ಸಿಬ್ಬಂದಿ ಆಯ್ಕೆ ಸಮಿತಿಡ್ ಖಾಲಿ ಇಪ್ಪುನ 7547 ಕಾನ್ಸ್‌ಟೇಬಲ್ ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ.
ಅರ್ಜಿ ಸಂದಾವೊನ ಅಭ್ಯರ್ಥಿಡ ಪಿಯುಸಿ, ಡ್ರೈವಿಂಗ್ ಲೈಸೆನ್ಸ್ ಕಡ್ಡಾಯವಾದ್ ಇಪ್ಪೊಡು. ಅಂಚೆನೆ ಅಭ್ಯರ್ಥಿಲೆನ್ CBT, ದೈಹಿಕ ದಕ್ಷತೆ ಪರೀಕ್ಷೆ, ವೈದ್ಯಕೀಯ ಪರೀಕ್ಷೆದ ದಾಖಲೆನ್ ಪರಿಶೀಲನೆ ಮಲ್ತ್ ದ್ ಆಯ್ಕೆ ಮಲ್ಪುವೆರ್. ಅರ್ಜಿ ಸಂದಾಯೆರೆ ಸೆ.30 ಅಕೇರಿದ ತಾರೀಕ್ ಆತ್ಂಡ್. ಎಚ್ಚದ ಪೊಲಬುನ್ ವೆಬ್ ಸೈಟ್ https://ssc.nic.in/ ಪಡೆವೊಲಿ.
ದಕ್ಷಿಣ ಕನ್ನಡ ಜಿಲ್ಲೆದ ಬೊಲ್ತೇರ್ ತಾಲೂಕ್ ದ ಕಿಲ್ಲೂರ್ ನಿವಾಸಿ ದೇವರಾವ್ ಮೇರ್ ರಾಷ್ಟ್ರಪತಿ ಮುರ್ಮು ಮೆರೆರ್ದ್ ಪ್ರಶಸ್ತಿ ಸ್ವೀಕಾರ ಮಲ್ದೆರ್.
ಭಾರತೀಯ ಕೃಷಿ ಸಂಶೋಧನಾ ಮಂಡಳಿ ಡೆಲ್ಲಿಡ್ ಅಟ್ಟಣೆ ಮಲ್ತಿನ ಲೇಸ್ ಡ್ ಈ ಪ್ರಶಸ್ತಿನ್ ಪ್ರದಾನ ಮಲ್ದೆರ್.
ದೇವರಾವ್ ಮೇರ್ ಆರೆಗ್ ಇಪ್ಪುನ 5 ಎಕ್ರೆ ಕಂಡಡ್ 175 ಬಿದೆತ್ತ (ತಳಿ) ನೇಜಿನ್ ಬುಲೆಪಾದೆರ್. ಅತ್ತಂದೆ ಕರಿನ 25 ವರ್ಷೊರ್ದಿಂಚ 50 ಕ್ವಿಂಟಲ್ ಬಾರ್ ಬುಲೆತೆರ್. ಒವ್ವೇ ಬಾರ್ ದ ಬಿದೆ ತೂಂಡಲ ಪತ್ತೆ ಮಲ್ಪುನ ಸಾಮರ್ಥ್ಯ ಮೆರೆಗ್ ಉಂಡು.
ಕುಡ್ಲ : ಹಿಂದೂ ಯುವ ಸೇನಾ ಮುತಾಲಿಕೆಡ್ ಕುಡ್ಲದ ನೆಹರೂ ಮೈದಾನಡ್ ಸಾರ್ವಜನಿಕ ಗಣೇಶೋತ್ಸವ ಸೆ.19-25 ಮುಟ್ಟ ನಡಪರೆ ಉಂಡು. ನೆತ್ತ ಅಟ್ಟಣೆದ ಸಭೆ ಬಲ್ಮಠದ ಸೇನಾ ಕಾರ್ಯಾಲಯಡ್ ನಡತ್ಂಡ್.
