Times of kudla

ಡಿ.16-23 : ತಿಬಾರ ಕೊಡಮಂದಾಯನ ವಾರ್ಷಿಕ ಉಚ್ಚಯ “ತಿಬಾರಾಯನ’

ಸುರತ್ಕಲ್ : ಶ್ರೀ ಕೊಡಮಣಿತ್ತಾಯ ಕ್ಷೇತ್ರ (ತಿಬಾರ್) ಶಿಬರೂರು ವಾರ್ಷಿಕ ಉಚ್ಚಯ, ತಿಬರಾಯನ ಲೇಸ್ ಡಿ.16 ‌ರ್ದ್ ಡಿ.23 ಮುಟ್ಟ ನಡಪರೆ ಉಂಡು.

ಡಿ.16 ಕ್ ನವಕ ಪ್ರಧಾನ ಕಲಶಾಭಿಷೇಕ, ಮಹಾಪೂಜೆ, ಕೊಡಿ ಏರುನು, ಡಿ. 17 ಕ್ ತುಲಾಭಾರ ಸೇವೆ, ಶ್ರೀ ಉಳ್ಳಾಯ ದೈವದ ನೇಮ, ಮಡಸ್ತಾನ ಸೇವೆ, ಕಂಚಿಲ್ದ್ ಸೇವೆ, ಬೊಕ್ಕ ಅನ್ನಸಂತರ್ಪಣೆ, ಬೊಕ್ಕ ಶ್ರೀ ಕೊಡಮಣಿತ್ತಾಯ ದೈವದ ನೇಮೋತ್ಸವ, ರಥೋತ್ಸವ ನಡಪುಂಡು.
ಡಿ. 18 ಕ್ ಶ್ರೀ ಕಾಂತೇರಿ ಜುಮಾದಿ ದೈವದ ನೇಮೋತ್ಸವ, ಡಿ. 19 ಕ್ ಶ್ರೀ ಸರಳ ಜುಮಾದಿ ದೈವದ ನೇಮೋತ್ಸವ, ಡಿ. 20 ಕ್ ಶ್ರೀ ಜಾರಂದಾಯ ದೈವದ ನೇಮೋತ್ಸವ, ಬೊಕ್ಕ ಡಿ. 21 ಕ್ ಶ್ರೀ ಕೈಯ್ಯೂರು ಜುಮಾದಿ ದೈವದ ನೇಮೋತ್ಸವ, ಡಿ. 22ಕ್ ಶ್ರೀ ಪಿಲಿಚಾಮುಂಡಿ ದೈವದ ನೇಮೋತ್ಸವ, ಬೊಕ್ಕ ಡಿ. 23 ಕ್ ತುಲಾಭಾರ ಸೇವೆ, ಧ್ವಜಾರೋಹಣ ಬೊಕ್ಕ ಅನ್ನಸಂತರ್ಪಣೆ ನಡಪುಂಡು. ಈ ಲೇಸ್ ಮಾತೆರ್ಲ ಪಾಲ್ ಪಡೆದ್, ಶ್ರೀ ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ತಿಬಾರ ಗುತ್ತಿನಾರ್ ಉಮೇಶ್ ಎನ್. ಶೆಟ್ಟಿ, ಶಿಬರೂರುಗುತ್ತು ಕಿಟ್ಟಣ್ಣ ಆರ್. ಶೆಟ್ಟಿ, ದೈವೋಲ್ಯಗ್ ಸಂಬಂಧಪಟ್ಟಿನ ಗುತ್ತು ಇಲ್ಲದಕುಲು, ಸಮಸ್ತ ವಿಲಯದಾರೆರ್ ಬೊಕ್ಕ ದೇಲಂತಬೆಟ್ಟು ಗ್ರಾಮದ ಪತ್ತ್ ಸಮಸ್ತೆರ್ ಬೊಕ್ಕ ಎಸ್. ವಾಸುದೇವ ಶಿಬರಾಯ, ಪುರಂದರ ಎಂ.ಶೆಟ್ಟಿ, ಮೊಕ್ತೇಸೆರ್ ಬೊಕ್ಕ ಆಡಳಿತ ಮಂಡಳಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಿಲ್ಲವಾಸ್ ದುಬೈ ಕೂಟದ ವತಿರ್ದ್ ಶ್ರೀ ಗೆಜ್ಜೆಗಿರಿ ಮೇಳದ ಲೆಪ್ಪೋಲೆ ಬುಡುಗಡೆ

ಶ್ರೀ ದೇಯಿ ಬೈದೆತಿ ಕೋಟಿ-ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿಡ್ ನ. 27 ಐತಾರದಾನಿ ನಡಪುನ ಶ್ರೀ ಗೆಜ್ಜೆಗಿರಿ ಮೇಳದ ಉದಿಪನ ಬೊಕ್ಕ ಸುರುತ ದೇವೆರೆನ ಸೇವೆದ ಆಟದ ಲೆಪ್ಪೋಲೆ ಬುಡುಗಡೆ ಲೇಸ್ ಬೊಕ್ಕ ಸಮಾಲೋಚನಾ ಸಭೆ ದುಬೈಡ್ ನಡತ್ಂಡ್.

