ರಾಮನಗರ: ಶ್ರೀ ಕಂಚುಗಲ್ ಬಂಡೇ ಮಠದ ಬಸವಲಿಂಗ ಸ್ವಾಮೀಜಿ(45) ಬಲ್ಲ್ ದೆತ್ತೊಂದು ತೀರ್ ಪೋಯಿನ ಘಟನೆ ರಾಮನಗರ ಜಿಲ್ಲೆದ ಮಾಗಡಿ ತಾಲೂಕ್ ದ ಬಂಡೇಮಠಡ್ ನಡತ್ಂಡ್.
ಜಾಗೆಗ್ ಬತ್ತಿನ ಪೊಲೀಸೆರ್ ಪರಿಶೀಲನೆ ಮಲ್ತೊಂದು ಉಲ್ಲೆರ್. ತೀರ್ ಪೋಯಿನ ಕಾರಣ ತೆರಿದ್ ಬೈದಿಜಿ. ಈ ಘಟನೆದ ಬಗೆಟ್ ಕುದೂರು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕಡಂದಲೆ ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘದ ಕಾರ್ಯಕಾರಿ ಸಮಿತಿಯ ಮಹಾಸಭೆ ಐತಾರ ಬೊಲ್ಪುಗು 10 ಗಂಟೆಗ್ ಪೂಪಾಡಿಕಲ್ಲ್ ಗುರುನಾರಾಯಣ ಸಭಾಭವನದ ಸಭಾಂಗಣಡ್ ನಡತ್ಂಡ್.
ಸಭೆಡ್ ಪೊಸ ಕಾರ್ಯಕಾರಿ ಸಮಿತಿದ ರಚನೆಗಾದ್ ನೂತನ ಅಧ್ಯಕ್ಷೆರಾದ್ ಪಾಲಡ್ಕ ಕುಕ್ಕುದಡಿ ಇಲ್ಲದ ಯು ಕೆ ಸುವರ್ಣ ಆಯ್ಕೆ ಆಯೆರ್. ಉಪಾಧ್ಯಕ್ಷೆರಾದ್ ಲೀಲಾಧರ್ ಪೂಜಾರಿ ಕಡಂದಲೆ ಬೊಕ್ಕ ಜಯ ಸಿ ಅಂಚನ್ ಪಾಲಡ್ಕ ಆಯ್ಕೆ ಆಯೆರ್.ಕಾರ್ಯದರ್ಶಿ ಆದ್ ನಿತಿನ್ ಕುಮಾರ್ ಪಾಲಡ್ಕ ಬೊಕ್ಕ ಜೊತೆ ಕಾರ್ಯದರ್ಶಿಯಾದ್ ರಾಜೇಶ್ ಕೆಂಜ ಪಾಲಡ್ಕ ಬೊಕ್ಕ ವಿತೇಶ್ ಪೂಜಾರಿ ಕೋಶಾಧಿಕಾರಿಯಾದ್ ಜಗದೀಶ್ ಕೋಟ್ಯಾನ್ ತೊಂದಡ್ಪು ಬೊಕ್ಕ ಹರೀಶ್ ಪೂಜಾರಿ ಕಡಂದಲೆ ಆಯ್ಕೆ ಆಯೆರ್. ಜಗದೀಶ್ ಕಲ್ಲೊಟ್ಟು ಸೊಲ್ಮೆ ಸಂದಾಯೆರ್.
ನಾಲ್ ತಿಂಗೊಲ್ದ ದ ಎಲ್ಯ ಬಾಲೆಗ್ ಮೂಜಿ ದಿನರ್ದಿಂಚ ಬುಡ್ದು ಬುಡ್ದು ಜರ ಬರೊಂದು ಇತ್ತ್ಂಡ್. ಜರ ಕಮ್ಮಿ ಆಯೆರೆ ಕೇನಂದಿಪ್ಪನಗ ಬಾಲೆದ ಕುಟುಂಬದಕುಲು ಕುಂದಾಪುರದ ಚಿನ್ಮಯ ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಅಲ್ಪ ಡಾಕ್ಟರ್ ಆಪುಜಿ ಪಂದ್ ಮಣಿಪಾಲದ ಕೆಎಂಸಿ ಆಸ್ಪತ್ರೆಗ್ ದಾಖಲ್ ಮಲ್ಪೆರೆ ಪಂಡೆರ್.
