Times of kudla

ಸುಳ್ಯ: ತಿಗಲೆ ಬೇನೆಡ್ ತೀರ್ ಪೋಯಿನ 7 ವರ್ಷದ ಆನ್ ಬಾಲೆ!!

ಸುಳ್ಯ: ತಿಗಲೆ ಬೇನೆಡ್ 7ವರ್ಷದ ಆನ್ ಒರಿ ತೀರ್ ಪೋಯಿನ ಘಟನೆ ಕುಂಟಿಕಾನಡ್ ನಡತ್ಂಡ್.

ಅಮರಮುಡ್ನೂರ್ ಗ್ರಾಮದ ಕುಕ್ಕುಜಡ್ಕ ಸ.ಹಿ.ಪ್ರಾ. ಶಾಲೆದ 2 ನೇ ಕ್ಲಾಸ್ ದ ವಿದ್ಯಾರ್ಥಿ ಕುಂಟಿಕಾನದ ಮೋಕ್ಷಿತ್ ಕೆ.ಸಿ. (7) ತೀರ್ ಪೋಯಿನಾರ್. ಮೇರ್ ಏಪಲದಲೆಕ್ಕನೆ ಶಾಲೆಗ್ ಬತ್ತ್ ದ್, ರಾಜ್ಯೋತ್ಸವ ಲೇಸ್ ಡ್ ಪಾಲ್ ಪಡೆತೆರ್. ಮಧ್ಯಾಹ್ನದ ಪೊರ್ತುಡು ಒಂತೆ ಜ್ವರ ಇತ್ಂಡ್ ಪಂದ್ ಶಿಕ್ಷಕೆರ್ ಇಲ್ಲಗ್ ತೆರಿಪಾದೆರ್. ವಿಷಯ ತೆರಿದ್ ಪೊಪ್ಪ ಚಂದ್ರಶೇಖರ ಆಚಾರ್ಯ ಶಾಲೆಗ್ ಬತ್ತಿನ ಪೊರ್ತುಡು ಆನ್ ಉಂತಿನಲ್ಪನೆ ಬೂರ್ದೆರ್, ಕೂಡ್ಲೆ ಸುಳ್ಯದ ಖಾಸಗಿ ಆಸ್ಪತ್ರೆಗ್ ಲೆತೊಂದು ಪೋಯೆರ್. ಆಂಡ ವೈದ್ಯೆರ್ ಪರೀಕ್ಷೆ ಮಲ್ತ್ ದ್ ಆನ್ ತಿಗಲೆ ಬೇನೆಡ್ ತೀರ್ ಪೋಯೆರ್ ಪಂದ್ ತೆರಿಪಾದೆರ್. ಮೆರೆಗ್ ಪೊಪ್ಪ, ಅಮ್ಮ, ಮೆಗ್ಗಿ ಉಲ್ಲೆರ್.

ಪಾಕ್ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ನ ಮಿತ್ತ್ ಗುಂಡುದ ದಾಳಿ, ಆಸ್ಪತ್ರೆಗ್ ದಾಖಲ್

ಇಸ್ಲಾಮಾಬಾದ್: ಪಾಕಿಸ್ತಾನದ ಮಾಜಿ ಪ್ರಧಾನಿ, ಪಿಟಿಐ‌ ಮುಖ್ಯಸ್ಥೆರ್ ಇಮ್ರಾನ್ ಖಾನ್ ಮಿತ್ತ್ ಇನಿ ಪಾಕಿಸ್ತಾನದ ಗುಜ್ರಾನ್‌ವಾಲ್‌ಡ್ ರ‌್ಯಾಲಿದ ಪೊರ್ತುಡು ಗುಂಡುದ ದಾಳಿ ನಡತ್ಂಡ್.