ಹಿಂದೂ ಯುವ ಸೇನಾದ ಮಾನಾದಿಗೆ ಗುರ್ಕಾರೆ ಭಾಸ್ಕರಚಂದ್ರ ಶೆಟ್ಟಿ, ಗುರ್ಕಾರೆ ಯಶೋಧರ ಚೌಟ, ಕುಡ್ಲ ಗಣೇಶೋತ್ಸವ ಸಮಿತಿದ ಗುರ್ಕಾರೆ ಶಶಿಕಾಂತ್ ನಾಗ್ವೇಕರ್ ಚೌತಿದ ಅಟ್ಟಣೆದ ಬಗೆಟ್ಟ್ ಪೊಲಬು ಕೊರಿಯೆರ್.
ಈ ಪೊರ್ತುಡು ಹಿಂದೂ ಯುವ ಸೇನಾ ಪ್ರಧಾನ ಕಾರ್ಯದರ್ಶಿ ಪದ್ಮನಾಭ ನಾವೂರು, ಗಣೇಶೋತ್ಸವ ಸಮಿತಿ ಪ್ರಧಾನ ಕಾರ್ಯದರ್ಶಿ ರಾಮಚಂದ್ರ ಚೌಟ, ಉಪಾಧ್ಯಕ್ಷೆರ್ ಸುಕುಮಾರ್ ಸುರತ್ಕಲ್, ಕೊರಗಪ್ಪ ಶೆಟ್ಟಿ ಆಕಾಶ ಭವನ, ಧರ್ಮೇಂದ್ರ ಎಂ.ಪಿ, ಯಾಧವ ಕುಂದರ್ ವಾಮಂಜೂರು, ಕೋಶಾಧಿಕಾರಿ ಸುರೇಶ್ ಶೆಟ್ಟಿ ಕೊಟ್ಟಾರ ಕ್ರಾಸ್, ಲೆಕ್ಕ ಪರಿಶೋಧಕೆರ್ ಕೇಶವ ಸಾಲ್ಯಾನ್, ಜಿಲ್ಲಾ ಕಾರ್ಯದರ್ಶಿ ರವಿಚಂದ್ರ ಎಕ್ಕೂರು ಬೊಕ್ಕ ಬೇತೆ ಬೇತೆ ಶಾಖೆಲೆನ ಪದಾದಿಕಾರಿಲು, ಗಣೇಶೋತ್ಸವ ಸಮಿತಿ ಪದಾದಿಕಾರಿಲು, ಮಾತೃ ಮಂಡಳಿ, ಹಿಂದೂ ಯುವ ಸೇನಾ ಸೇವಕ್ ಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಕಾರ್ಯದರ್ಶಿ ಪ್ರವೀಣ್ ಎಸ್ ಕುಂಪಲ ಎದ್ಕೊನಿಯೆರ್.
ನವಚೇತನ ಸೇವಾ ಬಳಗ (ರಿ.) ತೋಡಾರು ಸಂಸ್ಥೆದ 86ನೇ ಸೇವಾ ಯೋಜನೆದ ಲೆಕ್ಕೊಡು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಮುಲ್ಕಿ ತಾಲೂಕ್ ಹಳೆಯಂಗಡಿ ಕೈತಲ್ದ ಚೇಳಾಯಿರು ನಿವಾಸಿ ಕುಸುಮ ಮೇರ್ ಪಿತ್ತಕೋಶದ ಕ್ಯಾನ್ಸರ್ ದ ಸಮಸ್ಯೆಡ್ ಉಲ್ಲೆರ್. ಇತ್ತೆ ಮೆರೆಗ್ ಇಂಡಿಯನ್ ಆಸ್ಪತ್ರೆಡ್ ಕಿಮೋಥೆರಪಿ ಚಿಕಿತ್ಸೆ ನಡತೊಂದು ಉಂಡು. ಮಸ್ತ್ ಬಡಪತ್ತ್ ದ ಕುಟುಂಬ ಆಯಿರ್ನೆದಾವೆರ ಒರ್ತಿ ಮಗಲೆರ್ದ್ ಇಲ್ಲದ ಮಾತ ಜಬದಾರಿನ್ ದೆತೊನಿಯೆರೆ ಆವೊಂದು ಇಜ್ಜಿ. ಅಂಚಾದ್ ನವಚೇತನ ಸೇವಾ ಬಳಗ (ರಿ.) ತೋಡಾರು ಕೂಟರ್ದ್ ಪನವುದ ಸಕಾಯಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪುಗ್ ಸ್ವಂದಿಸಾಯಿನ ಕೂಟ 15 ಸಾರ ರೂ.ದ ಪನವುದ ಸಕಾಯನ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕೊರ್ತುಂಡು.