ಶ್ರೀ ಗೆಜ್ಜೆಗಿರಿ ಯಕ್ಷಗಾನ ಮಂಡಳಿದ ಗೌರವ ಸಲಹೆಗಾರೆರ್, ಹಿರಿಯ ಯಕ್ಷಗಾನ ಕಲಾವಿದೆರ್, ಕಲಾ ಪೋಷಕೆರ್, ಬಿಲ್ಲವಾಸ್ ದುಬೈ ಕೂಟದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ ಕರ್ನಿರೆ ಮೇರ್ ಲೆಪ್ಪೋಲೆನ್ ಬಿಲ್ಲವಾಸ್ ದುಬೈ ಕೂಟದ ಮಾಜಿ ಅಧ್ಯಕ್ಷೆರೆಗ್ ಬೊಕ್ಕ ಕಮಿಟಿದ ಸದಸ್ಯರೆಗ್ ಕೊರಿಯೆರ್. ಶ್ರೀ ಗೆಜ್ಜೆಗಿರಿ ಮೇಳದ ಲೆಪ್ಪೋಲೆನ್ ಬಿಲ್ಲವಾಸ್ ದುಬೈ ಕೂಟದ ನಿಕಟ ಪೂರ್ವ ಅಧ್ಯಕ್ಷೆರ್ ಸತೀಶ್ ಪೂಜಾರಿ ಬೆಳಪು ಬುಡುಗಡೆ ಮಲ್ತೆರ್. ಬೊಕ್ಕ ಪಾತೆರ್ದ್, ಅಪ್ಪೆನ ಗೆಜ್ಜೆ ಸೇವೆಗ್ ಸಹಕಾರ ಮಲ್ತಿನಿ ಅತ್ತಂದೆ ಬಿಲ್ಲವಾಸ್ ದುಬೈ ಕೂಟದ ಕಮಿಟಿ ಸದಸ್ಯೆರ್, ಸಮಾಜ ಬಾಂಧವೆರೆನ್ ಸಹಕಾರ ಮಲ್ಪುಲೆಕ್ಕ ಪ್ರೇರೇಪಣೆ ಮಲ್ತೆರ್. ಶ್ರೀ ಗೆಜ್ಜೆಗಿರಿ ಪೊಸ ಮೇಳಗ್ ಬೋಡಾಯಿನ ರಂಗಸ್ಥಳ, ವೇಷ ಭೂಷಣ, ಚಕ್ರತಾಳ ಹಿಮ್ಮೇಳ, ಲೈಟಿಂಗ್ ಸೆಟ್ಟ್, ದೇವೆರೆನ ಪೀಠ, ಚೌಕಿದ ಸಂಪೂರ್ಣ ಸಾಮಗ್ರಿ ಸಂಪೂರ್ಣ ವೆಚ್ಚ ಬಿಲ್ಲವಾಸ್ ದುಬೈ ಕೂಟದ ವತಿರ್ದ್ ಸೇವಾ ರೂಪಡ್ ಶ್ರೀ ಗೆಜ್ಜೆಗಿರಿ ಮೇಳಗ್ ಸಮರ್ಪಣೆ ಮಲ್ಪರೆ ಉಲ್ಲೆರ್. ಈ ಪೊರ್ತುಡು ಬಿಲ್ಲವಾಸ್ ದುಬೈ ಕೂಟದ ಕಮಿಟಿದ ಸದಸ್ಯೆರ್, ಸಮಾಜ ಬಾಂಧವೆರ್ ಇತ್ತೆರ್.

Billavas Association Dubai- Release the invite for Sri Gejjegiri Mela

Sri Kshetra Gejjegiri the ‘ Moolastana’ of Sri Dayee Baidethi Kori Channaya will have a program on Sunday the 27th of November for the inauguration of Gejjegiri Mela and the first Yakshagana play for the season which will be played as devotion to to the divine.An invite for the same was relesed and a meeting to discuss the details was organised in Dubai.

The honorary adviser to Sri Gejjegiri Yakshagana Mandala, senior Yakshagana artiste and a patron of arts , president of Billavas Association Dubai-Prabhakar Suvarna Karnire did the honours and handed over the invitation to members of the committee and former office bearers.Speaking on the occasion former president of the association Sri Satish Poojary requested for the cooperation of all members and community members.He announced that all materials required for Yakshagana performance and other associated paraphernalia will be contributed by Billava Sangha Dubai to the Gejjegiri Mela. Members of the association and community members were present on the occasion.

