ಬೆದ್ರ: ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಯುವವಾಹಿನಿ(ರಿ )ಬೆದ್ರ ಘಟಕದ ಪೊಸ ಅಧ್ಯಕ್ಷೆರ್ ಸುಶಾಂತ್ ಕರ್ಕೇರ ಬೊಕ್ಕ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ನ.20 ಕ್ ಬ್ರಹ್ಮ ಶ್ರೀ ಗುರು ನಾರಾಯಣ ಸ್ವಾಮಿ ಸೇವಾ ಸಂಘದ ಕಾಮದೇನು ಸಭಾಭವನಡ್ ನಡತ್ಂಡ್.
ಈ ಲೇಸ್ ನ್ ಉದಿಪನ ಮಲ್ತಿನ ಶಾಸಕೆರ್ ಉಮಾನಾಥ ಎ ಕೋಟ್ಯಾನ್ ಪೊಸ ಪದಾಧಿಕಾರಿಲೆಗ್ ಎಡ್ಡೆಪ್ಪು ಬಯಕಿಯೆರ್. ಎಸ್ ಎಸ್ ಎಲ್ ಸಿ ಡ್ ಶೇಕಡಾ 90ರ್ದ್ ಹೆಚ್ಚ ಮಾರ್ಕ್ ದೆತ್ತ್ ದಿನ 41 ವಿದ್ಯಾರ್ಥಿಲೆಗ್ ಯುವ ಸಿರಿ ಪ್ರಶಸ್ತಿ-ಪಿಯುಸಿಡ್ ಕಲಾ, ವಾಣಿಜ್ಯ ಬೊಕ್ಕ ವಿಜ್ಞಾನ ವಿಭಾಗಡ್ ಹೆಚ್ಚ ಮಾರ್ಕ್ ದೆತ್ತ್ ದಿನ ಮೂಜಿ ಜನ ವಿದ್ಯಾರ್ಥಿಲೆಗ್ ಯುವ ಚೈತನ್ಯ ಪ್ರಶಸ್ತಿ ಬೆದ್ರ ಯುವವಾಹಿನಿದ ಮಹತ್ವಕಾಂಕ್ಷಿ ಯೋಜನೆಯಾಯಿನ ಯುವ ಸ್ಪಂದನ ಸೇವಾ ಯೋಜನೆಯಡಿಟ್ 20 ಜನ ಅರ್ಹ ಪ್ರತಿಭಾನ್ವಿತಾ ವಿದ್ಯಾರ್ಥಿಲೆಗ್ ವಿದ್ಯಾರ್ಥಿ ವೇತನ ಕೊರಿಯೆರ್. ನಿರ್ಗಮನ ಅಧ್ಯಕ್ಷೆರ್ ನವಾನಂದ ಪದಗ್ರಹಣ ಕೇಸ್ ದ ಅಧ್ಯಕ್ಷತೆನ್ ಒಯಿಸೊಂದೆರ್. ಯುವವಾಹಿನಿ (ರಿ )ಕೇಂದ್ರ ಸಮಿತಿ ಅಧ್ಯಕ್ಷೆರ್ ಉದಯ ಅಮೀನ್ ಪೊಸ ಪದಾಧಿಕಾರಿಲೆಗ್ ಪ್ರತಿಜ್ಞಾ ವಿಧಿ ಬೋಧನೆ ಮಲ್ತ್ ದ್ ಪಾತೆರಿಯೆರ್.
ಪೊಸ ಅಧ್ಯಕ್ಷೆರ್ ಸುಶಾಂತ್ ಕರ್ಕೇರ ಮಾರೂರು ಪಾತೆರ್ದ್,ತನ್ನ ಅಧ್ಯಕ್ಷತೆದ ಕಾಲಡ್ ಅಟ್ಟಣೆ ಮಲ್ತಿನ ಯೋಜನೆದ ಬಗೆಟ್ ವಿವರಲೆನ್ ಕೊರ್ದು, ಸರ್ವೆರೆನ ಸಹಕಾರ ಕೇಂಡೆರ್. ಕುದುರೆಮುಖ ವನ್ಯಜೀವಿ ವಿಭಾಗದ ಸಹಾಯಕೆರ್ ಅರಣ್ಯ ಸಂರಕ್ಷಣಾಧಿಕಾರಿ ಪ್ರಕಾಶ್ ಪೂಜಾರಿ, ಬ್ರಹ್ಮ ಶ್ರೀ ಗುರುನಾರಾಯಣ ಸ್ವಾಮಿ ಸೇವಾ ಸಂಘದ ಅಧ್ಯಕ್ಷೆರ್ ಸುರೇಶ್ ಕೆ. ಪೂಜಾರಿ, ಪ್ರಥ್ವಿ ಅಸೋಶಿಯಟ್ಸ್ ದ ಸಿವಿಲ್ ಇಂಜಿನಿಯರ್ ವೀರೇಂದ್ರ ಕುಮಾರ್, ಯುವ ವಾಹಿನಿ(ರಿ) ಕೇಂದ್ರೀಯ ಸಮಿತಿ ಸಂಘಟನಾ ಕಾರ್ಯದರ್ಶಿ ಹರಿಪ್ರಸಾದ್. ಪಿ. ಮೊಕುಲು ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್, ಪೊಸ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲೆನ್ ಎಡ್ಡೆಪ್ಪು ಬಯಕಿಯೆರ್. ಇಂಚಿಪ್ಪ ತೀರ್ ಪೋಯಿನ ಧಾರ್ಮಿಕ ಗುರು ದಿ. ರಮೇಶ್ ಶಾಂತಿ ಅರೆಗ್ ನುಡಿ ನಮನ ಅರ್ಪಣೆ ಮಲ್ತಿನ ಡಾ.ಯೋಗೀಶ್ ಕೈರೋಡಿ ಮೇರ್ ಯುವ ವಾಹಿನಿ ಬೊಕ್ಕ ರಮೇಶ್ ಶಾಂತಿ ಮೆರೆನ ನಡುಟ್ ಇತ್ತಿನ ಒಡನಾಟನ್ ನೆಂಪು ಮಲ್ತೆರ್. ರಶ್ಮಿ ರಾಜೇಶ್ ಪ್ರಾರ್ತನೆ ಮಲ್ತೆರ್, ನವಾನಂದ ಎದ್ಕೊನಿಯೆರ್. ಹರಿಪ್ರಸಾದ್. ಪಿ. ಪೊಸ ಪದಾಧಿಕಾರಿಲೆನ ಸಭೆಕ್ ಪರಿಚಯ ಮಲ್ತೆರ್. ನಿರ್ಗಮನ ಕಾರ್ಯದರ್ಶಿ ರಮೇಶ್ ಅಮೀನ್, ವಾರ್ಷಿಕ ವರದಿ ಓದಿಯೆರ್.
ಯುವಚೈತನ್ಯ ಪ್ರತಿಭಾ ಪುರಸ್ಕಾರ ಲೇಸ್ ಡ್ ಎಸ್. ಎಸ್. ಎಲ್. ಸಿ ಪರೀಕ್ಷೆಡ್ 98.8% ಮಾರ್ಕ್ ದೈದಿನ ಕು|ಪ್ರೇರಿತ, ಪಿ. ಯು. ಸಿ ವಾಣಿಜ್ಯ ವಿಭಾಗದ ರೇಷ್ಮಾ.ಎಸ್. ಪೂಜಾರಿ, ಕಲಾ ವಿಭಾಗ ಕು.ಮಾನಸ ಮೊಕಲೆಗ್ ಪ್ರಶಸ್ತಿ ಕೊರ್ದು ಗೌರವ ಮಲ್ತೆರ್. ಕಿಶೋರ್ ಕುಮಾರ್ ಈ ಲೇಸ್ ನ್ ನಡಪಾದ್ ಕೊರಿಯೆರ್. ಯುವ ಸಿರಿ ಪ್ರಶಸ್ತಿ ಕೊರ್ಪುನ ಲೇಸ್ ಶುಭಾಕರ್ ಅಂಚನ್ ನಡಪಾದ್ ಕೊರಿಯೆರ್. ಯುವ ಸ್ಪಂದನ ವಿದ್ಯಾರ್ಥಿ ವೇತನ ಲೇಸ್ ನ್ ಯೋಗಿತಾ ಶಿವಾನಂದ್ ಬೊಕ್ಕ ಮೇಘರಾಣಿ ನಡಪಾಯೆರ್. ಯುವ ಸ್ಪಂದನ ಸಮಿತಿದ ಸಂತೋಷ್ ಪನಪಿಲ ಯೋಜನೆದ ಲೆಕ್ಕ ಪತ್ರ ಮಂಡನೆ ಮಲ್ತೆರ್. ಯುವ ಸ್ಪಂದನಾ ಯೋಜನೆದ ಬಗೆಟ್ ಸುರಕ್ಷಿತ್ ಪಾತೆರಿಯೆರ್. ಈ ಪೊರ್ತುಡು ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು ಮೆರೆನ್ ತಮ್ಮನ ಮಲ್ತೆರ್. ಪ್ರಭಾಕರ್ ಬೊಕ್ಕ ಸಂದೀಪ್ ಈ ತಮ್ಮನ ಲೇಸ್ ನ್ ನಡಪಾದ್ ಕೊರಿಯೆರ್. ಡಿಪ್ಲೊಮಾ ಇನ್ ಮೇಕೆಟ್ರಾನಿಕ್ಸ್ ವಿಭಾಗಡ್ ರಾಜ್ಯಗ್ ಸುರುತ ಸ್ಥಾನ ಪಡೆಯಿನ ವಂದಿತ್.ಆರ್. ಸುವರ್ಣ ಮೆರೆಗ್ ತಮ್ಮನ ಮಲ್ತೆರ್. ಅಂಚನೆ ಬೇತೆ ಬೇತೆ ಸಮಾಜದ ಪ್ರತಿಭಾವಂತ ವಿದ್ಯಾರ್ಥಿಲಾಯಿನ ರಕ್ಷಾ, ಸಪ್ನ, ಬೊಕ್ಕ ಸೋನಲ್ ಮೊಕ್ಲೆಗ್ ಸಭೆಟ್ ಪುರಸ್ಕಾರ ಮಲ್ತೆರ್. ಮೊಕ್ಲೆನ ಸಾಧನೆನ್ ಡಾ|ಯೋಗೀಶ್ ಕೈರೋಡಿ ಸಭೆಗ್ ತೆರಿಪಾಯೆರ್. ಸೌಮ್ಯ ಕೋಟ್ಯಾನ್ ಬೊಕ್ಕ ಸಂಪತ್ ಎಸ್. ಬಂಗೇರ ನಿರೂಪಣೆ ಮಲ್ತೆರ್. ಲೇಸ್ ಡ್ ಪೊಸ ಕಾರ್ಯದರ್ಶಿ ವಿದೇಶ್ ಸೊಲ್ಮೆ ಸಂದಾಯೆರ್.
ವರದಿ: ಜಗದೀಶ್ ಪೂಜಾರಿ
ಬೆದ್ರ