ಡಾಕ್ಟರ್ ನ ಸಲಹೆದ ಅಂಚೆನೆ ಈ ಆಸ್ಪತ್ರೆಗ್ ಸೇರ್ಸಾಯೆರ್ ಮುಲ್ಪ ಡಾಕ್ಟರ್ ಬಾಲೆನ್ ಪರೀಕ್ಷೆ ಮಲ್ತ್ ದ್ ಬಾಲೆಗ್ ಜೋರು ಜರ, ಫಿಡ್ಸ್ ಬೊಕ್ಕ ಹಾರ್ಟ್ ಉಂತುನ ಸಾಧ್ಯತೆಲ ಉಂಡು ಪಂದ್ ಬಾಲೆನ್ 9 ದಿನ ಐಸಿಒ ಡ್ ದೀಯೆರ್. ಆಂಡಲ ಬಾಲೆ ಹುಷಾರ್ ಆವಂದಿನಪಗ ಆಸ್ಪತ್ರೆಡ್ ಡಾಕ್ಟರ್ ನನ ಈ ಬಾಲೆನ್ ಬದ್ಕಾಯೆರೆ ಸಾಧ್ಯ ಇಜ್ಜಿ ಪಂದ್ ಪಂಡೆರ್.
ಆಸ್ಪತ್ರೆ ರ್ದ್ ಪಿದಯಿ ಬತ್ತಿನ ಕುಟುಂಬ ಒಡಿಪು ಎಂಜಿಎಂ ಕೈತಲ್ ಡ್ ಇಪ್ಪುನ ಕೊರಗಜ್ಜನ ಕ್ಷೇತ್ರಗ್ ಬತ್ತ್ ದ್, ಕೊರಗಜ್ಜನ ಎದುರು ಜೆಪುಡಾದ್ ಕೈ ಮುಗಿದ್ ಗಂಧ ಪರ್ಸಾದ ಕೊನೊಯೆರ್. ನೇರ್ದಾವೆರ ಬಾಲೆ ಹುಷಾರ್ ಆತ್ಂಡ್. ಉಂದು ಕೊರಗಜ್ಜನ ಪವಾಡ, ಕೊರಗಜ್ಜೆನೆ ಬದ್ಕಾಯಿನಿ ಪಂದ್ ಕುಟುಂಬದ ನಂಬಿಕೆ. ಕೊರಗಜ್ಜನ ಕಾರ್ಣಿಕ ಮಸ್ತ್ ಉಂಡು ಪನ್ಪುನೆಕ್ ಒಂಜಿ ಉದಾಹರಣೆ.
ನವದೆಹಲಿ: 58ನೇ ಪುಟ್ಟುಪರ್ಬನ್ ಇನಿ (ಅ.22) ಆಚರಣೆ ಮಲ್ತೊಂದು ಇಪ್ಪುನ ಬಿಜೆಪಿದ ಚಾಣಕ್ಯೆ ಅಮಿತ್ ಶಾ ಮೆರೆಗ್ ಮಾತೆರ್ಲಾ ಎಡ್ಡೆಪ್ಪು ಬಯಕೊಂದು ಉಲ್ಲೆರ್.
ಈ ಪೊರ್ತುಡು ಅಸ್ಸಾಂ ಮುಖ್ಯಮಂತ್ರಿ ಹಿಮಂತ್ ಬಿಸ್ವಾ ವಿಶಿಷ್ಟವಾದ್ ಶುಭಾಶಯ ಮಲ್ದೆರ್. ಅಂಚನೆ ಮೇರೆನ ಪುಟ್ಟು ಪರ್ಬಗ್ ಪ್ರಧಾನಿ ಮೋದಿ, ಟ್ಟೀಟ್ ಮಲ್ದೆರ್. ಬೊಕ್ಕ
ಅಸ್ಸಾಂ ಮುಖ್ಯಮಂತ್ರಿ ಹಿಮಂತ್ ಬಿಸ್ವಾ ಟ್ವಿಟ್ಟರ್ ಡ್ ಮೋದಿ ಬೊಕ್ಕ ಷಾ ಮೇರೆನ ಪರತ್ ಫೋಟೊ ಒಂಜಿನೆ ಪರ್ದ್ ಟ್ವೀಟ್ ಮಲ್ದೆರ್. ಅಂಚನೆ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ, ರಾಜನಾಥ್ ಸಿಂಗ್, ಸ್ಮೃತಿ ಇರಾನಿ, ಭೂಪೇಂದ್ರ ಯಾದವ್ ಬೊಕ್ಕ ಸುಮಾರ್ ಬಿಜೆಪಿ ನಾಯಕೆರ್ ಎಡ್ಡೆಪ್ಪು ಬಯಕಿಯೆರ್.
