Tulu News

ಸೆ.2-3: ಕುಂಜತ್ತಬೈಲ್ ಶ್ರೀ ಕೃಷ್ಣ ಭಜನಾ ಮಂದಿರ, ನಾಗ ಸನ್ನಿಧಿಡ್ ಪ್ರತಿಷ್ಠಾ ಕಲಶಾಭಿಷೇಕ ಪೂಜೆ

ಕುಡ್ಲ: ಕುಂಜತ್ತಬೈಲ್ ಶ್ರೀ ಕೃಷ್ಣ ಭಜನಾ ಮಂದಿರ ಬೊಕ್ಕ ನಾಗ ಸನ್ನಿಧಿಡ್ ಪ್ರತಿಷ್ಠಾ ಕಲಶಾಭಿಷೇಕ ಪೂಜೆ ಸೆ.2-3 ಕ್ಕ್ ನಡಪರೆ ಉಂಡು.

ಸೆ.2 ಸನಿಯಾರ ಪುದೆಕಾಣಿಕೆ ಬೊಕ್ಕ ಬೊಳ್ಳಿದ ಶ್ರೀ ಕೃಷ್ಣ ದೇವೆರೆನ ಪೋಟೋ ಬೊಕ್ಕ ನಾಗದೇವೆರೆನ ಕಲ್ಲ್ ದ ಮೂರ್ತಿದೊಟ್ಟಿಗೆ ಶೋಭಾಯಾತ್ರೆ ನಡಪರೆ ಉಂಡು.

ಸೆ.3 ಐತಾರ ಕೊಂರ್ಗಿಬೈಲ್ ಕೆ.ನಾರಾಯಣ ಮಯ್ಯ ಮೆರೆನ ಮುತಾಲಿಕೆಡ್ ಶ್ರೀ ನಾಗದೇವೆರ್ ಬೊಕ್ಕ ಶ್ರೀಕೃಷ್ಣ ದೇವೆರೆನ ಪ್ರತಿಷ್ಠೆ ಆಯೆರೆ ಉಂಡು.

ಈ ಲೇಸ್ ಗ್ ಭಕ್ತಾಭಿಮಾನಿಲು ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು, ಶ್ರೀ ಕೃಷ್ಣ ದೇವೆರೆನ ಬೊಕ್ಕ ನಾಗದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಸಮಿತಿ, ಪ್ರತಿಷ್ಠಾ ಕಲಶಾಭಿಷೇಕ ಸಮಿತಿ, ಮಹಿಳಾ ಸಮಿತಿದ ಮಾತ ಸರ್ವಸದಸ್ಯೆರ್ ತೆರಿಪಾದೆರ್.

ಹ್ಯುಮಾನಿಟಿ ಟ್ರಸ್ಟ್ ದ 20 ಧರ್ಮಾರ್ಥ ಇಲ್ಲ್ ಲೆನ ಉದಿಪನ ಮಲ್ತಿನ ಡಾ.ಸಂತೋಷ್ ಹೆಗ್ಡೆ

ಬೆದ್ರ: ಶ್ರೀಮಂತಿಕೆ ಬೊಕ್ಕ ಅಧಿಕಾರನ್ ಪೂಜೆ ಮಲ್ಪುನ ಸಮಾಜಡ್ ನಮ ಉಲ್ಲ. ಅಂಚಾದ್ ನಮ ಶ್ರೀಮಂತೆರಾವೊಡು ಪಂದ್ ಪೈಪೋಟಿ ಶುರು ಮಲ್ತ್ಂಡ ಮಾನವೀಯತೆನ್ ಮರಪುವ. ನಮಡ ತೃಪ್ತಿ ಪನ್ಪುನ ಗುಣ ಇಜ್ಜಂದೆ ದುರಾಸೆ ಪನ್ಪುನ ರೋಗ ಬತ್ತ್ಂಡ ಅವು ದೇಶಗ್ ನಷ್ಟ ಮಾತ್ರ ಅತ್ತಂದೆ ವ್ಯಕ್ತಿನ ಮಿತ್ತ್ ಪರಿಣಾಮ ಬುರ್ಪಾವುಂಡು. ಹ್ಯುಮಾನಿಟಿ ಸಂಸ್ಥೆ ಪೊರ್ಲುದ ಬೇಲೆ ಮಲ್ಪುನೆನ್ ಮೆಚ್ಚುಡಾಯಿನವು ಪಂದ್ ರಾಜ್ಯದ ಮಾಜಿ ಲೋಕಯುಕ್ತೆರ್ ಜಸ್ಟೀಸ್ ಎನ್.ಸಂತೋಷ್ ಹೆಗ್ಡೆ ಪಂಡೆರ್.

