Times of kudla

ಎಲ್ಲೆ ( ನ.6) ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಮುತಾಲಿಕೆಡ್ 2 ನೇ ಇಲ್ಲ್ ಕೊರ್ಪುನ ಲೇಸ್

ಬೈರಂಪಳ್ಳಿ: ಶ್ರಮಿಕ ತರುಣರ ಕೂಟದ ಬೈರಂಪಳ್ಳಿದ ಮುತಾಲಿಕೆಡ್ ನಿರ್ಮಾಣ ಆಯಿನ ರಡ್ಡ್ ನೇ ಇಲ್ಲ್ ನ್ 41 ನೇ ಶೀರೂರುದ ಪಟ್ಟಿಬಾವು ಮುಟ್ಟಿ ಹರಿಜನ ಮೆರೆಗ್ ಕೊರ್ಪುನ ಲೇಸ್ ನ.6 ಐತಾರ ಬೊಲ್ಪುಗು 8 ಗಂಟೆಗ್ ನಡಪರೆ ಉಂಡು.

ಈ ಲೇಸ್ ಬೊಲ್ಪುಗು 8 ಗಂಟೆಗ್ ಗಣಹೋಮರ್ದ್ ಸುರು ಆಪುಂಡು. ಬೊಕ್ಕ ದೀಪ ಪ್ರಜ್ವಲನೆ ಆದ್, ರಾಮನಗರ ಜಿಲ್ಲೆ ಮಾಗಡಿ ತಾಲೂಕ್ ದ ಸೋಲೂರ್ ದ ಶ್ರೀ ನಾರಾಯಣಗುರು ಮಠ, ಆರ್ಯ ಈಡಿಗ ಮಹಾಸಂಸ್ಥಾನ ಶ್ರೀ ರೇಣುಕಾ ಪೀಠ ನೆತ್ತ ಪೀಠಾಧಿಪತಿ ಶ್ರೀ ಶ್ರೀ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಒಡಿಪುದ ಉದ್ಯಮಿ ಹರೀಶ್ ಕುಕ್ಕೆಹಳ್ಳಿ ಲೇಸ್ ನ್ ಉದಿಪನ ಮಲ್ಪರೆ ಉಲ್ಲೆರ್. ಬಿನ್ನೆರಾದ್ ಬೈರಂಪಳ್ಳಿ ದಲಿತ ಸಂಘರ್ಷ ಸಮಿತಿದ ಪ್ರತಿನಿಧಿ ರಮೇಶ್ ಹರಿಖಂಡಿಗೆ, ಒಡಿಪುದ ವಕೀಲೆರ್ ಸತೀಶ್ ಪೂಜಾರಿ, ಮಲ್ಪೆ ಉದ್ಯಮಿ ದೇವದಾಸ್ ಸುವರ್ಣ, ಬೈರಂಪಳ್ಳಿ ಉದ್ಯಮಿ ಪ್ರವೀಣ್ ಪೂಜಾರಿ ಸಾಂತ್ಯಾರ್ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಬೊಕ್ಕ ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಮಹಿಳಾ ಘಟಕದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ನ. 7-8ಕ್ ಒಡಿಪುಗ್ ಸಿಎಂ ಬೊಮ್ಮಾಯಿ ಭೇಟಿ

ಒಡಿಪು: ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ನ 7-8 ಕ್ ಒಡಿಪುಗ್ ಭೇಟಿ ಕೊರಿಯೆರೆ ಉಲ್ಲೆರ್.