ಬಂಟ್ವಾಳ: ಗ್ರಾಮೀಣ ಭಾಗಡ್ ಪುಟ್ಟು ಬುಲೆಯಿನ ಇಸ್ಮಾಯಿಲ್ ಕಾನತ್ತೂರು ಕಾಲೇಜಿದ ಮುಟ್ಟು ಬರ್ತಿನಾರ್ ಅತ್ತ್. ಆಂಡ ಮೇರೆನ ಜ್ಞಾನ, ಆಸಕ್ತಿ ಮೆಚ್ಚುನವು. ಬಂಟ್ವಾಳದ ಬಾಳೆಪುಣಿ ಗ್ರಾಮದ ಪೂಪಾಡಿಕಲ್ಲ್ ಡ್ 25 ವರ್ಷರ್ದ್ ಗುಜರಿ ಅಂಗಡಿ ನಡಪಾವೊಂದು ಇತ್ತಿನ ಮೇರ್ ನ ಇಲ್ಲಲ್ 2 ಸಾರ ರ್ದ್ ಲ ಹೆಚ್ಚ ಬೂಕುದ ಲೈಬ್ರೆರಿ ಉಂಡು. ನೇರ್ದಾವೆರ ಗುಜಿರಿ ಸೇರುನ ಬೂಕುಲು ತಿಜೋರಿಡ್ ಉಂಡು.
ವಿದ್ಯಾರ್ಥಿಲು, ಸಾರ್ವಜನಿಕೆರ್ ಗುಜಿರಿಗ್ ಮಾರಿನ ಪುಸ್ತಕಡ್ ಎಡ್ಡೆ ಪುಸ್ತಕಲೆನ್ ದೆತ್ತ್ ದ್ ಮೇರೆನ ಇಲ್ಲಲ್ ಗ್ರಂಥಾಲಯ ಮಲ್ದೆರ್.
ಧರ್ಮ ಗ್ರಂಥಲು, ಪಠ್ಯ ಬೂಕುಲು, ಇಸ್ಮಾಯಿಲ್ ಮೇರೆನ ಲೈಬ್ರೆರಿಡ್ 10 ರೂ. ಬೂಕುರ್ದು 2 ಸಾರರ್ದ್ ಲ ಹೆಚ್ಚ ಬಿಲೆತ ಬೂಕುಲು ಉಲ್ಲ. ಬೇತೆ ಬೇತೆ ಧರ್ಮಗ್ರಂಥಲು, ಕಥೆ ಬೂಕುಲು, ಮಹಾನ್ ಪುರುಷೆರೆನ ಬೂಕುಲು, ಪ್ರಾಥಮಿಕ ಶಾಲೆರ್ದ್ ಬತ್ತಿನ ಪದವಿ, ಎಂಜಿನಿಯರಿಂಗ್ ಮುಟ್ಟದ ಬೂಕುಲ್ಲಾ ಉಲ್ಲ. ಬೂಕು ದೆಪ್ಪೆರೆ ದುಡ್ಡುದ ಬಂಗ ಇತ್ತಿನ ವಿದ್ಯಾರ್ಥಿಲು ಮೇರೆನ ಇಲ್ಲಡೆ ಬತ್ತ್ ದ್ ಬೂಕುಲೆನ್ ನಾಡ್ ದ್ ದೆತ್ತೊಂದು ಪೋಪೆರ್. ಒವ್ವೇ ಬೂಕುನ್ ಕೊನೊನಗ ರಿಜಿಸ್ಟರ್ ಬೂಕುಗ್ ಸೈನ್ ಪಾಡ್ದ್ ಅಕುಲು ಓದುದು ಮುಗಿತ್ತಿ ಬೊಕ್ಕ ಕುಡ ಕನತ್ ಕೊರೊಡು ಪಂದ್ ನಿಯಮಲ ಉಂಡು. ನೇರ್ದ್ ನನಲ ಹೆಚ್ಚ ವಿದ್ಯಾರ್ಥಿಲೆಗ್ ಅನುಕೂಲ ಆವು ಪನ್ಪಿನವು ಮೇರೆನ ಅಭಿಪ್ರಾಯ.