ಮೇರ್ ಹ್ಯುಮಾನಿಟಿ ಟ್ರಸ್ಟ್ (ರಿ.) ಬೆಳ್ಮಣ್ ದ 1 ಸಾರ ಪ್ರಾಜೆಕ್ಟ್ ದ ಧರ್ಮೊಗು ವಸತಿ ಯೋಜನೆದ 20 ಧರ್ಮಾರ್ಥ ಇಲ್ಲ್ ಲೆನ ಪಡುಮಾರ್ನಾಡ್ ಡ್ ಉದಿಪನ ಮಲ್ತ್ ದ್, ಬನ್ನಡ್ಕ ಪಾಂಚಜನ್ಯ ಚಾವಡಿಡ್ ನಡತಿನ ಸಭಾ ಲೇಸ್ ಡ್ ಪಾತೆರಿಯೆರ್.

ದುಂಬು ಸಮಾಜಡ್ ತಪ್ಪು ಮಲ್ತ್ ದ್ ಜೈಲ್ ಗ್ ಪೋಯಿನಾಯಗ್ ಬೊಕ್ಕ ಆಯನ ಇಲ್ಲದಕ್ಲೆಗ್ ಸಾಮಾಜಿಕ ಶಿಕ್ಷೆ ಆವೊಂದು ಇತ್ತ್ಂಡ್. ಆಂಡ ಇತ್ತೆ ಮಾನ ಮಾರ್ಯದೆ ಇಜ್ಜಂದಿಲೆಕ್ಕ ಆತ್ಂಡ್ ಪಂದ್ ಡಾ. ಸಂತೋಷ್ ಹೆಗ್ಡೆ ಪಂಡೆರ್.

ವಿಜಯ ಟೈಮ್ಸ್ ದ ವ್ಯವಸ್ಥಾಪಕ ನಿರ್ದೇಶಕಿ ವಿಜಯಲಕ್ಷ್ಮಿ ಶಿಬರೂರು ಮಲ್ಲ ಬಿನ್ನೆರಾದ್ ಲೇಸ್ ಡ್ ಪಾಲ್ ಪಡೆಯೆರ್. ಬೊಕ್ಕ ಮೇರ್ ಪಾತೆರ್ದ್, ನಮಡ ಹೃದಯ ವೈಶಾಲ್ಯತೆ ಇಪ್ಪೊಡು. ಮೋಕೆ ಮಲ್ಪುನ, ದಾನ ಮಲ್ಪುನ, ಆದರಿಸಾವುನ, ಗೌರವಿಸಾವೊನ, ಪ್ರೋತ್ಸಾಹಿಸಾವೊನ ಬೊಕ್ಕ ಮಾನವೀಯತೆದ ಗುಣ ನಮಡ ಇಪ್ಪೊಡು ಪಂದ್ ಪಂಡೆರ್.

ಅಖಿಲ ಭಾರತ ತುಳು ಒಕ್ಕೂಟರ್ದ್ ಡಾ.ಅತ್ತೂರು ಸದಾನಂದ ಶೆಟ್ರೆಗ್ ಪೆರ್ಮೆದ ತುಳುವೆ ಪ್ರಶಸ್ತಿ

ಪ್ರತಿಫಲತ್ತ ನಿರೀಕ್ಷೆ ದೀವಂದೆ ಮಲ್ತಿನ ಸಮಾಜಸೇವೆಗ್ ಸಂದಿನ ಗೌರವ: ಎ ಸಿ ಭಂಡಾರಿ

ಕುಡ್ಲ: ಜಾತಿ ಭೇದ ತೂವಂದೆ, ಒವ್ವೇ ಪ್ರತಿಫಲನ್ ನಿರೀಕ್ಷೆ ಮಲ್ಪಂದೆ ಸುಮಾರ್ ವರ್ಷೊದಿಂಚ ಸಮಾಜಸೇವೆ ಮಲ್ತಿನೆಕ್ಕ್ ಸಂದಿನ ಗೌರವ ಉಂದು ಪಂಡ್ದ್ ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ ಭಂಡಾರಿಲು ಕುಡ್ಲದ ಪೆವೆಲಿಯನ್‌ ಸಭಾ ಚಾವಡಿಡ್ ಡಾ. ಅತ್ತೂರು ಸದಾನಂದ ಶೆಟ್ರೆಗ್ ಪೆರ್ಮೆದ ತುಳುವೆ ಪ್ರಶಸ್ತಿನ್ ಸಂದೈತ ಮಲ್ಪುನಗ ತನ್ನ ಅಭಿಪ್ರಾಯನ್ ಪಟ್ಟೊಂಡೆರ್.