ಕಾಸ್ರೋಡು ಜಿಲ್ಲೆಡ್ ಗೆಜ್ಜೆಗಿರಿ ಯಕ್ಷಗಾನ ಮೇಳದ ಲೆಪ್ಪೋಲೆ ಬುಡುಗಡೆ

ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ ನ. 27 ಕ್ ನಡಪುನ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿ ಬೈದೆತಿ ಯಕ್ಷಗಾನ ಮಂಡಳಿದ ಉದಿಪನ ಬೊಕ್ಕ ಸುರುತ ಗೆಜ್ಜೆ ಸೇವೆ ಲೆಪ್ಪೋಲೆ ಬುಡುಗಡೆ ಕಾಸ್ರೋಡು ಜಿಲ್ಲೆಡ್ ನಡತ್ಂಡ್.

ಕುದ್ರೋಳಿ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್ ಕಾಸ್ರೋಡು ಜಿಲ್ಲೆಡ್ ಡಿಸೆಂಬರ್ 31 ಕ್ ನಡಪುನ ಸುರುತ ಪ್ರದರ್ಶನದ ಮುತಾಲಿಕೆ ಒಹಿಸೊನ್ನ ಕಾಸ್ರೋಡು ಜಿಲ್ಲೆದ ಅಖಿಲ ಕರ್ನಾಟಕ ಜನಜಾಗೃತಿ ವೇದಿಕೆದ ಅಧ್ಯಕ್ಷೆರ್ ಅಶ್ವಥ್ ಪೂಜಾರಿ ಲಾಲ್ ಬಾಗ್ ಮೆರೆಗ್ ಕೊರ್ಪುನ ಮುಖೇನ ಬುಡುಗಡೆ ಮಲ್ತೆರ್. ಈ ಪೊರ್ತುಡು ಜಿಲ್ಲಾ ಬಿಲ್ಲವ ಸಂಘಟನೆಲೆನ ಒಕ್ಕೂಟದ ಕೇರಳ ಅಧ್ಯಕ್ಷೆರಾಯಿನ ಕೃಷ್ಣಪ್ಪ ಪೂಜಾರಿ ದೇರಂಬಳ, ರಾಮಚಂದ್ರ ಪೂಜಾರಿ ಸುಣ್ಣಾರಬೀಡು, ವಿ. ಕೃಷ್ಣಪ್ಪ ಪೂಜಾರಿ ಕಲ್ಲಡ್ಕ, ಮೀನಾಕ್ಷಿ ಸಿ‌.ಕೆ ಚಿಪ್ಪಾರ್, ರವೀಂದ್ರ ಪೂಜಾರಿ, ಜಗದೀಶ್ ಪೂಜಾರಿ, ನಾರಾಯಣ ಪೂಜಾರಿ ಬೆಜ್ಜ, ನಾರಾಯಣ ಪೂಜಾರಿ ಅರಿಯಾಲ, ಚಂದ್ರಹಾಸ ಕಡಂಬಾರ್, ರಾಮಕೃಷ್ಣ ಸಂತಡ್ಕ, ಅಶ್ವಿನ್ ಕಲ್ಲಗದ್ದೆ ಇತ್ತೆರ್.

ಆನೆ ದೊಂಕುದು ತೀರ್ ಪೋಯಿನ ಪೊಂಜೋವುನು ತೂಯೆರೆ ತಡಾದ್ ಬತ್ತಿನ ಮೂಡಿಗೆರೆ ಶಾಸಕೆರೆಗ್ ಪೆಟ್ಟ್ ಪಾಡಿನ ಗ್ರಾಮಸ್ಥೆರ್

ಚಿಕ್ಕಮಗಳೂರು: ಮೂಡಿಗೆರೆ ತಾಲೂಕ್ ಕುಂದೂರು ಕೈತಲ್ ದ ಹುಲ್ಲೆಮನೆ ಗ್ರಾಮದ ಶೋಭಾ (45) ಕಾಡಾನೆ ದೊಂಕುದು ಐತಾರ ಬೊಲ್ಪುಗು ತೀರ್ ಪೋಯೆರ್. ಮೇರೆನ ಪುನನ್ ತೂಯೆರೆ ತಡ ಮಲ್ತ್ ದ್ ಬತ್ತಿನ ಶಾಸಕೆರ್ ಎಂ.ಪಿ.ಕುಮಾರಸ್ವಾಮಿನ್ ಗ್ರಾಮಸ್ಥೆರ್ ಬೆರಿಪತ್ತ್ ದ್ ಪೆಟ್ಟ್ ಹಾಕ್ ದಿನ ಅತ್ತಂದೆ, ಅರೆನ ಅಂಗಿ ಪರ್ತ್ ಪಾಡಿನ ಘಟನೆ ಐತಾರ ಬಯ್ಯಗ್ ನಡತ್ಂಡ್.