ಕೊಚ್ಚಿ: ಕಲ್ವ ಸಾದಿಡ್ ಬಂಗಾರ್ ಸಾಗಾಟ ಮಲ್ಪೆರೆ ತೂಯಿನ ಮಲಪ್ಪುರಂ ನಿವಾಸಿ ಮುನೀರ್ ನ್ ಕಸ್ಟಮ್ಸ್ ಅಧಿಕಾರಿಲು ಪತ್ತೆ ಮಲ್ತ್ ದ್ ಬಂಗಾರ್ ವಶ ಮಲ್ತಿನ ಘಟನೆ ಕೊಚ್ಚಿ ನೆಡುಂಬಾಶ್ಮೇರಿ ವಿಮಾನ ನಿಲ್ದಾಣಡ್ ನಡತ್ಂಡ್.
ಈ ಪೊರ್ತುಡು 44ಲಕ್ಷ ಬಿಲೆತ 185ಗ್ರಾಂ ಬಂಗಾರ್ ನ್ ವಶಕ್ಕ್ ಪಡೆತೆರ್.
ಒಡಿಪು : ಅಯೋಧ್ಯೆ ಶ್ರೀ ರಾಮ ಚಂದ್ರನ ದಿಗ್ವಿಜಯ ಯಾತ್ರೆದ ಅಟ್ಟಣೆದ ಸಭೆ ಅ.17 ದಾನಿ ಅಮೃತ ಗಾರ್ಡನ್ ಸಭಾಂಗಣಡ್ ನಡತ್ಂಡ್.
ಅಯೋಧ್ಯೆ ಪ್ರಭು ಶ್ರೀ ರಾಮಚಂದ್ರನ ದಿಗ್ವಿಜಯ ಯಾತ್ರೆ 26 ರಾಜ್ಯಲೆನ್ ಸುತ್ತುದು ಬರ್ಪುನ ಯಾತ್ರೆನ್ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಉದಿಪನ ಮಲ್ದೆರ್. ಈ ಯಾತ್ರೆ ನ. 7 ದಾನಿ ಒಡಿಪು ಜಿಲ್ಲೆಗ್ ಬರ್ಯೆರೆ ಉಂಡು, ನೆಕ್ ಅಟ್ಟಣೆದ ತಯಾರಿಗಾದ್ ಸಮಿತಿದ ರಚನೆನ್ ಮಲ್ಪೆರೆ ಆಂಡ್. ಈ ಪೊರ್ತುಡು ಸಮಿತಿದ ಪ್ರಧಾನ ಕಾರ್ಯದರ್ಶಿ ವಿಜಯ ಕೊಡವೂರು ಪಾತೆರ್ದ್, ಅಯೋಧ್ಯೆ ಪ್ರಭು ಶ್ರೀ ರಾಮಚಂದ್ರನ ಮಂದಿರದ ನಿರ್ಮಾಣಗಾದ್ ನಮ್ಮ ಹಿರಿಯೆರ್ ಜೀವನನೇ ಕೊರ್ತೆರ್. ರಾಷ್ಟ್ರೀಯ ಸ್ವಯಂಸೇವಕೆರ್ ಸಂಘದ ಮಾರ್ಗದರ್ಶನಡ್ ವಿಶ್ವ ಹಿಂದೂ ಪರಿಷತ್ ದ ಮುತಾಲಿಕೆಡ್ ಈ ಒಂಜಿ ಪೊರ್ಂಬಾಟದ ಮುಕೇನ ಉಂದೆನ್ ನಮ್ಮ ಹಿರಿಯೆರ್ ಒರಿಪಾವುನ ಪ್ರಯತ್ನ ಮಲ್ತ್ ದೆರ್. ಕಾನೂನು ಪ್ರಕಾರ ಲಕ್ಷಾಂತರ ಜನ ಪುನೆದೆರ್. ಈ ಒಂಜಿ ಅಯೋಧ್ಯೆದ ದಿಗ್ವಿಜಯ ಪೊರ್ತುಡು ನಮ ಮಾತ ಸಂಘ ಸಂಸ್ಥೆ / ಭಜನೆ ಕೂಟ / ಧಾರ್ಮಿಕ ಶ್ರದ್ಧೆ ಕೇಂದ್ರದ ಒಟ್ಟಿಗೆ ರಾಮನ ಮೂರ್ತಿಗ್ ಪೇರ್ ಪಾಡ್ದ್ ಅಭಿಷೇಕ ಮಲ್ಪುನ ಅವಕಾಶನ್ ಕೊರ್ತೆರ್.