ಬ್ಲಡ್ ಪ್ರೆಶರ್ (ರಕ್ತದ ಒತ್ತಡ) ಕಮ್ಮಿ ಆಂಡ ಕೂಡ್ಲೆ ದಾದ ಮಲ್ಪೊಡು ಪನ್ಪಿನ ಎಲ್ಯ ಪೊಲಬು ಇಂಚ ಉಂಡು.
•ಮಸ್ತ್ ನೀರ್ ಪರೊಡು.
•ಉಪ್ಪು ಇಪ್ಪುನಂಚಿನ ತೆನಸ್/ ಉಪ್ಪು ತಿನೊಡು.
•ವಿಟಮಿನ್ B12, B9 ಅಂಶ ಇಪ್ಪುನ ತೆನಸ್ ನ್ ಎಚ್ಚಾದ್ ತಿನೊಡು.
•ವನಸ್ ಮಲ್ಪುನ ಪ್ರಮಾಣನ್ ಕಮ್ಮಿ ಮಲ್ಪೊಡು.
•ಮಧುಮೇಹಿ ಆಯಿಜಿಂಡ, ಸೆಕ್ಕರೆಲ ತಿನೊಲಿ.
•ಎಲೆಕ್ಟ್ರೋಲೈಟ್ ಇಪ್ಪುನ ಪಾನೀಯ ಪಾರ್ಲೆ.
•ಕಮ್ಮಿ ನೆತ್ತೆರ್ ದ ಒತ್ತಡ ಎಚ್ಚ ಮಲ್ಪೆರೆ ಕಾಫಿ ಸಹಾಯ ಮಲ್ಪುಂಡು.
•ನೆತ್ತೆರ್ ಒತ್ತಡ ಕಮ್ಮಿ ಮಲ್ಪರೆ ಒವ್ವೇ ಸಮಸ್ಯೆಲು ತೋಜಿದ್ ಬತ್ತ್ಂಡ ಕೂಡ್ಲೆ ವೈದ್ಯೆರೆಗ್ ತೂಪಾಲೆ.
ಶಿಕ್ಷಣಗ್ ಎಚ್ಚದ ಒತ್ತು ಕೊರ್ದು, ಅಯಿಕ್ಕ್ ಬೋಡಾಪಿನ ಪೂರಕ ಸಂಪನ್ಮೂಲನ್ ಸೇರ್ಸಾದ್, ಬಡ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಆಸರೆ ಬೊಲ್ಪು ಕೊರ್ಂಡ ಸಂಘದ ಸಮಾಜ ಮುಖಿ ಕಾರ್ಯ ಅರ್ಥ ಪೂರ್ಣ ಆಪುಂಡು ಪಂದ್ ಕಾರ್ಲ ವಲಯ ಅರಣ್ಯಾಧಿಕಾರಿ ಪ್ರಭಾಕರ್ ಕುಲಾಲ್ ಪಂಡೆರ್.
ಮೇರ್ ಆ.6 ಐತಾರ ಕುಲಾಲ ಸಂಘ ನಾನಿಲ್ತಾರ್ ಮುತಾಲಿಕೆಡ್ ನಡತಿನ ಪ್ರತಿಭಾ ಪುರಸ್ಕಾರ, ಸನ್ಮಾನ, ಆಟಿಡೊಂಜಿ ಕೂಟ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರಿಯೆರ್. ಬೊಕ್ಕ ಸಂಘದ ವಿದ್ಯಾಸಿರಿ ಯೋಜನೆಗ್ ಸುರುತ್ತ ದೇಣಿಗೆನ್ ಈ ಪೊರ್ತುಡು ಘೋಷಣೆ ಮಲ್ತೆರ್.
ಲೇಸ್ ದ ಗುರ್ಕಾರ್ಮೆನ್ ಸಂಘದ ಅಧ್ಯಕ್ಷೆರ್ ಕುಶ ಆರ್ ಮೂಲ್ಯ ಒಯಿಸೊಂದಿತ್ತೆರ್. ನಿವೃತ್ತ ಯೋಧೆ ಜಯ ಮೂಲ್ಯ ಕಾರ್ಲ ದಂಪತಿಲೆಗ್ ಸನ್ಮಾನ ಮಲ್ತೆರ್. ಸಂಗೀತಾ ಕುಲಾಲ್ ಬೋಳ ಅಭಿನಂದನೆದ ಪಾತೆರ ಪಾತೆರಿಯೆರ್. ಈ ಲೇಸ್ ಗ್ ಉದ್ಯಮಿ ಅಶೋಕ್ ಕುಲಾಲ್ ಕುಡ್ಲ, ತೋಕೂರು ಕುಲಾಲ ಸಂಘದ ಅಧ್ಯಕ್ಷೆರ್ ಶ್ರೀಧರ್ ಬಂಗೇರ ಬೋಳ, ಕುಲಾಲ್ ಸಂಘದ ಅಧ್ಯಕ್ಷೆರ್ ಗಣೇಶ್ ಕುಲಾಲ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಕರಿನ ವರ್ಷ SSLC ಬೊಕ್ಕ puc ಡ್ 80/- ಮಿತ್ತ್ ಮಾರ್ಕ್ಸ್ ಪಡೆಯಿನ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಕೊರಿಯೆರ್.
ಚಾವಡಿಡ್ ಸಂಘದ ಮಾಜಿ ಅಧ್ಯಕ್ಷೆರ್ ಮಂಜಪ್ಪ ಮೂಲ್ಯ, ಕಾರ್ಯದರ್ಶಿ ಆಶಾ ವರದರಾಜ್, ಕೋಶಾಧಿಕಾರಿ ಸುಧಾಕರ ಕುಲಾಲ್, ಮಹಿಳಾ ಘಟಕ ಅಧ್ಯಕ್ಷೆರ್ ಪ್ರತಿಮಾ ಶ್ರೀಧರ್, ಯುವ ವೇದಿಕೆ ಅಧ್ಯಕ್ಷೆರ್ ದೀಪಕ್ ಬೆಳ್ಮಣ್ ಇತ್ತೆರ್.
