ದೇಶಡ್ ದಿನರ್ದ್ ದಿನೊ ಆಕ್ಸಿಡೆಂಟ್ ಸಂಖ್ಯೆ ಎಚ್ಚಾವೊಂದೇ ಉಂಡು. ಮಾರ್ಗ ಆಕ್ಸಿಡೆಂಟ್ ಡ್ ಸೈತಿನಕ್ಲೆನ ಸಂಖ್ಯೆಡ್ ಬೆಂಗ್ಲೂರ್ ದೇಶಡೇ 2ನೇ ತಾನಡ್ ಉಂಡು.
ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವಾಲಯ ಬುಡುಗಡೆ ಮಲ್ತಿನ ವರದಿಡ್ ಈ ಆಕ್ಸಿಡೆಂಟ್ ಇಚಾರ ಉಲ್ಲೇಖ ಆತ್ಂಡ್. 2022ನೇ ಸಾಲ್ ದ ವರದಿ ಉಂದಾತ್ಂಡ್. ಕರಿನ ವರ್ಷ 3822 ಆಕ್ಸಿಡೆಂಟ್ ಆತ್ಂಡ್. 772 ಜನ ತೀರ್ ಪೋಯೆರ್. ಒಟ್ಟು 3189 ಜನಕ್ಕ್ ಪೆಟ್ಟಾತ್ಂಡ್. ಡೆಲ್ಲಿಡ್ 1500 ಜನ ಹುಷಾರ್ ಇಜ್ಜಂದೆ ಆತೆರ್.
ಮಾಟುಂಗಾ (ಪೂರ್ವ) ದ ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ಪ್ರತಿ ವರ್ಷಲ ಜೋಕುಲೆನ ದಿನಾಚರಣೆದ ಪೊರ್ತುಡು ಲೇಖನಿ ಸಾಮಗ್ರಿ ದೆತೊನಿಯೆರೆ ಬೊಂಬೈದ ಕನ್ನಡ ಮಾಧ್ಯಮದ ಒಂಜಿ ಶಾಲೆಗ್ ಪನವುದ ಸಕಾಯನ್ ಕೊರೊಂದು ಉಂಡು.
ಈ ವರ್ಷದ ಲೆಕ್ಕೊಡು ಆಂಧೇರಿದ ನಿತ್ಯಾನಂದ ಮಾರ್ಗ ಹಿರಿಯ ಮಾಧ್ಯಮಿಕ ಮುನಿಸಿಪಲ್ ಕನ್ನಡ ಶಾಲೆನ್ ಆಯ್ಕೆ ಮಲ್ದ್ಂಡ್. ಬೊಂಬೈ ಕನ್ನಡ ಸಂಘದ ಕಾರ್ಯದರ್ಶಿ ಸೋಮನಾಥ ಎಸ್.ಕರ್ಕೇರ ಬೊಕ್ಕ ಜತೆ ಕಾರ್ಯದರ್ಶಿ ಮಲ್ಲಿಕಾರ್ಜುನ ಬಡಿಗೇರೆರ್ ಪನವುದ ಸಕಾಯನ್ ಶಾಲೆದ ಶಿಕ್ಷಕೆರ್ ಸಂಜಯ ಮಾಸ್ಯಾಳ ಬೊಕ್ಕ ರಮೇಶ ದೂದಗಿ ಮೆರೆಗ್ ಕೊರಿಯೆರ್.
ಈ ಪೊರ್ತುಡು ಶಾಲೆದ ಪ್ರತಿಭಾವಂತ ವಿದ್ಯಾರ್ಥಿನಿ ಚಂದ್ರಕಲಾ ಚವ್ಹಾನ್ರೆಗ್ ಸೋಮನಾಥ ಎಸ್ ಕರ್ಕೇರ ಬೊಕ್ಕ ಪ್ರತಿಭಾವಂತ ವಿದ್ಯಾರ್ಥಿ ಸಿದ್ಧಾರ್ಥ ಕುಂಬಾರ ಮೊಕ್ಲೆಗ್ ಸಂಘದ ಕೋಶಾಧಿಕಾರಿ ರಾಜೇಂದ್ರ ಗಡಿಯಾರ ಮೆರೆನ ಮುತಾಲಿಕೆಡ್ ವಿಶೇಷ ನಗದು ಪನವುದ ಸಕಾಯನ್ ಕೊರಿಯೆರ್.
