ಪುತ್ತೂರ್: ಕೋಡಿಂಬಾಡಿ ಗ್ರಾಮದ ಮಠಂತಬೆಟ್ಟು ನಿವಾಸಿ ಪುರುಷೋತ್ತಮ ನಾಯ್ಕ ಮೆರೆನ ಇಲ್ಲಗ್ ಸುಕ್ರಾರ ಬಯ್ಯಗ್ ತೆಡಿಲ್ ಆಕ್ ದ್ ಇಲ್ಲದ ಗೋಡೆ ಪುಡಾದ್ಂಡ್.
ಕರೆಂಟ್ ದ ಸೊತ್ತುಲು ಪೂರ ಲಗಾಡಿ ಪೋತುಂಡು. ಇಲ್ಲದ ಜಾಲ್ ಡ್ ಇತ್ತಿನ ತಾರೆಗ್ಲಾ ತೆಡಿಲ್ ಆಕ್ ದ್ಂಡ್. ಈ ಪೊರ್ತುಡು ಮೆರೆನ ಇಲ್ಲಲ್ ಏರ್ಲಾ ಇಜ್ಜಂಡ್ ಪಂದ್ ತೆರಿದ್ ಬೈದ್ಂಡ್.
ಬೊಂಬೈ: ರಿಲಯನ್ಸ್ ಇಂಡಸ್ಟ್ರೀಸ್ ಗ್ ಐನ್ ವರ್ಷ ಮುಟ್ಟ ಸ್ವತಂತ್ರ ನಿರ್ದೇಶಕೆರಾದ್ ತುಳುನಾಡ್ ಮೂಲದ ಕೆ. ವಿ. ಕಾಮತ್ ಮೆರೆನ್ ನೇಮಕ ಮಲ್ದ್ಂಡ್.
ಮೇರ್ ರಿಲಯನ್ಸ್ ಸ್ಟ್ರಾಟೆಜಿಕ್ ಇನ್ವೆಸ್ಟ್‌ಮೆಂಟ್ ಲಿಮಿಟೆಡ್‌ಗೆ (ಆರ್‌ಎಸ್‌ಐಎಲ್) ಸ್ವತಂತ್ರ ನಿರ್ದೇಶಕೆರಾದ್ ಬೊಕ್ಕ ಕಾರ್ಯನಿರ್ವಾಹಕೇತರ ಅಧ್ಯಕ್ಷೆರಾದ್ ನೇಮಕ ಆತೆರ್. ನಿರ್ದೇಶಕರೆನ ಮಂಡಳಿ ನಡತಿನ ಸಭೆಟ್ ಮಾನವ ಸಂಪನ್ಮೂಲ, ನಾಮನಿರ್ದೇಶನ ಬೊಕ್ಕ ಸಂಭಾವನೆ ಸಮಿತಿದ ಶಿಫಾರಸ್ ದ ಆಧಾರದ ಮಿತ್ತ್ ಮೆರೆನ್ ನೇಮಕ ಮಲ್ತ್ ದ ಪಂದ್ ಕಂಪನಿ ತೆರಿಪಾದ್ಂಡ್.
ಸುಳ್ಯ: ಮಾಣಿಬೆಟ್ಟು ನಿವಾಸಿ ಪೀತಾಂಬರ ಮೆರೆನ ಕೊಟ್ಯಗ್ ತೂ ಪೊತ್ತ್ ದ್ ಭಾರೀ ನಷ್ಟ ಆಯಿನ ಘಟನೆ ಸುಳ್ಯ ತಾಲೂಕ್ ದ ಉಬರಡ್ಕ ಗ್ರಾಮಡ್ ನಡತ್ಂಡ್.
ಈ ತೂನ್ ಸ್ಥಳೀಯೆರೆನ ಸಕಾಯೊರ್ದ್ ತೆಕ್ಕಾದೆರ್. ಯೇರೆಗ್ಲಾ ದಾಲ ಪೆಟ್ಟ್ ಆತಿಜಿ.
