Tulu News

ಇಂದ್ರಾಳಿ ರೈಲ್ವೆ ಸಂಕ ಕಾಮಗಾರಿ ಧಾರವಾಡ ಸ್ಟೀಲ್ ಬ್ರಿಡ್ಜ್ ನಿರ್ಮಾಣ ಘಟಕಗ್ ಶಾಸಕೆರ್ ಯಶ್ ಪಾಲ್ ಸುವರ್ಣ ಭೇಟಿ

ಇಂದ್ರಾಳಿ ರೈಲ್ವೆ ಸಂಕ ಕಾಮಗಾರಿದ ಭಾಗವಾದ್ ಧಾರವಾಡದ ಪದ್ಮಜಾ ಇಂಡಸ್ಟ್ರೀಸ್ ಡ್ ತಯಾರಾವೊಂದು ಇಪ್ಪುನ ಸ್ಟೀಲ್ ಬ್ರಿಡ್ಜ್ ನಿರ್ಮಾಣ ಘಟಕಗ್ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಮೆರೆನ ಸೂಚನೆದಂಚೆನೆ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಭೇಟಿ ಕೊರ್ದು, ಅಧಿಕಾರಿಲೆನೊಟ್ಟಿಗೆ ಸ್ಟೀಲ್ ಬ್ರಿಡ್ಜ್ ನಿರ್ಮಾಣದ ಬಗೆಟ್ಟ್ ಸಮಾಲೋಚನೆ ನಡಪಾದ್ ಬೇಗನೇ ಕೊರ್ಪುಲೆಕ್ಕ ಮಲ್ಪುವೆ ಪಂದ್ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್.

ಸುಮಾರ್ 5.20 ಕೋಟಿ ರೂಪಾಯಿಡ್ 54 ಮೀಟರ್ ಉದ್ದ ಬೊಕ್ಕ 12.5 ಮೀಟರ್ ಅಗಲದ 385 ಟನ್ ಸಾಮರ್ಥ್ಯದ ಸ್ಟೀಲ್ ಬ್ರಿಡ್ಜ್ ದ 60% ಕಾಮಗಾರಿ ಮುಗಿವುಂಡು. ಪದಿನೈನ್ ದಿನಟ್ಟ್ 80% ಮುಗಿನ ಬೊಕ್ಕ ರೈಲ್ವೇ ಇಲಾಖೆದ ತಾಂತ್ರಿಕ ವಿಭಾಗ ಪರಿಶೀಲನೆ ನಡಪಾದ್ ವರದಿ ಸಂದಾಯಿನ ಬೊಕ್ಕ ಡಿಸೆಂಬರ್ ಸುರುತ್ತ ವಾರಡ್ ಇಂದ್ರಾಳಿಡ್ ಸ್ಟೀಲ್ ಬ್ರಿಡ್ಜ್ ಅಳವಡಿಕೆ ಪ್ರಕ್ರಿಯೆ ನಡಪರೆ ಉಂಡು. ಆವೆರ್ದ್ ಬೊಕ್ಕ ಸ್ಟೀಲ್ ಬ್ರಿಡ್ಜ್ ಮಿತ್ತ್ 200 ಎಂ. ಎಂ. ಕಾಂಕ್ರಿಟೀಕರಣ ನಡಪರೆ ಉಂಡು.

ಡಿಸೆಂಬರ್ ಅಕೇರಿದ ವಾರಡ್ ಇಂದ್ರಾಳಿ ರೈಲ್ವೇ ಸಂಕ ಕಾಮಗಾರಿ ಮುಗಿವುಂಡು. ಜನವರಿಡ್ ಸಾರ್ವಜನಿಕೆರೆನ ಸೇವೆಗ್ ಲಭ್ಯ ಆಪುಂಡು ಪಂದ್ ಶಾಸಕೆರ್ ಯಶ್ ಪಾಲ್ ಸುವರ್ಣ ತೆರಿಪಾದೆರ್.