ಕಾರ್ಲ: ಇತ್ತೆದ ಪುಗರ್ತೆದ ಕಲಾವಿದೆರೆನೊಟ್ಟಿಗೆ ಒಂಜಿ ದಿನ ಕಳೆವೊನೇ ಕಷ್ಟ ಪನ್ಪುನ ಪರಿಸ್ಥಿತಿ ಇತ್ತ್ಂಡ್. ಯಕ್ಷಗಾನ ಕ್ಷೇತ್ರಡ್ 23 ವರ್ಷೊದಿಂಚ ಸೇವೆ ಸಂದಾವೊಂದು ಉಲ್ಲೆ. ಕಲಾವಿದೆರೆನ ಕಷ್ಟನ್ ಮಸ್ತ್ ಕೈತಲ್ ರ್ದ್ ತೂಯಿನಾಯೆ ಯಾನ್. ಕಲಾವಿದೆರೆಗ್ ಪನವುದ ಸಕಾಯ ಕೊರ್ಪುನ ದಿಟ್ಟಿಡ್ ಪಟ್ಲ ಫೌಂಡೇಶನ್ ಟ್ರಸ್ಟ್ ಸುರು ಆಂಡ್. ಟ್ರಸ್ಟ್ದ ಕಾರ್ಯವೈಖರಿಡ್ ಯಾನ್ ಕೇವಲ ನಿಮಿತ್ತ, ಮಾತಲ ಕಟೀಲ್ ಅಮ್ಮನ ಕೃಪೆ. ಹೃದಯ ಶ್ರೀಮಂತ ದಾನಿಲೆರ್ದ್ ನಮ್ಮ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕಲಾಸೇವೆಡ್ ದುಂಬಾರಿವೊಂದು ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಸ್ಥಾಪಕಾಧ್ಯಕ್ಷೆರ್ ಸತೀಶ್ ಶೆಟ್ಟಿ ಪಟ್ಲ ಪಂಡೆರ್.
ಮೇರ್ ನ.2 ಕ್ಕ್ ಗೋವಾ ಪಣಜಿ ಇನ್ಸಿಟ್ಯೂಟ್ ಮೆನೆಜಸ್ ಬ್ರಗಾನ್ಸಾ ಸಭಾಗೃಹಡ್ ನಡತಿನ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಗೋವಾ ಘಟಕದ ಉದಿಪನ ಲೇಸ್ ಡ್ ಪಾತೆರಿಯೆರ್.
ಲೇಸ್ ದ ಉದಿಪನ ಮಲ್ತಿನ ಬೈಂದೂರು ವಿಧಾನ ಸಭಾ ಕ್ಷೇತ್ರದ ಶಾಸಕೆರ್ ಗುರುರಾಜ್ ಗಂಟಿಹೊಳೆ ಪಾತೆರ್ದ್, ಯಕ್ಷಗಾನ ನಮ್ಮ ಕರಾವಳಿಗ್ ದೇವೆರ್ ಕೊರ್ನ ಕಾಣಿಕೆ. ಯಕ್ಷಗಾನ ಸಂಸ್ಕಾರನ್ ಕಲ್ಪಾವೊಂಡು. ಉಂದು ಎಡ್ಡೆ- ಆಳ್ ದ ಬಗೆಟ್ಟ್ ಜನಕ್ಲೆಗ್ ತೆರಿಪಾವೊಂಡು. ಯಕ್ಷಗಾನ ಸಾಂಸ್ಕೃತಿಕವಾದ್, ಸಾಮಾಜಿಕವಾದ್ ಘನತೆನ್ ಎಚ್ಚ ಮಲ್ಪೊಂಡು ಪನ್ಪುನೆಕ್ಕ್ ಪಟ್ಲ ಫೌಂಡೇಶನ್ ದ ಲೇಸ್ ಲೇ ಸಾಕ್ಷಿ ಪಂದ್ ಪಂಡೆರ್.