ನ.7ಕ್ ಬೊಲ್ಪುಗು 10:30ಕ್ ಆದಿ ಒಡಿಪು ಹೆಲಿಪ್ಯಾಡ್‌ಗ್ ಸಿಎಂ ಬಸವರಾಜ್ ಬೊಮ್ಮಾಯಿ ಬತ್ತ್ ದ್, ಬೊಕ್ಕ ಕಾಪುಗ್ ಪೋದು 11 ಗಂಟೆಗ್ ಜನಸಂಕಲ್ಪ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಮಧ್ಯಾಹ್ನ 1:50ಕ್ ಒಡಿಪು ಎಂಜಿಎಂ ಕಾಲೇಜ್ ಡ್ ನಡಪುನ ಕರಾವಳಿದ ಹಿರಿಯ ಪತ್ರಕರ್ತೆರೆನ ಜನ್ಮಶತಮಾನೋತ್ಸವ ಸಂಸ್ಮರಣೆ ಲೇಸ್ ಡ್ ಪಾಲ್ ಪಡೆಪೆರ್. ಬೊಕ್ಕ ಮಧ್ಯಾಹ್ನ 3:45ಕ್ ಕುಂದಾಪುರ ತಾಲೂಕ್ ಹೊಸಾಡು ಗ್ರಾಮದ ಮುಳ್ಳಿಕಟ್ಟೆಡ್ ಒಡಿಪು ಜಿಲ್ಲಾಡಳಿತದ ವತಿರ್ದ್ ಅಟ್ಡಣೆ ಮಲ್ತಿನ ಬೈಂದೂರ್ ವಿಧಾನಸಭಾ ಕ್ಷೇತ್ರದ ಬೇತೆ ಬೇತೆ ಅಭಿವೃದ್ಧಿ ಕಾಮಗಾರಿಲೆಗ್ ಕೆಸರ್ ಕಲ್ಲ್ ಪಾಡ್ದ್, ಉದಿಪನ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಡೇಂಜರ್ ! ಬೆದ್ರದ ಜ್ಯೋತಿನಗರ ಪಾರ್ಕ್ ಡ್ ನೇಲೊಂದುಂಡು ಪಿಲಿ ಕುಂಡೇಲ್ದ ಗೂಡು!!

ಬೆದ್ರ: ಬೆದ್ರ ಪೊಲೀಸ್ ಠಾಣೆದ ಕೈತಲ್ ಇಪ್ಪುನ ಜ್ಯೋತಿನಗರ ಮಹಾತ್ಮಾ ಗಾಂಧಿ ಪಾರ್ಕ್ ಡ್ ಪಿಲಿ ಕುಂಡೇಲ್ದ (Tiger Bee) ಮಲ್ಲ ಗೂಡು ಕಟ್ಟ್ ದ್ ಜನಕ್ಲೆನ ಜೂವೊಗು ಭಾರಿ ಸಂಚಿಕಾರ ಆಪಿಲೆಕ ಉಂಡು.

ಆಂಡ ಈ ಸಂಗತಿ ಪಾರ್ಕ್ ಗ್ ಸಂಬಂಧ ಪಟ್ಟಿನ ಒವ್ವೇ ಅಧಿಕಾರಿಗ್ಲಾ ತೆರಿದಿಜಿ ಪನ್ಪುನವೆ ವಿಪರ್ಯಾಸ. ಮುಲ್ಪ ಬೊಲ್ಪುಗು ಬಯ್ಯಗ್ ಸುಮಾರ್ ಜನ ವಾಕಿಂಗ್ ಮಲ್ಪರೆ ಬರ್ಪೆರ್. ಶಾಲೆ ಕಾಲೇಜ್ ಜೋಕುಲು ಜೂವ ಕೈಟ್ ಪತೊಂದು ಪಾರ್ಕ್ ಡ್ ತಿರ್ಗುನಂಚ ಆತ್ಂಡ್. ಜೋಕುಲು ಜನಕುಲು ತಿರ್ಗೆರೆ ಈ ಪಾರ್ಕ್ ಭಾರೀ ಡೇಂಜರ್ ಜಾಗೆ ಆದುಂಡು.