ಈ ಘಟನೆದ ವಿಡಿಯೋನ್ ಶಾಸಕೆರ್ ಎಂ.ಪಿ.ಕುಮಾರಸ್ವಾಮಿ ಮೇರ್ ಷೇರ್ ಮಲ್ದೆರ್. ಅವ್ವತ್ತಂದೆ ಈ ಪೆಟ್ಟ್ ದ ಪೊರ್ತುಡು ಸರ್ಕಾರದ ಪೊಲೀಸ್ ಇಲಾಖೆ ಎಂಕ್ ರಕ್ಷಣೆ ಕೊರ್ತುಜಿ ಪಂದ್ ದೂರುದೆರ್.

ಧರ್ಮಸ್ಥಳ ಲಕ್ಷ ದೀಪ ಉಚ್ಚಯದ ನಿಲೆಟ್ಟ್ ಉಜಿರೆರ್ದ್ ಪಾದಯಾತ್ರೆ

ಉಜಿರೆ: ಸತ್ಯ, ಧರ್ಮ, ನ್ಯಾಯ ಬೊಕ್ಕ ನೀತಿದ ನಿಲೆಟ್ ಬೇಧ ಭಾವ ದಾಂತೆ ಮಾತೆರ್ಲ ಒಂಜೇ ಮನಸ್ ಡ್ ಮೆಗ್ಯೆ ಪಲಯಲೆಕ್ಕ ಸಹಬಾಳ್ವೆದ ನಿಲೆಟ್ ಧರ್ಮಸ್ಥಳದ ಮಾತ ಸೇವಾ ಕಾರ್ಯ ನಡತೊಂದುಂಡು. ಅನ್ನದಾನ, ವಿದ್ಯಾದಾನ, ಔಷಧಿದಾನ ಬೊಕ್ಕ ಅಭಯದಾನ ಬೊಕ್ಕ ಮಾತ ಸೇವಾ ಕಾರ್ಯಲೆನ್ ಮಲ್ಪುನಗ ಜಾತಿ-ಮತ-ಬೇಧ ಇಜ್ಜಂದೆ ಮಾತ ಭಕ್ತರೆನ್ ಸಮಾನವಾದ್ ಗೌರವ ಕೊರೊಂದುಲ್ಲ ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಪಂಡೆರ್.

ಆರ್ ಲಕ್ಷ ದೀಪ ಉಚ್ಚಯದ ಸುರುತ ದಿನವಾಯಿನ ಶನಿಯಾರ ಉಜಿರೆರ್ದ್ ಧರ್ಮಸ್ಥಳಗ್ 25 ಸಾರರ್ದ್ ಹೆಚ್ಚ ಭಕ್ತೆರ್ ಬೊಕ್ಕ ಸಾರ್ವಜನಿಕೆರ್ ಶಿವ ಪಂಚಾಕ್ಷರಿ ಪಠಣ ಬೊಕ್ಕ ಭಜನೆ ಮಲ್ತೊಂದು ಪಾದಯಾತ್ರೆಡ್ ಬತ್ತಿನ ನಿಲೆಟ್ಟ್ ಅಮೃತವರ್ಷಿಣಿ ಸಭಾಭವನಡ್ ಅಟ್ಟಣೆ ಮಲ್ದಿನ ಅಭಿನಂದನ ಲೇಸ್ ಡ್ ಪಾತೆರಿಯೆರ್.
ಈ ಪೊರ್ತುಡು ಊರುದ ನಾಗರಿಕೆರ್ ಬೊಕ್ಕ ಪಾದಯಾತ್ರಿಲೆನ ಪರವಾದ್ ವೀರೇಂದ್ರ ಹೆಗ್ಗಡೆ ದಂಪತಿಲೆನ್ ಮಾನಾದಿಗೆ ಮಲ್ತೆರ್. ಪ್ರಧಾನಮಂತ್ರಿಲೇ ಎನನ್ ರಾಜ್ಯಸಭೆ ಸದಸ್ಯೆರಾದ್ ನಾಮನಿರ್ದೇಶನ ಮಲ್ಪುನಗ ರಾಷ್ಟ್ರಮಟ್ಟಡ್ ಸೇವೆ ಮಲ್ಪರೆ ಎಂಕ್ ತಿಕ್ಕಿನ ಅವಕಾಶ ಪಂದ್ ದೆತ್ತೊಂಡೆ. ಉಂದು ಎಂಕ್ ಬೊಕ್ಕ ಧರ್ಮಸ್ಥಳ ಕ್ಷೇತ್ರಗ್ ತಿಕ್ಕಿನ ಮಾನಾದಿಗೆ ಪಂದ್ ಪಂಡೆರ್. ಶ್ರೀ ಮಂಜುನಾಥ ಸ್ವಾಮಿ ಬೊಕ್ಕ ಧರ್ಮದೇವತೆಲೆನ ಅನುಗ್ರಹ, ಕುಟುಂಬದ ಮಾತಾ ಸದಸ್ಯೆರೆನ ಸಕ್ರಿಯ ಸಹಕಾರ, ಜನತ ಪ್ರೀತಿ-ವಿಶ್ವಾಸ, ಶ್ರದ್ಧೆ ಬೊಕ್ಕ ಭಕ್ತಿರ್ದ್ ಯಾನ್ ಮಾತಾ ಕಜ್ಜೊಲೆನ್ ಯಶಸ್ವಿಯಾದ್ ಮಲ್ಪರೆ ಸಾಧ್ಯ ಆಂಡ್. ಬೇಧ-ಭಾವ ಮರತ್ ದ್ ಮಾತೆರ್ಲ ಪ್ರೀತಿ-ವಿಶ್ವಾಸರ್ದ್, ಸಮಾನತೆ ಬೊಕ್ಕ ಸಾಮರಸ್ಯದ ಜೀವನ ನಡಪಾಲೆ ಪಂದ್ ಆರ್ ಸಲಹೆ ಕೊರಿಯೆರ್.