ಕಂಬುಲ ಕ್ಷೇತ್ರದ ಸಾಧನೆಗಾದ್ ಸದಾನಂದ ಶೆಟ್ಟಿ ಬೆಳುವಾಯಿ ಬೊಕ್ಕ ಅಶೋಕ್ ಶೆಟ್ಟಿ ಬೇಲಾಡಿ, ಕ್ರೀಡಾ ಕ್ಷೇತ್ರದ ಸಾಧನೆಗಾದ್ ಜಯ ಶೆಟ್ಟಿ ಗೋವಾ, ಯಕ್ಷಗಾನ ಭಾಗವತೆರ್ ಸದಾಶಿವ ಅಮಿನ್ ಕೊಕ್ಕರ್ಣೆ, ಯಕ್ಷಗಾನ ಕಲಾವಿದೆರ್ ಸತೀಶ್ ಮೊಗವೀರ ಹಾಲಾಡಿ, ವಿಶ್ವನಾಥ ಪೂಜಾರಿ ಎಣ್ಣೆಬೈಲು, ರಾಕೇಶ್ ಶೆಟ್ಟಿ ಮೇಘರವಳ್ಳಿ, ನವೀನ್ ಶಾನುಭೋಗ್, ಒಡಿಪು ಜಿಲ್ಲಾ ಪ್ರಶಸ್ತಿ ಪುರಸ್ಕೃತೆರ್ ಉಪ್ಪುಂದ ನಾಗೇಂದ್ರ ರಾವ್, ಸತೀಶ್ ಶೆಟ್ಟಿ ಪಟ್ಲ ಬೊಕ್ಕ ಶಶಿಧರ್ ಶೆಟ್ಟಿ ಬರೋಡಾ ಮೊಕ್ಲೆಗ್ ಸನ್ಮಾನ ಮಲ್ತೆರ್.
ದೇಣಿಗೆ ಕೊರ್ಪುನ ಗೋವಾ ಘಟಕರ್ದ್ ಪಟ್ಲ ಫೌಂಡೇಶನ್ದ ಕೇಂದ್ರ ಘಟಕಗ್ 1 ಲಕ್ಷ ರೂ. ದೇಣಿಗೆನ್ ಪಟ್ಟಿಯೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಗೋವಾ ಘಟಕದ ಮಾನಾದಿಗೆದ ಗುರ್ಕಾರೆ ವಿಜಯೇಂದ್ರ ಶೆಟ್ಟಿ ದಂಪತಿನ್ ಬೊಕ್ಕ ಗುರ್ಕಾರೆ ಗಣೇಶ್ ಶೆಟ್ಟಿ ಇರ್ವತ್ತೂರು ದಂಪತಿಗ್ ಅಭಿನಂದನೆ ಮಲ್ತೆರ್.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಪ್ರಧಾನ ಸಂಚಾಲಕೆರ್, ತುಳುಕೂಟ ಬರೋಡದ ಗುರ್ಕಾರೆ ಶಶಿಧರ್ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಈ ಪೊರ್ತುಡು ಕುಡ್ಲ ಘಟಕದ ಗುರ್ಕಾರೆ ತಾರನಾಥ ಶೆಟ್ಟಿ, ಗುಜರಾತ್ ಘಟಕದ ಅಜಿತ್ ಶೆಟ್ಟಿ, ಗೋವಾ ಬಂಟರ ಸಂಘದ ಗುರ್ಕಾರೆ ಶಶಿಧರ್ ನಾಯಕ್, ಬಿಲ್ಲವ ಸಂಘದ ಗುರ್ಕಾರೆ ನಾಗೇಶ್ ಪೂಜಾರಿ, ಆರ್ಎಸ್ಎಸ್ ಗೋವಾ ವಿಭಾಗದ ಸಂಘ ಸಂಚಾಲಕೆರ್ ಸಿಎ ರಾಜೇಂದ್ರ ಬೊಬೈ, ನಾರಾಯಣಗುರು ಸೇವಾ ಟ್ರಸ್ಟ್ ಗುರ್ಕಾರೆ ಪ್ರಕಾಶ್ ಪೂಜಾರಿ, ಕೋಶಾಧಿಕಾರಿ ಸುದೇಶ್ ಕುಮಾರ್ ರೈ, ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ, ಜತೆ ಕಾರ್ಯದರ್ಶಿ ರವಿಚಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ, ಪ್ರದೀಪ್ ಆಳ್ವ, ಪ್ರಸನ್ನ ಶೆಟ್ಟಿ ಬೈಲೂರು, ಪಳ್ಳಿ ಘಟಕದ ಗುರ್ಕಾರೆ ಸುನಿಲ್ ಶೆಟ್ಟಿ, ರಾಜೇಶ್ ಶೆಟ್ಟಿ, ಕರ್ನೂರು ಸುಭಾಷ್ ರೈ, ಗೋವಾ ಘಟಕದ ಕಾರ್ಯದರ್ಶಿ ಸುನಿಲ್, ಖಜಾಂಚಿ ಮೋಹನ್ದಾಸ್ ಶೆಟ್ಟಿ, ಸಂಚಾಲಕೆರ್ ಅಶೋಕ್ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಆನಂದ್ ಶೆಟ್ಟಿ ಬೊಕ್ಕ ಕೂಟದಕುಲು ಪ್ರಾರ್ತನೆ ಮಲ್ತೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಗೋವಾ ಘಟಕದ ಗುರ್ಕಾರೆ ಗಣೇಶ್ ಶೆಟ್ಟಿ ಇರ್ವತ್ತೂರು ಎದ್ಕೊಂಡೆರ್. ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಕೆ. ಭಂಡಾರಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರು ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
ಬೊಂಬೈ: ಪೋರ್ಟ್ ಪರಿಸರಡ್ 1920 ಟ್ಟ್ ಸ್ಥಾಪನೆ ಆಯಿನ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವ ಗೌಜಿ ಅ.29 ಐತಾರ ಸಾಂತಕ್ರೂಸ್ ಪೂರ್ವದ ಬಿಲ್ಲವ ಭವನದ ಸಭಾಗೃಹದ ನಿರ್ಮಿತ ಸೂರು ಸಿ. ಕರ್ಕೇರ ಚಾವಡಿಡ್ ನಡತ್ಂಡ್.
ಈ ಲೇಸ್ ವಿದ್ಯಾದಾಯಿನಿ ಸಭಾ (ರಿ.) ದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್. ವಿದ್ಯಾದಾಯಿನಿ ಸಭಾ ಸಂಚಾಲಿತ ಕೆನರಾ ವಿದ್ಯಾದಾಯಿನಿ ರಾತ್ರೆ ಶಾಲೆದ ಹಳೆ ವಿದ್ಯಾರ್ಥಿ, ಸಮಾಜ ಸೇವಕೆರ್, ಭರತ್ ಕೋಚ್ ಬಿಲ್ಡರ್ಸ್ ದ ಮುಖ್ಯ ಆಡಳಿತ ನಿರ್ದೇಶಕೆರ್ ಸದಾಶಿವ ಎಸ್ ಶೆಟ್ಟಿ ಪಿಂಗಾರ ಅರಲಾವುನ ಮುಖೇನ ಲೇಸ್ ದ ಉದಿಪನ ಮಲ್ತೆರ್. ಅಂತರಾಷ್ಟ್ರೀಯ ಖ್ಯಾತಿದ ಪುರೋಹಿತೆರ್, ಜ್ಯೋತಿಷ್ಯೆರ್, ವಾಸ್ತುತಜ್ಞೆರ್ ಅಶೋಕ್ ಪುರೋಹಿತ್, ಪೋರ್ಟ್ ಶ್ರೀ ಭುವನೇಶ್ವರಿ ಸೇವಾ ಸಮಿತಿದ ಧರ್ಮದರ್ಶಿಲು ರಾಜೇಶ್ ಭಟ್ ಆಶೀರ್ವಚನ ಕೊರಿಯೆರ್.
