ಬಿಲ್ಲವ ಫ್ಯಾಮಿಲಿ ದುಬೈದ ಮುತಾಲಿಕೆಡ್ 169ನೇ ವರ್ಷೊದ ಬ್ರಹ್ಮಶ್ರೀ ನಾರಾಯಣಗುರು ಜಯಂತಿ ಸೆ.17 ಐತಾರ ಬಯ್ಯಗ್ ಜೆಸಿಸಿ ಪ್ರೈವೇಟ್ ಶಾಲೆ ಅಲಾ ಸಫಾ ದುಬೈಡ್ ನಡಪರೆ ಉಂಡು.
ಈ ಲೇಸ್ ಕನ್ಯಾಡಿ ಶ್ರೀರಾಮ ಕ್ಷೇತ್ರದ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿನ ಆಶೀರ್ವಾದದೊಟ್ಟಿಗೆ ನಡಪರೆ ಉಂಡು. ಅಂಚೆನೆ ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಸೆ.18 ಕ್ಕ್ ಸಂಸತ್ತ್ ದ ಇಸೇಸ ಅಧಿವೇಶನ ಸುರು ಆಪುಂಡು. ಅಂಚಾದ್ ಸೆ.17 ಕ್ಕ್ ಸರ್ವಪಕ್ಷ ಸಭೆ ನಡಪರೆ ಉಂಡು ಪಂದ್ ಕೇಂದ್ರ ಸಚಿವೆರ್ ಪ್ರಹ್ಲಾದ್ ಜೋಶಿ ಪಂಡೆರ್.
ಈ ಸಭೆಕ್ಕ್ ಮಾತ ನಾಯಕೆರೆನ್ ಲೈದೆರ್. ಈ ಸಭೆಟ್ಟ್ ಇಸೇಸ ಅಧಿವೇಶನದ ಅಜೆಂಡಾಲೆನ ಬಗೆಟ್ಟ್ ಚರ್ಚೆ ನಡಪುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.
ಶಶಿಧರ ಕೆ ಶೆಟ್ಟಿ ಇನ್ನಂಜೆ ಮೆರೆನ ಸಂಪೂರ್ಣ ಸಹಕಾರಡ್ ಕಲಾ ಪ್ರಕಾಶ ಪ್ರತಿಷ್ಠಾನ ಬೊಂಬೈದ ಮುತಾಲಿಕೆಡ್, ಊರುದ ಕಲಾವಿದೆರೆರ್ದ್ ರಾಮ ಪಟ್ಟಾಭಿಷೇಕ ತಾಳಮದ್ದಳೆ ಸೆ.14 ಗುರುವಾರ ವಸಾಯಿ ರೀಜೆನ್ಸಿ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಪ್ರಕಾಶ್ ಶೆಟ್ಟಿ ಸುರತ್ಕಲ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ ಶ್ರೀ ಭಗವತೀ ಸಹಕಾರ ಬ್ಯಾಂಕ್ ನಿ. ದ 47ನೇ ವರ್ಷೊದ ಸರ್ವಸದಸ್ಯೆರೆನ ಮಹಾಸಭೆಟ್ಟ್ ಬ್ಯಾಂಕ್ ದ ಸದಸ್ಯೆರೆನ ಬೊಕ್ಕ ಸಿಬ್ಬಂದಿಲೆನ ಜೋಕುಲೆಗ್ ವಿದ್ಯಾರ್ಥಿವೇತನ ಪಟ್ಟುನ ಲೇಸ್ ಸೆ.24 ಐತಾರ ಬೊಲ್ಪುಗು ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರದ ಕೂಟಕ್ಕಳ ಆಡಿಟೋರಿಯಂ ಕೊಡಿಯಾಲ್ ಬೈಲ್ ಡ್ ನಡಪರೆ ಉಂಡು.