ಸದಾನಂದ ಶೆಟ್ರ್ ಗೊಬ್ಬು, ಶಿಕ್ಷಣ, ಉದ್ಯಮ, ಸಾಮಾಜಿಕ, ಸಾಂಸ್ಕೃತಿಕ ಕ್ಷೇತ್ರಡ್ ಸಾರ್ವತ್ರಿಕವಾದ್ ಸಾಧನೆ ಮಲ್ತ್ ಇತ್ತ್ ದ್  ಬೊಕ್ಕ ಇಂಚಿಪ್ಪೊಗು ಶಿವಮೊಗ್ಗ ಕುವೆಂಪು ವಿಶ್ವವಿದ್ಯಾನಿಲಯರ್ದ್ ಗೌರವ ಡಾಕ್ಟರೇಟ್‌ ಪದವಿ ಸ್ವೀಕಾರ ಮಲ್ತಿನ ಪೊರ್ತುಡು ಆರೆಗ್ ಕುಡ್ಲದ ಪೆವೆಲಿಯನ್‌ ಸಭಾ ಚಾವಡಿಡ್ ಅಖಿಲ ಭಾರತ ಒಕ್ಕೂಟದ ವತಿರ್ದ್ ಪೆರ್ಮೆದ ತುಳುವೆ ಪ್ರಶಸ್ತಿನ್ ಸಂದೈತ ಮಲ್ತ್ ದ್ ಪಾತೆರಿಯೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್‌ ಕುಡ್ಲ ಘಟಕದ ಗುರ್ಕಾರ್ಲು ತಾರನಾಥ ಶೆಟ್ಟಿ ಬೋಳಾರ್‌ ಈ ಪೊರ್ತುಡು ಪಾತೆರ್ದ್, ಸದಾನಂದ ಶೆಟ್ರ್ ಜಿಲ್ಲೆಗ್, ರಾಜ್ಯಗ್ ಸುಮಾರಾತ್ ಕೊಡುಗೆನ್ ಕೊರ್ತಿನಾರ್. ಸುಮಾರ್ ಸಂಘ-ಸಂಸ್ಥೆಲು ಮೆರೆನ ಮುಖಾಂತರ ಬುಲೆದ್ ಉಂತುದುಂಡು.‌ ಸಾಮಾಜಿಕ ಕಳಕಳಿತ್ತ ಸೇವೆನ್ ಮಲ್ತೊಂದು ಇಪ್ಪುನವು ಭಾರೀ ಮಲ್ಲ ಪೆರ್ಮೆ. ಆರ್ ವಿದ್ಯೆ ಬೊಕ್ಕ ಆರ್ಥಿಕವಾದ್ ಪಿರವು ಒರಿದಿನ ಬಡವೆರೆಗ್ ಇಲ್ಲ್ದ ಮೂಲಭೂತ ಸೌಕರ್ಯಲೆಗ್ ಸಹಕಾರ ಮಲ್ತೊಂದು ಇಪ್ಪುನೆಕ್ಕ್ ಈ ಗೌರವ ಖಂಡಿತವಾದ್ಲಾ ಸಂದೊಡಾಯಿನವೇ ಪಂದ್ ಪಂಡೆರ್.

ಸನ್ಮಾನನ್ ದೆತೊಂದು ಪಾತೆರ್ನ ಸದಾನಂದ ಶೆಟ್ರ್, ಮಾತ ಸಮುದಾಯದಕುಲು ಭಾರೀ ಮೋಕೆಡ್ ಗೌರವ ಕೊರ್ಪುನೆನ್ ಯಾನ್ ತೂತೆ‌. ಅಕ್ಲೆಗ್ ಎನ್ನ ಒವ್ವೇ ಅಪೇಕ್ಷೆ ಇಜ್ಜಂದೆ ಎನರ್ದ್ ಆಪಿನಾತ್ ಯಾನ್ ಸಕಾಯ ಮಲ್ತ್ದೆ. ಈ ಗೌರವಗ್ ಅಕ್ಲೆನ ಆಶೀರ್ವಾದನೇ ಕಾರಣ ಪಂಡ್ದ್ ಪಂಡೆರ್.

