ಡೆಲ್ಲಿ: ಶ್ರದ್ಧಾ ಪನ್ಪಿನ ಪೊಣ್ಣನ್ ಕೆರ್ತಿನ ಕೇಸ್ ದ ಆರೋಪಿ ಅಫ್ತಾಬ್ ಪೂನಾವಾಲನ್ ಇನಿ ಡೆಲ್ಲಿದ ಸಾಕೇತ್ ಕೋರ್ಟ್ ಗ್ ಪೊಲೀಸೆರ್ ಹಾಜರ್ ಮಲ್ಪರೆ ಉಲ್ಲೆರ್.
ಆತೆ ಅತ್ತಂದೆ ಆರೋಪಿನ್ ಪೊಲೀಸ್ ಕಸ್ಟಡಿಗ್ ಒಪ್ಪಯೆರೆ ಬಿನ್ನಾಪು ಮಲ್ಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್. ಈ ಆರೋಪಿ ಶ್ರದ್ಧಾನ ದೋಸ್ತಿಲೆಡ ಪೊಲೀಸೆರೆಗ್ ದೂರು ಕೊರಂದಿಲೆಕ್ಕ ಒತ್ತಡ ಪಾಡ್ಡೆ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ ಕರಾವಳಿ ನಿಯಂತ್ರಣ ವಲಯಡ್ ಸಾಂಪ್ರದಾಯಿಕವಾದ್ ಪೊಯ್ಯೆ ದೆಪ್ಪುನ ಬೇಲೆನ್ ಸುರು ಮಲ್ಪರೆ ಜಿಲ್ಲಾಡಳಿತ ಅವಕಾಶ ಕೊರ್ತುಂಡು.
ಏಳ್ ಜನ ಸದಸ್ಯೆರೆನ ಸಮಿತಿಡ್ ಈ ನಿರ್ಧಾರ ದೆತೊಂದುಂಡು ಪಂದ್ ಜಿಲ್ಲಾಧಿಕಾರಿ ರವಿಕುಮಾರ್ ಎಂ ಆರ್ ತೆರಿಪಾದೆರ್. ಸಿಆರ್ ಜಡ್ ವ್ಯಾಪ್ತಿಡ್ ಕಾರ್ಮಿಕೆರೆಗ್ ಮಾತ್ರ ಅವಕಾಶ ಕೊರ್ತುಂಡು. ಮುಲ್ಪ ಒವ್ವೇ ಅಕ್ರಮ ನಡಪರೆ ಇಜ್ಜಿ. ಮಿಷಿನ್ ಗಲಸರೆ ಇಜ್ಜಿ, ಮರಳು ದಿಬ್ಬದ ಕೈತಲ್ ಸಿಸಿಟಿವಿ ಪಾಡ್ದ್ ನಿಗಾ ದೆತೊನೊವ,ಆ್ಯಪ್ ಮುಖೇನ ಮಾತ್ರ ಪೊಯ್ಯೆ ಬಟವಾಡೆ ಮಲ್ಪರೆ ಅವಕಾಶ ಕೊರ್ತ ಪಂದ್ ರವಿಕುಮಾರ್ ಪಂಡೆರ್.
ಶಬರಿಮಲೆ: ವಿಶ್ವ ಪುಗರ್ತೆದ ಭಾರತದ ಕೇರಳ ರಾಜ್ಯದ ಶಬರಿಮಲೆಟ್ ಇನಿರ್ದ್ ಮಂಡಲಂ ಮಕರವಿಳಕ್ಕು ಪೂಜೆ ಸುರು ಆಯೆರೆ ಉಂಡು. ಈ ಪೂಜೆ ನನ ರಡ್ಡ್ ತಿಂಗೊಲ್ ನಡಪರೆ ಉಂಡು.
ಈ ಉಚ್ಚಯೊಗಾದ್ ದೇವಲ್ಯದ ಬಾಕಿಲ್ ನ್ ಬುಧಾರ ಬಯ್ಯಗ್ ದೈದೆರ್. ಶ್ರೀಕ್ಷೇತ್ರೊಗು ಈ ಸರ್ತಿ ಪೊಸ ತಂತ್ರಿಲಾದ್ ಕೆ. ಜಯರಾಮ್ ನಂಬೂದಿರಿ ಮೇರ್ ಬೈದೆರ್. ಕೊರೊನಾ ಇತ್ತಿನ ಕಾರಣ ಕರಿನ ರಡ್ಡ್ ವರ್ಷ ಹೆಚ್ಚದ ಸಂಖ್ಯೆಡ್ ಜನ ಸೇರಿಯೆರೆ ಇಜ್ಜಿ ಪಂದ್ ನಿರ್ಬಂಧ ಪಾಡ್ದ್ ಇತ್ಂಡ್. ಆಂಡ ಈ ಸರ್ತಿ ಲಕ್ಷಾಂತರ ಸಂಖ್ಯೆಡ್ ಭಕ್ತೆರ್ ಶಬರಿಮಲೆ ಯಾತ್ರೆಡ್ ಪಾಲ್ ಪಡೆಪೆರ್ ಪಂದ್ ನಿರೀಕ್ಷೆ ಉಂಡು. ಶಬರಿಮಲೆ ಮಾರ್ಗಡ್ ಬಿಗಿ ಪೊಲೀಸ್ ಬಂದೋಬಸ್ತ್ ಪಡ್ದೆರ್. ಭದ್ರತೆಗಾದ್ ಸುಮಾರ್ 13,000 ಸಿಬ್ಬಂದಿ ಬೊಕ್ಕ ಸಿಸಿ ಕ್ಯಾಮರ ಪಾಡ್ದೆರ್.