ಈ ಲೇಸ್ ನ್ ಕುಮಾರಿ ಹರ್ಷಿತಾ ಬೊಕ್ಕ ಶಿಕ್ಷಕೆರ್ ಶ್ರೀಕಾಂತ್ ಸುಧಾರಿಕೆ ಮಲ್ತೆರ್. ಸುಧಾಕರ್ ಕುಲಾಲ್ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಬೊಗ್ಗು ಮೂಲ್ಯ ಬೇಲಾಡಿ ಜಗನ್ನಾಥ ಮೂಲ್ಯ, ಬೆಲ್ಮಣ್ ಸಾಂತೂರ್ ರಾಜೇಶ್ ಕುಲಾಲ್, ಲೋಕೆಶ್ ಕುಲಾಲ್, ಸಂತೋಷ ಕುಲಾಲ್ ಅಗರಟ್ಟ, ಪವಿತ್ರ ಅಶೋಕ್ ಕುಲಾಲ್, ಸುಧಾಕರ್ ಸಾಲಿಯಾನ್ ಚೈತ್ರೇಶ್, ಅರುಣಾ ಕುಲಾಲ್ ಸಹಕಾರ ಕೊರಿಯೆರ್.
ಫೋಟೊ: ಅಶೋಕ್ ಫಲ್ಗುಣಿ ಡಿಜಿಟಲ್ ಮುಂಡೇರ್
ಉಳ್ಳಾಲ: ಸ್ಯಾಂಡಲ್ ವುಡ್ ದ ಪುಗರ್ತೆದ ನಟಿ ಮಾಲಶ್ರೀ ಬೊಕ್ಕ ಆರೆನ ಮಗಲ್ ಅನನ್ಯಾ ಮೊಕುಲು ಕುತ್ತಾರ್ ಡ್ ಕೊರಗಜ್ಜನ ಆದಿ ಜಾಗೆಗ್ ಭೇಟಿ ಕೊರ್ದು ಆಶೀರ್ವಾದ ಪಡೆಯೆರ್.
ಈ ಪೊರ್ತುಡು ಮಾಲಶ್ರೀ ಮೇರ್ ಪಾತೆರ್ದ್, ಮೂಜಿ ತಿಂಗೊಲ್ದ ಪಿರವು ಈ ಕೊರಗಜ್ಜನ ಕಟ್ಟೆಗ್ ಬತ್ತ್ ದ್ ಅಜ್ಜಡ ಕೇಂಡ್ ದ್ ಇತ್ತೆ. ಮಾತಲ ಆಶ್ಚರ್ಯ ಪನ್ಪುನಂಚ ನಡತ್ಂಡ್. ಕ್ಷೇತ್ರದ ಶಕ್ತಿನ್ ಪನಿಯೆರೆ ಆವೊಂದು ಇಜ್ಜಿ. ಮುಲ್ಪ ಮಸ್ತ್ ಪಾಸಿಟಿವ್ ಎನರ್ಜಿ ಉಂಡು. ಉಲಯಿ ಪೋನಗನೇ ಸಾನಿಧ್ಯದ ಶಕ್ತಿ ಗೊತ್ತಾಪುಂಡು. ಎನ್ನಿದಿನಂಚ ಆಯಿನೆಕ್ಕ್ ಪರಕೆ ಸಂದಾದ್ ಕುಡ ಆಶೀರ್ವಾದ ದೆತೊನರೆ ಕುಟುಂಬ ಬೊಕ್ಕ ದೋಸ್ತಿಲೆನೊಟ್ಟಿಗೆ ಬೈದೆ. ನನಲ ಬರ್ಪೆ ಪಂದ್ ಪಂಡೆರ್.
ಈ ಪೊರ್ತುಡು ಶ್ರೀ ಪಂಜಂದಾಯ ಬಂಟ ವೈದ್ಯನಾಥ ಆದಿ ಕೊರಗತನಿಯ ಸೇವಾ ಟ್ರಸ್ಟ್ ದಕುಲು ಮಾಲಶ್ರೀ ಬೊಕ್ಕ ಮಗಲೆನ್ ತಮ್ಮನ ಮಲ್ತೆರ್.