ಈ ಪೊರ್ತುಡು ಹಿರಿಯಡ್ಕ ಮೋಹನ್‌ದಾಸ್‌ ಬೊಂಬೈ, ರವಿ ಎಸ್ ದೇವಾಡಿಗ ಬೊಂಬೈ, ಉಮೇಶ್‌ ಶೆಟ್ಟಿ ನೂಜಿಬೈಲ್‌, ಸತೀಶ್‌ ಸಾಲ್ಯಾನ್‌ ಕಾಸ್ರೋಡು, ಚಂದ್ರಹಾಸ ದೇವಾಡಿಗ ಬೆದ್ರ, ಪ್ರಸಾದ್‌ ರೈ ಕಲ್ಲಿಮಾರ್‌ ಕುಡ್ಲ, ದೇವಿಚರಣ್‌ ಶೆಟ್ಟಿ ಕುಡ್ಲ, ರತನ್‌ ಶೆಟ್ಟಿ ಕುಡ್ಲ, ಸುಕಲಾಕ್ಷಿ ವೈ ಸುವರ್ಣ ಕುಡ್ಲ, ವಿಜಯಲಕ್ಷ್ಮೀ ಬಿ. ಶೆಟ್ಟಿ ಕುಡ್ಲ ಮೊಕುಲು ಉಪಸ್ಥಿತಿಡ್ ಇತ್ತೆರ್.

ಒತ್ತು ಕಾರ್ಯಂತೆರ್ ಪಿ.ಎ.ಪೂಜಾರಿ ಪ್ರಶಸ್ತಿ ಪತ್ರನ್ ಓದಿಯೆರ್. ಪ್ರದೀಪ್‌ ಆಳ್ವ ಎದ್ಕೊನಿಯೆರ್. ಸಂಘಟನಾ ಕಾರ್ಯಂತೆರ್ ಡಾ.ರಾಜೇಶ್‌ ಆಳ್ವ ಬದಿಯಡ್ಕ ಸೊಲ್ಮೆ ಸಂದಾಯೆರ್. ಮಲ್ಲ ಕಾರ್ಯಂತೆರ್ ಮುಲ್ಕಿ ಕರುಣಾಕರ ಶೆಟ್ಟಿ ಲೇಸ್ನ್ ಪೊರ್ಲುಡು ಸುಧಾರಿಕೆ ಮಲ್ತೆರ್.

ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ
ಮೊ:9880425265

ಸೆ.10: ಯುವವಾಹಿನಿ (ರಿ.) ಕೇಂದ್ರ ಸಮಿತಿ ಕುಡ್ಲದ ಮುತಾಲಿಕೆಡ್ ಡೆನ್ನಾನ ಡೆನ್ನಾನ

ಯುವವಾಹಿನಿ (ರಿ.) ಕೇಂದ್ರ ಸಮಿತಿ ಕುಡ್ಲದ ಮುತಾಲಿಕೆಡ್ ಯುವವಾಹಿನಿ ಅಂತರ್ ಘಟಕ  ಡೆನ್ನಾನ ಡೆನ್ನಾನ 2023 ಲೇಸ್ ಸೆ.10 ಬೊಲ್ಪುರ್ದ್ ಬಯ್ಯ ಮುಟ್ಟ ಕುಡ್ಲದ ಪುರಭವನಡ್ ನಡಪರೆ ಉಂಡು.