ಕಾರ್ಣಿಕ ಕ್ಷೇತ್ರ ಗೆಜ್ಜೆಗಿರಿ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಉದಿಪನ ಬೊಕ್ಕ ದೇವೆರೆನ ಸುರುತ ಸೇವೆ ಆಟ ಆದ್ ಮೇಳ ಪಿದಾಡುನ ಗೌಜಿದ ಲೇಸ್ ನ.27 ಐತಾರದಾನಿ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ ನಡಪರೆ ಉಂಡು.
ಬಯ್ಯಗ್ 5:30ರ್ದ್ ಸಭಾ ಕಾರ್ಯಕ್ರಮ ನಡಪರೆ ಉಂಡು. ಈ ಲೇಸ್ ಡ್ ಆರ್ಯ-ಈಡಿಗ(ಬಿಲ್ಲವ) ಮಹಾಸಂಸ್ಥಾನ ಸೋಲೂರು ಮಠತ್ತ ಪೀಠಾಧಿಪತಿಕುಲು ಶ್ರೀ ಶ್ರೀ ಶ್ರೀ ವಿಖ್ಯಾತನಂದಜಿ,
ಶ್ರೀ ಕ್ಷೇತ್ರ ಧರ್ಮಸ್ಥಳದ ಡಿ.ಹರ್ಷೇಂದ್ರ ಕುಮಾರ್, ಶ್ರೀ ಕ್ಷೇತ್ರ ಕಟೀಲ್ ದ ಅನುವಂಶಿಕ ಅರ್ಚಕೆರ್ ಕಮಲಾದೇವಿ ಅಸ್ರಣ್ಣ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ ಸಭಾಧ್ಯಕ್ಷತೆನ್ ಒಯಿಸೊನ್ವೆರ್. ಯುವ ಸಂಶೋಧಕೆರ್ ಡಾ. ಆರುಣ್ ಉಳ್ಳಾಲ್ ಧಾರ್ಮಿಕ ಮದಿಪು ಕೊರ್ರೆ ಉಲ್ಲೆರ್. ಅಂಚನೆ ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ಬೊಕ್ಕ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ವಿಧಾನ ಪರಿಷತ್ ವಿರೋಧ ಪಕ್ಷದ ನಾಯಕೆರ್ ಬಿ.ಕೆ ಹರಿಪ್ರಸಾದ್, ಇಂಧನ ಬೊಕ್ಕ ದ.ಕ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ.ಸುನಿಲ್ ಕುಮಾರ್, ಹಿಂದುಳಿದ ವರ್ಗ ಬೊಕ್ಕ ಸಮಾಜ ಕಲ್ಯಾಣ ಮಾನ್ಯ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ, ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು, ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಕೋಟ್ಯಾನ್, ವಿಧಾನ ಪರಿಷತ್ ಸದಸ್ಯೆರ್ ಕೆ.ಹರೀಶ್ ಕುಮಾರ್, ಬೊಲ್ತೇರ್ ಮಾಜಿ ಶಾಸಕೆರ್ ವಸಂತ ಬಂಗೇರ, ಕುಡ್ಲ ಓಶಿಯನ್ ಪರ್ಲ್, ಸಾಗರ ರತ್ನ ಇಂಟರ್ ನ್ಯಾಷನಲ್ ಎಂ.ಡಿ., ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಜಯರಾಮ ಬನಾನ್, ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್, ಅಖಿಲ ಭಾರತ ಬಿಲ್ಲವರ ಯೂನಿಯನ್ ದ ನವೀನ್ ಚಂದ್ರ ಡಿ.