ಈ ಪೊರ್ತುಡು ಶ್ರೀ ಶ್ರೀ ಶ್ರೀ ಶಕ್ತಿ ಶಂತಾನಂದ ಮಹರ್ಷಿ ಮೇರೆನ ಮಾರ್ಗದರ್ಶನಡ್ ಧಾರ್ಮಿಕ ಸಭೆ ನಡಪರೆ ಉಂಡು. ಹಿಂದೂ ಸಮಾಜದ ಮಾತ ಬಂಧುಲು ಈ ಪೊರ್ತುಡು ಇತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಬೊಕ್ಕ ಕೇವಲ ಮಂದಿರ ನಿರ್ಮಾಣ ಮಾತ್ರ ಅತ್ತ್ ಒಟ್ಟಿಗೆ ರಾಮರಾಜ್ಯದ ನಿರ್ಮಾಣ ಆವೊಡು. ರಾಮನ ರೀತಿ ನಮ ಮಾತ ನಡತ್ಂದ್ ರಾಮರಾಜ್ಯ ನಿರ್ಮಾಣ ಮಲ್ಪುನ ಅವಶ್ಯಕತೆ ಉಂಡು ಪಂಡೆರ್.
ಪತ್ತ್ ಸಾವಿರ ಜನ ಧಾರ್ಮಿಕ ಸಭೆಕ್ ಸೇರ್ದ್ ಬೊಕ್ಕ ಗಾಡಿಡ್ ಜಾಥಾದೊಟ್ಟಿಗೆ ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯ ಮುಟ್ಟ ಲೆತೊಂದು ಪೋದು ಅಲ್ಪ ಆಶೀರ್ವಚನ ದೆತ್ತೊಂದು ಅರೆನ್ ಎತ್ತವೊನಂಚಿನ ಜಬದಾರಿ ಒಡಿಪು ಜಿಲ್ಲೆದ ಸಮಸ್ತ ನಾಗರಿಕೆರೆನ ಪುಗೆಲ್ಡ್ ಉಂಡು, ಆಯಿರ್ದಾವರ ಮಾತ ಭಕ್ತೆರ್ ಈ ಲೇಸ್ ಡ್ ಪಾಲ್ ಪಡೆವೊಡು ಬೊಕ್ಕ ಈ ಲೇಸ್ ದ ಒಟ್ಟಿಗೆ ಸಮಾಜ ಜಾಗ್ರತೆ ಆವೊಡು. ಹಿಂದೂ ಸಮಾಜಡ್ ಇಪ್ಪುನ ಕುಂದು ಕೊರತೆ ನಿವಾರಣೆ ಆವೊಡು ಪಂಡೆರ್. ಈ ಪೊರ್ತುಡು ಪುರುಷೋತ್ತಮ್ ಶೆಟ್ಟಿ, ಹರಿಯಪ್ಪ ಕೋಟ್ಯಾನ್, ಪಾಂಡುರಂಗ ಮಲ್ಪೆ,
ರಾಘವೇಂದ್ರ ಕುಂದರ್ (ವಿಶ್ವ ಹಿಂದೂ ಪರಿಷತ್),
ಮನೋಹರ್ ಶೆಟ್ಟಿ ತೊನ್ಸೆ,
ರಾಧಾಕೃಷ್ಣ ಮೆಂಡನ್ ಮಲ್ಪೆ, ತೋನ್ಸೆ, ತಾರಾ ಆಚಾರ್ಯ, ಇತ್ತೆರ್. ದಾಮೋದರ್ ಶರ್ಮ ಲೇಸ್ ನ್ ಎದ್ಕೊಂದು, ಸುಧಾರಿಕೆ ಮಲ್ತೆರ್.