ಈ ಪೊರ್ತುಡು ಸುಗ್ಗಿ ಸುಧಾಕರ ಶೆಟ್ಟಿ, ಮಹೇಶ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಜ.5-7: ಕುಡ್ಲಡ್ ರಾಜ್ಯ ಮಟ್ಟದ ಪತ್ರಕರ್ತೆರೆನ ಕ್ರಿಕೆಟ್ ಮ್ಯಾಚ್

ಕುಡ್ಲ: ಕರ್ನಾಟಕ ರಾಜ್ಯ ಕಾರ್ಯ ನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ಜ.5-7 ಮುಟ್ಟ ನಡಪುನ ರಾಜ್ಯ ಮಟ್ಟದ ಕ್ರಿಕೆಟ್ ಮ್ಯಾಚ್ ನ್ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ನಡಪಾಯೆರೆ ರಾಜ್ಯ ಸಮಿತಿ ತೀರ್ಮಾನ ಮಲ್ದ್ಂಡ್.

ಈ ಬಗೆಟ್ಟ್ ಕುಡ್ಲ ಪತ್ರಿಕಾ ಭವನಡ್ ದ.ಕ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಗುರ್ಕಾರೆ ಶ್ರೀನಿವಾಸ ನಾಯಕ್ ಇಂದಾಜೆ ಮೇರ್ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ತುಳುನಾಡ್ ದ ಸೌಹಾರ್ದ ಪರಂಪರೆದ ಬ್ರ್ಯಾಂಡ್ ಕುಡ್ಲ ಪರಿಕಲ್ಪನೆನ್ ರಾಜ್ಯ ಇಡೀ ಪಸರಿಯೆರೆ ಈ ಮ್ಯಾಚ್ ಪೂರಕ ಆತ್ಂಡ್ ಪಂದ್ ಪಂಡೆರ್.

ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಒತ್ತು ಗುರ್ಕಾರೆ ಅಜ್ಜ ಮಾಡ ರಮೇಶ್ ಕುಟ್ಟಪ್ಪ ಪಾತೆರ್ದ್, ಈ ಕ್ರೀಡಾ ಕೂಟಡ್ 25 ಜಿಲ್ಲೆಡ್ 500 ಪ್ರತಿನಿಧಿಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್.

ಸಭೆಟ್ಟ್ ಕ್ರಿಕೆಟ್ ಪಂತೊದ ಪ್ರಧಾನ ಸಂಚಾಲಕೆರ್, ಕುಡ್ಲ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ, ರಾಜ್ಯ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಜಗನ್ನಾಥ ಶೆಟ್ಟಿ ಬಾಳ, ಪ್ರತ್ರಿಕಾ ಭವನ ಟ್ರಸ್ಟ್ ದ ಗುರ್ಕಾರೆ ರಾಮಕೃಷ್ಣ, ಸಂಚಾಲಕೆರ್ ರವೀಂದ್ರ ಶೆಟ್ಟಿ, ಪುಷ್ಪ ರಾಜ್ ಬಿ.ಎನ್, ಭಾಸ್ಕರ್ ರೈ ಕಟ್ಟ, ರಾಜೇಶ್ ಪೂಜಾರಿ ಪಾಲ್ ಪಡೆದಿತ್ತೆರ್.

SBI ಡ್ 47 ಬೇಲೆ

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಡ್ ಖಾಲಿ ಇಪ್ಪುನ 47 ಬೇಲೆಗ್ ಅರ್ಜಿ ಸಂದಾವೊಲಿ.

ನೆಟ್ಟ್ ಉಪ ವ್ಯವಸ್ಥಾಪಕೆರ್, ಅಧಿಕಾರಿ ಬೊಕ್ಕ ಡೇಟಾ ಅನಾಲಿಸ್ಟ್ ಬೇಲೆ ಉಂಡು. ಪದವಿ, BE/B.Tec, ಡಿಪ್ಲೊಮಾ, ಎಂಬಿಎ, ಎಂಎಸ್ಸಿ ವಿದ್ಯಾರ್ಹತೆ ಇಪ್ಪುನ ಅರ್ಹ ಅಭ್ಯರ್ಥಿಲು ಅಧಿಕೃತ ವೆಬ್ ಸೈಟ್ ಮುಖೇನ ಅರ್ಜಿ ಸಂದಾವೊಲಿ. ಈ ಬೇಲೆಗ್ ಪರೀಕ್ಷೆ, ಸಂದರ್ಶನ ಬೊಕ್ಕ ಅನುಭವ ಆಧಾರದ ಮಿತ್ತ್ ನೇಮಕಾತಿ ನಡಪರೆ ಉಂಡು. ಅರ್ಜಿ ಸಂದಾಯೆರೆ ನ.27 ಅಕೇರಿದ ದಿನ ಆತ್ಂಡ್.

