ಬಂಟ್ವಾಳ: ಶಾಲೆಗ್ ಪೋಯಿನ ಪೊಣ್ಣು ನಾಪತ್ತೆ ಆತಿನ ಘಟನೆ ಬಂಟ್ವಾಳ ನಗರ ಪೊಲೀಸ್ ಠಾಣೆಡ್ ವ್ಯಾಪ್ತಿಡ್ ನಡತ್ಂಡ್.
ಕಲ್ಲಡ್ಕ ಶ್ರೀರಾಮ ಪ್ರಾಥಮಿಕ ಶಾಲೆದ ವಿದ್ಯಾರ್ಥಿನಿ ಪೃಥ್ವಿ (12) ನಾಪತ್ತೆ ಆತೊಲು. ಮೋಲು ಹಾಸನ ಜಿಲ್ಲೆದ ಸಕಲೇಶಪುರ ತಾಲೂಕ್ ದ ಹುರುಡಿ ಗ್ರಾಮದ ನಿವಾಸಿ ಪುಟ್ಟರಾಜ್ ಮೆರೆನ ಮಗಲ್.
ಪೃಥ್ವಿ ಕಲ್ಲಡ್ಕದ ಅಮ್ಟೂರ್ ದ ಸಂಬಂಧದಾರ್ ಆಯಿನ ರಾಜಪ್ಪ ಮೆರೆನ ಇಲ್ಲರ್ದ್ ಶಾಲೆಗ್ ಪೋವೊಂದು ಇತ್ತೊಲು ಪಂದ್ ತೆರಿದ್ ಬೈದ್ಂಡ್.
ಸಜೀಪ: ಬಂಟರ ಸಂಘ ವಲಯದ ಬಂಟ ಕ್ರೀಡೋತ್ಸವ ನ.6 ಐತಾರ ಬೊಲ್ಪುಗು 9 ಗಂಟೆರ್ದ್ ದಿ.ಸುಧಾ ಬಿ. ಶೆಟ್ಟಿ ವೇದಿಕೆ ಸಜೀಪ ಸಂಕೇಶ ಕ್ರೀಡಾಂಗಣಡ್ ನಡಪರೆ ಉಂಡು.
ಅಂಚನೆ ಬಯ್ಯಗ್ 5 ಗಂಟೆರ್ದ್ ಮುಗಿತಲದಲೇಸ್ ನಡಪುಂಡು. ಈ ಲೇಸ್ ಡ್ ಸಜೀಪ ವಲಯದ ಬಂಟರ ಸಂಘದ ಗುರ್ಕಾರ್ಲು ಶ್ರೀಕಾಂತ್ ಶೆಟ್ಟಿ ಸಭಾಧ್ಯಕ್ಷೆರಾದ್ ಉಲ್ಲೆರ್. ಬಿನ್ನೆರಾದ್ ಮಾಜಿ ರಾಜ್ಯಸಭೆ ಸದಸ್ಯೆರ್ ಬೊಕ್ಕ ಪಂಚಭಾಷೆದ ನಟಿ ಜಯಪ್ರದಾ, ಖ್ಯಾತ ಸಂಗೀತ ನಿರ್ದೇಶೆರ್ ಗುರುಕಿರಣ್, ನಿಕಟಪೂರ್ವ ಅಧ್ಯಕ್ಷೆರ್ ಬಂಟರ ಸಂಘ ಬಂಟವಾಳ ತಾಲೂಕ್ ಬೊಕ್ಕ ಸಜೀಪ ವಲಯ ಸಂಘದ ಗೌರವಾಧ್ಯೆಕ್ಷೆರ್ ನಗ್ರಿಗುತ್ತು ವಿವೇಕ್ ಶೆಟ್ಟಿ, ಬಂಟರ ಸಂಘ ಬಂಟವಾಳ ತಾಲೂಕ್ ದ ಅಧ್ಯೆಕ್ಷೆರ್ ಚಂದ್ರಹಾಸ ಶೆಟ್ಟಿ, ಸಜೀಪ ವಲಯ ಬಂಟರ ಸಂಘದ ಗೌರವಾಧ್ಯೆಕ್ಷೆರ್ ರಾಧಾಕೃಷ್ಣ ಆಳ್ವ, ಉಲ್ಲೆರ್ ಪಂದ್ ಚಂದ್ರಹಾಸ ಶೆಟ್ಟಿ ನೀಲ್ಯ, ನಿತಿನ್ ಅರಸ, ಪ್ರಶಾಂತಿ ಆಳ್ವ ಸಜೀವಗುತ್ತು, ದೀಪಿಕಾ, ರಮಾ ಎಸ್. ಭಂಡಾರಿ, ದೇವಿಪ್ರಸಾದ್ ಪೂಂಜ, ಸುನೀತಾ ಶೆಟ್ಟಿ, ಶಿವಪ್ರಸಾದ್ ಶೆಟ್ಟಿ, ಪದಾಧಿಕಾರಿಲು, ಕಾರ್ಯಕಾರಿ ಸಮಿತಿ ಬೊಕ್ಕ ಸರ್ವ ಸದಸ್ಯೆರ್, ಬಂಟರ ಸಂಘ ಸಜೀಪ ವಲಯದ ಮಹಿಳಾ ವಿಭಾಗ, ಯುವ ವಿಭಾಗ, ಗ್ರಾಮ ಗೌರವ ಸಲಹೆಗಾರೆರ್ ಬೊಕ್ಕ ಗ್ರಾಮ ಸಂಚಾಲಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕಾಂತಾರ ಪಿಕ್ಚರ್ ದ ಯಶಸ್ಸಿದ ಬಗೆಟ್ ನಟೆ, ನಿರ್ದೇಶೆಕೆರ್ ರಿಷಬ್ ಶೆಟ್ಟಿ ಬೊಕ್ಕ ಪ್ರಗತಿ ಶೆಟ್ಟಿ ದಂಪತಿ ಧರ್ಮಸ್ಥಳಗ್ ಭೇಟಿ ಕೊರ್ದು ದೇವೆರೆನ ಆಶೀರ್ವಾದ ಪಡೆಯೆರ್.
ಈ ಪೊರ್ತುಡು ನಟೆ ಪ್ರಮೋದ್ ಶೆಟ್ಟಿ ಇತ್ತೆರ್. ರಿಷಭ್ ದಂಪತಿ ದೇವೆರೆನ ದರ್ಶನ ಪಡೆದ್ ಡಿ. ವೀರೇಂದ್ರ ಹೆಗ್ಗಡೆರೆನ್, ಹೇಮಾವತಿ ವಿ. ಹೆಗ್ಗಡೆ, ಡಿ. ಹರ್ಷೇಂದ್ರ ಕುಮಾರ್ ಬೊಕ್ಕ ಸುಪ್ರಿಯಾ ಹರ್ಷೇಂದ್ರ ಕುಮಾರ್ ಮೊಕ್ಲೆನ್ ಭೇಟಿಯಾದ್ ಆಶೀರ್ವಾದ ಪಡೆಯೆರ್. ಖಾವಂದೆರ್ ರಿಷಭ್ ಶೆಟ್ಟಿ ದಂಪತಿನ್ ಅಭಿನಂದನೆ ಮಲ್ತೆರ್. ಬೊಕ್ಕ ಮಾಧ್ಯಮದಕಲ್ನೊಟ್ಟುಗು ಪಾತೆರಿನ ರಿಷಭ್, ಪಿಚ್ಚರ್ ಸುರು ಮಲ್ಪುನೆರ್ದ್ ದುಂಬೇ ಧರ್ಮಸ್ಥಳಗ್ ಬತ್ತ್ ದ್ ಪೂಜೆ ಸಂದಾದ್ ಹೆಗ್ಗಡೆರೆನ ಆಶೀರ್ವಾದ ದೆತೊಂದಿತ್ತೆ. ಹೆಗ್ಗಡೆರ್ ಪಿಕ್ಚರ್ ತೂದು ಮೆಚ್ಚಿದೆರ್. ಎಂಕ್ಲೆಗ್ ದೇವರೇ ಪಿಕ್ಚರ್ ತೂದು ಆಶೀರ್ವಾದ ಮಲ್ತಿಲೆಕ್ಕ ಆತ್ಂಡ್ ಪಂದ್ ಪಂಡೆರ್.