10ನೇ ಕ್ಲಾಸ್ ಬೊಕ್ಕ ಅವೆರ್ದ್ ಜಾಸ್ತಿ ಕಲ್ತ್ ದ್ ಅಕೇರಿದ ಪರೀಕ್ಷೆಡ್ ಶೇಕಡಾ 75 ರ್ದ್ ಎಚ್ಚ ಮಾರ್ಕ್ ಪಡೆಯಿನ ಬ್ಯಾಂಕ್ ದ ಮಾತ ಸದಸ್ಯೆರೆನ ಜೋಕುಲೆಗ್ ವಿದ್ಯಾರ್ಥಿ ವೇತನ ಪಟ್ಟಿಯೆರೆ ಉಂಡು. ನೆಕ್ಕ್ ಅರ್ಜಿ ಸಂದಾವುನಕುಲು ಸೆ.20 ತ್ತ ಉಲಯಿ ಸಂದಾವೊಡು ಪಂದ್ ಆಡಳಿತ ಮಂಡಳಿದ ಸೂಚನೆದಂಚ ಪ್ರಧಾನ ವ್ಯವಸ್ಥಾಪಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಡೊಂಬಿವಲಿದ ಮೋಕೆದ ತುಳು ಭಾಂದವೆರ್ ಅರ್ಪಣೆ ಮಲ್ಪುನ ಶಿವದೂತೆ ಗುಳಿಗೆ ತುಳು ನಾಟಕ ಅ.1 ಐತಾರ ಡೊಂಬಿವಲಿ ಸಾವಿತ್ರಿಬಾಯಿ ಫುಲೆ ನಾಟ್ಯಗೃಹಡ್ ಕಲಾಸಂಗಮ ಕಲಾವಿದೆರ್ದ್ ನಡಪರೆ ಉಂಡು.
ಈ ನಾಟಕಗ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ನಿರ್ದೇಶನ ಮಲ್ದೆರ್. ಎ.ಕೆ ವಿಜಯ್ (ಕೋಕಿಲಾ) ಸಂಗೀತ ಕೊರ್ತೆರ್. ಸ್ವರಾಜ್ ಶೆಟ್ಟಿ ಅಭಿನಯ ಮಲ್ದೆರ್. ಈ ನಾಟಕನ್ ತೂಪುನ ಕಲಾಭಿಮಾನಿಲು ಸಂತೋಷ್ ಶೆಟ್ಟಿ, ಭರತ್ ಶೆಟ್ಟಿ ಬೊಕ್ಕ ರಾಜೇಶ್ ಕೋಟ್ಯಾನ್ ಮೆರೆನ್ ಸಂಪರ್ಕ ಮಲ್ಪೊಲಿ.
ವಾಪಿ ಕನ್ನಡ ಸಂಘದ ವಾರ್ಷಿಕ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಪಿ.ಎಸ್ ಕಾರಂತೆರೆನ ಮುತಾಲಿಕೆಡ್ ಪಣಂಬೂರು ವೆಂಕಟ್ರಾಯ ಐತಾಳ ಪ್ರತಿಷ್ಠಾನದ ಒಡಪು ಅರ್ಪಣೆ ಮಲ್ಪುನ ದಕ್ಷ ಯಜ್ಞ ಆಟ ಸೆ.15 ಬಯ್ಯಗ್ ವಾಪಿ ಕನ್ನಡ ಸಂಘದ ಸಭಾಗೃಹಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತ ಕಲಾಭಿಮಾನಿಲು ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ದ.ಕ ಜಿಲ್ಲಾ ದಲಿತ್ ಸೇವಾ ಸಮಿತಿ (ರಿ.) ವಿಟ್ಲದ ಸ್ಧಾಪಕಾಧ್ಯಕ್ಷೆರ್ ಬಿ.ಕೆ. ಸೇಸಪ್ಪ ಬೆದ್ರಕಾಡು ಮೇರ್ ಸೆ.12 ಕ್ಕ್ ದಕ್ಷಿಣ ಕನ್ನಡ ಜಿಲ್ಲೆದ ಅಪರ ಜಿಲ್ಲಾಧಿಕಾರಿಲೆಗ್, ನಿವೃತ ಸೈನಿಕೆರೆಗ್ ಬಂಟ್ವಾಳ ತಾಲೂಕ್ ಡ್ ಅಳತೆ ಆಯಿನ ಜಾಗೆನ್ ಕೂಡ್ಲೆ ಮಂಜೂರು ಮಲ್ಪೊಡು ಪಂದ್ ಪ್ರತಿಭಟನೆದ ಬಿನ್ನಾಪು ಸಂದಾದೆರ್.