ಯಕ್ಷತರಂಗ ಬೆಂಗ್ಲೂರ್ ದ ಮುತಾಲಿಕೆಡ್ ಶಾಲೆದ ಜೋಕುಲೆಗ್ ಯುನಿಫಾರ್ಮ್ ಪಟ್ಟುನ ಲೇಸ್ ರಘುವನ ಹಳ್ಳಿಡ್ ಇಪ್ಪುನ ಶ್ರೀ ಸಿದ್ದಗಂಗಾ ವಿದ್ಯಾ ಕೇಂದ್ರಡ್ ಇಂಚಿಪ್ಪ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಸಿದ್ದಗಂಗಾ ಶಾಲೆದ ಸ್ಥಾಪಕ ಸದಸ್ಯೆರ್, ಶಿಕ್ಷಕೆರ್ ಸಿ. ಎನ್. ನಾಗರಾಜ್ ಮೇರ್ ಪಾತೆರ್ದ್, ಯಕ್ಷತರಂಗ ಬೆಂಗ್ಲೂರ್ ಡ್ ಕರಿನ 12 ವರ್ಷೊರ್ದಿಂಚಿ ಯಕ್ಷಗಾನ ತರಬೇತಿನ್ ಕೊರ್ದು ಸುಮಾರ್ ಯಕ್ಷಗಾನ ಪ್ರಸಂಗನ್ ಪ್ರದರ್ಶನ ಮಲ್ತ್ ದ್ ಜನ ಮೆಚ್ಚುಗೆಗ್ ಪಾತ್ರ ಆತ್ಂಡ್. ಯಕ್ಷತರಂಗ ಯಕ್ಷಗಾನಗ್ ಮಾತ್ರ ಸೀಮಿತ ಆವಂದೆ ಅನಾಥ ಆಶ್ರಮ ಬೊಕ್ಕ ಸರ್ಕಾರಿ ಶಾಲೆಡ್ ಓದುನ ಬಡ ಜೋಕುಲೆಗ್ ಸಕಾಯನ್ ಕೊರೊಂದು ಉಂಡು. ಆತೆ ಅತ್ತಾಂದೆ ಬೇತೆ ಸುಮಾರ್ ಸಮಾಜಮುಖಿ ಬೇಲೆಲು ಏಪಲ ನಡತೊಂದು ಉಂಡು. ಕರಿನ ಸುಮಾರ್ ವರ್ಷೊದಿಂಚ ಸಿದ್ದಗಂಗಾ ಶಾಲೆದ ಚಾವಡಿಡ್ ಯಕ್ಷತರಂಗದ ಮುತಾಲಿಕೆಡ್ ಯಕ್ಷಗಾನದ ತರಬೇತಿ ಶಿಬಿರ ನಡತೊಂದು ಇತ್ತ್ಂಡ್. ಈ ಶಾಲೆದ ಬಡ ಕಲ್ಪಾರ್ಥಿನಕ್ಲೆಗ್ ಧರ್ಮಾರ್ಥವಾದ್ ಯಕ್ಷಗಾನದ ತರಬೇತಿ ಕೊರೊಂದುಪ್ಪುನ ಬೊಕ್ಕ ಉಂದುವೇ ಶಾಲೆಡ್ ಓದೊಂದು ಇಪ್ಪುನ ಜೋಕುಲೆಗ್ ಯುನಿಫಾರ್ಮ್ ಪಟ್ಟುನ ಲೇಸ್ ಇಸೇಸ ಆತ್ಂಡ್. ನನದ ದಿನಟ್ಟ್ ಯಕ್ಷತರಂಗದ ಪ್ರತಿಯೊಂಜಿ ಲೇಸ್ ಪುಗರ್ತೆ ಪಡೆಯಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಯಕ್ಷತರಂಗ ಬೆಂಗ್ಲೂರ್ ದ ಅಧ್ಯಕ್ಷೆರ್ ಪಳ್ಳಿ ವಿಶ್ವನಾಥ ಶೆಟ್ಟಿ ಮೇರ್ ಪಾತೆರ್ದ್, ಕರಿನ 12 ವರ್ಷದ ಪಿರವು ತುಳುನಾಡ್ ದ ಯುವಜನತೆ ತನ್ನ ಜೀವನಗಾದ್ ಬೆಂಗ್ಲೂರ್ ಗು ಬತ್ತ್ ದ್, ಸಮಯ ಇಜ್ಜಿಂದಿನ ಪೊರ್ತುಡುಲ ನಮ್ಮ ಸಂಸ್ಕೃತಿನ್ ಮದಪೆರೆ ಬಲ್ಲಿ ಪನ್ಪುನ ಮನವರಿಕೆಡ್ ಉತ್ಸಾಹ ಇಪ್ಪುನ ಜವನೆರೆನೊಟ್ಟಿಗೆ ಸ್ಥಾಪನೆ ಆಯಿನ ಯಕ್ಷತರಂಗ ಬೆಂಗ್ಲೂರ್ ಇನಿ ಸುಮಾರ್ ಬಡ ಕುಟುಂಬಗ್ ರಕ್ಷ ರಂಗವಾದ್ ರಕ್ಷಣೆನ್ ಕೊರೊಂದು ಉಂಡು. ಯಕ್ಷತರಂಗದ ಯಕ್ಷಗಾನ ತರಬೇತಿನ್ ಪಡೆಯಿನ ಕಲ್ಪಾರ್ಥಿಲು ನನದ ಪುಗರ್ತೆದ ಕಲಾವಿದೆರಾದ್ ದುಂಬಾರಿಯಾಡ್ ಪಂದ್ ಆಶೀರ್ವಾದ ಮಲ್ತೆರ್.
ಚಾವಡಿಡ್ ಯಕ್ಷತರಂಗ ಬೆಂಗ್ಲೂರ್ ದ ಸಂಚಾಲಕೆರ್ ಗೋಪಾಲ್ ಪೂಜಾರಿ ಪಟ್ಟೆ, ಕಾರ್ಯದರ್ಶಿ ಸುಕೇಶ್ ಶೆಟ್ಟಿ ಮಾಳ, ಕೋಶಾಧಿಕಾರಿ ನಿರಂಜನ್ ಸುವರ್ಣ ಪಟ್ಟೆ ಇತ್ತೆರ್. ಲೇಸ್ ದ ಯಶಸ್ವಿಗ್ ಸಂತೋಷ್ ಶೆಟ್ಟಿ, ಸುರೇಂದ್ರ ಪೂಜಾರಿ, ಪ್ರದಿಪ್ ಶೆಟ್ಟಿ, ಚಿದಂಬರ ಶೆಟ್ಟಿ ಬೊಕ್ಕ ಶ್ರೀ ಸಿದ್ದಗಂಗಾ ಶಾಲೆದ ಆಡಳಿತ ಮಂಡಳಿ ಬೊಕ್ಕ ಜೋಕುಲು ಸಹಕಾರ ಮಲ್ತೆರ್.