ವಿಜಯನಗರ: ನೀರ್ ದ ಗುಂಡಿಡ್ ಮುರ್ಕುದು ಒಂಜೇ ಕುಟುಂಬದ ನಾಲ್ ಜೋಕುಲು ತೀರ್ ಪೋಯಿನ ಘಟನೆ ರಾಜ್ಯದ ವಿಜಯನಗರ ಜಿಲ್ಲೆದ ಹರಪನ ಹಳ್ಳಿ ತಾಲೂಕ್ ದ ಚನ್ನಹಳ್ಳಿ ತಾಂಡಾಡ್ ನಡತ್ಂಡ್.
ನೀರ್ ಡ್ ಮುರ್ಕೊಂದು ಇತ್ತಿನ ಮೆಗ್ಯೆ ಅಭಿನ್ ರಕ್ಷಣೆ ಮಲ್ಪೆರೆ ಪೋಯಿನ ಅಕ್ಕನಕುಲು ಅಶ್ವಿನಿ, ಕಾವೇರಿ ಬೊಕ್ಕ ಅಪೂರ್ವ ಲ ನೀರ್ಡ್ ಮುರ್ಕುದು ತೀರ್ ಪೋಯೆರ್. ಜೋಕುಲೆನ ಮರಣೊರ್ದು ತಾಂಡಾಡ್ ಜೋರು ಬೊಬ್ಬೆ ಕೇನೊಂದುಂಡು. ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್, ತನಿಖೆ ಮಲ್ತೊಂದು ಉಲ್ಲೆರ್.
ಪುತ್ತೂರ್ : ಕೂರ್ನಡ್ಕ ಮರೀಲ್ ನಿವಾಸಿ ಯೂಸುಫ್ ಪನ್ಪುನರೆನ ಮಗೆ ಖಲಂದರ್ ಶಾಫಿ ಸೌದಿ ಅರೇಬಿಯಾದ ರಿಯಾದ್ ಡ್ ನಾಪತ್ತೆ ಆತೆರ್.
ಅ. 29 ದಾನಿ ರಾತ್ರೆ ಸೌದಿದ ಪೊರ್ತು 9:30ಕ್ ಪಿದಯಿ ಪೋದು ಬರ್ಪೆ ಪಂದ್ ಪೋಯಿನಾರ್ ಪಿರ ಬೈದಿಜೆರ್. ಮೆರೆನ ಮೊಬೈಲ್ ಫೋನ್ ಸ್ವಿಚ್ ಆಫ್ ಆತ್ಂಡ್ ಪಂದ್ ಕುಟುಂಬದಕುಲು ಮಂಡೆಬೆಚ್ಚಡ್ ಉಲ್ಲೆರ್, ಏರಾಂಡಲ ಮೆರೆನ್ ತೂಂಡ ಈ ಮೊಬೈಲ್ ನಂಬರ್ ಗ್ (ಸೌದಿ ಮೊಬೈಲ್ ನಂ. 0507039795) ಕೂಡ್ಲೆ ತೆರಿಪಾಲೆ ಪಂದ್ ಇಲ್ಲದಕುಲು ಬಿನ್ನಾಪು ಮಲ್ದೆರ್.
ಬೆಳ್ಳಾರೆ: ಕೊಲೆ ಆಯಿನ ಬಿಜೆಪಿ ಯುವ ನಾಯಕೆರ್ ಬೆಳ್ಳಾರೆದ ಪ್ರವೀಣ್ ನೆಟ್ಟಾರ್ ಮೆರೆನ ಕನತ್ತ ಇಲ್ಲ್ ಗ್ ಬಿಜೆಪಿ ರಾಜ್ಯಾಧ್ಯೆಕ್ಷೆರ್ ಸಂಸದ ನಳಿನ್ ಕುಮಾರ್ ಕಟೀಲ್ ಇನಿ ಕೆಸರ್ ಕಲ್ಲ್ ಪಾಡಿಯೆರ್.