ಈ ದಾಳಿರ್ದ್ ಇಮ್ರಾನ್ ಮೆರೆನ ಬಲತ ಕಾರ್ ಗ್ ಪೆಟ್ಟಾತ್ಂಡ್. ಮೆರೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಬಲತ ಕಾರ್ ಗ್ ಬ್ಯಾಂಡೇಜ್ ಪಾಡ್ದ್ಂಡ್ ಪಂದ್ ಆಸ್ಪತ್ರೆ ದ ವೈದ್ಯೆರ್ ತೆರಿಪಾದೆರ್.

ಪಿಎಸ್ ಐ ಪರೀಕ್ಷೆಡ್ ಫಸ್ಟ್‌ ರಾಂಕ್‌ ಪಡೆದಿತ್ತಿನ ಸುಪ್ರಿಯಾ ಅರೆಸ್ಟ್‌..!

ಕಲಬುರ್ಗಿ: ಅಕ್ರಮ ಪಿಎಸ್ ಐ ಪರೀಕ್ಷೆಡ್ ಕಲ್ಯಾಣ ಕರ್ನಾಟಕ ಕೋಟಾಡ್ ಫಸ್ಟ್‌ ರಾಂಕ್‌ ಪಡೆದಿತ್ತಿನ ಸುಪ್ರಿಯಾ ಹುಂಡೇಕರ್‌ ನ್ ಸಿಐಡಿ ಪೊಲೀಸೆರ್ ಕಲಬುರ್ಗಿಡ್ ಅರೆಸ್ಟ್ ಮಲ್ದೆರ್.

ಕಲಬುರ್ಗಿ ಜಿಲ್ಲೆ ಜೇವರ್ಗಿದ ಹಿಪ್ಪರಗಾ ಗ್ರಾಮದ ಸುಪ್ರಿಯಾ ಹುಂಡೇಕರ್‌ ಬ್ಲೂಟೂತ್ ಗಲಸ್ ದ್ ಪಿಎಸ್ ಐ ಪರೀಕ್ಷೆ ಬರೆತೆರ್ ಪಂದ್ ತೆರಿದ್ ಬೈದ್ಂಡ್. ಅಂಚಾದ್ ಮೆರೆನ್ ಅರೆಸ್ಟ್ ಮಲ್ದೆರ್. ಕುಡೊಂಜಿ ಆರೋಪಿನ್ ಸಿಐಡಿ ಅಧಿಕಾರಿಲು ನಾಡೊಂದುಲ್ಲೆರ್. ನನ ಸುಪ್ರಿಯಾ ವಿಚಾರಣೆದ ಬೊಕ್ಕ ಹೆಚ್ಚದ ಮಾಹಿತಿ ತಿಕ್ಕೊಡಾತೆ.

ನಾಪತ್ತೆ ಆದಿತ್ತಿನ ಕಲ್ಲಡ್ಕದ ಪೊಣ್ಣು ಚಿಕ್ಕಮಗಳೂರುಡ್ ಪತ್ತೆ

ಬಂಟ್ವಾಳ: ಶಾಲೆಗ್ ಪಂದ್ ಪೋಯಿನ ಕಲ್ಲಡ್ಕದ ಪೊಣ್ಣು ಶಾಲೆಗ್ ಪೋವಂದೆ ನಾಪತ್ತೆ ಆದಿತ್ತಿನಾಲ್ ಚಿಕ್ಕಮಗಳೂರುಡ್ ಪತ್ತೆ ಆತೊಲು.

