ಬೊಂಬೈ: ಚಾಂಡಿವಲಿ ಮಹಾದಾ ಕಾಲೊನಿ ಸಾಕಿನಾಕಾ ಶ್ರೀ ಮಹಾಕಾಳಿ ಸೇವಾ ಸಮಿತಿದ 8ನೇ ವರ್ಷದ ಲೆಕ್ಕೊಡು ಮಹಾಕಾಳಿ ಪೂಜೆ ಬೊಕ್ಕ ದರ್ಶನ ನ.26 ಐತಾರ ನಡಪರೆ ಉಂಡು.
ಆನಿ ಬೊಲ್ಪುಗು ಗಣಹೋಮ, ಸತ್ಯನಾರಾಯಣ ಪೂಜೆ, ಘಾಟ್ ಕೋಪರ್ ಬಿಲ್ಲವ ಸಂಘದ ಸದಸ್ಯೆರೆರ್ದ್ ಭಜನೆ ಬೊಕ್ಕ ಶ್ರೀ ಮಹಾಕಾಳಿ ದೇವಿನ ಮಹಾಪೂಜೆ, ಅಮ್ಮನ ಆವೇಶ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಮಹಾಕಾಳಿ, ಕಾಲಭೈರವನ ಕೃಪೆಗ್ ಪಾತ್ರರಾವೊಡು ಪಂದ್ ಸಂಜೀವ, ಸೀತಾ ಪೂಜಾರಿ ಬೊಕ್ಕ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಪತ್ತೊಂಜಿ ವರ್ಷೊದ ಪಿರವು ಕೊಲೆ ಆಯಿನ ಬೊಲ್ತೇರ್ ತಾಲೂಕ್ ದ ಧರ್ಮಸ್ಥಳ ಗ್ರಾಮದ ಕಾಲೇಜ್ ಕಲ್ಪಾರ್ಥಿ ಸೌಜನ್ಯ ಕೇಸ್ ದ ಆರೋಪಿ ಸಂತೋಷ್ ರಾವ್ ನಿರ್ದೋಷಿ ಪಂದ್ ತೀರ್ಪು ಕೊರಿನ ಸುಮಾರ್ ತಿಂಗೊಲುರ್ದು ಬೊಕ್ಕ ನ.4 ಸನಿಯಾರ ಸಿಬಿಐ ತನಿಖಾಧಿಕಾರಿಲು ಹೈಕೋರ್ಟ್ ಗ್ ಮೇಲ್ಮನವಿ ಸಂದಾದೆರ್.
ನೆತ್ತ ಬಗೆಟ್ಟ್ ಕೆಲವೇ ದಿನಟ್ಟ್ ಹೈಕೋರ್ಟ್ ಕೇಸ್ ದಾಖಲ್ ಮಲ್ತಿನ ಬೊಕ್ಕ ದಾವೆದ CC ನ್ ಕೊರ್ತುಂಡು. ನನ ಕೇಸ್ ವಾ ರೀತಿಡ್ ಪೋಪುಂಡು ಪಂದ್ ನನ ಗೊತ್ತಾವೊಡಾತೆ.
ಕುಡ್ಲ ಪೇಂಟೆದ ಉರ್ವಸ್ಟೋರ್ ದ ಶ್ರೀ ಮಹಾಗಣಪತಿ ದೇವಲ್ಯಡ್ ಶ್ರೀ ದೇವೆರೆನ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಫೆ.11-18 ಮುಟ್ಟ ನಡಪರೆ ಉಂಡು. ನೆತ್ತ ಲೆಪ್ಪೋಲೆ ಬುಡುಗಡೆ ಲೇಸ್ ಇಂಚಿಪ್ಪ ಕ್ಷೇತ್ರದ ಚಾವಡಿಡ್ ನಡತ್ಂಡ್.
ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಲೆಪ್ಪೋಲೆ ಬುಡುಗಡೆ ಮಲ್ತ್ ದ್, ಪಾತೆರ್ದ್, ಕ್ಷೇತ್ರದ ಜೀರ್ಣೋದ್ಧಾರ ಬ್ರಹ್ಮಕಲಶ ಉಚ್ಚಯದ ಕೆಲಸ ಕಾರ್ಯಲೆಗ್ ಮಾತೆರೆನ್ಲಾ ಸಹಕಾರ ಅಗತ್ಯ. ಬ್ರಹ್ಮಕಲಶ ಉಚ್ಚಯ ಲೇಸ್ ಗ್ ಸಂಬಂಧಪಟ್ಟಿನಂಚೆನೆ ಸರಕಾರದ ಮಟ್ಟಡ್ ತಿಕ್ಕೊಡಾಯಿನ ಸಕಾಯ-ಸಹಕಾರನ್ ದೆಪ್ಪಾದ್ ಕೊರ್ಪಿನ ಮತ ರೀತಿದ ಪ್ರಯತ್ನ ಮಲ್ಪುವೆ ಪಂದ್ ಪಂಡೆರ್.
