮಲ್ತ್ ದ್ ಈ ಶನಿವಾರ ಬೊಂಬಾಯಿಗ್ ಬರೊಂದುಪ್ಪುನ ಪೊರ್ತುಗು ಅರೆನ ಅಭಿಮಾನಿ ಬಂದುಲು ಒಟ್ಟುಗು ಸೇರೊನೊಡು ಪಂಡ್ ದ್ ಐಲೇಸಾದ ಸಾರಥಿ ರಮೇಶ್ಚಂದ್ರ ಬಿನ್ನಾಪು ಮಲ್ದೆರ್.
(ವರದಿ: ಶಾಂತಾರಾಮ್ ಶೆಟ್ಟಿ ಬೆಂಗ್ಲೂರು)
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಮುತಾಲಿಕೆಡ್ ‘ಚಿಣ್ಣರ ದನಿ ಲೇಸ್ ಜುಲೈ26 ಕ್ಕ್ ಬುಧಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಜುಲೈ27 ಕ್ಕ್ ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಇನಿ ಪ್ರಸಾರ ಆಪುನ ಲೇಸ್ ದ 19ನೇ ಸಂಚಿಕೆಡ್ ಬಾಲ ಪ್ರತಿಭೆ ಬನ್ನಂಜೆ ಮಹಾಲಕ್ಷ್ಮಿ ಪಾಲ್ ಪಡೆಯೆರ್.
ಒಡಿಪು: ಶ್ರೀಶಿರೂರು ಮಠತ್ತ ಕೀರ್ತಿಶೇಷ ಶ್ರೀಲಕ್ಷ್ಮೀವರತೀರ್ಥ ಸ್ವಾಮೀಜಿನ ಪೂರ್ವಾಶ್ರಮದ ಕುಟುಂಬಿಕೆರ್ದ್ ಶ್ರೀಪಾದರೆನ 5ನೇ ವರ್ಷೊದ ಆರಾಧನೆ ಒಡಿಪುದ ಶ್ರೀರಾಘವೇಂದ್ರ ಮಠಟ್ಟ್ ಗೌಜಿಡ್ ನಡತ್ಂಡ್.
ಶ್ರೀರಾಘವೇಂದ್ರ ಗುರುಕ್ಲೆನ ಸಮ್ಮುಖಡ್ ಪ್ರಾರ್ತನೆ ಸಂದಾಯಿನ ಬೊಕ್ಕ ಪವಮಾನ ಕಲಶಾಭಿಷೇಕ ಹೋಮ ಬೊಕ್ಕ ವಿರಜಾ ಹೋಮನ್ ಶ್ರೀಸುಬ್ಬಣ್ಣ ಮಲ್ತೆರ್. ಬೊಕ್ಕ ಶ್ರೀಲಕ್ಷ್ಮೀವರತೀರ್ಥ ಸ್ವಾಮೀಜಿನ ಮೃತ್ತಿಕಾ ವೃಂದಾವನಗ್ ಪಂಚಾಮೃತಾಭಿಷೇಕ ಬೊಕ್ಕ ಇಸೇಸ ಪೂಜೆನ್ ಪಿ.ಲಾತವ್ಯ ಆಚಾರ್ಯೆರ್ ಮಲ್ತೆರ್. ನೆರವೇರಿಸಿದರು. ಮಧ್ಯಾಹ್ನ ಅನ್ನಸಂತರ್ಪಣೆ ನಡತ್ಂಡ್. ಶ್ರೀಲಕ್ಷ್ಮೀವರತೀರ್ಥ ಸ್ವಾಮೀಜಿನ ಬಗ್ಗೆ ವೇದಮೂರ್ತಿ ಅಗ್ರಹಾರ ಶ್ರೀಲಕ್ಷ್ಮೀನಾರಾಯಣ ತಂತ್ರಿ ಮೇರ್ ಚರಮ ಶ್ಲೋಕನ್ ಓದಿಯೆರ್.