ಸುವರ್ಣ, ಕುಳಾಯಿ ಫೌಂಡೇಶನ್ ಅಧ್ಯಕ್ಷೆರ್ ಬೊಕ್ಕ ಯುವ ನಾಯಕಿ ಪ್ರತಿಭಾ ಕುಳಾಯಿ, ಶ್ರೀ ಕ್ಷೇತ್ರ ಗೆಜ್ಜೆಗಿರಿ ನಿಕಟಪೂರ್ವ ಅಧ್ಯಕ್ಷೆರ್ ಜಯಂತ ನಡುಬೈಲ್, ಶ್ರೀ ಕ್ಷೇತ್ರ ಹನುಮಗಿರಿತ ಅಚ್ಯುತ ಮೂಡೆತ್ತಾಯ, ಕೊಟ್ಟಾರಿ ಸುಧಾರಕ ಸಂಘದ ಜಿಲ್ಲಾಧ್ಯಕ್ಷೆರ್ ಬಾಲಕೃಷ್ಣ ಕೊಟ್ಟಾರಿ, ಬೊಂಬೈ ಬಿಲ್ಲವರ ಅಸೋಸಿಯೇಶನ್ ಅಧ್ಯಕ್ಷೆರ್ ಹರೀಶ್ ಜಿ.ಅಮೀನ್ , ಕಟಪಾಡಿ ಶ್ರೀ ವಿಶ್ವನಾಥ ಕ್ಷೇತ್ರದ ಅಧ್ಯಕ್ಷೆರ್ ಬಿ.ಎನ್ ಶಂಕರ ಪೂಜಾರಿ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್, ಗೆಜ್ಜೆಗಿರಿ ನಂದನ ಬಿತ್ತಿಲ್ ದ ಶ್ರೀಧರ ಪೂಜಾರಿ, ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು,ಡಿ. ದೇವರಾಜ ಅರಸು ರಾಜ್ಯ ಪ್ರಶಸ್ತಿ ಪುರಸ್ಕೃತೆರ್ ಡಾ. ಅಣ್ಣಯ್ಯ ಕುಲಾಲ್ ಉಳ್ತೂರು, ಬಿಲ್ಲವಾಸ್ ದುಬೈದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ ಕರ್ನಿರೆ(ದುಬೈ), ಬೊಲ್ತೇರ್ ಬೆಸ್ಟ್ ಫೌಂಡೇಶನ್ ಅಧ್ಯಕ್ಷೆರ್ ರಕ್ಷಿತ್ ಶಿವರಾಮ್, ಪುತ್ತೂರ್ ಬಿಲ್ಲವ ಸಂಘದ ಅಧ್ಯಕ್ಷೆರ್ ಸತೀಶ್ ಕಡೆಂಜಿ, ಬಡಗನ್ನೂರು ಗ್ರಾಮ ಪಂಚಾಯತಿ ಅಧ್ಯಕ್ಷೆರ್ ಶ್ರೀಮತಿ ಮೇರ್ ಬರಿಯೆರೆ ಉಲ್ಲೆರ್. ಬೊಕ್ಕ ಕಂಕನಾಡಿ ಬ್ರಹ್ಮ ಬೈದರ್ಕಳ ಗರಡಿ ಕ್ಷೇತ್ರದ ಅಧ್ಯಕ್ಷೆರ್ ಕೆ. ಚಿತ್ತರಂಜನ್ ಮೆರೆಗ್ ಶ್ರೀ ಧರ್ಮ ರತ್ನ ಪ್ರಶಸ್ತಿ, (ರಾಜ್ಯ ಪ್ರಶಸ್ತಿ ವಿಜೇತೆರ್) ತೆಂಕು-ಬಡಗತಿಟ್ಟುದ ಹಿರಿಯ ಯಕ್ಷಗಾನ ಕಲಾವಿದೆರ್ ಐರೋಡಿ ಗೋವಿಂದಪ್ಪ ಮೆರೆಗ್ ಶ್ರೀ ದೇಯಿ ಬೈದೆತಿ ಮಾತೃ ಸನ್ಮಾನ, (ಒಡಿಪು ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರ್) ಹಿರಿಯ ಯಕ್ಷಗಾನ ಕಲಾವಿದೆರ್ ಪೂಕಳ ಲಕ್ಷ್ಮೀನಾರಾಯಣ ಭಟ್ ಮೆರೆಗ್ ಶ್ರೀ ಸಾಯನ ಬೈದ್ಯ ಗುರು ಸನ್ಮಾನ, (ರಾಜ್ಯ ಪ್ರಶಸ್ತಿ ವಿಜೇತೆರ್) ಹಿರಿಯ ಯಕ್ಷಗಾನ ಕಲಾವಿದೆರ್ ಆರುವ ಕೊರಗಪ್ಪ ಶೆಟ್ಟಿ ಮೆರೆಗ್ ಯಕ್ಷಕೋಟಿ ಸಾಧಕ ತಮ್ಮನ, ಕಲಾ ಪೋಷಕೆರ್ ಸೇಸಪ್ಪ ಕೋಟ್ಯಾನ್ ಪಚ್ಚಿನಡ್ಕ ಬೊಕ್ಕ ಯಾದವ ಕೋಟ್ಯಾನ್ ಪೆರ್ಮುದೆ ಮೊಕ್ಲೆಗ್ ಕೋಟಿ ಚೆನ್ನಯ ಕಲಾಪೋಷಕ ತಮ್ಮನ ನಡಪುಂಡು. ಬೊಕ್ಕ ಶ್ರೀ ಪಾವಂಜೆ ಮೇಳದ ಪುಗರ್ತೆದ ಭಾಗವತೆರ್ ಪಟ್ಲ ಸತೀಶ್ ಶೆಟ್ಟಿ, ಶ್ರೀ ಹನುಮಗಿರಿ ಮೇಳದ ಪುಗರ್ತೆದ ಭಾಗವತೆರ್ ರವೀಂದ್ರ ಪೂಜಾರಿ ಕನ್ನಡಿಕಟ್ಟೆ, ಶ್ರೀ ಗೆಜ್ಜೆಗಿರಿ ಮೇಳದ ಪುಗರ್ತೆ ದ ಭಾಗವತೆರ್ ಗಿರೀಶ್ ರೈ ಕಕ್ಯಪದವು ಬೊಕ್ಕ ನಿರಂಜನ ಪೂಜಾರಿ ಬಡಗ ಬೆಳ್ಳೂರು, ಬಡಗು ತಿಟ್ಟುದ ಪುಗರ್ತೆದ ಭಾಗವತೆರ್ ಆರ್. ಡಿ ಸಂತೋಷ್ ಪೂಜಾರಿ, ತೆಂಕು ತಿಟ್ಟುದ ಪುಗರ್ತೆದ ಮಹಿಳಾ ಭಾಗವತೆರಾಯಿನ ಭವ್ಯಶ್ರೀ ಮಂಡೆಕೋಲು, ಕಾವ್ಯಶ್ರೀ ಆಜೇರು, ಬಡಗುತಿಟ್ಟುದ ಉದಯೋನ್ಮುಖ ಭಾಗವತೆರ್ ಇಂಚರ ಪೂಜಾರಿ ಶಿವಪುರ ಮೊಕ್ಲೆಗ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಅಭಿನಂದನ ತಮ್ಮನ ನಡಪರೆ ಉಂಡು ಪಂದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ ಬೊಕ್ಕ ಪದಾಧಿಕಾರಿಲು ಅಂಚೆನೆ ಸಮಿತಿ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಯಕ್ಷಗಾನದೊಟ್ಟಿಗೆ ತುಳು ಕನ್ನಡ ಸಂಸ್ಕೃತಿ ಅಭಿವೃದ್ಧಿದ ನಿಲೆಟ್ಟ್ ಸಾಮಾಜಿಕ, ಧಾರ್ಮಿಕ, ಸಾಂಸ್ಕೃತಿಕ, ಕ್ರೀಡಾ ಲೇಸ್ ಲೆನ ಉದ್ದೇಶದ ಬಗೆಟ್ ಕರಿನ ವರ್ಷ ಉದಿಪನ ಆಯಿನ ಸಮಾನ ಮನಸ್ಕೆರ್ನ ಕೂಟದ ನಮ್ಮೂರ ಆಟ-ಕೂಟ ತನ್ನ ಉದ್ದೇಶದೊಟ್ಟಿಗೆ ಸರಿಯಾಯಿನ ಮಾರ್ಗಡ್ ಬುಲೆವೊಂದು ಉಂಡು. ಈ ಆರೋಗ್ಯವಾಯಿನ ಟ್ರಸ್ಟ್ ನ್ ಪೋಷಕೆರಾದ್ ನಮ ಮಾತ ಪೋಷಣೆ ಮಲ್ಪೊಡು ಪಂದ್ ಇಂಟರ್ನ್ಯಾಷನಲ್ ಬಂಟ್ಸ್ ವೆಲ್ಫೇರ್ದ ಅಧ್ಯಕ್ಷೆರ್ ಬೊಕ್ಕ ಟ್ರಸ್ಟ್ ದ ಸುರುತ ಮಹಾದಾನಿ ಅತ್ತೂರು ಸದಾನಂದ ಶೆಟ್ರ್ ಪಂಡೆರ್.
ಮೇರ್ ಕುಡ್ಲ ಪೆವಿಲಿಯನ್ ಬಲ್ಮಠ ಮುಲ್ಪ ನಡತಿನ ನಮ್ಮೂರ ಆಟ-ಕೂಟ ಟ್ರಸ್ಟ್ ದ ಸರ್ವ ಸದಸ್ಯೆರೆನ ಸಭೆಟ್ ತುಡರ್ ಅರ್ಲಾದ್ ಪಾತೆರಿಯೆರ್.
ನಮ್ಮೂರ ಆಟ ಕೂಟ ಟೀಮ್ ಡ್ ಬೇತೆ ಬೇತೆ ಕ್ಷೇತ್ರದ ಸಾಧಕೆರ್ ಪದಾಧಿಕಾರಿಲಾದ್ ಬೇಲೆ ಮಲ್ತೊಂದು ಉಲ್ಲೆರ್. ಈ ನಿಟ್ಟ್ ಡ್ ಟ್ರಸ್ಟ್ ದ ಲೇಸ್ ಡಿಸೆಂಬರ್ 24ಕ್ ಅಂಬೇಡ್ಕರ್ ಭವನಡ್ ನಡಪರೆ ಇಪ್ಪುನ ನಮ್ಮ ಸಂಭ್ರಮ ಲೇಸ್ ಯಶಸ್ವಿ ಆವಡ್ ಪಂದ್ ಪಂಡೆರ್. ಈ ಪೊರ್ತುಡು ಸದಾನಂದ ಶೆಟ್ರ್, ಮುಲ್ಕಿ ಸುಂದರರಾಮ ಶೆಟ್ಟಿ ಮಾರ್ಗ ನಾಮಕರಣದ ಚರಿತ್ರೆ ದಾಖಲೆ ಬುಡುಗಡೆ ಲೇಸ್ ದ ದಾಖಲೆ ಭಾವಚಿತ್ರದ ಫೋಟೋ ಆಲ್ಬಂ ನ್ ಮುಲ್ಕಿ ಕರುಣಾಕರ ಶೆಟ್ಟಿ ಮೆರೆಗ್ ಕೊರಿಯೆರ್. ಯಕ್ಷಗಾನ ಪ್ರಸಂಗ ಕರ್ತೆರ್ ಜಿ ಕೆ ಸಾಲ್ಯಾನ್, ವೇಣುಗೋಪಾಲ್, ಭಾಸ್ಕರ್ ರೈ ಕುಕ್ಕುವಳ್ಳಿ, ಶಮೀನಾ ಆಳ್ವ, ಸುರೇಶ್ ಚಂದ್ರ ಶೆಟ್ಟಿ, ಗಣೇಶ್ ಮಲ್ಲಿ, ಪ್ರದೀಪ್ ಆಳ್ವ, ಜೇ ವಿ ಶೆಟ್ಟಿ ಮೊಕುಲು ಟ್ರಸ್ಟ್ ದ ಬುಲೆಚ್ಚಿಲ್ ದ ಬಗೆಟ್ ಸಲಹೆ ಮಾರ್ಗದರ್ಶನ ಕೊರ್ದು ಪಾತೆರಿಯೆರ್. ಸಭೆತ ಅಧ್ಯಕ್ಷತೆ ಒಯಿಸೊನ್ನ ಕದ್ರಿ ನವನೀತ ಶೆಟ್ಟಿ ಈ ಪೊರ್ತುಡು ಪಾತೆರ್ದ್, ಟ್ರಸ್ಟ್ ದ ಸ್ಥಾಪಕ ಅಧ್ಯಕ್ಷೆರ್ ಮುಲ್ಕಿ ಕರುಣಾಕರ ಶೆಟ್ಟಿ ಪಾತೆರ್ದ್, ಕರಿನ 36 ವರ್ಷದ ಬ್ಯಾಂಕಿಂಗ್ ಸೇವೆ ಬೇತೆ ಬೇತೆ ರಾಜ್ಯಲೆಡ್ ಸಾಮಾಜಿಕ, ಸಾಂಸ್ಕೃತಿಕ, ಧಾರ್ಮಿಕ ಸೇವಾ ಸಂಘ ಸಂಸ್ಥೆಲೆನ ಪದಾಧಿಕಾರಿಯಾದ್, ಯಶಸ್ವಿ ತುಳು ಸಂಘಟಕೆ ರಾದ್ ಕಜ್ಜ ಮಲ್ತಿನ ಅನುಭವ ಅರೆನ ಈ ಟ್ರಸ್ಟ್ ದ ಬುಲೆಚ್ಚುಲ್ ಗ್ ಕಾರಣ ಆಯೆರೆ ಉಂಡು ಪಂದ್ ಪಂಡೆರ್. ಬೊಕ್ಕ ಯಕ್ಷಗಾನ ಮರಣೋತ್ತರ ಪ್ರಶಸ್ತಿದ ದಿ. ಕಲ್ಲಾಡಿ ವಿಠಲ ಮೆರೆಗ್ ಮುಲ್ಕಿ ಸುಂದರ ರಾಮ ಶೆಟ್ಟಿ ಪ್ರಶಸ್ತಿ, ಬ್ಯಾಂಕ್ ಆಫ್ ಬರೋಡಾ, ಬ್ಯಾಂಕಿಂಗ್ ಕ್ಷೇತ್ರದ ಮಹಾ ಪ್ರಬಂಧಕೆರ್ ಬೊಕ್ಕ ವಲಯ ಮುಖ್ಯಸ್ಥೆರ್ ಗಾಯತ್ರಿ ಆರ್ ಮೆರೆಗ್ ನಮ್ಮೂರ ಆಟ-ಕೂಟ ಪ್ರಶಸ್ತಿ, ಸಹಕಾರ ಕ್ಷೇತ್ರದ ಇಂದ್ರಾಳಿ ಜಯಕರ ಶೆಟ್ರೆಗ್ “ನಮ್ಮ ಸಂಭ್ರಮ’ ಪ್ರಶಸ್ತಿ, ಸಮಾಜ ಸೇವೆಡ್ ರಾಮಣ್ಣ ಶೆಟ್ಟಿ ಬೋಂದೆಲ್ ಮೆರೆಗ್ “ನಮ್ಮೂರ ಪ್ರಶಸ್ತಿ ಮೊಕ್ಲೆನ್ ಈ ಪೊರ್ತುಡು ನಮ್ಮ ಸಂಭ್ರಮ ಲೇಸ್ ಡ್ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆ ನಿರ್ಧಾರ ಮಲ್ತೆರ್. ನಮ್ಮ ಸಂಭ್ರಮಡ್ ತಾಖಮದ್ದಳೆಡ್ ಶ್ರೀ ಸತ್ಯನಾರಾಯಣ ಪೂಜೆ, ಬಾಲ ಯಕ್ಷ ರಂಗ ಪ್ರವೇಶ ಪಂತೊ, ಸಭಾ ಕಾರ್ಯಕ್ರಮ ಬೊಕ್ಕ ಯಕ್ಷಗಾನ ಪ್ರದರ್ಶನ ಲೇಸ್ ದ ರೂಪು ರೇಷೆನ್ ಈ ಸಭೆಟ್ ರಚನೆ ಮಲ್ತೆರ್. ಭಾಗವತೆರ್ ಸತೀಶ್ ಶೆಟ್ಟಿ ಬೋಂದೆಲ್ ಯಕ್ಷಗಾನ ಶೈಲಿಡ್ ಪ್ರಾರ್ತನೆ ಮಲ್ತೆರ್. ರಾಜಗೋಪಾಲ ರೈ ಎದ್ಕೊನಿಯೆರ್, ನಿತೀಶ್ ಶೆಟ್ಟಿ ಎಕ್ಕಾರ್ ಸೊಲ್ಮೆ ಸಂದಾಯೆರ್. ಲೇಸ್ ನ್ ಪಿ.ಎ ಪೂಜಾರಿ ನಿರ್ವಹಣೆ ಮಲ್ತೆರ್.
(ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ)
ಉಳ್ಳಾಲ: ಕರೆಂಟ್ ಕಂಬಗ್ ಮಾರುತಿ 800 ಕಾರ್ ಗುದ್ದುದು, ಕಂಬ ಮಾರ್ಗಗ್ ಬೂರ್ದುಂಡು. ನೆಟ್ ಕಾರ್ ಡ್ರೈವರ್ ಗ್ ಪೆಟ್ಟಾಯಿನ ಘಟನೆ ಉಳ್ಳಾಲ ನಾಟೆಕಲ್ ಕೈತಲ್ ದ ಸಂಕೇಶಡ್ ಬುಧಾರ ರಾತ್ರೆ ನಡತ್ಂಡ್.
ಡ್ರೈವರ್ ಗ್ ದಾಲ ತೊಂದರೆ ಆತಿಜಿ. ಆಂಡ ಕಾರ್ ಗುದ್ದಿನ ರಭಸಗ್ ಕ್ವಿಂಟಾಲ್ ಗಟ್ಟ ಲೇ ತೂಕ ಇಪ್ಪುನ ಕಂಬ ನೆಲಕ್ಕ್ ಬೂರ್ದುಂಡು.
ಈ ಬಗೆಟ್ ಕುಡ್ಲ ದಕ್ಷಿಣ ಸಂಚಾರಿ ಠಾಣೆ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಕೇಸ್ ದಾಖಲ್ ಮಲ್ದೆರ್.
ಹಳೆಯಂಗಡಿ: ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ, ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ), ಹಳೆಯಂಗಡಿ ಬೊಕ್ಕ ಸುವರ್ಣ ಮಹೋತ್ಸವ ಸಮಿತಿದ ಒಟ್ಟು ಸೇರಿಗೆಡ್ ನ. 13 ಬೊಲ್ಪುಗು 11 ಗಂಟೆಗ್ 10 ವರ್ಷ ಮಿತ್ತ್ ದ ಜೋಕುಲೆಗ್ ನಲಿಪು ಭಜನೆ ತರಬೇತಿದ ಉದಿಪನ ಲೇಸ್ ಯುವಕ ಮಂಡಲದ ಚಾವಡಿಡ್ ನಡತ್ಂಡ್.
ಈ ತರಬೇತಿನ್ ಶ್ರೀ ದುರ್ಗಾ ಪರಮೇಶ್ವರಿ ವಿನಾಯಕ ಮಠ ನೆತ್ತ ಮೊಕ್ತೇಸರೆರ್ ಆಯಿನ ದಿವಾಕರ ಆಚಾರ್ಯ ಬೊಳ್ಳೂರು ಮೇರ್ ಉದಿಪನ ಮಲ್ತ್ ದ್ ಪಾತೆರಿಯೆರ್. ದೇವೆರೆನ ಮಿತ್ತ್ ದ ಭಕ್ತಿ ಬೊಕ್ಕ ಅಧ್ಯಾತ್ಮಿಕ ವಿಚಾರಲು ಪ್ರತಿಯೊರಿನ ಬದ್ ಕ್ ಡ್ ಮಹತ್ವದ ಪಾತ್ರ ಒಯಿಸೊಂದುಂಡು. ದೇವೆರೆನ ಕೃಪೆಗ್ ಪಾತ್ರರಾಯೆರೆ ಸುಮಾರ್ ವಿಧಾನಲು ಉಂಡು. ಆಂಡ ಭಜನೆ ಸರಳವಾಯಿನ ಮಾರ್ಗ. ನಲಿಕೆ ಭಜನೆ ಪನ್ಪುನವು ಭಕ್ತಿ ಬೊಕ್ಕ ಅಧ್ಯಾತ್ಮಿಕ ವಿಚಾರದೊಟ್ಟಿಗೆ ಶರೀರಗ್ ಒಂಜಿ ಎಡ್ಡೆ ವ್ಯಾಯಾಮ ಆದುಂಡು ಪಂದ್ ಪಂಡೆರ್. ಭಜನೆ ಕಮ್ಮಟಡ್ ಭಜನೆದ ಸಾಧಕೆರೆನ ಪ್ರಶಸ್ತಿ ಪುರಸ್ಕೃತೆರ್ ಬೊಕ್ಕ ಭಜನೆ ಕಲ್ಪಾವುನಾರ್ ಆಯಿನ ದಿನ್ ರಾಜ್ ಕಳವಾರು ಪಾಲ್ ಪಡೆಯೆರ್. ಸಭಾ ಕಾರ್ಯಕ್ರಮರ್ದ್ ಬೊಕ್ಕ ಜೋಕುಲೆನ ನಲಿಕೆ ಭಜನೆದ ಬೇತೆ ಬೇತೆ ಆಯಾಮಲೆನ್ ತೆರಿಪಾಯೆರ್. ಈ ಪೊರ್ತುಡು ಯುವಕ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್, ಸುವರ್ಣ ಮಹೋತ್ಸವ ಸಮಿತಿಯ ಕಾರ್ಯ ಅಧ್ಯಕ್ಷೆರ್ ಬೊಕ್ಕ ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಧಾಕರ ಆರ್ ಅಮೀನ್, ಸಲಹಾ ಸಮಿತಿದ ಅಧ್ಯಕ್ಷೆರ್ ಮೋಹನ್ ಬಂಗೇರ, ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡಿ ಕೋಸ್ಟಾ, ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಇತ್ತೆರ್.