ಯುವವಾಹಿನಿದ ಇತಿಹಾಸಡ್ ದಾಖಲೆ ಮೊತ್ತದ ಇನಾಮು, ಯುವವಾಹಿನಿ ಘಟಕ ಘಟಕಲೆನ ನಡುಟ್ ಪಂತೊ, ಡೆನ್ನಾನ-ಡೆನ್ನಾನ 2023 ಟ್ಟ್ ಬಂಗಾರ್ ದ ಪದಕ, ಬೊಳ್ಳಿ ಪದಕ, ಕಂಚ್ ದ ಪದಕ, ಟಾಪ್ 8 ಡೆನ್ನಾನ ಡೆನ್ನಾನ-2023 ಪ್ರಶಸ್ತಿದೊಟ್ಟಿಗೆ ದುಡ್ಡುದ ಇನಾಮು, ಎಡ್ಡೆ ನಿರೂಪಕೆ, ಎಡ್ಡೆ ನಿರೂಪಕಿ, ಎಡ್ಡೆ ನಟೆ-ನಟಿ, ಸಮೂಹ ನೃತ್ಯ, ಸ್ಕಿಟ್ ಬೊಕ್ಕ ಶಿಸ್ತುಬದ್ದ ಕೂಟೊಗು ಪ್ರಶಸ್ತಿ, ಡೆನ್ನಾನ ಡೆನ್ನಾನ-2023 ಶೀಷೀಕೆ ಪದತ್ತ ಪಂತೊಗು ಇನಾಮು, ಡೆನ್ನಾನ ಡೆನ್ನಾನ-2023 ಗತ ವೈಭವ ಬರವುದ ಪಂತೊಗು ಇನಾಮು ಕೊರ್ಪುನತ್ತದೇ, ಬಣ್ಣ ಬಣ್ಣಡ್ ದಿಂಜಿನ ಚಾವಡಿಡ್ ಈ ಲೇಸ್ ನಡಪೆರೆ ಇತ್ತ್ ದ್ ಅಂಚೆನೆ ವನಸ್ ತೆನಸ್ ದಲ ಭಾರೀ ಪೊರ್ಲುದ ವ್ಯವಸ್ಥೆಲೆನ್ ಯುವವಾಹಿನಿ (ರಿ.) ಕೇಂದ್ರ ಸಮಿತಿದ ಸಾಂಸ್ಕೃತಿಕ ಕೂಟದಕುಲು ಮಲ್ಪರೆ ಉಲ್ಲೆರ್ ಪಂದ್ ಸಾಂಸ್ಕೃತಿಕ ಕೂಟದ ನಿರ್ದೇಶಕೆರ್ ಲೋಕೇಶ್ ಸುವರ್ಣ ಅಲೆತ್ತೂರು, ಮಲ್ಲ ಕಾರ್ಯಂತೆರ್ ಕುಸುಮಾಕರ ಕುಂಪಲ, ಅಂಚೆನೆ ಗುರ್ಕಾರ್ಲು ರಾಜೇಶ್ ಬಿ ಪ್ರತಿಕೆಗ್ ತೆರಿಪಾದೆರ್.

ಬೇಲಾಡಿ ಪುಂಡರೀಕ ಶ್ರೀ ವಿಷ್ಣುಮೂರ್ತಿ ಭಜನಾ ಮಂಡಳಿ ಮೊಕ್ಲೆನ ಮುತಾಲಿಕೆಡ್ ಶ್ರೀ ಕೃಷ್ಣ ಮುದ್ದುಕೃಷ್ಣ ಪಂತೊ

ಬೇಲಾಡಿ ಪುಂಡರೀಕ ಶ್ರೀ ವಿಷ್ಣುಮೂರ್ತಿ ಭಜನಾ ಮಂಡಳಿ ಮೊಕ್ಲೆನ ಮುತಾಲಿಕೆಡ್ ಶ್ರೀ ಕೃಷ್ಣ ಜನ್ಮಾಷ್ಟೆಮಿದ ಲೆಕ್ಕೊಡು ಮುದ್ದುಕೃಷ್ಣ ಪಂತೊ ಸೆ.3 ಐತಾರ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಸುಬ್ರಹ್ಮಣ್ಯಡ್ ಮಠಟ್ಟ್ ದಕ್ಷಾಧ್ವರ ವೀರ ಅಭಿಮನ್ಯು ಆಟ

ಪದ್ಮನಾಭ ಮುಚಿಂತ್ತಾಯ ಬೊಕ್ಕ ಯಕ್ಷಮಿತ್ರರು ಸುಬ್ರಹ್ಮಣ್ಯ ಮೊಕ್ಲೆನ ಮುತಾಲಿಕೆಡ್, ಪುತ್ತೂರ್ ಮಹಾಲಿಂಗೇಶ್ವರ ಪ್ರವಾಸಿ ಯಕ್ಷಗಾನ ಮಂಡಳಿದಕ್ಲೆರ್ದ್ ದಕ್ಷಾಧ್ವರ ವೀರ ಅಭಿಮನ್ಯು ಪನ್ಪುನ ಆಟ ಶ್ರೀ ಸಂಪುಟ ನರಸಿಂಹ ಸ್ವಾಮಿ ಶ್ರೀ ಸುಭ್ರಮಣ್ಯ ಮಠಟ್ಟ್ ಬಯ್ಯಗ್ 7 ಗಂಟೆರ್ದ್ ನಡತ್ಂಡ್.