ವರದಿ: ಸದಾನಂದ ಕಾರ್ಲ
ಕುಡ್ಲ ಪೇಂಟೆಡ್ ಬೇತೆ ಬೇತೆ ರೀತಿಡ್ ಸಂಚಾರಿ ನಿಯಮ ಉಲ್ಲಂಘನೆ ಮಲ್ತಿನ 170 ಜನತ್ತ (ಅನುಜ್ಞಾ ಪತ್ರ) ಡಿ.ಎಲ್. ನ್ ಆರ್ ಟಿ ಒ ಅಧಿಕಾರಿಲು ಕಾನ್ಸಲ್ ಮಲ್ದೆರ್.
24 ಆಕ್ಸಿಡೆಂಟ್ ಕೇಸ್, 12 ಸ್ವೀಡ್ ರೈಡ್, 11 ಗೂಡ್ಸ್ ಗಾಡಿಡ್ ಪ್ರಯಾಣಿಕೆರೆನ್ ಲೆತೊಂದು ಪೋಯಿನ ಬಗೆಟ್ಟ್, 95 ಹೆಲ್ಮೆಟ್ ಇಜ್ಜಂದೆ ಬೈಕ್ ಡ್ರೈವ್ ಮಲ್ತಿನ ಕೇಸ್, 13 ಸೀಟ್ ಬೆಲ್ಟ್ ಪಾಡಂದೆ ಗಾಡಿ ಕೊನೊಯಿನ ಬಗೆಟ್ಟ್, 7 ರೆಡ್ ಸಿಗ್ನಲ್ ಜಂಪ್, 5 ಡ್ರೈವಿಂಗ್ ಪೊರ್ತುಡು ಮೊಬೈಲ್ ಗಲಸಿನ ಕೇಸ್ ಗ್ ಸಂಬಂಧಪಟ್ಟಿನಂಚೆನೆ ಡಿಎಲ್ ಕಾನ್ಸಲ್ ಆತ್ಂಡ್.
ಅಂಚೆನೆ ನೋ ಪಾರ್ಕಿಂಗ್ ಜಾಗೆಡ್ ಪಾರ್ಕ್ ಮಲ್ತಿನ 371 ಗಾಡಿದ ಮಿತ್ತ್, ಬೊಕ್ಕ ಕರ್ಕಶ ಹಾರ್ನ್ ಗಲಸಿನ 31 ಗಾಡಿ, ಟಿಂಟ್ ಗಲಸಿನ 23 ಗಾಡಿದ ಮಿತ್ತ್ ಕೇಸ್ ದಾಖಲ್ ಆತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 19ನೇ ಸಂಚಿಕೆ ಆ.8 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್ ಬೊಕ್ಕ ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ಆ.9 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ರಾಮ್ ಫ್ರೆಂಡ್ಸ್ (ರಿ.) ಕಟೀಲ್ ಸೇವಾ ಕೂಟದ 4ನೇ ವರ್ಷದ ಗೌಜಿ ಬೊಕ್ಕ ಪನವುದ ಸಕಾಯ ಕೊರ್ಪುನ ಲೇಸ್ ಆ.6 ಐತಾರ ಮಧ್ಯಾಹ್ನ 3 ಗಂಟೆಗ್ ಕಾಮತ್ ಕಾಂಪ್ಲೆಕ್ಸ್ “ಶ್ರೀ ಲಕ್ಷ್ಮಿ ಸಭಾಗ್ರಹ ಕಟೀಲ್ ಡ್ ಮಲ್ಲ ಬಿನ್ನೆರೆನ ಬೊಕ್ಕ ಪನವುದ ಸಕಾಯ ಮಲ್ತಿನಕ್ಲೆನ ಸಮ್ಮುಖಡ್ ನಡತ್ಂಡ್.
ಮಲ್ಲ ಬಿನ್ನೆರೆನ್ ಕೂಟದ ಸದಸ್ಯೆರ್ ಯಶಸ್ ಮೇರ್ ಎದ್ಕೊಂದು, ಲೇಸ್ ದ ಉದಿಪನನ್ ಶ್ರೀ ಹರಿನಾರಾಯಣದಾಸ ಆಸ್ರಣ್ಣ ಕಟೀಲ್ ಮೆರೆನ ಆಶೀರ್ವಚನ ಮಲ್ತೆರ್.
ಮಲ್ಲ ಬಿನ್ನೆರಾದ್ “ಶಿವರಾಮ್ ಕೋಟ್ಯಾನ್ ಪೆರ್ಮುದೆ, ರಂಜಿತ್ ಪೂಜಾರಿ ತೋಡಾರು, ರಾಜೇಶ್ ಅಮೀನ್ ಪೊರ್ಕೋಡಿ, ಪ್ರಕಾಶ್ ಕುಕ್ಯಾನ್ ಎಕ್ಕಾರ್, ರತ್ನಾಕರ್ ಶೆಟ್ಟಿ ಎಕ್ಕಾರ್, ರಾಜಶೇಖರ್. ಎನ್., ಪ್ರದೀಪ್ ಶೆಟ್ಟಿ ದುರ್ಗಾ ನಗರ- ಎಕ್ಕಾರ್, ಹರಿಪ್ರಸಾದ್ ದುರ್ಗಾ ನಗರ -ಎಕ್ಕಾರ್ ಬೊಕ್ಕ ರಾಮ್ ಫ್ರೆಂಡ್ಸ್ (ರಿ.) ಕಟೀಲ್ ಕೂಟದ ಸಂಸ್ಥಾಪಕೆರ್ ರಮಾನಂದ ಪೂಜಾರಿ ಕಟೀಲ್ ಬೊಕ್ಕ ಅಧ್ಯಕ್ಷೆರ್ ರೋಹಿತ್ ಪೊಳಲಿ ಪಾಲ್ ಪಡೆದಿತ್ತೆರ್.