ಕೊಟ್ಯಡ್ ಇತ್ತಿನ ತಾರಾಯಿ, ಕನಕ್ ಸೇರ್ದ್ ಕೊಟ್ಯನೇ ತೂಟ್ ಪೂರ ಪೊತ್ತ್ ದುಂಡು. ಈ ಘಟನೆರ್ದ್ ಮಸ್ತ್ ನಷ್ಟ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್: ಭಾರತ್‌ ಜೋಡೋ ಪ್ರಚಾರಡ್ ಕೆಜಿಎಫ್‌ 2 ಪಿಕ್ಚರ್ ದ ಹಿಂದಿ ಪದ್ಯಲೆನ್ ಗಲಸಿನೆಕ್ಕ್ ಎಂ.ಆರ್.ಟಿ. ಮ್ಯೂಸಿಕ್‌ ಸಂಸ್ಥೆದಕುಲು ಕಾಂಗ್ರೆಸ್ ಮುಖಂಡೆರ್ ರಾಹುಲ್ ಗಾಂಧಿ, ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಜೈರಾಮ್‌ ರಮೇಶ್‌ ಬೊಕ್ಕ ಸಾಮಾಜಿಕ ಜಾಲತಾಣ ಮುಖ್ಯಸ್ಥೆರ್ ಸುಪ್ರಿಯಾ ಶ್ರೀನೇತ್ ನ ಮಿತ್ತ್ ಕೇಸ್ ದಾಖಲ್ ಮಲ್ದೆರ್.
ಈ ಕೇಸ್ ಯಶವಂತಪುರ ಪೊಲೀಸ್ ಠಾಣೆಡ್ ದಾಖಲ್ ಆತ್ಂಡ್. ಕಾಂಗ್ರೆಸ್ ರಾಜಕೀಯ ಪಕ್ಷ ಹಕ್ಕುಸ್ವಾಮ್ಯದ ಕಾನೂನುನು ತತ್ತ್ ದ್ಂಡ್ ಪಂದ್ ಈ ದೂರುಡು ಉಲ್ಲೇಖ ಮಲ್ದೆರ್.
ಬೆಳ್ಳಾರೆ: ಬಿಜೆಪಿ ಯುವನಾಯಕೆರ್ ಪ್ರವೀಣ್ ನೆಟ್ಟಾರ್ ಮೆರೆನ್ ಕೆರ್ತಿನ ಕೇಸ್ ಗ್ ಸಂಬಂಧಪಟ್ ದ್ ಎಸ್ ಡಿಪಿಐದ ಕುಡ ಮೂಜಿ ಮುಖಂಡೆರೆನ್ ಎನ್ ಐಎ ಅಧಿಕಾರಿಲು ವಶಕ್ ದೆತೊಂದೆತೆರ್.
ಎಸ್ ಡಿಪಿಐ ರಾಜ್ಯ ಮುಖಂಡೆರಾಯಿನ ಶಾಫಿ ಬೆಳ್ಳಾರೆ, ಇಕ್ಬಾಲ್ ಬೆಳ್ಳಾರೆ ಬೊಕ್ಕ ಸುಳ್ಯದ ಇಬ್ರಾಹಿಂ ಮೊಕ್ಲೆನ್ ಮೊಕಲೆನ ಇಲ್ಲಲ್ ರ್ದೆ ಸನಿಯಾರ ಬೊಲ್ಪುಗು ಎನ್ ಐಎ ಅಧಿಕಾರಿಲು ಬಂಧನ ಮಲ್ದೆರ್.
ಬೆದ್ರ: ಮೂರ್ತೆ ಮಲ್ತೊಂದು ಇತ್ತಿನ ಮೂರ್ತೆದಾರ್ ಒರಿ ತಾರಿರ್ದ್ ಬೂರ್ದು ತೀರ್ ಪೋಯಿನ ಘಟನೆ ಕೋಡೆ ಪಾಲಡ್ಕ ಗ್ರಾ.ಪಂ ವ್ಯಾಪ್ತಿದ ವರ್ಣಬೆಟ್ಟುದ ಪಂಜಿಗುರಿಡ್ ನಡದ್ಂಡ್.