ಹಾಸನ ಜಿಲ್ಲೆದ ಸಕಲೇಶಪುರ ತಾಲೂಕ್ ದ ಹುರುಡಿ ಗ್ರಾಮದ ನಿವಾಸಿ ಪುಟ್ಟರಾಜ್ ಮೆರೆನ ಮಗಲ್ ಪೃಥ್ವಿ (12) ಇತ್ತೆ ಪತ್ತೆ ಆತೊಲು.
ಕಲ್ಲಡ್ಕ ಶ್ರೀರಾಮ ಪ್ರಾಥಮಿಕ ಶಾಲೆಡ್ ಕಲ್ತೊಂದು ಇತ್ತಿನ ಮೋಲು ಕಲ್ಲಡ್ಕದ ಅಮ್ಟೂರ್ ದ ಸಂಬಂಧದಾರ್ ಆಯಿನ ರಾಜಪ್ಪ ಮೆರೆನ ಇಲ್ಲರ್ದ್ ಶಾಲೆಗ್ ಪೋವೊಂದು ಇತ್ತೊಲು.
ಪೃಥ್ವಿ ಇಲ್ಲ್ ರ್ದ್ ರಿಕ್ಷಾಡ್ ಶಾಲೆಗ್ ಪೋಯಿನಾಲ್ ಶಾಲೆಗ್ ಬರಂದಿನೆನ್ ಶಾಲೆದ ಟೀಚರ್ ಇಲ್ಲಗ್ ತೆರಿಪಾದೆರ್. ನಾಪತ್ತೆ ಆಯಿನ ವಿಷಯ ತೆರೆನ ಪೋಷಕೆರ್ ಬಂಟ್ವಾಳ ನಗರ ಪೋಲೀಸ್ ಠಾಣೆಡ್ ದೂರು ದಾಖಲ್ ಮಲ್ದ್ ಇತ್ತೆರ್. ಇತ್ತೆ ಈ ಪೊಣ್ಣು ಚಿಕ್ಕಮಗಳೂರುಡ್ ಪತ್ತೆ ಆತೊಲು ಪಂದ್ ತೆರಿದ್ ಬೈದ್ಂಡ್.

‌ಕುಡ್ಲ: ಅಮಲ್ದ ಸೊತ್ತುಲೆನ್ ಕೊನೊಂದು ಇತ್ತಿನ ಮೂಜಿ ಜನ ಅರೆಸ್ಟ್

ಕುಡ್ಲ: ಅಮಲ್ದ ಸೊತ್ತುಲೆನ್ ಕಲ್ವ ತಾದಿಡ್ ಕೊನೊಂದು ಇತ್ತಿನ ಮೂಜಿ ಜನ ಆರೋಪಿಲೆನ್ ಸಿಸಿಬಿ ಪೊಲೀಸೆರ್ ಪತ್ ದೆರ್.

ಉಳ್ಳಾಲ ಮೇಲಂಗಡಿದ ಅಬ್ದುಲ್ ರಹ್ಮಾನ್ ಅರ್ಫಾನ್ ಯಾನೆ ಜಲ್ದಿ ಅರ್ಫಾನ್ (24), ಬೋಳೂರ್ ಬೊಕ್ಕಪಟ್ಣದ ಅಬ್ದುಲ್ ಜಲೀಲ್ (42), ಬೋಳಿಯಾರ್ ಕಾಪಿಕಾಡ್‌ದ ಮುಹಮ್ಮದ್ ಮನ್ಸೂರ್ (29) ಮೊಕುಲು ಬಂಧನ ಮಲ್ಪರೆ ಆಯಿನ ಆರೋಪಿಲು.

ಸಿಲಿಂಡರ್ ಪುಡಾದ್ ತೂಟು ಪೊತ್ತಿನ ಇಲ್ಲ್

ಹುಬ್ಬಳ್ಳಿ: ಗ್ಯಾಸ್ ಸಿಲಿಂಡರ್ ಪುಡಾದ್ ಮಾಬೂಸಾಬ್ ಅಲ್ಲಿಸಾಬ ಸಂಶಿ ಮೆರೆನ ಇಲ್ಲ್ ಗ್ ತೂ ಪೊತ್ತುದುಂಡು.