ಏಷ್ಯಾಕಪ್ ಡ್ ಎಲ್ಲೆ ಶ್ರೀಲಂಕಾ ಬೊಕ್ಕ ಪಾಕಿಸ್ತಾನದ ನಡುಟ್ಟ್ ಮಹತ್ವದ ಪಂತೊ ನಡಪರೆ ಉಂಡು.
ಸೂಪರ್4 ಟ್ಟ್ ಭಾರತ ರಡ್ಡ್ (ಶ್ರೀಲಂಕಾ, ಪಾಕಿಸ್ತಾನ) ಪಂತೊ ಗೆಂದಿರ್ನೆದಾವೆರ ಫೈನಲ್ ಗ್ ಬೈದ್ಂಡ್. ಕುಡೊಂಜಿ ತಾನಗ್ ಪಾಕಿಸ್ತಾನ ಬೊಕ್ಕ ಶ್ರೀಲಂಕಾ ನಡುಟ್ಟ್ ಪಂತೊ ನಡಪರೆ ಉಂಡು.
ಕೊಲೊಂಬೋದ ಪ್ರೇಮದಾಸ ಮೈದಾನಡ್ ನಡಪುನ ಈ ಪಂತೊ ಸೆಮಿಫೈನಲ್ ದಾತ್ ಮಲ್ಲ ಮಹತ್ವ ಪಡೆತ್ಂಡ್. ಬರ್ಸರ್ದ್ ಉಂತಿನ ಪಂತೊ ಕ್ಯಾನ್ಸಲ್ ಆಂಡ, ನೆಟ್ ರನ್ ರೇಟ್ ಆಧಾರಡ್ ಶ್ರೀಲಂಕಾ ಫೈನಲ್ ಗ್ ಬರ್ಪುಂಡು.
ನನ ಬರ್ಪುನ ಲೋಕಸಭೆ ವೋಟುಗು ಮುಖಂಡೆರ್ ಬೊಕ್ಕ ಕಾರ್ಯಕರ್ತೆರೆನ್ ತಯಾರ್ ಮಲ್ಪರೆ ರಾಜ್ಯ ಬಿಜೆಪಿ ನಾಯಕೆರ್ ಸೆ.18 ರ್ದ್ ಒಂಜೇ ಕೂಟವಾದ್ ರಾಜ್ಯ ಪ್ರವಾಸ ಮಲ್ಪರೆ ಉಲ್ಲೆರ್.
ಈ ಬಗ್ಗೆ ಕೋಡೆ ನಡತಿನ ಸಭೆಟ್ಟ್ ತೀರ್ಮಾನ ಆತ್ಂಡ್. ಕೋಲಾರ ಜಿಲ್ಲೆದ ಮುಳಬಾಗಿಲು ತಾಲೂಕ್ ದ ಕುರುಡುಮಲೆ ಕ್ಷೇತ್ರದ ಗಣೇಶ ದೇವಲ್ಯಡ್ ಇಸೇಸ ಪೂಜೆ ಸಂದಾದ್ ಪ್ರವಾಸ ಸುರು ಮಲ್ಪುವೆರ್. ಈ ಪೊರ್ತುಡು ಕೈತಲ್ ದ ಮುಖಂಡೆರೆನೊಟ್ಟಿಗೆ ಸಭೆ ನಡಪಾದ್ ನಾಯಕೆರ್ ಪಕ್ಷ ಸಂಘಟನೆ ಮಲ್ಪರೆ ಉಲ್ಲೆರ್.