ವಿಧಾನಪರಿಷತ್ ಸದಸ್ಯೆರ್ ಕೆ. ಹರೀಶ್‌ಕುಮಾರ್ ಪಾತೆರ್ದ್, ಶ್ರದ್ಧೆ-ಭಕ್ತಿರ್ದ್ ಮಲ್ತಿನ ಪಾದಯಾತ್ರೆಡ್ ಬಚ್ಚುನ ಆವಡ್ ಪೊರ್ತು ಪೋಯಿನ ಗೊತ್ತೇ ಆಯಿಜಿ. ಮಾತೆರೆಡ್ಲಾ ಉತ್ಸಾಹ, ಸಂತೋಷ ಬೊಕ್ಕ ನೆಮ್ಮದಿ ಇತ್ತ್ಂಡ್ ಪಂದ್ ಪಂಡೆರ್. ವಿಧಾನಪರಿಷತ್ ಸದಸ್ಯೆರ್ ಕೆ. ಪ್ರತಾಪಸಿಂಹ ನಾಯಕ್ ಪಾತೆರ್ದ್, ಕಲಿಯುಗಡ್ ಸಾತ್ವಿಕ ಶಕ್ತಿದ ಸಂಘಟನೆನೇ ಬಲ ಆತ್ಂಡ್. ಧರ್ಮಸ್ಥಳದ ಬಗೆಟ್ ಇಪ್ಪುನ ಗೌರವ ಬೊಕ್ಕ ಭಕ್ತಿರ್ದ್ ಪ್ರತಿವರ್ಷ ಪಾದಯಾತ್ರೆ ಸುಗಮ ಆವೊಂದುಂಡು ಪಂದ್ ಪಂಡೆರ್. ಹೇಮಾವತಿ ಹೆಗ್ಗಡೆ, ಉಜಿರೆದ ಶರತ್‌ಕೃಷ್ಣ ಪಡ್ವೆಟ್ನಾಯ, ಡಿ. ಸುರೇಂದ್ರಕುಮಾರ್, ಡಿ. ಹರ್ಷೇಂದ್ರಕುಮಾರ್, ಸುಪ್ರಿಯಾ ಹರ್ಷೇಂದ್ರಕುಮಾರ್, ಕು. ಮಾನ್ಯ, ಸೋನಿಯಾ ವರ್ಮ ಬೊಕ್ಕ ಪೂರಣ್ ವರ್ಮ ಇತ್ತೆರ್.ಶಾಸಕೆರ್ ಹರೀಶ್ ಪೂಂಜ ಪ್ರಾಸ್ತಾವಿಕ ಪಾತೆರ್ದ್ ಎದ್ಕೊನಿಯೆರ್. ಗ್ರಾಮಾಭಿವೃದ್ಧಿ ಯೋಜನೆ ದ ಸಿ.ಒ.ಒ. ಅನಿಲ್ ಕುಮಾರ್‌ ಸೊಲ್ಮೆ ಸಂದಾಯೆರ್. ಶ್ರೀನಿವಾಸ್‌ರಾವ್ ಧರ್ಮಸ್ಥಳ ಲೇಸ್ ದ ನಿರ್ವಹಣೆ ಮಲ್ತೆರ್. ಉಜಿರೆಡ್ ಶ್ರೀ ಜನಾರ್ದನ ಸ್ವಾಮಿ ದೇವಲ್ಯಡ್ ಶರತ್‌ಕೃಷ್ಣ ಪಡ್ವೆಟ್ನಾಯ ಬೊಕ್ಕ ಶಾಸಕೆರ್ ಹರೀಶ್ ಪೂಂಜ ಪಾದಯಾತ್ರೆ ಉದಿಪನ ಮಲ್ತೆರ್. ಧರ್ಮಸ್ಥಳ ಡ್ ಡಿ. ಹರ್ಷೇಂದ್ರಕುಮಾರ್ ಪಾದಯಾತ್ರಿಲೆನ್ ಎದ್ಕೊನಿಯೆರ್.