ಪಿಲಿ ಕುಂಡೇಲ್ ದ ಗೂಡು ದಾದಾಂಡಲ ತಾಗ್ಂಡ ಅಯಿಕ್ಕುಲು ತಿಕ್ಕಿನಕ್ಲೆಗ್ ತುಚ್ಚುಂಡು. ಉಂದೆಟ್ಟ್ ನರಮಾನಿ ಆಡ್ ಪ್ರಾಣಿಲಾವಡ್ ಬದ್ ಕ್ ದ್ ಒರಿವುನು ಭಾರಿ ಕಮ್ಮಿ. ಅಯಿಕುಲು ತನ್ನ ಗೂಡುಕಟ್ಟುನ ಜಾಗೆನ್ ಆಕ್ರಮಣಕಾರಿ ಆದ್ ರಕ್ಷಣೆ ಮಲ್ತೊಂದುಪ್ಪುವ. ಆಂಡಲ ನಮ ಭಾರೀ ಜಾಗ್ರತೆಡ್ ಇಪ್ಪೊಡು.

ದಾಯೆ ಪಂಡ ನೆತ್ತ ಪಿಲಿ ಕುಂಡೇಲ್ದ ಕೊಂಡಿಲು ತೊಡ್ಡೆಕೆಲೆಂಜಿರ್ದ್ ಲ ಹೆಚ್ಚ ಡೇಂಜರ್. ನೆತ್ತ ಕೊಂಡಿಲೆಡ್ ಅಸಿಟೈಲ್‍ಕೋಲಿನ್ ಪನ್ಪುನ ಇಸ ಇಪ್ಪುಂಡು. ಏರ್ಲಾ ಎದುರು ತಿಕ್ಂಡ ಒಂಜೇ ಕುಂಡೇಲ್ ಬೆರಿ ಬೆರಿಕ್ಕ್ ಕುಟ್ಟುವ. ಅಂಚಾದ್ ಪುರಸಭೆತ್ತ ಅಧಿಕಾರಿಲು ನೆತ್ತ ಬಗೆಟ್ ಆಯಿನತ್ ಬೇಗ ಕ್ರಮ ದೆತೊನೊಡು ಪಂದ್ ಜನಕುಲು ಒತ್ತಾಯ ಮಲ್ತೊಂದುಲ್ಲೆರ್.

ಕಡಬ: ನೀರ್ ಬುಡ್ದು ಶಾಲೆದ ಕೈತಲ್ ಬತ್ತಿನ ಮುದಲೆ!!

ಕಡಬ: ನೀರ್ ನ್ ಬುಡ್ದು ಮಾರ್ಗಗ್ ಬತ್ತಿನ ಮುದಲೆನ್ ಅರಣ್ಯ ಇಲಾಖೆದ ಸಿಬ್ಬಂದಿಲು ರಕ್ಷಣೆ ಮಲ್ತ್ ದ್ ಬೊಕ್ಕ ನೀರ್ ಗ್ ಬುಡ್ನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಕಡಬ ತಾಲೂಕ್ ದ ಆಲಂಕಾರ್ ಕೊಂಡಾಡಿಕೊಪ್ಪ ಪ್ರಾಥಮಿಕ ಶಾಲೆದ ಕೈತಲ್ ನಡತ್ಂಡ್.