ಇನಿ ಬೊಲ್ಪುಗು ಪ್ರವೀಣೆರೆನ ಇಲ್ಲ್ ಗ್ ಪ್ರವೀಣ್ ಸಮಾಧಿದ ಕೈತಲ್ ಜಾಗಡೇ 2,700 ಚದರ ಅಡಿತ್ತ ಪೊಸ ಇಲ್ಲ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡಿಯೆರ್. ಮೊಗರೋಡಿ ಕನ್ಸ್ ಸ್ಟ್ರಕ್ಷನ್ ಕಂಪನಿಗ್ ಇಲ್ಲ್ ನಿರ್ಮಾಣದ ಜಬದಾರಿನ್ ಕೊರ್ತೆರ್. ಈ ಪೊರ್ತುಡು ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ, ಸಚಿವೆರ್ ಎಸ್.ಅಂಗಾರ, ಶಾಸಕೆರ್ ಸಂಜೀವ ಮಠಂದೂರು, ಪ್ರವೀಣ್ ಮೆರೆನ ಬೊಡೆದಿ ನೂತನಾ ಬೊಕ್ಕ ಕುಟುಂಬಸ್ಥೆರ್ ಇತ್ತೆರ್.
ದಿಲ್ಲಿ : ಲೆಫ್ಟಿನೆಂಟ್ ಜನರಲ್ ಅಜಯ್ ಕುಮಾರ್ ಸಿಂಗ್ ಮೇರ್ ಭಾರತೀಯ ಸೇನೆದ ತೆನ್ಕಾಯಿ ಭಾಗೊದ ಕಮಾಂಡ್ದ ಜನರಲ್ ಆಫೀಸ್ ಕಮಾಂಡಿಂಗ್-ಇನ್-ಚೀಫ್ ಆದ್ ಅಂಗಾರೆ ಅಧಿಕಾರ ಒಯಿಸೊಂದೆರ್.
ಅಧಿಕಾರ ಒಯಿಸೊನ್ನ ಬೊಕ್ಕ ಅಜಯ್ ಕುಮಾರ್ ಸಿಂಗ್ ಪುಣೆದ ಸದರ್ನ್ ಕಮಾಂಡ್ ವಾರ್ ಮೆಮೋರಿಯಲ್ಡ್ ಪೂಗೊಂಚಿಲ್ ದೀದ್ ದೇವೆರ್ನ ಪಾದೊ ಸೇರ್ದಿನ ಸೈನಿಕೆರೆಗ್ ಗೌರವ ಸಂದಾಯೆರ್. ಅಜಯ್ ಕುಮಾರ್ ಸಿಂಗ್ ಮೆರೆನ ಕರ್ತವ್ಯ ನಿಷ್ಠೆನ್ ಗುರುತಿಸಾದ್ ಅತಿ ವಿಶಿಷ್ಟ ಸೇವಾ ಪದಕ, ಯುದ್ಧ ಸೇವಾ ಪದಕ, ಸೇನಾ ಪದಕ, ವಿಶಿಷ್ಟ ಸೇವಾ ಪದಕ, ರಡ್ಡ್ ಸೇನಾ ಮುಖ್ಯಸ್ಥೆರೆನ ಕಮೆಂಡೇಶನ್ ಕಾರ್ಡ್ ಬೊಕ್ಕ ಮುಖ್ಯ ಕಮಾಂಡಿಂಗ್ ಕಾರ್ಡ್ ಡ್ ಜನರಲ್ ಆಫೀಸರ್ ಪ್ರಶಸ್ತಿ ಕೊರ್ತೆರ್.
ದಿಲ್ಲಿ: ಜಮ್ಮು ಕಾಶ್ಮೀರ ಬೊಕ್ಕ ರಾಜಸ್ಥಾನದ ಗಡಿ ಪ್ರದೇಶಡ್ ಪಾಕಿಸ್ತಾನ್ ಇಂಟರ್ನ್ಯಾಷನಲ್ ಏರ್ಲೈನ್ಸ್ ಪಂದ್ ಬರೆದ್ ಇಪ್ಪುನ ಪುಗ್ಗೆಲು ಪತ್ತೆ ಆತ್ಂಡ್.