ಪಂಜಿಗುರಿ ನಿವಾಸಿ ಸುರೇಶ್ (42) ತೀರ್ ಪೋಯಿನಾರ್. ಮೇರ್ ತನ್ನ ಸ್ವಂತ ಜಾಗೆಡ್ ಮೂರ್ತೆ ಮಲ್ತೊಂದು ಇತ್ತೆರ್. ಕೋಡೆ ಮಧ್ಯಾಹ್ನ ಮೂರ್ತೆಗ್ ಪೋಯಿನ ಮೇರ್ ಬಯ್ಯ ಆಂಡಲ ಪಿರ ಇಲ್ಲಡೆ ಬರಂದಿನೆಕ್ಕ್ ಪೂರ ನಾಡಿಯೆರೆ ಸುರು ಮಲ್ದೆರ್. ಈ ಪೊರ್ತುಡು ಮೇರ್ ಪುನ ಆದ್ ಪತ್ತೆ ಆತೆರ್ ಪಂದ್ ಸ್ಥಳೀಯೆರ್ ತೆರಿಪಾದೆರ್. ಮೆರೆಗ್ ಬೊಡೆದಿ, ಮಗೆ, ಮಗಲ್ ಉಲ್ಲೆರ್. ಬೆದ್ರ ಪೋಲಿಸೆರ್ ಅಸಹಜ ಸಾವು ಪಂದ್ ಕೇಸ್ ದಾಖಲ್ ಮಲ್ದೆರ್.
ಹಾಸನ: ವೈವಾಟ್ ದ ವಿಷಯೊಡು ತಕರಾರ್ ಇತ್ತಿನ ವಿಚಾರೊಗು ನೀರ್ ದ (ಗಂಗೆ) ಮಿತ್ತ್ ಆಜ ಪ್ರಮಾಣ ಮಲ್ಪರೆ ಪೋಯಿನ ರಡ್ಡ್ ಜವನೆರ್ ನೀರ್ ಡ್ ಮುರ್ಕುದು ತೀರ್ ಪೋಯೆರ್.
ಈ ಘಟನೆ ಹಾಸನ ಗ್ರಾಮಾಂತರ ಪೊಲೀಸ್ ಠಾಣೆದ ತೇಜೂರುಡ್ ನಡತ್ಂಡ್. ತೀರ್ ಪೋಯಿನಕುಲು ಚಂದ್ರು ಬೊಕ್ಕ ಆನಂದ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಹಾಸನ ಗ್ರಾಮಾಂತರ ಠಾಣೆ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್, ತನಿಖೆ ಸುರು ಮಲ್ದೆರ್.
ಕುಡ್ಲ: ‘ಮ್ಯಾಂಗಲೋರ್’ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಪಂದ್ ದಾಖಲೆಡ್ ಇಪ್ಪುನ ಪುದರ್ ನ್ ‘ಮಂಗಳೂರು’ ಪಂದ್ ಬದಲಾವಣೆ ಮಲ್ತ್ ದ್ ವಿಮಾನ ನಿಲ್ದಾಣ ಪ್ರಾಧಿಕಾರ ಆದೇಶ ಮಲ್ದ್ಂಡ್.
ವಿಮಾನ ನಿಲ್ದಾಣಡ್ ಇಪ್ಪುನ ಬೋರ್ಡ್ ಬೊಕ್ಕ ಸ್ವಾಗತ ಕಮಾನುಲೆಡ್ “ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ” ಪಂದ್ ಬರೆತೆರ್. ಆಂಡ ಪ್ರಾಧಿಕಾರದ ದಾಖಲೆಡ್ ಮಾತ್ರ ’ ಮ್ಯಾಂಗಲೋರ್’ ಪಂದೇ ಉಂಡು. ಕುಡ್ಲ ಪೇಂಟೆಡ್ ಮಂಗಳೂರು ಪದ ಬಳಕೆ ಜಾರಿ ಇಪ್ಪುನ ಕಾರಣ ಬೊಕ್ಕ ದೇಶ ವಿದೇಶದ ಪಾಲುದಾರೆರೆನ ನಡುತ ವ್ಯವಹಾರಗ್ ಅನುಕೂಲ ಆಪಿಲೆಕ ಪುದರ್ ಬದಲಾವಣೆ ಮಲ್ದೆರ್.