ಲೇಸ್ ಡ್ 2022-23ನೇ ಸಾಲ್ ದ” ಎಸ್ ಎಸ್ ಎಲ್ ಸಿಡ್ ಎಡ್ಡೆ ಮಾರ್ಕ್ಸ್ ಪಡೆಯಿನ” ಕಲ್ಪಾರ್ಥಿಲೆಗ್ ಬೊಕ್ಕ ಪಿಯುಸಿಡ್ ಎಡ್ಡೆ ಮಾರ್ಕ್ಸ್ ಪಡೆಯಿನ ನಾಲ್ ಕಲ್ಪಾರ್ಥಿಲೆನ್ ಮಾನಾದಿಗೆ ನಡತ್ಂಡ್.
ಅವೆರ್ದ್ ಬೊಕ್ಕ ಕೂಟದ ಮುತಾಲಿಕೆಡ್ 1,000 ದ ಲೆಕ್ಕ 10 ಕಲ್ಪಾರ್ಥಿಲೆಗ್ 10,000 ಪ್ರೋತ್ಸಾಹ ಧನ ಕೊರಿಯೆರ್. ಬೊಕ್ಕ 5,000 ದ ಲೆಕ್ಕ ಆಸಕ್ತ ಮೂಜಿ ಕಲ್ಪಾರ್ಥಿಲೆಗ್ 15,000 ಪನವುನ್ ಕೊರಿಯೆರ್. ಬೊಕ್ಕ ಆಸಕ್ತ ಕುಟುಂಬಗ್ 10,000 ಸಾರದಲೆಕ್ಕ 9 ಕುಟುಂಬಗ್ ತಲಾ 90,000 ರೂ. ನ್ ಬಿನ್ನೆರೆನ ಬೊಕ್ಕ ಸಕಾಯ ಮಲ್ತಿನಕ್ಲೆನ ಸಮ್ಮುಖಡ್ ಒಟ್ಟಾದ್ 1,15,000 ರೂ. ನ್ ಕೊರಿಯೆರ್.
ಸಮಾಜಡ್ ಏಪಲ ಸಮಾಜ ಸೇವೆನ್ ಮಲ್ತೊಂದು ಇತ್ತಿನ ಅರ್ಜುನ್ ಭಂಡಾರ್ಕರ್, ಚಂದ್ರಶೇಖರ್ ಪೂಜಾರಿ ಬಿ.ಸಿ.ರೋಡ್, ಬಿರುವೆರ್ ಕುಡ್ಲ ಬಜಪೆ ಘಟಕ, ತೇಜ್ ಪಾಲ್ ಸುವರ್ಣ ಹಳೆಯಂಗಡಿ, ನಾಲ್ ಸಮಾಜ ಸೇವಕೆರೆಗ್ ಸೇವಾ ಮಾಣಿಕ್ಯ ಪ್ರಶಸ್ತಿ ಬೊಕ್ಕ ಯುವ ಪ್ರತಿಭೆ ತನಿಷಾ ಕಾರ್ಲ ಮೊಕ್ಲೆಗ್ ತಮ್ಮನ ಲೇಸ್ ನಡತ್ಂಡ್.
ಅಂಚೆನೆ ಪನವುದ ಸಕಾಯ ಮಲ್ತಿನಕುಲು, ಕೂಟದಕ್ಲೆಗ್ ಮಾನಾದಿಗೆ ನಡತ್ಂಡ್. ಈ ಪೊರ್ತುಡು ರಾಮ್ ಫ್ರೆಂಡ್ಸ್ (ರಿ.) ಕಟೀಲ್ ಕೂಟದ ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಇತ್ತೆರ್.
ದಕ್ಷಿಣ ಕನ್ನಡ ಜಿಲ್ಲಾ ಖಾಸಗಿ ಅನುದಾನಿತ ಪದವಿ ಪೂರ್ವ ಕಾಲೇಜ್ ಲೆನ ಉಪನ್ಯಾಸಕರ ಬೊಕ್ಕ ಬೋಧಕೇತರ ಸಂಘದ ಮಹಾಸಭೆ ಆ.5 ಕ್ಕ್ ನಡತ್ಂಡ್.
ಈ ಸಭೆಟ್ಟ್ ನನದ ದಿನಟ್ಟ್ ದಕ್ಷಿಣ ಕನ್ನಡ ಜಿಲ್ಲಾ ಪದವಿಪೂರ್ವ ಅನುದಾನಿತ ನೌಕರರ ಸಂಘ ಪಂದ್ ಬದಲಾವಣೆ ಮಲ್ತೆರ್. ಬೊಕ್ಕ ಪೊಸ ಪದಾಧಿಕಾರಿಲೆನ್ ಆಯ್ಕೆ ಮಲ್ತೆರ್.
ಸಂಘದ ಪೊಸ ಜಿಲ್ಲಾಧ್ಯಕ್ಷೆರಾದ್ ಸುಬ್ರಹ್ಮಣ್ಯದ ಎಸ್ ಎಸ್ ಪಿ ಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ್ ನಾಯಕ್, ಕಾರ್ಯದರ್ಶಿಯಾದ್ ಅಡ್ಯನಡ್ಕ ಜನತಾ ಪದವಿಪೂರ್ವ ಕಾಲೇಜ್ ದ ಜೀವಶಾಸ್ತ್ರ ಉಪನ್ಯಾಸಕೆರ್ ರವಿಕುಮಾರ್, ಉಪಾಧ್ಯಕ್ಷೆರಾದ್ ಕೆನರಾ ಪದವಿಪೂರ್ವ ಕಾಲೇಜ್ ದ ಉಪನ್ಯಾಸಕೆರ್ ಮಧುಕೇಶ್ವರ್ ಶಾಸ್ತ್ರಿ, ಕೋಶಾಧಿಕಾರಿಯಾದ್ ಎಡಪದವು ವಿವೇಕಾನಂದ ಪದವಿಪೂರ್ವ ಕಾಲೇಜ್ ದ ಸತೀಶ್, ಜತೆ ಕಾರ್ಯದರ್ಶಿಯಾದ್ ಬೆಸೆಂಟ್ ಪದವಿ ಪೂರ್ವ ಕಾಲೇಜ್ ದ ಕಿರಣಾ ಆಯ್ಕೆ ಆಯೆರ್.