ಯುವಕ ಮಂಡಲದ ಅಧ್ಯಕ್ಷೆರ್ ಯತೀಶ್ ಕೋಟ್ಯಾನ್ ಬಿನ್ನೆರೆನ್ ಎದ್ಕೊನಿಯೆರ್. ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಲೇಸ್ ದ ನಿರೂಪಣೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್. ಸುಮಾರ್ 44 ಜೋಕುಲು ಈ ಲೇಸ್ ದ ಪ್ರಯೋಜನನ್ ಪಡೆಯೆರ್. ನನ ನ. 27 ರ್ದ್ ಪ್ರತಿ ಐತಾರ ಮಧ್ಯಾಹ್ನ 2.30 ರ್ದ್ 3.30 ಮುಟ್ಟ ನಲಿಕೆ ಭಜನೆ ತರಬೇತಿ ನಡಪುಂಡು. ಅವ್ವತ್ತಂದೆ ಈ ಪೊರ್ತುಡು ಜವನೆರ್ ಬೊಕ್ಕ ಮಹಿಳಾ ಮಂಡಲದ ಸುಮಾರ್ ಸದಸ್ಯೆರ್, ಜೋಕುಲೆನ ಪೋಷಕೆರ್ ಇತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರಿಯೆರ್.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಗ್ರಾಹಕೆರೆಗ್ ಶಾಕಿಂಗ್ ಸುದ್ದಿ ಕೊರ್ತುಂಡು. ಈ ಬ್ಯಾಂಕ್ ತನ್ನ ಮತ ಟೆನ್ಯೂರ್ ಲೋನ್ ಲೆನ MCLR ನ್ 15 ಬೇಸಿಸ್ ಪಾಯಿಂಟ್ ದಾತ್ ಹೆಚ್ಚ ಮಲ್ದ್ಂಡ್.
ನೇರ್ದಾವೆರ ಇಲ್ಲ್, ಗಾಡಿ ಬೊಕ್ಕ ಪರ್ಸನಲ್ ಲೋನ್ ದ ಬಡ್ಡಿ ದರ ಶೇ. 7.95 ರ್ದ್ ಶೇ.8.05 ಗ್ ಏರಿಕೆ ಆತ್ಂಡ್. ಪೊಸ ಬಡ್ಡಿ ರೇಟ್ ಕೋಡೆರ್ದೇ ಸುರು ಆತ್ಂಡ್. RBI ಸುಮಾರ್ ಸರ್ತಿ ರೆಪೋ ದರ ಹೆಚ್ಚ ಮಲ್ತಿನ ಕಾರಣ ಬ್ಯಾಂಕುಲು ಕೂಡ ಸಾಲದ ಮಿತ್ತ್ ದ ಬಡ್ಡಿದರನ್ ಹೆಚ್ಚ ಮಲ್ಪುಂಡು.
ಬೆದ್ರ: ಯುವವಾಹಿನಿ ಬೆದ್ರ ಘಟಕದ 2022-23 ನೇ ಸಾಲ್ ದ ಪೊಸ ಅಧ್ಯಕ್ಷೆರಾದ್ ಸುಶಾಂತ್ ಕರ್ಕೇರ ಆಯ್ಕೆ ಆತೆರ್.