ಆಶ್ಲೇಷ ನಕ್ಷತ್ರದ ಎಡ್ಡೆದಿನ ಆಯಿನ ಇನಿ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಗ್ ಹೈದರಾಬಾದ್ ದ ಎ.ಎಂ.ಆರ್.ಇಂಡಿಯಾ ಲಿಮಿಟೆಡ್‌ ದ ಎ.ಮಹೇಶ್ ರೆಡ್ಡಿ ಮೇರ್ ಭೇಟಿ ಕೊರಿಯೆರ್.
ಬೊಕ್ಕ ಮೇರ್ ಪಾತೆರ್ದ್, ನನದ ದಿನಟ್ಟ್ ದೇವಲ್ಯದ ಸುತ್ತುಪೌಳಿ ನಿರ್ಮಾಣದ ಪೊರ್ತುಡು ಯಾನ್ ಕಾಲಭೈರವೇಶ್ವರಗ್ ಗುಡಿ ನಿರ್ಮಾಣ ಮಲ್ಪುವೆ. ಅಂಚೆನೆ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರೆಗ್ ಬಂಗಾರ್ ದ ಪ್ರಭಾವಳಿನ್ ಕೊರ್ಪೆ ಪಂದ್ ಪಂಡೆರ್. ಅವೆರ್ದ್ ಬೊಕ್ಕ ಪುಂಗನೂರು ತಳಿತ್ತ ಪೆತ್ತನ್ ಈ ದೇವಲ್ಯಗ್ ಕೊರಿಯೆರ್.
ಈ ಪೊರ್ತುಡು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ವ್ಯವಸ್ಥಾಪನ ಸಮಿತಿದ ಗುರ್ಕಾರೆ ಮೋಹನ್ ರಾಮ್ ಸುಳ್ಳಿ ಪಾತೆರ್ದ್ ಪುಂಗನೂರು ತಳಿತ್ತ ಪೆತ್ತನ್ ಈ ದೇವಲ್ಯಡ್ ನಡಪುನ ಗೋಪೂಜೆ ಬೊಕ್ಕ ಸರ್ಪ ಸಂಸ್ಕಾರ ಯಾಗದಪ ನಡಪುನ ಗೋಪೂಜೆಡ್ ಉಪಯೋಗ ಮಲ್ಪುವ. ಇತ್ತೆನೆ ಈ ದೇವಲ್ಯದ ಅನ್ನದಾನ ಶಾಲೆಗ್ ಬೋಡಾಯಿನ ನುಪ್ಪುಪ್ರಸಾದ ತಯಾರ್ ಮಲ್ಪುನ ಸೊತ್ತುಲೆನ್ ಸುಮಾರ್ 25 ಲಕ್ಷ ರೂಪಾಯಿ ಕರ್ಚಿಡ್ ಮಲ್ತ್ ದ್ ಕೊರ್ತ ಮಹೇಶ್ ರೆಡ್ಡಿ ಪಂದ್ ಪಂಡೆರ್.
ಈ ಸುದ್ದಿಗೋಷ್ಠಿಡ್ ಮಹೇಶ್ ರೆಡ್ಡಿ ಮೆರೆನ ಬೊಡೆದಿ ಎ. ರಾಧಿಕಾ, ನಂದಕಿಶೋರ್ ರೆಡ್ಡಿ ನೆಲ್ಲೂರು, ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ವನಜ.ವಿ.ಭಟ್, ಶೋಭಾ ಗಿರಿಧರ್, ಮನೋಜ್ ಇತ್ತೆರ್.