ತಲಪಾಡಿ: ದೇವಿಪುರ ಶ್ರೀ ದುರ್ಗಾಪರಮೇಶ್ವರೀ ಸೇವಾ ಸಂಘ ಯುವಕ ಮಂಡಲ (ರಿ.) ದ ಮುತಾಲಿಕೆಡ್ ಕೋಟೆಕಾರ್, ತಲಪಾಡಿ, ಕಿನ್ಯ ಗ್ರಾಮದ ಸಂಘ ಸಂಸ್ಥೆಲೆನ ಒಟ್ಟುಸೇರಿಗೆಡ್ ದೇವೆರೆ ಬಾಕಿಲ್ದ ಕಂಡಡೊಂಜಿ ದಿನ ಗ್ರಾಮೀಣ ಕ್ರೀಡಾಕೂಟ ಆ.13 ಐತಾರ ಬೊಲ್ಪುರ್ದ್ ದೇವಿಪುರ ಶ್ರೀ ಕ್ಷೇತ್ರದ ಎದುರುದ ಕಂಡಡ್ ನಡಪರೆ ಉಂಡು.
ಈ ಕ್ರೀಡಾಕೂಟಡ್ ಅಂಗನವಾಡಿ, ಎಲ್ ಕೆಜಿ, ಯುಕೆಜಿ ಜೋಕುಲೆಗ್ 50 ಮೀ. ಬಲಿಪೆರೆ, ಸಂಗೀತ ಕುರ್ಚಿ, ಬಾಲ್ ದಕ್ಕರೆ ಉಂಡು. 1-3 ನೇ ಕ್ಲಾಸ್ ದ ಜೋಕುಲೆಗ್ 50 ಮೀ. ಬಲಿಪೆರೆ, ಸಂಗೀತ ಕುರ್ಚಿ, ಬಾಲ್ ಪಾಸಿಂಗ್, 4-7 ನೇ ಕ್ಲಾಸ್ ದ ಜೋಕುಲೆಗ್ 100 ಮೀ. ಬಲಿಪೆರೆ, ಪಾಲೆಡ್ ಒಯಿಪುನ ಗೊಬ್ಬು, ಬೊಕ್ಕ 8-10 ನೇ ಕ್ಲಾಸ್ ದ ಜೋಕುಲೆಗ್ 100 ಮೀ. ಬಲಿಪೆರೆ, ಮೂಜಿ ಕಾರ್ ಡ್ ಬಲಿಪೆರೆ, ಪಾಲೆಡ್ ಒಯಿಪುನ ಗೊಬ್ಬು ನಡಪರೆ ಉಂಡು.
ಸಾರ್ವಜನಿಕ ವಿಭಾಗಡ್ ಆಂಜೋವ್ ನಕ್ಲೆಗ್ 100 ಮೀ. ಬಲಿಪೆರೆ, ಮೂಜಿ ಕಾರ್ ಡ್ ಬಲಿಪರೆ, 4×100=ರಿಲೇ, ಪಿರ ಪಿರ ಬಲಿಪರೆ, ಪೊಂಜೋವ್ ನಕ್ಲೆಗ್ 100 ಮೀ. ಬಲಿಪರೆ, ಲಿಂಬೆ ಚಮಚ ಬಲಿಪರೆ, ಬಾಲ್ ಪಾಸಿಂಗ್, 4×100=ರಿಲೇ, ಪಿರ ಪಿರ ಬಲಿಪರೆ ಬೊಕ್ಕ ಹಿರಿಯ ವಿಭಾಗಡ್ 60 ವರ್ಷ ಮಿತ್ತ್ ದಕ್ಲೆಗ್ ಅಂಜೋವ್ ನಕ್ಲೆಗ್ 100 ಮೀ. ಬೇಗ ನಡಪರೆ, ಪೊಂಜೋವ್ ನಕ್ಲೆಗ್ ಕರ ಪುಡಪುನ ಗೊಬ್ಬು ನಡಪರೆ ಉಂಡು, ಆತೆ ಅತ್ತಂದೆ ಸಾರ್ವಜನಿಕ ಮುಕ್ತ ವಿಭಾಗಡ್ ಕರ ಪುಡಪುನ, ಕಂಡನಿ ಬೊಡೆದಿನ್ ಪಾಲೆಡ್ ಒಯಿಪುನ ಗೊಬ್ಬು ಬೊಕ್ಕ ಗುಂಪು ವಿಭಾಗಡ್ ಬಲ್ಲ್ ಒಯಿಪುನ, ವಾಲಿಬಾಲ್ ಗೊಬ್ಬುಲು ನಡಪರೆ ಉಂಡು.