ಕ್ಷೇತ್ರದ ತಂತ್ರಿ ಡಾ. ಶಿವಪ್ರಸಾದ್ ತಂತ್ರಿಲು ಕ್ಷೇತ್ರ ಬೊಕ್ಕ ಬ್ರಹ್ಮಕಲಶದ ಬಗೆಟ್ಟ್ ಪೊಲಬು ಕೊರಿಯೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ ಪಾತೆರ್ದ್, ಬ್ರಹ್ಮ ಕಲಶ ಉಚ್ಚಯಗ್ ಸಹಕಾರದ ಭರವಸೆ ಕೊರಿಯೆರ್. ನೆತ್ತೊಟ್ಟಿಗೆ ಕ್ಷೇತ್ರದ ಭಕ್ತೆರ್, ದಾನಿಲು ಇಸೇಸ ಸಹಕಾರ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮಾಜಿ ಮೇಯರ್ ಎಂ. ಶಶಿಧರ ಹೆಗ್ಡೆ, ಮಹಾಗಣಪತಿ ಸೇವಾ ಸಮಿತಿ ಗುರ್ಕಾರೆ ಸುರೇಂದ್ರ ರಾವ್, ಬ್ಯಾಂಕ್ ಆಫ್ ಬರೋಡ ಮಹಾ ಪ್ರಬಂಧಕಿ ಗಾಯತ್ರಿ ಆರ್., ಎಕ್ಸಿಕ್ಯೂಟಿವ್ ಇಂಜಿನಿಯರ್ ವೇಣುಗೋಪಾಲ್, ಪ್ರಮುಖೆರಾಯಿನ ರಾಜಗೋಪಾಲ್ ರೈ, ಶ್ರೀಕಾಂತ್ ರಾವ್, ಸುರೇಶ್ ಆಳ್ವ ಮುಡಾರೆಗುತ್ತು, ಸಂತೋಷ್ ಕುಮಾರ್ ಶೆಟ್ಟಿ, ಪ್ರಿಯಾ ಹರೀಶ್, ರಾಜೇಶ್ ಶೆಟ್ಟಿ, ಕ್ಷೇತ್ರದ ಆಡಳಿತ ಸಮಿತಿ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಸಮಿತಿ ಕಾರ್ಯದರ್ಶಿ ಶ್ರೀಧರ್ ಎಂ. ಎದ್ಕೊಂದು, ಲೇಸ್ ಸುಧಾರಿಕೆ ಮಲ್ತೆರ್.
ಕುಡ್ಲ: ರಾಷ್ಟ್ರದ ಪ್ರಮುಖ ಗ್ರಾಮೀಣ ಬ್ಯಾಂಕ್ ಲೆನ ಸಾಲ್ ಡ್ ಇಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದೊಟ್ಟಿಗೆ (ಕೆವಿಜಿಬಿ) ಜೀವ ವಿಮೆಗ್ ಸಂಬಂಧ ಪಟ್ಟಿನಂಚ ಒಡಂಬಡಿಕೆ ಮಲ್ತಿನ ಕೆನರಾ ಬ್ಯಾಂಕ್ ಪ್ರಾಯೋಜನೆದ ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ಕಂಪನಿ, ಪ್ರತಿಫಲನ್ ಖಾತರಿ ಮಲ್ಪುನ ಗ್ಯಾರಂಟೀಡ್ ಅಸ್ಯೂರ್ಡ್ ಇನ್ಕಮ್ (ಗೈನ್) ಪುದರ್ ದ ಪೊಸ ವಿಮಾ ಯೋಜನೆನ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಗ್ರಾಹಕೆರೆಗಾದ್ ಬುಡುಗಡೆ ಮಲ್ದ್ಂಡ್.