ಈ ಪೊರ್ತುಡು ಶ್ರೀರಾಯರೆ ಮಠತ್ತ ಶ್ರೀಜಯತೀರ್ಥ ಆಚಾರ್ಯ, ಅಪ್ಪಣ್ಣ ಆಚಾರ್ಯ, ಶ್ರೀಹರಿಕೃಷ್ಣ ಪುನರೂರು, ಸೊಂಡೂರು ಪ್ರಹ್ಲಾದ ಆಚಾರ್ಯ, ಅಗ್ರಹಾರ ಅನಂತ ತಂತ್ರಿ, ಚೆನ್ನೈದ ರಾಜಗೋಪಾಲ್, ಪ್ರಸಾದ, ಶ್ರೀಪಾದೆರೆನ ಪೂರ್ವಾಶ್ರಮದ ಸಹೋದರೆರ್ ಪಿ.ವಾದಿರಾಜ ಆಚಾರ್ಯ, ಪಿ.ಶ್ರೀನಿವಾಸ ಆಚಾರ್ಯ, ಪಿ.ವೃಜನಾಥ ಆಚಾರ್ಯ, ಗಾಂಧಿ ಆಸ್ಪತ್ರೆದ ಡಾ.ವ್ಯಾಸರಾಜ ತಂತ್ರಿ, ಅಕ್ಷೋಭ್ಯ ಆಚಾರ್ಯ, ಅರ್ಜುನ್ ಆಚಾರ್ಯ, ವಿಶಾಲ ಆಚಾರ್ಯ, ಹರೀಶ ಜೋಯಿಸ್, ಲಕ್ಷ್ಮೀಶ ಜೋಯಿಸ್, ಜಯರಾಮ ರಾವ್, ಮಡಾಮಕ್ಕಿ ವೇದವ್ಯಾಸ ತಂತ್ರಿ, ಶಂಕರನಾರಾಯಣ ಹೊಳ್ಳ ಬೊಕ್ಕ ಸುಮಾರ್ ಸುಮಾರ್ ಶ್ರೀಪಾದೆರ್ ಇತ್ತೆರ್.
ಅಂಚೆನೆ ಕೇಮಾರು ಸಾಂದೀಪನಿ ಮಠತ್ತ ಆಶ್ರಮಡ್ ಶ್ರೀಈಶ ವಿಠಲದಾಸ ಸ್ವಾಮೀಜಿ ಮೇರ್ ಶಿರೂರು ಶ್ರೀಪಾದೆರೆನ ಆರಾಧನೆದ ಲೆಕ್ಕೊಡು ಇಸೇಸ ಪೂಜೆ ಬೊಕ್ಕ ಪುಷ್ಪಾರ್ಚನೆನ್ ಆಯೋಜನೆ ಮಲ್ತ್ ದ್ ಇತ್ತೆರ್.
ಕುಡ್ಲ ಬಾವುಟಗುಡ್ಡೆದ ಇನ್ಶೂರೆನ್ಸ್ ಕಂಪೆನಿಯೊಂಜೇಟ್ ತೂ ಪೊತ್ತಿನ ಘಟನೆ ನಡತ್ಂಡ್.
ಇನ್ಶೂರೆನ್ಸ್ ಕಚೇರಿದ ಕಟ್ವಾನದ ಮೂಜಿನೇ ಮಾಳಿಗೆಡ್ ತೂ ಪೊತ್ತ್ ದ್ ಇತ್ತ್ ದ್, ಕೂಡ್ಲೆ ಪಾಂಡೇಶ್ವರ ಅಗ್ನಿಶಾಮಕ ದಳತ್ತ ಸಿಬ್ಬಂದಿಲು ಈ ಘಟನೆ ನಡತಿನ ಜಾಗೆಗ್ ಬತ್ತ್ ದ್ ತೂ ನ್ ತೆಕ್ಕಾದೆರ್. ಘಟನೆಡ್ ಕಂಪ್ಯೂಟರ್, ಎಸಿ ಪೊತ್ತ್ ಪೊದಿತ್ತ್ ದ್ ನೆರ್ದ್ ಲಕ್ಷರ್ದ್ ಎಚ್ಚ ರೂ. ನಷ್ಟ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಬರ್ಸರ್ದಾವರ ಡೆಲ್ಲಿಡ್ ಕಾಂಜಂಕ್ವಿವಿಟಿಸ್ (ಪಿಂಕ್ ಐ) ಕೇಸ್ ಲು ವರದಿ ಆವೊಂದುಂಡು.