ಈ ಗ್ರಾಮೀಣ ಕ್ರೀಡಾಕೂಟಡ್ ಮಾತೆರ್ಲಾ ಪಾಲ್ ಪಡೆದ್ ಕೂಟನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ತಲಪಾಡಿ, ದೇವಿಪುರ ಶ್ರೀ ದುರ್ಗಾಪರಮೇಶ್ವರೀ ಸೇವಾ ಸಂಘ ಯುವಕ ಮಂಡಲ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ತುಳುನಾಡ ಸಂಸ್ಕೃತಿನ್ ಒರಿಪಾಯೆರೆ ಕಾರಣ ಆಯಿನ ಹಿರಿಯೆರೆನ್ ಮದಪರೆ ಬಲ್ಲಿ : ಕರುಣಾಕರ ಎಂ.ಶೆಟ್ಟಿ
ಬೊಂಬೈ: ತುಳು ಸಂಘ ಬೊರಿವಿಲಿ ಸ್ಥಾಪನೆ ಆಯೆರೆ ಸಂಘದ ಮಾಜಿ ಅಧ್ಯಕ್ಷೆರಾಯಿನ ವಾಸು ಪುತ್ರನ್, ಪ್ರಕಾಶ್ ಶೆಟ್ಟಿ ಪೇಟೆಮನೆ ಮೊಕ್ಲೆನ ಕೊಡುಗೆ ಮಸ್ತ್ ಉಂಡು. ಬೇತೆ ಬೇತೆ ಸಮುದಾಯ ದಕ್ಲೆನ್ ಒಂಜಿ ಕಡೆಕ್ಕ್ ಸೇರ್ಸಾದ್, ಬೊರಿವಿಲಿ ಜಯರಾಜ ನಗರದ ಮಹಿಷ ಮರ್ಧಿನಿ ದೇವಲ್ಯದ ಪುಣ್ಯ ಜಾಗೆಡ್, ಅಪ್ಪೆನ ಆಶೀರ್ವಾದರ್ದ್ ನಮ್ಮ ತುಳು ಸಂಘ ಬೊರಿವಿಲಿ ಸ್ಥಾಪನೆ ಆಂಡ್. ದೇವಲ್ಯದ ಶ್ರೀಧರ್ ಶೆಟ್ಟಿ ಮೆರೆನ್ ಮಸ್ತ್ ಗೌರವರ್ದ್ ನೆಂಪು ಮಲ್ಪೊಡಾಪುಂಡು. ಅತ್ತಂದೆ ಪ್ರದೀಪ್ ಶೆಟ್ಟಿ ಮೇರ್ ಸೇರ್ದ್ ಮೆರೆನ ಪರಿವಾರದಕ್ಲೆನ್ ಗೌರವರ್ದ್ ಅಭಿನಂದನೆ ಸಂದಾವೆ ಪಂದ್ ತುಳು ಸಂಘದ ಅಧ್ಯಕ್ಷೆರ್ ಕರುಣಾಕರ ಎಂ. ಶೆಟ್ರೆ ಪಂಡೆರ್.
ಮೇರ್ ಆ.6 ಕ್ಕ್ ತುಳು ಸಂಘ ಬೊರಿವಿಲಿದ ಮಹಿಳಾ ವಿಭಾಗದ ಮುತಾಲಿಕೆಡ್ ಬೊರಿವಿಲಿ (ಪ.) ಎಂ.ಎಚ್. ಕಾಲೋನಿದ ಸಮರ್ಥ ಬ್ಯಾಂಕ್ವೆಟ್ ಹಾಲ್ ಡ್ ನಡತಿನ ‘ಆಟಿಡ್ ಒಂಜಿ ಕೂಟ’ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು, ಬತ್ತಿನ ಬೇತೆ ಬಿನ್ನೆರೆನೊಟ್ಟಿಗೆ ತುಡರ್ ಅರ್ಲಾದ್ ಪಾತೆರಿಯೆರ್.
ಆತೆ ಅತ್ತಂದೆ ತುಳು ಸಂಘದ ಬುಲೆಚ್ಚಿಲ್ ಡ್ ಒವ್ವೇ ಬೇಲೆ ಇತ್ತ್ಂಡಲ ನಮ ಮಹಿಷ ಮರ್ಧಿನಿ ದೇವಲ್ಯದ ಮುಖ್ಯಸ್ಥೆರಾಯಿನ ಪ್ರದೀಪ್ ಶೆಟ್ಟಿ ಮೆರೆನ್, ಸಂಘದ ಗೌರವಾಧ್ಯಕ್ಷೆರ್ ವಿರಾರ್ ಶಂಕರ್ ಶೆಟ್ಟಿ, ಸಲಹೆಗಾರೆರ್ ಮುಂಡಪ್ಪ ಪಯ್ಯಡೆ, ಶ್ರೀನಿವಾಸ ಸಾಫಲ್ಯ, ಬಂಟರ ಸಂಘದ ಜೋಗೇಶ್ವರಿ-ದಹಿಸರ್ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ನಿಟ್ಟೆ ಎಂ. ಜಿ. ಶೆಟ್ಟಿ ಮೊಕ್ಲೆಗ್ ಸಂಪರ್ಕ ಮಲ್ತ್ ಸ್ ಧೈರ್ಯಡ್ ದುಂಬು ಪೋವೊಂದು ಉಲ್ಲ.ಈ ಸಂಘಡ್ ಮಾತೆರ್ಲಾ ಒಟ್ಟಾದ್ ತುಳು ಸಂಘನ್ ದುಂಬು ಕೊನೊವೊಡು ಪಂದ್ ಆಟಿಡ್ ಒಂಜಿ ಕೂಟ ಆಚರಣೆನ್ ಆಯೋಜನೆ ಮಲ್ತಿನ ತುಳು ಸಂಘ ಬೊರಿವಿಲಿದ ಮಹಿಳಾ ವಿಭಾಗಗ್ ಬೊಕ್ಕ ಸಹಕಾರ ಕೊರ್ನ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬತ್ತಿನ ಬೊಂಬೈ ಬಂಟ್ಸ್ ಅಸೋಸಿಯೇಶನ್ ದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್, ಪುಗರ್ತೆದ ಯಕ್ಷಗಾನ ಕಲಾವಿದೆರ್ ತೇಜಾಕ್ಷಿ ಶೆಟ್ಟಿ ಮೇರ್ ಪಾತೆರ್ದ್, ನಮ್ಮ ತುಳುನಾಡ್ ದ ಭಾಷೆ ಬೊಕ್ಕ ಸಂಸ್ಕೃತಿನ್ ಮುಲ್ಪಲ ಒರಿಪಾದ್ ಬುಲೆಪಾವುನ ಬಗೆಟ್ಟ್ ಪಾತೆರ್ದ್ ಸಂಘಗ್ ಎಡ್ಡೆಪ್ಪು ಬಯಕಿಯೆರ್.