ಮಲ್ಲ ಬಿನ್ನೆರಾದ್ ಸಾಫಲ್ಯ ಸೇವಾ ಸಂಘದ ಗುರ್ಕಾರೆ ಶ್ರೀನಿವಾಸ್ ಸಾಫಲ್ಯ, ಭಾರತ್ ಬ್ಯಾಂಕ್ ದ ಮಾಜಿ ಕಾರ್ಯಾಧ್ಯಕ್ಷೆರ್ ಡಿ.ಬಿ ಅಮಿನ್, ಸಮಾಜ ಸೇವಕೆರ್ ಡಾ.ಸತೀಶ್ ಎನ್ ಬಂಗೇರ, ವೆಸ್ಟರ್ನ್ ಇಂಡಿಯಾ ಶನಿಮಹಾತ್ಮ ಸೇವಾ ಸಮಿತಿ ಪೋರ್ಟ್ ದ ಗುರ್ಕಾರೆ ರವಿ ಎಲ್ ಬಂಗೇರ, ಸುಮಂಗಳಾ ಮಿಷಿನರಿ ಭಿವಂಡಿದ ಆಡಳಿತ ನಿರ್ದೇಶಕೆರ್ ನಾರಾಯಣ್ ಆರ್ ಪೂಜಾರಿ, ಕನ್ನಡ ಜಾನಪದ ಪರಿಷತ್ತು ಬೆಂಗ್ಲೂರ್ ಮಹಾರಾಷ್ಟ್ರ ಘಟಕದ ಸಂಚಾಲಕೆರ್ ರಾಮಣ್ಣ ದೇವಾಡಿಗ, ಕೆನರಾ ವಿದ್ಯಾದಾಯಿನಿ ರಾತ್ರೆ ಶಾಲೆದ ಮುಖ್ಯೋಪಾಧ್ಯಾಯೆರ್ ಪ್ರಕಾಶ್ಚಂದ್ರ ಎಮ್ ಆರ್, ವಿದ್ಯಾದಾಯಿನಿ ಸಭಾದ ಮಾನಾದಿಗೆದ ಗುರ್ಕಾರೆ ಜೆ ಎಮ್ ಕೋಟ್ಯಾನ್, ಒತ್ತು ಗುರ್ಕಾರೆ ಆರ್ ಕೆ ಕೋಟ್ಯಾನ್, ಗೌರವ ಪ್ರಧಾನ ಕಾರ್ಯದರ್ಶಿ ಚಿತ್ರಾಪು ಕೆ ಎಮ್ ಕೋಟ್ಯಾನ್, ಶಾಲೆದ ಕಾರ್ಯಾಧ್ಯಕ್ಷೆರ್ ಡಾ. ಪ್ರಕಾಶ್ ಬೆದ್ರ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಸಂತಿ ಆರ್ ಕೋಟ್ಯಾನ್, ಸೇವಾ ದಳತ್ತ ಜಿಒಸಿ ಸುರೇಶ್ ಎಮ್ ಪೂಜಾರಿ ಪಾಲ್ ಪಡೆದಿತ್ತೆರ್.
ಬತ್ತಿ ಬಿನ್ನೆರೆನ್ ಸಭಾದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್ ಸಾಲ್ ಪುದೆಪಾದ್, ಪೂಗುಚ್ಚ, ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಹರಿಣಾಕ್ಷಿ ನಿಲೇಶ್ ಪೂಜಾರಿ ಬೊಕ್ಕ ಸಚ್ಚೀಂದ್ರ ಅಂಬಾಗಿಲು ಲೇಸ್ ದ ಸುಧಾರಿಕೆ ಮಲ್ತೆರ್. ಸಭಾದ ಜತೆ ಕಾರ್ಯದರ್ಶಿ ಉಮೇಶ್ ಕೆ ಅಂಚನ್, ಹರೀಶ್ ಶಾಂತಿ ಹೆಜಮಾಡಿ, ಗೌರವ ಕೋಶಾಧಿಕಾರಿ ಶರತ್ ಜಿ ಪೂಜಾರಿ, ಶತಮಾನೋತ್ಸವ ಸಮಿತಿದ ಗೌರವ ಕಾರ್ಯದರ್ಶಿ ಜೆ.ಜೆ ಕೋಟ್ಯಾನ್ ಸಹಕಾರ ಕೊರಿಯೆರ್.