ವರದಿ: ಗೋಪಿಚಂದನ್ ಕೆಎಸ್
ಕ್ಷೇತ್ರ ಶಿಕ್ಷಣಾಧಿಕಾರಿಲೆನ ಕಚೇರಿ ಸುಳ್ಯ ಬೊಕ್ಕ ಕುಮಾರಸ್ವಾಮಿ ವಿದ್ಯಾಲಯ ಸುಬ್ರಹ್ಮಣ್ಯ ನೆತ್ತ ಒಟ್ಟುಸೇರಿಗೆಡ್ ಕುಮಾರಸ್ವಾಮಿ ವಿದ್ಯಾಲಯಡ್ ಸುಳ್ಯ ತಾಲೂಕು ಮಟ್ಟದ ಪ್ರಾಥಮಿಕ ಶಾಲೆದ ಆನ್ ಬೊಕ್ಕ ಪೊಣ್ಣು ಜೋಕುಲೆನ ಕಬಡ್ಡಿ ಪಂತೊ ಸೆ.9 ಕ್ಕ್ ನಡತ್ಂಡ್.
ಈ ಪಂತೊಡು ಆನ್ ಲೆನ ವಿಭಾಗಡ್ ಸುರುತ್ತ ತಾನನ್ ಸ.ಹಿ.ಪ್ರಾ. ಶಾಲೆ ಗುತ್ತಿಗಾರು, ರಡ್ಡನೇ ತಾನನ್ ಸೈಂಟ್ ಜೋಸೆಫ್ ಸುಳ್ಯ ಪಡೆತ್ಂಡ್. ಪೊಣ್ಣು ಜೋಕುಲೆನ ವಿಭಾಗಡ್ ಸುರುತ್ತ ತಾನನ್ ಮೊರಾರ್ಜಿ ವಸತಿ ಶಾಲೆ ಪಂಜ, ರಡ್ಡನೇ ತಾನನ್ ಜ್ಞಾನ ದೀಪ ಶಾಲೆ ಎಲಿಮಲೆ ಪಡೆತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಸುಬ್ರಹ್ಮಣ್ಯ ಗ್ರಾ.ಪಂ ಗುರ್ಕಾರ್ದಿ ಸುಜಾತ ಆಚಾರ್ಯ ಒಯಿಸೊಂದಿತ್ತೆರ್. ಪಂತೊದ ಉದಿಪನನ್ ಜಿಲ್ಲಾ ಅಮೆಚೂರು ಕಬ್ಬಡಿ ತೀರ್ಪುಗಾರೆರೆನ ಸಂಘದ ಗುರ್ಕಾರೆ ಶಿವರಾಮ ಏನೇಕಲ್ಲು ಮಲ್ತೆರ್.
ಸಮಾರೋಪ ಸಮಾರಂಭ ಬೊಕ್ಕ ಇನಾಮು ಪಟ್ಟುನ ಲೇಸ್ ಡ್ ಮಾಜಿ ಜಿಲ್ಲಾ ಪಂಚಾಯತ್ ಸದಸ್ಯೆರ್ ಹರೀಶ್ ಕಂಜಿಪಿಲಿ ಬೊಕ್ಕ ಗ್ರಾ. ಪಂ. ಸುಬ್ರಹ್ಮಣ್ಯ ನೆತ್ತ ಉಪಾಧ್ಯಕ್ಷೆರ್ ಎಚ್ ಎಲ್ ವೆಂಕಟೇಶ್ ಇನಾಮುನ್ ಪಟ್ಟಿಯೆರ್.
ಈ ಪೊರ್ತುಡು ಶಾಲೆದ ಗುರ್ಕಾರೆ ಗಣೇಶ್ ಪ್ರಸಾದ್, ತಾಲೂಕ್ ಕ್ರೀಡಾ ಸಂಯೋಜಕೆರ್ ಸೂಫಿ ಪೆರಾಜೆ, ತಾಲೂಕ್ ದೈಹಿಕ ಶಿಕ್ಷಣ ಶಿಕ್ಷಕೆರೆನ ಸಂಘದ ಗುರ್ಕಾರೆ ಧನಂಜಯ ಮೆರ್ಕಜೆ, ಶಾಲೆದ ಮುಖ್ಯ ಶಿಕ್ಷಕಿ ವಿದ್ಯಾರತ್ನ, ಗ್ರಾ.ಪಂ ಸದಸ್ಯೆರ್ ನಾರಾಯಣ ಅಗ್ರಹಾರ, ಭಾರತಿ ದಿನೇಶ್ ಪಾಲ್ ಪಡೆದಿತ್ತೆರ್. ದಿನಕರ್ ಸೊಲ್ಮೆ ಸಂದಾಯೆರ್.