ಡೆಲ್ಲಿಡ್ ಪ್ರತಿದಿನ 100 ಕೇಸ್ ವರದಿ ಆವೊಂದು ಉಂಡು ಪಂದ್ ಏಮ್ಸ್ ಡಾ.ಜೆ.ಎಸ್ ತಿತಿಯಾಲ್ ಪಂತೆರ್.
ಶಾರ್ಪ್ ಸೈಟ್ ಐ ಹಾಸ್ಪಿಟಲ್ಸ್ ದ ನಿರ್ದೇಶಕೆರ್ ಡಾ.ಸಮೀರ್ ಪಾತೆರ್ದ್, ಕಾಂಜಂಕ್ವಿವಿಟಿಸ್ ಉಂತಾಯೆರೆ ಸ್ವಚ್ಚತೆ ಮಲ್ಪೊಡಾಪುಂಡು. ಪಿದಯಿರ್ದ್ ಇಲ್ಲಗ್ ಬತ್ತಿನ ಕೂಡ್ಲೆ ಕೈ ದೆಕ್ಕೊಡು. ಕುಟುಂಬಡ್ ಏರೆಗಾಂಡಲ ಕಣ್ಣ್ ದ ಸೋಂಕು ಇತ್ತ್ಂಡ ಅಕ್ಲೆರ್ದ್ ದೂರ ಇಪ್ಪೊಡು.
ಈ ಸೀಕ್ ದ ಲಚ್ಚನ:
•ಮರಿಯಲಡ್ ಈ ಸೀಕ್ ಎಚ್ಚಾಪುಂಡು.
•ಕಣ್ಣ್ ಕೆಂಪಾಪುಂಡು.
•ಕಣ್ಣ್ ಡ್ ನೀರ್ ಬರ್ಪುಂಡು, ರೆಪ್ಪೆ ದಪ್ಪ ಆಪುಂಡು.
•ರಾತ್ರೆ ಜೆತ್ತಿ ಬೊಕ್ಕ ಕಣ್ಣ್ ರೆಪ್ಪೆಲು ಅಂಟುಂಡು.
•ಕಣ್ಣ್ ಕೆಂಪಾನಗ ಅಂಟಿಬಯೋಟಿಕ್ ಪಾಡೊಡು.
•ಕಣ್ಣ್ ನ್ ಅಪಗಪಗ ನೀರ್ ಡ್ ದೆಕ್ಕೊಡು.
•ಈ ಸಮಸ್ಯೆ ಇಪ್ಪುನಕ್ಲೆರ್ದ್ ದೂರ ಇತ್ತಿನಾತ್ ಎಡ್ಡೆ.
ಕುಡ್ಲ: ಕ್ರೀಡಾ ಕ್ಷೇತ್ರಗ್ ಪ್ರೋತ್ಸಾಹ, ಸಾಧನೆ, ಅವಿರತ ಸಮಾಜಸೇವೆ ಮಲ್ತಿನ ಉದ್ಯಮಿ ಅತ್ತೂರು ಸದಾನಂದ ಶೆಟ್ಟಿ ಮೆರೆಗ್ ಶಿವಮೊಗ್ಗದ ಕುವೆಂಪು ವಿಶ್ವವಿದ್ಯಾಲಯದ 33ನೇ ಘಟಿಕೋತ್ಸವಡ್ ರಾಜ್ಯಪಾಲೆರ್ ಥಾವರ್‌ಚಂದ್ ಗೆಹ್ಲೋಟ್ ಮೇರ್ ಗೌರವ ಡಾಕ್ಟರೇಟ್ ಕೊರ್ದು ಮಾನಾದಿಗೆ ಮಲ್ತೆರ್.