ಉದಿಪನ ಲೇಸ್ ದ ಬೊಕ್ಕ ಸ್ವಾಗತ ನೃತ್ಯ, ಡೆನ್ನಾ-ಡೆನ್ನಾನ ಜಾನಪದ ನೃತ್ಯ ಪಂತೊ, ವಿಠ್ಠಲ್ ನಾಯಕ್ ಕಲ್ಲಡ್ಕ ಮೆರೆರ್ದ್ ವಿನೂತನ ಶೈಲಿದ ಗೀತಾ ಸಾಹಿತ್ಯ ಸಂಭ್ರಮ, ಜೈ ತುಳುನಾಡ್ ಸ್ವರ ಮಾಧುರ್ಯ, ಪುಣೆ ಫ್ರೆಂಡ್ಸ್ ಮೊಕ್ಲೆರ್ದ್ ತಾದಿ ತತ್ತ್ಂಡ ತುಳು ನಾಟಕ ಪ್ರದರ್ಶನ ಆಂಡ್. ಬೊಕ್ಕ ಸಾಧಕೆರೆಗ್ ಪ್ರಶಸ್ತಿ ಪಟ್ಟುನ ಲೇಸ್ ನಡತ್ಂಡ್. ಲೇಸ್ ದ ದ್ವಾರನ್ ನರ್ಸಪ್ಪ ಸಿ ಸಾಲ್ಯಾನ್ (ಪೋರ್ಟ್ ಸೆಂಟ್ರಲ್) ಬೊಕ್ಕ ಜಯ ಪೂಜಾರಿ (ಹೋಟೆಲ್ ಗೋಕುಲ್) ನೆಂಪುಗಾದ್ ನಿರ್ಮಾಣ ಮಲ್ದೆರ್.
ಬೊಂಬೈ ಕುಲಾಲ ಸಂಘ (ರಿ.) ದ ಅಮೂಲ್ಯ ಪತ್ರಿಕೆದ 25ನೇ ವರ್ಷೊದ ಬೊಳ್ಳಿ ಪರ್ಬ ಲೇಸ್ ನ.5 ಐತಾರ ಬೊಲ್ಪುಗು ಗೋರೆಗಾಂವ್ ನಂದಾ ದೀಪ ಹೈಸ್ಕೂಲ್ ದ ಸಭಾಗೃಹಡ್ ನಡಪರೆ ಉಂಡು.
ಅಂಚೆನೆ ಈ ಲೇಸ್ ದೊಟ್ಟಿಗೆ ದಿ/ ಪಿ.ಕೆ ಸಾಲ್ಯಾನ್ ಸ್ಮರಣಾರ್ಥ ವೇದಿಕೆದ ಉದಿಪನ, ಸ್ವಾಗತ ನೃತ್ಯ, ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಕುಲಾಲ ಸಂಘ ಬೊಂಬೈದ ಕೈತಲ್ ದ ಸಮಿತಿದಕ್ಲೆರ್ದ್ ಜಾನಪದ ನೃತ್ಯ ಬೊಕ್ಕ ಅಮೂಲ್ಯ ಪತ್ರಿಕೆದ ಮಾಜಿ ಸಂಪಾದಕೆರೆಗ್ ಸನ್ಮಾನ ನಡಪರೆ ಉಂಡು.