ರವಿಚಂದ್ರ ಕನ್ನಡಿಕಟ್ಟೆ, ದೇವರಾಜ್ ಆಚಾರ್ಯ, ಚಿನ್ಮಯ ಕಲ್ಲಡ್ಕ ಮೊಕ್ಲೆನ ಭಾಗವತಿಕೆಡ್, ಚಂದ್ರಶೇಖರ ಸರಪಾಡಿ, ಶ್ರೀಧರ ವಿಟ್ಲ, ಜಿ.ಸುಬ್ರಹ್ಮಣ್ಯ ಮುಚಿಂತ್ತಾಯ ಚೆಂಡೆ, ಮದ್ದಳೆ, ಚಕ್ರತಾಳಡ್ ವಸಂತ ವಾಮನಪದವು, ಹಾಸ್ಯ ಪಾತ್ರಡ್,  ಜಯರಾಮ ಆಚಾರ್ಯ ಬಂಟ್ಟಾಳ, ಪ್ರಜ್ವಲ್ ಕುಮಾರ್, ಸ್ತ್ರೀ ಪಾತ್ರಡ್, ಪ್ರಶಾಂತ ಶೆಟ್ಟಿ ನೆಲ್ಯಾಡಿ, ಸತೀಶ್ ಗೌಡ ನೀರಕೆರೆ, ಚರಣ್ ಗೌಡ ಕಾಣಿಯೂರು, ಪ್ರಧಾನ ಭೂಮಿಕೆಡ್, ವಸಂತ ಗೌಡ, ಚಂದ್ರಶೇಖರ ಧರ್ಮಸ್ಥಳ, ಸದಾಶಿವ ಆಚಾರ್ಯ, ಕೀರ್ತನ ಕಾರ್ಲ, ಬಾಲಕೃಷ್ಣ ಗೌಡ, ಅರಳ ಗಣೇಶ, ಹರೀಶ ಶೆಟ್ಟಿ, ಮೋಹನ ಬೆಳ್ಳಿಪ್ಪಾಡಿ, ಶಿವಾನಂದ ಪೆರ್ಲ, ಶಿವರಾಜ್ ಬಜಕೂಡ್ಲು ಅತಿಥಿ ಕಲಾವಿದೆರಾದ್, ಅಕ್ಷಯ ಮಾರ್ನಾಡು ಮಾತ ಕಲಾವಿದೆರೆನ ಒಟ್ಟುಸೇರಿಗೆಡ್ ಈ ಆಟ ನಡತ್ಂಡ್. ಸುಬ್ರಹ್ಮಣ್ಯ ಸೇರಿನಂಚೆನೆ ಮಾತ ಕಡೆತ್ತ ಆಟದ ಆಸಕ್ತೆರ್ ಈ ಆಟಡ್ ಪಾಲ್ ಪಡೆದಿತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಸೆ.10: ಬೊಂಬೈದ ಕುರ್ಲಾ ಬಂಟರ ಭವನಡ್ ಶ್ರೀ ಭಗವತೀ ಮಹಾತ್ಮೆ ಆಟ

ಅಜೆಕಾರ್ ಕಲಾಭಿಮಾನಿ ಬಳಗ (ರಿ.) ಬೊಂಬೈದ 22 ನೇ ವರ್ಷೊದ ಲೆಕ್ಕೊಡು ಸೆ.10 ಐತಾರ ಬೊಂಬೈದ ಕುರ್ಲಾ ಬಂಟರ ಭವನಡ್ ಶ್ರೀ ಭಗವತೀ ಮಹಾತ್ಮೆ ಆಟ ನಡಪರೆ ಉಂಡು.