ಈ ಪೊರ್ತುಡು ನಿವೃತ್ತ ಸೈನಿಕೆರ್ ಪಾಲ್ ಪಡೆದ್, ಸಮುದಾಯ ಆರೋಗ್ಯ ಕೇಂದ್ರ ವಿಟ್ಲಗ್ ಮೂಲ ಸೌರ್ಕಯನ್ ಒದಗಿಸಾವೊಡು ಪಂದ್ ಪಂಡೆರ್. ಅವ್ವತ್ತಂದೆ ಈ ರಡ್ಡ್ ಬೇಡಿಕೆಲು ಈಡೇರಿಜಿಂಡ ಪ್ರತಿಭಟನೆ ಅನಿವಾರ್ಯ ಆಪುಂಡು ಪಂದ್ ಅಪಾರ ಜಿಲ್ಲಾಧಿಕಾರಿಗ್ ತೆರಿಪಾಯೆರ್. ಈ ಪೊರ್ತುಡು ಸಂಘಟನೆದ ಕಾರ್ಯಾಧ್ಯಕ್ಷೆರ್ ಚಂದ್ರಶೇಖರ್ ಯು ವಿಟ್ಲ ಇತ್ತೆರ್. ದ.ಕ.ಜಿಲ್ಲಾ ದಲಿತ್ ಸೇವಾ ಸಮಿತಿ ಪುತ್ತೂರ್ ದ ಉಪಾಧ್ಯಕ್ಷೆರ್ ಯಾಮಿನಿ ಬೆಟ್ಟಂಪಾಡಿ ಸೊಲ್ಮೆ ಸಂದಾಯೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಒಟ್ಟುಸೇರಿಗೆಡ್ ಚಿಣ್ಣರ ದನಿ ಲೇಸ್ ಸೆ.13 ಬುಧಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಇನಿ ಪ್ರಸಾರ ಆಪುನ ಲೇಸ್ ದ 25ನೇ ಸಂಚಿಕೆಡ್ ಬಾಲ ಪ್ರತಿಭೆ ನತಾಶ ಎನ್ ಪಾಲ್ ಪಡೆಯೆರೆ ಉಲ್ಲೆರ್. ಸೆ.14 ಗುರುವಾರ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು. ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
INDIA ಮೈತ್ರಿಕೂಟದ ಸಮನ್ವಯ ಸಮಿತಿ ಸಭೆ ಇನಿ ನಡಪರೆ ಉಂಡು.
2024ತ್ತ ಲೋಕಸಭೆ ಚುನಾವಣೆಗ್ ದೆತೊನೊಡಾಯಿನ ಕಾರ್ಯತಂತ್ರಲು, ಸೀಟು ಪಟ್ಟುನ, ಪ್ರಚಾರದ ತಯಾರಿಲೆನ ಬಗೆಟ್ಟ್ ಸದಸ್ಯೆರ್ ಇನಿ ಚರ್ಚೆ ನಡಪಾಯೆರೆ ಉಲ್ಲೆರ್.
ಇಂಚಿಪ್ಪ ಬೊಂಬೈಡ್ ನಡತಿನ ಸಭೆಟ್ಟ್ ಮೈತ್ರಿ ಪಕ್ಷಲೆನ ನಡುಟ್ಟ್ ಸಮನ್ವಯತೆ ಇಪ್ಪೊಡು ಪಂದ್ ಸಮಿತಿ ರಚನೆ ಮಲ್ದೆರ್. ಈ ಸಮಿತಿಡ್ ವಿರೋಧ ಪಕ್ಷದ 13 ಸದಸ್ಯೆರ್ ಉಲ್ಲೆರ್.
ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ಬೊಂಬೈ ಮುತಾಲಿಕೆಡ್ 169ನೇ ಬ್ರಹ್ಮ ಶ್ರೀ ನಾರಾಯಣ ಗುರು ಜಯಂತಿ ಆಚರಣೆ ಬೊಕ್ಕ ಸಮುದಾಯದ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಪಟ್ಟುನ ಲೇಸ್ ಸೆ.17 ಕ್ಕ್ ಕೆಂಟಿಲಾಲ್ ಮಿಥೈವಾಲಾದ ಪಿರವು, ಸರ್ವೋದಯ ನಗರಡ್ ನಡಪರೆ ಉಂಡು.
ಬೊಕ್ಕ ಉದಿಪನ ಲೇಸ್ ಆದ್ ಸ್ವಾಮಿ ನಿತ್ಯಾನಂದ ಶ್ರೀ ಕೃಷ್ಣ ಭಜನಾ ಮಂಡಳಿದಕ್ಲೆರ್ದ್ ಭಜನೆ ಪ್ರತಿಷ್ಠಿತ ಪ್ರಶಸ್ತಿ ಪಟ್ಟುನ ಲೇಸ್, ಮಂಗಳಾರತಿ, ತೀರ್ಥಪ್ರಸಾದ ಸೇವೆ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಸಮಿತಿದ ಸದಸ್ಯೆರ್, ಅರ್ಚಕೆರ್, ಶಿಕ್ಷಣ ಸಮಿತಿ, ಪೂಜಾ ಸಮಿತಿ, ಮಹಿಳಾ ವಿಭಾಗ, ಯುವ ವಿಭಾಗ, ಸದಸ್ಯತ್ವ ಸಮಿತಿ ಬೊಕ್ಕ ಕಾರ್ಯಕ್ರಮಲು, ಸಾರ್ವಜನಿಕ ಸಂಪರ್ಕ ಸಮಿತಿ ಲೆಪ್ಪೋಲೆಡ್ ತೆರಿಪಾದೆರ್.