ಈ ಯೋಜನೆನ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಗುರ್ಕಾರೆ ಶ್ರೀಕಾಂತ ಎಮ್ ಭಂಡಿವಾಡ ಕುಡ್ಲಡ್ ಅಂಗಾರೆ ಬುಡುಗಡೆ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ಕಂಪನಿಗ್ ಕೆನರಾ ಬ್ಯಾಂಕ್ ಬೊಕ್ಕ ಎಚ್.ಎಸ್.ಬಿ.ಸಿ ಪಾಲುದಾರಿಕೆ ಉಂಡು. ಸುಮಾರ್ 120 ಮಿಲಿಯನ್ ಗ್ರಾಹಕೆರ್ ಇಪ್ಪುನ ಎಡ್ಡೆ ಜೀವ ವಿಮಾ ಕಂಪನಿಯಾದ್ ಉಂಡು. ರಾಷ್ಟ್ರಮಟ್ಟಡ್ ವಿಮಾ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರ (ಐ ಆರ್ ಡಿ ಏ) ರಾಷ್ಟ್ರಡ್ ಎಡ್ಡೆ ವಿಮಾ ಕಂಪನಿನ್ ಪ್ರೋತ್ಸಾಹ ಮಲ್ತೊಂದು ಉಂಡು. ನೆರ್ದ್ ಜನಸಾಮಾನ್ಯೆರೆಗ್ ವೈವಿಧ್ಯಮಯ ವಿಮಾ ಯೋಜನೆಲು ತಿಕ್ಕಡ್ ಪಂದ್ ಪಂಡೆರ್.
ದೇಶದ ಜನಸಂಖ್ಯೆಡ್ ಕೇವಲ 15 ಪ್ರತಿ ಶತದಾತ್ ಜನಕ್ಕ್ ಮಾತ್ರ ಸಂಪೂರ್ಣ ವಿಮಾ ಸುರಕ್ಷೆ ಉಂಡು. ಮಾತೆರೆನ್ ವಿಮಾ ಯೋಜನೆಗ್ ಸೇರ್ಸಾವುನ ಜಬದಾರಿ ಇಪ್ಪುನೆರ್ದಾವರ ಬ್ಯಾಂಕ್ ಲು ವಿಮಾ ವ್ಯವಹಾರಗ್ ದುಂಬಾತ್ಂಡ್. ವಿಮೆ ಪಂಡ ಸಾವುಗು ಮಾತ್ರ ಸಂಬಂಧ ಇಪ್ಪಂದೆ ಒಟ್ಟಾರೆ ಕುಟುಂಬಗ್ ಸುರಕ್ಷೆ ಕೊರ್ಪುನ ಉಳಿತಾಯ ಯೋಜನೆ ಆತ್ಂಡ್. ಈ ಯೋಜನೆ ಬ್ಯಾಂಕ್ ದ ಮಾತ 629 ಶಾಖೆಡ್ ತಿಕ್ಕುಂಡು. ಅತ್ತಂದೆ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಇತ್ತೆ 33150 ಕೋಟಿ ರೂ. ವೈವಾಟ್ ಮಲ್ತೊಂದು ಉಂಡು. 80 ಲಕ್ಷ ಗ್ರಾಹಕೆರೆಗ್ ವೈವಿಧ್ಯಮಯ ಬ್ಯಾಂಕಿಂಗ್ ಸೇವೆ ಕೊರೊಂದು ಉಂಡು ಪಂದ್ ಭಂಡಿವಾಡ ಪಂಡೆರ್.