ಬ್ರಹ್ಮಶ್ರೀ ನಾರಾಯಣ ಗುರು ಬಿಲ್ಲವ ಸಮಾಜ ಸೇವಾ ಸಂಘ ಮಳಲಿ ವಲಯದ ಉದಿಪನ, ಪದ ಪ್ರದಾನ ಲೇಸ್ ದ ಲೆಪ್ಪೋಲೆ ಬುಡುಗಡೆ

ಬ್ರಹ್ಮಶ್ರೀ ನಾರಾಯಣ ಗುರು ಬಿಲ್ಲವ ಸಮಾಜ ಸೇವಾ ಸಂಘ ಮಳಲಿ ವಲಯದ ಉದಿಪನ ಬೊಕ್ಕ ಪದ ಪ್ರದಾನ ಲೇಸ್ ದ ಲೆಪ್ಪೋಲೆನ್ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಲ್ಯಡ್ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ನ.20 ಐತಾರದಾನಿ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಸಂಘದ ನಿಯೋಜಿತ ಗೌರವಾಧ್ಯಕ್ಷೆರ್ ವಿಶ್ವನಾಥ ಪೂಜಾರಿ, ಯೋಗೀಶ್ ಪೂಜಾರಿ, ಹರಿಶ್ಚಂದ್ರ ಬಿರಾವು, ನಿಯೋಜಿತ ಅಧ್ಯಕ್ಷೆರ್ ಕೇಶವ ಪೂಜಾರಿ ಮಟ್ಟಿ, ನಿಯೋಜಿತ ಉಪಾಧ್ಯಕ್ಷೆರ್ ಸದಾನಂದ ಪೂಜಾರಿ, ಕಾರ್ಯದರ್ಶಿ ಸಚಿನ್ ಸಾಲ್ಯಾನ್ ಮಟ್ಟಿ, ಕೋಶಾಧಿಕಾರಿ ಮೋಹನದಾಸ್, ಜತೆ ಕೋಶಾಧಿಕಾರಿ ದಯಾನಂದ ಪೂಜಾರಿ ಮಳಲಿ ಸೈಟ್, ಸಂಘಟನಾ ಕಾರ್ಯದರ್ಶಿ ನೀಲಯ್ಯ ಪೂಜಾರಿ, ಮಹಿಳಾ ಘಟಕದ ನಿಯೋಜಿತ ಕಾರ್ಯದರ್ಶಿ ವಾಣಿ ಕೈಕಂಬ, ಪ್ರಮುಖೆರ್ ಸದಾಶಿವ ಕರ್ಕೇರ, ಬಿಲ್ಲವ ಬ್ರಿಗೇಡ್‌ದ ಪ್ರಜ್ವಲ್ ದಂಡೆಕೇರಿ, ಕೃಷ್ಣ ಶಾಂತಿ, ರೂಪೇಶ್ ಶಾಂತಿ, ಚಂದ್ರಹಾಸ ಶಾಂತಿ ಇತ್ತೆರ್. ಅಂಚನೆ ಪೊಸ ಸಂಘದ ಉದಿಪನ ಡಿ.25ದಾನಿ ಮಳಲಿ ಮಟ್ಟಿ ಶ್ರೀ ಕಾಲಭೈರವ ಮಂಜುನಾಥೇಶ್ವರ ದೇವಲ್ಯದ ಕೈತಲ್ ನಡಪರೆ ಉಂಡು.

ಮುದ್ದು ಮೂಡುಬೆಳ್ಳೆ ಮೆರೆಗ್ ರಂಗ ಚಾವಡಿ ಪ್ರಶಸ್ತಿ ಪ್ರದಾನ

ಸುರತ್ಕಲ್ : ತುಳುನಾಡ್ ಡ್ ಸಾಹಿತ್ಯ, ಸಿನಿಮಾ, ನಾಟಕ ರಂಗ ಇಂಚ ಸಾಂಸ್ಕೃತಿಕ ಲೋಕೊಡು ಪುಗರ್ತೆ ಪಡೆಯಿನ ರಂಗ ಚಾವಡಿ ಕುಡ್ಲ ನೆತ್ತ 23 ನೇ ವರ್ಷದ ಉಚ್ಚಯ ಅಂಚೆನೆ 2022 ನೇ ವರ್ಷದ ರಂಗ ಚಾವಡಿ ಪ್ರಶಸ್ತಿ ಪಟ್ಟುನ ಲೇಸ್ ನ.20 ಐತಾರದಾನಿ ಸುರತ್ಕಲ್ ಬಂಟರ ಭವನ ಚಾವಡಿಡ್ ನಡತ್ಂಡ್.