ಶುಕ್ರಾರ ಬೊಲ್ಪುಗು ಕೊಂಡಾಡಿಕೊಪ್ಪ ಶಾಲೆದ ಕೈತಲ್ ಈ ಮುದಲೆ ಮಾರ್ಗಡ್ ಇತ್ತ್ಂಡ್.
ಉಂದೆನ್ ರಬ್ಬರ್ ಟ್ಯಾಪಿಂಗ್‌ ಬೇಲೆಗ್ ಪೋವೊಂದು ಇತ್ತಿನ ಶೀನಪ್ಪ ಕುಂಬಾರ ಮೇರ್ ತೂದು ಅರಣ್ಯ ಇಲಾಖೆಗ್ ತೆರಿಪಾದೆರ್. ಅರಣ್ಯ ಇಲಾಖೆದ ಸಿಬಂದಿಲಾಯಿನ ಬಾಲಚಂದ್ರ ಗೌಡ ಬೊಕ್ಕ ರವಿಕುಮಾರ್ ಕೂಡ್ಲೆ ಜಾಗೆಗ್ ಬತ್ತ್ ದ್, ಸ್ಥಳೀಯೆರಾಯಿನ ಶೀನಪ್ಪ ಕುಂಬಾರ, ಕಿರಣ್ ಕೊಂಡಾಡಿ ಬೊಕ್ಕ ಧರ್ಮಸ್ಥಳ ಶೌರ್ಯ ಟೀಮ್ ದ ಕಾರ್ಯಕರ್ತೆರಾಯಿನ ಹರೀಶ್, ವಿನೋದ್ ಸೇರ್ದ್ ಮುದಲೆನ್ ಪತ್ತ್ ದ್ ಕುಮಾರಧಾರೆ ತುದೆಕ್ ಬುಡಿಯೆರ್.

ಗುಜರಾತ್ ಮಾಜಿ ಆರೋಗ್ಯ ಸಚಿವೆರ್ ಜೈ ನಾರಾಯಣ ವ್ಯಾಸ್ ಬಿಜೆಪಿಗ್ ರಾಜೀನಾಮೆ

ಗುಜರಾತ್: ಗುಜರಾತ್ ವಿಧಾನಸಭೆ ಚುನಾವಣೆಗ್ ದಿನ ನಿಗಂಟ್ ಆಯಿನ ಪೊರ್ತುಡು ಮಾಜಿ ಆರೋಗ್ಯ ಸಚಿವೆರ್ ಜೈ ನಾರಾಯಣ ವ್ಯಾಸ್ ಬಿಜೆಪಿಗ್ ರಾಜೀನಾಮೆ ಕೊರ್ತೆರ್.

2007ರ್ದ್ 2012 ಮುಟ್ಟ ಜೈ ನಾರಾಯಣ ವ್ಯಾಸ್ ಬಿಜೆಪಿ ಸರ್ಕಾರಡ್ ಆರೋಗ್ಯ ಸಚಿವರಾದ್ ಬೇಲೆ ಮಲ್ತೊಂದು ಇತ್ತಿನ ಮೇರ್ ಇತ್ತೆ ಈ ಪಕ್ಷಗ್ ರಾಜೀನಾಮೆ ಕೊರ್ದು ನನ ಒವು ಪಕ್ಷಗ್ ಸೇರುವೆರ್ ಪನ್ಪುನ ಮಾಹಿತಿ ತೆರಿದಿಜಿ. ಆಂಡ ಆರ್ ಆಮ್ ಆದ್ಮಿ ಪಕ್ಷ ಸೇರುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್. ಗುಜರಾತ್ ವಿಧಾನಸಭೆಕ್ಕ್ ಡಿ. 1ಕ್ ಸುರುತ ಹಂತ ಬೊಕ್ಕ ಡಿ. 5 ಕ್ ರಡ್ಡ್ ನೇ ಹಂತದ ವೋಟು ನಡಪರೆ ಉಂಡು. ಡಿ. 8ಕ್ ಫಲಿತಾಂಶ ಪ್ರಕಟ ಆಪುಂಡು.

ವಿರಾಟ್ ಕೊಹ್ಲಿಗ್ ಇನಿ ಪುಟ್ಟು ಪರ್ಬದ ಗೌಜಿ

ಬೆಂಗ್ಲೂರ್: ಟೀಮ್ ಇಂಡಿಯಾ ಮಾಜಿ ನಾಯಕೆ ಬೊಕ್ಕ ರಾಯಲ್ ಚಾಲೆಂಜರ್ಸ್ ಬೆಂಗ್ಲೂರ್ ಟೀಮ್ ದ ಶ್ರೇಷ್ಠ ಬ್ಯಾಟ್ಸ್ ಮನ್ ವಿರಾಟ್ ಕೊಹ್ಲಿಗ್ ಇನಿ 34 ನೇ ವರ್ಷದ ಪುಟ್ಟುಪರ್ಬದ ಗೌಜಿ.