ಬೊಂಬೈ ಬಿಲ್ಲವರ ಸಂಘದ ಮುತಾಲಿಕೆಡ್ ಯುವ ಕಲ್ಯಾಣ ಉಪ ಸಮಿತಿ ಆಯೋಜನೆ ಮಲ್ತಿನ ಕಾಂತಾಬಾರೆ-ಬೂದಬಾರೆ ಒಳಾಂಗಣ ಗೊಬ್ಬುದ ಕೂಟ ನ.19 ಕ್ಕ್ ಸಾಂತಾಕ್ರೂಜ್ ಬಿಲ್ಲವ ಭವನಡ್ ನಡಪರೆ ಉಂಡು.
ಈ ಕೂಟೊಡು ಕೇರಂ, ಚೆಸ್, ಡ್ರಾಯಿಂಗ್, ರಂಗೋಲಿ ಪಂತೊ ನಡಪರೆ ಉಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ನ.2 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ನ.3 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ: ತುಳು ರಾಜ್ಯದ ವಿಚಾರಡ್ ಜನಜಾಗೃತಿಗಾದ್ ನವೆಂಬರ್ 1 ಕ್ಕ್ ಟ್ವಿಟರ್ (X) ಡ್ ದಿನ ಇಡೀ #TulunadState ಅಭಿಯಾನ ನಡತ್ಂಡ್.
ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ಕೊರ್ಪುನ ವಿಚಾರಡ್ ಸರ್ಕಾರೊರ್ದು ನಂಬಿಕೆದ್ರೋಹ ಆವೊಂದುಂಡು. ದಾಯೆ ಪಂಡ ಕರ್ನಾಟಕ ಬೊಕ್ಕ ಕೇರಳ ರಾಜ್ಯರ್ದ್ ಲ ಎಲ್ಯ ರಾಜ್ಯಲೆಡ್ 2-19 ಭಾಷೆನ್ ಅಧಿಕೃತ ಮಲ್ದೆರ್.
ಸಂವಿಧಾನದ ವಿಧಿ 347ತ್ತ ಪ್ರಕಾರ ರಾಜ್ಯ ಸರಕಾರಗ್ ಅಧಿಕೃತ ಮಲ್ಪುನ ಮಾತ ಅವಕಾಶನ್ ನಮ್ಮ ಸಂವಿಧಾನನೇ ಕೊರ್ತುಂಡು. ಆಂಡಲ ಪದೇ ಪದೇ ಇಂಚ ಅಧಿಕೃತ ಮಲ್ಪುವೆ ಪಂದ್ ತಡ ಮಲ್ಪುನೆನ್ ತೂಂಡ ಮೊಕ್ಲೆಗ್ ತುಳುನು ಅಧಿಕೃತ ಮಲ್ಪುನ ಮನಸ್ಸಿಜ್ಜಿ ಪನ್ಪುನವು ಗೊತ್ತಾಪುಂಡು.
ಅಂಚಾದ್ ಅಧಿಕೃತ ತಾನಮಾನದ ಬೇಡಿಕೆರ್ದ್ ತುಳುರಾಜ್ಯದ ಬೇಡಿಕೆನೇ ಎಚ್ಚ ಪರಿಣಾಮಕಾರಿ ಆತ್ಂಡ್.ಒಂಜಾತ್ ಒಂಜಿ ದಿನ ನಮ ನಟ್ಟುನೆರ್ದ್, ನಮಕ್ ದಕ್ಕೊಡಾಯಿನೆನ್ ಪಡೆಯೆರೆ ನಮ ಸ್ವತಂತ್ರರಾವೊಡು.ಸಂವಿಧಾನಿಕವಾದ್ ರಾಜ್ಯದ ಬೇಡಿಕೆ ದೀವೊಡು. ಉಂದು ಸಂವಿಧಾನಬದ್ಧವಾಯಿನ ಹಕ್ಕು ಆತ್ಂಡ್. ಅಂಚಾದ್ ತುಳುರಾಜ್ಯನ್ ಅವ್ವೆ ಸಂವಿಧಾನ ಕೊರ್ನ ಅವಕಾಶದ ಮುಕೇನ ಪಡೆಕ ಪಂದ್ ಭಾರತದ ಸಂವಿಧಾನನ್ ಗೌರವಿಸಾವೊಂದು ಸುರುಕು ತುಳುರಾಜ್ಯದ ವಿಚಾರಡ್ ಜನಜಾಗೃತಿಗಾದ್ X ಅಭಿಯಾನ ಮಲ್ತ್ ದ ಪಂದ್ ತುಳು ಸಂಘಟನೆದಕುಲು ತೆರಿಪಾದೆರ್.