ವರದಿ: ಗೋಪಿಚಂದನ್ ಕೆಎಸ್
ನವಚೇತನ ಸೇವಾ ಬಳಗ (ರಿ.) ಬಾರಾಡಿ ಘಟಕದ 16ನೇ ಸೇವಾ ಯೋಜನೆದ ಲೆಕ್ಕೊಡು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಕಾಂತಾವರ ಕುಡ್ತಕಾರು ನಿವಾಸಿ ಶಿವಾನಂದ ಪದ್ದು ಪೂಜಾರಿ ಮೆರೆನ ಬೊಡೆದಿ ರಡ್ಡ್ ಕಿಡ್ನಿದಲ ಸಮಸ್ಯೆರ್ದ್ ಆಸ್ಪತ್ರೆಡ್ ಮರ್ದ್ ಪಡೆವೊಂದು ಉಲ್ಲೆರ್. ಮೆರೆಗ್ ಇಡೇ ಮುಟ್ಟ 6 ಲಕ್ಷ ರೂಪಾಯಿದಾತ್ ಖರ್ಚಾತ್ಂಡ್. ವಾರಗ್ 3 ಸರ್ತಿ ಡಯಾಲಿಸಿಸ್ ಮಲ್ಪೊಡು ಪಂದ್ ಡಾಕ್ಟರ್ ತೆರಿಪಾದಿತ್ತೆರ್. ನನಲ ಮೆರೆನ ಚಿಕಿತ್ಸೆಗ್ ಸುಮಾರ್ 10 ಲಕ್ಷ ಮುಟ್ಟ ಕಾಸ್ ದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಇತೊಂಜಿ ಕಾಸ್ ನ್ ಒಟ್ಟು ಮಲ್ಪರೆ ಆವಂದಿನ ಈ ಬಡಪತ್ತ್ ಕುಟುಂಬಗ್ ನವಚೇತನ ಸೇವಾ ಬಳಗ (ರಿ.) ಬಾರಾಡಿ ಕೂಟದಕುಲು 15 ಸಾರ ರೂಪಾಯಿನ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕೊರಿಯೆರ್.
ಒಂಜಾರೆ ತಿಂಗೊಲ್ದ ದುಂಬು ಕೆಜಿಗ್ 300 ರೂ. ಗ್ ಮಾರೊಂದು ಇತ್ತಿನ ಟೊಮೆಟೊ ಕಿರಯ ಇತ್ತೆ ಕುಡ್ಲದ ಅಂಗಡಿಡ್ 25 ರೂ. ಆತ್ಂಡ್.
ಮಹಾರಾಷ್ಟ್ರದ ಲಾತೂರ್ ಡ್ ಟೊಮೆಟೊನ್ ಕೆಜಿಗ್ ಬಜೀ 80 ಪೈಸೆಗ್ ಮಾರೊನ ಪರಿಸ್ಥಿತಿ ಬೈದ್ಂಡ್. ಅಂಚಾದ್ ಬುಲೆಪಾಯೆರೆ ಆಯಿನ ಕಾಸ್ ನ್ ಕುಡ ಪಡೆಯೆರೆ ಆವೊಂದು ಇಜ್ಜಿ ಪಂದ್ ರೈತೆರ್ ಟೊಮೆಟೊನ್ ಮಾರ್ಗಗ್ ದಕ್ಕ್ ದ್ ಪ್ರತಿಭಟನೆ ಮಲ್ತೊಂದು ಉಲ್ಲೆರ್. ಬೆಂಗ್ಲೂರ್ ಡ್ ಕೆಜಿಗ್ 5-8 ರೂ. ಉಂಡು.