ಕೆನರಾ ಎಚ್.ಎಸ್.ಬಿ.ಸಿ ಜೀವ ವಿಮಾ ನಿಗಮದ ಪ್ರಾದೇಶಿಕ ಮುಖ್ಯಸ್ಥೆರ್ ರಾಘವೇಂದ್ರ ಧಾರವಾಡ್ಕರ್ ಪಾತೆರ್ದ್, ವಿಮಾ ಯೋಜನೆಲು ದುಂಬುರ್ದ್ ಆಕರ್ಷಕ ಆತ್ಂಡ್. ವಿಮಾ ಕಂಪನಿಲು ಸುರಕ್ಷತೆದೊಟ್ಟಿಗೆ ಎಚ್ಚದ ಪ್ರತಿಫಲನ್ ಗ್ಯಾರಂಟಿ ಬಾಂಡ್ ದೊಟ್ಟಿಗೆ ಕೊರೊಂದು ಉಂಡು. ನೆರ್ದ್ ಜನಸಾಮಾನ್ಯೆರೆಗ್ ಬ್ಯಾಂಕ್ ನಿರ್ದಿಷ್ಟ ಠೇವಣಿದಲೆಕ್ಕ ನಿರ್ಧಾರ ಮಲ್ತಿನ ಅವಧಿದ ಬೊಕ್ಕ ಬಡ್ಡಿದೊಟ್ಟಿಗೆ ಪೂರ್ಣ ಮೊತ್ತ ಪಡೆಯೆರೆ ಅತ್ತಂಡ ಪೂರ್ಣ ಜೀವಿತಾವಧಿ ಮುಟ್ಟ ಪಿಂಚಣಿ ಪಡೆಯೆರೆ ಅನುಕೂಲ ಆತ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ಬ್ಯಾಂಕ್ ದ ಪ್ರಾದೇಶಿಕ ವ್ಯವಸ್ಥಾಪಕೆರ್ ವಿಜಯ ಧೋತಿಹಾಳ, ಮಾರ್ಕೆಟ್ ಮುಖ್ಯ ಪ್ರಬಂಧಕೆರ್ ಉಲ್ಲಾಸ ಗುನಗಾ, ಕೆನರಾ ಎಚ್ಎಸ್ಬಿಸಿ ಜೀವ ವಿಮಾ ನಿಗಮದ ಹಿರಿಯ ಅಧಿಕಾರಿಲು ಪಾಲ್ ಪಡೆದಿತ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 32ನೇ ಸಂಚಿಕೆ ನ.7 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನ.8 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದೆರ್.
ಕುಸಲ್ದ ಜವನೆರ್ ಬದ್ಯಾರು ಶಿರ್ಲಾಲು ಮುತಾಲಿಕೆಡ್ ತುಡರ್ ಪರ್ಬದ ಲೆಕ್ಕೊಡು 5ನೇ ವರ್ಷೊದ ಕೆಸರ್ ಡೊಂಜಿ ಕುಸಲ್ದ ಗೊಬ್ಬು ನ.13 ಸೋಮಾರ ನಲ್ಲಾರುಗುತ್ತು ಬಾಕಿಮಾರ್ ಕಂಡಡ್ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಮೋನಪ್ಪ ಮೂಲ್ಯ ನಲ್ಲಾರಗುತ್ತು ಮಲ್ಪುವೆರ್. ಲೇಸ್ ದ ಗುರ್ಕಾರ್ಮೆನ್ ಬದ್ಯಾರು ಲೋಕನಾಥೇಶ್ವರ ಭಜನಾ ಮಂಡಳಿ ಗುರ್ಕಾರೆ ಜಗನ್ನಾಥ್ ಕುಲಾಲ್ ಬೈರೊಟ್ಟು ಒಯಿಸೊನ್ವೆರ್. ಕೆಸರ್ ಕಂಡ ಕ್ರೀಡಾಕೂಟದ ಉದಿಪನನ್ ತುಳುನಾಡು ಒಕ್ಕೂಟ ಬೊಲ್ತೇರ್ ದ ಸ್ಥಾಪಕ ಗುರ್ಕಾರೆ ಶೈಲೇಶ್ RJ ಮೇರ್ ಮಲ್ಪೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಚಿತ್ರದುರ್ಗದ ಯೋಜನಾಧಿಕಾರಿ ಪ್ರವೀಣ್ A G, ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಕಾರ್ಯದರ್ಶಿ ಸದಾಶಿವ ಶಿವಗಿರಿ ಬೊಕ್ಕ ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬದ್ಯಾರುದ ಮಾಜಿ ಗುರ್ಕಾರೆ ಸುರೇಶ್ ಮೂಲ್ಯ ಕೊಚ್ಚೊಟ್ಟು ಪಾಲ್ ಪಡೆಯೆರೆ ಉಲ್ಲೆರ್.
ಸಾಮಾನ್ಯ ಪ್ರವೇಶ ಪರೀಕ್ಷೆ (CAT)- 2023 ಅಡ್ಮಿಟ್ ಕಾರ್ಡ್ ಇನಿರ್ದ್ ತಿಕ್ಕುಂಡು.
ಈ ಪರೀಕ್ಷೆ ಈ ತಿಂಗೊಲ್ದ 26 ರ್ದ್ ದೇಶ ಇಡೀ ಸುಮಾರ್ ಕಡೆಟ್ಟ್ ನಡಪರೆ ಉಂಡು. ಪ್ರವೇಶ ಕಾರ್ಡ್ ನ್ iimcat.ac.in ವೆಬ್ಸೈಟ್ ರ್ದ್ ಡೌನ್ಲೋಡ್ ಮಲ್ಪೊಲಿ. ಎಂಬಿಎ ಪ್ರವೇಶಗಾದ್ ನಡಪಾಯೆರೆ ಆಪುನ ಈ ಪರೀಕ್ಷೆಗ್ 3.3 ಲಕ್ಷ ಅಭ್ಯರ್ಥಿಲು ಅರ್ಜಿ ಸಂದಾದೆರ್.