ಈ ದಿನನ್ ನೆಂಪು ಮಲ್ತ್ ದ್ ಅಭಿಮಾನಿಲು ಸಾಮಾಜಿಕ ಜಾಲತಾಣಡ್ ಎಡ್ಡೆಪ್ಪು ಬಯಕ್ ದೆರ್.

ಕಡಬ: ಕರೆಂಟ್ ಕಂಬಗ್ ಗುದ್ದಿನ ಕಾರ್..!!

ಕಡಬ : ಕಾರೊಂಜಿ ಕರೆಂಟ್ ಕಂಬಗ್ ಗುದ್ದಿನ ಘಟನೆ ಕಡಬ ಪೇಂಟೆಡ್ ಕೋಡೆ ರಾತ್ರೆ ನಡತ್ಂಡ್.

ಈ ಘಟನೆಡ್ ಕಾರ್ ಡ್ರೈವರ್ ಬಚಾವಾತೆರ್. ಕಾರ್ ದ ರಭಸಗ್ ಕಾರ್ ದ ಎದುರು ಮೈ ನಕ್ಕೆ ಆತ್ಂಡ್. ಕರೆಂಟ್ ಕಂಬ ಮಗ್ ರ್ದ್, ವಯರ್ ಮಾತ ಕಾರ್ ದ ಮಿತ್ತ್ ಬೂರ್ದುಂಡು. ಈ ಕಾರ್ ಕಡಬರ್ದ್ ಸುಬ್ರಹ್ಮಣ್ಯಗ್ ಪೋವೊಂದು ಇತ್ತ್ಂಡ್ ಪಂದ್ ತೂಯಿನಕುಲು ತೆರಿಪಾದೆರ್.

ನ.13 ಬೊಕ್ಕ 14 ಕ್ಕ್ ಪ್ರವಾಸಿಗೆರೆಗ್ ದತ್ತಪೀಠ ಪ್ರವೇಶ ಇಜ್ಜಿ

ಚಿಕ್ಕಮಗಳೂರು: ಜಿಲ್ಲೆದ ಪುಗರ್ತೆದ ದತ್ತಪೀಠ ಬೊಕ್ಕ ಸುತ್ತದ ಜಾಗೆಗ್ ನ.13 ಬೊಕ್ಕ ನ.14 ದಾನಿ ಪ್ರವಾಸಿಗರೆನ ಪ್ರವೇಶ ನಿಷೇಧ ಮಲ್ತ್ ದ್ ಜಿಲ್ಲಾಧಿಕಾರಿ ಕೆ.ಎನ್ ರಮೇಶ್ ಆದೇಶ ಕೊರ್ತೆರ್.

ದತ್ತಮಾಲೆ ಅಭಿಯಾನ ಇಪ್ಪುನ ಕಾರಣ ಶ್ರೀರಾಮ ಸೇನೆ ಕಾರ್ಯಕರ್ತೆರ್ ನ.13 ದಾನಿ ಶ್ರೀ ಗುರು ದತ್ತಾತ್ರೇಯ ಪೀಠಗ್ ಬರಿಯೆರೆ ಉಲ್ಲೆರ್. ಈ ಬಗೆಟ್ ಪ್ರವಾಸಿಗೆರೆನ ಭೇಟಿನ್ ನಿಷೇಧ ಮಲ್ಪೊಡು ಪಂದ್ ಜಿಲ್ಲಾಡಳಿತ ಆದೇಶ ಕೊರ್ತುಂಡು. ಅಂಚಾದ್ ಚಿಕ್ಕಮಗಳೂರು ಜಿಲ್ಲೆದ ಮುಳ್ಳಯ್ಯನಗರಿ, ದತ್ತಪೀಠಗ್ ಬರಿಯೆರೆ ಪ್ಲ್ಯಾನ್ ಪಡಿನಕುಲು ಈ ರಡ್ಡ್ ದಿನ ಭೇಟಿ ಕೊರಂದೆ ಇಪ್ಪುನವು ಎಡ್ಡೆ ಪಂದ್ ಪಂಡೆರ್.