ಪಡ್ಡೆದ್ರ: ಆರೋಗ್ಯ ರಕ್ಷಾ ಸಮಿತಿ ಸಭೆಟ್ಟ್ ಪಾಲ್ ಪಡೆಯಿನ ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ

ಪ್ರಾಥಮಿಕ ಆರೋಗ್ಯ ಕೇಂದ್ರ, ಪಡ್ಡೆದ್ರ ನೆತ್ತ ಆರೋಗ್ಯ ರಕ್ಷಾ ಸಮಿತಿ ಸಭೆಟ್ಟ್ ಕೋಡೆ ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಮೇರ್ ಪಾಲ್ ಪಡೆದ್ ಸಲಹೆ ಸೂಚನೆನ್ ಕೊರಿಯೆರ್.

ಈ ಪೊರ್ತುಡು ಪಡ್ಡೆದ್ರ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಶಶಿಕಲಾ, ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆರ್ ಶಶಿಕಾಂತ್ ಪಡ್ಡೆದ್ರ, ತಾಲೂಕ್ ಪಂಚಾಯತ್ ಮಾಜಿ ಗುರ್ಕಾರ್ದಿ ನೀತಾ ಗುರುರಾಜ್, ಪ್ರಕಾಶ್ ಪಾದೆಬೆಟ್ಟು, ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ರಾಜಶ್ರೀ ಬೊಕ್ಕ ಆರೋಗ್ಯ ರಕ್ಷಾ ಸಮಿತಿ ಸದಸ್ಯೆರ್, ಗ್ರಾಮ ಪಂಚಾಯತ್ ಸದಸ್ಯೆರ್, ಬೊಕ್ಕ ಪ್ರಾಥಮಿಕ ಆರೋಗ್ಯ ಕೇಂದ್ರದ ದಾದಿಯೆರ್, ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್‌.

ರೇಡಿಯೊ ಮಣಿಪಾಲಡ್ ಮಧುರಗಾನ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಲೇಸ್ ದ ಸಂಚಿಕೆ ನ.8 ಬುಧಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಲತಾಚೇತನ್ ಅಶ್ವತ್ಥಕಟ್ಟೆ ಪಾಲ್ ಪಡೆಯೆರ್. ನ.2ಕ್ಕ್ ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರ ಪ್ರಕಟಣೆಡ್ ತೆರಿಪಾದ್ಂಡ್.

ಪೊಳಲಿ ದೇವಲ್ಯಗ್ ಎಸ್‌ಇಜಡ್ ಕಮಿಷನರ್ ಹೇಮಲತಾ, ಜಿಲ್ಲಾಧಿಕಾರಿ ಮು‌ಲ್ಲೈ ಮುಗಿಲನ್ ಭೇಟಿ

ಪೊಳಲಿ: ಎಸ್‌ಇಜಡ್ ಡೆವೆಲಪ್‌ಮೆಂಟ್ ಕಮಿಷನರ್ ಹೇಮಲತಾ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಮೊಕುಲು ನ.8 ಬುಧಾರ ಪೊಳಲಿ ಶ್ರೀ ರಾಜರಾಜೇಶ್ವರಿ ದೇವಲ್ಯಗ್ ಭೇಟಿ ಕೊರ್ದು ದೇವೆರೆನ ದರ್ಶನ ಪಡೆಯೆರ್.