ಎ. ಸದಾನಂದ ಶೆಟ್ಟಿ ಮೇರ್ ಉದ್ಯಮಿಯಾದ್, ಶಿಕ್ಷಣ ಪ್ರೇಮಿಯಾದ್, ಕ್ರೀಡಾ ಪೋಷಕೆರಾದ್ ಪುಗರ್ತೆ ಪಡೆಯಿನಾರ್ ಅತ್ತಂದೆ ಸಾರರ್ದ್ ಎಚ್ಚ ಜನಕ್ಕ್ ಬೇಲೆ ಮಲ್ತ್ ದ್ ಕೊರ್ಪಿನ ಮುಖೇನ ಆಕ್ಲೆನ ಬದ್ಕ್ ಗ್ ನೆರವು ಆತೆರ್. ಕುಡ್ಲಡ್ ತನ್ನ ಉದ್ಯಮಶೀಲತೆ, ಬೊಕ್ಕ ಕಠಿನ ಶ್ರಮರ್ದ್ ಹೋಟೆಲ್ ಉದ್ಯಮಡ್ ಯಶಸ್ಸ್ ಆಯೆರ್.
1992ಟ್ಟ್ ಶ್ರೀದೇವಿ ಎಜುಕೇಶನ್ ಟ್ರಸ್ಟ್ ಸ್ಥಾಪನೆ ಮಲ್ತ್ ದ್ ಸಾರರ್ದ್ ಎಚ್ಚ ಕಲ್ಪಾರ್ಥಿಲೆಗ್ ಶಿಕ್ಷಣ ಕೊರಿಯೆರ್. ಮೇರ್ ಗುಣಮಟ್ಟದ ಶಿಕ್ಷಣಗ್ ಮಹತ್ವ ಕೊರಿನಾರ್. ಎಲ್ಯೆರ್ದೆ ಕ್ರೀಡೆ, ಗೊಬ್ಬುಡು ಇತ್ತಿನಾರ್. ಉದ್ಯಮಿ ಆಯಿನಪಗಲ ಪತ್ತೆರ್ದ್ ಎಚ್ಚ ಕ್ರೀಡಾ ಚಟುವಟಿಕೆನ್ ಸಂಘಟನೆ ಮಲ್ದೆರ್. ಪ್ರೋತ್ಸಾಹ ಕೊರ್ಪಿನ ಮುಖೇನ ಆ ಕ್ಷೇತ್ರಗ್ ಮಲ್ಲ ಕೊಡುಗೆ ಕೊರ್ತೆರ್.
1985 ಟ್ಟ್ ಇಂಡಿಯನ್ ಸ್ಯಾಟಲೈಟ್ ಟೆನ್ನಿಸ್ ಟೀಂ ಟೂರ್ನಮೆಂಟ್ ಆಯೋಜನೆ ಮಲ್ತೆರ್. ಆಯಿಟ್ಟ್ 90ದಾತ್ ದೇಶ ವಿದೇಶದ ಕ್ರೀಡಾಪಟುಲು ಪಾಲ್ ಪಡೆಯಿನವು ಇಸೇಸ ಆತ್ಂಡ್. 1997 ಟ್ಟ್ ಆಲ್ ಇಂಡಿಯನ್ ಮಹಿಳಾ ಕ್ರಿಕೆಟ್ ಪಂದ್ಯಾಟ ಆಯೋಜನೆ ಮಲ್ತೆರ್. 1993 ಟ್ಟ್ ಸೇ ನೋ ಟು ಡ್ರಗ್ಸ್ ರನ್ ಆಯೋಜನೆ ಮಲ್ಪುನಗ ಸಾರರ್ದ್ ಎಚ್ಚ ಜನ ಪಾಲ್ ಪಡೆದಿತ್ತೆರ್.