ಕೋಡೆ ರಾತ್ರೆ ಬೆಂಗ್ಲೂರ್ ಪೇಂಟೆಡ್ ಭಾರೀ ಬರ್ಸ ಬೈದ್ಂಡ್. ನೆರ್ದ್ ಅಲ್ಪಲ್ಪ ಮರಕುಲು ಬೂರ್ದು ತೊಂದರೆ ಆತ್ಂಡ್.
ಅತ್ತಂದೆ ನನಲ ಮೂಜಿ ದಿನ ಬಯ್ಯದ ಪೊರ್ತುಡು ಬರ್ಸ ಬರಿಯೆರೆ ಉಂಡು ಪಂದ್ ರಾಜ್ಯ ಹವಾಮಾನ ಇಲಾಖೆ ಎಚ್ಚರಿಕೆ ಕೊರ್ತುಂಡು. ಅಂಚೆನೆ ಬೆಂಗ್ಲೂರ್, ಧಾರವಾಡ, ತುಮಕೂರು, ಚಿಕ್ಕಮಗಳೂರು, ಚಿಕ್ಕಬಳ್ಳಾಪುರ, ಶಿವಮೊಗ್ಗ ಸೇರಿನಂಚೆನೆ 10 ರ್ದ್ ಎಚ್ಚ ಜಿಲ್ಲೆಡ್ ಎಡ್ಡೆ ಬರ್ಸ ಬೈದ್ಂಡ್.
ಆಂಧ್ರಪ್ರದೇಶದ ತಿರುಪತಿ ತಿರುಮಲ ದೇವಲ್ಯಡ್ ನ.19 ಕ್ಕ್ ಪುಷ್ಪಯಾಗ ನಡಪರೆ ಉಂಡು.
ಬೊಲ್ಪುಗು ಸ್ನಪನತಿರುಂಜನ, ಮಧ್ಯಾಹ್ನ ರ್ದ್ ಬಯ್ಯ ಮುಟ್ಟ ಪುಷ್ಪಯಾಗ ನಡಪರೆ ಉಂಡು. ನೆಕ್ಕಾದ್ ನ.18 ಕ್ಕ್ ಅಂಕುರಾರ್ಪಣೆ ನಡಪರೆ ಉಂಡು. ಬಯ್ಯಗ್ ಸಹಸ್ರ ದೀಪಾಲಂಕಾರ ಸೇವೆದ ಬೊಕ್ಕ ಭಕ್ತೆರ್ ಮಲಯಪ್ಪಸ್ವಾಮಿನ ದರ್ಶನ ಪಡೆವೊಲಿ.
ಎಕ್ಲೆನ ಬೇತೆ ಬೇತೆ ಬೇಡಿಕೆನ್ ರಾಜ್ಯ ಸರ್ಕಾರ ನ.15 ತ್ತೊಲಯಿ ಈಡೇರಿಸಾಯಿಜಿಂಡ ನ.16 ರ್ದ್ ಬಿಸಿಯೂಟ ತಯಾರಿ ಮಲ್ಪುನೆನ್ ಉಂತಾವ ಪಂದ್ ಅಕ್ಷರ ದಾಸೋಹ ಯೋಜನೆದ ಬಿಸಿಯೂಟ ತಯಾರಕೆರೆನ ಸಂಘ ಎಚ್ಚರಿಕೆ ಕೊರ್ತುಂಡು.
ಕರಿನ ಅ.30 ರ್ದ್ ಬೆಂಗ್ಲೂರ್ ದ ಸ್ವಾತಂತ್ರ್ಯ ಉದ್ಯಾನಡ್ ಪ್ರತಿಭಟನೆ ಮಲ್ತೊಂದು ಇಪ್ಪುನ ನೌಕರೆರ್, ನ.12 ರ್ದ್ ತುಡರ್ ಪರ್ಬ ಇಪ್ಪುರ್ನೆದಾವೆರ ನ.10 ಮುಟ್ಟ ಧರಣಿ ನಡಪಾದ್, ಆವೆರ್ದ್ ಬೊಕ್ಕ ಊರುಗು ಪೋಪೆರ್ ಪಂದ್ ವರದಿ ಆತ್ಂಡ್.