ಈ ಘಟನೆ ಹುಬ್ಬಳ್ಳಿ ತಾಲೂಕ್ ದ ಕರಡಿಕೊಪ್ಪ ಗ್ರಾಮಡ್ ನಡತ್ಂಡ್. ಗ್ಯಾಸ್ ಸಿಲಿಂಡರ್ ಪುಡಾಯಿನ ಶಬ್ಧಗ್ ಪೋಡಿದ್ ಇಲ್ಲಲ್ ದಕುಲು ಪೂರ ಪಿದಯಿ ಬಲಿತೊಂದು ಬೈದೆರ್. ಯೆರೆಗ್ಲಾ ಜೂವೊಗು ದಾಕ ತೊಂದರೆ ಆತಿಜಿ. ಹುಬ್ಬಳ್ಳಿ ಗ್ರಾಮಾಂತರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ತಿಗಲೆ ಬೇನೆಡ್ ತೀರ್ ಪೋಯೆರ್ ಸುಬ್ರಹ್ಮಣ್ಯ ಪಿಡಿಒ ಶೇಖರ್

ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯ ಗ್ರಾಮ ಪಂಚಾಯತಿಡ್ ಬೇಲೆ ಮಲ್ತೊಂದು ಇತ್ತಿನ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ(ಪಿಡಿಒ) ಯು.ಡಿ. ಶೇಖರ್ ಇನಿ ಬೊಲ್ಪುಗು ತಿಗಲೆ ಬೇನೆಡ್ ತೀರ್ ಪೋಯೆರ್.

ಬೊಲ್ಪುಗು ಇಲ್ಲಲ್ ತಿಗಲೆ ಬೇನೆ ಬತ್ತಿನ ಮೆರೆನ್ ಇಲ್ಲಲ್ ದಕುಲು ಸುಳ್ಯ ಕೆ.ವಿ.ಜಿ. ಆಸ್ಪತ್ರೆಗ್ ಲೆತೊಂದು ಪೋಯೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ಮೇರ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಐವರ್ನಾಡು ಗ್ರಾಮ ಪಂಚಾಯತ್ ಡ್ ಬೇಲೆ ಮಲ್ತೊಂದು ಇತ್ತಿನ ಮೇರ್ ಬೊಕ್ಕ ಸುಬ್ರಹ್ಮಣ್ಯ ಗ್ರಾ.ಪಂ. ಪಿಡಿಒ ಆದ್ ವರ್ಗ ಆದಿತ್ತೆರ್. ಮೆರೆಗ್ ಬೊಡೆದಿ ಬಿಜೆಪಿ ಮಹಿಳಾ ಮೋರ್ಚಾ ಪ್ರಧಾನ ಕಾರ್ಯದರ್ಶಿ ಗೀತಾ ಶೇಖರ್, ಬೊಕ್ಕ ರಡ್ಡ್ ಜೋಕುಲು ಉಲ್ಲೆರ್.

ಚೀನಾದ ಒಂಜಿ ಜಾಗೆಡ್ ಕುಡ ಲಾಕ್ ಡೌನ್!!

ಚೀನಾ: ಜಗತ್ತ್ ದ ಮಾಮಲ್ಲ ಐಫೋನ್ ತಯಾರ್ ಮಲ್ಪುನ ಘಟಕ ಇಪ್ಪುನ ಒಂಜಿ ಜಾಗೆಡ್ ಚೀನಾದ ಅಧಿಕಾರಿಲು ಕೋಡೆ ಲಾಕ್‌ಡೌನ್ ಘೋಷಣೆ ಮಲ್ದೆರ್.