ಮಠಂತಬೆಟ್ಟು: ತೆಡಿಲ್ ಆಕ್ ದ್ ಇಲ್ಲದ ಗೋಡೆ ಪುಡಾದ್ಂಡ್…!

ಪುತ್ತೂರ್: ಕೋಡಿಂಬಾಡಿ ಗ್ರಾಮದ ಮಠಂತಬೆಟ್ಟು ನಿವಾಸಿ ಪುರುಷೋತ್ತಮ ನಾಯ್ಕ ಮೆರೆನ ಇಲ್ಲಗ್ ಸುಕ್ರಾರ ಬಯ್ಯಗ್ ತೆಡಿಲ್ ಆಕ್ ದ್ ಇಲ್ಲದ ಗೋಡೆ ಪುಡಾದ್ಂಡ್.

ಕರೆಂಟ್ ದ ಸೊತ್ತುಲು ಪೂರ ಲಗಾಡಿ ಪೋತುಂಡು. ಇಲ್ಲದ ಜಾಲ್ ಡ್ ಇತ್ತಿನ ತಾರೆಗ್ಲಾ ತೆಡಿಲ್ ಆಕ್ ದ್ಂಡ್. ಈ ಪೊರ್ತುಡು ಮೆರೆನ ಇಲ್ಲಲ್ ಏರ್ಲಾ ಇಜ್ಜಂಡ್ ಪಂದ್ ತೆರಿದ್ ಬೈದ್ಂಡ್.

ರಿಲಯನ್ಸ್ ಇಂಡಸ್ಟ್ರೀಸ್ ದ ನಿರ್ದೇಶೆಕೆರಾದ್ ತುಳುವೆ ಕೆ.ವಿ. ಕಾಮತ್ ನೇಮಕ

ಬೊಂಬೈ: ರಿಲಯನ್ಸ್ ಇಂಡಸ್ಟ್ರೀಸ್ ಗ್ ಐನ್ ವರ್ಷ ಮುಟ್ಟ ಸ್ವತಂತ್ರ ನಿರ್ದೇಶಕೆರಾದ್ ತುಳುನಾಡ್ ಮೂಲದ ಕೆ. ವಿ. ಕಾಮತ್ ಮೆರೆನ್ ನೇಮಕ ಮಲ್ದ್ಂಡ್.

ಮೇರ್ ರಿಲಯನ್ಸ್ ಸ್ಟ್ರಾಟೆಜಿಕ್ ಇನ್ವೆಸ್ಟ್‌ಮೆಂಟ್ ಲಿಮಿಟೆಡ್‌ಗೆ (ಆರ್‌ಎಸ್‌ಐಎಲ್) ಸ್ವತಂತ್ರ ನಿರ್ದೇಶಕೆರಾದ್ ಬೊಕ್ಕ ಕಾರ್ಯನಿರ್ವಾಹಕೇತರ ಅಧ್ಯಕ್ಷೆರಾದ್ ನೇಮಕ ಆತೆರ್. ನಿರ್ದೇಶಕರೆನ ಮಂಡಳಿ ನಡತಿನ ಸಭೆಟ್ ಮಾನವ ಸಂಪನ್ಮೂಲ, ನಾಮನಿರ್ದೇಶನ ಬೊಕ್ಕ ಸಂಭಾವನೆ ಸಮಿತಿದ ಶಿಫಾರಸ್ ದ ಆಧಾರದ ಮಿತ್ತ್ ಮೆರೆನ್ ನೇಮಕ ಮಲ್ತ್ ದ ಪಂದ್ ಕಂಪನಿ ತೆರಿಪಾದ್ಂಡ್.