ಈ ಆಟ ಸಸಿಹಿತ್ಲು ಶ್ರೀ ಭಗವತೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಕುಡ್ಲ ಮೊಕ್ಲೆರ್ದ್ ನಡಪರೆ ಉಂಡು. ಭಾಗವತಿಕೆಡ್ ಗಾನಗಾರುಡಿ ಗಣೇಶ್ ಕುಮಾರ್ ಹೆಬ್ರಿ, ಡಾ.ಪ್ರಖ್ಯಾತ್ ಶೆಟ್ಟಿ ಅಳಿಕೆ, ಚೆಂಡೆಮದ್ದಳೆಡ್ ಶ್ರೀಧರ ಪಡ್ರೆ, ಆನಂದ ಪಡ್ರೆ, ಚಕ್ರತಾಳಡ್ ರಾಮ ಬಿ.ಅರಳ, ವಿದೂಷಕೆರಾದ್ ತುಳು ಹಾಸ್ಯದರಸು ಬಿರುದಾಂಕಿತ ಸುಂದರ ಬಂಗಾಡಿ, ರಂಗಭೂಮಿ ಕಲಾವಿದೆ ರವಿಕುಮಾರ್ ಸುರತ್ಕಲ್, ಸ್ತ್ರೀ ಪಾತ್ರಧಾರಿಯಾದ್ ಯಕ್ಷಮೇನಕೆ ಬಿರುದಾಂಕಿತ ಸಂತೋಷ್ ಕುಲಶೇಖರ, ಸುಬ್ರಹ್ಮಣ್ಯ ಎರ್ಮಾಳ್, ಪವನ್ ರಾಜ್ ಹೆಗ್ಡೆ ಧರ್ಮಸ್ಥಳ, ಪ್ರವೀಣ್ ಅಚಾರ್ಯ ಗುರುವಾಯನಕೆರೆ ಮೊಕುಲು ಮಾತ ಅಭಿನಯ ಮಲ್ಪರೆ ಉಲ್ಲೆರ್.

ಅಂಚೆನೆ ಯಕ್ಷ ರಕ್ಷಾ ಪ್ರಶಸ್ತಿ ಪ್ರದಾನ ಲೇಸ್ ಬೊಕ್ಕ ರಂಗಸ್ಥಳತ್ತ ರಾಜೆ ಅರುವ ಕೊರಗಪ್ಪ ಶೆಟ್ಟಿ ಮೆರೆನ ಅಭಿನಂದನಾ ಗ್ರಂಥ ಬುಡುಗಡೆ ಮಲ್ಪುನ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಬೊಂಬೈದ ಸಂಚಾಲಕೆರ್ ಅಜೆಕಾರ್ ಬಾಲಕೃಷ್ಣ ಶೆಟ್ಟಿ ತೆರಿಪಾದೆರ್.

ವೋಟುದ ತಯಾರಿಗಾದ್ ಸೆ.10 ಕ್ಕ್ ಜೆಡಿಎಸ್ ಸಮಾವೇಶ

ಲೋಕಸಭೆ ವೋಟುರ್ದ್ ದುಂಬು ಪಕ್ಷ ಬಲವರ್ಧನೆ ಮಲ್ಪರೆ ಜೆಡಿಎಸ್ ಪಕ್ಷ ಸೆ.10ಕ್ಕ್ ಬೆಂಗ್ಲೂರ್ದ ಅರಮನೆದ ಚಾವಡಿಡ್ ಜೆಡಿಎಸ್ ಸಮಾವೇಶನ್ ಆಯೋಜನೆ ಮಲ್ದ್ಂಡ್.

ಈ ಸಮಾವೇಶಡ್ ಕಾರ್ಯಕರ್ತೆರೆಗ್ ಬೊಕ್ಕ ನಾಯಕೆರೆಗ್ ವಿಶ್ವಾಸ ಅಂಚೆನೆ ಬಲ ಕೊರ್ಪುನಂಚಿತ್ತಿನ ಕೆಲಸ ಮಲ್ಪರೆ ಪ್ಲಾನ್ ಪಾಡ್ದೆರ್. ನೆಟ್ಟ್ ಮಾಜಿ ಪಿಎಂ ಹೆಚ್ಡಿ ದೇವೆಗೌಡ, ಮಾಜಿ ಸಿಎಂ ಹೆಚ್ಡಿ ಕುಮಾರಸ್ವಾಮಿ ಸೇರಿನಂಚೆನೆ ಸುಮಾರ್ ನಾಯಕೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಶಾಲೆಗ್ ಪೂವಂದೆನೇ ಸಂಬಳ ಪಡೆಪುನ ಶಿಕ್ಷಕೆ!