ಜಮ್ಮು ಬೊಕ್ಕ ಕಾಶ್ಮೀರ ನಡ್ದ ಸಾಂಬಾ ಪ್ರದೇಶಡ್ ಬಿಎಚ್ಎನ್ ಬೊಕ್ಕ ಎಮಿರೇಟ್ಸ್ ಪಂದ್ ಬರೆದ್ ಇಪ್ಪುನ ಪಚ್ಚೆ ಬೊಕ್ಕ ಬೊಲ್ದು ಬಣ್ಣದ ಇಮಾನ ಆಕಾರದ ಪುಗ್ಗೆಲು ಪತ್ತೆ ಆತ್ಂಡ್. ಸಾಂಬಾಡ್ ಪತ್ತೆ ಆಯಿನಂಚನೆ, ಪಾಕಿಸ್ತಾನ ಇಂಟರ್ನ್ಯಾಷನಲ್ ಏರ್ಲೈನ್ಸ್ದ ಪುದರ್ ನ್ ಬರೆದ್ ಇಪ್ಪುನ ವಿಮಾನದ ಆಕಾರದ ಪುಗ್ಗೆ ಅಂಗಾರೆ ರಾಜಸ್ಥಾನದ ಬಿಕಾನೇರ್ ಜಿಲ್ಲೆಡ್ ಪತ್ತೆ ಆತ್ಂಡ್. ಬೊಲ್ದು ಬೊಕ್ಕ ಪಚ್ಚೆ ಬಣ್ಣದ ಪುಗ್ಗೆ ದಂಟೌರ್ ಪೊಲೀಸ್ ಠಾಣೆ ವ್ಯಾಪ್ತಿಡ್ ಪತ್ತೆ ಆತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್.
ಬೊಲ್ತೇರ್: ಪಿಕಪ್ ಡ್ ಕಲ್ವ ಸಾದಿಡ್ ಕೈಕಂಜಿಲೆನ್ ಕೊನೊಂದು ಇತ್ತಿನ ರಡ್ಡ್ ಆರೋಪಿಲೆನ್ ಬಜರಂಗದಳ ಕಾರ್ಯಕರ್ತೆರ್ ಪತ್ ದ್, ಪೊಲೀಸೆರೆಗ್ ಒಪ್ಪಿಸಾಯಿನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಬೊಲ್ತೇರ್ ಪುದುವೆಟ್ಟುದ ಬಾಯಿತರ್ ಡ್ ನಡತ್ಂಡ್.
ಆರೋಪಿಲು ಕಾಯರ್ತಡ್ಕರ್ದ್ ಅಣಿಯೂರ್ ಗ್ ಪಿಕಪ್ ಡ್ ಕೈಕಂಜಿಲೆನ್ ಕೊನೊಂದು ಇತ್ತೆರ್ ಪಂದ್ ಮಾಹಿತಿ ತೆರಿದ್ 6 ಬಜರಂಗದಳ ಕಾರ್ಯಕರ್ತೆರ್ ಕೈಕಂಜಿಲೆನ್ ರಕ್ಷಣೆ ಮಲ್ದೆರ್. ಈ ಕೇಸ್ ಗ್ ಸಂಬಂಧಪಟ್ಟಿನ ಆರೋಪಿಲಾಯಿನ ಅಜೀದ್ ಕಕ್ಕಿಂಜೆ, ರಫೀಕ್ ನೆರಿಯ ಮೊಕ್ಲೆನ್ ಪೊಲೀಸೆರ್ ಬಂಧಿಸಾದೆರ್. ಈ ಬಗೆಟ್ ಧರ್ಮಸ್ಥಳ ಠಾಣೆದ ಪೊಲೀಸೆರ್ ತನಿಖೆ ಮಲ್ತೊಂದು ಉಲ್ಲೆರ್.
ಬೆಂಗ್ಲೂರ್: ರಾಜ್ಯಡ್ ನನ ಐನ್ ದಿನ ತೆಡಿಲ್ ದೊಟ್ಟಿಗೆ ಭಾರೀ ಬರ್ಸ ಆಪುನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು.
ಬಂಗಾಳ ಕೊಲ್ಲಿಡ್ ಬದಲಾಯಿನ ಪರಿಸ್ಥಿತಿದ ಬಗೆಟ್ ರಾಜ್ಯಡ್ ಬರ್ಸ ಆಪುಂಡು ಪಂದ್ ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ಕೊರ್ತುಂಡು.