ಸ್ಪೋರ್ಟ್ ಪ್ರಮೋಟರ್ಸ್ ಕ್ಲಬ್, ಅಮೆಚೂರು ಕಬಡ್ಡಿ ಅಸೋಸಿಯೇಶನ್, ಜಿಲ್ಲಾ ಬಾಸ್ಕೆಟ್‌ಬಾಲ್ ಅಸೋಸಿಯೇಶನ್, ಮಂಗಳಾ ಅಥ್ಲೆಟಿಕ್ಸ್, ಕರ್ನಾಟಕ ರಾಜ್ಯ ಬಾಸ್ಕೆಟ್‌ಬಾಲ್ ಅಸೋಸಿಯೇಶನ್, ಮಹಾತ್ಮಾಗಾಂಧಿ ಶಾಂತಿ ಪ್ರತಿಷ್ಠಾನ, ಕೆನರಾ ಕ್ಲಬ್ ಕುಡ್ಲ, ರಾಮಕೃಷ್ಣ ಟೀಮ್ಸ್ ಕ್ಲಬ್, ರೈಡರ್ಸ್ ಕ್ಲಬ್, ಕದ್ರಿ ಜಿಮ್ಹಾನಾ ಕ್ಲಬ್ ಲೆನ ಅಧ್ಯಕ್ಷೆರ್ -ಮಾಜಿ ಅಧ್ಯಕ್ಷೆರಾತೆರ್.
ಮೇರ್ ಕ್ರೀಡೆಗ್ ಕೊರಿನ ಪ್ರೋತ್ಸಾಹಕ್ಕಾದ್ ರಾಜ್ಯ ಸರಕಾರ ಮೆರೆನ್ ಬ್ಯಾಂಕಾಕ್‌ಡ್ ನಡತಿನ 1998ತ್ತ ಏಷ್ಯನ್ ಗೇಮ್ಸ್‌ಗ್ ತಾಂತ್ರಿಕ ವೀಕ್ಷಕೆರೆನಾದ್ ಕಡಪಾದಿತ್ತ್ಂಡ್. 2000ಟ್ಟ್ ಆಸ್ಟ್ರೇಲಿಯಾದ ಸಿಡ್ನಿ ನಗರಡ್ ನಡತಿನ ಒಲಿಂಪಿಕ್ಸ್‌ ನ್ ತೂಪುನ ಅವಕಾಶ ಮೆರೆಗ್ ತಿಕ್ಕ್ ದಿತ್ತ್ಂಡ್. ಜಿಲ್ಲಾಡಳಿತ ಬೊಕ್ಕ ಕ್ರೀಡಾ ಸಂಘಟನೆದ ನಡುಟ್ ಕೊಂಡಿ ಆತ್ಂಡ್. ಪ್ರೋತ್ಸಾಹ, ಎಪಲ ಸಹಕಾರ ಕೊರ್ಪುನ ಮುಖೇನ ಕ್ರೀಡಾ ಲೋಕಗ್ ಮೇರ್ ಮಲ್ಲ ಕೊಡುಗೆ ಸಂದಾದೆರ್.
ಸಚಿವೆರೆನ ಬಗೆಟ್ಟ್ ಅಸಮಾಧಾನ ಇಪ್ಪುನ ಶಾಸಕೆರೆನ್ ಸಮಾಧಾನ ಮಲ್ಪೆರೆ ಬೊಕ್ಕ ಪಕ್ಷಡ್ ಇಪ್ಪುನ ಅತೃಪ್ತಿನ್ ಕಮ್ಮಿ ಮಲ್ಪೆರೆ ಅಜೆಂಡಾದೊಟ್ಟಿಗೆ ಎಲ್ಲೆ ಕಾಂಗ್ರೆಸ್ ಪಕ್ಷದ ಶಾಸಕಾಂಗ ಸಭೆ ನಡಪರೆ ಉಂಡು.
ಈ ಸಭೆಟ್ಟ್ ಎಐಸಿಸಿ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ ಪಾಲ್ ಪಡೆಯೆರೆ ಉಲ್ಲೆರ್. ನೆರ್ದ್ ದುಂಬು ಸಿಎಂ ಅಧಿವೇಶನದ ಬೊಕ್ಕ ಕೆಲವು ನಿಗಮ ಬೊಕ್ಕ ಪ್ರಾಧಿಕಾರಗ್ ಅಧ್ಯಕ್ಷೆರೆನ್ ನೇಮಕ ಮಲ್ಪುನ ಬಗೆಟ್ ಸುಳಿವು ಕೊರ್ದು ಇತ್ತೆರ್. ಈ ಇಸಯನ್ ಸಭೆಟ್ಟ್ ಪಾತೆರುನ ಸಾಧ್ಯತೆ ಉಂಡು.