ಹಿರಿಯ ನಾಟಕ ರಚನೆಕಾರೆರ್ ಡಾ.ಸಂಜೀವ ದಂಡೆಕೇರಿ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್. ಸಾಹಿತಿ, ಜನಪದ ಸಂಶೋಧಕೆರ್ ಆಯಿನ ಮುದ್ದು ಮೂಡುಬೆಳ್ಳೆ ಮೆರೆಗ್ 2022 ನೇ ವರ್ಷದ ರಂಗ ಚಾವಡಿ ಪ್ರಶಸ್ತಿ ನ್ ಪ್ರದಾನ ಮಲ್ತೆರ್. ರಂಗಕರ್ಮಿ ವಿ.ಜಿ.ಪಾಲ್ ಅಭಿನಂದನೆದ ಮದಿಪು ಪಂಡೆರ್.

ಲೇಸ್ ಡ್ ಮಲ್ಲ ಬಿನ್ನೆರಾದ್ ಯುವ ನಾಯಕೆರ್, ಸಮಾಜ ಸೇವಕೆರ್ ಇನಾಯತ್ ಅಲಿ, ಬಹುಭಾಷಾ ನಟೆ ಸುಮನ್, ರಂಗ ನಿರ್ದೇಶಕೆರ್ ಲಯನ್ ಡಿ. ಕಿಶೋರ್ ಶೆಟ್ಟಿ ,ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರೆ ಸುಧಾಕರ ಪೂಂಜ, ಕಾರ್ಪೊರೇಟರ್ ಕಿಶೋರ್ ಡಿ. ಶೆಟ್ಟಿ, ಉದ್ಯಮಿ ಗಿರೀಶ್ ಎಂ. ಶೆಟ್ಟಿ, ರಂಗ ಚಾವಡಿದ ಸ್ಥಾಪಕೆರ್ ಜಗನ್ನಾಥ ಶೆಟ್ಟಿ ಬಾಳ, ರಂಗ ನಿರ್ದೇಶಕೆರ್ ತಮ್ಮ ಲಕ್ಷ್ಮಣ, ಚಿತ್ರ ನಿರ್ಮಾಪಕೆರ್ ಧನರಾಜ್ ಇತ್ತೆರ್.
ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ಸುಧಾರಿಕೆ ಮಲ್ತೆರ್.

ನಮ್ಮಟಿವಿದ ಆಡಳಿತ ನಿರ್ದೇಶಕೆರ್ ಡಾ.ಶಿವ ಶರಣ್ ಶೆಟ್ರೆಗ್ ಮೈಸೂರ್ ರಾಜ ಯದುವೀರ ಕೃಷ್ಣದತ್ತ ಒಡೆಯರೆರ್ದ್ ಪ್ರಶಸ್ತಿ ಪ್ರದಾನ

ಪತ್ರಿಕೋದ್ಯಮಡ್ ಸಂದಾಯಿನ ಸೇವೆಗಾದ್ ಕರ್ನಾಟಕ ಪ್ರೆಸ್ ಕ್ಲಬ್ ಕೌನ್ಸಿಲ್ ವತಿರ್ದ್ ದುಬೈಡ್ ಕೊರ್ಪುನ ಅಂತರಾಷ್ಟ್ರೀಯ ‘ವಿಶ್ವ ಮಾನ್ಯ’ ಪ್ರಶಸ್ತಿಗ್ ನಮ್ಮ ಟಿವಿದ ಮುಖ್ಯಸ್ಥೆರ್ ಡಾ.ಶಿವಶರಣ್ ಶೆಟ್ರ್ ಆಯ್ಕೆ ಆತೆರ್.

ಮೇರೆಗ್ ಈ ಪ್ರಶಸ್ತಿನ್ ಮೈಸೂರ್ ರಾಜ ಯದುವೀರ ಕೃಷ್ಣದತ್ತ ಒಡೆಯರ್‌ ಮೇರ್ ಇಂಚೊಗು ಪ್ರದಾನ ಮಲ್ತೆರ್.

ವಿಶ್ವಹಿಂದು ಪರಿಷದ್ ಬಜರಂಗದಳ ಸಿಂತಾನಿಕಟ್ಟೆ ಪೂಪಾಡಿಕಟ್ಟೆ, ಬಂಟ್ವಾಳ ಪ್ರಖಂಡ ಘಟಕದ ಮುತಾಲಿಕೆಡ್ ಪೊಸ ಭಜರಂಗಿ ಪೀಠ ಉದಿಪನ

ಬಂಟ್ವಾಳ: ವಿಶ್ವ ಹಿಂದು ಪರಿಷದ್ ಬಜರಂಗದಳ ಸಿಂತಾನಿಕಟ್ಟೆ ಪೂಪಾಡಿಕಟ್ಟೆ, ಬಂಟ್ವಾಳ ಪ್ರಖಂಡ ಘಟಕದ ಮುತಾಲಿಕೆಡ್ ಪೊಸ ಭಜರಂಗಿ ಪೀಠದ ಉದಿಪನ ಲೇಸ್ ನಡತ್ಂಡ್.