ಡೆಲ್ಲಿ: ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ದ ಪೊಸ ಕಾರ್ಯ ನಿರ್ವಾಹಕ ನಿರ್ದೇಶಕೆರಾದ್ ಮನೋರಂಜನ್ ಮಿಶ್ರಾ ಮೇರ್ ನೇಮಕ ಆತೆರ್.
ಮನೋರಂಜನ್ ಮಿಶ್ರಾ ಮೇರ್ ನೆಕ್ಕ್ ದುಂಬು ನಿಯಂತ್ರಣ ಇಲಾಖೆಡ್ ಮುಖ್ಯ ಪ್ರಧಾನ ವ್ಯವಸ್ಥಾಪಕೆರಾದ್ ಸೇವೆ ಸಂದಾದೆರ್. ಇತ್ತೆ ಆರ್ಬಿಐಗ್ ನೇಮಕ ಆತೆರ್.
ಮೆರೆಗ್ ಆರ್ಬಿಐಡ್ ಮೂಜಿ ದಶಕರ್ದ್ ಎಚ್ಚ ಅನುಭವ ಉಂಡು, ಬ್ಯಾಂಕ್ ಲು ಬೊಕ್ಕ ಎನ್ಬಿಎಫ್ಸಿದ ನಿಯಂತ್ರಣ, ಬ್ಯಾಂಕ್ದ ಮೇಲ್ವಿಚಾರಣೆ ಬೊಕ್ಕ ಕರೆನ್ಸಿ ನಿರ್ವಹಣೆ ಕ್ಷೇತ್ರಡ್ ಕೆಲಸ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಕನ್ನಡ ಸಾಂಸ್ಕೃತಿಕ ಕೇಂದ್ರ ಕಲ್ಯಾಣ್ (ರಿ.) ದ 21 ನೇ ವರ್ಷದ ಉಚ್ಚಯ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಲೇಸ್ ನ.19 ಐತಾರ ಮಧ್ಯಾಹ್ನ ಕಲ್ಯಾಣ್ ಪಶ್ವಿಮದ ಮಾತೋಶ್ರೀ ಸಭಾಗೃಹಡ್ ನಡಪರೆ ಉಂಡು.
ಈ ಲೇಸ್ ಡ್ ಬೊಂಬೈ ಪರಿಸರದ ಸಮಸ್ತ ಕನ್ನಡ ಸಂಘ, ಸಂಸ್ಥೆಲು, ಬೇತೆ ಬೇತೆ ಜಾತಿ ಸಮುದಾಯ ಸಂಸ್ಥೆಲು, ಬೇತೆ ಬೇತೆ ಕಲಾಮಾಧ್ಯಮ ಕೂಟಲೆಗ್ ಸಮೂಹ ಭಕ್ತಿಸುಗಿಪು ಪಂತೊನ್ ಆಯೋಜನೆ ಮಲ್ದೆರ್.
ಈ ಪಂತೊಡು ಪಾಲ್ ಪಡೆಪುನ ಆಸಕ್ತೆರ್ ತನ್ನ ಪುದರ್ ನ್ ಸಂಸ್ಥೆದ ಗೌರವ ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಕುಂಠಿನಿ 9322400251 ಅತ್ತಂಡ ಜತೆ ಕಾರ್ಯದರ್ಶಿ ಕುಮುದಾ ಡಿ. ಶೆಟ್ಟಿ 9619026965 ಮೆರೆನ್ ಸಂಪರ್ಕ ಮಲ್ತ್ ದ್ ನೊಂದಣಿ ಮಲ್ಪೊಲಿ.