ನಡು ಚೀನಾದ ಝೆಂಗ್‌ಝು ಏರ್ ಪೋರ್ಟ್ ಆರ್ಥಿಕ ವಲಯದ ಕೈತಲ್ ತೈವಾನ್ ಮೂಲದ ಟೆಕ್ ಕಂಪನಿ ಫಾಕ್ಸ್‌ಕಾನ್ ಐಫೋನ್‌ದ ಮಲ್ಲ ಘಟಕನ್ ನಡಪಾವೊಂದು ಉಂಡು. ಅಲ್ಪ ಇತ್ತೆ ಲಾಕ್‌ಡೌನ್ ಮಲ್ದೆರ್ ಪಂದ್ ವರದಿ ಆತ್ಂಡ್.
ಆಂಡ ಒವು ನಮುನೆದ ಪರಡು ಸೀಕ್ ಗ್ ಲಾಕ್‌ಡೌನ್ ಮಲ್ದೆರ್ ಪಂದ್ ವರದಿ ಆತಿಜಿ. ಫಾಕ್ಸ್‌ಕಾನ್ ದ ಉಲಯಿ 100ರ್ದ್ ಸಾರ ಮುಟ್ಡ ಉದ್ಯೋಗಿಲು ಬೇಲೆ ಮಲ್ತೊಂದು ಉಲ್ಲೆರ್. ಅಕುಲು ಕಂಪೆನಿಡ್ ಸಮರ್ಪಕ ವ್ಯವಸ್ಥೆ ಮಲ್ಪಂದಿನ ಬಗೆಟ್ ಸಾಮಾಜಿಕ ಜಾಲತಾಣಡ್ ದೂರುದೆರ್. ಅತ್ತಂದೆ ಕೋವಿಡ್ ಲಾಕ್‌ಡೌನ್ ನಡುಟ್ ತಿಕ್ ದ್ ಸೋತು ಪೋತಿನ ಫ್ಯಾಕ್ಟರಿ ಕುಡೊರ ಆಯಿನ ಲಾಕ್ ಡೌನ್ ರ್ದ್ ಬಚಾವ್ ಆಪಿನೆಂಚ ಪಂದ್ ಪನೊಂದೆರ್.

ಕೆನರಾ ವಿಕಾಸ್ ಕಾಲೇಜ್ ಗ್ ಭೇಟಿ ಕೊರ್ನ ಕಾಶಿ ಮಠದ ಶ್ರೀ ಶ್ರೀ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿ

ಕುಡ್ಲ: ಕಾಶಿ ಮಠ ಸಂಸ್ಥಾನ ವಾರಾಣಸಿದ ಮಠಾಧಿಪತಿ ಆಯಿನ ಶ್ರೀ ಶ್ರೀ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿ ಅ.31 ದಾನಿ ಪೇಂಟೆದ ಕೆನರಾ ವಿಕಾಸ್ ಕಾಲೇಜ್ ಗ್ ಭೇಟಿ ಕೊರಿಯೆರ್.

ಆರ್ ಆಶೀರ್ವಾದ ಮಲ್ತ್ ದ್, ಕೆನರಾ ವಿಕಾಸ್ ಸಂಸ್ಥೆ ನನಾತ್ ಬುಲೆಯಡ್, ಒವ್ವೇ ಕಜ್ಜಗ್ ಪ್ರಯತ್ನ ಮುಖ್ಯ. ಸವಾಲ್ ನ್ ಜೈಪಂದೆ ಸಾಧನೆ ಮಲ್ಪೆರೆ ಆಪುಜಿ. ನಮ ಇಂದ್ರಿಯಲೆರ್ದ್ ಜ್ಞಾನ ದೆತೊನುವ. ಅವು ಸಂಸ್ಕಾರ ಕೊರ್ಪುಂಡು. ವಿದ್ಯೆ ಬಾಯಿಪಾಠ ಆಯೆರೆ ಬಲ್ಲಿ. ಅವು ಜೀವನ ಪರ್ಯಂತ ಅನ್ವಯ ಅಪುಲೆಕ್ಕ ಇಪ್ಪೊಡು. ಶಿಕ್ಷಣ ವ್ಯವಹಾರ ಆಯೆರೆ ಬಲ್ಲಿ, ಶಿಕ್ಷಕೆರೆನ ಸ್ಥಾನಗ್ ಗೌರವ ಕೊರೊಡು. ಮಾತೆರ್ದ್ ಲ ಶ್ರೇಷ್ಠ ದಾನ ವಿದ್ಯಾದಾನ ಪಂದ್ ಪಂಡೆರ್.