ಕಾರ್ಯದರ್ಶಿಯಾದ್ ವಿಜೇಶ್, ಶಂಕರ್. ಎ. ಕೋಟ್ಯಾನ್, ಶರ್ಮಿತ್ ಕೋಟ್ಯಾನ್ ಉಪಾಧ್ಯಕ್ಷೆರಾದ್, ಪ್ರಭಾಕರ್ ಚಾಮುಂಡಿಬೆಟ್ಟ ಕೋಶಧಿಕಾರಿಯಾದ್ ಆಯ್ಕೆ ಆತೆರ್. ಬೇತೆ ಬೇತೆ ವಿಭಾಗದ ನಿರ್ದೇಶಕೆರಾದ್ ಶಿವರಾಜ್ ಕಡಂದಲೆ, ಲೋಲಾಕ್ಷಿ, ಸೌಮ್ಯ ಕೋಟ್ಯಾನ್, ಅಕ್ಷತಾ ಪೂಜಾರಿ, ರಂಜಿತ್ ಕೋಟ್ಯಾನ್, ಮಹೇಶ್ ಕರ್ಕೇರ, ವಸಂತ್ ಪೂಜಾರಿ, ಸಂಪತ್. ಎಸ್. ಬಂಗೇರ, ಹರೀಶ್ಚಂದ್ರ. ಕೆ. ಸಿ., ಪಾವನ ಸಂತೋಷ್, ಶೋಭಾ ದಿನೇಶ್ ಬೊಕ್ಕ ಬೇತೆ ಬೇತೆ ವಿಭಾಗದ ಸಂಘಟನಾ ಕಾರ್ಯದರ್ಶಿಯಾದ್ ಪ್ರಶಾಂತ್ ಕರ್ಕೇರ, ಆದರ್ಶ್ ಸುವರ್ಣ, ಲೋಕೇಶ್ ಪಣಪಿಲ, ಹಿಂದೂ ಚೇತನ್, ರಾಜೇಶ್ ಕಡಂದಲೆ, ಸಾಯಿ ರಾಜ್ ಕೋಟ್ಯಾನ್, ಗಿರೀಶ್ ಕೋಟ್ಯಾನ್, ದೇವರಾಜ್, ಅಶ್ವಿನಿ ಪೂಜಾರಿ, ಅವಿನಾಶ್ ಎ. ಸುವರ್ಣ, ಹರೀಶ್ ಕೆ, ಪ್ರಸಾದ್ ಪೂಜಾರಿ, ಚಂದ್ರವತಿ ಸುವರ್ಣ, ನವೀನ್, ಪ್ರದೀಪ್, ಪ್ರಶಾಂತ್ ಪೂಜಾರಿ ಬೊಕ್ಕ ಗೌರವ ಸಲಹೆಗಾರೆರಾದ್ ಉಮಾನಾಥ್ ಎ ಕೋಟ್ಯಾನ್, ನಾರಾಯಣ್, ಪಿ. ಎಮ್, ಭಾನುಮತಿ ಸೀನಪ್ಪ, ಸುರೇಶ್. ಕೆ. ಪೂಜಾರಿ, ರಾಘು. ಸಿ. ಪೂಜಾರಿ ಗುಮಡಬೆಟ್ಟು, ಸುರೇಶ್ ಕೋಟ್ಯಾನ್, ಸುರೇಶ್ ಎಮ್, ಕಾಯಂ ಆಹ್ವಾನಿತರಾದ್ ಯೋಗೀಶ್ ಕೈರೋಳಿ, ಪದ್ಮನಾಭ ಸಾಲಿಯಾನ್, ಹರೀಶ್ ಕಾಫೀಕಾಡ್, ಯೋಗಿತಾ ನವನಂದ, ಜೀವಿತ ಶಂಕರ್, ಮಾಲತಿ ಗೋಪಿನಾತ್, ವಾಸು ಪೂಜಾರಿ, ಶೋಭಾ ಸುರೇಶ್, ಜಯಶೀಲಾ ಆಯ್ಕೆ ಆತೆರ್ ಪಂದ್ ಪ್ರಕಟಣೆಡ್ ತೆರಿಪಾದೆರ್.
ವರದಿ: ಜಗದೀಶ್ ಪೂಜಾರಿ
ಬೆದ್ರ
ಕಡಂದಲೆ ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವೆರೆನ ಸನ್ನಿಧಿಡ್ ವರ್ಷಂಪ್ರತಿ ನಡಪುನ ಚಂಪಾ ಷಷ್ಠಿ ಉಚ್ಚಯ ನ.29 ಅಂಗಾರೆ ಎಡಪದವು ವೆಂಕಟೇಶ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಶ್ರೀ ಭಗವತನ ಅನುಗ್ರಹರ್ದ್ ನ.28 ಸೋಮಾರ ಸ್ಕಂದ ಪಂಚಮಿರ್ದ್ ಸುರು ಆದ್, ಡಿ.3 ಶನಿಯಾರ ಮುಗಿವುಂಡು. ಈ ವರ್ಷಾವಧಿ ಉಚ್ಚಯಗ್ ಬತ್ತ್ ದ್, ಶ್ರೀ ದೇವೆರೆನ ಸಿರಿ-ಮುಡಿ-ಗಂಧ ಪ್ರಸಾದನ್ ದೆತೊಂದು, ಶ್ರೀ ಸುಬ್ರಹ್ಮಣ್ಯ ಸ್ವಾಮಿನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಅರ್ಚಕೆರ್ ಕೆ. ವಾಸುದೇವ ಭಟ್, ಬೆದ್ರದ ತಹಶೀಲ್ದಾರ್ ಬೊಕ್ಕ ಆಡಳಿತಾಧಿಕಾರಿ ಸಚ್ಚಿದಾನಂದ ಸತ್ಯಪ್ಪ ಕುಚನೂರು ಬೊಕ್ಕ ಕಡಂದಲೆ ಬೊಕ್ಕ ಪಾಲಡ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ವರದಿ:ಜಗದೀಶ್ ಪೂಜಾರಿ ಬೆದ್ರ