ಜಯರಾಜ ನಗರದ ಮಹಿಷ ಮರ್ಧಿನಿ ದೇವಲ್ಯದ ಪ್ರಮುಖೆರಾಯಿನ ಪ್ರದೀಪ್ ಶೆಟ್ಟಿ ಮೇರ್ ಪಾತೆರ್ದ್, ತುಳು ಸಂಘ ಉಂದುವೇ ರೀತಿ ನನ ಸುಮಾರ್ ಲೇಸ್ ನ್ ಬೊರಿವಿಲಿ ಪರಿಸರಡ್ ನಡಪಾದ್ ತುಳುನಾಡ್ ದ ಸಂಸ್ಕೃತಿನ್ ಒರಿಪಾವೊಂದು ಸಂಘ ನನಾತ್ ಮಲ್ಲ ಮಟ್ಟಗ್ ಪೋವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ತಿಲೋತ್ತಮ ಪಿ. ವೈದ್ಯ ಮೇರ್ ಪಾತೆರ್ದ್, ಲೇಸ್ ದ ಆಯೋಜನೆಗ್ ಸಹಕಾರ ಮಲ್ತಿನ ಮಹಿಳಾ ವಿಭಾಗಗ್ ಬೊಕ್ಕ ಕಾರ್ಯಕಾರಿ ಸಮಿತಿದ ಮಾತೆರೆಗ್ಲಾ ಅಭಿನಂದನೆ ಸಂದಾಯೆರ್.
ಪ್ರಮುಖ ವಕ್ತಾರೆರಾದ್ ಪಾಲ್ ಪಡೆದಿತ್ತಿನ ತುಳು ಕನ್ನಡ ಸಾಹಿತಿ ಶಿಮಂತೂರು ಚಂದ್ರಹಾಸ ಸುವರ್ಣ ಮೇರ್ ಆಟಿದ ಬಗೆಟ್ಟ್ ಬೊಕ್ಕ ಆಟಿ ಆಚರಣೆದ ಬಗೆಟ್ಟ್ ತೆರಿಪಾಯೆರ್.
ಬಿನ್ನೆರೆನ್ ಪರಿಚಯ ಮಲ್ತ್ ದ್ ಸಭಾ ಲೇಸ್ ನ್ ಸುಧಾರಿಕೆ ಮಲ್ತ್ ದ್ ಸಂಘದ ಮಾಜಿ ಅಧ್ಯಕ್ಷೆರ್ ಪ್ರಕಾಶ್ ಶೆಟ್ಟಿ ಪೇಟೆಮನೆ ಮೇರ್ ಪಾತೆರ್ದ್, ಆಟಿದ ಬಗೆಟ್ಟ್ ಪೊಲಬು ಮಲ್ತೆರ್.
ಪ್ರಧಾನ ಕಾರ್ಯದರ್ಶಿ ರಜಿತ್ ಸುವರ್ಣ ಸಾಂಸ್ಕೃತಿಕ ಲೇಸ್ ದ ಸುಧಾರಿಕೆ ಮಲ್ತೆರ್. ಶೋಭಾ ಶೆಟ್ಟಿ ಮೇರ್ ಪ್ರಾರ್ತನೆ ಮಲ್ತೆರ್. ಮಲ್ಲ ಬಿನ್ನೆರೆನ್ ಲಕ್ಷ್ಮಿ ದೇವಾಡಿಗ ಪರಿಚಯ ಮಲ್ತೆರ್.
ಈ ಲೇಸ್ ದ ಚಾವಡಿಡ್ ರತಿ ಶಂಕರ್ ಶೆಟ್ಟಿ, ಸಂಘದ ಉಪಾಧ್ಯಕ್ಷೆರ್ ಹರೀಶ್ ಜಿ. ಮೈಂದನ್, ಕೋಶಾಧಿಕಾರಿ ಚಂದ್ರಹಾಸ ಬೆಳ್ಚಡ, ಸಾಂಸ್ಕೃತಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಕುಸುಮ ಬಿ. ಶೆಟ್ಟಿ, ಮೆಂಬರ್ ಶಿಪ್ ಕಮಿಟಿದ ಕಾರ್ಯಾಧ್ಯಕ್ಷೆರ್ ಜಯಂತಿ ಶೆಟ್ಟಿ ಇತ್ತೆರ್.
ಲೇಸ್ ದ ಅಕೇರಿಡ್ ಪಾಲ್ ಪಡೆದಿತ್ತಿನ ಮಾತ ಪೊಂಜೋವುಲು ಅಕಲ್ನಕಲ್ನ ಇಲ್ಲಡ್ ತಯಾರ್ ಮಲ್ತ್ ದ್ ಕನತಿನ ಆಟಿದ ಬೇತೆ ಬೇತೆ ತೆನಸ್ ಲೆನ್ ಕುಷಿಟ್ಟ್ ಬಲಸಿಯೆರ್.