ಡಿ.1 ರ್ದ್ ಉಂದು ಅಧಿಕೃತ ಆಪುಂಡು.
ಉಬಾರ್: ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಯುವವಾಹಿನಿ(ರಿ.) ಉಬಾರ್ ಘಟಕದ 25 ನೇ ವರ್ಷದ ಬೊಳ್ಳಿಪರ್ಬದ ಗೌಜಿ ನ.5 ಶನಿಯಾರ ಬಯ್ಯಗ್ 6 ಗಂಟೆಗ್ ಪೆರ್ನೆದ ಮೇಗಿನಪುರಿತ್ತ ರವೀಂದ್ರ ಪೂಜಾರಿ ಮೆರೆನ ಸಮೃದ್ಧಿ ನಿಲಯಡ್ ನಡಪರೆ ಉಂಡು.
ಈ ಲೇಸ್ ದ ಒಟ್ಟಿಗೆ ಬೊಳ್ಳಿ ಪರ್ಬದ ಚಿತ್ತಾರ, ತುಳಸಿ ಪರ್ಬದ ಆಚರಣೆ ಬೊಕ್ಕ ಬಿರುವೆರ್ ಪೆರ್ನೆ ಬಿಳಿಯೂರು ಸಂಘಟನೆದ ಉದಿಪನ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: “ಕಾಂತಾರ’ ಪಿಕ್ಚರ್ ಡ್ ಬರ್ಪಿನ ಪಂಜುರ್ಲಿ ದೈವದಂಚನೆ ವೇಷ ಪಾಡ್ದ್ ಸೋಶಿಯಲ್ ಮೀಡಿಯಾಡ್ ರೀಲ್ಸದ ಮಲ್ದಿನೆಕ್ಕ್ ಭಾರೀ ವಿರೋಧ ಬೈದಿತ್ತ್ಂಡ್.
ಈ ಬಗೆಟ್ ಹೈದರಾಬಾದ್‌ ಮೂಲದ ಶ್ವೇತಾ ರೆಡ್ಡಿ ಮೇರ್ ಧರ್ಮಸ್ಥಳಗ್ ಬತ್ತ್ ದ್ ತಪ್ಪು ಕಾಣಿಕೆ ಸಂದಾದ್, ಡಾ| ಡಿ. ವೀರೇಂದ್ರ ಹೆಗ್ಗಡೆರೆಡ ಕ್ಷಮಾಪಣೆ ಕೇನ್ದ್ ಆಶೀರ್ವಾದ ಪಡೆಯಿನ ಘಟನೆ ನ. 3ದಾನಿ ನಡತ್ಂಡ್. ಮಾಧ್ಯಮಗ್ ಪ್ರತಿಕ್ರಿಯೆ ಕೊರ್ನ ಶ್ವೇತಾ, ನೆನ್ ಯಾನ್ ತೆರಿದ್ ಮಲ್ತಿನ ಅತ್ತ್. ಆಟ ಬೊಕ್ಕ ಉಂದು ಒಂಜೇ ಪಂದ್ ಎನ್ನಿದ್ ಇತ್ತೆ. ಸಾಮಾಜಿಕ ಜಾಲತಾಣಡ್ ಟೀಕೆ ಬತ್ತಿನ ಬೊಕ್ಕ ಬೇತೆ ಬೇತೆ ಪಂದ್ ತೆರಿಡ್. ಅಂಚಾದ್ ಮಾತ ದೈವಾರಾಧಕೆರೆಡ ಬೊಕ್ಕ ಜನಕ್ಲೆಡ ಕ್ಷಮಾಪಣೆ ಕೇನೊಂದು ಉಲ್ಲೆ ಪಂದ್ ಪಂಡೆರ್.