ಈ ಪೊರ್ತುಡು ಕೆನರಾ ಹೈಸ್ಕೂಲ್ ಅಸೋಸಿಯೇಷನ್ ಆಡಳಿತ ಮಂಡಳಿದ ಕಾರ್ಯದರ್ಶಿಲು ಎಂ ರಂಗನಾಥ್ ಭಟ್ ಬೊಕ್ಕ ಸದಸ್ಯೆರ್ ಎಂ. ಪದ್ಮನಾಭ ಪೈ, ಕೆ ಸುಧಾಕರ್ ಪೈ, ಜಗನ್ನಾಥ ಕಾಮತ್, ಕೆ ಸುರೇಶ್ ಕಾಮತ್, ಬಸ್ತಿ ಪುರುಷೋತ್ತಮ್ ಶೆಣೈ, ರಾಘವೇಂದ್ರ ಕುಡ್ವ, ನರೇಶ್ ಶೆಣೈ ಬೊಕ್ಕ ಯೋಗೇಶ್ ಕಾಮತ್, ಕೆನರಾ ಸಮೂಹ ಶಿಕ್ಷಣ ಸಂಸ್ಥೆದ ನಿರ್ದೇಶೆಕೆರ್ ಡಾ.ರಾಧಾಕೃಷ್ಣ ಐತಾಳ್, ಕೆನರಾ ವಿಕಾಸ್ ಸಮೂಹ ಶಿಕ್ಷಣ ಸಂಸ್ಥೆದ ಸಂಯೋಜಕೆರ್ ಪಾರ್ಥಸಾರಥಿ ಪಾಲೆಮಾರ್, ವಿಕಾಸ್ ಫಿಸಿಯೋತೆರಪಿ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಅಜಯ್ ಠಾಕೂರ್, ವಿಕಾಸ್ ಪಿಯುಸಿ ಕಾಲೇಜ್ ದ ಪ್ರಾಂಶುಪಾಲೆ ಮೋಹನಾ ಆರ್, ವಿಕಾಸ್ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಂಶುಪಾಲೆ ಐಶ್ವರ್ಯ ಕೆ. ಬೊಕ್ಕ ಬೋಧಕ ಬೋಧಕೇತರ ಸಿಬ್ಬಂದಿ, ವಿದ್ಯಾರ್ಥಿಲು ಇತ್ತೆರ್.

ಪರ್ತಿನ ಅಮಲ್ ಡ್ ಮಾರ್ಗಡ್ ಉಂತಿನ ನೀರ್ ಡ್ ನೀಂದುನ ಜನತ ವೀಡಿಯೋ ವೈರಲ್

ಚೆನ್ನೈ: ಪರ್ತಿನ ಅಮಲ್ ಡ್ ಇತ್ತಿನ ಒಂಜಿ ಜನ ಬರ್ಸರ್ದ್ ದಿಂಜಿದ್ ಇತ್ತಿನ‌ ನೀರ್ ಡ್ ನೀಂದುನ ವಿಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತತ್ಂಡ್.

ಈ ಘಟನೆ ಉತ್ತರ ಚೆನ್ನೈದ ಪುಲಿಯತೊಪೆ ಪ್ರದೇಶಡ್ ನಡತ್ಂಡ್. ಬರ್ಸರ್ದ್ ಮಾರ್ಗ ಪೂರ ನೀರ್ ದಿಂಜಿದ್ ಪೋತ್ಂಡು. ಈ ಕೆಸರ್ ನೀರಡ್ ಆ ಜನ ಅಂಚಿರ್ದ್ ಇಂಚಿ ಮಾಲೊಂದು ಇಪ್ಪುನ ವೀಡಿಯೋನ್ ಮಸ್ತ್ ಜನ ತೂತೆರ್.