ಜೋಕುಲು ಇಪ್ಪುನ ಇಲ್ಲಲ್ ಗೋಡೆಲೆಡ್ ಚಿತ್ರಲು ತೋಜುನ ಸಾಮಾನ್ಯ. ಆಂಡ ಈ ಬಾಲೆ ಮಲ್ತಿನ ಬೇಲೆ ತೂಂಡ ಬಾಲೆದ ಪೋಷಕೆರೆಗ್ ಒಂಜಿ ಕ್ಷಣಕ್ ಕೋಪ, ಬೇಜಾರ್ ರಡ್ಡ್ ಲ ಒಟ್ಟಿಗೆ ಆಪುನೆ ಗ್ಯಾರಂಟಿ.
ದಾಯೆ ಪಂಡ ಈ ಎಲ್ಯ ಬಾಲೆ ಬೊಲ್ದು ಕಾರ್ ದ ಮಿತ್ತ್ ಲಿಪ್ಸ್ಟಿಕ್ ರ್ದ್ ಮನಸ್ ಗ್ ಬತ್ತಿಲೆಕ್ಕ ಗೀಚ್ ದ್ಂಡ್. ಆಯಿಕ್ಕ್ಂದೆ ಸುಮಾರ್ ಲಿಪ್ಸ್ಟಿಕ್ ಲೆನ್ ಖಾಲಿ ಮಲ್ದ್ಂಡ್. ಬಾಲೆ ಈ ರೀತಿ ಕಾರ್ ದ ಮಿತ್ತ್ ಚಿತ್ರ ಬರೆಪುನ ವಿಡಿಯೋನ್ ಮೊರಿಸ್ಸಾ ಪನ್ಪುನಾರ್ ಸಾಮಾಜಿಕ ಜಾಲತಾಣಡ್ ಪಂಡ್ ದೆರ್. ಈ ವಿಡಿಯೋ ಭಾರೀ ವೈರಲ್ ಆತ್ಂಡ್.
ಭಾರತೀಯ ಸಂಸ್ಕೃತಿಡ್ ಪ್ರಾಮುಖ್ಯತೆ ಇಪ್ಪುನ ಬೊಕ್ಕ ಜಾಸ್ತಿ ಗೌಜಿಡ್ ಆಚರಣೆ ಮಲ್ಪುನ ಪರ್ಬನೇ ತುಡರ್ ಪರ್ಬ.
ಜಲಪೂರ್ಣ ತ್ರಯೋದಶೀ, ನರಕಚತುರ್ದಶೀ, ಮಹಾಲಕ್ಷ್ಮೀಪೂಜೆದ ಅಮಾಸೆ, ಬಲಿಪಾಡ್ಯ, ಯಮದ್ವಿತೀಯಾ ಪಂದ್ ಉಂದೆನ್ ಐನ್ ದಿನ ಮುಟ್ಟ ಆಚರಣೆ ಮಲ್ಪುನ ಪರ್ಬ. ಚಾತುರ್ಮಾಸ್ಯ ಕಾಲಡ್ ಶಯನೀಏಕಾದಶಿದಾನಿ ಭಗವಂತೆ ಯೋಗನಿದ್ರೆಗ್ ಪೋಪೆರ್. ಭಾದ್ರಪದ ಪರಿವರ್ತಿನೀ ಏಕಾದಶಿದಾನಿ ಜೆಪ್ಪುವೆರ್. ಕಾರ್ತಿಕ ಶುಕ್ಲ ಪ್ರಬೋಧಿನೀ ಏಕಾದಶಿದಾನಿ ಶ್ರೀ ಮಹಾಲಕ್ಷ್ಮೀ ಭಗವಂತನ್ ಲಕ್ಕವೆರ್. ನೆಕ್ ದುಂಬು ಅಮಾವಾಸ್ಯೆದಾನಿ ನಮ ಮಹಾಲಕ್ಷ್ಮಿನ್ ಲಕ್ಕವುನ ಸಂಕೇತವಾದ್ ಈ ಪೂಜೆ ಮಲ್ತೊಂದು ಇತ್ತ. ಆಂಡ ಈ ಸರ್ತಿ ಅಮಾಸೆದಾನಿ ಸೂರ್ಯಗ್ರಾಣ ಇಪ್ಪುರ್ನೆದಾವೆರ ಧಾರ್ಮಿಕ ಕಜ್ಜ ಮಲ್ಪೆರೆ ಆಪುಜಿ. ಅಂಚಾದ್ ಈ ವರ್ಷದ ಲಕ್ಷ್ಮೀಪೂಜೆನ್ ನರಕಚತುರ್ದಶಿದಾನಿ (ಅ.24)ಮಲ್ಪೊಡು ಪಂದ್ ವಿದ್ವಾಂಸೆರ್ ಪನ್ತೆರ್.