ಈ ಲೇಸ್ ದ ಉದಿಪನನ್ ಭಜರಂಗದಳ ಪ್ರಾಂತ ಸಹಸಂಯೋಜಕೆರಾಯಿನ ರಘು ಜೀ ಸಕಲೇಶಪುರ, ಜಿಲ್ಲಾ ಸಂಚಾಲಕೆರಾಯಿನ ಭರತ್ ಕುಮುಡೆಲ್, ಗುರುರಾಜ್ ಬಂಟ್ವಾಳ, ಪ್ರಸಾದ್ ಕುಮಾರ್ ರೈ, ಮಲ್ತೆರ್.

ಭಜರಂಗಿ ಪೀಠದ ಮಹತ್ವನ್ ರಘು ಜೀ ಸಕ್ಲೇಶಪುರ ಕಾರ್ಯಕರ್ತೆರೆಗ್ ತೆರಿಪಾಯೆರ್. ಬೊಕ್ಕ ಸುಮಾರ್ ಸಾಮಾಜಿಕ ರಂಗಲೆಡ್ ಸಾಧನೆ ಮಲ್ತಿನ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಗ್ ಬಾಜನರಾಯಿನ ವೆಂಕಪ್ಪ ನಲಿಕೆ ಮೆರೆಗ್ ತಮ್ಮನ ಮಲ್ತೆರ್.

ಈ ಪೊರ್ತುಡು ಬಂಟ್ವಾಳ ಪ್ರಖಂಡ ಸಂಚಾಲಕೆರ್ ಶಿವಪ್ರಸಾದ್ ತುಂಬೆ, ಸಂತೋಷ್ ಸರಪಾಡಿ, ಅಭಿನ್ ರೈ, ಪ್ರವೀಣ್ ಕುಂಟಾಳಫಲ್ಕೆ ಇತ್ತೆರ್.

ಶ್ರೀ ದೈವರಾಜ ಬಬ್ಬುಸ್ವಾಮಿ ಭಕ್ತೆರ್ ಕೂಟದ ಮುಖೇನ ಸಮಾಜ ಸೇವೆ

ಶ್ರೀ ದೈವರಾಜ ಬಬ್ಬುಸ್ವಾಮಿ ಭಕ್ತೆರ್ ಪನ್ಪುನ ತಂಡದ ಮುಖೇನ ಸಮಾಜ ಸೇವಾ ಮನೋಭಾವದ ಜವನೆರ್ನ ಕೂಟದಕುಲು ಶ್ರೀ ಬಬ್ಬುಸ್ವಾಮಿನ ಪುದರ್ ಡ್ ಸಮಾಜಮುಖಿ ಸೇವೆ ಮಲ್ಪರೆ ಪಿದಾಡ್ದೆರ್.

ನೆಕ್ಕಾದ್ ಎಡ್ಡೆ ಉಡಲ್ ದ ದಾನಿಲೆಡ ಪ್ರತಿ ದಿನಕ್ 1/- ರೂ. ಇಜ್ಜಿಂಡ ತಿಂಗೊಲ್ ಗ್ 30/- ರೂ.ದ ಲೆಕ್ಕ ದೆತೊಂದು, ಪ್ರತಿ ತಿಂಗೊಲ್ದ ಅಕೆರಿಗ್ ಒಟ್ಟಾಯಿನ ಕಾಸ್ ನ್ ಕಷ್ಟಡ್ ಇಪ್ಪುನ ಬಡಪತ್ತ್ ಕುಟುಂಬದಕ್ಲೆಗ್ ಪಣವುದ ಸಕಾಯ ಮಲ್ಪೆರೆ ನಿರ್ಧಾರ ಮಲ್ದ. ನಿಕುಲು ಮಾತ ಈ ಪುಣ್ಯ ಕಾರ್ಯಗ್ ಸಹಕಾರ ಕೊರೊಡು. ಅಂಚನೆ ನಿಕ್ಲೆನ ಸಕಾಯನ್ ಬ್ಯಾಂಕ್ ಅಕೌಂಟ್ ಗ್, ಗೂಗಲ್ ಪೇ, ಫೋನ್ ಪೇ ಇಜ್ಜಿಂಡ ಒವ್ವೇ ಯುಪಿಐ ವ್ಯವಹಾರದ ಮುಖೇನ ಕಾಸ್ ಕೊರೊಲಿ ಪಂದ್ ಶ್ರೀ ದೈವರಾಜ ಬಬ್ಬುಸ್ವಾಮಿ ಭಕ್ತೆರ್ ತಂಡದ ಅಧ್ಯಕ್ಷೆರ್ ರವಿ ಪಂಪ್ ವೆಲ್, ಕಾರ್ಯದರ್ಶಿ ಶ್ರೀಧರ ನಾಯ್ಕ ಮಾಣಿ, ಜೊತೆ ಕಾರ್ಯದರ್ಶಿ ರೇಷ್ಮಪೂಜಾರಿ ಲೆಪ್ಪೋಲೆಡ್ ತೆರಿಪಾದೆರ್.