ಅನುವಂಶಿಕ ಮೊಕ್ತೇಸರೆರ್, ಪವಿತ್ರಪಾಣಿ ಮಾಧವ್ ಭಟ್, ಕ್ಷೇತ್ರದ ಅರ್ಚಕೆರ್ ಪದ್ಮನಾಭ ಭಟ್ ಪ್ರಸಾದ ಕೊರಿಯೆರ್. ಶ್ರೀ ಕ್ಷೇತ್ರದ ಮುತಾಲಿಕೆಡ್ ಶಾಲ್, ಫಲಪುಷ್ಪ, ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಕಾರ್ಯನಿರ್ವಹಣಾಧಿಕಾರಿ ಪ್ರವೀಣ್ ಇತ್ತೆರ್. ಬೊಕ್ಕ ದೇವಲ್ಯಡ್ ನಡಪುನ ಒಂಜಿ ತಿಂಗೊಲ್ದ ವಾರ್ಷಿಕ ಜಾತ್ರೆ, ಮೃಣ್ಮಯ ದೇವೆರೆನ ಮೂರ್ತಿ ಬೊಕ್ಕ ಕ್ಷೇತ್ರದ ಇತಿಹಾಸದ ಬಗೆಟ್ಟ್ ಪೊಲಬು ಕೊರಿಯೆರ್.

ಕುಡ್ಲ ಇಮಾನ ನಿಲ್ದಾಣಡ್ 17.40 ಲಕ್ಷ ರೂ. ಬಿಲೆತ್ತ ಬಂಗಾರ್ ವಶಕ್ಕ್

ಕುಡ್ಲ: ದುಬೈರ್ದ್ ಕುಡ್ಲ ಇಮಾನ ನಿಲ್ದಾಣಗ್ ಬತ್ತಿನ ರಡ್ಡ್ ಜನತ್ತ ಕೈರ್ದ್ ಒಟ್ಟು 17,49,660 ರೂ. ಬಿಲೆತ್ತ 228 ಗ್ರಾಂ ಬಂಗಾರ್ ನ್ ಕಸ್ಟಮ್ಸ್ ಅಧಿಕಾರಿಲು ವಶಕ್ಕ್ ಪಡೆತೆರ್.

ಪೇಸ್ಟ್ ರೂಪದ ಬಂಗಾರ್ ಬೊಕ್ಕ ಬಂಗಾರ್ ದ ಮಾಲೆನ್ ಡ್ರೆಸ್, ಸಾಕ್ಸ್ ಡ್ ದೆಂಗದ್ ಕೊನೊಂದು ಇತ್ತೆರ್ ಪಂದ್ ಕಸ್ಟಮ್ಸ್ ಅಧಿಕಾರಿಲು ತೆರಿಪಾದೆರ್.

ಪುಣೆಡ್ ಪುಗರ್ತೆದ ತುಳುಕೂಟದ ಪೊಸ ಪದಾಧಿಕಾರಿಲೆನ ಆಯ್ಕೆ

ಮುಲ್ಕಿ: ಪುಣೆದ ಪುಗರ್ತೆದ ತುಳುಕೂಟದ ಪೊಸ ಸಮಿತಿಡ್ ಸಮಾಜ ಕಲ್ಯಾಣ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಮಹಾಬಲೇಶ್ವರ ದೇವಾಡಿಗ ಬೊಕ್ಕ ತುಳುಕೂಟದ ಮಹಿಳಾ ವಿಭಾಗದ ಗುರ್ಕಾರ್ದಿಯಾದ್ ಪ್ರೀಯಾ ಎಚ್ ದೇವಾಡಿಗ ಆಯ್ಕೆ ಆತೆರ್.

ಪೊಸ ಸಮಾಜ ಕಲ್ಯಾಣ ಸಮಿತಿದ ಕಾರ್ಯಾಧ್ಯಕ್ಷೆರ್ ಬೊಕ್ಕ ಮಹಿಳಾ ವಿಭಾಗದ ಗುರ್ಕಾರೆರೆನ್ ಸಮಿತಿದ ಗುರ್ಕಾರೆ ಬೊಕ್ಕ ಪದುಕೆರ್ ಅಭಿನಂದನೆ ಸಂದಾದೆರ್.