ಬೆಂಗ್ಲೂರ್ : ನಿಗಂಟ್ ಆಯಿನ ಕಾರ್ಯಕ್ರಮ ಒಂಜೇಕ್ಕಾದ್ ಬಹ್ರೇನ್ ಡ್ ಇಪ್ಪುನ ಕಾರಣ, ಕೋಡೆ ಇತ್ತಿನ ‘ಪುನೀತ್ ಪರ್ವ’ಡ್ ಪಾಲ್ ಪಡೆಯೆರೆ ಆಯಿಜಿ ಪಂದ್ ನಟೆ, ನಿರ್ದೇಶಕೆರ್ ರಿಷಭ್ ಶೆಟ್ಟಿ ಟ್ವೀಟ್ ಮಲ್ದೆರ್.
ಟ್ವೀಟ್ ಡ್ ಪುನೀತ ಪರ್ವ ಲೇಸ್ ತೂದು ಕಣ್ ದಿಂಜಿದ್ ಬತ್ತ್ಂಡ್. ಯಾನ್ ಅಲ್ಪ ಆ ನೆಂಪುದೊಟ್ಟಿಗೆ ಇಪ್ಪೊಡು ಇತ್ಂಡ್. ಅಪ್ಪು ಸರ್ ಕ್ಷಮೆ ಇಪ್ಪಡ್, ಸುರುತ ದಿನ ಗಂಧದಗುಡಿಟ್ ಭೇಟಿ ಆಕ ” ಪಂದ್ ಬರೆತೆರ್. ‘ಪುನೀತ ಪರ್ವ’ ಡ್ ಬಿನ್ನೆರಾದ್ ಪಾತೆರಿನ ಖ್ಯಾತ ನಟೆ ಪ್ರಕಾಶ್ ರಾಜ್, ಅಪ್ಪು ಮೇರ್ ಇತ್ತ್ಂಡ ಕಾಂತಾರ ಪಿಕ್ಚರ್ ಟೀಮ್ ನ್ ಅರಂಟ್ ಪತ್ ದ್ ಖುಷಿ ಪಡೆತುವೆರ್. ಆರ್ ಉಲ್ಲೆರ್ ಎನ್ನಿಗ, ಅಂಚನೆ ನಮ್ಮ ಜಾನಪದ ಸಂಸ್ಕೃತಿನ್ ಜಗತ್ತ್ ಗ್ ತೊಜಿಪಾಯಿನ ರಿಷಭ್ ಶೆಟ್ಟಿ, ವಿಜಯ್ ಮೊಕುಲೆಗ್ ಅಭಿನಂದನೆ ಪಂಡೆರ್. ಈ ಲೇಸ್ ಡ್ ಡಾ. ರಾಜ್ ಕುಟುಂಬದಕುಲು, ಸಿಎಂ ಬಸವರಾಜ್ ಬೊಮ್ಮಾಯಿ, ಸಚಿವೆರ್, ದಕ್ಷಿಣ ಭಾರತದ ಖ್ಯಾತ ನಟೆರ್, ಕನ್ನಡ ಚಿತ್ರ ರಂಗದ ನಟೆ, ನಟಿಯೆರ್ ಗಣ್ಯೆರ್ ಸಾರ ಸಾರ ಅಭಿಮಾನಿಲು ಇತ್ತೆರ್.