ಮಂಡ್ಯ ಶ್ರೀರಂಗಪಟ್ಟಣದ ನೆಲಮನೆ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಿಕ್ಷಕೆರ್ ಕಾಡಪ್ಪಗೋಳ ಪನ್ಪುನಾರ್ 9 ವರ್ಷ ಶಾಲೆಡ್ ವಿದ್ಯೆ ಕಲ್ಪಾವಂದೆ ಸಂಬಳ ಪಡೆಪಿನ ಘಟನೆ ನಡತ್ದ್ಂಡ್.

ಮೇರ್ 2014 ಟ್ಟ್ ಕೆಲಸಗ್ ಸೇರ್ದೆರ್. ಕಾಲಿ 2 ವರ್ಷ ಮಾತ್ರ ಶಾಲೆಗ್ ಬೈದೆರ್. ಬೊಕ್ಕ ಶಾಲೆಗ್ ಬರಂದೆನೇ ಸಂಬಳ ದೆತೊನೊಂದು ಉಲ್ಲೆರ್ ಪಂದ್ ಅಲ್ಪದ ಎಸ್ ಡಿಎಮ್ಸಿ ಗುರ್ಕಾರ್ಲು ಬೊಕ್ಕ ಪದುಕೆರ್ ಆರೋಪ ಮಲ್ದೆರ್.

ಸೆ.5: ಮೀರಾ ಭಾಯಂದರ್ ರೋಡ್ ದ ಸಂತ ಥೋಮಸ್ ಚರ್ಚ್ ಹಾಲ್ ಡ್ ಶ್ರೀ ಭಗವತೀ ಕ್ಷೇತ್ರ ಮಹಾತ್ಮೆ ಆಟ

ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಮುತಾಲಿಕೆಡ್ ಅಜೆಕಾರ್ ಕಲಾಭಿಮಾನಿ ಬಳಗ (ರಿ.) ಬೊಂಬೈದ ಆಯೋಜನೆಡ್ ಸೆ.5 ಸನಿಯಾರ ಮೀರಾ ಭಾಯಂದರ್ ರೋಡ್ ದ ಸಾಯಿ ಬಾಬ ನಗರ್ ದ ಸಂತ ಥೋಮಸ್ ಚರ್ಚ್ ಹಾಲ್ಡ್ ಶ್ರೀ ಭಗವತೀ ಕ್ಷೇತ್ರ ಮಹಾತ್ಮೆ ಆಟ ನಡಪರೆ ಉಂಡು. ‌

ಈ ಲೇಸ್ ಸಸಿಹಿತ್ಲು ಶ್ರೀ ಭಗವತಿ ಕ್ಷೇತ್ರದ ಅನುವಂಶಿಕ ಮೊಕ್ತೇಸೆರೆರ್ ಬೊಕ್ಕ ಪ್ರಧಾನ ಅರ್ಚಕೆರ್ ಶ್ರೀನಿವಾಸ ಯಾನೆ ಅಪ್ಪು ‌ಪೂಜಾರಿ ಮೆರೆನ ಆಶೀರ್ವಾದದೊಟ್ಟಿಗೆ ನಡಪರೆ ಉಂಡು.

ಈ ಲೇಸ್ಗ್ ಮಾತೆರ್ಲಾ ಬತ್ತ್ದ್, ಆಟನ್ ಪೊರ್ಲು ಮಲ್ತ್ದ್ ಕೊರ್ದು, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರ್ಕಾರ್ರೆ ಚಂದ್ರಹಾಸ ಕೆ.ಪಾಲನ್, ಗೌರವಾಧ್ಯಕ್ಷೆರ್ ಲಾಜರ್ ಟಿ.ಎಮ್ ಕೋಟ್ಯಾನ್, ಕಾರ್ಯಕಾರಿ ಸಮಿತಿದ ಸರ್ವಸದಸ್ಯೆರ್, ಪೂಜಾ ಕಮಿಟಿ, ಅರ್ಚಕೆರ್, ಮಹಿಳಾ ವಿಭಾಗ, ಯುವ ವಿಭಾಗದ ಸದಸ್ಯೆರ್, ಸದಸ್ಯತ್ವ ಸಮಿತಿ, ಶಿಕ್ಷಣ ಸಮಿತಿ ಬೊಕ್ಕ ಕಾರ್ಯಕ್ರಮ ಸಂಘಟಕ ಸಮಿತಿದಕುಲು ಲೆಪ್ಪೋಲೆಡ್ ಮಾತೆರೆನ್ಲಾ ಎದ್ಕೊಂದೆರ್.