Tulu News

ಎಲ್ಲೆ ಗೃಹಲಕ್ಷ್ಮೀ ಯೋಜನೆದ ಉದಿಪನ

ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಲೆಡ್ ಒಂಜಾಯಿನ ಗೃಹಲಕ್ಷ್ಮೀ ಯೋಜನೆ ಎಲ್ಲೆ ಉದಿಪನ ಆಯೆರೆ ಉಂಡು.

ಮೈಸೂರ್ಡ್ ನಡಪುನ ಈ ಲೇಸ್ಗ್ ರಾಜ್ಯದ ಮಾತ ಫಲಾನುಭವಿಲು ಪಾಲ್ ಪಡೆಯೆರೆ ಉಲ್ಲೆರ್. ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಈ ಯೋಜನೆದ ಉದಿಪನ ಮಲ್ಪರೆ ಉಲ್ಲೆರ್. ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿಕೆಶಿ ಬೊಕ್ಕ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್ ಮಾತ ತಯಾರಿನ್ ಮಲ್ಪುವೆರ್. ಈ ಲೇಸ್ಗ್ ಜನಕ್ಲೆನ್ ಲೆತೊಂದು ಬರಿಯೆರೆ 2 ಸಾರ ಬಸ್ತ್ತ ವ್ಯವಸ್ಥೆ ಆತ್ಂಡ್ ಪಂದ್ ತೆರಿಪಾದೆರ್.

ಇನಿ ಬಿಜೆಪಿದ ಚಾರ್ಜ್ ಶೀಟ್ ಬುಡುಗಡೆ

ಸಿದ್ದರಾಮಯ್ಯ ಮೆರೆನ ಮುತಾಲಿಕೆದ ಕಾಂಗ್ರೆಸ್ ಸರ್ಕಾರ ಅಧಿಕಾರಗ್ ಬತ್ತ್ದ್ 100 ದಿನ ಕರಿಂಡ್. ಈ 100 ದಿನಟ್ಟ್ ಸಾಧನೆರ್ದ್ ವೇದನೆನೇ ಎಚ್ಚಾ ಪಂದ್ ಜನಕ್ಲೆಗ್ ಮನವರಿಕೆ ಮಲ್ಪರೆ ಸರ್ಕಾರದ ವಿರುದ್ಧ ಬಿಜೆಪಿ ಇನಿ ಚಾರ್ಜ್ಶೀಟ್ ಬುಡುಗಡೆ ಮಲ್ಪುಂಡು.

ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ, ಆರ್ ಅಶೋಕ್ ಸೇರಿನಂಚೆನೆ ಪಕ್ಷದ ಪ್ರಮುಖ ನಾಯಕೆರ್ ಈ ಕಾರ್ಯಕ್ರಮಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಕ್ಷದ ಮೂಲಲು ತೆರಿಪಾದ್ಂಡ್.

ಆಫ್ರಿಕಾದ ಕಾಂಗೋಡ್ ಉಗ್ರೆರೆನ ದಾಳಿ: 14 ಜನ ತೀರ್ ಪೋಯೆರ್

ಆಫ್ರಿಕಾದ ಕಾಂಗೋದ ಗೋಬು ಗ್ರಾಮಡ್ ಉಗ್ರೆರ್ ಮಲ್ತಿನ ದಾಳಿಡ್ 14 ಜನ ತೀರ್ ಪೋಯೆರ್.

ಕೊಡ್ಕೊ ಮಿಲಿಷಿಯಾ ಗುಂಪುಗು ಸೇರಿನ ಉಗ್ರೆರ್ ಕೋಡೆ ರಾತ್ರೆ ಗೋಬು ಗ್ರಾಮಗ್ ಪೊಗ್ಗುದು ಬೆಡಿ ಪತ್ತ್ದ್ ಜನಕ್ಲೆನ ಮಿತ್ತ್ ಗುಂಡು ಪಾರಾದೆರ್. ನೆಕ್ಕ್ ಪ್ರತೀಕಾರವಾದ್ ಕಾಂಗೋದ ಮಿಲಿಟರಿ ಸೇನೆಲ ಬೆಡಿತ್ತ ಗುಂಡುನ್ ಪಾರಾದೆರ್. ಈ ಪೊರ್ತುಡು ಒರಿ ಕಾಂಗೋ ಯೋಧೆ, ಅಂಚೆನೆ 4 ಉಗ್ರೆರ್ ಬೊಕ್ಕ 9 ನಾಗರಿಕೆರ್ ತೀರ್ ಪೋತೆರ್. ಅವ್ವತ್ತಂದೆ 2 ಯೋಧೆರ್ ಬೊಕ್ಕ 2 ಜನಕ್ಲೆಗ್ ಪೆಟ್ಟಾತ್ಂಡ್.

ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ  ಸರಣಿ ಲೇಸ್ ದ 22ನೇ ಸಂಚಿಕೆ ಆ.28 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ಡ್  ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆದಿತ್ತೆರ್. ಆ.29 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ  ಈ ಕಾರ್ಯಕ್ರಮ ಪ್ರಸಾರ ಆಪುಂಡು. ಈ ಲೇಸ್ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ದ https://itunes.apple.com/app/id6447231815 ಲಿಂಕ್ ಮುಖೇನ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್  ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಸೂರ್ಯನಡೆಗ್ ಪೋಯೆರೆ ಮೂರ್ತ ಫಿಕ್ಸ್: ಸೆ.2 ಕ್ಕ್ ಆದಿತ್ಯ-ಎಲ್1 ಉಡಾವಣೆ

ಚಂದ್ರಯಾನ-3 ಉಡಾವಣೆ ಯಶಸ್ಸಿ ಆಯಿಲೆಕ್ಕನೇ, ಇಸ್ರೋರ್ದ್ ಕುಡೊಂಜಿ ಐತಿಹಾಸಿಕ ಸಾಧನೆಗ್ ಮೂರ್ತ ಫಿಕ್ಸ್ ಆತ್ಂಡ್. ಸೂರ್ಯನಡೆಗ್ ಪೋಯೆರೆ ಆದಿತ್ಯ ಎಸ್1 ಉಡಾವಣೆಗ್ ದಿನ ಫಿಕ್ಸ್ ಆತ್ಂಡ್.

ಈ ಬಗೆಟ್ಟ್ ಎಕ್ಸ್ ಡ್ ಇಸ್ರೋ ಪೊಲಬು ಕೊರ್ತುಂಡು. ಸೂರ್ಯನ ಮಿತ್ತ್ ದ ಅಧ್ಯಯನಗಾದ್ ಆದಿತ್ಯ ಎಲ್1 ನ್ ಸೆ.2 ತ್ತ ದಾನಿ ಪಗೆಲ್ ಡ್ 11.50 ಕ್ಕ್ ಶ್ರೀಹರಿಕೋಟಾದ ಸತೀಶ್‌ ಧವನ್‌ ಉಡಾವಣಾ ಕೇಂದ್ರರ್ದ್ ಉಡಾವಣೆ ಮಲ್ಪರೆ ಉಂಡು ಪಂದ್ ತೆರಿಪಾದೆರ್.

ಆ.31: ಕನ್ನಡ ಸಂಸ್ಕೃತಿ ಇಲಾಖೆದ ನಿರೆಲ್ ಡ್ ಬೆಂಗ್ಲೂರುಡು ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ

ಬೆಂಗ್ಲೂರು : ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಪ್ರಸ್ತುತಿದ ಮುತಾಲಿಕೆಡ್ ಆ.31ಕ್ಕ್ ನಾರಾಯಣ ಗುರು ಜಯಂತಿ ನಡಪರೆ ಉಂಡು.

ಆನಿ ಕಂಠೀರವ ಕ್ರೀಡಾಂಗಣರ್ದ್ ಶ್ರೀ ನಾರಾಯಣ ಗುರುನ ಪ್ರತಿಮೆದೊಟ್ಟಿಗೆ ರವೀಂದ್ರ ಕಲಾಕ್ಷೇತ್ರ ಮುಟ್ಟ ಮೆರವಣಿಗೆ ಬರಿಯೆರೆ ಉಂಡು. ಬಯ್ಯಗ್ ರವೀಂದ್ರ ಕಲಾಕ್ಷೇತ್ರ ಬೆಂಗ್ಲೂರ್ಡ್ ಸಭಾ ಲೇಸ್ ನಡಪರೆ ಉಂಡು.

ಈ ಲೇಸ್ಗ್ ಮಾತೆರ್ಲಾ ಸಾರ ಸಾರ ಸಂಖ್ಯೆಡ್  ಬತ್ತ್ದ್ ಮೆರವಣಿಗೆ ಬೊಕ್ಕ ಸಭಾ ಲೇಸ್ ಡ್ ಪಾಲ್ ಪಡೆದ್ ಶ್ರೀ ಗುರುಕುಲೆನ ಜನ್ಮ ದಿನಾಚರಣೆನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಿಲ್ಲವ ಅಸೋಸಿಯೇಶನ್ ಬೆಂಗ್ಲೂರ್ (ರಿ.) ದ ಗುರ್ಕಾರ್ರೆ ಎಂ.ವೇದಕುಮಾರ್ ಲೆಪ್ಪೋಲೆಡ್ ತೆರಿಪಾದೆರ್.